Read Ngomba Lúkɑ́shi 1 Bible Online

Lúkɑ́shi 1 - Ngomba bible

Lúkɑ́shi 1

¹Nɛtʉʉndɛn Tɛɔfîl, ɔ jí ŋɡɔ pʉɔ tɛ ńzɑ́ɑ tíi mɔ́ fɑꞋ nɛcúꞋlɛ mɛnu mi ɛ́ kɑ lɛɛnɛ tsɛtsɛt pɛkŋɛ tɛ ŋ́ŋwɑꞋnɛ,

²ŋ́ŋwɑꞋnɛ kwɑꞋ pɑ́Ꞌ pʉɔ pi pɔ́p kɑ jʉ́ɔnɛ pɑ́Ꞌ nu yɔ kɑ zɛnɛ, ḿbɛn ńjʉ́ɔ pɑ́Ꞌ ɛ́ kɑ nɛnnɛ pɔ́Ꞌɔ.

³Pɑ́Ꞌ ɛ́ kɑ ɡɔ ḿbɔ́, mbɑ mɔ yɑ́ɑ, ŋ kɑ kɛ́ mɔ́ ŋ́kɑ́t ńtúŋtɛ ńdɔ́ɔ yɔ tɛ ɛ́fú nɛtsɛ́n-nu lɑ́, ŋ kɑ jʉ́ɔ ŋɡɔ ɛ́ pɔ́ŋ ŋɡɔ n niitɛ yɔ sʉ́Ꞌnɛ, ńníꞋ tsɛt yɔ ŋwɑꞋnɛ, ŋ́ɡɑ́ mbɔ̌ wu.

⁴Ŋ ɡɛ pɑ́Ꞌɑ nɛlɔk ŋ́ɡɛ ŋɡɔ ɔ ɡʉ ɛ́fúŋ ńdɔk ńjí ŋɡɔ mɛnu mi pɛ́ kɑ zíꞋnɛ wú ɛ́ zúꞋu ḿbɔ́ kwɑꞋ pɔ́Ꞌɔ.

⁵Ɛ́ kɑ pɔ́ ŋkɑ́ yi Ɛlɔ̂dɛ m̄bɔ́nɛ fɔɔ-ŋɡɔ́ŋ-Jẅidɛ̂,[1] Wɛcɔ́ nɔŋpɔꞋ pɔ́ ɡú, lík yɛ́ pɔ́ ŋɡɔ Sɑkɑlíyɑ, ɑ pɔ́ ŋɡɑŋfɑꞋ tsɛtsɛt pʉɔ pɛ́ Ábyɑ. Nzwɛ́ wɛ ḿbɔ́ yɛ́ ɡúu nǔu njẅɛt-Álɔ̂ŋ, tɑ́tndɑ́-pɑnɔŋpɔꞋ, lík yɛ́ pɔ́ ŋɡɔ Lísɑpɛ.

⁶Sɑkɑlíyɑ pɔ́p nzwɛ́ wɛ kɑ pɔ́ pʉɔ, ŋ́ɡẅɛɛ nɛpʉ́ʉ-Sɛ́ kwɑꞋ sʉ́Ꞌnɛ, ńzúꞋ ntsu-Sɛ́, ḿbɛn ŋ́ɡɛ pɔ yúu mi ɑ sɛ́ ŋ́kɔŋ tɛ lɔ́Ꞌ pɔɔ ńcẅɛt pɔ́.

⁷Pɔ́p ŋ́kɑɑ mɔ́ɔ ɡẅɛɛ, mbíꞋŋɡɔ Lísɑpɛ kɑ pɔ́ ŋkɛ́n mɑŋɡɛ́, mbɔ pɔ́p pɛn mɔ́ ńdɛn.

⁸Ŋkɑ́ yi cúꞋlɛ-fɑꞋ yɛ́ pɛ́ Sɑkɑlíyɑ ńdɛ́ɛnɛ tɛ ŋ́kɛ́ ŋ́kuꞋ, ɑ pɔ́ ndɑ́-nɛnɔŋpɔꞋ Yɛlúsɑlɛm ḿbɔ́ ńnɔ́ŋ pɔꞋ.

