Read Ngomba Lúkɑ́shi 24 Bible Online

Lúkɑ́shi 24 - Ngomba bible

Lúkɑ́shi 24

¹Nduŋmbi lɛ́Ꞌ, nǔu ŋɡɑplɑ́Ꞌ ɡɛ ḿbɔ́, pɑŋɡɛ́ ɛ̂pɑ́ mʉ́ʉ mbɑꞋmbɑꞋɑ́, ńdɔk lɑmɛ́ndɑɑ yi pɔ́p kɑ niitɛ́nɛ ŋ́ɡʉ nɛ́ zʉꞋ-nɛshi.

²Ŋ́ɡʉ tɛ ŋ́kúu zúꞋu, ńjʉ́ɔ, mbɔ pɛ́ kɑ fú ntsu-nɛshi, ńtsʉ́ʉ mɑ́mɑ́ ŋɡɔꞋ yí ɛ́ ḿbɔ́nɛ zúꞋu.

³Pɔ́p jɛ́Ꞌ ŋ́kúu tsɛtú, ŋ́kɛ́ ḿbɔɔ pfú-Tsɑpʉɔ Yɛ́su jʉ́ɔ.

⁴Pɔ́p kɑ tʉ́ʉ ńdíŋɛ zʉꞋ ɛ́ pɔ́ ŋ́kʉꞋnɛ wɔ́p, pɔ́p ɡɔ́ɔ ńjʉ́ɔ pʉɔ pɛ́pɑ́ cẅɛt, ḿmɑꞋ mɛndẅí ɛ́ fúk tɛ ŋwɑŋɛ.

⁵Pɔ́p pɔ́k tɛ ńtsʉ́Ꞌ ńdíŋɛ pɔ sɛ́, lɑ́ pʉɔ ɛ̂pɑ́ píkŋɛ wɔ́p ŋɡɔ: «Pʉʉ tɔ́ tsɛtsɛt pɛpfú sɛ́, ńdɔ́ɔ ŋu ẅí ɑ ntʉʉ mɛlɑ́Ꞌkʉ̈ɔ́?

⁶A kɑ́ pɛ́t zɑ́Ꞌnɛ pɔ́, ɑ zẅíimɛ nǔu nɛvú. Pʉʉ zɛɛ ŋ́kẅíitɛ nu yi ɑ kɑ pɔ́ ńcú mbɔ̌ pʉʉ ŋkɑ́ yi pʉʉ pɛ́pɔ́p kɑ pɛ́tnɛ Ŋɡɑlilɛɛ.

⁷A kɑ cú ŋɡɔ: Ɛ́ sɛ́ ḿbíkŋɛ ŋɡɔ pɛ́ fɛn Mɔ́ɔ-Ŋu mbɔ̌ pʉɔ kɛpɔŋ, pɔ́p kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, ɑ zẅíimɛ nǔu nɛvú nǔu mbɑ́ɑtɛ lɛ́Ꞌ pɛ́tɑ́t.»

⁸Pɔ́p zúꞋ pɔ́Ꞌɔ, ŋ́ɡɔ́ɔ ŋ́kɛ́ ŋ́kẅíitɛ ŋɡɔ, ɛ́ mɛnu mi Yɛ́su kɑ zɛɛ ɛ́sẅíi wɔ́p,

⁹ɛ́fú zúꞋu, ŋ́ɡʉ ḿbɛ́ɛtɛ mɛnu tsʉʉ mi ɛ́ lɛɛnɛ, ɛ́sẅíi ɡɑŋku pɛ́ ntsɔ̌pmɔꞋ nɛ́ nɛɡɛ́m mbɑ mbɔ̌ pɛcɔ́ pʉɔ nǔu ku yɔ́p.

¹⁰Pɑŋɡɛ́ ɛ̂pɑ́ ḿbɔ́ Mɑlíyɑ ẅi ɑ ḿbɔ́ ńnɑ́ŋ Mɑkdɑlɑ, ŋ́ɡɛ Jɑ̂ɑnɛ, mbɑ Mɑlíyɑ mɑ́ pɛ́ Jɑ̂k, pɔ́p pɛcɔ́ pɑŋɡɛ́. Pɔ́p pɛ́ɛtɛ mɛnu ɛ̂mɑ́ ɛ́sẅíi ɡɑŋntúu-Yɛ́su.

