Read Ngomba Lúkɑ́shi 22 Bible Online

Lúkɑ́shi 22 - Ngomba bible

Lúkɑ́shi 22

¹Lɛ́Ꞌ tsɑ́ɑtɛ-Pɑyúdɑ yi pɛ́ kɑ pɔ́ ɛ́fúŋ nɛ́ Pɑ́skɑ ɡɛ ḿbɔ́ ŋ́kuꞋ, ńdɔk ńzɛ ŋɡɑp yi pɔ́p kɑ pɔ́ ŋ́kwɛ́t yɛcɔ́ ntɛ́ mbɛlɛ̂ɛt kɛ́ fɛntɛ.

²Pɛtɑ́tndɑ́ pɑnɔ́ŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́ ńdɔ́ɔ shʉ́ nɛɡɛ pɛ́ jẅí Yɛ́su, lɑ́ ḿbɔ́ ḿbɔ́k mík-lɑ́Ꞌ.

³Sɑ́ttɑ kúu tsɛt tʉ́m Jẅídɑ, ɑ pɔ́ wɛcɔ́ tɑ́Ꞌ ŋu nǔu pʉɔ ntsɔ̌ppɑ́ nɛ́ nɛɡɛ́m, ẅi yɛcɔ́ lík yɛ́ kɑ pɛnnɛ ḿbɔ́ ŋɡɔ Iskɑlyɔt.

⁴A ɡɔ́ɔ ŋ́kɛ́ ŋ́ɡʉ ńjʉ́ɔ Pɛtɑ́tndɑ́ pɑnɔ́ŋpɔꞋ pɔ́p pɑtʉ́ʉ mbi nǔu nɛpyɛ́p ndɑ́-nɛnɔŋpɔꞋ, pɔ́p pɛpɔ́p ŋ́kwɑŋɛ pɑꞋ ɑ ɡʉ ŋ́ɡɛ lɑ́ ɛ́fɛn Yɛ́su mbɔ̌ pɔ́p.

⁵Ɛ́ puu ḿbɔŋ wɔ́p, tɛ pɔ́p pɛ́m ŋɡɔ pɔ́p ɡʉ ŋ́ɡɑ́ ŋkɑ́p mbɔ̌ wɛ.

⁶A pɛ́m, ŋ́ɡɔ́ɔ ńzɛ nɛlɔ́ɔ shʉ́ pɑꞋ ɑ ɡʉ ɛ́fɛn Yɛ́su mbɔ̌ pɔ́p tɛ lɑ́Ꞌ pɔɔ jí.

⁷Lɛ́Ꞌ Pɑ́skɑ ɛ̂wɑ́ ɡɔ́ɔ ŋ́kɛ́ ńtɔ́, ḿbɔ́ lɛ́Ꞌ yi pɛ́ kɑ pɔ́ ŋ́ɡwɑt pɔ́ɔ-njinjɔ-tsɑ́ɑtɛ.

⁸Yɛ́su túu Pyɛ̂ pɔ́p Jɑ̂ŋ, ńcú mbɔ̌ pɔ́p ŋɡɔ: «Pʉʉ ɡʉ niitɛ yɛkŋɛ yúu-Pɑ́skɑ, pɛkŋɛ jʉ́.»

⁹Pɔ́p píkŋɛ wɛ́ ŋɡɔ: «Ɔ kɔŋ ŋɡɔ: “Pɛk ɡʉ ɡʉ̈ɔ́ niitɛ?”»

¹⁰A cú ŋɡɔ: «Pʉʉ zúꞋ sʉ́Ꞌnɛ, pʉʉ ɡʉ ŋ́ɡʉ tɛ ŋ́kúu tʉ́sɔŋ, ńjʉ́ɔ ŋu mbɛ́ɛnɛ ɡẅɛɛ tʉ́ɔ-ŋki, pʉʉ cʉ́ɔ nzʉʉ yɛ, tɛ ɑ kúu ndɑ́ pʉʉ kúu yʉ́ʉ.