⁹PɑnɔŋpɔꞋ kɑ ɡẅɛɛ mɑt nɛmɑꞋ ńtíitɛ ńdɔk ŋ́kɑŋ tɑ́Ꞌ ŋu tsɛtsɛt pɔ́p ẅi ɑ ɡʉ ŋ́kúu tsɛt ndɑ́-nɛnɔŋpɔꞋ, ńtɔɔ lii nɛlɔk ŋ́ɡɛ́mtɛ Sɛ́, ŋ́ɡɛ pɔ́Ꞌɔ, yɛcɔ́ lɛ́Ꞌ, Sɛ́ tsɔ́Ꞌ Sɑkɑlíyɑ.

¹⁰A ɡɔ ḿbɔ́ ndɑ́ nɛtɔɔ lǐi ɛ̂yɑ́, lɑ́Ꞌ pɔ́ píi tɛ ńzɑ́ɑ, ḿbɔ́ ńcɛꞋlɛ Sɛ́ pɔ́p pɛtsʉʉ.

¹¹Sɑkɑlíyɑ ɡɔ ńjʉ́ɔ, wɛcɔ́ Cʉ̈ɔꞋ-Sɛ́ cẅɛt mbi yɛ́ ḿvukŋɛ vukŋɛnɛ, ńtʉ́ʉ nɛkɛlɛmúk, nǔu ɡúŋ pɔ́ tʉʉ.

¹²Sɑkɑlíyɑ jʉ́ɔ wɛ́, lɛ́m yɛ́ sɑ́ɑnɛ, pɔ́k ɡẅɛɛ wɛ́.

¹³Lɑ́ Cʉ̈ɔꞋ-Sɛ́ cú mbɔ̌ wɛ́ ŋɡɔ: «Sɑkɑlíyɑ, kɔɔ kíi ḿbɔ́k, Sɛ́ zúꞋ mɔ́ nu yi ɔ júknɛ ńcɛꞋlɛ wɛ́ nǔu, tɛ ɑ ŋ́ɡɛ ńcʉ̈ɔꞋ nzwɛ́ wu Lísɑpɛ, pʉʉnɛ ḿbí tɑ́Ꞌ mɔ́ɔ mbɛ́ɛnɛ, ɔ cẅi lík yɛ́ ŋɡɔ Jâŋ.

¹⁴Mɔ́ɔ ɛ̂wɑ́ ŋ́ɡɛ ńdɑ́Ꞌ ḿbɔ́ mbɔ̌ wu, ḿbɔ́ kwɑꞋ yúu-tsɑ́ɑtɛ, pʉɔ tɛ ńzɑ́ɑ pɛn ńtsɑ́ɑtɛ nǔu pɑ́Ꞌ pɛ́ pinɛ wɛ́.

¹⁵A ŋ́ɡɛ ńdɑ́Ꞌ ḿbɔ́ mbɔ̌ Sɛ́ ḿbɔ́ ŋu tɛꞋ. A ńdɑ́Ꞌ ḿbɔɔ mɛluꞋ ńnɔ́ pɔ́, tɛ mbɑ kʉ̈ɔ́ lɑ́ yi ḿbɔ́ ŋu nɔ́ ḿbɑ́. A ŋ́ɡɛ ńdɑ́Ꞌ ńzɛɛ ŋ́ɡɔ ńcẅɛt nɛpɛm-mɑ́ wɛ, mbɔ Zẅikŋɛ Lɛ́ɛnɛ́nɛ jʉ́ mɔ́ wɛ́.

¹⁶A ŋ́ɡɛ ŋ́ɡɛ pʉɔ-islɑyɛ̂l tɛ ńzɑ́ɑ shɔt tʉ́m yɔ́p, ḿbɛn mbɔ̌ Tsɑpʉɔ Sɛ́ wɔp.

¹⁷Sɛ́ ŋ́ɡɛ ńdɑ́Ꞌ ŋ́ɡɑ́ wɛ́ nɛ́ mɛtʉʉ, ɑ lɔk ḿbɔ́ yɛ́ pɑ́Ꞌ Ɛlíyɑ, ŋɡɛ́mndʉ̈ɔ́Ꞌ-Sɛ́, nɛlɔk ḿbɔ́ mbi ńdɔ́ɔ pɑ́Ꞌ ɑ ɡɛ ŋ́ɡɛ ŋɡɔ pɛtɑ́t ɡẅɛɛ kwɑŋɛ sʉ́Ꞌnɛ nǔu mbɔ́ŋkʉ̈ɔ́ pɔ́p, ɛ́ pɛn ŋ́ɡɛ ḿbɑ́ɑtɛ pɑtʉʉtú ɡẅɛɛ jínu-pʉɔ pi pɔ́p pɔ́knɛ Sɛ́. Pɔ́Ꞌɔ, Sɛ́ lɔk ńniitɛ pʉɔ pi pɔ́p ɡɛ ńdɑ́Ꞌ ŋ́kuꞋ nɛɡɑ́ mɛkuꞋ mbɔ̌ wɛ́.»