¹¹Pɔ́p zúꞋ ɛ́ pɔ́ pɔ pɑꞋ njʉɔ lɑ́, pɔ́p pɔɔ pɛ́m.

¹²Lɑ́, Pyɛ̂ lɔ sɛ́, ŋ́kʉɔ tɛ ŋ́kúu zʉꞋ-nɛshi, ŋ́ŋɔ́Ꞌnɛ sɛ́, ńjʉ́ɔ pɔ ndɑꞋ yúu-ndẅí yi pɛ́ kɑ lɔknɛ ŋ́kɑ́tɛ pfú-Yɛ́su, ɛ́ nɔɔ nǔu yɛcɔ́ ɡúŋ. Ŋ́ɡɔ ḿbɛn, ɛ́ nɛn ŋ́kʉꞋnɛ wɛ́, ɑ pɔɔ ḿbɔ́ ńjí yúu mi ɛ́ lɛɛnɛ pɔ́.

¹³Ɛ́ kɑ pɛn ḿbɔ́ pɔ lɛ́Ꞌ ɛ̂yɑ́, pɛcɔ́ pʉɔ pɛ́pɑ́, nǔu ku-Yɛ́su lɔ sɛ́ Yɛlúsɑlɛm, ḿbɔ́ ŋ́ɡʉ nɛ́ yɛcɔ́ lɑ́Ꞌ yi pɛ́ fúŋnɛ ŋɡɔ Ɛmɑwûs. Nɛɡʉ tɛ ŋ́kúu zúꞋu pɔ nɛnɛn hɑ́wɑ yɛ́pɑ́.

¹⁴Ńnɛn ḿbɔ́ sẅiŋɛ nǔu mɛnu tsʉʉ mi ɛ́ kɑ lɛɛnɛ.

¹⁵Ŋkɑ́ pɔ́p kɑ pɔ́ sẅiŋɛ, ḿbɔ́ ńzɔŋɛ lɑ́, Yɛ́su ɡɔ́ɔ ńtɔ́ yɛ́ ŋ́kẅɛ́ɛtɛ wɔ́p sɛ̂ndúŋ, pɔ́p pɛpɔ́p pɔ́ ńnɛn.

¹⁶Lɑ́, yɛcɔ́ yúu tɑɑtɛ, pɔ́p pɔɔ wɛ́ lii.

¹⁷Yɛ́su píkŋɛ wɔ́p ŋɡɔ: «Pʉʉ nɛn ńzɔŋ pɔ kʉ̈ɔ́ pɛꞋnɛ?» Pɔ́p zúꞋ ńtʉ́ʉ, ḿmɑꞋ mɛjʉ́ŋ, ɛ́sɑ́ŋɛ tú.

¹⁸Wɛcɔ́ tɑ́Ꞌ nǔu pɔ́p, lík yɛ́ pɔ́ ŋɡɔ Kɛlɛ́ɔpɑs píkŋɛ wɛ́ ŋɡɔ: «Pʉɔ tsʉʉ Yɛlúsɑlɛm jí yúu mi ɛ́ kɑ ɡɛnɛ Yɛlúsɑlɛm nǔu mɛlɛ́Ꞌ mɔ, tɛ ɛ́ tsʉ́Ꞌ pɔ ndɑꞋ ɡu kɛkʉ̈ɔ́?»

¹⁹A píkŋɛ wɔ́p ŋɡɔ: «Kʉ̈ɔ́ ŋ́ɡɛnɛ?» Pɔ́p cú ŋɡɔ, pɛk lɑ́Ꞌ ḿbɔ́ ḿmɑɑ pɔ mɛnu mi ɛ́ kɑ ɡɛnɛ Yɛ́su ŋu-Nɑ̌ɑzɑlɛt. A ḿbɔ́ kwɑꞋ ŋɡɛ́mndʉ̈ɔ́Ꞌ-Sɛ́ wɛ ɡwɛ́, nǔu mɛfɑꞋ-mɛ́, mbɑ nǔu sẅiŋɛ yɛ́ mbi Sɛ́ mbɑ mbi pʉɔmɛsɔŋ.

