Read Ngomba Lúkɑ́shi 23 Bible Online

Lúkɑ́shi 23 - Ngomba bible

Lúkɑ́shi 23

¹Gɑŋ-cúꞋlɛ cú pɔ́Ꞌɔ, ńdɔ sɛ́ pɛtsʉʉ, ńdɔk Yɛ́su ŋ́ɡʉ nɛ́ mbi-Pilɑ́tu.

²Ńzɛ nɛfɛn wɛ́ ŋɡɔ: «Pɛk jʉ́ɔ ŋu wɔ pɔ́ ńjúk ŋ́kɑ́t tsɛt ŋɡɔŋ wɛk ḿbʉ́ʉpɛ tú-lɑ́Ꞌ, ńtɔꞋ wɔ́p nɛmɑꞋ ntsup-ntʉ̈ɔꞋ, ŋ́ɡɑ́ mbɔ̌ kɑ́sɑ-Pɑlɔ́mɑ. A pɛn ḿbɔ́ ńcú ŋɡɔ ɑ Nzɑ́Ꞌŋkʉ ẅí Sɛ́ kɑ kɑꞋnɛ mbɔ̌ pɛk, ńdɔk ńcú ŋɡɔ ɑ fɔɔ.»

³Pilɑ́tu píkŋɛ Yɛ́su ŋɡɔ: «Ɔ fɔɔ-Pɑyúdɑ pɔ?» Yɛ́su tsɔ́Ꞌ mbɔ̌ wɛ́ ŋɡɔ: «Ɔ cú pɔ́Ꞌɔ.»

⁴Pilɑ́tu cú mbɔ̌ Pɛtɑ́tndɑ́-pɑnɔ́ŋpɔꞋ mbɑ mbɔ̌ lɑ́Ꞌ ŋɡɔ: «Mɔ sɛ́ ḿbɔɔ ńjʉ́ɔ yúu mi ŋu wɔ fɑɑnɛ́nɛ tɛ ḿbɔ́ pɛ́ cú ŋɡɔ ɑ vu ntsɑŋ pɔ́.»

⁵Lɑ́ pɔ́p tsúŋ ńnʉʉ nʉʉnɛ, ńcú ŋɡɔ: «A sɛ́ mbɔ́ ŋ́kɑ́t ɛ́swɛtɛ pʉɔ ŋɡɔ pɔ́p tʉʉ tú. A kɑ zɛ Ŋɡɑlilɛɛ, ŋ́kúu Jẅidɛ̂, ɛ́ pʉ́ɔ lɑɑ ɑ lɔknɛ ńtɔ́ tɔ́nɛ tɛ ŋ́kúu zɑ́Ꞌnɛ lɑɑnɛ.»

⁶Pilɑ́tu zúꞋ pɔ́Ꞌɔ, ḿbíkŋɛ ŋɡɔ: «A ŋu-ŋɡɑlílɛɛ pɔ?»

⁷Pɔ́p cú ŋɡɔ ɔ́ɔŋ. A túu Yɛ́su ŋ́ɡɑ́ mbɔ̌ fɔɔ Ɛlɔ̂dɛ, mbíꞋŋɡɔ jʉ́ kɑ pɔ́nɛ ɛ́sɑ́Ꞌ yîyɑ́ pɑk-ŋɡɔŋ, ŋ́ɡɔ ḿbɔ́, mbɔ ɑ kɑ tɔ́ tɛ ḿbɔ́ Yɛlúsɑlɛm nǔu mîmɑ́ mɛlɛ́Ꞌ.

⁸Ɛlɔ̂dɛ jʉ́ɔ Yɛ́su, ḿbuu ńtsɑ́ɑtɛ tɛꞋ, mbíꞋŋɡɔ ɑ kɑ pɔ́ ńtswɛ́ ńzúꞋ pɛ́ pɛ́ɛtɛ mɛnu nǔu wɛ́ tɛꞋ, ɑ pɔ́ ńtsɑ́ɑ nɛjʉ́ɔ wɛ́. A jʉ́ɔ wɛ́ pɔ́Ꞌɔ, ŋ́kwɑŋɛ ŋɡɔ, líkcɔ́ Yɛ́su ɡɛ yɛcɔ́ n dɑɑ kɑ́ jʉ́ɔ nu, ɑ jʉ́ɔ.

