Read Ngomba Lúkɑ́shi 16 Bible Online

Lúkɑ́shi 16 - Ngomba bible

Lúkɑ́shi 16

¹Yɛ́su pɛn ńcú mbɔ̌ ɡɑŋku pɛ́ ŋɡɔ: «Wɛcɔ́ ŋɡɑŋyúu kɑ lɑ́Ꞌ ŋ́ɡẅɛɛ ŋɡɑŋfɑꞋ ẅi ɑ líŋɛ́nɛ yúu pɛ́ tsʉʉ. Pɛ́ lɑ́Ꞌ lɛ́Ꞌ ɛ́sẅíi wɛ́ ŋɡɔ ŋɡɑŋfɑꞋ ɛ̂wɑ́ tsʉ́Ꞌ ḿbʉ́ʉpɛ yúu pɛ́ pʉ́ʉpɛnɛ.»

²A fúŋ wɛ́ ḿbíkŋɛ wɛ́ ŋɡɔ: «N zúꞋ pɛ́ cú ŋɡɔ ɔ tsʉ́Ꞌ ŋ́ɡɛ pɔ ŋ́ɡɔ ku lɑ́ɑ? Pɔ́tnɛ ɛ́sɑ́ŋ yúu pi ŋ kɑ níꞋnɛ mbɔ̌ wu ɛ́sẅíi wɑ́ɑ. Mɔ, ŋ kɑ́ pɛn ŋ́kɔŋ ŋɡɔ ɔ líŋɛ mɛyúu mɑ́ɑ pɔ́.»

³ŊɡɑŋfɑꞋ ɛ̂wɑ́ zúꞋ ŋ́kwɑŋɛ ŋɡɔ: «Mɔ ŋ́ɡɛ ŋ́ɡɛ ŋ́ɡɔ ku pɑꞋ tɑ̌ɑfɑꞋ wɑɑ ɡɛ ńzuŋ wɑ́ɑ lɑɑ? N dɑɑ ŋɡɔ ŋ ɡɛ ńzʉ́Ꞌ nɑŋ, n dɔk tʉʉ ɡɔ́? Ńtsʉ́Ꞌ ŋɡɑŋndɔ́ɔ, mbɔ ɛ́ ɡʉ ḿbɔ́ nu-sʉ́ʉ nǔu mɔ.»

⁴Ńnɑ́ŋ tɛ ńcú ŋɡɔ: «N jí pɑꞋ mɔ ŋ́ɡɛ ŋ́ɡɛ tɛ ŋkɑ́ yi pɛ́ cẅɛɛtɛ́nɛ wɑ́ɑ nǔu fɑꞋ lɑ́, pʉɔ cẅɛ́ɛ wɑ́ɑ sʉ́Ꞌnɛ mɛnjɛ́Ꞌ mɔ́p.»

⁵Ŋ́ɡɛ pɔ́Ꞌɔ, ɛ́fúŋ mbɑ wɔ̌ lɑ́ ẅi ɑ kɑ ɡẅɛɛnɛ nɛpɑꞋ yúu mbɔ̌ tɑ̌ɑfɑꞋ wɛ, ḿbíkŋɛ nduŋmbi ŋɡɔ, ɔ pɑ́Ꞌɑ ŋ́ɡẅɛɛ lɑ́ɑ yi ɔ ɡɛ ńtsɔ́Ꞌ mbɔ̌ tɑ̌ɑfɑꞋ wɑɑ?

⁶A cú ŋɡɔ ŋ ɡẅɛɛ nɛɡɑ́ mɛɡwɛ́t pɑ̂n ŋkʉ, ŋɡɑŋfɑꞋ cú ŋɡɔ: «ŊwɑꞋnɛ yi ɔ kɑ ŋwɑꞋnɛnɛ pʉ́ɔ lɑɑ, ńtsʉ́Ꞌ ŋ́ŋwɑꞋnɛ pɔ mɛɡɛ́m ntɑɑ ŋkɔ̂ɔnɛ.»

