Read Ngomba Mɑ́lɛ́kúshi 7 Bible Online

Mɑ́lɛ́kúshi 7 - Ngomba bible

Mɑ́lɛ́kúshi 7

¹Ɛ́ pɔ́ yɛcɔ́ lɛ́Ꞌ, pɛcɔ́ pʉɔ pi pɔ́p fúnɛ Yɛlúsɑlɛm tɔ́ ńcúꞋlɛ nɛjɔ́ŋ Yɛ́su, ḿbɔ́ pɑfɑlísɑy pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ,

²ńjʉ́ɔ ɡɑŋku-Yɛ́su pɔ́ ńjʉ́ yúu nɛ́ lɔ́Ꞌ nǔu mbɔ́ mɔ́p, mbɔ́ mi pɔ́p kɑ́ suk.

³Pɑfɑlísɑy pɔ́p pɑyúdɑ tsʉʉ lɔɔ kwɛ́t yúu kɛ́ piitɛ ńzɑtɛ ŋki nǔu mbɔ́ mɔ́p tɛ ŋ́kúu nǔu ŋkwɛn-pɔ́ yɔ́p, pɑꞋ ńnɔŋ pʉɔ-ŋkɑ́mbi sɛ́ ḿbíkŋɛ pɔ́,

⁴ŋ́ɡʉ mɛntɑ́ɑ tɛ ḿbɛn, ḿbiitɛ ńcẅɛɛtɛ lɔ́Ꞌ nǔu pɔ́p, lɑ́ ńjʉ́ yúu. Pɔ́p pɛn ŋ́ɡẅɛɛ mɛcɔ́ mɛnɛpʉ́ʉ tɛ ɛ́ zɑ́ɑ, mi nɔŋŋɡɔŋ kɑ zɑ́pnɛ, ńdɔk ńnyɛt wɔ́p nɛ́ ntɛ́ nɛsuk lɔ́Ꞌ nǔu mɛntúꞋ mbɑ nǔu mɛkʉŋ, mbɑ nǔu mɛkɑ́ŋ, (tɛ mbɑ nǔu mɛkúu).

⁵Ɛ́ lɛɛ pɔ́Ꞌɔ, lɑ pɑfɑlísɑy pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ ɛ̂wɑ́ píkŋɛ Yɛ́su ŋɡɔ: «Gɑŋku pú jʉ́ yúu nɛ́ lɔ́Ꞌ nǔu mbɔ́ mɔ́p. Pɔ́p kɑ́ nɛn nǔu nɔŋ-pʉɔ-ŋkɑ́mbi pɔ́ ńdɔk ŋ́ɡɛ pɑꞋɑ?»

⁶Yɛ́su tsɔ́Ꞌ mbɔ̌ pɔ́p ŋɡɔ: «Pʉʉ pɑŋkɔŋ-mík.» Ɛsɑ̌yɑ, Ŋɡɛ́mndʉ̈ɔꞋ-Sɛ́ kɑ pɔ́ fɑ́ɑ ńcú pɛꞋnɛ sẅíinu, pɑꞋ ɑ kɑ ŋwɑꞋnɛ ntɛ́ mɑt wʉʉ ńcú ŋɡɔ: «Pʉɔ pɔ́nɛ lɔk pɔ ndɑꞋ ntsu wɔ́p ŋ́ɡɛ́mtɛ wɑɑ, tʉ́m yɔ́p kɑ́ pɔ́ nǔu mɔ pɔ́.

⁷Pɔ́p sɛ́ ŋ́ɡúꞋlɛ wɑ́ɑ, lɑ́ nu pɔɔ nǔu pɔ́, ntɛ́ nu yi pɔ́p sɛ́ ńzíꞋ mɛnu-pʉɔmɛsɔŋ mbɔ̌ pʉɔ ŋɡɔ ɛ́ nu yɑ́ɑ[6].»

⁸Yɛ́su cú mbɔ̌ pɔ́p ŋɡɔ: «Ɛ́ yɛ́tɛ́ yi pʉʉ pɑꞋnɛ nɛpʉ́ʉ-Sɛ́ ŋ́ɡɑ́ nzʉʉ, ńtsʉ́ꞌ ŋ́ɡẅɛɛ pɔ nɛ́ pʉɔmɛsɔŋ lɑ́.»