⁹Ḿbíkŋɛ wɛ́ nɛ́ mɛnu tɛ ɛ́ zɑ́ɑ tɛꞋ, ɑ kɛ́ ḿbɔɔ yɛcɔ́ tsɔ́Ꞌ.

¹⁰Pɛtɑ́tndɑ́-pɑnɔ́ŋpɔꞋ pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ pɔ́ zúꞋu, ḿbuu ḿbɔ́ ńzɑ́p mɛnu tú Yɛ́su tɛꞋ.

¹¹Ɛlɔ̂dɛ pɔ́p pɛmɑ́kɑ́ɑ pɛ́ zɔɔtɛ Yɛ́su, ŋ́ɡwɛ wɛ́ tɛ ńtíi ndẅí-nɛfɔɔ ɛ́sɔ nǔu wɛ́, ńtúu ŋɡɔ, pɛ́ pɛn ńdɔk wɛ́ ḿbɛn ŋ́ɡɑ́ mbɔ̌ Pilɑ́tu.

¹²Ɛ́ kɑ ɡɔ́ ḿbɔ́ Pilɑ́tu pɔ́p Ɛlɔ̂dɛ pɔ́ nɛ́ mbuu, tɛ ɛ́fú lɛ́Ꞌ ɛ̂yɑ́ pɔ́p tsʉ́Ꞌ pɛsúu.

¹³Pɛ́ lɔk wɛ́ ŋ́kúu zúꞋu, Pilɑ́tu fúŋ pɑnɔ́ŋpɔꞋ pɛɡwɛ́, mbɑ pɑsɑ́Ꞌ lɑ́Ꞌ,

¹⁴ńcú mbɔ̌ pɔ́p ŋɡɔ: «Pʉʉ lɑ́Ꞌ ŋ́ɡɔ ńdɔk ŋu wɔ ńtɔ́ mbi mɔ, ńcú ŋɡɔ ɑ sɛ́ ḿbʉ́ʉpɛ tú-lɑ́Ꞌ. Ŋ ŋɑk wɛ́ pɔ mbi pʉʉ. Ŋ ɡʉ nǔu mɛnu mi pʉʉ lɑ́Ꞌnɛ ńcú nǔu wɛ, ŋ kɑ́ jʉ́ɔ yɛcɔ́ mɛfɑɑnɛ pɔ́.

¹⁵Tɛ mbɑ fɔɔ Ɛlɔ̂dɛ kɑ́ jʉ́ɔ mɛfɑɑnɛ nǔu wɛ́ pɔ́, lɑ́ ɑ pɛn wɛ́ ŋ́ɡɑ́ mbɔ̌ mɔ. N dɔk ńcú ŋɡɔ ŋu wɔ kɑ́ fɑɑnɛ yɛcɔ́ nu pɔ́, tɛ ḿbɔ́ pɛ́ jẅí wɛ́ jẅínɛ pɔ́.»

¹⁶Ɛ́ pɔ́Ꞌɔ lɑ́, ŋ ɡɛ tsʉ́Ꞌ ńcú pɛ́ tswɑ́ wɛ́ tswɑ́nɛ, ŋ́ɡɔ́ɔ ńnɑ́ wɛ́ ɑ ɡʉ.

¹⁷[Ɛ́ kɑ pɔ́ ŋkɑ́ ndínɑ-Pɑ́skɑ, Pilɑ́tu ɡẅɛɛ nɛcẅɛɛtɛ tɑ́Ꞌ ŋɡɑŋtsɑ́ŋ ŋ́ɡɑ́ mbɔ̌ lɑ́Ꞌ.][19]

¹⁸Lɑ́, lɑ́Ꞌ zɛ nɛzɔtnɛ tsʉʉ ḿbɔ́ ɛ́sẅíŋɛ ŋɡɔ: «Gɛ pɛ́ jẅí ŋu wɔ, ɔ nɑ́ Bɑnɑbɑs mbɔ̌ pɛk.»

¹⁹Bɑnɑbɑs ɛ̂wɑ́ ḿbɔ́ tsɑ́ŋ ntɛ́ vɑꞋ yi ɑ kɑ mɑꞋnɛ tʉ́sɔŋ, ḿbɛn ntɛ́ pɑꞋ ɑ kɑ jẅínɛ ŋu.

²⁰Pilɑ́tu pɔ́ ńdɔ́ɔ nɛnɑ́ Yɛ́su nɑ́nɛ, lɑ́ ɛ́ lɛɛ pɔ́Ꞌɔ, ɑ pɛn ńcú nu mbɔ̌ lɑ́Ꞌ cúnɛ.

