Read Ngomba Lúkɑ́shi 11 Bible Online

Lúkɑ́shi 11 - Ngomba bible

Lúkɑ́shi 11

¹Yɛ́su pɔ́ yɛcɔ́ lɛ́Ꞌ, ḿbɔ́ yɛcɔ́ zʉꞋ ḿbɔ́ ńcɛꞋlɛ Sɛ́, ńcɛꞋlɛ wɛ́ tɛ ḿbɔ́tnɛ ńnɑ́ŋ, wɛcɔ́ ŋɡɑŋku wɛ tɔ́ ńcú mbɔ̌ wɛ́ ŋɡɔ: «Tsɑpʉɔ, Jɑ̂ŋ kɑ zíꞋ ɡɑŋku pɛ́ nɛcɛꞋlɛ Sɛ́, zíꞋ wɛk ɡúu nɛcɛꞋlɛ Sɛ́ lɑ.»

²Yɛ́su ɡɔ́ɔ ŋ́kɛ́ ńcú mbɔ̌ ɡɑŋku pɛ́ ŋɡɔ: «Pʉʉ lɑɑ ḿbɔ́ ńcɛꞋlɛ Sɛ́, pʉʉ cú ŋɡɔ: Tɑ̌ɑ wɛk, ɡɛ ŋɡɔ pʉɔmɛsɔŋ jí ŋɡɔ ɑ ndɑꞋ ɡu ḿbɔ́ Sɛ́, ḿbɛn ŋ́ɡɛ nɛfɔɔ nú tɔ́

³ḿbɔ́ lɛ́Ꞌ tsʉʉ, ŋ́ɡɑ́ yɛk yúu jʉ́ yi ɛ́ ɡɛ kuꞋ nǔu pɛk lɔ́Ꞌnɛ

⁴likŋɛ mɛnu kɛpɔŋ mɛk ŋ́ɡɑ́ mbɔ̌ pɛk, mbíꞋŋɡɔ pɛk sɛ́ ńdikŋɛ yɛk ŋ́ɡɑ́ mbɔ̌ pʉɔ pinɛ pɔ́p fɑɑnɛ́nɛ nu mbɔ̌ pɛk lɑ́. Kɔɔ pɛ́m ŋɡɔ pɛk kúu tsɛt ŋkwɑꞋnɛ.»

⁵Yɛ́su pɛn ńcú ŋɡɔ: «Pɛkŋɛ lɔk yɔ ḿbɛ́ɛ fʉꞋ: Ɔ ɡẅɛɛ súu nu, ŋ́ɡʉ njɛ́Ꞌ yɛ nɛtúꞋ, ńcú mbɔ̌ wɛ́ ŋɡɔ: Súu wɑɑ, sɛsẅíi ɡɑ́ wɑ́ɑ nɛ́ mbɛlɛ̂ɛt ntɑ́Ꞌ yɛ́tɑ́t.»

⁶N tʉ́ʉ pɑ́Ꞌɑ, mbɔ wɛcɔ́ súu wɑɑ fú nɛnɛn, ńtɔ́ ŋ́kẅɛ́ɛtɛ wɑ́ɑ ndɑ́ pɔ ŋkɔ̂ɔnɛ, m bɛn ḿbɔɔ ɡẅɛɛ yɛcɔ́ yúu mi ḿbɔ́ n dɔk ńdi wɛ́ pɔ́.

⁷Líkcɔ́ súu nu ɡɔ́ŋ ndɑ́ ńtsɔ́Ꞌ ŋɡɔ: «Kɔɔ pɛn ḿbɑ́klɛ wɑ́ɑ, mɔ ńdɑ́Ꞌ mɔ́ ńjʉ̈ɔ́Ꞌ ntsundɑ́, pɛk pɛ́ mbɔ́ŋkʉ̈ɔ́ pɑ́ɑ ńdɑ́Ꞌ mɔ́ ńnɔɔ kúu. Tɛ ɛ́ lɑɑ ḿbɔ́ m bɔɔ pɛn ŋɡɔ ŋ ɡɛ ńdɔ sɛ́ ŋ́ɡɑ́ mbɛlɛ̂ɛt mbɔ̌ ɡu pɔ́.»

