Read Ngomba Lúkɑ́shi 14 Bible Online

Lúkɑ́shi 14 - Ngomba bible

Lúkɑ́shi 14

¹Ɛ́ pɔ́ yɛcɔ́ lɛ́Ꞌ nji-Pɑyúdɑ, Yɛ́su ɡʉ njɛ́Ꞌ wɛcɔ́ tɑ́tndɑ́-Pɑfɑlísɑy nɛjʉ́ yúu. Pʉɔ pinɛ pɔ́p ḿbɔ́nɛ zúꞋu pɔ́ ḿbɑ́tɛ wɛ́ pɑ́tɛnɛ,

²ŋ́ɡɔ́ ḿbɔ́ wɛcɔ́ ŋu tʉ́ʉ mbi yɛ́, mbɔ kɔ́Ꞌtɛ kɑ ɡẅɛɛ wɛ́.

³Yɛ́su píkŋɛ Pɑfɑlísɑy pɔ́p pɑkyɛ́Ꞌtɛ nɛpʉʉ-Sɛ́ pinɛ pɔ́p ḿbɔ́nɛ ndɑ́ ŋɡɔ: «Ɛ́ nǔu nɛpʉ́ʉ nɛkŋɛ pɛꞋnɛ, ḿbɔ́ yí mbɔ pɛ́ ɡɛ ŋu fíitɛ lɛ́Ꞌnji wɛkŋɛ kɛ ŋɡɑ́ŋ?»

⁴Lɑ́ pɔ́p pɛtsʉʉ nɑꞋ. Pɔ́Ꞌɔ lɑ́, Yɛ́su ɡẅɛɛ ŋɡɔɔ ɛ̂wɑ́, ŋ́ɡɛ ɑ fíitɛ, ńcú ɑ ɡʉ.

⁵A píkŋɛ wɔ́p ŋɡɔ, wɔ̌ tsɛtsɛt pʉʉ, ḿbɔ́ yi mɔ́ɔ nɛ kɛ fɔŋ wɛ ɔ́ɔ lɑɑ ḿvu tsɛt nɛpʉ́-ŋki lɛ́Ꞌnji wɛkŋɛ, ɑ nɑ́ kɛ́ ɡwɛtnɛ ɛ́fú tsɛtú ńcẅɛɛtɛ wɛ́?

⁶Ɛ́ lɛɛ wɔ́p, pɔ́p zɑ́k pʉ̈ɔt.

⁷Yɛ́su jʉ́ɔ pɑ́Ꞌ pʉɔ pinɛ pɛ́ kɑ fúŋnɛ wɔ́p pɔ́ ŋ́kúu ndɑ́, ńdɔ́ɔ pɔ zʉꞋ yi ɡwɛ́ lɑ́ ńnɑ́ŋ, ɛ́sɑk nɛkɛt mbɔ̌ pɔ́p ŋɡɔ:

⁸«Ŋu lɑɑ ńdɑ́Ꞌ ɛ́fúŋ wú nǔu tsɑ́ɑtɛ-lɑ́ɑndɑ́, ɔ kúu zúꞋu, ɔ pɑ́ɑ nɛlɔ́ɔ pɔ nduŋmbi-zʉꞋ lɑ́ ńnɑ́ŋ, ḿbɔ́k wɛcɔ́ ŋu ẅí ɑ lɛɛnɛ wú nɛpɛn ńtɔ́ nzʉʉ.»

⁹Ŋɡɑŋndɑ́ ẅi ɑ fúŋnɛ wú nǔu yîyɑ́ tsɑ́ɑtɛ ɡɔ́ɔ ńtɔ́ ńcú mbɔ̌ ɡu ŋɡɔ: «Lɔ sɛ́, ndʉ́m wɔ ńnɑ́ŋ, mbɔ sʉ́ʉ ɡɛ ŋ́kɔ́ wú nɛlɔ sɛ́ ŋ́ɡʉ ńnɑ́ŋ nzʉʉ.

¹⁰Ɛ́ yɛ́t lɑ́ ḿbɔ́ ŋu lɑɑ ńdɑ́Ꞌ ɛ́fúŋ wú nǔu tsɑ́ɑtɛ, ɔ tɔ́ ńnɑ́ŋ yú pɔ nzʉʉ. Ɔ ńnɑ́ŋ zúꞋu, ŋu ẅí ɑ lɑ́Ꞌnɛ ɛ́fúŋ wú kúu ndɑ́, ńjʉ́ɔ ɔ pɔ́ nzʉʉ, ɑ ńcú mbɔ̌ ɡu ŋɡɔ: “Súu wɑɑ, tɔ́ nɛ mbi, mbɔ ɑ lɔk ŋ́kɑꞋ ndɛn wú mbi pʉɔ pɛ́tsʉʉ pinɛ pʉʉ pɔ́p pɔ́nɛ ndɑ́.”