⁹Pʉʉ jí nɛmɛꞋ nɛpʉ́ʉ-Sɛ́, ńtsuŋ ŋ́ɡẅɛɛ pɔ nɔŋ-lɑ́Ꞌ wʉʉ sʉ́Ꞌnɛ.

¹⁰N cú mbíꞌŋɡɔ Mɔ̌sɛ̂ɛ kɑ cú ŋɡɔ: «Gɛ mɛkuꞋ-tɑ́t wu pɔ́p mɑ́ wu, ḿbɛn ńcú ŋɡɔ ŋu lɑɑ ńzɔɔtɛ tɑ́t wɛ kɛ pɔ mɑ́ wɛ ɔɔ, pɛ́ jẅí ŋɡɑŋ[7].»

¹¹Lɑ́ ɛ́ ɡʉ nǔu pʉʉ, pʉʉ cú yʉ́ʉ ŋɡɔ: Ŋu lɑɑ ńcú mbɔ̌ tɑ́t wɛ kɛ mɑ́ wɛ ɔɔ ŋɡɔ: «Kʉ̈ɔ́ lɑ́ yi ɛ́ lɑɑ ḿbɔ́ ɑ lɔk ńcẅɛ́lɛ́ wɛ́ tsʉ́Ꞌ ḿbɔ́ pɔ Kɔlbɑn, ńdɔk ńcú ŋɡɔ: Ɛ́ tsʉꞋ yɛ́ Sɛ́,

¹²mbɔ pʉʉ ɡʉ ḿbɛ́m ŋɡɔ ɑ kɑ́ pɛn ŋ́ɡẅɛɛ nɛcẅɛ́lɛ tɑ́t wɛ pɔ́p mɑ́ wɛ pɔ́.»

¹³Pʉʉ zíꞋ nɔŋ-lɑ́Ꞌ wʉʉ pɔ́Ꞌɔ, ńdɔk ḿmɛꞋ sẅíŋɛ-Sɛ́. Pʉʉ pɛn ḿbɔ́ ŋ́ɡɛ lii-mɛnu ɛ̂mɑ́ tɛ ɛ́ zɑ́ɑ zɑ́ɑnɛ.

¹⁴Yɛ́su pɛn ɛ́fúŋ lɑ́Ꞌ ńcú mbɔ̌ pɔ́p ŋɡɔ: Pʉʉ pɛtsʉʉ ńtʉ̈ɔ́ŋɛ mɛtúutɛ́, ńtsuŋ ńzúꞋ nu yí ŋ ɡʉ ńcú.

¹⁵Yɛcɔ́ yúu mi ḿbɔ́ ɛ́ fú nzɛmpíi, ŋ́kúu nǔu ŋu tɛ ńníꞋ lɔ́Ꞌ nǔu wɛ́ kɑ́ pɔ́ ɡú pɔ́, yi ɛ́ fúnɛ tsɛt tʉ́m yɛ́ níꞋnɛ lɔ́Ꞌ nǔu wɛ́.

¹⁶[Ŋu lɑɑ ŋ́ɡẅɛɛ mɛtúutɛ́ nɛlɔk ńzúꞋ nu, ɑ zúꞋ.]

¹⁷Yɛ́su ɡɛ ńnɑ́ lɑ́Ꞌ, ŋ́ɡʉ tɛ ŋ́kúu ndɑ́, ɡɑŋku pɛ́ píkŋɛ wɛ́ ŋɡɔ ɑ kyɛ́Ꞌtɛ nu yi ɑ fúnɛ nɛcú, ɛ́sẅíi wɔ́p.

¹⁸A cú mbɔ̌ pɔ́p ŋɡɔ, ńjí ŋɡɔ yʉ́ʉ jínu pɛ́t túꞌ tuꞋnɛ pɑꞋ yɛ́ pɛcɔ́ pʉɔ pʉ́ɔ? Yúu mi ɛ́ fúnɛ nzɛmpíi ŋ́kúu nǔu ŋu, kɑ́ níꞋ lɔ́Ꞌ nǔu wɛ́ pɔ́.