¹¹Ńcú mbɔ̌ ŋɡɑŋndɑ́ ŋɡɔ: “Cícɑ cú ŋɡɔ pɛk píkŋɛ wú ŋɡɔ lûmndɑ́ yi pɔ́pɡɑŋku pɛ́ ɡʉ ńjʉ́ Pɑ́skɑ zúꞋu wɛ́tɛ́ ɔ́ɔ?”

¹²A ɡʉ ńnyɛt wʉ́ʉ mɑ́mɑ́ lûmndɑ́ ndǔ ndɛ̂k wɛ tʉ́, tɛ ḿbɔ́ pɛ́ ńdɑ́Ꞌ mɔ́ ńniitɛ sʉ́Ꞌnɛ, ɛ́ zʉꞋ yi pʉʉ ɡʉ niitɛ yɛkŋɛ yúu-tsɑ́ɑtɛ zúꞋu.»

¹³Pɔ́p ɡʉ ŋ́kúu zúꞋu, ńjʉ́ɔ mbɑ kʉ̈ɔ́ lɑ́ pɔ́ pɔ pɑꞋ Yɛ́su sẅíinɛ wɔ́p. Pɔ́p niitɛ yúujʉ́-Pɑ́skɑ zúꞋu.

¹⁴Ŋkɑ́ ɡɛ ŋ́kuꞋ, Yɛ́su pɔ́p ɡɑŋntúu pɛ́ tɔ́ ńnɑ́ŋ sɛ́,

¹⁵ḿbɔ́ ŋ́kwɛ́t yúu, ɑ cú mbɔ̌ pɔ́p ŋɡɔ: «Ŋ kɑ zɛɛ ńtsɑ́ɑ tɛꞋ pɑꞋ pɛkŋɛ ɡʉ ńjʉ́ wɔ Pɑ́skɑ lɑ́ n jʉ́ɔ ŋɡʉ̈ɔ́Ꞌ.

¹⁶Tsʉ́Ꞌnɛ ɛ sẅíi wʉ́ʉ sʉ́Ꞌnɛ: “Mɔ ńdɑ́Ꞌ ḿbɛn ńjʉ́ wɛcɔ́ Pɑ́skɑ pɔ́, tɛ ńdɑ́Ꞌ ŋ́kúu ŋkɑ́ yi nu wɔ tsɑ́ɑtɛ puutɛnɛ, Sɛ́ tsʉ́Ꞌnɛ ḿbɛn ɛ́sɑ́Ꞌ mbí.”»

¹⁷A kɑ sẅíi wɔ́p pɔ́Ꞌɔ, ŋ́ɡɔ́ɔ ŋ́kɛ́ ńtíi ntúꞋ mɛluꞋ, ŋ́ɡɑ́ pɑ́Ꞌlɑ́ mbɔ̌ Sɛ́, ńcú mbɔ̌ pɔ́p ŋɡɔ: «Pʉʉ kɔ ntúꞋ yɔ ńnɔ́ tɛ ḿmɛk wʉ́ʉ.

¹⁸Pʉʉ jí ŋɡɔ mɔ ńdɑ́Ꞌ ḿbɛn ńnɔ́ mɛluꞋ pɔ́ tɛ ńdɑ́Ꞌ ŋ́kúu ŋkɑ́ yi Sɛ́ ńtsʉꞋnɛ ɛ́sɑ́Ꞌ mbí.»

¹⁹A kɑ pɛn ḿbɛ́ɛ mbɛlɛ̂ɛt, ŋ́ɡɑ́ pɑ́Ꞌlɑ́ mbɔ̌ Sɛ́, ḿbʉ̈ɔ́Ꞌ ŋ́ɡɔ ŋ́ɡɑ́ mbɔ̌ ɡɑŋku pɛ́ ńcú ŋɡɔ: «Yɔ mbɑp-mbʉʉ yɑɑ yi pɛ́ ɡɑ́nɛ nǔu tú yʉ́ʉ. Pʉʉ tsʉ́Ꞌ ḿbɔ́ ŋ́ɡɛ pɑꞋnɛ ńdɔk ŋ́kẅíitɛ wɑ́ɑ.»