⁷Ńcú mbɔ̌ wɛcɔ́ ŋu ŋɡɔ: «Ɔ pɑ́Ꞌɑ ŋ́ɡẅɛɛ lɑ́ɑ yi ɔ ɡɛ ńtsɔ́Ꞌ mbɔ̌ tɑ̌ɑfɑꞋ wɑɑ?» A cú ŋɡɔ: «mɛsɑ́ŋntsʉ́ʉ pɑɑ ŋkʉ.» A cú ŋɡɔ: «ŊwɑꞋnɛ yú pʉ́ɔ, ŋwɑꞋnɛ mɛɡɛ́m yɛ́nɛ́fɔ́m ŋkɔ̂ɔnɛ.»

⁸Tɑ́fɑꞋ ɡɛ ńjʉ́ɔ ntɛ́ yi ŋɡɑŋfɑꞋ kɛpɔŋ wɛ lɔknɛ ńtɑ́ɑ zúŋ pɔ́Ꞌɔ, ńtsʉ́Ꞌ ḿbɛ́m pɛ́mnɛ ŋɡɔ jínu yɛ́ ɡú. Yɛ́su cú mbɔ̌ pɔ́p ŋɡɔ: «Ɛ́ nɛ́nẅín ŋɡɔ pʉɔ-mbí yɔ jí nɛtɑ́ɑ zúŋ ńdɔk niitɛ mɛnu tsɛtsɛt pɔ́p, ńdɛɛ pʉɔ pinɛ pɔ́p zɑ́pnɛ tʉ́m yɔ́p nǔu Sɛ́.»

⁹Yɛ́su cú mbɔ̌ pɔ́p ŋɡɔ: «Pʉʉ lɔk yʉ́ʉ yúu ndǔ tsɛ́tsɑ́Ꞌ yɔ yi ɛ́ fúklɛ́nɛ wʉ́ʉ, ŋ́kúu kwɑꞋ súu yi ɛ́ ńtswɛ́ kɛ́ mɛ, ɛ́ lɑ́Ꞌ ńtʉ́ʉ ŋkɑ́ yi yîyɑ́ yúu kɑ́ pɛ́t ɡú pɔ́, pɔ́p lɔk wʉ́ʉ ŋ́kúu tsɛt mɛndɑ́ mi ɛ́ ńdɑ́Ꞌ ḿbɛ́ pɔ́, pʉʉ tswɛ́ ḿbɔ́ zúꞋu.

¹⁰Pɛ́ lɑɑ ńníꞋ mɔ́ɔ mɔ́yúu mbɔ̌ ŋu, ɑ pɑ́ɑ sʉ́Ꞌnɛ, mbɔ ɛ́ ɡʉ ńtɔ́ ḿbɔ́ yi ɛ́ zɑ́ɑnɛ, ɑ pɛn ḿbɑ́ɑ pɔ pɔ́Ꞌɔ, ńníꞋ mɔ́ɔ mɔ́yúu mbɔ̌ ŋu ɑ pɔɔ pɑ́ɑ sʉ́Ꞌnɛ pɔ́, mbɔ ɛ́ ɡʉ ńtɔ́ ḿbɔ́ yi ɡwɛ́ ɑ pɔɔ pɑ́ɑ sʉ́Ꞌnɛ pɔ́.

¹¹Pʉʉ lɑɑ ḿbɔɔ kuꞋ nɛpɑɑ yúu yi yɔ njí kɛpɔŋ pɔ́, mbɔ ɛ́ lɑɑ ḿbɔ́ wɔ̌ níꞋnɛ kwɑꞋ yúu yi tʉʉ ndɛn mbɔ̌ pʉʉ?

¹²Pʉʉ lɑɑ ḿbɔɔ jí nɛpɑɑ yúu ŋu ndɛꞋ pɔ́, mbɔ wɔ̌ ɡʉ ńdɑ́Ꞌ ŋ́ɡɑ́ yi ɛ́ kwɑꞋ yʉ́ʉ mbɔ̌ pʉʉ?»

