Read Ngomba Lúkɑ́shi 17 Bible Online

Lúkɑ́shi 17 - Ngomba bible

Lúkɑ́shi 17

¹Yɛ́su pɛn ńcú mbɔ̌ ɡɑŋku pɛ́ ŋɡɔ: «Yúu mi ḿbɔ́ pɛ́ fú nǔu ɛ́fɑɑnɛ nu, ɛ́ lɑɑ ḿbɔ́ ɛ́ pɔɔ zɑ́k. Lɑ́, pɛ́ktú ŋu ẅí ɑ ɡɛ ŋ́ɡɛ ŋu fɑɑnɛ nu.»

²Mbi pɑꞋ mbɔ pɛ́ cʉŋɛ mɑ́mɑ́ luŋ lɔ́ŋ-ŋɡɑŋ, ḿmɑꞋ wɛ́ tsɛt Mí, ńtsɑ pɑꞋ ḿbɔ́ pɛ́ nɑ́ wɛ́, ɑ ɡɛ tɛ wɛcɔ́ tɑ́Ꞌ nǔu pɛɡɛɡʉʉ pɑ́ɑ lɛɛ nzʉʉ yɛ́ lɑ ɛ́fɑɑnɛ nu.

³Pʉʉ kɛ ńdɑk tú yʉ́ʉ. Mɔ́ɔmɑ́ pɛ́ ŋu lɑɑ ŋ́ɡɛ nu kɛpɔŋ nǔu wɛ́, ɑ pɔ́tnɛ ɛ́sẅíi wɛ́, mbɔ ɑ lɑɑ ḿbɛ́m mɛfɑɑnɛ mɛ́, ɑ likŋɛ ŋ́ɡɑ́ mbɔ̌ wɛ́.

⁴Ŋ́kɛ́ ńjúk tɑ́Ꞌ lɛ́Ꞌ ŋ́ɡɛ nu kɛpɔŋ nǔu wɛ́ pɔ mbɑ ŋkɑ́ sɑɑmbɑ́, ḿbɛn ńtɔ́ ŋkɑ́ sɑɑmbɑ́, ḿbɛ́m mɛfɑɑnɛ mɛ́ mbɔ̌ wɛ́, ḿbɔ́ ɑ ńdikŋɛ ŋ́ɡɑ́ mbɔ̌ wɛ́.

⁵Gɑŋntúu-Yɛ́su cú mbɔ̌ wɛ́ ŋɡɔ: «Tsɑpʉɔ, cẅɛ́lɛ́ wɛk nɛkẅiꞋ ńzɑ́p tʉ́m yɛk nǔu Sɛ́!»

⁶Yɛ́su cú ŋɡɔ: «Nɛsɑɑ-sɛ́súk yúu ŋ́kʉ̈ɔ́k tɛꞋ, ŋu wʉʉ lɑɑ ńzɛɛ ńzɑ́p tʉ́m yɛ́ nǔu Sɛ́ mbɑ mɔ́zʉꞋ pɔ́Ꞌɔ, mbɔ ɑ ɡɛ ńcú mbɔ̌ tʉ́ yi ɛ́ tʉ́ʉnɛ lɑɑ ŋɡɔ: Tsɔ́Ꞌnɛ ŋ́ɡʉ ńtʉ́ʉ tsɛt Mí, mbɔ ɛ́ ńzúꞋ ntsu wɛ́.»

⁷Pɛkŋɛ pɛ́ɛ fʉꞋ ŋɡɔ ŋu wʉʉ ɡẅɛɛ ŋɡɑŋfɑꞋ, ɑ lɑɑ ńjúk tɛt ńzʉ́Ꞌ nɑŋ, kɛ ńjúk ńtsiinɛ pɔ mɛyúumɛku ɔ́ɔ, ŋ́ɡɛ ḿbɛn nzʉʉ, mbɔ jʉ́ ẅi ɑ tɑ̌ɑfɑꞋ lɑ́, ɡɛ ńcú mbɔ̌ wɛ́ ŋɡɔ: «Gʉ ńnɑ́ŋ sɛ́ nɛtʉʉ ŋ́kwɛ́t yúu?

⁸Kɛ ŋɡɔ ɑ ɡɛ cú mbɔ̌ wɛ́ pɔ ŋɡɔ: “Kúpmɛ mɛndẅí, niitɛ yúujʉ́ pɑ́ɑ tík mbɔ̌ mɔ, ńzẅíꞋlɛ ŋ kwɛ́t, ḿbɛn ńnɔ́ mɛluꞋ lɑ́ ɔ kɛ ḿbɔɔ ŋ́kwɛ́t yú yúu ḿbɛn ńnɔ́ mú mɛluꞋ pɔ́ ɔɔ?”