²⁰Pɔ́p kɑ kwɛ́t yúujʉ́ tɛ ḿmɛk, Yɛ́su tíi ntúꞋ mɛluꞋ ńcú ŋɡɔ: «NtúꞋ yɔ pɑꞋnɛ ḿbɔ́ kɑɑ fí yi Sɛ́ lɔknɛ mɛci mɑ́ɑ ŋ́ɡwɑt. Ɛ́ tswɛtnɛ ntɛ́ wʉ́ʉ.»

²¹Ŋ kɛ ńcú pɑꞋnɛ ŋu ẅí ɑ ɡɛ ɛ́fɛn wɑ́ɑ pɔ́ pɔ zɑꞋnɛ tɛ pɛkŋɛ pɔ́ tɛmtɛ ńjʉ́ yúu.

²²Ɛ́ nu ŋɡɔ Mɔ́ɔ-Ŋu ɡʉ ḿpfú pɑꞋ Sɛ́ kɑ lɑ́Ꞌnɛ ńzɑ́p, lɑ́ ndɔ́ɔ tú ŋu ẅí ɑ ɡʉ ńcɑklɛ wɛ́ ŋ́ɡɑ́ pɛ́ jẅí wɛ́.

²³Pɔ́p zúꞋ pɔ́Ꞌɔ, ḿbuu mɑɑ, ɛ́shɔtnɛ ḿbíkŋɛ tsɛtsɛt pɔ́p ŋɡɔ: Wɔ̌ pɑꞋnɛ ḿbɔ́ tsɛtsɛt pɔ́p ŋ́kuꞋ nɛfʉꞋ yɔ ntɛ́ nu ɔ́ɔ?

²⁴Gɑŋku-Yɛ́su ɡɛ ńzɛ nɛzɔŋ nu, ńdɔ́ɔ ŋu ẅí ɑ tsɛtsɛt pɔ́p ḿbɔ́ ndʉ́m.

²⁵Yɛ́su cú mbɔ̌ pɔ́p ŋɡɔ: «Pʉʉ pɛn ńjí yʉ́ʉ ŋɡɔ pɛfɔɔ pɑ́ kɛ́ jí Sɛ́ ḿbɔ́ ɛ́sɑ́Ꞌ mɛlɑ́Ꞌ mɔ́p, ḿbɔ́ ńnɔꞋ pʉɔ, ŋ́kɛ́ ŋ́kɔŋ pɔ ŋɡɔ pɛ́ fúŋ wɔ́p ŋɡɔ pɑɡɛ nu sʉ́Ꞌnɛ.

²⁶Lɑ́, kɔɔ pʉʉ fʉꞋnɛ wɔ́p. Tɛ ńtsʉ́Ꞌ pɔ́Ꞌɔ, ŋu ẅí ɑ tsɛtsɛt pʉʉ ḿbɔ́ ndʉ́m shɔtnɛ ńtsʉ́Ꞌ mɔ́ɔ, ŋu ẅí ɑ pɛn ńtʉ́ʉ mbi pʉʉ, ḿbɔ́ ɛ́sɑ́Ꞌ wʉ́ʉ, ɑ pɔ́ pɔ pɑꞋ ŋɡɑŋfɑꞋ wʉʉ lɑ́.

²⁷Pʉʉ zɛɛ ɛ́sẅíi wɑ́ɑ: “Ɛ́ ɡʉ nǔu ŋu ẅí ɑ nɑ́ŋnɛ Sɛ́ ḿbɔ́ ŋ́kwɛ́t yúu pɔ́p ŋu ẅí ɑ lɑ́Ꞌnɛ ńnɛ́ɛ ńtíi tík pɛꞋnɛ, wɔ̌ pɔ́ ndʉ́m?” Ŋu ẅí ɑ ńnɑ́ŋnɛ sɛ́ ŋ́kwɛ́t jʉ́ kɑ́nɛ pɔ́ ndʉ́m pɔ́ ɔɔ? Lɑ́, ŋ kɛ́ ḿbɔ́ tsɛtsɛt pʉʉ, ḿbɔ́ pɔ ŋu ẅí ɑ fɑꞋnɛ mbɔ̌ pʉʉ.»