¹³«Ɛ́ lɑɑ ḿbɔ́ wɛcɔ́ ŋɡɑŋfɑꞋ pɔɔ fɑꞋ mbɔ̌ pɛ tɑ̌ɑfɑꞋ pɛ́pɑ́ pɔ́. A lɑɑ ŋ́ɡɛ pɔ́Ꞌɔ, mbɔ ɑ ɡɛ ḿbɑɑ wɛcɔ́, ŋ́kɔŋ wɛcɔ́, ŋ́kɛ́ ḿbɔɔ pɔ́Ꞌɔ pɔ́, mbɔ ɑ ɡɛ ńcʉŋɛ nzʉʉ wɛcɔ́, ḿbɛn ŋ́ɡwɑ́k wɛcɔ́. Ḿbɔ́ pʉʉ pɔɔ ḿbɔ́ ńzɑ́p tʉ́m nǔu Sɛ́, ḿbɛn ḿbɔ́ ńzɑ́p nǔu ŋkɑ́p pɔ́.»

¹⁴Yɛ́su cú pɔ́Ꞌɔ, Pɑfɑlísɑy pinɛ pɔ́p ḿbɔ́nɛ zúꞋu zúꞋ, sɔ́ɔ, ŋ́ɡwɛ wɛ́ mbíꞋŋɡɔ pɔ́p ɡʉ̈ɔꞋ ŋkɑ́p tɛꞋ.

¹⁵A cú mbɔ̌ pɔ́p ŋɡɔ: «Pʉʉ pɑ́ ẅi pʉʉ júknɛ ɛ́fúklɛ pʉɔ ŋɡɔ pʉʉ pʉɔ sʉ́Ꞌnɛ, lɑ́, Sɛ́ kɛ́ ḿbɔ́ ńjí pɑꞋ tʉ́m yʉ́ʉ pɔ́nɛ. Pʉʉ jí ŋɡɔ: Nu yi pʉɔmɛsɔŋ jʉ́ɔnɛ ŋɡɔ ɛ́ nu tɛꞋ, ɛ́ mbi Sɛ́ ḿbɔ́ nu-sʉ́ʉ.»

¹⁶Yɛ́su pɛn ńcú ŋɡɔ: «Jɑ̂ŋ kɑ ŋ́ɡɔ ńtɔ́, pɛ́ pɔ́ ńzúꞋ pɔ nɛpʉ́ʉ-Mɔ̌sɛ̂ɛ, pɔ́p mɛnu-pɛŋɡɛ́mndʉ̈ɔ́Ꞌ-Sɛ́, pɛ́ ŋkɔ̂ɔnɛ ḿbɔ́ ɛ́sɑ́Ꞌ Ŋkʉʉ sʉ́Ꞌnɛ ńdɔk ḿbʉ́ ŋɡɔ nɛfɔɔ-Sɛ́ zɛ nɛtɔ́. Mbɑ wɔ̌ lɑ́ sɛ́ ɛ́sɑ́Ꞌ tʉʉ nɛpɛ́m ŋɡɔ Sɛ́ tsʉ́Ꞌnɛ ɛ́sɑ́Ꞌ wɛ́.

¹⁷Lɑ́ ŋ kɑ́ pɔ́ ńdɔk ńcú ŋɡɔ nɛpʉ́ʉ-Mɔ̌sɛ̂ɛ mɛ pɔ́, nɛpú pɔ́p tsɛ́tsɑ́Ꞌ ɡʉ ńdɑ́Ꞌ mɛ, lɑ́ sɑ̌ɑ yúu lɑ́Ꞌ mbɔɔ pɛ́ nǔu nɛpʉ́ʉ ɛ̂nɑ́ pɔ́.»