⁸Yɛ́su cú ŋɡɔ, pʉʉ jí sʉ́Ꞌnɛ ŋɡɔ, súu nu lɑɑ ńzɛɛ ńdɔ mbɑ sɛ́ ŋ́ɡɑ́ mbɛlɛ̂t mbɔ̌ ɡu, mbɔ ɑ kɑ́ lɔ sɛ́ ŋ́ɡɑ́ ntɛ́ pɔ́, pɑ́Ꞌ ɔ súu nɛ pɔ́. Mbɔ ɑ tsʉ́Ꞌ ŋ́ɡɑ́ ntɛ́ pɔ ŋɡɔ ɔ nɑ́ŋ ńtɔ́ ḿbɑ́klɛ wɛ́ pɔ kɛ́ kɑ́ɑ.

⁹Ɛ́ pɔ́Ꞌɔ lɑ́ ɛ sẅíi wʉ́ʉ ŋɡɔ: «Pʉʉ lɔ́ɔ, Sɛ́ ɡɛ ŋ́ɡɑ́ mbɔ̌ pʉʉ. Pʉʉ lɔɔ, Sɛ́ ɡɛ ŋ́ɡɛ pʉʉ jʉ́ɔ. Pʉʉ púꞋtɛ ntsundɑ́ ɑ ɡɛ tsɔ́Ꞌ ŋ́ɡɑ́ mbɔ̌ pʉʉ.

¹⁰Jínɛ ŋɡɔ ŋu lɑɑ ńdɔ́ɔ yúu, mbɔ pɛ́ ɡɛ ŋ́ɡɑ́ mbɔ̌ wɛ́, ńdɔɔ, mbɔ ɑ ɡɛ ńjʉ́ɔ, ḿbɛn ḿbúꞋtɛ ntsundɑ́, mbɔ pɛ́ ɡɛ tsɔ́Ꞌ ŋ́ɡɑ́ mbɔ̌ wɛ́.

¹¹Pʉʉ pɛtɑ́t-mbɔ́ŋkʉ̈ɔ́, mɔ́ɔ wɔ̌ tsɛtsɛt pʉʉ lɑɑ ńdɔ́ɔ [mbɛlɛ̂ɛt, ɑ ɡɑ́ ŋɡɔꞋ mbɔ̌ wɛ, kɛ pɔ][10] mbɑp-shú, ɑ ɡẅɛɛ nɔ́ ŋ́ɡɑ́ mbɔ̌ wɛ́?

¹²Mɔ́ɔ wɔ̌ pɛn ńdɔ́ɔ nɛpuu-ŋɡɛ́p, mbɔ ɑ ɡɛ ŋ́ɡẅɛɛ ŋɡɑɑsɛ́, ńníꞋ mbɔ̌ wɛ́?

¹³Pʉʉ pʉɔ fʉꞋ nu kɛpɔŋ tɛꞋ, lɑ́ ńjí nɛɡɑ́ yúu sʉ́Ꞌnɛ mbɔ̌ pɔ́ɔ pʉ́ʉ. Tɛ ŋkɑ́ yɛ́sʉ́Ꞌʉ́ nǔu Tɑ̌ɑ wʉʉ ẅi ɑ tʉ́nɛ́pú? A ɡɛ ŋ́ɡɑ́ Zẅikŋɛ Lɛ́ɛnɛ́nɛ mbɔ̌ pʉɔ pinɛ pɔ́p lɔ́ɔnɛ?»

¹⁴Ɛ́ pɔ́ yɛcɔ́ lɛ́Ꞌ, Yɛ́su zuŋ zẅikŋɛ kɛpɔŋ yi ɛ́ kɑ kúunɛ nǔu wɛcɔ́ ŋu, ńdɔk wɛ́ ŋ́ɡɛ tɑ́Ꞌ ntsɑꞋmbúꞋ. Zẅikŋɛ kɛpɔŋ pɔ́ tɛ ɛ́fú nǔu ŋɡɑŋ ńcẅɛt, ɑ zɛ nɛcú nu, lɑ́Ꞌ jʉ́ɔ mɑɑ tɛꞋ.