²¹Lɑ́ lɑ́Ꞌ tsʉʉ kɛ ḿbɔ́ ŋ́kẅiꞋ ḿbíkŋɛ pɔ sẅiŋɛ ńcú ŋɡɔ: «Kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, kɛ ŋ́kẅii wɛ́ pɔ nǔu tʉ́ mbɑ́ŋtɛ pɑ́ŋtɛ́nɛ.»

²²Pilɑ́tu cú nu nǔu mbɑ́ɑtɛ yɛtɑ́t ŋɡɔ: «Nu kɛpɔŋ ɑ ɡɛnɛ pɑꞋnɛ ḿbɔ́ kʉ̈ɔ́? Ŋ kɑ́ jʉ́ɔ yɛcɔ́ nu yi ɑ fɑɑnɛ́nɛ tɛ ḿbɔ́ pɛ́ jẅí wɛ́ jẅínɛ pɔ́. Mɔ ńcú pɛ́ lɔk ŋɡwɑɑ ńtswɑ́ɑ wɛ́, n nɑ́ wɛ́ ɑ ɡʉ.»

²³Lɑ́Ꞌ kɛ ńdɔk pɔ ŋɡi tɛnnɛ, ńnʉʉ nʉʉnɛ ŋɡɔ pɛ́ kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, tɛ ɛ́ tsɑ Pilɑ́tu.

²⁴A ńzɑ́Ꞌ ntsɑŋ pɑꞋ lɑ́Ꞌ sɛ́ ŋ́kɔŋ.

²⁵Ńnɑ́ ŋu ẅí pɔ́p kɑ pɔ́ ḿbíkŋɛ. Ŋu ẅí ɑ kɑ kúunɛ tsɑ́ŋ ntɛ́ vɑꞋ mbɑ nɛjẅí ŋu, ḿbɛn ŋ́kúu nǔu Yɛ́su, ńtsʉ́Ꞌ ŋ́ɡɑ́ wɛ́ mbɔ̌ pɔ́p ŋɡɔ pɔ́p lɔk wɛ́ ŋ́ɡʉ ŋ́ɡɛ yúu mi pɔ́p ḿbɔ́ ŋ́kɔŋ nɛɡɛ.

²⁶Pɛ́ lɔk Yɛ́su ńcʉ́ɔ sɛ̂ndúŋ, ńnɛn tɛ ḿbuutɛ wɛcɔ́ ŋu-silɛɛnɛ, ẅí pɛ́ kɑ pɔ́ ɛ́fúŋ wɛ́ nɛ́ Símɔ̂ŋ, ɑ pɔ́ ɛ́fú ŋkɑ́Ꞌ. Pɑlʉ̈ɔꞋntsɔ ɡẅɛɛ wɛ́, ńdɔk tʉʉ ŋ́ɡɑ́ tʉ́ Mbɑŋtɛ pɑ́ŋtɛ́nɛ-Yɛ́su ŋɡɔ ɑ tíi ńdɔk ńcʉ́ɔ nzʉʉ pɔ́p.

²⁷Lɑ́Ꞌ ḿbɔ́ nzʉʉ tɛ ńzɑ́ɑ, pɑŋɡɛ́ pɔ́ tsɛtsɛt pɔ́p ŋ́kíi ńtʉŋ ŋɡʉ̈ɔ́Ꞌ-Yɛ́su.

²⁸Yɛ́su nɛn tɛ ɛ́shɔtnɛ, ńdíŋɛ wɔ́p ńcú ŋɡɔ: «Nzẅíi-Yɛlúsɑlɛm, kɔɔ pʉʉ lɑɑ wɑ́ɑ, pʉʉ lɑɑ pɔ yʉ́ʉ tú mbɑ yi mbɔ́ŋkʉ̈ɔ́ pʉ́ʉ.»

²⁹Pʉʉ jí ŋɡɔ mɛlɛ́Ꞌ lɑ́Ꞌ sɛ́ ńtɔ́, yi pɛ́ ɡʉ ńcú ŋɡɔ: «Pɛpɔ́ttú pɛŋkɛ́n pɑŋɡɛ́, pɑꞋ pɔ́p ŋ́kɑɑ zɛɛ ḿbí pɔ́, mbɔ pɔ́p ŋ́kɑɑ mɔ́ mɔ́ɔ nɔ́ŋ.