¹⁸«Ɛ́ pɔ́Ꞌɔ lɑ́ n dɔk ńcú ŋɡɔ: Ŋu lɑɑ ńzuŋ nzwɛ́ wɛ, ńzɔ́Ꞌ wɛcɔ́, mbɔ pɔ́p wîwɑ́ pɔ́ pɔ nǔu nu-ɡɑp. Ŋu ẅí ɑ pɛn ńzɔ́Ꞌ mɑŋɡɛ́ ẅi ndúu mɛ zuŋnɛ wɛ́, mbɔ ɑ ɡɛ pɔ ɡɑp.»

¹⁹Yɛ́su pɛn ńcú ŋɡɔ: «Wɛcɔ́ ŋɡɑŋkɑ́p kɑ lɑ́Ꞌ ḿbɔ́ ɡú, ńnɑ́ŋ ḿmɑꞋ mɛndẅí mi ɛ́ pɔ́ŋnɛ, ḿbɛn ńcʉ̈ɔ́k ŋkɑ́p tɛꞋ, ḿbɔ́ lɛ́Ꞌ tsʉʉ, ńnɑ́ŋ yɛ́ pɔ tsɛt tsɑ́ɑtɛ ɡwɛ́.

²⁰Wɛcɔ́ mbúŋ pɔ́ yí ɡú, lík yɛ́ pɔ́ ŋɡɔ Lɑzɑ̂ɑ. Mɛfʉ́ŋ puu ḿbɔ́ nǔu wɛ́ tɛꞋ, ɑ nɔɔ ntsundɑ́-ŋɡɑŋŋkɑ́p ɛ̂wɑ́,

²¹ḿbɔ́ ńtsɑ́ɑ ŋɡɔ kɛ ɛ́ lɑɑ ḿbɔ́ ŋɡɑŋkɑ́p ŋ́kwɛ́t yúu tɛ pɛ́ mɛꞋ pfuꞋ, ɑ lɑktɛ ɔ́ɔ, lɑ́, ńnɔɔ zúꞋu, mvú pɔ́nɛ ńtɔ́ ḿbyɑŋ mɛfʉ́ŋ mɛ́.

²²Ŋɡɑŋŋɡʉ̈ɔ́Ꞌ ɡɛ ḿpfú, pɛcʉ̈ɔ́Ꞌ-Sɛ́ tɔ́ ńtíi wɛ́, ŋ́ɡʉ ńtík nɛjɔ́ŋ Ábɛlɛhɑ̂m. Ŋɡɑŋkɑ́p ɡɛ ḿpfú yɛ́, pɛ́ tíi wɛ́ ńtẅí.

²³A kúu lɑ́Ꞌ pɛpfú, ḿbɔ́ ńjʉ́ɔ ŋɡʉ̈ɔ́Ꞌ tɛꞋ, ḿmɑꞋ lík ŋɡɑ sɛsɑ, ńjʉ́ɔ Ábɛlɛhɑ̂m, Lɑzɑ̂ɑ ńnɑ́ŋ nɛjɔ́ŋ yɛ́.»

²⁴Ŋɡɑŋkɑ́p zɛ nɛkíi ḿbúꞋ mbɔ́ mbɔ̌ ńcú ŋɡɔ: «Tɑ̌ɑ mɔ Ábɛlɛhɑ̂m, tsɑ́ɑ mɛjʉ́ŋ mɑ́ɑ, ńtúu Lɑzɑ̂ɑ, ɑ cʉɔꞌ mɔ́ɔ tɔ̂pɔ́ wɛ nǔu ŋki ńdɔk ńtɔ́, ńcʉ̈ɔ́kŋɛ nǔu lʉ́m yɑ́ɑ. MbíꞋŋɡɔ mɔ sɛ́ ńjʉ́ɔ ŋɡʉ̈ɔ́Ꞌ tsɛt múk wɔ tɛꞋ.»

