Read Ngomba Lúkɑ́shi 3 Bible Online

Lúkɑ́shi 3 - Ngomba bible

Lúkɑ́shi 3

¹Jɑ̂ŋ mɔ́ɔ Sɑkɑlíyɑ lɑ́Ꞌ ńtswɛ́ kɔ̂ŋtɛt tɛ Sɛ́ túu wɛ́ ŋɡɔ ɑ ɡʉ ɛ́sẅíi nu yɛ́. Ɛ́ pɔ́ ŋɡuꞋ ɛ̂yɑ́, mbɔ Kɑ́sɑ Tíbɛɛ ẅi ɑ m̄bɔ́nɛ ɛ́sɑ́Ꞌ ŋɡɔŋ nɛ́ ŋɡɔŋ, mbɔ ɑ nɑ́ŋ nǔu kɔꞋ ŋɡuꞋ ntsɔ̌pɛ́tɑɑ nɛ́ nɛɡɛ́m. Pɔ́ŋnti Pilɑ́tɔ pɔ́ ŋɡɔ́mnɑɑ ŋɡɔ́ŋ-Jẅidɛ̂, Ɛlɔ̂dɛ pɔ́ sɑ́Ꞌ ŋɡɔ́ŋ-Ŋɡɑlilɛ́, mɔ́ɔmɑ́ wɛ Filîp pɔ́ sɑ́Ꞌ Itẅílíyɑ pɔ́p Tɛ́lɑkɔnît, Lisɑníyɑs pɔ́nɛ ɛ́sɑ́Ꞌ Abilɛ̂n. Ánɑ pɔ́p Kɑyífɑ pɔ́ pɛtɑ́tndɑ́-pɑnɔ́ŋpɔꞋ.

³Jɑ̂ŋ ɡɔ́ɔ ŋ́ɡʉ tsɛt mɛlɑ́Ꞌ mi ɛ́ ŋkɑŋ-ŋki Juudɛŋ, ńnɛn sɑ́Ꞌ lɑ́Ꞌ ŋɡɔ: Pɔ́p kúpmɛ mɑt wɔp ńnuꞋ wɔ́p ŋki, Sɛ́ likŋɛ mɛnu kɛpɔŋ mɔ́p ŋ́ɡɑ́ mbɔ̌ pɔ́p.

⁴Ɛ́ lɔk ḿbuutɛ nǔu nu yí Ɛsɑ̌yɑ, ŋɡɛ́mndʉ̈ɔ́Ꞌ-Sɛ́ kɑ ŋwɑꞋnɛnɛ ŋɡɔ: «Ŋɡi-ŋu kɔ́Ꞌ ɛ́fú kɔ̂ŋtɛt ńcú ŋɡɔ: Pʉʉ niitɛ sɛ̂ndúŋ Tsɑpʉɔ, ŋ́ɡɛ mɛlɛ̌ɛndúŋ mɛ́ tʉ́ʉ ndʉ́ŋndʉŋ!

⁵Ńdẅíkŋɛ mɛfúꞋ tsʉʉ mi ɛ́ nǔu, ŋ́kɔk mɛmbɑ́t pɔ́p mɛŋkɔ́Ꞌ tsʉʉ, ɛ́sɛn ndúŋ ŋɔ́Ꞌnɛ́nɛ ɛ́ tʉ́ʉ ndʉ́ŋndʉŋ, ŋ́kwɑk mɛlút mi ɛ́ ndǔ sɛ̂ndúŋ ɛ́sɑŋtɛ!

⁶Lɑ́ ɛ́ lɛɛ pɔ́Ꞌɔ, pʉɔ pɛtsʉʉ jʉ́ɔ pɑ́Ꞌ Sɛ́ ɡʉ ŋ́ɡɛ pɛkŋɛ luk.»