²⁰PɑꞋ Pɛtɑ́tndɑ́-pɑnɔ́ŋpɔꞋ pɔ́p pɑsɑ́Ꞌ lɑ́Ꞌ pɛk kɑ cɑklɛ wɛ́ mbɔ̌ Pilɑ́tu ŋɡɔ pɛ́ ɡʉ ŋ́ŋɑk wɛ́, ńjẅí wɛ́. Pɛ́ kɑ ɡɔ́ɔ ŋ́kɛ́ ŋ́kẅii wɛ́ nǔu tʉ́ Mbɑŋtɛ pɑ́ŋtɛ́nɛ.

²¹Lɑ́ mbɔ pɛk m̄bɔ́ ŋ́kwɑŋɛ ŋɡɔ jʉ́ ɡɛnɛ ńdɑ́Ꞌ ńzɑ́Ꞌ ŋkʉ-ŋɡʉ̈ɔ́Ꞌ, lɔ́ŋ-Islɑɛ̂l. Mɔ mɛnu ɡɛ, ɛ́ ŋkɔ̂ɔnɛ ḿbɔ́ lɛ́Ꞌlɑ́Ꞌ yɛ́tɑ́t.

²²Ɛ́ kɑ́ pɔ́ ndɑꞋ pɔ́Ꞌɔ pɔ́, pɛcɔ́ pɑŋɡɛ́ tsɛtsɛt pɛk lɑ́Ꞌ ŋ́kʉꞋnɛ wɛk. Pɔ́p lɑ́Ꞌ ḿmʉ́ʉ ŋkɔ́Ꞌnjí lɔ́Ꞌnɛ, ŋ́ɡʉ zʉꞋ yi pɛ́ kɑ lẅɛꞋnɛ wɛ́ zúꞋu,

²³ḿbɔɔ pfú yɛ́ jʉ́ɔ, ḿbɛn nzʉʉ ɛ́sẅíi wɛk ŋɡɔ pɔ́p kúu zúꞋu, Pɛcʉ̈ɔ́Ꞌ-Sɛ́ cẅɛt mbi pɔ́p, ńcú ŋɡɔ Yɛ́su pɔ́ ntʉʉ!

²⁴Pɛcɔ́ pʉɔ pɛk lɑ́Ꞌ ńzúꞋ pɔ́Ꞌɔ, ńdɔ sɛ́, ḿbɛn ŋ́ɡʉ yɔ́p nɛshi, ńjʉ́ɔ ɛ́ pɔ́ pɔ ndʉ́ŋndʉŋ pɑꞋ pɑŋɡɛ́ ɛ̂pɑ́ lɑ́Ꞌnɛ ɛ́sẅíi wɔ́p, lɑ́ pɔ́p kɛ́ ḿbɔɔ Yɛ́su jʉ́ɔ.

²⁵Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Pʉɔ kɛ́ jínu. Pʉʉ kɑ́ pɔ́ ɛ́fɛ́Ꞌnɛ ḿbɛ́m mɛnu tsʉʉ mi pɛŋɡɛ́mndʉ̈ɔ́Ꞌ-Sɛ́ kɑ ŋwɑꞋnɛnɛ pɔ́.»

²⁶Pʉʉ kɑ́ jí ŋɡɔ, ɛ́ kɑ pɔ́ ḿbíkŋɛ ŋɡɔ Nzɑ́Ꞌŋkʉ piitɛ ńjʉ́ɔ ŋɡʉ̈ɔ́Ꞌ lɑ́ ŋ́kúu tsɛt nɛɡúꞋ wɛ pɔ́ kɛ?