²⁵Ábɛlɛhɑ̂m tsɔ́Ꞌ mbɔ̌ wɛ́ ŋɡɔ: «Mɔ́ɔ wɑɑ, kẅíitɛ pɑꞋ ɔ kɑ pɛ́t ndǔ mbí ḿbɔ́ tsɛt fuꞋ, Lɑzɑ̂ɑ pɔ́ ńjʉ́ɔ ŋɡʉ̈ɔ́Ꞌ, ɛ́ pɛn ḿbɔ́ ŋkɔ̂ɔnɛ, Lɑzɑ̂ɑ pɔ́ tsɛt fuꞋ, ɔ pɔ́ ńjʉ́ɔ ŋɡʉ̈ɔ́Ꞌ.

²⁶Ɛ́ zɛɛ ŋ́ɡɔ ḿbɔ́, mɑ́mɑ́ sɛ́m pɔ́ tsɛtsɛt pɛkŋɛ, tɛ ḿbɔ́ yi ŋu lɑɑ ɛ́fú zɑ́Ꞌnɛ ńdɔ́ɔ nɛɡʉ zɑ́Ꞌɑ, ɑ pɔɔ kuꞋ, ɛ́fú zɑ́Ꞌɑ ńdɔ́ɔ nɛtɔ́ zɑ́Ꞌnɛ, ɑ pɔɔ kuꞋ.»

²⁷Ŋɡɑŋkɑ́p cú mbɔ̌ wɛ́ ŋɡɔ: «Tɑ̌ɑ mɔ, m búꞋ mbɔ́ mbɔ̌ ɡu, mbɔ ɔ túu Lɑzɑ̂ɑ, ɑ ɡʉ tsɛt nɛtsɛ́nndɑ́ nɛ́k.

²⁸MbíꞋŋɡɔ pɔ́ɔpɛ́mɑ́ pɑ́ɑ pɛ́ mbɛ́ɛnɛ lɑ́Ꞌ pɛ́tɑɑ. N tsɑ́ɑ ŋɡɔ Lɑzɑ̂ɑ pɛn ŋ́kɑ́k nɛtúutɛ nɔ́p, ŋ́ɡɑ́ wɔ́p nɛ́ ntík ḿbɔ́k pɑꞋ pɔ́p ɡʉ ńdɑ́Ꞌ ḿbɛn ńtɔ́ ŋ́kúu yɔ́p tsɛt yɔ zʉꞋ ŋɡʉ̈ɔ́Ꞌ.»

²⁹Ábɛlɛhɑ̂m tsɔ́Ꞌ mbɔ̌ wɛ́ ŋɡɔ: «Pɔ́ɔpɛ́mɑ́ pú ɡẅɛɛ Mɔ̌sɛ̂ɛ, ḿbɛn ŋ́ɡẅɛɛ mɛ pɛŋɡɛ́mndʉ̈ɔ́Ꞌ-Sɛ́. Pɔ́p zúꞋ wɔ́p.»

³⁰Ŋɡɑŋkɑ́p cú ŋɡɔ: «Ŋɡɑ́ŋ, mbɑ́ɑ Tɑ̌ɑ mɔ Ábɛlɛhɑ̂m, ɛ́ nu lɑ́, ŋu lɑɑ ɛ́fú lɑ́Ꞌ-pɛpfú ḿbɛn ńtɔ́ ɛ́sẅíi wɔ́p, mbɔ pɔ́p ɡɛ ńzúꞋ, ɛ́ kúpmɛ mɑt wɔp.»

³¹Lɑ́ Ábɛlɛhɑ̂m cú mbɔ̌ wɛ́ ŋɡɔ: «Pɔ́p lɑɑ ḿbɔɔ zúꞋ sẅiŋɛ-Mɔ̌sɛ̂ɛ mbɑ yi pɛŋɡɛ́mndʉ̈ɔ́Ꞌ-Sɛ́ pɔ́, mbɔ ŋu lɑɑ ńzɛɛ ńzẅíimɛ zẅíimɛnɛ, ńtɔ́ ɛ́sẅíi wɔ́p pɔ kʉ̈ɔ́ lɑ́, mbɔ pɔ́p kɛ́ pɛ́m.»