¹⁸Sɑkɑlíyɑ zúꞋ pɔ́Ꞌɔ, ḿbíkŋɛ Cʉ̈ɔꞋ-Sɛ́ ŋɡɔ: «Tɛ mɔ ŋ́ɡɛ ńjʉ́ɔ kʉ̈ɔ́ lɑ ńjí ŋɡɔ ɛ́ ŋ́ɡɛ ńdɑ́Ꞌ ḿbɔ́ nu? M bɔ́ mɔ́ ndɛn ŋu, nzwɛ́ wɑɑ pɛn ńdɛn yɛ!»

¹⁹Cʉ̈ɔꞋ-Sɛ́ pʉ̈ɔt ŋɡɔ: «Mɔ Ŋɡɑ́ɑpɛliyɑ, n zúꞋ pɔ mbɔ̌ Sɛ́. Jʉ́ túunɛ wɑ́ɑ ŋɡɔ n tɔ́ ɛ́sɑ́Ꞌ wɔ Ŋkʉʉ sʉ́Ꞌnɛ mbɔ̌ wu.

²⁰Ɛ́ nu yi ɛ́ ŋ́ɡɛ ńtsuŋ ńcẅɛt nǔu yɛ́ ŋkɑ́, lɑ́ pɑ́Ꞌ ɔ kɑ́ pɛ́m lɑ́, ɔ ɡʉ ńtsʉ́Ꞌ ḿbɔ́ pɔ cípúꞋ tɛ yîyɑ́ ŋkɑ́ ɡɛ ŋ́kuꞋ.»

²¹Lɑ́Ꞌ yi ɛ́ m̄bɔ́nɛ píi ńzẅíꞋlɛ́ Sɑkɑlíyɑ kɑ jʉ́ɔ, mbɔ ɑ lɑ́ɑtɛ tsɛt ndɑ́ tɛ ɛ́ tsɑ, ɛ́ kʉꞋnɛ wɔ́p.

²²A pɔ́ tɛ ńcẅɛt, ḿbɔɔ pɛn ŋ́kuꞋ nɛcú nu mbɔ̌ pɔ́p pɔ́, ńtsʉ́Ꞌ ńdɔk pɔ mbɔ́ ńdɛꞋlɛ nu. Pɔ́p ɡɔ́ɔ ńjí ŋɡɔ ɑ tɔ́ ndɑ́, Sɛ́ níɛꞋ mík mɛ́, ɑ jʉ́ɔ yɛcɔ́ ŋkʉꞋnɛ nu. A fú pɔ́Ꞌɔ, ńtsʉ́Ꞌ ḿbɔ́ pɔ cípúꞋ.

²³Sɑkɑlíyɑ pɔ́ tɛ ḿmɛk mɛ́ mɛlɛ́Ꞌ-fɑꞋ ndɑ́-nɛnɔŋpɔꞋ Yɛlúsɑlɛm, ḿbɛn nɛ́ njɛ́Ꞌ yɛ.

²⁴Mɔnɛ mɛnu kɑ lɛɛ, nzwɛ́ wɛ Lísɑpɛ ɡɔ́ɔ ɛ́shuŋ, ńnɑ́ŋ pɔ ńdʉɔmɛ lʉɔmɛ́nɛ nǔu pɛsɑŋ pɛ́tɑɑ, ḿbɔ́ ńcú tsɛt tʉ́m yɛ́ ŋɡɔ:

²⁵«Yɔ nu yi Tsɑpʉɔ kɛ́nɛ ńdíŋɛ wɑ́ɑ tɛ ŋ́ɡɛ nǔu mɔ, nɛlɔk ńcẅɛɛtɛ sʉ́ʉ yi ɛ́ júknɛ ŋ́kɔ́ wɑ́ɑ tsɛtsɛt pʉɔmɛsɔŋ pɑ́Ꞌ mɔ yɑ́ɑ mɔ́ɔ kɑ́ ɡẅɛɛ.»

