Read Ngomba Lúkɑ́shi 21 Bible Online

Lúkɑ́shi 21 - Ngomba bible

Lúkɑ́shi 21

¹Yɛ́su pɛ́t ḿbɔ́ pɔ ndɑ́-nɛnɔŋpɔꞋ, ɛ́shɔtnɛ ḿbɔ́ ńdíŋɛ zʉꞋ, ńjʉ́ɔ pɑ́Ꞌ ɡɑŋyúu sɛ́ ńníꞋ yúu-pɔꞋ tsɛt zʉꞋ yi pɛ́ níꞋnɛ yúu pɔꞋ zúꞋu.

²Ńjʉ́ɔ wɛcɔ́ mbúŋ mpfúk mɑŋɡɛ́ tɔ́ yɛ́, ńníꞋ pɑk ŋkɑ́p yɛ́pɑ́ yi ɛ́ kɑ́ kuꞋ yɛcɔ́ yúu pɔ́.

³Yɛ́su cú ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, mpfúk mɑŋɡɛ́ wɔ, ḿbɔ́ mbúŋ, níꞋ ŋkɑ́p, ńdɛɛ pʉɔ tsʉʉ.

⁴Pʉɔ tɛ ńzɑ́ɑ ɡɑ́ pɔ mɛtú-ŋkɑ́p mɔ́p. Lɑ́ ŋ́ɡʉ nǔu wɔ mbúŋ mɑŋɡɛ́, ɑ ɡɑ́ ndɑꞋ yí yúu mi ɑ ɡẅɛɛnɛ nɛlɔk ńnɑ́ŋ ndǔ ŋɡɔŋ.»

⁵Pɛcɔ́ ɡɑŋku pɛ́ nɑ́ŋ tɛ ńdíŋɛ ndɑ́-nɛnɔŋpɔꞋ, ḿbɔ́ ŋ́ɡʉ̈ɔꞋtɛ ńcú ŋɡɔ: «Lɑ́ ɛ́ pɔɔ pɔŋ, yɛcɔ́ ntɛ́ mɛŋɡɔꞋ sʉ́Ꞌnɛ mi pɛ́ kɑ lɔknɛ ŋ́kút, mbɑ yɛcɔ́ ntɛ́ yúu sʉ́Ꞌnɛ yi pɛ́ kɑ ɡɑ́nɛ pɛ́ lɔk ŋ́kẅii!» Yɛ́su cú mbɔ̌ pɔ́p ŋɡɔ:

⁶«Kɔɔ pʉʉ jʉ́ɔ pɔ pɑ́Ꞌ ɛ́ pɔ́ŋnɛ lɑɑ, yɛcɔ́ lɛ́Ꞌ ɡʉ ŋ́ɡɛ ḿbɔ́, pɛ́ puu ńtɑ́k, tɛ ŋɡɔꞋ pɔɔ pɛn ńzɑ́pmɛ ndǔ yɛcɔ́ pɔ́.»

⁷Pɔ́p píkŋɛ wɛ́ ŋɡɔ: «Ndɛ, yɔ nu ɡʉ ńdɑ́Ꞌ ŋ́ɡɛ shʉ́nɛ? Pɛ́ lɔk kʉ̈ɔ́ lɑ ńjí ŋɡɔ yîyɑ́ ŋkɑ́ sɛ́ ŋ́kuꞋ?»

⁸A tsɔ́Ꞌ ŋɡɔ: «Pʉʉ lɑk tú yʉ́ʉ, ḿbɑ́ɑ wʉ́ʉ nɛfʉꞋnɛ mɑt-pɛcɔ́ pʉɔ. MbíꞋŋɡɔ pʉɔ tɛ ńzɑ́ɑ ɡʉ ŋ́ɡɛ ńtík lík yɑ́ɑ mbi, mbɑ wɔ̌ lɑ́ nǔu pɔ́p pɔ́ ńcú ŋɡɔ mɔ pɔ́nɛ Nzɑ́Ꞌŋkʉ, ŋkɑ́ kuꞋ. Pɔ́p lɑɑ ńcú pɔ́Ꞌɔ, kɔɔ pʉʉ zúꞋ tɛ ńcʉ́ɔ nzʉʉ pɔ́p.