⁷Jɑ̂ŋ cú pɔ́Ꞌɔ, pʉɔ tɛ ńzɑ́ɑ pɔ́ ńtɔ́ pɑ́Ꞌ ɑ ńnuꞋ wɔ́p ŋki. A pɔ́ ńcú mbɔ̌ pɔ́p ŋɡɔ: «Njẅɛt-mɛnɔ́, pɑtɑ́ɑ mɛzúŋ! Wɔ̌ sẅíinɛ wʉ́ʉ nɛkʉɔ ŋɡʉ̈ɔ́Ꞌ yi pʉʉ lɔ́ɔnɛ tɛ ɛ́ pɔ́ ŋ́ɡʉ ŋ́kúu nǔu pʉʉ?

⁸Pʉʉ kúp pɔ mɑt, ŋ́ɡɛ mɛnu sʉ́Ꞌnɛ mi ɛ́ nyɛtnɛ ŋɡɔ pʉʉ kúpmɛ. Pʉʉ pɑ́ɑ nɛlɔk ndɑꞋ ntsu wʉ́ʉ ńcú ŋɡɔ: Pɛk pɔ́ɔ-Ábɛlɛhɑm. Lɑ́ ŋ kɛ́ ɛ́sẅíi wʉ́ʉ: Sɛ́ kuꞋ nɛshɔt mɛŋɡɔꞋ mɔnɛ ńdɔk ŋ́ɡɛ njẅɛt-Ábɛlɛhɑ̂m.

⁹Pɛ́ kɛ́ mɔ́ ńzɛ ńtíi nzɑɑ nɛlɔk ŋ́kʉ́ɔꞋ mbɑ yɛ́tɛ́ tʉ́ lɑ́ yi ɛ́ sɛ́ ḿbɔɔ ńzɛ́m ntɑ́ɑ-sʉ́Ꞌnɛ pɔ́, ɛ́fú sɛ́ ŋ́kʉ́ɔꞋ wɛ́ ḿmɑꞋ pɔ múk.»

¹⁰Lɑ́Ꞌ zúꞋ, ḿbíkŋɛ wɛ́ ŋɡɔ: «Tɛ pɛk ŋ́ɡɛ pɑ́Ꞌɑ?»

¹¹A tsɔ́Ꞌ mbɔ̌ pɔ́p ŋɡɔ: «Ŋu wʉʉ lɑ́ɑ ŋ́ɡẅɛɛ mɛndẅí mɛ́mbɑ́, ɑ ɡɑ́ tɑ́Ꞌ mbɔ̌ ŋu ẅi ɑ zɛ ḿbɔɔ yɛcɔ́ ɡẅɛɛ. Ŋu ẅi ɑ ɡẅɛɛnɛ yúujʉ́, ɡɑ́ yɛ ŋu ẅí nji sɛ́ ńzɑ́ŋ wɛ́.»

¹²Pɑcẅɛ́ɛntsup-Pʉɔlɔ́mɑ kɑ tɔ́ yɔ́p pɑ́Ꞌ pɛ́ ɡɛ ńnuꞋ wɔ́p ŋki, ḿbíkŋɛ ŋɡɔ: «Cícɑ, tɛ pɛk ɡʉ ŋ́ɡɛ yɛk ŋɡɔ ku?»

¹³Jɑ̂ŋ tsɔ́Ꞌ mbɔ̌ pɔ́p ŋɡɔ: «Pʉʉ cẅɛ́ɛ ndɑꞋ yúu mi nɛpʉ́ʉ-Sɛ́ sɛ́ ḿbíkŋɛ, kɔɔ pʉʉ kẅiꞋ!»

¹⁴Pɑlʉ̈ɔ́Ꞌntsɔ pɛn ḿbíkŋɛ yɔ́p ŋɡɔ: «Ŋ́ɡʉ nǔu pɛk, pɛk ŋ́ɡɛ pɑ́Ꞌɑ?» A pʉ̈ɔt ŋɡɔ: «Kɔɔ pʉʉ lɔk mɛtʉʉ mbɑ cɔtnu ɛ́fyɛ́t ŋu ńcẅɛ́ɛ ŋkɑ́p yɛ. Pʉʉ zẅiꞋlɛ pɔ ndɑꞋ ŋkɑ́p-fɑꞋ yʉʉ.»

