Read Ngomba Mɑ́lɛ́kúshi 9 Bible Online

Mɑ́lɛ́kúshi 9 - Ngomba bible

Mɑ́lɛ́kúshi 9

¹Yɛ́su pɛn ńcú mbɔ̌ pɔ́p ŋɡɔ: «Ɛ sẅíi wʉʉ, kwɑꞋ nɛ́nẅín, ŋɡɔ pɛcɔ́ ntɑ́Ꞌ nǔu pʉɔ pí pɔ́p zɑ́Ꞌnɛ ŋkɔ̂ɔnɛ kɛ́ ɡɛ ḿpfú kɛ́ pɔ́ yi pɔ́p lɔk mík ńjʉ́ɔ Nɛfɔɔ-Sɛ́ pɑꞋ ɛ́ tɔ́nɛ nɛ́ nɛŋwɑ́ŋɛ wɛ pɔ́.»

²Ɛ́ lɛɛ lɛ́Ꞌ pɛ́nɛ́túkú, Yɛ́su fɑk Pyɛ̂ ŋ́ɡɛ Jɑ̂k pɔ́p Jɑ̂ŋ, ńdɔk wɔ́p ŋ́ɡʉ ŋ́kɔ́Ꞌ ndǔ yɛcɔ́ mɑ́mɑ́ nɛŋkɔ́Ꞌ. Pɔ́p pɛ́pɔ́p pɔ́ zúꞋu zɛ́nɛ pɔ́p, pɔ́p ɡɔ́ ńdíŋɛ, lii yɛ́ shɔtnɛ.

³Mɛndẅí mɛ́ tsʉꞋ ŋ́ŋwɑŋɛ ŋwɑŋɛ́nɛ, fúk tɛ yɛcɔ́ yúu mi ɛ́ lɑɑ ḿbɔ́ ŋu lɔk ɛ́suk ndẅí ndǔ tsɛ́tsɑ́Ꞌ tɛ ɛ́ fúk pɔ́Ꞌɔ, kɑ́ pɔ́ ɡú pɔ́.

⁴Gɑŋku-Yɛ́su píipɑ́ pɛtɑ́t jʉ́ɔ, mbɔ Ɛlíyɑ pɔ́p Mɔ̌sɛ̂ɛ cẅɛt ńtʉ́ʉ, pɔ́p pɛ́ Yɛ́su pɔ́ ɛ́sẅíŋɛ.

⁵Pyɛ̂ ɡɔ́ɔ ḿvukŋɛ vukŋɛnɛ ńcú mbɔ̌ Yɛ́su ŋɡɔ: «Tɑ̌ɑ wɛk, ɛ́ pɔŋ pɑꞋ pɛkŋɛ zɑ́Ꞌnɛ lɑɑ. Pɛ́m pɛk nʉk mɛtɑp mɛ́ntɑ́t, tɑꞋ pɔ́ wú, tɑꞋ pɔ́ wɛ Mɔ̌sɛ̂ɛ, wɛcɔ́ pɔ́ wɛ Ɛlíyɑ.»

⁶A kɑ pɔ́ ńtsʉ́ꞌ ńcú yɛ́ pɑꞋnɛ, lɑ́ ḿbɔɔ ńjí yúu mi ɑ cúnɛ yɛ́tɛ́ pɔ́, mbɔ cʉɔꞌ ɡẅɛɛ wɔ́p tɛꞋ.

⁷Pɔ́p ɡɔ́ ńjʉ́ɔ, yɛcɔ́ lɑ́ɑ cúŋ, ŋ́kẅíipɛ wɔ́p. Ŋɡi-ŋu fú tsɛtú ńcú ŋɡɔ: «Yɔ Mɔ́ɔ wɑɑ, ŋ kɔŋ wɛ́ tɛꞋ. Pʉʉ zúꞋ ntsu wɛ́,»

⁸ŋ́ɡɔ mɛkŋɛ, ɡɑŋku-Yɛ́su pɔɔ kíi ńjʉ́ɔ pɛcɔ́ pʉɔ pɔ́, ndɑꞋ pɔ́p pɛ́ Yɛ́su tsʉ́Ꞌnɛ ḿbɔ́.

⁹Pɔ́p pɛ́pɔ́p ɡɛ ḿbɔ́ ɛ́fú ndǔ nɛŋkɔ́Ꞌ ńcúŋ, ɑ tɔꞋ wɔ́p ŋɡɔ kɔɔ pɔ́p kíɛꞋ yúu mi pɔ́p jʉ́ɔnɛ lɑ́, tɛ ńdɑ́Ꞌ ŋ́kúu ŋkɑ́ yi Mɔ́ɔ-Ŋu ńzẅíimɛ nǔu nɛvú.