⁹A kɛ́ ŋ́ɡɑ́ pɑ́Ꞌlɑ́ mbɔ̌ ŋɡɑŋfɑꞋ, mbíꞋŋɡɔ ɑ ɡɛ yúu mi ɑ cúnɛ pɔ́.

¹⁰Mbɑ yʉ́ʉ fɑꞋ kɛ ḿbɛn ḿbɔ́ pɔ pɔ́Ꞌɔ. Pʉʉ lɑɑ ńdɑ́Ꞌ ɛ́fɑꞋ fɑꞋ yi pɛ́ cúnɛ mbɔ̌ pʉʉ tɛ ḿmik, pʉʉ cú pɔ ndɑꞋ ŋɡɔ: “Pɛk yɛk pɔ pɛɡɑŋfɑꞋ níinɛ, pɛk ɡɛ pɔ yúu mi pɛ́ lɑ́Ꞌnɛ ńcú ŋɡɔ pɛk ɡɛ.”»

¹¹Yɛ́su kɑ pɛ́t ḿbɔ́ pɔ sɛ̂ndúŋ ḿbɔ́ ŋ́ɡʉ Yɛlúsɑlɛm, ńdɛɛ nǔu nɛpɑt-lɑ́Ꞌ-Pɑsɑmɑlíyɑ pɔ́p Pɑŋɡɑlílíyɑ.

¹²Ŋ́ɡʉ tɛ ŋ́kúu tsɛt yɛcɔ́ lɑ́Ꞌ, ɡɑŋkɑꞋpɑ́p nɛɡɛ́m zɑ́Ꞌ wɛ́, lɑ́ ńtʉ́ʉ pɔ ŋɡɑ sɛsɑ,

¹³ŋ́kíi nɛ́ tʉʉ ńcú ŋɡɔ: «Yɛ́su, Ndɛ, tsɑ́ɑ mɛjʉ́ŋ mɛk.»

¹⁴Yɛ́su jʉ́ɔ wɔ́p, ńcú mbɔ̌ pɔ́p ŋɡɔ: «Pʉʉ ɡʉ ńnyɛt mbʉʉ yʉʉ mbɔ̌ pɑnɔ́ŋpɔꞋ.» Pɔ́p cʉ́ɔ sɛ̂ndúŋ, ḿbɔ́ ŋ́ɡʉ, ńjʉ́ɔ, mbɔ ŋkɑꞋ mɛ nǔu pɔ́p.

¹⁵Wɛcɔ́ tɑ́Ꞌ nǔu pɔ́p jʉ́ɔ pɑꞋ ɑ fíitɛ́nɛ, ḿbɛn nzʉʉ, ŋ́kɑꞋ ŋɡi yɛ ŋ́ɡɑ́ tʉ́ ńdɔk ŋ́ɡúꞋlɛ Sɛ́.

¹⁶Ńtɔ́ ńnɔɔ kɛpkɛ́p mbi Yɛ́su, ŋ́ɡɑ́ pɑ́Ꞌlɑ́ mbɔ̌ wɛ́. Ŋɡɑŋ ḿbɔ́ ŋu-Sɑmɑlîi.

¹⁷Yɛ́su kɛ́ ńcú ŋɡɔ: «pʉɔ nɛɡɛ́m fíitɛ, pɛ pɛ́nɛ́pfuꞋú pɔ́ pɔ ɡɔ́?

¹⁸Pɔ́p fíitɛ pɛtsʉʉ, lɑ́ ndɑꞋ wɔ tɔ́nɛ nɛɡɑ́ pɑ́Ꞌlɑ́ mbɔ̌ Sɛ́ pʉ́ɔ? Ḿbɛn ḿbɔ́ ŋu-Sɑmɑlîi?»

¹⁹Pɔ́Ꞌɔ, Yɛ́su ɡɔ́ɔ ŋ́kɛ́ ńcú mbɔ̌ ŋu-Sɑmɑlîi ɛ̂wɑ́ ŋɡɔ: «Lɔ sɛ́ ŋ́ɡʉ, Sɛ́ ɡɛ ɔ luk, ntɛ́ pɑꞋ ɔ zɑ́p tʉ́m yú nǔu mɔ.»