²⁶Lísɑpɛ shuŋ tɛ ḿbɔ́ pɛsɑŋ pɛ́nɛ́ntúkú, Sɛ́ túu cʉ̈ɔ́Ꞌ wɛ Ŋɡɑ́ɑpɛliyɑ tsɛt yɛcɔ́ tʉ́sɔŋ-Ŋɡɑlilɛɛ yi pɛ́ fúŋnɛ ŋɡɔ Nɑ̌ɑzɑlɛt,

²⁷mbɔ̌ wɛcɔ́ mɔ́ɔŋɡɔɔ ẅi pɛ́ fúŋnɛ wɛ́ ŋɡɔ Mɑlíyɑ, mbɔ pɛ́ kɑ pʉ́ wɛ́ mbɔ̌ Yɔsɛ̂p, ŋu nǔu tsɛ́nndɑ́-fɔɔ Ndɑvît, tɛ pɛ́ ńnɑ́ŋ sɛ́ nǔu.

²⁸Cʉ̈ɔꞋ-Sɛ́ ɡʉ tɛ ŋ́kúu ndɑ́ pɔ́p, ńcú mbɔ̌ wɛ́ ŋɡɔ: «N cɛꞋlɛ wú, mbɑ Mɑlíyɑ, mbɔ́tnɛ-Sɛ́ nǔu wu, Tsɑpʉɔ lɔk wú ŋ́ɡɛ yúu, ɑ sɛ́ ńdíŋɛ wú tɛꞋ.»

²⁹Mɑlíyɑ zúꞋ, ɛ́ tsɑ wɛ́ tɛꞋ, ɑ kwɑŋɛ ŋɡɔ: «Yɔ ntɛ́ cɛꞋlɛ ɛ́ pɑ́Ꞌɑ ńdɔk ńcú ŋɡɔ kʉ̈ɔ́?»

³⁰Cʉ̈ɔꞋ-Sɛ́ cú ŋɡɔ: «Mɑlíyɑ, kɔɔ pɔ́k, Sɛ́ cʉɔꞌ wú.

³¹ZúꞋ: ɔ ɡʉ ḿbɔ́ shǔutɛ, ŋ́ɡɛ ḿbí tɑ́Ꞌ mɔ́ɔ mbɛ́ɛnɛ, ńcẅi lík yɛ́ ŋɡɔ Yɛ́su.

³²A ŋ́ɡɛ ńdɑ́Ꞌ ḿbɔ́ ŋu ɡwɛ́, pɛ́ ɛ́fúŋ wɛ́ ŋɡɔ mɔ́ɔ-Sɛ́ ŋɡɑŋmɛtʉʉ tsʉʉ. KwɑꞋ jʉ́ Tsɑpʉɔ Sɛ́ pɛnnɛ ŋ́ɡɑ́ nɛfɔɔ-ŋɡɑpnjẅɛt yɔp Ndɑvît nɛ́ jʉ́.

³³A ńdɑ́Ꞌ ḿbɔ́ ɛ́sɑ́Ꞌ njẅɛt-Íslɑyɛ̂l tsʉʉ; nɛfɔɔ nɛ́ pɔɔ lɑ́Ꞌ ḿmɛ pɔ́.»[2]

³⁴Mɑlíyɑ zúꞋ pɔ́Ꞌɔ, ńcú mbɔ̌ Cʉ̈ɔꞋ-Sɛ́ ŋɡɔ: «Tɛ yɔ nu ɡʉ ńdɑ́Ꞌ ńdɛɛ ŋɡɔ ku, pɑ́Ꞌ m bɛ́t kɛ́ jí ŋu mbɛ́ɛnɛ lɑɑnɛ?»

³⁵Cʉ̈ɔꞋ-Sɛ́ pʉ̈ɔt mbɔ̌ wɛ́ ŋɡɔ: «Zẅikŋɛ Lɛ́ɛnɛ́nɛ ɡʉ ńcúŋ ŋ́kúu nǔu wu, Sɛ́ ẅi ɑ piꞋnɛ mbɑ kʉ̈ɔ́ lɑ́ ńdɔk nɛ́ mɛtʉʉ mɛ́ ŋ́kẅíipɛ wú tɛ yɔ nu puutɛ. Ɛ́ lɛɛtɛ pɔ́Ꞌɔ, lɑ pɛ́ ɡɛ ɛ́fúŋ mɔ́ɔ ẅi ɔ ɡʉ ḿbí ŋɡɔ Ndɛ́ɛnɛ Lɛ́ɛnɛ́nɛ, ḿbɛn ɛ́fúŋ wɛ́ ŋɡɔ mɔ́ɔ-Sɛ́.