¹¹Ɛ́ pɔ́Ꞌɔ, lɑ́ m bɔ́ ŋɡɔ ŋu lɑɑ ŋ́ŋɑ́Ꞌ mbʉʉ yɛ, mbɔ Sɛ́ ɡɛ ŋ́kɔk wɛ́ ŋ́ɡɑ́ sɛ́, ŋ́kɛ́ ŋ́kɔk mbʉʉ yɛ ŋ́ɡɑ́ sɛ́, mbɔ Sɛ́ ɡɛ ḿbʉꞋ wɛ́ ńtík tíknɛ.»

¹²Yɛ́su pɛn ńcú mbɔ̌ ŋu ẅí ɑ lɑ́Ꞌnɛ ɛ́fúŋ wɛ́ ŋɡɔ: «Ɔ lɑɑ ńdɑ́Ꞌ ḿbɔ́ ɛ́fúŋ tsɑ́ɑtɛ, nɛnɛm kɛ ntsuŋkẅɛ́Ꞌ ɔ́ɔ, kɔɔ ɛ́fúŋ pɛsúu pú, kɛ pɔ́ɔpɛ́mɑ́ pú ɔ́ɔ, kɛ pʉɔ nǔu nɛtsɛ́nndɑ́ nʉ́ʉ ɔ́ɔ, kɛ mbɑ pɛtɑ̌ɑlɑ́Ꞌ pú pɔ́p ɡɑŋŋkɑ́p ɔ́ɔ, mbíꞋŋɡɔ pɔ́p ɡʉ ŋ́ɡɛ ḿbɛn ɛ́fúŋ yú zʉꞋ, ńdɔk tsɔ́Ꞌ ɛ́sʉ́Ꞌ wú.

¹³Ɔ lɑɑ ńdɑ́Ꞌ ḿbɔ́ ɛ́fúŋ tsɑ́ɑtɛ, ɔ fúŋ pɛkɛyúu, ɛ́fúŋ pɛkʉ́ɔ, ɛ́fúŋ pɛkɛmku, ɛ́fúŋ pɛfumík.

¹⁴Ɔ lɑɑ ŋ́ɡɛ pɔ́Ꞌɔ, mbɔ ɔ pɔ́ttú, mbíꞋŋɡɔ ɛ́ lɑɑ ḿbɔ́ pɔ́p pɔɔ tsɔ́Ꞌ sʉ́Ꞌ wú pɔ́, pɔ́Ꞌɔ, Sɛ́ lɑ́Ꞌ ńtsɔ́Ꞌ fɑꞋ yú, ŋkɑ́ yi pʉɔ pɛ́ ɡɛ ńdɑ́Ꞌ zẅíimɛ nǔu nɛvú.»

¹⁵Pɛ́ zúꞋ yɔ sẅiŋɛ tɛ wɛcɔ́ ŋu ẅí pɔ́p pɛpɔ́p kɑ nɑ́ŋnɛ sɛ́ ḿbɔ́ ńjʉ́ yúu cú mbɔ̌ Yɛ́su ŋɡɔ: pɔ́ttú ɑ ŋu ẅí ɑ ɡɛ ńdɑ́Ꞌ jʉ́ yɛ́ yúu tsɛt nɛfɔɔ-sɛ́!

¹⁶Yɛ́su tsɔ́Ꞌ mbɔ̌ wɛ́ ŋɡɔ: «Wɛcɔ́ ŋu kɑ lɑ́Ꞌ ḿbɛn niitɛ mɑ́mɑ́ tsɑ́ɑtɛ, ńcú mbɔ̌ pʉɔ tɛ ńzɑ́ɑ.

¹⁷Ŋkɑ́ nɛjʉ́ yúu ɡɛ ŋ́kuꞋ, ɑ túu mɔ́ŋkʉ̈ɔ́ wɛ ŋɡɔ ɑ ɡʉ ɛ́fúŋ wɔ́p ŋɡɔ pɔ́p tɔ́ ŋkɔ̂ɔnɛ.

¹⁸Lɑ́, pɔ́p pɛ́tsʉʉ pɔ́ ńdɔ́ɔ mbɛ̌tntɑ́ŋ nɛlɔk ńtẅí tsɑ́ɑtɛ. Nduŋmbi cú ŋɡɔ: N kɑ zúu ŋkɑ́Ꞌ, ɛ́ pɔ́ŋ ŋ ɡʉ ńjʉ́ɔ, sɛsẅíi, sẅíi wɛ́ ŋɡɔ ŋ kɛ́ tɔ́ pɔ́.»