²⁷Ńcú pɔ́Ꞌɔ, ńzɛ nɛkyɛ́Ꞌtɛ mɛnu tsʉʉ mi ɛ́ tsɛt ŋwɑꞋnɛ-Sɛ́ ḿbɔ́ ńdíŋɛ wɛ́, ɛ́sẅíi wɔ́p, ńzɛ nǔu mɛŋwɑꞋnɛ-Mɔ̌sɛ̂ɛ, ḿbɑ́ɑtɛ ŋ́kúu tsɛt mɛ́ pɛŋɡɛ́mndʉ̈ɔ́Ꞌ-Sɛ́.

²⁸Pɔ́p pɛ́ pɔ́p ɡʉ tɛ ḿbɔ́ ŋ́kúu lɑ́Ꞌ yi pɔ́p pɛ́pɑ́ kɑ pɔ́ ŋ́ɡʉ zúꞋu. Pɔ́p jʉ́ɔ ɑ lɔɔ pɔ pɑꞋ ɑ ḿbɛn ńnɛn tɛ ŋɡɑ sɑk.

²⁹Lɑ́ pɔ́p ɡẅɛɛ wɛ́, ŋɡɔ pɔ́p pɛpɔ́p lɛ́, mbíꞋŋɡɔ túꞌ tsʉ́Ꞌ ɛ́sʉ́ʉ sʉ́ʉnɛ, zɑꞋ lɛɛ mɔ́. A pɛ́m pɔ́p pɛpɔ́p kúu ndɑ́ yi pɔ́p kɑ pɔ́ ŋ́ɡʉ nɛ zúꞋu.

³⁰Ŋkɑ́ nɛjʉ́ yúu ɡɛ ŋ́kuꞋ, pɔ́p nɑ́ŋ sɛ́, ɑ pɛ́ɛ mbɛlɛ̂ɛt, ŋ́ɡɑ́ pɑ́Ꞌlɑ́ mbɔ̌ Sɛ́, ḿbʉ̈ɔ́Ꞌtɛ ŋ́ɡɑ́ mbɔ̌ pɔ́p.

³¹Pɔ́Ꞌ mík mɔ́p ɡɔ́ɔ ŋ́kɛ́ ńdɛ́ɛnɛ pɔ́p lii wɛ́, ɑ ɡɔ́ɔ ḿbɛ́.

³²Pɔ́p shɔtnɛ ńcú tsɛtsɛt pɔ́p ŋɡɔ: «Yɔ lɔk ḿbɔ́ yúu mi ɛ́ lɑ́Ꞌnɛ ŋ́ɡɛ lɑ́ sẅiŋɛ yɛ́ kúutɛ wǔu ŋkɑ́ yi pɛkŋɛ lɑ́Ꞌnɛ ḿbɔ́ sɛ̂ndúŋ ɑ pɔ́ ŋ́kyɛ́Ꞌtɛ nu-Sɛ́ ɛ́sẅíi wǔu lɑ́!»

³³Pɔ́p lɔ sɛ́ pɔ ŋkɑ́ ɛ̂yɑ́, ńcʉ́ɔ sɛ̂ndúŋ, ḿbɛn ḿbɛn Yɛlúsɑlɛm, ŋ́kẅɛ́ɛtɛ ɡɑŋku-Yɛ́su ntsɔ̌pmɔꞋ nɛ́ nɛɡɛ́m, mbɔ pɔ́p pɛcɔ́ pʉɔ-Yɛ́su cúꞋlɛ.

³⁴Ŋ́kẅɛ́ɛtɛ wɔ́p pɔ́Ꞌɔ, pɔ́p sẅíi wɔ́p ŋɡɔ: «Ɛ́ nɛ́nẅín ŋɡɔ Ndɛ zẅíimɛ nǔu nɛvú, Símɔ̂ŋ lɑ́Ꞌnɛ ńjʉ́ɔ wɛ́.»