⁹Pʉʉ lɑɑ ḿbɔ́ tɛ ńzúꞋ pɛ́ pɔ́ ńcú nu nǔu mɛntsɔ mi ɛ́ cẅɛtnɛ, kɛ pɔ nǔu pɑ́klɛ yi ɛ́ shɔtnɛnɛ ḿvu tsɛt mɛlɑ́Ꞌ ɔ́ɔ, kɔɔ pʉʉ pɔ́k. Ɛ́ sɛ́ ḿbíkŋɛ ŋɡɔ yîyɑ́ yúu piitɛ ńdɛɛ, lɑ́ ɛ́ lɔk ḿbɔɔ nyɛt pɔ ŋɡɔ njí ɡɔ́ɔ ḿmɛ pɔ́.»

¹⁰Yɛ́su pɛn ńcú mbɔ̌ pɔ́p ŋɡɔ: «Lɑ́Ꞌ ɡʉ ńdɑ́Ꞌ ńdɔ sɛ́ ńdʉ̈ɔ́Ꞌ yɛcɔ́, Fɔɔ túu lɔ sɛ́ ńdʉ̈ɔ́Ꞌ wɛcɔ́.

¹¹Tsɛ́tsɑ́Ꞌ ɡʉ ńdɑ́Ꞌ mbuu ńtsʉꞋnɛ nǔu mɛzʉꞋ tɛ ńzɑ́ɑ, ɡwɑ́Ꞌ pɔ́p cʉ́ vu tsɛt mɛpɑk-ŋɡɔŋ tɛ ńzɑ́ɑ. Mɛtɛn mɛnu ɡɛ, mɛyúu mi pɛ́ ɡʉ ńjʉ́ɔ ḿbɔ́k pɔ́knɛ ńcẅɛt nɛpú.»

¹²Mɔnɛ mɛnu ɡʉ ńzɛɛ ńdɑ́Ꞌ ŋ́ɡɔ ńtɔ́, pʉʉ piitɛ ńjʉ́ɔ pɛ́ ɡẅɛɛ wʉ́ʉ, ńnyɛt wʉ́ʉ nɛ ŋɡʉ̈ɔ́Ꞌ, ɛ́fɛn wʉ́ʉ, pɛ́ ŋɑk wʉ́ʉ mɛndɑ́-cúꞋlɛ-Pɑyúdɑ, ńníꞋ wʉ́ʉ tsɑ́ŋ. Pɛ́ ɡʉ ńdɑ́Ꞌ ŋ́ŋɑk wʉ́ʉ mbi pɛfɔɔ pɔ́p pɛŋɡɔ́mnɑɑ, mbíꞋŋɡɔ pʉʉ zúꞋ ntsu wɑ́ɑ.

¹³Lɑ́ ɛ́ kɛ ńdɛɛ pɔ́Ꞌɔ, ńdɔk ŋ́ɡɑ́ wʉ́ʉ shʉ́ nɛsẅíi ŋu ẅí mɔ jʉ́.

¹⁴Kɔɔ pʉʉ zɑ́Ꞌ njí ḿmʉk ŋɡɔ pʉʉ ɡʉ ńdɑ́Ꞌ ŋ́kúu zʉꞋ-fɛꞋ mɛfɛꞋ ńzɔŋ tú yʉ́ʉ ŋɡɔ ku ɔ́ɔ?