²⁰Pɛcɔ́ pɑfɑlísɑy ɡɛ ḿbíkŋɛ Yɛ́su ŋɡɔ: «Sɛ́ ɡɛ ńdɑ́Ꞌ ńzɛ nɛsɑ́Ꞌ mbí pɔ shʉ́nɛ? A tsɔ́Ꞌ mbɔ̌ pɔ́p ŋɡɔ: “Nɛfɔɔ-Sɛ́ kɑ́ ɡɔ ńzɛ pɛ́ pɔ́ ńdɔk mík ńjʉ́ɔ pɔ́.”

²¹Mbɔ pɛ́ pɔɔ cú ŋɡɔ: “Ɛ́ pʉ́ɔ zɑ́Ꞌnɛ kɛ pɔ nɛcú ŋɡɔ, ɛ́ píi zíꞋnɛ pɔ́. N zɛɛ ńcú pɑꞋɑ, mbɔ nɛfɔɔ-Sɛ́ ńdɑ́Ꞌ mɔ́ ḿbɔ́ tsɛtsɛt pʉʉ[14].” »

²²Yɛ́su pɛn ńcú mbɔ̌ ɡɑŋku pɛ́ zɛ́nɛ pɔ́p ŋɡɔ: «Yɛcɔ́ ŋkɑ́ ɡʉ ŋ́ɡɛ ḿbɔ́ pʉʉ tsɑ́ɑ pɑꞋ pʉʉ pɛ́ Mɔ́ɔ-ŋu ɡʉ ḿbɛn ńjúk pɔ ndɑꞋ tɑ́Ꞌ lɛ́Ꞌ,kɛ́ ḿbɔɔ wɛ́ jʉ́ɔ.»

²³Pʉɔ ɡʉ ńdɑ́Ꞌ ḿbɔ́ ńcú mbɔ̌ pʉʉ ŋɡɔ: «A pʉ́ɔ zɑ́Ꞌnɛ kɛ pɔ ŋɡɔ ɑ pʉ́ɔ liinɛ zíꞋnɛ ɔ́ɔ. Pʉʉ pɑ́ɑ nɛzuŋtɛ, kɔɔ pʉʉ kɑ́t ŋ́kʉɔ mɛndʉ́ɔlɛ́.

²⁴Mɔ́ɔ-ŋu ɡʉ ńzɛɛ ńdɑ́Ꞌ ŋ́ɡɔ ńtɔ́ pɛ́ jʉ́ɔ wɛ́ pɑꞋ mɛnɛ́ɛ-mbʉŋ mi ɛ́ lɛɛnɛ ŋɡɔ ŋwɑŋ, ɛ́fú nǔu mbú-ŋɡɔŋ ŋ́kúu nǔu nɛcɔ́, ḿbuu ŋ́kyɛꞋ zʉꞋ tsʉʉ.

²⁵Lɑ́, ɛ́ ɡʉ ŋ́kɛ́ ńzɛɛ ŋ́ɡɔ ḿbɔ́ pɔ́Ꞌɔ, Mɔ́ɔ-ŋu zɛ ḿbiitɛ ńjʉ́ɔ ŋɡʉ̈ɔ́Ꞌ pɑꞋɑ tɛꞋ, pʉɔ pinɛ pɔ́p ndǔ mbí ŋkɔ̂ɔnɛ lʉꞋ wɛ́.

²⁶A ɡʉ ńdɑ́Ꞌ ŋ́ɡɔ ńtɔ́ mɛnu mi ɛ́ kɑ ɡɛnɛ ŋkɑ́ Nɔwɛ́ pɛn ŋ́ɡɛ.

²⁷Ɛ́ ḿbɔ́ ŋkɑ́ ɛ̂yɑ́, pʉɔmɛsɔŋ pɔ́ ŋ́kwɛ́t yúu, ḿbɔ́ ńnɔ́ mɛluꞋ, ḿbɔ́ ńdɑ́ɑ ndɑ́, ŋ́ɡɑ́ pɔ́ɔ pɔ́p lɑ́ɑndɑ́, tɛ ŋ́kúu lɛ́Ꞌ yi Nɔwɛ́ kɑ kúunɛ tsɛt pɑ́ŋ. Ŋki ŋ́kɔ́Ꞌ ḿbuu ḿbík wɔ́p pɛ́tsʉʉ.