¹⁰Pɔ́p pɛ́m pɑꞋ ɑ cúnɛ pɔ́Ꞌɔ, ŋ́kɛ́ ḿbɔ́ ḿbíkŋɛ tsɛtsɛt pɔ́p pɔ ŋɡɔ: «A cú ŋɡɔ ńzẅíimɛ nǔu nɛvú, ńzẅíimɛ nǔu nɛvú ńdɔk ńcú ŋɡɔ kʉ̈ɔ́?»

¹¹Pɔ́p pɛn ḿbíkŋɛ Yɛ́su ŋɡɔ: «Tɛ pɑkyɛ́Ꞌtɛ nɛpʉ́ʉ-Mɔ̌sɛ̂ɛ cú ŋɡɔ Ɛlíyɑ ɡʉ ńdɑ́Ꞌ ḿbiitɛ ńtɔ́ pɛ́Ꞌɛ mɛlɑ́Ꞌ kʉ̈ɔ́?»

¹²A pʉ̈ɔt mbɔ̌ pɔ́p ŋɡɔ: «Ɛ́ nu, ŋɡɛ́mndʉ̈ɔꞋ-Sɛ́ Ɛlíyɑ ńdɑ́Ꞌ ḿbiitɛ ńtɔ́ nɛzɑ́p mbɑ kʉ̈ɔ́ lɑ́ nǔu yɛ́ zʉꞋ, ńzɛɛ ŋ́ɡɔ ḿbɔ́, mbɔ pɑꞋ pɛ́ kɑ pɛnnɛ ŋ́ŋwɑꞋnɛ tsɛt ŋwɑꞋnɛ-Sɛ́ ŋɡɔ: Mɔ́ɔ-Ŋu ɡʉnɛ ńdɑ́Ꞌ ńjʉ́ɔ ŋɡʉ̈ɔ́Ꞌ tɛꞋ, pɛ́ kʉʉnɛ wɛ́, pɛ́ ŋwɑꞋnɛ pɔ́Ꞌɔ, ńdɔk ńcú ŋɡɔ kʉ̈ɔ́?»

¹³Lɑ́, ɛ sẅíi wʉ́ʉ pɑꞋɑ, mbɔ Ɛlíyɑ ɛ̂wɑ́ kɑ kɛ́ mɔ́ ńtɔ́, pʉɔmɛsɔŋ ɡɛ nǔu wɛ́ pɑꞋ pɔ́p kɔŋnɛ, ɛ́ pɔ́ ndʉ́ŋndʉŋ pɑꞋ pɛ́ kɑ ŋwɑꞋnɛnɛ tsɛt ŋwɑꞋnɛ-Sɛ́ ntɛ́ wɛ́.

¹⁴Yɛ́su ɡɔ́ ḿbɛn nzʉʉ zʉꞋ yí pfuꞋ ɡɑŋku pɛ́ zúꞋu, ńjʉ́ɔ lɑ́Ꞌ tʉ̈ɔ́Ꞌlɛ wɔ́p ńníꞋ sɔŋ, ɡɑŋku pɛ́ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́ zúꞋu ńzɔŋ yɛcɔ́ nu.

¹⁵LɑꞋ pɔ́ tɛ ńjʉ́ɔ Yɛ́su cẅɛt nǔu pɔ́p, pɔ́p ńnɑ́ɑtɛ ŋ́ɡʉ ńcɛꞋlɛ wɛ́.

¹⁶A pɛn ḿbíkŋɛ ɡɑŋku pɛ́ ŋɡɔ pɔ́p zɔŋ kʉ̈ɔ́ ɔɔ?

¹⁷Wɛcɔ́ ŋu cẅɛt tsɛtsɛt lɑ́Ꞌ, ńtsɔ́Ꞌ mbɔ̌ wɛ́ ŋɡɔ: «Ndɛ, n dɔk mɔ́ɔ wɑɑ ńtɔ́ nɛjʉ́ɔ wú. Ɛ́ pɔ́, mbɔ zẅikŋɛ kɛpɔŋ kɑ ɡẅɛɛ wɛ́, tsɛ́t ntsu wɛ́.