¹⁹Wɛcɔ́ cú ŋɡɔ: «Ŋ kɑ zúu pɛfɔŋ nɛɡɛ́m nɛlɔk ɛ́fɑꞋ fɑꞋ, mɔ sɛ́ ńdɔ́ɔ nɛɡʉ ńzẅíꞋ ńjʉ́ɔ, sɛsẅíi cú ŋɡɔ ɑ pɑ́ɑ nɛ lɑ́Ꞌ wɑ́ɑ.»

²⁰Wɛcɔ́ ɡɔ: «Mɔ ḿbɛ́t lɑ́ ńzɔ́Ꞌ, ḿbɔ́ m bɔɔ tɔ́.»

²¹Mɔ́ŋkʉ̈ɔ́ ɛ̂wɑ́ pɛn nzʉʉ, ɛ́sẅíi tɑ́t wɛ pɑ́Ꞌ pɔ́p cúnɛ, ɛ́ zɑ́ŋ wɛ́ tɛꞋ, ɑ pɛn ńtúu mɔ́ŋkʉ̈ɔ́ ɛ̂wɑ́, ńcú mbɔ̌ wɛ́ ŋɡɔ: «Kʉɔ nɛtʉʉ, ŋ́ɡʉ tʉ́sɔŋ ńtʉ́ʉ ndǔ zɑ́n, ńnɛn nǔu mɛndúŋ, ɛ́fúŋ pɛkɛyúu, ɛ́fúŋ pɛkʉ́ɔ, mbɑ pɛfumík pɔ́p pɛkɛmku pʉʉ pɔ́p tɔ́.»

²²A ɡʉ tɛ ḿbɛn, ńcú mbɔ̌ tɑ́t wɛ ŋɡɔ: «Tɑ̌ɑ mɔ, ŋ ɡɛ yúu mi ɔ lɑ́Ꞌnɛ ńcú, n níꞋ mɔ́ pʉɔ ndɑ́, lɑ́ zʉꞋ pɛ́t pɔ ɡú.»

²³Tɑ́t wɛ zúꞋ ńcú mbɔ̌ wɛ́ ŋɡɔ: «Gʉ mɛtú-ndúŋ ŋkɔ̂ɔnɛ, mbɑ nǔu mɛlɛ̌ɛndúŋ tsɛt lɑ́Ꞌ, wɛ́t ŋu ẅi ɔ jʉ́ɔnɛ, ɔ lɔk tʉʉ, ɛ́fúŋ wɛ́ ŋɡɔ ɑ tɔ́, ńníꞋ wɔ́p tɛ ndɑ́ yɔ lúu.

²⁴Jí sʉ́Ꞌnɛ ŋɡɔ, ḿbɔ́ sɑ̌ɑ ŋu nǔu pʉɔ pinɛ ŋ kɑ piitɛ ńcú mbɔ̌ pɔ́p lɑ́, pɔɔ zẅíꞋ sɑ̌ɑ yúu nǔu yúujʉ tsɑ́ɑtɛ pɔnɛ pɔ́.»

²⁵Yɛ́su pɔ́ yɛcɔ́ lɛ́Ꞌ, ńcʉ́ɔ sɛ̂ndúŋ ḿbɔ́ ńnɛn, pʉɔ tɛ ńzɑ́ɑ pɔ́ nzʉʉ yɛ́. A shɔtnɛ ńcú mbɔ̌ pɔ́p ŋɡɔ:

²⁶«Ŋu lɑɑ ńcʉ́ɔ nzʉʉ mɔ, kɛ́ kɔŋ wɑ́ɑ ńtsɑ tɑ́t wɛ, ńtsɑ mɑ́ wɛ, ńtsɑ nzwɛ́ wɛ, ńtsɑ mbɔ́ŋkʉ̈ɔ́ pɛ́, ńtsɑ pɔ́ɔpɛ́mɑ́ pɛ́ pɛ mbɛ́ɛnɛ mbɑ pɛ pɑŋɡɛ́, ńtsɑ mbɑ kwɑꞋ tú mbʉʉ wɛ́ pɔ́, mbɔ ɑ kɛ́ kuꞋ nɛpɔ́ ŋɡɑŋku wɑɑ pɔ́.

²⁷Ŋu lɑɑ ḿbɔɔ tíi yɛ́ tʉ́ mbɑ́ŋtɛ pɑ́ŋtɛ́nɛ ńdɔk ḿbɛ́m nɛpfú, lɑ ńcʉ́ɔ nzʉʉ mɔ pɔ́, mbɔ ḿbɔ́ ɑ pɔɔ kuꞋ nɛpɔ́ ŋɡɑŋku wɑɑ pɔ́.»