³⁵Pɔ́p pɛn ḿbɛ́ɛtɛ yɔ́p yúu mi pɔ́p lɑ́Ꞌnɛ ńtɔ́ sɛ̂ndúŋ ńjʉ́ɔ, ŋɡɔ pɔ́p lɑ́Ꞌ ŋ́ɡɔ́ ńdii wɛ́, mbɔ ɑ pɛ́ɛ mbɛlɛ̂ɛt tɛ ḿbɔ́ ŋ́ɡɑp.

³⁶Pɔ́p pɛ́t ɛ́sẅíŋɛ sẅiŋɛnɛ, Yɛ́su ɡɔ́ɔ ńcẅɛt ńtʉ́ʉ tsɛtsɛt pɔ́p, ńcɛꞋlɛ wɔ́p ŋɡɔ: «Mbɔ́tnɛ pɔ́ nɛ́ pʉʉ!»

³⁷Lɛ́m yɔ́p sɑ́ɑnɛ. Pɔ́p pɔ́k, ńzɛ ḿbɔ́ ŋ́kwɑŋɛ pɔ ŋɡɔ ɛ́ jíjʉ́ŋ-ŋu.

³⁸Lɑ́ Yɛ́su cú mbɔ̌ pɔ́p ŋɡɔ: «Lɛ́m yʉ́ʉ sɛ́ ńtsɔ́Ꞌɔnɛ tsɔ́Ꞌnɛ́nɛ mɛlɑ́Ꞌkʉ̈ɔ́? Pʉʉ mʉꞋlɛ mʉꞋlɛ́nɛ mɛlɑ́Ꞌkʉ̈ɔ́?

³⁹Pʉʉ líŋɛ mbɔ́ mɑ́ɑ nɛ mɛku mɑ́ɑ lɑ́ ńjʉ́ɔ, ɑ kwɑꞋ mɔ. Pʉʉ mɔɔtɛ wɑ́ɑ lɑ́ ńzúꞋ, jíjʉ́ŋ-ŋu kɑ́ ɡẅɛɛ mbɑp-mbʉʉ pɔ́, ŋ́kɛ́ ḿbɔɔ mɛtsẅí ɡẅɛɛ, pʉʉ kɛ ńjʉ́ɔ pɑꞋ, m bɛn ŋ́ɡẅɛɛ mbɑp-mbʉʉ nɛ mɛtsẅí.»

⁴⁰A ɡɔ́ ńcú ḿbɔ́ ńnyɛt wɔ́p nɛ́ mbɔ́ mɛ́ pɔ́p mɛku mɛ́.

⁴¹Pɔ́p pɔ́ ńtsɑ́ɑtɛ tɛꞋ lɑ́ ɛ́ pɛ́t ŋ́kʉꞋnɛ wɔ́p kʉꞋnɛ́nɛ, pɔ́p cú ŋɡɔ kɛ ɛ́ nu ɔ́ɔ? Yɛ́su píkŋɛ wɔ́p ŋɡɔ: «Pʉʉ ɡẅɛɛ yúu kwɛ́tnɛ zɑ́Ꞌnɛ?»

⁴²Pɔ́p lɔ́ɔ kɛ́m-shú yi tɔɔnɛ ŋ́ɡɑ́ mbɔ̌ wɛ́.

⁴³A cẅɛ́ɛ, ńtʉ́ʉ pɔ mbi pɔ́p ŋ́kwɛ́t.

⁴⁴A kɑ kwɛ́t tɛ ḿmɛk, ńcú mbɔ̌ pɔ́p ŋɡɔ: «Pʉʉ jʉ́ɔ yúu mi ŋ kɑ pɔ́ ɛ́sẅíi wʉ́ʉ, ŋkɑ́ yi pɛkŋɛ kɑ pɛ́tnɛ ńjúk. Ŋ kɑ sẅíi wʉ́ʉ ŋɡɔ ɛ́ sɛ́ ḿbíkŋɛ ŋɡɔ yɛ́t kʉ̈ɔ́ lɑ́ yi pɛ́ kɑ ŋwɑꞋnɛnɛ nǔu mɔ lɑ́ puutɛ. Mɛnu ɛ̂mɑ́ tsʉʉ tsʉʉ mi ɛ́ tsɛt ŋwɑꞋnɛ-Mɔ̌sɛ̂ɛ, mbɑ tsɛt yi pɛŋɡɛ́mndʉ̈ɔ́Ꞌ-Sɛ́ pɔ́p yi mɛzɔpŋki.»