¹⁵Lɑ́ pɛcɔ́ pʉɔ tsɛtsɛt pɔ́p pɔ́ ńcútɛ ńcú ŋɡɔ: «Bɛlzɛbûl, tɑ́t-ndɑ́ mɛzẅikŋɛ kɛpɔŋ jʉ́ ɡɛnɛ lɑ́ Yɛ́su kuꞋ nɛzuŋ mɛzẅikŋɛ kɛpɔŋ.»

¹⁶Pɛcɔ́ pʉɔ pɔ́ ńtsʉ́ʉnɛ Yɛ́su tsʉ́ʉnɛ́nɛ, ḿbɔ́ ńdɔ́ɔ ŋɡɔ ɑ nyɛt ŋkʉꞋnɛ nu ŋɡɔ Sɛ́ túunɛ wɛ́.

¹⁷Lɑ́, Yɛ́su jí kwɑŋɛ yɔ́p, ńcú mbɔ̌ pɔ́p ŋɡɔ: «Pʉɔ tɑ́Ꞌ lɑ́Ꞌ lɑɑ shɔtnɛ ńdʉ̈ɔ́Ꞌ ntsɔ tsɛtsɛt pɔ́p, mbɔ yîyɑ́ lɑ́Ꞌ ɡɛ ḿbɛ́. Mɛndɑ́ kɛ́mɛ ḿbʉ̈ɔtnɛ nǔu mɛcɔ́.

¹⁸Nɛfɔɔ-Sɑ́ttɑ pɛn ḿbɔ́ pɔ kwɑꞋ pɔ́Ꞌɔ. Pʉɔ pɛ́ lɑɑ ɛ́fɑkŋɛ, ńzɛ nɛshɔtnɛ ńdʉ̈ɔ́Ꞌ ntsɔ tsɛtsɛt pɔ́p, mbɔ nɛfɔɔ nɛ́ ɡɛ ḿbɛ́. Pʉʉ cú ŋɡɔ, n dɔk pɔ mɛtʉʉ Bɛlzɛbûl lɑ ńzuŋ mɛzẅikŋɛ kɛpɔŋ.

¹⁹Tɛ pɑ́Ꞌ pʉ́ʉ pʉɔ pɛn ńzuŋ yɔ́p mɛzẅikŋɛ kɛpɔŋ lɑɑ, tɛ pɔ́p pɛn ńdɔk mɔ́p mɛtʉʉ ɡɔ́ lɑ ńzuŋ? KwɑꞋ pʉɔ pʉ́ʉ ɛ̂pɑ́ ńnyɛt wʉ́ʉ ŋɡɔ pʉʉ cú pɑ́Ꞌ ɛ́fɑɑnɛ fɑɑnɛ́nɛ.

²⁰Ɛ́ ɡʉ nǔu mɔ, mbɔ n dɔk pɔ mɛtʉʉ Sɛ́ ńzuŋ, yɔ lɔk ńnyɛt wʉ́ʉ ŋɡɔ Sɛ́ ńdɑ́Ꞌ mɔ́ ńtɔ́ tɛ ḿbɔ́ fɔɔ tsɛt yɔ mbí.

²¹Pʉʉ sɛ́ ńjí yʉ́ʉ ŋɡɔ ŋu lɑɑ ŋ́ɡẅɛɛ yúu ntsɔ, ḿbɛn ŋ́ɡẅɛɛ mɛtʉʉ nɛlɔk ḿbyɛ́p njɛ́Ꞌ yɛ, mbɔ ɛ́ lɑɑ ḿbɔ́ yúu yɛ́ pɔɔ pɛ́.

²²Lɑ́ wɛcɔ́ ŋu ẅí ɑ pɛn ńtɛn ńdɛɛ wɛ́ lɑɑ ńtɔ́, mbɔ wɛcɔ́ nɛɡɛ kɛ́ pɛn ḿbɔ́ ɡú ŋkɑ́ ɛ̂yɑ́ pɔ́. Mbɔ wîwɑ́ ŋu ɡɛ ńtɔ́ ŋ́ɡẅɛɛ wɛ́, ńcẅɛ́ɛ yúu ntsɔ pɛ́ pi ɑ ḿbɔ́ ńdɔk ńtɛn lɑ́. Ḿbuu ńtúꞋ yúu pɛ́, pɔ́p pɛ́ pʉɔ ɡɑptɛ.