¹⁵Pɑ́Ꞌ ɛ́ kɑ ɡɔ ḿbɔ́ lɑ́Ꞌ pɔ́ ńzẅíꞋlɛ Nzɑ́Ꞌŋkʉ ẅí Sɛ́ kɑ kɑꞋnɛ lɑ́, mbɑ wɔ̌ lɑ́ pɔ́ ḿbíkŋɛ tsɛt tʉ́m yɛ́ ŋɡɔ: Kɛ Jɑ̂ŋ lɔk ḿbɔ́ pɔ jʉ́?

¹⁶Lɑ́ ɑ pʉ̈ɔt mbɔ́ pɔ́p pɛ́tsʉʉ ŋɡɔ: «Mɔ, ŋ ɡẅɛɛ yɑ́ɑ pɔ ndɑꞋ nɛnuꞋ wʉ́ʉ ŋki. Lɑ́ kwɑꞋ ŋu ɡwɛ́ sɛ́ ńtɔ́; ɑ lɛɛ wɑ́ɑ tɛꞋ, ŋ kɑ́ kuꞋ nɛkyɛ́Ꞌ mɛŋkʉ-mɛtɑp mɛ́ pɔ́. A ɡʉ ńtɔ́ ńníꞋ pʉɔ tsɛt mbɔ́-Zẅikŋɛ Lɛ́ɛnɛ́nɛ, ḿbɛn ńníꞋ pʉɔ tsɛt múk.»

¹⁷A ɡʉ ńtɔ́ ɛ́fɑ́k yúu mi pɛ́ púꞋnɛ, ńníꞋ yi sʉ́Ꞌnɛ ŋkɛn, ńtsʉ́ꞌ kyɑŋɛ, ḿbʉ̈ɔt tsɛt múk ẅi ɛ́ ŋ́ɡʉ ńdɑ́Ꞌ ḿbɛ́ pɔ́.

¹⁸Jɑ̂ŋ pɔ́ ɛ́sɑ́Ꞌ Ŋkʉʉ sʉ́Ꞌnɛ pɔ́Ꞌɔ, ḿbɛn ŋ́ɡɑ́ mɛntík tɛ ńzɑ́ɑ mbɔ̌ lɑ́Ꞌ.

¹⁹A kɑ kɑkŋɛ mbɑ ŋɡɔ́mnɑɑ Ɛlɔ̂dɛ ntɛ́ pɑ́Ꞌ ɑ kɑ tíinɛ Ɛlɔ̂díyɑ ẅi ɑ m̄bɔ́nɛ nzwɛ́-mɔ́ɔmɑ́ wɛ, ḿbɛn ŋ́kɑkŋɛ wɛ́ ntɛ́ mɛcɔ́ mɛnu kɛpɔŋ tɛ ńzɑ́ɑ.

²⁰Ɛlɔ̂dɛ ɡɔ mɛkŋɛ ńcɔp, ńcú pɛ́ ɡẅɛɛ Jɑ̂ŋ ḿmɑꞋ ndɑ́tsɑ́ŋ.

²¹Jɑ̂ŋ kɑ kɛ́ ŋ́ɡɔ ŋ́kúu tsɑ́ŋ, mbɔ ɛ́ m̄bɔ́ yɛcɔ́ lɛ́Ꞌ, ɑ nuꞋ pʉɔ ŋki tɛ ɛ́ mɛ, Yɛ́su tɔ́ yɛ́, ɑ nuꞋ wɛ́ ɡúu ŋki. Pɑ́Ꞌ ɑ ḿbɔ́ ŋ́ɡúꞋlɛ Sɛ́, ntsu-tʉ́ nɛpú tsɔ́Ꞌnɛ ntʉ́ʉ.