²⁸Pʉʉ pɔ́p kɑ ńnɑ́ŋnɛ nɛjɔ́ŋ mɔ nǔu ŋkɑ́ ŋɡʉ̈ɔ́Ꞌ yɑɑ.

²⁹Ɛ́ yɛ́t lɑ́, ndʉ́ŋndʉŋ pɑꞋ Tɑ̌ɑ mɔ kɑ ɡɑ́nɛ nɛfɔɔ mbɔ̌ mɔ lɑ́, ŋ ɡɛ ńdɑ́Ꞌ ŋ́ɡɑ́ nʉ́ʉ nɛfɔɔ.

³⁰Ŋkɑ́ yi mɔ ŋ́ɡɛ ḿbɔ́ Fɔɔ lɑ́, pɛkŋɛ tɛmtɛ yúu ńjʉ́, ńnɔ́, pʉʉ pɛn ńnɑ́ŋ ndǔ mɛkɔꞋ-nɛfɔɔ, ŋ́ŋɑk njẅɛtndɑ́-Íslɑyɛ̂l ntsɔ̌ppɑ́ nɛ́ nɛɡɛ́m.

³¹Yɛ́su pɛn ńcú mbɔ̌ Pyɛ̂ ŋɡɔ: «Símɔ̂ŋ, Símɔ̂ŋ, Sɑ́ttɑ ńdɑ́Ꞌ mɔ́ ńdɔ́ɔ nɛtɑꞋ wʉ́ʉ pɛtsʉʉ ńtíitɛ, pɑꞋ pɛ́ tɑꞋnɛ mɛkúu ńtíitɛ lɑ́.

³²Lɑ́, n cɛꞋlɛ Sɛ́ nǔu tú yú, nɛpɔ́ yi ɔ kɛ́ puu ŋ́kɑ́ɑ kɑ́ɑnɛ nǔu nɛzɑ́p tʉ́m nǔu mɔ pɔ́. Ɔ ɡɛ ḿbɛn ḿbɔ́ tɛ ńtsuŋ ńzɑ́p tʉ́m yú nǔu mɔ, ḿbɔ́ ńníꞋ tʉ́m-pɔ́ɔpɛ́mɑ́ pú.»

³³Pyɛ̂ cú ŋɡɔ: «Tsɑpʉɔ, ɛ́ lɑɑ ḿbɔ́ pɔ nɛkúu tsɑ́ŋ, mbɔ ɑ pûu, ńtɔ́ ŋ́kɛ́ ḿbɔ́ pɔ nɛvú, mbɔ ɑ pûu.»

³⁴Yɛ́su cú ŋɡɔ: «Pyɛ̂, tsʉ́Ꞌ ŋ kɛ́ ɛ́sẅíi wú: Mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ ńtɔ́ŋ nɛtúꞋ lɔ́Ꞌnɛ, mbɔ ɔ muŋɛ mɔ́ wɑ́ɑ ŋkɑ́ yɛ́tɑ́t.»

³⁵Yɛ́su pɛn ḿbíkŋɛ ɡɑŋku pɛ́ ŋɡɔ: «Pʉʉ kẅíitɛ ŋkɑ́ yi ŋ kɑ túunɛ wʉ́ʉ ŋɡɑ sɛsɑ, pʉ́ʉ kɑ ɡʉ kɛ́ mɔ́ɔpɑɑ kɛ́ pɑɑlyɛpnɛ kɛ́ mɛtɑp, pʉʉ kɛ ńtswɛ́ ńnɛn pɛꞋnɛ, ńdɑ́Ꞌ ńjɑ́k kʉ̈ɔ́?» Pɔ́p cú ŋɡɔ ŋɡɑ́ŋ, yúu ŋkɑɑ zɑ́k.