²³Ŋu lɑɑ ńdʉꞋ pɑ́Ꞌ pɛkŋɛ ɡɛ ḿbɔ́ nɛ́ nu, mbɔ ɑ lɔk ḿbʉ́ʉpɛ nu yɑ́ɑ. Ŋu pɛn ńdʉꞋ nɛcẅɛ́lɛ́ wɑ́ɑ, pɛkŋɛ cúꞋlɛ pʉɔ pɑ́ɑ, mbɔ ɑ tsʉ́Ꞌ ńtɑ́k wɔ́p ɛ́sɑt sɑtnɛ.»

²⁴Yɛ́su pɛn cú ŋɡɔ: «Zẅikŋɛ kɛpɔŋ lɑɑ ńnɑ́ŋ mbʉʉ ŋu tɛ ŋ́ɡɛ ńcẅɛt, ḿbɔ́ ɛ́ ŋ́kɑ́t nǔu zʉꞋ zúplɛ́nɛ, ńdɔ́ɔ zʉꞋ yi ɛ́ ɡɛ ḿbɔ́tnɛ ńnɑ́ŋ zúꞋu, mbɔ ɛ́ lɑɑ ḿbɔɔ jʉ́ɔ, ɛ́ cú ŋɡɔ: Ɛ́ pɔ́ŋ ŋɡɔ m bɛn nzʉʉ tsɛt ndɑ́ mɔ yi ŋ kɑ zɛnɛ ḿbɔ́ zúꞋu lɑ́.»

²⁵Ɛ́ lɑɑ ḿbɛn nzʉʉ, ńjʉ́ɔ, mbɔ pɛ́ zʉk ndɑ́ ḿbɛn niitɛ,

²⁶mbɔ ɛ́ ɡɛ ŋ́ɡʉ ŋ́ɡúu mɛcɔ́ mɛzẅikŋɛ kɛpɔŋ sɑɑmbɑ́, ɛ́ pɔ́ minɛ ɛ́ ńzɑ́ɑ sɔ́ɔ tɛ ńdɛɛ wɛ́, pɔ́p pɛpɔ́p pɛn nzʉʉ ŋ́kúu nǔu ŋu ɛ̂wɑ́, ḿbɛn ńdɔk wɛ́ ŋ́ɡɛ ndɑ́ yɔp. Ŋɡʉ̈ɔ́Ꞌ-ŋɡɑŋ zɑ́ɑ ńdɛɛ pɑ́Ꞌ ɛ́ kɑ zɛnɛ ḿbɔ́.

²⁷Yɛ́su kɑ pɔ́ ńcú pɔ́Ꞌɔ, wɛcɔ́ mɑŋɡɛ́ tsɛtsɛt lɑ́Ꞌ kɑꞋ ŋɡi yɛ, ŋ́ɡɑ́ tʉ́, ńcú ŋɡɔ: «Mɑŋɡɛ́ ẅi ɑ kɑ nɑ́ŋnɛ sɛ́ ḿbí wú, ḿbɛn ńnɔ́ŋ wú, ɑ pɔ́ttú.»

²⁸Yɛ́su pɑ́Ꞌ ńcú mbɔ̌ wɛ́ ŋɡɔ: «Ɔ ḿbɔ́ ŋ́ɡʉ ńcú pɔ ŋɡɔ: “Pɛpɔ́ttú ɛ́ pʉɔ pinɛ pɔ́p zúꞋ sẅíŋɛ-Sɛ́, ḿbɛn ŋ́ɡɛ pɑ́Ꞌ ɑ sɛ́ ḿbíkŋɛ.”»

²⁹Yɛ́su pɔ́ sẅíiŋɛ pɔ́Ꞌɔ, lɑ́Ꞌ pɔ́ ŋ́kẅiꞋ ŋ́kɔ́Ꞌ kɔ́Ꞌnɛ, ɑ ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Pʉɔ pinɛ pɔ́p tsɛt mbí ŋkɔ̂ɔnɛ pɔ́p kɑ́ pɔ́ŋ. Pɔ́p sɛ́ ḿbíkŋɛ wɑ́ɑ ŋɡɔ n nyɛt lii. Lɑ́ pɛ́ kɛ́ nyɛt wɔ́p yɛcɔ́ yúu pɔ́, tɛ ńdíꞋ ndɑꞋ nu yi ɛ́ kɑ ɡɛnɛ Yɔ́nɑ́shi.