²²Zẅikŋɛ Lɛ́ɛnɛ́nɛ cúŋ pɑ́Ꞌ puutɛ lɑ́, ńtʉ́ʉ nǔu yɛ, ŋɡi fú tʉ́nɛ́pú ŋɡɔ: «Ɔ mɔ́ɔ wɑɑ, ŋ kɔŋ wú tɛꞋ, ɔ yɑ́ɑ tsɑ́ɑtɛ.»

²³Yɛ́su kɑ ɡɔ ńzɛ nɛsɑ́Ꞌ Ŋkʉʉ sʉ́Ꞌnɛ, ɛ́ ńtsʉ́Ꞌ mɔ́yúu ɑ ɡẅɛɛ ŋɡuꞋ mɛɡɛ́mɛ́ntɑ́t, pɛ́ pɔ́ ŋ́kwɑŋɛ ŋɡɔ ɑ mɔ́ɔ-Yɔsɛ̂p. Yɔsɛ̂p pɔ́ mɔ́ɔ-Ɛlîi.

²⁴Ɛlîi pɔ́ mɔ́ɔ-Mɑtɑt. Mɑtɑt pɔ́ mɔ́ɔ-Lɛ́vi. Lɛ́vi pɔ́ mɔ́ɔ-Mɛ̂lshi. Mɛ́lshi pɔ́ mɔ́ɔ-Jɑnɑ̂y. Jɑnɑ̂y pɔ́ mɔ́ɔ-Yɔsɛ̂p.

²⁵Yɔsɛ̂p pɔ́ mɔ́ɔ-Mɑtɑtíɑs. Mɑtɑtíɑs pɔ́ mɔ́ɔ-Ámɔs. Ámɔs pɔ́ mɔ́ɔ-Nɑwûm. Nɑwûm pɔ́ mɔ́ɔ-Ɛslí. Ɛslí pɔ́ mɔ́ɔ-Nɑɡɑ̂y.

²⁶Nɑɡɑ̂y pɔ́ mɔ́ɔ-Mɑɑt. Mɑɑt pɔ́ mɔ́ɔ-Mɑtɑtíɑs. Mɑtɑtíɑs pɔ́ mɔ́ɔ-Sɛ́mɛ̂n. Sɛ́mɛ̂n pɔ́ mɔ́ɔ-Yɔsɛ̂k. Yɔsɛ̂k pɔ́ mɔ́ɔ-Jɔ́dɑ.

²⁷Yɔ́dɑ pɔ́ mɔ́ɔ-Yɔɑ́nɑŋ. Yɔɑ́nɑŋ pɔ́ mɔ́ɔ-Lɛ́sɑ. Lɛ́sɑ pɔ́ mɔ́ɔ-Zɔlɔbɑbɛl. Zɔlɔbɑbɛl pɔ́ mɔ́ɔ-Sɑlɑtiɛ̂l. Sɑlɑtyɛl pɔ́ mɔ́ɔ-Nɛlí.

²⁸Nɛlí pɔ́ mɔ́ɔ-Mɛ̂lshi. Mɛ̂lshi pɔ́ mɔ́ɔ-Adí. Adî pɔ́ mɔ́ɔ-Kɔsɑm. Kɔsɑm pɔ́ mɔ́ɔ-Ɛlmɑ́ndɑm. Ɛlmɑndɑm pɔ́ mɔ́ɔ-Ɛt.

²⁹Ɛt pɔ́ mɔ́ɔ-Yɛ́su. Yɛ́su pɔ́ mɔ́ɔ-Ɛliyɛ́zɛɛ. Ɛliyɛ́zɛɛ pɔ́ mɔ́ɔ-Yɔlîm. Yɔlîm pɔ́ mɔ́ɔ-Mɑtɑt. Mɑtɑt pɔ́ mɔ́ɔ-Lɛ́vi.

³⁰Lɛ́vi pɔ́ mɔ́ɔ-Simɛyɔ̂ŋ. Simɛyɔ̂ŋ pɔ́ mɔ́ɔ-Jẅídɑ. Jẅídɑ pɔ́ mɔ́ɔ-Yɔsɛ̂p. Yɔsɛ̂p pɔ́ mɔ́ɔ-Yɔnɑ̂m. Yɔnɑ̂m pɔ́ mɔ́ɔ-Ɛliyɑ́kim.