³⁶A cú ŋɡɔ: «Ɛ́ ŋkɔ̂ɔnɛ pɑꞋnɛ, mbɔ ɛ́ kúpmɛ tɛ ŋu lɑɑ ŋ́ɡẅɛɛ mɔ́ɔpɑɑ-ŋkɑ́p wɛ, ɑ pɛ́ɛ, ŋ́ɡẅɛɛ pɑɑlyɛpnɛ yɛ, ɑ lyɛp. Ŋu ẅí ɑ kɑ́ ɡẅɛɛ níi-ntsɔ pɔ́, ɑ fɛn ndẅí-fɑ́k yɛ ńdɔk ńzúu yɛ.»

³⁷N cú pɑꞋnɛ, nu yí pɛ́ kɑ ŋwɑꞋnɛnɛ ntɛ́ wɑ́ɑ sɛ́ ŋ́ɡʉ ḿbuutɛ. Pɛ́ kɑ ŋwɑꞋnɛ tsɛt ŋwɑꞋnɛ ŋɡɔ: «Pɛ́ ɡʉ ńdɑ́Ꞌ ɛ́sɑ́ŋ wɛ́ tsɛtsɛt pɛfút. Mbɑ kʉ̈ɔ́ lɑ́ kɛ ḿbɔ́ pɑꞋnɛ ńzɛ zɛnɛ nɛpuutɛ.»

³⁸Gɑŋku pɛ́ cú mbɔ̌ wɛ́ ŋɡɔ: «Tsɑpʉɔ, mɛníi-ntsɔ mɑ́ɑ sɛ́ mɛmbɑ́.» Yɛ́su cú ŋɡɔ: «pʉʉ nɑ́ pɑ́Ꞌ.»

³⁹Yɛ́su kɑ cú pɔ́Ꞌɔ, ńcẅɛt, pɔ́p ɡɑŋku pɛ́ ŋ́ɡʉ nɛ́ ndǔ nɛŋkɔ́Ꞌ-mɛtʉ́-mɛɡwɛ́t-Ɔlíivɛ, pɑꞋ ɛ́ kɑ pɔ́nɛ mɑt mbɔ̌ wɛ.

⁴⁰Pɔ́p kɑ ɡʉ tɛ ŋ́kúu zúꞋu, ɑ cú mbɔ̌ pɔ́p ŋɡɔ: «Pʉʉ ńcɛꞋlɛ Sɛ́ ḿbɔ́k nɛkúu tsɛt ŋkwɑꞋnɛ ɛ́ tsɑ wʉ́ʉ.»

⁴¹Ń cú pɔ́Ꞌɔ, ńnɑ́ wɔ́p ḿbɛn ńtʉ́ʉ nɛmɑꞋ ŋɡɔꞋ, ńcúŋ ŋ́kẅíꞋlɛ sɛ́, ḿbɔ́ ńcɛꞋlɛ Sɛ́ ńcú ŋɡɔ:

⁴²«Tɑ̌ɑ mɔ, ɔ lɑɑ ńjʉ́ɔ, ɔ pɑꞋnɛ wɑ́ɑ nǔu yɔ ŋɡʉ̈ɔ́Ꞌ yi, ɛ́ sɛ́ ńtɔ́ nǔu mɔ lɑɑ. Lɑ́, mɔ ńcú ŋɡɔ ɔ ɡɛ pɔ wɑɑ nɛkɔŋtɛ pɔ́. Gɛ pɔ wu nɛkɔŋtɛ.»

⁴³Ńcú pɔ́Ꞌɔ, tɑ́Ꞌ Cʉ̈ɔꞋ-Sɛ́ tɔ́ ḿbɔ́ ńtɔ́ɔtɛ wɛ́.

⁴⁴Nɛvú pɔ́ ŋ́kwɛ́t wɛ́, ɑ ŋ́kẅiꞋ ńcɛꞋlɛ Sɛ́ ńníꞋ tú, tɛ ziꞋnɛ tsʉ́Ꞌnɛ ńcẅɛt nǔu wɛ, ńcʉ́ɔtɛ sɛ́, ɛ́fí pɔ mɛtyɑk-mɛci lɑ́.

⁴⁵ŃcɛꞋlɛ Sɛ́ tɛ ḿbɔ́tnɛ ńnɑ́ŋ, ḿbʉꞋ mbʉʉ yɛ, ḿbɛn nɛ nɛjɔ́ŋ ɡɑŋku pɛ́, ŋ́ɡɔ ńtɔ́, mbɔ pɔ́p mʉk mɔ́ tɛ ŋ́kɑ́ɑ ńdɛ́tɛ.