³⁰Pʉʉ jí pɑ́Ꞌ Sɛ́ kɑ lɔknɛ Yɔ́nɑ́shi ńnyɛt lii mbɔ̌ pʉɔ Niniivɛ, Sɛ́ ɡʉ ḿbɛn ŋ́ɡɛ ndʉ́ŋndʉŋ pɔ́Ꞌɔ, ńdɔk Mɔ́ɔ-ŋu ńnyɛt nu mɑ̌ɑmɑɑnɛ mbi pʉɔ pinɛ pɔ́p tsɛt mbí ŋkɔ̂ɔnɛ.»

³¹Pʉɔ Niniivɛ kɑ zúꞋ sẅiŋɛ-Yɔ́nɑ́shi, ŋ́kúpmɛ mɑt wɔp, ŋu ẅi ɑ pɛnnɛ ɛ́sẅíi wʉ́ʉ nɛ́ nu lɔ́Ꞌnɛ pʉʉ pɔɔ ńzúꞋ pɔ́, ɑ lɛɛ Yɔ́nɑ́shi. Ɛ́ pɔ́Ꞌɔ lɑ́ ɛ sẅíi wʉ́ʉ ŋɡɔ Sɛ́ ɡɛ ńdɑ́Ꞌ ḿbɔ́ tɛ ḿbɔ́ ŋ́ŋɑk pʉɔmɛsɔŋ, pʉɔ Niniivɛ pɔnɛ ńtɔ́ ńtʉ́ʉ ńzɑ́p nu tú pʉɔ pinɛ pɔ́p tsɛt mbí ŋkɔ̂ɔnɛ. Nu-mɑ́ɑfɔɔ-pʉɔ-Shɛ́bɑ pɛn ḿbɔ́ pɔ pɔ́Ꞌɔ. A kɑ zúꞋ ŋɡɔ jínu fɔɔ Sɑlɛ́mɔ tsɑ nɛ pʉɔ tsʉʉ, ɛ́fú tɛ lɑ́Ꞌ yɛ́, ńdɔ sɛ́ ńtɔ́, ńdɔk mík mɛ́ ńjʉ́ɔ yɛ́. Ŋu ẅi ɑ pɛnnɛ ɛ́sẅíi wʉ́ʉ nɛ́ nu lɔ́Ꞌnɛ pʉʉ pɔɔ pɛ́m pɔ́, yi jínu tsɑ yi fɔɔ Sɑlɛ́mɔ. Ɛ́ pɔ́Ꞌɔ lɑ́ ɛ sẅíi wʉ́ʉ ŋɡɔ, Sɛ́ ɡɛ ńdɑ́Ꞌ ḿbɔ́ tɛ ḿbɔ́ ŋ́ŋɑk pʉɔmɛsɔŋ, mɑfɔɔ-pʉɔ-lɑ́Ꞌ-Shɛbɑ ɛ̂pɑ́ tɔ́ ńtʉ́ʉ ńzɑ́p nu tú pʉɔ pinɛ pɔ́p tsɛt mbí ŋkɔ̂ɔnɛ.

³²

³³Pɛ́ kɑ́ lyɛt kyɛꞌ pɑ́Ꞌɑ nɛɡʉ ńtík zʉꞋ lʉɔmɛ́nɛ pɔ́, [ḿbɛn ḿbɔɔ kɛ́ ńdyɛt tɛ ɛ́ kuꞋ pɛ́ tíi luŋɡɑ́ɑ ńdɔk ŋ́kẅíipɛ pɔ́.][11] Pɛ́ lyɛt kyɛꞌ, ńtíi ńtík pɔ ndǔ tɑ́pɛlɛ, zʉꞋ yi ɛ́ ŋɑ́Ꞌnɛ́nɛ nɛ́ tʉ́, nɛpɔ́ yi pʉɔ ɡɛ ŋ́ɡɔ ŋ́kúu ndɑ́, ńjʉ́ɔ ɛ́ pɔ́ ŋ́kyɛꞋ zʉꞋ.