³⁰Ɛ́ ɡʉ ńdɑ́Ꞌ ḿbɔ́ pɔ́nɛ tɛ pʉɔ cú mbɔ̌ mɛmbɑ́t ŋɡɔ: “Pʉʉ kɔkŋɛ ɛ́fyɛ́t wɛk.” Ńcú mbɔ̌ nɛŋkɔ́Ꞌ ŋɡɔ: “Pʉʉ cúŋ ḿbɔɔ wɛ́k.”

³¹Ńtsɑ́ɑ nɛpfú pɔ́Ꞌɔ, mbíꞋŋɡɔ pɛ́ lɑɑ ŋ́ɡɛ pɑꞋnɛ nǔu tʉ́ fɛ́, mbɔ pɛ́ ɡʉ ńtɔ́ ŋ́kúu nǔu tʉ́ zúunɛ ŋ́ɡɛ ŋɡɔ ku?»

³²Pɛ́ kɑ ɡɔ́ ńdɔk Yɛ́su ŋ́ɡʉ, ḿbɑ́ɑtɛ pɛtsɔ́ŋ pɛ́pɑ́ nǔu wɛ, pɑꞋ pɛ́ ɡʉ ńtɛmtɛ ńjẅí wɔ́p pɛpɔ́p.

³³Ŋ́ɡʉ tɛ ŋ́kúu nǔu yɛcɔ́ zʉꞋ yi pɛ́ kɑ pɔ́ ɛ́fúŋ ŋɡɔ kɑ́ɑtú, ŋ́kẅii Yɛ́su nǔu tʉ́ mbɑ́ŋtɛ pɑ́ŋtɛ́nɛ, ḿbɛn ŋ́kẅii mbɑ pɛtsɔ́ŋ pɑ́ pɛ́pɑ́, nǔu mɔ́p mɛtʉ́ Mbɑŋtɛ pɑ́ŋtɛ́nɛ. Tɑ́Ꞌ pɔ́ nǔu ɡúŋ-pɔ́-Yɛ́su yi tʉʉ, wɛcɔ́ pɔ́ nǔu ɡúŋ-pɔ́ ŋkẅɛpmɛ.

³⁴Yɛ́su cú ŋɡɔ: «Tɑ̌ɑ mɔ, likŋɛ mɛfɑɑnɛ mɔ́p, mbíꞋŋɡɔ pɔ́p kɑ́ pɔ́ ńjí yúu mi pɔ́p ɡɛnɛ pɔ́.» Pɑlʉ̈ɔꞋntsɔ pinɛ pɔ́p ḿbɔ́nɛ zúꞋu mɑꞋ ńtíitɛ tɛ ńdɔk ŋ́ɡɑp mɛndẅí mɛ́.

³⁵Lɑ́Ꞌ kɑ tʉ́ʉ ḿbɔ́ ńdíŋɛ pɑꞋ pɛ́ kẅiinɛ Yɛ́su. Pɑsɑ́Ꞌ lɑ́Ꞌ pɔ́ ńzɔɔtɛ Yɛ́su ńcú ŋɡɔ: «A kɑ cẅɛ́ɛ pɛcɔ́ pʉɔ ntsu-nɛvú, ɑ pɛn ńcẅɛ́ɛ kwɑꞋ yɛ́ tú, pɑꞋ ɑ lɑɑ ńcú tɛ ɛ́sẅíi nu ŋɡɔ ɑ Nzɑ́Ꞌŋkʉ ẅí Sɛ́ kɑ tsɔ́Ꞌnɛ.»

³⁶Pɑlʉ̈ɔ́Ꞌntsɔ kɑ pɔ́ ḿbɛn ńtuŋɛ wɛ́ ɡúu, ŋ́kẅɛ́Ꞌlɛ mbʉʉ yɔp ńtɔ́ nɛjɔ́ŋ yɛ́, ŋ́ɡɑ́ cícɔ́k mɛluꞋ mbɔ̌ wɛ́.

³⁷Ḿbɔ́ ńcú ŋɡɔ: «Ɔ lɑɑ ḿbɔ́ kwɑꞋ fɔɔ-Pɑyúdɑ, ɔ cẅɛ́ɛ tú yú mbɔ̌ nɛvú.»

³⁸Pɛ́ kɑ ŋwɑꞋnɛ ntɔŋ-nɛvú wɛ́ ŋ́kẅii tú yɛ́.