¹⁸Zẅikŋɛ kɛpɔŋ ɛ̂wɑ́ lɑɑ ḿbɔ́ ńdɔ sɛ́ nǔu wɛ́, ɑ pɔ́ ɡɔ́ lɑ́, ɛ́ tíi wɛ́ ḿmɑꞋ pɔ sɛ́, ɑ tɛn, ɛ́fuꞋ mɛ́tɛ́, ŋ́kwɛ́t mɛsɔŋ mɛ́. N tɔ́ pɑꞋnɛ, ḿbuꞋ mbɔ́ mbɔ̌ ɡɑŋku pú ŋɡɔ pɔ́p zuŋ zẅikŋɛ kɛpɔŋ ɛ̂wɑ́, pɔ́p pɔɔ nǔu kuꞋ.»

¹⁹Yɛ́su cú mbɔ̌ pɔ́p ŋɡɔ: «Ɛ́ kʉ̈ɔ́ pʉʉ pɔɔ ńzɑ́p tʉ́m nǔu Sɛ́ pɔ́, ɛ́ pɑꞋɑ mɔ ńdɑ́Ꞌ ńnɑ́ŋ tsɛtsɛt pʉʉ tɛ ŋ́kúu shʉ́nɛ lɑ́ pʉʉ zɑ́p tʉ́m yʉ́ʉ nǔu Sɛ́? Ŋ ɡʉ ńdɑ́Ꞌ sʉk nǔu mɛnu mʉ́ʉ tɛ ŋ́kúu pɔ shʉ́n? Pʉʉ lɔk mɔ́ɔ ɛ̂wɑ́ ńtɔ́, ŋ́ɡɑ́ mbɔ̌ mɔ.»

²⁰Pɛ́ lɔk wɛ́ ńtɔ́ ŋ́ɡɑ́ mbɔ̌ wɛ́, zẅikŋɛ kɛpɔŋ ɛ̂yɑ́ zúꞋ jɑ́k-Yɛ́su, ńtíi mɔ́ɔ ɛ̂wɑ́ ńtɛ́m sɛ́, ɑ kɑtnɛ sɛ́, ńzɛ nɛfuꞋ mɛ́tɛ́.

²¹Yɛ́su píkŋɛ Tɑ́-mɔ́ɔ ŋɡɔ: «Yɔ ɡɔɔ pɑꞋɑ ḿbɔ́ nǔu mɔ́ɔ tɛ ɛ́fú shʉ́n?» A cú ŋɡɔ: «Tɛ ɛ́fú ŋkɑ́ mbɔ́ŋkʉ̈ɔ́.»

²²A pɛn ḿbɔ́ tɛ zẅikŋɛ kɛpɔŋ ɛ̂yɑ́ ɡẅɛɛ wɛ́, ḿbɔ́ ḿmɑꞋ wɛ́ ɡɔ́ lɑ́, ḿmɑꞋ mɑꞋnɛ, kɛ tsɛt múk ɔɔ, kɛ tsɛt ŋki ɔɔ, ńdɔɔ pɔ shʉ́ nɛ́ kɛ́ ńjẅí wɛ́ jẅínɛ. Sɛ́sẅíi tsɑ́ɑ mɛjʉ́ŋ mɛ́k, ńcẅɛ́lɛ́ wɛ́k, ŋ́ɡɛ ɑ fíitɛ pɑꞋ ɔ lɑɑ ŋ́kuꞋ.

²³Yɛ́su pɑꞋ yɛ́ ŋɡɔ: «Ɔ pɛn ŋɡɔ pɑꞋ ɔ lɑɑ ŋ́kuꞋ ŋɡɔ ku? Nu kɑ́ tsɑ ŋu ẅí ɑ zɑ́pnɛ tʉ́m nǔu Sɛ́ pɔ́.»

²⁴Tɑ́-mɔ́ɔ ɡɔ́ɔ fɛ́Ꞌnɛ ńcú ŋɡɔ: «Ɔ́ɔŋ! N zɑ́b tʉ́m yɑ́ɑ nǔu Sɛ́, cẅɛ́lɛ́ wɑ́ɑ, ŋ kẅiꞋ ńzɑ́p tʉ́m nǔu wɛ́.»