⁴⁶A cú ŋɡɔ: «Pʉʉ nɑ́ŋ kɛ́ lɛ́, ḿbɔ́k nɛkúu tsɛt ŋkwɑꞋnɛ, ɛ́ tsɑ wʉ́ʉ.»

⁴⁷A kɑ pɛ́t ńcú cúnɛ, nɔɔ-lɑ́Ꞌ tɔ́, tɛ Jẅídɑ ẅí ɑ ḿbɔ́nɛ wɛcɔ́ tɑ́Ꞌ ŋu tsɛtsɛt ɡɑŋku pɛ́ ntsɔ̌ppɑ́ nɛ́ nɛɡɛ́m pɔ́ mbi, ŋ́kẅɛ́Ꞌlɛ ńtɔ́ nɛ́ nɛjɔ́ŋ Yɛ́su, ńtɑ́ŋtɛ wɛ́, ńcɛꞋlɛ wɛ́.

⁴⁸Yɛ́su cú mbɔ̌ wɛ ŋɡɔ: «Jẅídɑ, ɔ ɡʉ ńdɔk pɔ nɛtɑ́ŋtɛ lɑ ńcɑklɛ Mɔ́ɔ-Ŋu pɔ?»

⁴⁹Gɑŋku-Yɛ́su pɔ́p ḿbɔ́nɛ nɛjɔ́ŋ yɛ jʉ́ɔ yúu mi ɛ́ ɡɛ ńdɛɛ, ḿbíkŋɛ wɛ́ ŋɡɔ: «Tsɑpʉɔ, pɛk lɔk mɛníi ńdʉ̈ɔ́Ꞌ?»

⁵⁰Wɛcɔ́ ŋu wɔp ɡɔ́ɔ ɛ́sɔŋ níi nɛlɔk ŋ́kʉ́ɔꞋ ŋu ńtɔ́ nɛkʉ́ɔꞋ, ńcẅɛɛtɛ nɛtúutɛ-ŋɡɑŋfɑꞋ-tɑ́tndɑ́-pɑnɔŋpɔꞋ nǔu ɡúŋ-pɔ́ tʉʉ.

⁵¹Lɑ́ Yɛ́su kɑkŋɛ wɛ́ ńcú ŋɡɔ: «pʉʉ pɔ́tnɛ ńnɑ́ŋ, ɛ́ kɛ ŋ́ɡɔ́ɔ ŋ́kuꞋ pɑ́Ꞌ.» Ŋ́ɡɔ́ɔ ńzɑ́p pɔ́ yɛ́ nǔu nɛtúutɛ ɛ̂nɑ́, ɛ́ fíitɛ.

⁵²Yɛ́su ɡɔ́ɔ ŋ́kɛ́ ńcú mbɔ̌ pɛtɑ́tndɑ́-pɑnɔ́ŋpɔꞋ pɔ́p pɛtɑ́tndɑ́ pɑpyɛ́p ndɑ́-nɛnɔŋpɔꞋ pɔ́p pɛkɛ́m-lɑ́Ꞌ pinɛ pɔ́p tɔ́nɛ nɛɡẅɛɛ wɛ́ ŋɡɔ: «Pʉʉ ɡɔ́ ńtɔ́ nɛɡẅɛɛ wɑ́ɑ, ŋ́ɡẅɛɛ mɛníi-ntsɔ pɔ́p pɛsʉʉ pɑꞋ ŋkɑ́ yi pʉʉ ɡʉ ɡẅɛɛ tsɔ́ŋ pɑꞋnɛ ŋɡɔ ku?