³⁹Wɛcɔ́ tɑ́Ꞌ nǔu pɛtsɔ́ŋ pinɛ pɛ́ kɑ kẅiinɛ wɔ́p pɛ́ Yɛ́su nǔu mɛtʉ́ Mbɑŋtɛ pɑ́ŋtɛ́nɛ pɔ́ ńzɔɔtɛ wɛ́ ŋɡɔ: «Pɛ́ cú ŋɡɔ ɔ Nzɑ́Ꞌŋkʉ-puꞋ pʉ́ɔ? Cẅɛ́ɛ tú yú mbɔ̌ nɛvú, ńcẅɛ́ɛ yɛk lɑ́.»

⁴⁰Wɛcɔ́ zúꞋ pɔ́Ꞌɔ, ŋ́kɑkŋɛ wɛ́ ŋɡɔ: «Pɛ́ tɛmtɛ ŋ́kẅii wɛkŋɛ pɛ́ ŋu wɑ́lɑ́ nǔu tʉ́ mbɑ́ŋtɛ pɑ́ŋtɛ́nɛ, ɔ jʉ́ɔ pɔ́Ꞌɔ, ɔ kɑ́ pɔ́k Sɛ́ pɔ́. Ɛ́ ɡʉ nǔu pûu, mbɔ pɛ́ kẅii wûu, ɛ́ pɔ́ kwɑꞋ nɛ́nẅín.

⁴¹Pûu pfú mɛnu mûu. Lɑ́ ŋ́ɡʉ nǔu wɛ́, mbɔ ɑ kɑ́ fɑɑnɛ yɛcɔ́ pɔ́.»

⁴²A kɑkŋɛ wɛ́ pɔ́Ꞌɔ, ḿbɛn ḿbúꞋ mbɔ́ mbɔ̌ Yɛ́su ŋɡɔ: «Yɛ́su, ɔ lɑɑ ńdɑ́Ꞌ ńtɔ́ nǔu nɛfɔɔ nú, ɔ pɑ́ɑ nɛlikŋɛ wɑ́ɑ.»

⁴³Yɛ́su tsɔ́Ꞌ ŋɡɔ: «Ɛ sẅíi wú, ɛ́ kwɑꞋ nɛ́nẅín, ŋɡɔ kwɑꞋ lɔ́Ꞌnɛ puu ɡʉnɛ ḿbɔ́ tsɛt zʉꞋ mbɔ́tnɛ-Sɛ́.»

⁴⁴Mbɔ́t nɛm ɡɛ ŋ́kuꞋ, mɔ́nɛm pɛ́, túꞋ puu sʉ́ʉ tsɛt ŋɡɔŋ tsʉʉ tɛ ŋ́kúu nǔu nɛm yɛ́tɑ́t mbɔ́t njí.

⁴⁵Ndẅí yi pɛ́ kɑ lɔknɛ ɛ́sɑ́ɑ ndɑ́-nɛnɔŋpɔꞋ, sɑnɛ tsɛtsɛt, ɛ́fú tʉ́ ŋ́kúu sɛ́.

⁴⁶Yɛ́su nɑ́ŋ nǔu tʉ́ mbɑ́ŋtɛ pɑ́ŋtɛ́nɛ, tɛ ŋ́kíi nɛ́ ŋɡi tɛnnɛ, ńcú ŋɡɔ: «Tɑ̌ɑ mɔ, ŋ ɡɑ́ zẅikŋɛ yɑ́ɑ nǔu mbɔ́ mú. Ńcú pɔ́Ꞌɔ, ŋ́ɡɔ́ɔ ŋ́kɛ́ ńcʉ́ɔ.»

⁴⁷Tɑ́tndɑ́-pɑlʉ̈ɔ́Ꞌntsɔ-Pɑlɔ́mɑ zúꞋu kɑ jʉ́ɔ mbɑ kʉ̈ɔ́ lɑ́ yi ɛ́ lɛɛnɛ, tɛ yi mbʉ̈ɔt pɔ́ nɛcú ŋɡɔ: «Ŋu wɔ ŋ́kɑɑ fɑɑnɛ.» Sẅiŋɛ yɛ́ ɛ̂yɑ́ ɡɑ́ mɛkuꞋ mbɔ̌ Sɛ́.