¹⁵Mɔ ŋ́ɡɛnɛ ńzɛɛ ńdɑ́Ꞌ ŋ́ɡɑ́ jínu yi pʉʉ ɡɛ ńdɔk ńtsɔ́Ꞌ nu. Pʉʉ tsɔ́Ꞌ nu tɛ ɡɑŋmbuu pʉ́ʉ pɔɔ zɔŋ, ŋ́kɛ́ ḿbɔɔ kíi ńcú yɛcɔ́ nu pɔ́.

¹⁶KwɑꞋ pʉɔ pʉ́ʉ ɡɛ ńdɑ́Ꞌ ńzɑ́p nu nǔu pʉʉ, mbɑ kwɑꞋ pɛtɑ́t pʉ́ʉ pɔ́p pɛmɑ́ pʉ́ʉ, tɛ mbɑ pɔ́ɔpɛ́mɑ́ pʉ́ʉ, pɔ́p pʉɔ pinɛ pɔ́p pɑ́ɑtɛnɛ wʉ́ʉ, mbɑ pɛsúu pʉ́ʉ. Pɔ́p lɔk wʉ́ʉ ŋ́ɡʉ, pɛ́ ŋɑk wʉ́ʉ, jẅítɛ pʉɔ tɛ ńzɑ́ɑ tsɛtsɛt pʉʉ.

¹⁷Pʉɔ tsʉʉ ɡɛ ńdɑ́Ꞌ mbuu ḿbɑɑ wʉ́ʉ mɛlɑ́Ꞌ wɑ́ɑ.

¹⁸Lɑ́, yɛcɔ́ tɑ́Ꞌ nuk kɛ́ ḿbɔɔ tsɔ́Ꞌnɛ tú pʉʉ tɛ ḿbɛ́ pɔ́.

¹⁹Pʉʉ ńdɑ́Ꞌ ńdɔk nɛsʉk wʉ́ʉ ŋ́ɡẅɛɛ luk kɛ́mɛ.

²⁰Pʉʉ ŋ́ɡɛ ḿbɔ́ tɛ ńjʉ́ɔ pɑlʉ̈ɔꞋntsɔ tɔ́ ńzɛmɛ Yɛlúsɑlɛm tɛ ḿbuutɛ, pʉʉ jí ŋɡɔ ŋkɑ́ yi pɛ́ ɡɛ ɛ́sɑt tʉ́sɔŋ sɛ́ ŋ́kuꞋ.

²¹Ŋkɔ̂ɔnɛ lɑ́, ɛ́ pɔ́ŋ ŋɡɔ pʉɔ pinɛ pɔ́p Jẅidɛ̂ ŋ́kʉɔ ńdɔk wɛ́ mɛŋkɔ́Ꞌ ŋ́ɡʉ ńdʉɔmɛ, pʉɔ pinɛ pɔ́p tsɛt tʉ́sɔŋ-Yɛlúsɑlɛm fú zúꞋu ńcẅɛt, pʉɔ pinɛ pɔ́p tɛt pɑ́ɑ nɛpɛn ḿbɛn nzʉʉ nɛ́ tʉ́sɔŋ.

²²Ɛ́ lɔk pɔ́Ꞌɔ, ḿbɔ́ lɛ́Ꞌ yi Sɛ́ níꞋnɛ ŋɡʉ̈ɔ́Ꞌ tú pʉɔ Yɛlúsɑlɛm. Mɛnu mi pɛ́ kɑ ŋwɑꞋnɛnɛ tsɛt ŋwɑꞋnɛ-Sɛ́ lɔk ḿbuutɛ.

²³Yɛ́ɛ ŋɡʉ̈ɔ́Ꞌ ɛ́! Tɛ pɑŋɡɛ́ pinɛ pɔ́p ɡʉ ńdɑ́Ꞌ ḿbɔ́ shǔutɛ, mbɑ pinɛ pɔ́p ɡʉ ńdɑ́Ꞌ ḿbɔ́ ńnɔ́ŋ pɔ́ɔmbɔ́t nǔu mîmɑ́ mɛlɛ́Ꞌ ɡʉ ńdɑ́Ꞌ ḿbɔ́ ŋɡɔ ku? Sɛ́ ɡʉ ńdɑ́Ꞌ ńzɑ́ŋ lɔ́ŋ nǔu pʉɔ lɑ́Ꞌ pɔ. Pʉɔ tsʉʉ jʉ́ɔ kwɑꞋ mɑ́mɑ́ ŋɡʉ̈ɔ́Ꞌ.