³⁶Zɛɛ ńjʉ́ɔ mɔ́ɔmɑ́ wu Lísɑpɛ. Pɛ́ sɛ́ ɛ́fúŋ wɛ́ ŋɡɔ ŋkɛ́n mɑŋɡɛ́, ɑ kɛ́ mɔ́ ńdɛn tɛꞋ lɑ́, ɛ́ ŋkɔ̂ɔnɛ ḿbɔ́ pɛsɑŋ pɛ́nɛ́ntúkú pɑ́Ꞌ ɑ shǔutɛ, lɑ́ ɑ ŋ́ɡɛ ńtɑ́ɑ ḿbí mɔ́ɔ mbɛ́ɛnɛ.

³⁷Ɛ́ lɔk ḿbɔ́ ŋɡɔ ḿbɔ́ nu pɔɔ Sɛ́ tsɑ.»[3]

³⁸Mɑlíyɑ pʉ̈ɔt ŋɡɔ: «Mɔ pɔ ŋɡɑŋfɑꞋ-Tsɑpʉɔ: Ɛ́ pɔ́ŋ ŋɡɔ ɑ ɡɛ mɛnu mi ɔ sẅíinɛ́ wɑɑ lɑ́, ɛ́ puutɛ nǔu mɔ.» A cú pɔ́Ꞌɔ, Cʉ̈ɔꞋ-Sɛ́ ɡɔ́ɔ ŋ́kɛ́ ŋ́ɡʉ.

³⁹Ɛ́ pɔ́ mîmɑ́ mɛlɛ́Ꞌ, Mɑlíyɑ lɔ sɛ́, ńnɛn pɔ nɛ́ mɛtʉʉ ńdɔk yi mɛŋkɔ́Ꞌ Jẅidɛ̂ ḿbʉʉ ŋ́ɡʉ nɛ́ yɛcɔ́ tʉ́sɔŋ,

⁴⁰ŋ́ɡʉ tɛ ŋ́kúu njɛ́Ꞌ-Sɑkɑlíyɑ, ŋ́kúu ndɑ́, ńcɛꞋlɛ Lísɑpɛ.

⁴¹Lísɑpɛ zúꞋ cɛꞋlɛ-Mɑlíyɑ, mɔ́ɔ ŋɑtnɛ nɛpɛm yɛ́, Zẅikŋɛ Lɛ́ɛnɛ́nɛ ńcúŋ ŋ́kúu nǔu wɛ́.

⁴²A kɑꞋ ŋɡi yɛ ŋ́ɡɑ́ tʉ́ ńcú mbɔ̌ Mɑlíyɑ ŋɡɔ: «Ɔ ɡẅɛɛ mbɔ́tnɛ-Sɛ́ tɛ ńtsɑ pɑŋɡɛ́ pɛtsʉʉ. Mbɔ́tnɛ pɛn ḿbɔ́ nǔu mɔ́ɔ ẅi ɔ ɡɛ ńtɑ́ɑ ḿbí.

⁴³Mɑ́ pɛ́ Tsɑpʉɔ wɑɑ tɔ́ ŋ́ɡwɑ́ wɑɑ pɑ́Ꞌɑ, m bɔ́ yɑ́ɑ wɔ̌?

⁴⁴Jʉ́ɔ pɑ́Ꞌ n dɛɛnɛ tɛ ńzúꞋ cɛꞋlɛ yú, mɔ́ɔ ŋɑtnɛ, ńtsɑ́ɑtɛ nɛpɛm mɔ.

⁴⁵Ɔ pɔ́ttú, mbíꞋŋɡɔ ɔ kɑ pɛ́m ŋɡɔ mɛnu mi Sɛ́ kɑ ɡɛnɛ ɔ jí, ńtɑ́ɑ ḿbuutɛ.»

⁴⁶Mɑlíyɑ zúꞋ ńcú ŋɡɔ: «Mɔ sɛ́ ŋ́ɡɑ́ ɡúꞋlɛ mbɔ̌ Tsɑpʉɔ,

⁴⁷tʉ́m yɑ́ɑ sɛ́ ńtsɑ́ɑtɛ tɛꞋ nǔu Tsɑpʉɔ Sɛ́ Nzɑ́Ꞌŋkʉ wɑɑ.