³¹Ɛlíyɑkim pɔ́ mɔ́ɔ-Mɛlɛ́yɑ. Mɛlɛ́yɑ pɔ́ mɔ́ɔ-Mɛ́nɑ. Mɛ́nɑ pɔ́ mɔ́ɔ-Mɑtɑtɑ. Mɑtɑtɑ pɔ́ mɔ́ɔ-Nɑtɑ̂ŋ. Nɑtɑ̂ŋ pɔ́ mɔ́ɔ-Ndɑvît,

³²Ndɑvît pɔ́ mɔ́ɔ-Jɛsɛ́. Jɛsɛ́ pɔ́ mɔ́ɔ-Ɔbɛ̂t Ɔbɛ̂d pɔ́ mɔ́ɔ-Mbɔ̂ɔz. Mbɔ̂ɔz pɔ́ mɔ́ɔ-Sɑllɑ. Sɑllɑ pɔ́ mɔ́ɔ-Nɑɑsɔ̂n.

³³Nɑɑsɔŋ pɔ́ mɔ́ɔ-Amínɑdɑp. Amínɑdɑp pɔ́ mɔ́ɔ-Admin. Admin pɔ́ mɔ́ɔ-Aɑnî. Aɑnî pɔ́ mɔ́ɔ-Ɛ́slɔm. Ɛslɔm pɔ́ mɔ́ɔ-Pɛlɛ̂s. Pɛlɛ̂s pɔ́ mɔ́ɔ-Jẅídɑ,

³⁴Jẅídɑ pɔ́ mɔ́ɔ-Yɑkɔ̂p. Yɑkɔ̂p pɔ́ mɔ́ɔ-Ɛ́sɑk. Ɛ́sɑk pɔ́ mɔ́ɔ-Ábɛlɛhɑ̂m. Ábɛlɛhɑ̂m pɔ́ mɔ́ɔ-Tɛlɑ́. Tɛlɑ́ pɔ́ mɔ́ɔ-Nɑhɔ̂ɔ.

³⁵Nɑhɔ̂ɔ pɔ́ mɔ́ɔ-Sɛluk. Sɛluk pɔ́ mɔ́ɔ-Lɑɡɑ́ɔ. Lɑɡɑ́ɔ pɔ́ mɔ́ɔ-Fɑlɛk. Fɑlɛk pɔ́ mɔ́ɔ-Hɛbɛ̂ɛ. Hɛbɛ̂ɛ pɔ́ mɔ́ɔ-Sɑllɑ.

³⁶Sɑllɑ pɔ́ mɔ́ɔ-Kɑynɑm. Kɑynɑm pɔ́ mɔ́ɔ-Álfɑksɑ̂t. Alfɑksɑ̂t pɔ́ mɔ́ɔ-Sɛ̂m. Sɛ̂m pɔ́ mɔ́ɔ-Nɔwɛ́. Nɔwɛ pɔ́ mɔ́ɔ-Lɑmɛ̂k.

³⁷Lɑmɛ̂k pɔ́ mɔ́ɔ-Mɑtúsɑlɑ. Mɑtúsɑlɑ pɔ́ mɔ́ɔ-Hɛnɔk. Hɛnɔk pɔ́ mɔ́ɔ-Yɑlɛ̂t. Yɑlɛ̂t pɔ́ mɔ́ɔ-Mɑlɛlɛ̂l. Mɑlɛlɛ̂l pɔ́ mɔ́ɔ-Kɑynɑm.

³⁸Kɑynɑm pɔ́ mɔ́ɔ-Ɛ́nɔs. Ɛnɔs pɔ́ mɔ́ɔ-Sɛt. Sɛt pɔ́ mɔ́ɔ-Ádɑm. Ádɑm pɔ́ ẅi Sɛ́ kɑ pɔ́ɔnɛ́ wɛ́.