²⁴Pɛ́ lɔk mɛníi-ntsɔ ŋ́ɡwɑt pʉɔ, ŋ́ɡẅɛɛ pɛcɔ́, ɛ́sɑt mɛlɑ́Ꞌ mɛlɑ́Ꞌ pɔ́p tsʉ́Ꞌ pɛkwɑɑ. Yɔ ntɛ́ yi pʉɔ mɛlɑ́Ꞌ mi pɔ́p kɑ́ jí Sɛ́ pɔ́, ɡʉ ńdɑ́Ꞌ ḿbuu ɛ́sɑt Yɛlúsɑlɛm pɔ́Ꞌɔ, ńnɔꞋ pʉɔ zúꞋu tɛ yɔ́p ŋkɑ́ lɑ́Ꞌ ḿmɛ.

²⁵Ɛ́ ɡʉ ńdɑ́Ꞌ ḿbɔ́ ŋkɑ́ ɛ̂yɑ́, pɛ́ jʉ́ɔ mɛlii cẅɛt nǔu mɔ́nɛm, ńcẅɛt nǔu sɑŋ mbɑ nǔu pɛcʉ̈ɔ́Ꞌ-sɑŋ. Ŋki kɛ́ ndẅiklɛ pʉʉnɛ, ḿbuu ńtsʉ́Ꞌnɛ tɛ pʉɔ tsʉʉ pinɛ pɔ́p ndǔ tsɛ́tsɑ́Ꞌ vukŋɛ ḿbuu ḿbɔ́k tɛꞋ.

²⁶Pʉɔmɛ́sɔŋ ńdɔ ḿbɔ́ ḿbɔ́k yúu mi ɛ́ ɡʉ ńtɔ́ ndǔ tsɛ́tsɑ́Ꞌ, ɛ́shʉ́ŋ. Mbɑ kʉ̈ɔ́ lɑ́ yi ɛ́ nɛpú, puu tɑ́kŋɛ.

²⁷Pɛ́ kɛ́ ŋ́ɡɔ́ɔ ńjʉ́ɔ Mɔ́ɔ-Ŋu pɔ́ tsɛt lɑ́ɑ ḿbɔ́ ńtɔ́, ŋ́ɡẅɛɛ Nɛŋwɑ́ŋɛ mbɑ mɑ́mɑ́ mɛtʉʉ.

²⁸Mɔ mɛnu lɑɑ ńdɑ́Ꞌ ḿbɔ́ tɛ ńzɛ nɛtɔ́, pʉʉ zẅíꞋlɛ yʉ́ʉ pɔ kɛ́ pɔ́k, mbíꞋŋɡɔ ŋkɑ́ yi Sɛ́ ɡɛ ńcẅɛɛtɛ wʉ́ʉ tsɛt ŋɡʉ̈ɔ́Ꞌ sɛ́ ŋ́kuꞋ.

²⁹Ńcú pɔ́Ꞌɔ, ɛ́sɑk nɛkɛt ŋɡɔ: «Pʉʉ líŋɛ tʉ́-zɔ̌ɔ pɔ́p mɛcɔ́ mɛtʉ́ lɑ́ ńjʉ́ɔ,

³⁰ɛ́ pɔ́ tɛ ńzɛ nɛtɔ́p, pʉʉ jí ŋɡɔ ŋkɑ́ luu sɛ́ ńtɔ́.