⁴⁸A kẅíitɛ wɑ́ɑ, lɑ́ ŋ kɛ́ ḿbɔ́ pɔ nzʉʉ nǔu pʉɔ pi pɔ́p zúꞋnɛ ntsu wɛ́: pʉɔmɛsɔŋ nǔu mɛzuŋ mɛzuŋ ŋ́ɡɛ ńdɑ́Ꞌ ńtsʉ́Ꞌ ɛ́fúŋ wɑ́ɑ nɛ́ pɔ́ttú,

⁴⁹mbíꞋŋɡɔ Sɛ́ ŋɡɑŋmɛtʉʉ tsʉʉ kɛ́ ŋ́ɡɛ ŋkʉꞋnɛ nu sʉ́Ꞌnɛ nǔu mɔ. Sɛ́ Sɛ́!»

⁵⁰«A lɔ ŋ́ɡɛ nu sʉ́Ꞌnɛ nǔu pʉɔ pi pɔ́p ɡɛ́mtɛnɛ wɛ́, ḿbɛn ŋ́ɡɛ nǔu pɔ́ɔ pɔ́p nǔu mɛzuŋ mɛzuŋ

⁵¹A nyɛt mɛtʉʉ mɛ́, ŋ́ɡɛ pɛmɑ́mɑ́ mɛnu. A sɑt pɑnyɛt mbʉʉ.

⁵²A kɔk pɛfɔɔ ndǔ kɔꞋ-nɛfɔɔ nɔ́p ńtsẅíkŋɛ pɛpúŋ ndǔ.

⁵³A lɔk yúu sʉ́Ꞌnɛ ńzẅík ɡɑŋnji kuꞋ, ńzuŋ ɡɑŋyúu pɔ́p ɡʉ mbɔ́ fɛ̌ɛ

⁵⁴A tɔ́ ńcẅɛ́lɛ́ pʉɔ-Íslɑyɛ̂l, ɡɑŋfɑꞋ pɛ́ A kɑ́ likŋɛ nɛnyɛt pɔ́ŋtʉ́m yɛ́ pɔ́,

⁵⁵ɛ́ yúu minɛ ɑ kɑ kɑꞋnɛ mbɔ̌ pɛmɑ́ŋɡɑpnjẅɛt pɛkŋɛ, mbɑ mbɔ̌ Ábɛlɛhɑ̂m pɔ́p njẅɛt yɛ mɛzuŋ mɛzuŋ.»

⁵⁶Mɑlíyɑ kɑ cú pɔ́Ꞌɔ, pɔ́p Lísɑpɛ lɔ ńnɑ́ŋ yúu pɛsɑŋ pɛtɑ́t, lɑ ɑ pɛn nzʉʉ.

⁵⁷Ŋkɑ́ nɛpí-Lísɑpɛ kɑ kuꞋ, ɑ pí mɔ́ɔ mbɛ́ɛnɛ.

⁵⁸Pɛtɑ̌ɑlɑ́Ꞌ pɔ́p pɔ́ɔpɛmɑ́ pɛ́ zúꞋ pɑ́Ꞌ Tsɑpʉɔ tsɑ́ɑnɛ mɛjʉ́ŋ mɛ́, ŋ́ɡɑ́ wɛ́ nɛ́ mɔ́ɔ, pɔ́p pɛ pɔ́p tsɑ́ɑtɛ.

⁵⁹Mɔ́ɔ ɡɛ ŋ́ɡẅɛɛ lɛ́Ꞌ pɛ́nɛ́fɔ́m, pɛ tɔ́ nɛpúꞋ wɛ́ ḿbɛn ńcẅi lík yɛ́, ḿbɔ́ ńdɔ́ɔ nɛfúŋ wɛ́ ŋɡɔ Sɑkɑlíyɑ pɑ́Ꞌ tɑ́t wɛ.

⁶⁰Lɑ́ mɑ́ wɛ lʉꞋ ńcú ŋɡɔ: «Pɛ́ ɛ́fúŋ wɛ́ ŋɡɔ Jâŋ.»