²⁵Yɛ́su jʉ́ɔ, lɑ́Ꞌ pɔ́ ńnɑ́ɑtɛ ŋ́kẅiꞋ ńtɔ́ tɔ́nɛ, ɑ cʉ́ɔk zẅikŋɛ kɛpɔŋ ɛ̂wɑ́, ńcú ŋɡɔ: «Gu zẅikŋɛ kɛpɔŋ ẅí ɛ́ tsɛ́tnɛ ntsu-ŋu, ńzʉʉnɛ pɔ́p mɛtúutɛ́ mɛ́, ŋ ɡɔ́ ńjʉ́ɔ, mbɔ ɔ fú nǔu mɔ́ɔ wɑ́ ńcẅɛt, ḿbɑ́ɑ nɛlɑ́Ꞌ ḿbɛn ḿbɛn nzʉʉ ŋ́kúu nǔu wɛ́.»

²⁶Zẅikŋɛ kɛpɔŋ ɛ̂wɑ́ tíi mɔ́ɔ ḿmɑꞋ sɛ́ ńtsʉꞋnɛ wɛ́, ŋ́ɡɛ ɑ kíi nɛ́ ŋɡi tɛnnɛ́, ɛ́fú nǔu wɛ́ ńcẅɛt. A tsʉꞋ ńnɔɔ sɛ́ ŋ́ɡɛ pɔ pɑꞋ pfú-ŋu lɑ́, tɛ pɛ́ pɔ́ ńcú pɔ ŋɡɔ ɑ pfú.

²⁷Lɑ́, Yɛ́su ɡẅɛɛ pɔ́ yɛ́ ńcẅɛ́lɛ́ wɛ́, ŋ́ɡɛ ɑ lɔ sɛ́ ńtʉ́ʉ tʉ́ʉnɛ.

²⁸Yɛ́su pɔ́p ɡɑŋku pɛ́ ɡɛ ḿbɛn tɛ ŋ́kúu ndɑ́, ḿbɔ́ zɛ́nɛ pɔ́p, pɔ́p píkŋɛ wɛ́ ŋɡɔ: «Ku lɑ́Ꞌnɛ ŋ́ɡɛ lɑ́ pɛk pɔɔ kuꞋ nɛzuŋ yɔ zẅikŋɛ kɛpɔŋ ɛ̂yɑ́ pɔ́ ɔɔ?»

²⁹Yɛ́su pʉ̈ɔt mbɔ̌ pɔ́p ŋɡɔ: «Pɛ́ lɔk pɔ ndɑꞋ nɛcɛꞋlɛ Sɛ́ lɑ́ ńdɔk ŋ́ɡɛ yîyɑ́ ntɛ́ zẅikŋɛ kɛpɔŋ fú nǔu ŋu ńcẅɛt.»

³⁰Pɔ́p pɛ́ Yɛ́su fú zúꞋu ḿbɔ́ ŋ́ɡʉ, ńdɛɛ tsɛt ŋɡɔŋ-Ŋɡɑlilɛɛ, ɑ pɛn ŋ́kɛ́ ḿbɔɔ ḿbɔ́ ŋ́kɔŋ ŋɡɔ pɛ́ jí zʉꞋ yí ɑ zúꞋu pɔ́,

³¹ḿbɔ́ ńzíꞋ ɡɑŋku pɛ́ nɛ́ yúu, ḿbɔ́ ɛ́sẅíŋɛ ŋɡɔ: «Pɛ́ ɡʉ ɛ́fɛn Mɔ́ɔ-Ŋu mbɔ̌ pʉɔmɛsɔŋ pɔ́p ɡɛ ɑ pfú. Lɑ́ mbɑɑtɛ lɛ́Ꞌ pɛtɑ́t ɑ zẅíimɛ.»

³²A cú pɔ́Ꞌɔ, ɡɑŋku pɛ́ kɛ́ mbɔɔ zúꞋ sʉ́Ꞌnɛ pɔ́, lɑ́ ḿbɛn ḿbɔ́ ḿbɔ́k nɛ́ píkŋɛ wɛ́ nɛ́ nu nǔu.

³³Pɔ́p ɡʉ tɛ ŋ́kúu Kɑpɛɛnɑwûm, ŋ́kúu ndɑ́, Yɛ́su píkŋɛ wɔ́p ŋɡɔ: «Pʉʉ; lɑ́Ꞌ ḿbɔ́ ńnɛn sɛ̂ndúŋ ńzɔŋ kʉ̈ɔ́ pɛꞋnɛ?»

³⁴Pɔ́p pɔɔ tsɔ́p, mbíꞌŋɡɔ pɔ́p lɑ́Ꞌ ḿbɔ́ sɛ̂ndúŋ, ḿbɔ́ ńzɔŋ ńdɔɔ ŋu ẅí ɑ tsɛtsɛt pɔ́p ḿbɔ́ wɛ ɡwɛ́ nǔu pɔ́p pɛtsʉʉ.