³⁴Mík mú mbɔ̌ ɡu ḿbɔ́ pɑ́Ꞌ kyɛꞌ yi ɔ lɔknɛ ńjʉ́ɔ zʉꞋ. Mík mú lɑɑ ḿbɔɔ sʉ́ʉ, ḿbɔ́ ɔ ɡɛ ńjʉ́ɔ zʉꞋ sʉ́Ꞌnɛ. Lɑ́ mík mú pɛn ḿbɔ́ tɛ sʉ́ʉ, mbɔ ɔ ɡɛ ńtsʉ́Ꞌ ḿbɔ́ pɔ tsɛt nzɛ́nzʉ́ʉ.

³⁵Ɛ́ lɔk ḿbíkŋɛ ŋɡɔ ɔ lɑk tú yú, ḿbɑ́ɑ mík mú nɛlɔk wú ŋ́ɡʉ tsɛt nzɛ́nzʉ́ʉ.

³⁶Ɔ lɑɑ ńtík ku yú ńdii, ḿbɛn ḿbɔ́ ŋ́kʉɔ mɛnu mi ɛ́ ḿbɔ́ pɔ mɛnu nzɛ́nzʉ́ʉ sʉ́Ꞌnɛ, mbɔ ɔ ɡɛ nɛn nǔu nu nɛ́nẅín kwɑꞋ pɑ́Ꞌ ŋu ɡẅɛɛ kyɛꞌ ńdɔk jʉ́ɔ sɛ̂ndúŋ sʉ́Ꞌnɛ lɑ́.

³⁷Yɛ́su cú nu tɛ ḿbɔ́tnɛ ńnɑ́ŋ, wɛcɔ́ ŋu nǔu nɔɔ-pɑfɑlísɑy fúŋ wɛ́ njɛ́Ꞌ yɛ, pɑ́Ꞌ pɔ́pmɛ́ ɡɛ jʉ́ yúu. Pɔ́p mɛ pɔ́ tɛ ḿbɔ́ ńjʉ́ yúu,

³⁸ŋu-Fɑlísɑy jʉ́ɔ pɑ́Ꞌ ɑ ŋkɑɑ suk mbɔ́ mɛ́ pɑ́Ꞌ nɛpʉ́ʉ-lɑ́Ꞌ nɔ́p sɛ́ ḿbɔ́ ḿbíkŋɛ pɔ́, ɛ́ ŋ́kʉꞋnɛ wɛ́ tɛꞋ.

³⁹Yɛ́su jí, ńtsɔ́Ꞌ mbɔ̌ wɛ́ ŋɡɔ: «Pʉʉ Pɑfɑlísɑy pʉʉ nɑ́ tsɛt ntúꞋ, pɔ́p tsɛt kɑ́ŋ, ɛ́suk yʉ́ʉ pɔ mbʉʉ yɛ. Ɛ́ pɛn ḿbɔ́ pɔ ndʉ́ŋndʉŋ pɑ́Ꞌ pʉʉ kɑ́ suk sɔ́ɔ yi ɛ́ tʉ́m pʉʉ pɔ́, ḿbɛn ńnɑ́ŋ ŋ́kwɑŋɛ pɔ nɛɡẅɛɛ yúu pʉɔ ńcẅɛ́ɛ ńjʉ́.

⁴⁰Pʉʉ pɛɡɛɡʉʉ! NdɑꞋ ŋɡɔ Sɛ́ ẅi ɑ kɑ niitɛ́nɛ nzɛmpíi jʉ́ kɑ pɛnnɛ ńniitɛ tsɛt mbʉʉ mbɑ wɔ̌ lɑ́?

⁴¹Yúu mi ɛ́ ḿbɔ́ ḿbɔŋ ŋɡɔ pʉʉ ɡɛ pɔ́ pɔ nɛpɛ́ɛ yúu sʉ́Ꞌnɛ yi ɛ́ tsɛt mɛkɑ́ŋ mʉ́ʉ, ŋ́ɡɑ́ mbɔ̌ pɛkɛyúu, pɔ́p jʉ́ yɔ́p. Pʉʉ ɡɛ ŋ́ɡɛ pɔ́Ꞌɔ, lɑ́ tʉ́m wʉ́ʉ kɛ ḿbɔɔ ńdɛ́ɛnɛ mbi Sɛ́.»