⁶¹Pɔ́p tɛn ndʉꞋ; ńcú ŋɡɔ: «Sɑ̌ɑ ŋu kɑ́ pɔ́ tsɛtsɛt pɔ́ɔpɛmɑ́ pʉ́ʉ lík yɛ́ pɔ́ pɑ́Ꞌɑ pɔ́.»

⁶²Ńdɔk mbɔ́ ḿbíkŋɛ Sɑkɑlíyɑ pɑ́Ꞌ ɑ kɔŋnɛ ŋɡɔ pɛ́ ɛ́fúŋ mɔ́ɔ pɔ́Ꞌɔ.

⁶³A píkŋɛ yúu minɛ ɑ ɡɛ ŋwɑꞋnɛ yúu nǔu, pɛ́ ɡɑ́, ɑ ŋwɑꞋnɛ lík yɛ́ ŋɡɔ Jɑ̂ŋ. Pɔ́p jʉ́ɔ ɛ́ kʉꞋnɛ wɔ́p tɛꞋ.

⁶⁴Pɔ́p ɡɔ́ɔ ńjʉ́ɔ ntsu-Sɑkɑlíyɑ ńtsɔ́Ꞌnɛ tɛ ɑ ɡɔ́ɔ ḿbɛn ńzɛ nɛcú nu, ḿbɔ́ ŋ́ɡúꞋlɛ Sɛ́.

⁶⁵Pɛtɑ̌ɑlɑ́Ꞌ kɑ zúꞋ ŋɡɔ Sɑkɑlíyɑ pɛn ńcú nu ḿmɑɑ tɛꞋ. Yɔ nu kɛ́ ŋ́ɡɔ́ɔ ɛ́sɑt lɑ́Ꞌ, tɛ pɛ́ tsʉ́Ꞌ ḿbɔ́ mbɑ ɡɔ́ lɑ́ shʉ́ mɛŋkɔ́Ꞌ Pɑjẅidɛ̂ ɛ́sẅíi pɔ yɛ́tɛ́.

⁶⁶Mbɑ wɔ̌ lɑ́ ẅi ɑ kɑ zúꞋnɛ mɔnɛ mɛnu lẅɛꞋ pɔ tsɛt tʉ́m yɛ́. Pɔ́p pɔ́ ḿbíkŋɛ ŋɡɔ: «Yɔ ntɛ́ mɔ́ɔ pɑ́Ꞌɑ ńdɑ́Ꞌ ḿbɔ́ ku?» Ɛ́ zɛɛ ŋ́ɡɔ ḿbɔ́ Tsɑpʉɔ pɔ́ ńdɔk mɛtʉʉ mɛ́ ńtɔ́ɔtɛ wɛ́.

⁶⁷Zẅikŋɛ Lɛ́ɛnɛ́nɛ jʉ́ tɑ́t wɛ Sɑkɑlíyɑ, ɑ cú nu pɑ́Ꞌ ŋɡɛ́mndʉ̈ɔ́Ꞌ-Sɛ́ lɑ́, ŋɡɔ:

⁶⁸«Mbɔ́tnɛ mbɔ̌ Tsɑpʉɔ Sɛ́ pɑ Íslɑɛ̂l, pɑ́Ꞌ ɑ tɔ́nɛ ńcẅɛ́lɛ́ pʉɔ pɛ́, ńtsúꞋ wɔ́p ndɑ́-kwɑɑ.

⁶⁹A túu Nzɑ́Ꞌŋkʉ wɛ ɡwɛ́ mbɔ̌ pɛkŋɛ. A cẅɛt nǔu njẅɛtndɑ́-ŋɡɑŋfɑꞋ wɛ́, fɔɔ Ndɑvît,

⁷⁰ɛ́ pɔ́ nu yinɛ ɑ kɑ lɑ́Ꞌ ńcú tɛ ntí ɡú, ɔ́ɔŋ, ɑ kɑ lɔk ntsu-pɛɡɛ́mndʉ̈ɔ́Ꞌ pɛ́ ńcú ŋɡɔ:

⁷¹“Mɔ ŋ́ɡɛ ńdɑ́Ꞌ ńcẅɛɛtɛ wʉ́ʉ mbɔ̌ pɛɡɑŋ mbuu pʉ́ʉ, mbɑ nǔu mbɔ́ pʉɔ pi pɔ́p sɛ́ ḿbɔɔ ŋ́kɔŋ nɛjʉ́ɔ wʉ́ʉ pɔ́.”