³⁵Yɛ́su nɑ́ŋ sɛ́, ɛ́fúŋ ɡɑŋku pɛ́ ntsɔ̌ppɑ́ nɛ́ nɛɡɛ́m, ɛ́sẅíi wɔ́p ŋɡɔ: «Ŋu wʉʉ lɑɑ ḿbɔ́ ńdɔɔ nɛtʉ́ʉ ḿbɔ́ nduŋmbi, mbɔ ɛ́ pɔŋ ŋɡɔ ɑ pɛ́m nɛpɔ́ nzʉʉ, ɛ́fɑꞋ mbɔ̌ pʉɔ tsʉʉ,»

³⁶ńcú pɔ́Ꞌɔ, ɛ́fúŋ mɔ́yúu mɔ́ɔ, ńtík wɛ́ pɔ mbi pɔ́p, ńtíi wɛ́ ŋ́ɡẅɛɛ, ńcú ŋɡɔ:

³⁷«Ŋu lɔk lík yɑ́ɑ, ŋ́kúkŋɛ mɔ́yúu mɔ́ɔ pɑꞋ wɔ lɑɑ, mbɔ ŋɡɑŋ kúkŋɛ pɔ wɑ́ɑ. Ŋu pɛn ŋ́kúkŋɛ wɑ́ɑ, mbɔ ŋɡɑŋ kɑ́ kúkŋɛ pɔ ndɑꞋ wɑ́ɑ pɔ́, ɑ kúkŋɛ pɔ ŋu ẅí ɑ kɑ túunɛ wɑ́ɑ.»

³⁸Jɑ̂ŋ nɑ́ŋ tɛ ńcú mbɔ̌ Yɛ́su ŋɡɔ: «Tɑ̌ɑ wɛk, pɛk lɑ́Ꞌ ńjʉ́ɔ wɛcɔ́ ŋu pɔ́ ńdɔk lík yú ńzuŋ mɛzẅikŋɛ kɛpɔŋ nǔu pʉɔ, pɛk lɔɔ nɛtɔꞋ wɛ́, mbíꞌŋɡɔ ɑ kɑ́ pɔ́ yɛ́ nzʉʉ ɡu pɑꞋ pɛk pɔ́.»

³⁹Yɛ́su pʉ̈ɔt ŋɡɔ: «Kɔɔ pʉʉ tɔꞋ wɛ́ nɛɡɛ pɔ́Ꞌɔ, ɛ́ lɑɑ ḿbɔ́ ŋu pɔɔ lɔk lík yɑ́ɑ, ŋ́ɡɛ ŋkʉꞋnɛ nu, ḿbɛn ŋ́ɡɔ́ɔ ŋ́kẅíi lík yɑ́ɑ kɛpɔŋ pɔ́.

⁴⁰Ŋu ẅí ɑ kɑ́ lʉꞋ nu yɛ́kŋɛ pɔ́, wɛkŋɛ ŋu.

⁴¹Ɛ sẅíi wʉ́ʉ, kwɑꞋ nɛ́nẅín, ŋu lɑɑ ŋ́ɡɔ ŋ́ɡɑ́ mɔ́zʉꞋ ŋki mbɔ̌ pʉʉ, ŋ́ɡɑ́, mbíꞌŋɡɔ pʉʉ pʉɔ pɑ́ɑ, mbɔ yɛ́ tsɔ́ꞋfɑꞋ ńdɑ́Ꞌ ḿbɛ́ pɔ́.»

⁴²«Lɑ́, ŋu ẅí ɑ ŋ́kɛ́ ńtsʉ́ʉnɛ wɛcɔ́ tɑꞋ ŋu nǔu pɛɡɛɡʉʉ pɑ́ɑ pi pɔ́p zɑ́pnɛ tʉ́m nǔu mɔ, nɛlɔk ŋ́ɡɛ ŋɡɔ ɑ fɑɑnɛ nu, mbɔ ŋɡʉ̈ɔ́Ꞌ yi ɛ́ ɡʉ ńdɑ́Ꞌ ŋ́kúu ŋɡɑŋ, ɡʉ ḿbɔ́ yi ɛ́ ńzɑ́ɑ, tɛ mbii pɔ́ ndɑꞋ pɑꞋ ɛ́ lɑɑ ḿbɔ́ pɛ́ cʉŋɛ mɑ́mɑ́ ŋɡɔꞋ lɔ́ŋ-ŋɡɑŋ, ḿmɑꞋ wɛ́ tsɛt mí.