⁴²Pɑfɑlísɑy ndɔ́ɔ tú pʉʉ! Pʉʉ lɔ ŋ́ɡɑptɛ yúu nɑ́Ꞌ yʉ́ʉ tɛ mbɑ nzɑp yʉ́ʉ njí nɛɡɛ́m, ŋ́ɡɑ́ tɑ́Ꞌ njí mbɔ̌ Sɛ́. Lɑ́, pʉʉ sɛ́ ńdikŋɛ nɛɡɛ nu sʉ́Ꞌnɛ mbɔ̌ pʉɔmɛsɔŋ, ḿbɛn ńdikŋɛ nɛkɔŋ Sɛ́. Lɑ́ yîyɑ́ pɔ́nɛ yúu mi ɛ́ kɑ pɔ́ ḿbíkŋɛ ŋɡɔ pʉʉ ɡɛ. Pʉʉ ɡɛ pɔ́Ꞌɔ, ḿbɔɔ wɛcɔ́ ɡɛ́ɡɛ́ yúu likŋɛ.

⁴³Ndɔ́ɔ tú pʉʉ Pɑfɑlísɑy! Pʉʉ lɔ ŋ́kúu ndɑ́-cúꞋlɛ, ŋ́kɑŋ yʉ́ʉ zʉꞋ pɔ mbi, ŋ́kɔŋ ŋɡɔ pɛ́ tɔ́ ńcɛꞋlɛ wʉ́ʉ ndǔ zɑ́n.

⁴⁴Ndɔ́ɔ tú pʉʉ, pʉʉ fí mɛshi kɛ́ mɛlii mi ŋu lɑɑ ńnɛn ndǔ, mbɔ ɑ ɡɛ ńdutnɛ kɛ́ jí, ńtíi lɔ́Ꞌ[12].

⁴⁵Wɛcɔ́ tɑ́Ꞌ ŋu nǔu pɑkyɛ́Ꞌtɛ nɛpʉ́ʉ-Mɔ̌sɛ̂ɛ zúꞋ tɛ ńcú mbɔ̌ Yɛ́su ŋɡɔ: «Cícɑ, tɛ ɔ jí ŋɡɔ ɔ cú pɛ́Ꞌnɛ ńdɔk ńtɛ́m sʉ́ʉ nǔu pɛk ɡúu?»

⁴⁶Yɛ́su pɑ́Ꞌ ŋɡɔ: «Tɛ mbɑ pʉʉ yʉ́ʉ pɑkyɛ́Ꞌtɛ nɛpʉ́ʉ-Mɔ̌sɛ̂ɛ, pʉʉ kɑ́ pɔ́ sʉ́Ꞌnɛ pɔ́. Ndɔ́ɔ tú pʉʉ, mbíꞋŋɡɔ pʉʉ lɔ ńtíi piꞋ, ńzɑ́p tú-pʉɔmɛsɔŋ ɛ́ pɔ́ ńtsɑ wɔ́p, pʉʉ pɔɔ lɔk mɔ́ncɛꞋ tɔ́pɔ́ ńdɔk ŋ́kẅiꞋ ńcẅɛ́lɛ́ wɔ́p pɔ́.»

⁴⁷Ɛ sẅíi wʉ́ʉ, kwɑꞋ nɛ́nẅín, ndɔ́ɔ tú pʉʉ. Pɛtɑ́t pʉʉ kɑ jẅítɛ pɛŋɡɛ́mndʉ̈ɔ́Ꞌ-Sɛ́, pʉʉ tsʉ́Ꞌ nzʉʉ ḿbɔ́ɔ mɛshi mɔ́p, pʉʉ júk ntsẅii, ḿbɛn ḿbɔɔ kẅíitɛ nu yi pɔ́p kɑ cúnɛ pɔ́,

⁴⁸ŋ́ɡɛ pɔ́Ꞌɔ, ńdɔk ńnyɛt ŋɡɔ yúu mi pɛtɑ́t pʉ́ʉ kɑ ɡɛnɛ, kɑ pɔ́ŋ. Pɛ́ jẅítɛ pɛŋɡɛ́mndʉ̈ɔ́Ꞌ-Sɛ́, pʉʉ tsʉ́Ꞌ nzʉʉ ḿbɔ́ɔ mɛshi mɔ́p, ńjúk ntsẅii.