³¹Ndʉ́ŋndʉŋ pɔ́Ꞌɔ, pʉʉ lɑɑ ńdɑ́Ꞌ ḿbɔ́ tɛ ńjʉ́ɔ mɔ mɛnu zɛ nɛlɛɛtɛ, pʉʉ jí ŋɡɔ ŋkɑ́ yi Sɛ́ ɡʉ ńnyɛt nɛfɔɔ nɛ́ ndǔ mbí sɛ́ ŋ́kuꞋ.

³²Ɛ sẅíi wʉ́ʉ, kwɑꞋ nɛ́nẅín, pʉɔ pinɛ pɔ́p ndǔ mbí ŋkɔ̂ɔnɛ kɛ́ ɡɛ ńdɑ́Ꞌ ḿpfútɛ tɛ mɛ kɛ́ pɔ́ yi mɔ mɛnu tsʉʉ tɔ́ pɔ́.

³³Nɛpú pɔ́p tsɛ́tsɑ́Ꞌ ɡʉ ŋ́ɡɛ mɛ, lɑ́ sẅíiŋɛ yɑ́ɑ lɑ́Ꞌ ḿbɔɔ pɛ́.

³⁴Pʉʉ lɑk tú yʉ́ʉ nǔu nɛtsʉ́Ꞌ ńjúk ŋ́kwɛ́t pɔ yúu, ńnɔ́ mɛluꞋ tɛ ḿbɑ́, ḿbɔ́ ḿmʉk mɛnu nji nji ndǔ mbí, ḿbɔ́k jínu yʉ́ʉ nɛpɛ́, lɛ́Ꞌ lɑ́Ꞌ Mɔ́ɔ-Ŋu ɡɔ́ ńtɔ́, pʉʉ pɔɔ ḿbɔ́ ḿbyɛ́p wɛ́ pɔ́,

³⁵Ɛ́ pɔ́ mbɔ̌ pʉʉ pɑꞋ ɡwɑk lɑ́. Pʉʉ jí ŋɡɔ mɛnu-yîyɑ́ lɛ́Ꞌ ɡʉ ńdɑ́Ꞌ ḿvukŋɛ vukŋɛnɛ ŋ́ɡẅɛɛ pʉɔ tsʉʉ ndǔ tsɛ́tsɑ́Ꞌ.

³⁶Pʉʉ pɑ́ɑ nɛlɛ́, ḿbɔ́ ńcɛꞋlɛ Sɛ́ ŋkɑ́ tsʉʉ, ɑ ɡɑ́ wʉ́ʉ nɛ́ mɛtʉʉ nɛlɔk ńdɛɛ mɔ mɛnu[18] mi ɛ́ sɛ́ ńtɔ́ lɑ́ɑ, mbɑ nɛlɔk ńtʉ́ʉ kɛ́ kɔ́ sʉ́ʉ mbi Mɔ́ɔ-Ŋu.»

³⁷Yɔ pɑ́Ꞌ Yɛ́su kɑ pɔ́ ńzíꞋ pʉɔ nɛ́ yúu tsɛt ndɑ́-nɛnɔŋpɔꞋ lɛ́Ꞌ tsʉʉ, ḿbɔ́ ntsuŋkẅɛ́Ꞌ, ŋ́ɡʉ ndǔ nɛŋkɔ́Ꞌ ni pɛ́ fúŋnɛ ŋɡɔ nɛŋkɔ́Ꞌ-mɛtʉ́-mɛɡwɛ́t-Ɔlíivɛ, ńdɔ́ɔ zʉꞋ, ńdɛ́ zúꞋu.

³⁸Njí ɡɔ́ ŋɡɔ ɛ́ kyɛɛnɛ lɑɑnɛ, lɑ́Ꞌ tsʉʉ mʉ́ʉ mbɑꞋmbɑꞋɑ́, ńtɔ́ tsɛt ndɑ́-nɛnɔŋpɔꞋ, nɛjɔ́ŋ Yɛ́su nɛzúꞋ sẅiŋɛ yɛ́.