⁴³Pɔ́ yú lɑɑnɛ ḿbɔ́ ńtsʉ́ʉnɛ wú ńníꞋ tsɛt mɛfɑɑnɛ, ɔ zɑꞋ ḿmɛꞋ, mbi nɛpɔ́ ŋkɛmpɔ́, lɑ́ ŋ́kɛ́ ńdɑ́Ꞌ ḿbɔ́ ɡú, ńtsɑ nɛɡẅɛɛ mbɔ́ mɛmbɑ́, lɑ́ ḿbɛn ŋ́kúu tsɛt zʉꞋ yí múk zúꞋu, ḿbɔ́ yi ɛ́ ńdɑ́Ꞌ ḿbɛ́ yɛcɔ́ lɛ́Ꞌ pɔ́,

⁴⁴[ɛ́ zʉꞋ yí mɛntʉ̈ɔt mí ɛ́ ńdɑ́Ꞌ ḿpfú pɔ́ nuꞋnɛ pɛpfú-pʉɔ zúꞋu. Múk ẅí ɛ́ kʉ́nɛ zúꞋu, ɛ́ ńdɑ́Ꞌ ḿbɛ́ pɔ́.]

⁴⁵Ku yú lɑɑnɛ ḿbɔ́ ńtsʉ́ʉnɛ wú ńníꞋ tsɛt mɛfɑɑnɛ, ɔ zɑꞋ ḿmɛꞋ, mbi ɡu nɛpɔ́ kɛmku lɑ́ ńdɑ́Ꞌ ŋ́kɛ́ ḿbɔ́ ɡú, ńtsɑ nɛɡẅɛɛ mɛku mú mɛmbɑ́ lɑ́ pɛ́ mɑꞋ wú tsɛt múk,

⁴⁶[ɛ́ zʉꞋ yí mɛntʉ̈ɔt mi ɛ́ ńdɑ́Ꞌ ḿpfú pɔ́ kwɛ́t pɛpfú-pʉɔ zúꞋu. Múk ẅi ɛ́ kʉ́nɛ zúꞋu, ɛ́ ńdɑ́Ꞌ ḿbɛ́ pɔ́,]

⁴⁷ḿbɛn ḿbɔ́ yi lík yú sɛ́ ńtsʉ́ʉnɛ wú, ɔ fɑɑnɛ nu, ɔ tsɔ́Ꞌ ḿmɛꞋ, mbii nɛpɔ́ pɛlík lɑ ŋ́kúu nǔu nu-Nɛfɔɔ-Sɛ́, ńtsɑ pɑꞋ ɛ́ lɑɑ ḿbɔ́ ɔ ɡẅɛɛ mík mú mɛmbɑ́ pɛ́ pɛn ḿmɑꞋ wú tsɛt zʉꞋ-múk,

⁴⁸zʉꞋ yí mɛntʉ̈ɔt mí ɛ́ ńdɑ́Ꞌ ḿpfú pɔ́ kwɛ́tnɛ pɛpfú-pʉɔ zúꞋu. Múk ẅi ɛ́ kʉ́nɛ zúꞋu, ɛ́ ńdɑ́Ꞌ ḿbɛ́ pɔ́[10].»

⁴⁹Pʉʉ sɛ́ jí ŋɡɔ múk ɡʉ ńdɑ́Ꞌ niitɛ mbɑ wɔ̌ lɑ́ ndʉ́ŋndʉŋ pɑꞋ pɛ́ lɔknɛ ŋɡwɑ́ŋ ńniitɛ yúu-pɔꞋ.

⁵⁰Ŋɡwɑ́ŋ sɛ́ ḿbɔ́ yúu sʉ́Ꞌnɛ lɑ́, ɛ́ lɑɑ ḿbɔ́ tɛ ḿbɔɔ ḿbɛ́t ńdʉʉ pɔ́ pɛ́ pɛn ńdɔk kʉ̈ɔ́ ŋ́ɡɛ lɑ́ ɛ́ pɛn ńdʉʉ? Ɛ́ pɔŋ ŋɡɔ kwɑꞋ ŋɡwɑ́ŋ sʉ́Ꞌnɛ pɔ́ lɔ́ŋ pʉʉ, pɔ́Ꞌɔ, mbɔ́tnɛ pɔ́ tsɛtsɛt pʉʉ.