⁵³Lɑ́ mɔ, ŋ kɑ pɔ́ lɛ́Ꞌ tsʉʉ, ŋ́kɛ́ ḿbɔ́ pɔ tsɛtsɛt pʉʉ tsɛt ndɑ́-nɛnɔŋpɔꞋ, pʉʉ kɛ ḿbɔɔ lɔ́ɔ nɛɡẅɛɛ wɑ́ɑ pɔ́. Lɑ́, yʉʉ ŋkɑ́ pʉ́ɔ, mbɔ ɛ́ ɡɔ́ɔ mɔ́ ŋ́kɛ́ ŋ́kuꞋ, ḿbɔ́ ŋkɑ́ yi Fɔɔ-mɛnu-nzɛ́nzʉ́ʉ tɔ́ mɔ́ tɛ ḿbɔ́ ɛ́sɑ́Ꞌ lɑ́Ꞌ yɛ.»

⁵⁴Pɔ́p ɡẅɛɛ Yɛ́su ńdɔk ŋ́ɡʉ nɛ njɛ́Ꞌ tɑ́tndɑ́-pɑnɔ́ŋpɔꞋ, Pyɛ̂ cʉ́ɔ nzʉʉ pɔ́p, lɑ́ ŋ́kɛ́ ḿbɔ́ pɔ ŋɡɑ sɛsɑ.

⁵⁵Pɔ́p kúu zúꞋu, pɛ́ niitɛ múk sɔŋ-tɛtɑ́ɑ ńnɑ́ŋ sɛ́ ḿbɔ́ ńzɔ́k. Pyɛ̂ tɔ́ yɛ́ ńnɑ́ŋ tsɛtsɛt pɔ́p.

⁵⁶Wɛcɔ́ mɔ́ɔ mɑŋɡɛ́ ẅi ɑ ḿbɔ́ fɑꞋ njɛ́Ꞌ ɛ̂yɑ́, nɑ́ŋ tɛ múk kyɛꞌ zʉꞋ, ɑ líŋɛ Pyɛ̂ pɑ́Ꞌ ɑ nɑ́ŋnɛ zúꞋu, ńcú ŋɡɔ: «Ŋu ẅí pɛ́ ɡẅɛɛnɛ wɛ́ lɑ́, pɔ́p ŋu wɔ ŋ́kɛ́nɛ ḿbɔ́ ńnɛn.»

⁵⁷Pyɛ̂ lʉꞋ, ńcú mbɔ̌ wɛ́ ŋɡɔ: «Mɑŋɡɛ́ wɔ, ŋ kɑ́ pɔ́ ńjí wɛ́ pɔ́!»

⁵⁸Ɛ́ pɛn ŋ́ɡɔ́ ńdɑ́ɑtɛ, wɛcɔ́ ŋu mbɛ́ɛnɛ líŋɛ yí wɛ́ tɛ ńcú ŋɡɔ: «Ɔ yú wɛcɔ́ ŋu wɔp.» Pyɛ̂ tsɔ́Ꞌ mbɔ̌ ŋɡɑŋ ŋɡɔ: «Ŋu wɔ! Ŋɡɑ́ŋ, ɛ́ kɑ́ pɔ́ nu pɔ́.»

⁵⁹Pɛ́ nɑ́Ꞌ ńnɑ́ŋ, wɛcɔ́ ŋu ndɛꞋ cú yɛ́ tɛ ŋ́kɑɑ Sɛ́ ŋɡɔ: «Ɛ́ kɑ́ pɔ́ nu lʉɔmɛ́nɛ pɔ́, ŋu wɔ ḿbɔ́ tsɛtsɛt pɔ́p, pʉʉ zɛɛ ńjʉ́ɔ pɑꞋ ɑ ŋu-Ŋɡɑlílɛɛ pɑꞋ jʉ́.»

⁶⁰Pyɛ̂ tsɔ́Ꞌ ŋɡɔ: «ŋu wɔ! Ŋ kɑ́ jí nu yi ɔ pɑ́Ꞌ ńdɔk ńcú pɔ́.» Pyɛ̂ pɛ́t ńcú cúnɛ, mɔ̂ŋkʉ̈ɔ́Ꞌ ɡɔ́ɔ ńtɔ́ŋ.