⁷²Yɔ pɑ́Ꞌ pɔŋtʉ́m-Sɛ́ kɑ zɛnɛ nǔu pɛmɑ̂ɑŋɡɑpnjẅɛt pɛkŋɛ, ɛ́ pɛn ḿbɔ́ lɔ́Ꞌnɛ, kẅíitɛ kɑɑ yinɛ kwɑꞋ Sɛ́ pɔ́p pɛ pɔ́p kɑ ɡwɑtnɛ,

⁷³kẅíitɛ pɑ́Ꞌ ɑ kɑ cúnɛ tɛ ŋ́kɑɑ mbɔ̌ Ábɛlɛhɑ̂m, mɑ̂ɑŋɡɑpnjẅɛt wɛkŋɛ. A ḿbɔ́ ńcú ntɛ́ wɛkŋɛ ŋɡɔ:

⁷⁴A ŋ́ɡɛ ńdɑ́Ꞌ ńcẅɛɛtɛ mbɔ́ŋkʉ̈ɔ́ pʉ́ʉ, nǔu mbɔ́-ɡɑŋmbuu pɔ́p, lɑ pɔ́p kɛ́ ḿbɔɔ ŋ́kuꞋ nɛɡúꞋlɛ wɛ́ kɛ́ pɔ́k.

⁷⁵Pɔ́p tsʉ́Ꞌ pʉɔ pɛ́, ŋ́ɡɛ pɔ wɛ nɛkɔŋ nǔu mɛŋɡɔŋ mɛlɛ́Ꞌ lɑ́Ꞌ mɔ́p ndǔ tsɛ́tsɑ́Ꞌ.»

⁷⁶Sɑkɑlíyɑ pɛn ńcú ŋɡɔ: «Ɛ́ ɡʉ nǔu ɡu mɔ́ɔ wɑɑ, mbɔ pɛ́ ŋ́ɡɛ ńdɑ́Ꞌ ɛ́fúŋ wú ŋɡɔ ŋɡɛ́mndʉ̈ɔ́Ꞌ-Sɛ́, Sɛ́ ẅi ɑ piꞋnɛ mbɑ kʉ̈ɔ́ lɑ́. Tsɑpʉɔ ɡɔ ḿbɛn ńtɔ́, mbɔ ɔ piitɛ ḿbɔ́ mbi ńniitɛ sɛ̂ndúŋ yɛ́.

⁷⁷Ɔ ɡɛ ńtɑ́ɑ ŋ́ɡɛ pʉɔ pɛ́ jí ŋɡɔ ɑ kẅɛ́Ꞌlɛ mɔ́ tɛ ḿbɑ́ɑtɛ pɑ́Ꞌ ɑ ɡɛ ńdikŋɛ mɛnu kɛpɔŋ mɔ́p, ŋ́ɡɛ pɔ́p luk,

⁷⁸mbíꞋŋɡɔ ɑ sɛ́ ńdíŋɛ wɛkŋɛ sʉ́Ꞌnɛ, ḿbɛn ḿbɔ́ ńtsɑ́ɑ mɛjʉ́ŋ mɛkŋɛ tɛꞋ. A ɡɛ ńtúu ŋu ẅi ɑ ŋ́ɡɛ pɛkŋɛ luk, ŋɡɑŋ fú tʉ́nɛ́pú ńtɔ́ ḿbɔ́ kyɛꞌ,

⁷⁹ŋ́kyɛꞋ pʉɔ pi pɔ́p nɑ́ŋnɛ tsɛt nzɛ́nzʉ́ʉ, nɛvú pɛn ḿbɔ́ ńnʉk wɔ́p, ńcɑklɛ wɔ́p ńníꞋ tsɛt mɔ́fíitɛ.»

⁸⁰Ŋ́ɡʉ nǔu Mɔ́ɔ-Sɑkɑlíyɑ, ɑ pɔ́tnɛ ŋ́ɡúꞋ nǔu mbɑp-mbʉʉ mbɑ nɛ́ jínu yɛ́. Pɔ́Ꞌɔ, ŋ́ɡɛ ŋ́ɡʉ ńnɑ́ŋ kɔ̂ŋtɛt, ńdɑ́Ꞌ ńtswɛ́ pɔ zúꞋu tɛ ŋ́kúu lɛ́Ꞌ yinɛ ɑ kɑ nyɛtnɛ shʉ́ wɛ́ mbɔ̌ pʉɔ-Íslɑyɛ̂l.