¹⁹Ɛ́ kɑ́ kúu tsɛt tʉ́m ŋɡɑŋ pɔ́, ɛ́ kúu pɔ tsɛt nɛpɛm nɛ́, ńcẅɛt ŋ́kúu tsɛt kɔt. Yɛ́su lɔk ńcú ŋɡɔ: yúu mi pɛ́ jʉ́ jʉ́nɛ kɑ́ pɔ́ yi ɛ́ mbi Sɛ́ ḿbɔ́ yi ɛ́ níꞋnɛ lɔ́Ꞌ nǔu ŋu pɔ́,

²⁰ḿbɛn ńcú ŋɡɔ, yúu mi ɛ́ cẅɛtnɛ tʉ́m ŋu níꞋnɛ lɔ́Ꞌ nǔu wɛ́.

²¹Mɛkwɑŋɛ kɛpɔŋ fú pɔ tsɛt tʉ́m ŋumɛsɔŋ, lɑ́ ńtsʉ́ʉnɛ mbɛ́ɛnɛ pɔ́p lɔɔ pɑŋɡɛ́, pɑŋɡɛ́ lɔɔ mbɛ́ɛnɛ, ńtsʉ́ʉnɛ ŋu ɑ pɔ́ ńjɔ, ńtsʉ́ʉnɛ ŋu ɑ jẅí wɛcɔ́,

²²ḿbɔ́ ŋ́ɡɛ ɡɑ́ɑ, ḿbɔ́ ŋ́ɡẅɛɛ kɛ́ɡʉ̈ɔꞋ, ŋ́ɡẅɛɛ shíshí tʉ́m, ŋ́ɡẅɛɛ fúklɛ, ŋ́kúu nɛjúk kɛpɔŋ, ŋ́kɔ́Ꞌ lɔ́ŋ, ńtík sɔ́ɔ tú-ŋu, ŋ́ŋɑ́Ꞌ mbʉʉ, ńdʉꞋ ntík tsʉʉ.

²³Ŋɡɔŋ mɛnu kɛpɔŋ mɔnɛ cẅɛt pɔ tsɛt tʉ́m ŋumɛsɔŋ, lɑ́ ńníꞋ lɔ́Ꞌ nǔu wɛ́.

²⁴Yɛ́su ɡɛ ɛ́fú zúꞋu ŋ́ɡʉ nǔu yɛcɔ́ pɑk-ŋɡɔŋ, shʉ́ tísɔŋ-Til, ŋ́kúu tsɛt yɛcɔ́ ndɑ́, ŋ́kɛ́ ḿbɔɔ ḿbɔ́ ŋ́kɔŋ ŋɡɔ pɛ́ jí ŋɡɔ ɑ zúꞋu pɔ́. Lɑ́ pɛ́ kɛ́ ńjí jínɛ.

²⁵Wɛcɔ́ mɑŋɡɛ́ pɔ́ yɛ́ zúꞋu, mbɔ zẅikŋɛ kɛpɔŋ kɑ ɡẅɛɛ mɔ́ɔ nɛ wɛ mɑŋɡɛ́, ḿbɔ́ ḿbúunɛ wɛ́. A zúꞋ yɛ́ pɛ́ cú ŋɡɔ Yɛ́su tɔ́, ɑ nɑ́ɑtɛ yɛ́, ńnɔɔ mɛku wɛ́,

²⁶ḿbuꞋ mbɔ́ mbɔ̌ wɛ́ ŋɡɔ ɑ zuŋ zẅikŋɛ kɛpɔŋ ɛ̂yɑ́, ɑ nɑ́ mɔ́ɔ nɛ. Mɑŋɡɛ́ ɛ̂wɑ́ kɑ pɛn ḿbɔɔ mɔ́ɔ-Yúdɑ pɔ́. A kɑ pɔ́ mɔ́ɔ-Fɛ́nisi, tsɛt ŋɡɔŋ-Silii.

²⁷Yɛ́su tsɔ́Ꞌ mbɔ̌ wɛ́ ŋɡɔ: «Zɛɛ ńzẅíꞋlɛ mbɔ́ŋkʉ̈ɔ́ jʉ́ yúu tɛ ńzwɛ́t, ɛ́ kɑ́ pɔŋ nɛcẅɛ́ɛ yúu pɛjʉ́ mbɔ́ŋkʉ̈ɔ́ ḿmɑꞋ mbɔ̌ pɔ́ɔ-mvú pɔ́.»