²⁸Pɔ́Ꞌɔ lɑ́, ŋu wʉʉ lɑɑ ḿbɔ́ ŋ́ɡʉ ŋ́kút mɑ́mɑ́ ndɑ́, mbɔ ɑ ɡʉ ńzɛ ńnɑ́ŋ sɛ́ ŋ́kwɑŋɛ yúu-fɑꞋ, ńjí ndɛn ŋkɑ́p yi ḿbɔ́ ɑ lɔk ŋ́kút tɛ ńjʉ́ɔ ɛ́ kuꞋ nǔu wɛ́,

²⁹ḿbɔ́k nɛnɔŋ cʉ́, ndɑ́ tsɑ wɛ́. Pɛ́ lɑ́Ꞌ ńjúk ńjʉ́ɔ ŋ́ɡwɛ wɛ́ ŋɡɔ:

³⁰«Jʉ́ɔ pɑ́Ꞌ wɛcɔ́ ŋu wɑ́ kɑ zɛnɛ ndɑ́, ḿbɔɔ kuꞋ nɛmɛkŋɛ pɔ́.»

³¹Kɛ pɔ fɔɔtúu ẅi ɑ sɛ́ niitɛ mbʉʉ yɛ nɛɡʉ ńdʉ̈ɔ́Ꞌ wɛcɔ́ fɔɔtúu ẅi ɑ lɔknɛ ntsɔ kɛm wɛ́, mbɔ ɑ ɡɛ ɛ́sɑ́ŋ pɛ́ pʉɔ jʉ́ɔ ŋɡɔ kɛ ɛ́ lɑɑ ḿbɔ́ ɑ lɔk pʉɔ ntsɑ́Ꞌ nɛɡɛ́m, ŋ́ɡʉ ńdʉ̈ɔ́Ꞌ wɛcɔ́ fɔɔ ẅí ɑ lɑ́Ꞌnɛ ńdɔk pʉɔ ntsɑ́Ꞌ mɛɡɛ́mɛ́mbɑ́ ńtɔ́ nɛlʉ̈ɔ́Ꞌ wɛ́ nɛ́ ntsɔ ɔ́ɔ?

³²A lɑɑ ńjʉ́ɔ, ɛ́ tsɑ wɛ́, mbɔ fɔɔ ẅí ɑ lɑ́Ꞌnɛ ńdɔk ntsɔ ńtɔ́ ɡɛ ḿbɛ́t pɔ ŋɡɑ sɛsɑ, ɑ túu nɛnkɛ́m, ɑ ɡʉ ḿbúꞋ mbɔ́ mbɔ̌ wɛ́ ŋɡɔ ɑ sẅíi wɛ́ nɛ́ yúu mi ɛ́ lɑɑ ḿbɔ́ ɑ ɡɑ́ lɑ́ ŋ́ɡẅɛɛ mbɔ́tnɛ.

³³Pɔ́Ꞌɔ Yɛ́su cú mbɔ̌ pɔ́p ŋɡɔ: «Ɛ́ ndʉ́ŋndʉŋ pɔ́Ꞌɔ, mbɑ wɔ̌ lɑ́ tsɛtsɛt pʉʉ lɑɑ ḿbɔɔ piitɛ ńnɑ́ yúu tsʉʉ yi ɑ ɡẅɛɛnɛ pɔ́, mbɔ ɑ kɛ́ kuꞋ nɛpɔ́ ŋɡɑŋkuwɑɑ pɔ́.»

³⁴Ŋɡwɑ́ŋ yúu sʉ́Ꞌnɛ, lɑ́ ɛ́ lɑɑ ńtsʉ́Ꞌ ńdɛplɛ lɛpɛlɛ́nɛ, mbɔ pɛ́ ŋ́ɡɛ ŋ́ɡɔ ku tɛ ɛ́ pɛn ńdʉʉ?

³⁵Ɛ́ kɑ́ pɛn ŋ́kuꞋ nǔu yɛcɔ́ yúu pɔ́, ḿbɔ́ ɛ́ pɔɔ tsɛ́tsɑ́Ꞌ cẅɛ́lɛ́, pɛ́ kɛ́ ḿbɔɔ lɔk ŋ́ɡɛ mɛkyɑŋɛ pɔ́, pɛ́ tsʉꞋ ḿmɛꞋ mɛꞋnɛ. Ŋu lɑɑ ŋ́ɡẅɛɛ mɛtúutɛ́ nɛlɔk ńzúꞋ nu, ɑ zúꞋ.