⁴⁹Mbɔ Sɛ́ kɑ zɑ́Ꞌ njí ńdɔk jínu yɛ́ ńcú ŋɡɔ: «Ŋ ɡɛ túu pɛŋɡɛ́mndʉ̈ɔ́Ꞌ pɑ́ɑ tɛ mbɑ pɛɡɑŋntúu pɑ́ɑ mbɔ̌ pɔ́p, pɔ́p ɡɛ ŋ́ɡẅɛɛ pɛcɔ́ jẅítɛ, ńnyɛt pɛcɔ́ nɛ́ ŋɡʉ̈ɔ́Ꞌ.»

⁵⁰Tɛ ɛ́fú pɑ́Ꞌ Sɛ́ kɑ niitɛ́nɛ mbí yɔ, pɔ́p jẅí pɛŋɡɛ́mndʉ̈ɔ́Ꞌ pɛ́ tɛ ɛ́ zɑ́ɑ tɛꞋ, mɛci mɔ́p pɛtsʉʉ ɡʉ ŋ́kɛ́ ńtswɛtnɛ pɔ tú pʉɔ pinɛ pɔ́p tsɛt mbí ŋkɔ̂ɔnɛ.

⁵¹Pʉɔ pinɛ Sɛ́ ɡɛnɛ ńdɑ́Ꞌ ḿbíkŋɛ mɛci mɔ́p mbɔ̌ pʉɔ pinɛ pɔ́p ndǔ mbí ŋkɔ̂ɔnɛ pɔ́p zɛɛ ńzɑ́ɑ tɛꞋ. Tɛ ɛ́fú nǔu mɛ Ábɛɛ ẅi pɛ́ kɑ piitɛ nǔu wɛ́ nɛjẅí, ŋ́ɡʉ ŋ́kúu nǔu mɛ Sɑkɑlíyɑ ẅi pɛ́ kɑ jẅí wɛ́ pɔ ntsu ndɑ́-nɔŋpɔꞋ, mbʉʉ nɛkɛlɛmúk yúu-pɔꞋ. Sɛ́ ɡʉ ńdɑ́Ꞌ ḿbíkŋɛ wɔ́p pɛtsʉʉ pɔ mbɔ̌ pʉɔ pinɛ pɔ́p tsɛt mbí ŋkɔ̂ɔnɛ.

⁵²Ndɔ́ɔ tú pʉʉ pɑkyɛ́Ꞌtɛ nɛpʉ́ʉ-Mɔ̌sɛ̂ɛ, pʉʉ kɑ kíitɛ sɛ̂ndúŋ ẅi pʉɔmɛsɔŋ lɛɛnɛ nǔu lɑ́ ńjí yúu mi Sɛ́ cúnɛ, ńdʉꞋ kwɑꞋ wʉ́ʉ ɡúu nɛlɛɛ nǔu, ḿbɛn ńtɑɑtɛ pʉɔ pinɛ pɔ́p sɛ́ ńtsɑ́ɑ nɛlɛɛ pɔ́Ꞌɔ.

⁵³Yɛ́su ɡɔ ɛ́fú ndɑ́ ńcẅɛt, pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́p pɑfɑlísɑy pɔ́ mbi, ńtsʉ́ꞌ mbɔ́ ḿbíkŋɛ wɛ́ nɛ́ mɛnu pɔ ɛ́fyɛ́tnɛ fyɛ́tnɛ́nɛ,

⁵⁴ŋ́ɡɛ pɔ́Ꞌɔ, ńdɔ́ɔ nɛkwɑꞋnɛ wɛ́ tɛ ḿbɔ́ ɑ cú nu ɛ́fɑɑnɛ yɛcɔ́, pɔ́p lɔk ɛ́fɛn wɛ́.