²⁸Ɛ́ ɡʉ ńdɑ́Ꞌ ḿbɛn ḿbɔ́ pɔ pɑꞋ mɛnu mi ɛ́ kɑ ɡɛnɛ nǔu ŋkɑ́ Lɔ̂t: Pʉɔ mɛsɔŋ kɑ pɔ́ ŋ́kwɛ́t, ḿbɔ́ ńnɔ́, ḿbɔ́ ńzúu, ḿbɔ́ ɛ́fɛn, ḿbɔ́ ḿbɛ́ɛ yúu, ḿbɔ́ ŋ́kút mɛndɑ́.

²⁹Tɛ ńdɑ́Ꞌ ŋ́kúu nǔu lɛ́Ꞌ yi Lɔ̂t kɑ fúnɛ tʉ́sɔŋ Sɔdɔ̂m tɛ ńcẅɛt. Sɛ́ fú tʉ́nɛ́pú, ńtúu mbʉŋ múk pɔ́p mɛkɑɑ, ḿbuu ḿbík lɑ́Ꞌ ɛ̂yɑ́ tɛ ɛ́ mɛ.

³⁰Ɛ́ ŋ́ɡɛ ḿbɛn ḿbɔ́ pɔ pɔ́Ꞌɔ, nǔu lɛ́Ꞌ yi Mɔ́ɔ-ŋu ɡʉ ńdɑ́Ꞌ ḿvukŋɛ vukŋɛnɛ ńtɔ́.

³¹Ɛ́ ńdɔ ḿbɔ́ lɛ́Ꞌ ɛ̂yɑ́, ŋu ẅí ɑ ɡɛ ńdɑ́Ꞌ ḿbɔ́ ndǔ tɛtɑ́ɑ yi ɛ́ ndǔ ndɑ́ pɔɔ fú zúꞋu ńcúŋ ŋɡɔ ɑ ɡʉ ḿbɛ́ɛ yúu lɑ́ ŋ́kʉɔ pɔ́. Ŋu ẅí ɑ ŋkɑ́Ꞌ pɔɔ njɛ́Ꞌ yɛ́ pɛn.»

³²Pʉʉ kẅíitɛ nzwɛ́-Lɔt.

³³Ŋu ẅí ɑ ɡʉ ŋ́ɡɛ ńdɔ́ɔ nɛpɑ́ɑ wɛ nɛpɔ́ ɡʉ ŋ́ɡɛ ḿbɛ́ wɛ nɛpɔ́ ɛ̂wɑ́, ŋu ẅí ɑ pɛ́mnɛ nɛpɛ́, jʉ́ ɡʉnɛ ŋ́ɡɛ ḿbɔ́ ɡú.

³⁴Ɔ́ɔŋ ɛ sẅíi wʉ́ʉ, ɛ́ ɡʉ ńdɑ́Ꞌ ḿbɔ́ nɛtúꞋ lɛ́Ꞌ yîyɑ́, ḿbɔ́ yi pʉɔ nɔɔ kúu pɛ́pɑ́, mbɔ pɛ́ ɡʉ ńdɔk tɑ́Ꞌ ŋu ŋ́ɡʉ ńnɑ́ wɛcɔ́,

³⁵ḿbɔ́ yi pɑŋɡɛ́ pɛ́pɑ́ ḿbɔ́ ŋ́ɡɔꞋ ŋɡɛsɑ́ŋ ndǔ luŋ ńcẅɛ́ɛnɛ, mbɔ pɛ́ ɡʉ ńdɔk tɑ́Ꞌ ŋ́ɡʉ, ńnɑ́ wɛcɔ́,

³⁶[ḿbɔ́ yi mbɛ́ɛnɛ ŋkɑ́Ꞌ pɛ́pɑ́, mbɔ pɛ́ ɡʉ ńdɔk tɑ́Ꞌ ŋ́ɡʉ, ńnɑ́ wɛcɔ́][15].

³⁷Gɑŋku-Yɛ́su ɡɔ́ɔ ŋ́kɛ́ ḿbíkŋɛ wɛ́ ŋɡɔ: «Tsɑpʉɔ, yɔ ntɛ́ nu ɡʉ ńdɑ́Ꞌ ŋ́ɡɛ ɡɔ́?» A tsɔ́Ꞌ mbɔ̌ pɔ́p ŋɡɔ: «Pfú yúu ɡʉ ŋ́ɡɛ ḿbɔ́ ɡɔ́ lɑ́, pɛɡúm cúꞋlɛ zúꞋu.»