⁴⁸Pʉɔ tsʉʉ pí pɔ́p kɑ nɑ́ɑtɛ́nɛ ńjʉ́ɔ mɔ mɛnu, kɑ tsʉꞋ nɛpɛn nzʉʉ, mbɑ wɔ̌ lɑ́ zẅík ŋɡɔ́ɔ.

⁴⁹Ŋɡɔŋ pɛsúu-Yɛ́su, tɛ mbɑ pɑŋɡɛ́ pinɛ pɔ́p kɑ fúnɛ Ŋɡɑlilɛɛ cʉ́ɔ nzʉʉ yɛ, kɑ tʉ́ʉ pɔ tɛ nzʉʉ lɑ ńjʉ́ɔ mɔ mɛnu.

⁵⁰Wɛcɔ́ ŋu m̄bɔ́ ɡú Yɛlúsɑlɛm, pɛ́ fúŋ wɛ́ ŋɡɔ Yɔsɛ̂p, mbɔ pɛ́ kɑ pí wɛ́ tsɛt yɛcɔ́ tʉ́sɔŋ-Pɑyúdɑ yi pɛ́ fúŋnɛ ŋɡɔ Alimɑtɛ̂ɛ, ḿbɔ́ ŋu sʉ́Ꞌnɛ, ŋ́kúꞋlɛ nɛpʉ́ʉ-Sɛ́ tɛꞋ, ḿbɛn ńtswɛ́ ḿbɔ́ ńzẅíꞋlɛ ŋkɑ́ yi Sɛ́ ɡʉ ɛ́sɑ́Ꞌ mbí. A m̄bɔ́ mbɑ tsɛtsɛt cúꞋlɛ-pɛkɛ́m-ŋɡɔŋ pinɛ pɔ́p kɑ pɔ́nɛ ɛ́sɑ́Ꞌ lɑ́Ꞌ. Lɑ́, ɑ ŋ́kɑɑ pɛ́m nu yi pɛcɔ́ pɛlʉ́m kɑ zɑ́pnɛ ḿbɛn ŋ́ɡɛ nǔu Yɛ́su pɔ́.

⁵¹

⁵²Yɔsɛ̂p ɛ̂wɑ́ ɡʉ ńjʉ́ɔ Pilɑ́tu, ńdɔ́ɔ pfú-Yɛ́su mbɔ̌ wɛ́, ɑ pɛ́m.

⁵³A ɡʉ, ɛ́fú nǔu tʉ́ mbɑ́ŋtɛ pɑ́ŋtɛ́nɛ ŋ́kɔk wɛ́, ńdɔk pɔ́-ndẅí ŋ́kɑ́tɛ wɛ́, ŋ́ɡʉ ńníꞋ tsɛt nɛshi ni pɛ́ kɑ sʉ́Ꞌnɛ ńzɛmɛ zɛmɛnɛ, nǔu ŋɡɔꞋ ɡwɛ́, lɑ́ ḿbɛn ḿbɛ́t kɛ́ níꞋ wɛcɔ́ ŋu tsɛtú.

⁵⁴A kɑ pɔ́ ńníꞋ pɔ́Ꞌɔ mbɔ́tnjí Fɛlɑ́dɛ̂ɛ, pɔ́p pɔ́ niitɛ mbʉʉ pɑꞋ lɛ́Ꞌnji yɔ́p sɛ́ ŋ́ɡʉ ńzɛ.

⁵⁵Pɑŋɡɛ́ pinɛ pɔ́p Yɛ́su ḿbɔ́nɛ ńnɛn tɛ ɛ́fú Ŋɡɑlilɛɛ, kɑ cʉ́ɔ nzʉʉ Yɔsɛ̂p tɛ ŋ́kúu nɛshi, ńjʉ́ɔ pɑꞋ ɑ nɔŋnɛ pfú-Yɛ́su pɔ́Ꞌɔ,

⁵⁶ŋ́ɡɔ́ɔ ŋ́kɛ́ ḿbɛn tʉ́sɔŋ, niitɛ lɑmɛ́ndɑɑ sʉ́Ꞌnɛ, mbɑ mɛcɔ́ mɛɡwɛ́t nɛlɔk ńzɔ́Ꞌ pfú-Yɛ́su. Lɛ́Ꞌ nji zɛ, pɔ́p pɔ́tnɛ ńjẅiitɛ pɑꞋ nɛpʉ́ʉ kɑ pɔ́ ḿbíkŋɛ.