⁴⁵Ŋ́ɡɔ́ɔ ŋ́kɛ́ ńtsɔ́Ꞌ jínu yɔ́p, ŋ́ɡɛ pɔ́p zúꞋ mɛnu mi ɛ́ tsɛt ŋwɑꞋnɛ-Sɛ́.

⁴⁶Ńcú ŋɡɔ: «Ɛ́ tsɛt ŋwɑꞋnɛ-Sɛ́ ḿbɔ́ ŋɡɔ: Nzɑ́Ꞌŋkʉ ɡẅɛɛ nɛ lɑ́Ꞌ ńjʉ́ɔ ŋɡʉ̈ɔ́Ꞌ, ḿpfú, lɑ́ Sɛ́ pɛn ńzẅíi wɛ́ nǔu nɛvú nǔu mbɑ́ɑtɛ lɛ́Ꞌ pɛ́tɑ́t.

⁴⁷Ɛ́ sɛ́ ḿbíkŋɛ ŋɡɔ pɛ́ lɑ́Ꞌ ńdɔk lík yɑ́ɑ, ńcú nu-Sɛ́ mbɔ̌ lɑ́Ꞌ ŋɡɔ mbɑ wɔ̌ lɑ́ kúpmɛ mɑt wɛ, Sɛ́ likŋɛ mɛnu kɛpɔŋ mɛ́. Pɔ́Ꞌɔ, ɛ́ kɛ ńzɛ Yɛlúsɑlɛm.»

⁴⁸Pʉʉ ɡʉnɛ ŋ́kɛ́ ḿbɔ́ pɑjʉ́ ńjʉ́ɔ, nɛlɔk mɛnu ɛ̂mɑ́ ɛ́sɑt lɑ́Ꞌ.

⁴⁹Pʉʉ jí ŋɡɔ ŋ ɡɛ ńtɔ́ ńtúu yúu mi Tɑ̌ɑ mɔ kɑ kɑꞋnɛ nɛɡɑ́ mbɔ̌ pʉʉ. Pʉʉ kɛ ńzẅíꞋlɛ pɔ tʉ́sɔŋ tɛ ŋ́kúu ŋkɑ́ yi mɛtʉʉ-Sɛ́ ɡʉ ɛ́fú tʉ́nɛ́pú ńcúŋ ŋ́kúu nǔu pʉʉ.

⁵⁰Yɛ́su cú pɔ́Ꞌɔ, ńdɔk wɔ́p ńcẅɛt, ŋ́ɡʉ tɛ ńtsʉ́Ꞌ nɛkúu Mbɛtɑni, ŋ́kɑꞋ mbɔ́ ŋ́ɡɑ́ tʉ́, ńníꞋ mbɔ́tnɛ nǔu pɔ́p.

⁵¹A pɔ́ ńníꞋ mbɔ́tnɛ nǔu pɔ́p pɔ́Ꞌɔ, ḿbɔ́ ŋ́kɔ́Ꞌ ŋ́ɡʉ nɛ́ tʉ́nɛ́pú.

⁵²Pɔ́p tsʉ́Ꞌ ńtʉ́ʉ zúꞋu ḿbɔ́ ŋ́ɡúꞋlɛ wɛ́, tɛ ɛ́ kuꞋ, pɔ́p lɔk tsɑ́ɑtɛ ḿbɛn nzʉʉ nɛ́ Yɛlúsɑlɛm.

⁵³Ŋ́ɡʉ tɛ ŋ́kúu zúꞋu, ŋ́kɛ́ ńtsʉ́Ꞌ ńnɑ́ŋ pɔ tsɛt ndɑ́-nɛnɔŋpɔꞋ ŋkɑ́ tsʉʉ, ŋ́ɡúꞋlɛ Sɛ́.