²⁸Mɑŋɡɛ́ ɛ̂wɑ́ pʉ̈ɔt ŋɡɔ: «Tsɑpʉɔ, ɔ cú ɛ́sẅíi nu, lɑ́ pɔ́ɔ-mvú kɛ ńdɑklɛ mɛsɑɑ-yúu mi mbɔ́ŋkʉ̈ɔ́ sɛ́ ŋ́kwɛ́t yúu, ɛ́ vutɛ sɛ́.»

²⁹Yɛ́su cú mbɔ̌ wɛ́ ŋɡɔ: «N zúꞋ ntɛ́ yi ɔ lɔknɛ ńtsɔ́Ꞌ, fɛ́Ꞌnɛ ŋ́ɡʉ, ɛ́ lɛɛ nǔu sẅiŋɛ yú, zẅikŋɛ kɛpɔŋ fú nǔu mɔ́ɔ nu ńcẅɛt.»

³⁰A pɛn njɛ́Ꞌ yɛ́ ńjʉ́ɔ, mɔ́ɔ pɔ́tnɛ ńnɔɔ ndǔ kúu mbɔ zẅikŋɛ kɛpɔŋ fú nǔu wɛ́ ńcẅɛt.

³¹Yɛ́su fú Til, ḿbɔ́ ḿbɛn nɛ́ mbʉʉ Mí-Ŋɡɑlilɛɛ, ńdɔk wɛ́ tʉsɔ́ŋ-Sidɔŋ, ḿbɔ́ ńdɛɛ tsɛt pɑk-lɑ́Ꞌ-mɛtʉ́sɔŋ nɛɡɛ́m.

³²Pɛ́ lɔk wɛcɔ́ ŋu ńtɔ́ mbi yɛ́, ɑ pɔ́ mbúꞋ-mɛtúutɛ́, ḿbɛn ḿbɔɔ jí nɛsẅíŋɛ tɛ ɛ́ cẅɛt pɔ́, pɛɡɑŋ puꞋ mbɔ́ mbɔ̌ Yɛ́su ŋɡɔ ɑ zɑ́p mbɔ́ mɛ́ nǔu wɛ́ ɑ fíitɛ,

³³Yɛ́su lɔk wɛ́ ɛ́fú tsɛt nɔɔ-pʉɔ ńcẅɛt, ńníꞋ pɔ́ɔ-tɔ̂mbɔ́ pɛ́ tsɛt mɛtúutɛ́ mɛ́, ńtsɛp tɔ̂pɔ́ wɛ nɛ́ mɛ́tɛ́, ńzɑ́p nǔu lʉ́m yɛ́,

³⁴ŋ́ɡɔ́ɔ ŋ́kɛ́ ḿbʉꞋ mík mɛ́ ńdíŋɛ tʉ́, ńjẅi, ńcú ŋɡɔ: «Ɛfɑtɑ!» Ńdɔk ńcú ŋɡɔ: «Tsɔ́Ꞌnɛ!»

³⁵Mɛtúutɛ́ mɛ́ ɡɔ́ɔ ńtsɔ́Ꞌnɛ, lʉ́m yɛ́ kíɛꞋnɛ, ɑ zɛ nɛcú nu kɛ́ mʉꞋ.

³⁶Yɛ́su cú mbɔ̌ pʉɔ pi pɔ́p lɑ́Ꞌnɛ ńdɔk wɛ́ ńtɔ́ ŋɡɔ: «Kɔɔ pʉʉ cú tɛ ŋu zúꞋ.» Lɑ́ ŋ́kɛ́ ḿbɔ́ ńtɔꞋ wɔ́p ŋɡɔ́ku lɑ́, pɔ́p kɛ́ ḿbɔ́ ɛ́sɑ́Ꞌ yɔ nu sɑ́Ꞌnɛ.

³⁷Pʉɔ tsʉʉ pɔ́ ńzúꞋ, ḿmɑɑ tɛ ńcú ŋɡɔ ɑ ɡɛ yɛ́ mbɑ kʉ̈ɔ́ lɑ́, ɛ́ pɔ́ pɔ sʉ́Ꞌnɛ. A ɡɛ pɛ́ mbúꞋ-mɛtúutɛ́ zúꞋ nu, mbɑ pɛ́cípuꞋ pɛn ɛ́sẅíŋɛ.