⁶¹Yɛ́su shɔtnɛ ńdíŋɛ Pyɛ̂, mík mɔ́pnɛ puutɛ. Pyɛ̂ ɡɔ́ɔ ŋ́kẅíitɛ nu yi Tsɑpʉɔ lɑ́Ꞌnɛ ńcú mbɔ̌ wɛ́ ŋɡɔ: «Mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ ńtɔ́ŋ lɔ́Ꞌnɛ, mbɔ ɔ muŋɛ wɑ́ɑ ŋkɑ́ yɛ́tɑ́t.»

⁶²Pyɛ̂ fú tɛtɑ́ɑ ńcẅɛt, ḿbuu ŋ́kíi tɛꞋ.

⁶³Pʉɔ pinɛ pɔ́p kɑ ɡẅɛɛnɛ Yɛ́su kɑ pɔ́ ńtswɑ́ɑ wɛ́, ḿbɔ́ ńzɔɔtɛ wɛ́.

⁶⁴Pɔ́p kɑ pɛn ŋ́kút shʉ́ wɛ́, ḿbɔ́ ńtswɑ́ɑ wɛ́, ḿbíkŋɛ wɛ́ ŋɡɔ: «Kyɛ́ꞌ ŋu ẅí ɑ tswɑ́ɑnɛ wú.»

⁶⁵Pɔ́p kɑ pɔ́ pɔ́Ꞌɔ, ḿbɛn ḿbɔ́ ŋ́kẅiꞋ ńnyɑklɛ wɛ́.

⁶⁶Njí ɡɛ ḿbɔ́ tɛ ŋ́kiɛ, pɛkɛ́m tsɛt lɑ́Ꞌ pɔ́p pɛtɑ́tndɑ́-pɑnɔ́ŋpɔꞋ, mbɑ pɑkyɛ́Ꞌtɛ nɛpʉ́ʉ-Mɔ̌sɛ̂ɛ cúꞋlɛ, ńcú pɛ́ lɔk Yɛ́su ńtɔ́ zʉꞋ-cúꞋlɛ-ŋɡɔŋ.

⁶⁷Pɔ́p píkŋɛ wɛ́ ŋɡɔ: «Ɔ lɑɑ ḿbɔ́ Nzɑ́Ꞌŋkʉ, ɔ sẅíi wɛk.» Yɛ́su tsɔ́Ꞌ mbɔ̌ pɔ́p ŋɡɔ: «Mɔ sẅíi wʉ́ʉ pʉʉ pɔɔ pɛ́m,

⁶⁸ḿbɛn ḿbíkŋɛ wʉ́ʉ nɛ́ nu, pʉʉ pɔɔ tsɔ́Ꞌ.

⁶⁹Tɛ mbɑ pɔ́Ꞌɔ, ɛ́ ŋkɔ̂ɔnɛ pɑꞋɑ, mbɔ ɛ́ kɛ ŋ́ɡɔ́ɔ ŋ́kuꞋ pɑꞋ Sɛ́ ŋɡɑŋmɛtʉʉ tsʉʉ ɡʉ ńníꞋ Mɔ́ɔ-Ŋu nǔu ɡúŋ-pɔ́ yɛ yi tʉʉ.»

⁷⁰Pɔ́p pɛtsʉʉ kɑ zúꞋ ńcú ŋɡɔ: «Ɔ lɔk ḿbɔ́ mɔ́ɔ-Sɛ́ pɔ?» Yɛ́su tsɔ́Ꞌ ŋɡɔ: «Ɛ́ cẅɛt pɔ ntsu pʉʉ, mɔ kwɑꞋ wɛ́t.»

⁷¹A kɑ cú pɔ́Ꞌɔ pɔ́p ɡɔ́ɔ shɔtnɛ ńcú tsɛtsɛt pɔ́p ŋɡɔ: «Tɛ ɛ́ lɑɑ ḿbɔ́ pɑꞋnɛ, pɛkŋɛ kɛ ḿbɛn ńdɔ́ɔ wɛcɔ́ ŋu ẅi ɑ ńcú nu nǔu wɛ́ kɛkʉ̈ɔ́? KwɑꞋ pɛkŋɛ tsuŋnɛ ńzúꞋ nu yi ɛ́ cẅɛtnɛ ntsu wɛ́.»