Read Ngomba Lúkɑ́shi 4 Bible Online

Lúkɑ́shi 4 - Ngomba bible

Lúkɑ́shi 4

¹Jɑ̂ŋ kɑ pɔ́ tɛ ńnuꞋ Yɛ́su ŋki, ɑ fú mbʉʉ-ŋki Juudɛŋ ŋ́ɡʉ. Zẅikŋɛ Lɛ́ɛnɛ́nɛ kúu nǔu wɛ́, ńdɔk wɛ́ ŋ́ɡʉ nɛ́ kɔ̂ŋtɛt.

²Ńtswɛ́ zúꞋu lɛ́Ꞌlɑ́Ꞌ mɛɡɛ́mɛ́nɛ́kwɑ, Zẅikŋɛ Lɛ́ɛnɛ́nɛ pɔ́ ńtʉ̈ɔ́Ꞌlɛ wɛ́, Sɑ́ttɑ tɔ́ ḿbɔ́ ŋ́kwɑꞋlɛ wɛ́ kwɑꞋnɛ́nɛ. Yɛ́su ɡɛ ńnɑ́ŋ zúꞋu, ńdɑ́Ꞌ ḿbɔɔ yúu kwɛ́t tɛ ɛ́ tsʉ́Ꞌ nɛmɛ; nji zɑ́ŋ wɛ́ tɛꞋ.

³Sɑ́ttɑ tɔ́ ńcú mbɔ̌ wɛ́ ŋɡɔ: «Pɑ́Ꞌ ɔ mɔ́ɔ-Sɛ́ lɑ́, kɛ́ ŋ́ɡɔ́ɔ ńcú mbɔ̌ ŋɡɔꞋ yɔ ŋɡɔ ɛ́ shɔtnɛ ńtsʉ́Ꞌ yúujʉ́ ɔ jʉ́!»

⁴Yɛ́su pɑꞋ mbɔ̌ Sɑ́ttɑ ŋɡɔ: «Pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: Ŋu kɛ́ lɔk pɔ ndɑꞋ yúu minɛ ɑ jʉ́nɛ lɑ ḿbɔ́ ɡú pɔ́.»

⁵Sɑ́ttɑ pɛn ńdɔk wɛ́ ŋ́ɡʉ ńtík yɛcɔ́ zʉꞋ tɛ tʉ́, ńtʉ́ʉ zúꞋu ŋ́ɡɛ ɑ jʉ́ɔ mɛŋɡɔŋ mi ɛ́ ndǔ tsɛ́tsɑ́ꞌ tsʉʉ tɑ́Ꞌ ŋkɑ́,

⁶ńcú mbɔ̌ wɛ́ ŋɡɔ: «Pɛ́ kɑ ɡɑ́ mɛŋɡɔŋ mɔ́ mbɔ̌ mɔ, m bɛn ŋ́kuꞋ nɛɡɑ́ mbɔ̌ mbɑ wɔ̌lɑ́ ẅi ŋ kɔŋnɛ. Ŋ ɡʉ ńzɛɛ ŋ́ɡɑ́ nɛfɔɔ mbɔ̌ wu, ɡu tsʉ́Ꞌnɛ ńdɔk ŋ́ɡẅɛɛ yúu sʉ́Ꞌnɛ yi ɛ́ tsɛtú tsʉʉ.

⁷N cú pɔ ndɑꞋ ŋɡɔ ɔ pi mɛkẅíꞋlɛ mú mbi mɔ, ŋ́ɡúꞋlɛ wɑ́ɑ pɑ́Ꞌ Sɛ́, ɛ́ kɛ́ ŋ́ɡɔ́ɔ ńtsʉ́Ꞌ yú.»

⁸Yɛ́su tsɔ́Ꞌ mbɔ̌ wɛ́ ŋɡɔ: «Pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: Ŋu ɡúꞋlɛ pɔ ndɑꞋ tɑ̌ɑ wɔp Sɛ́ jʉ́ zɛnɛ jʉ́, ḿbɛn ńzúꞋ pɔ ndɑꞋ ntsu wɛ́.»

⁹Sɑ́ttɑ ɡɔ́ɔ ńdɔk Yɛ́su ŋ́ɡʉ nɛ́ Yɛlúsɑlɛm ŋkɔ̂ɔnɛ, ńtík wɛ́ ndǔ ntsɔꞋ-ndɑ́-nɛnɔŋpɔꞋ, Ńcú mbɔ̌ wɛ́ ŋɡɔ: «Ɔ lɑɑ ḿbɔ́ mɔ́ɔ-Sɛ́, ɔ fú zɑ́Ꞌnɛ, ŋ́kít, ńcʉ́ɔ sɛ́! MbíꞋŋɡɔ

¹⁰pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: Sɛ́ ɡʉ ńcú pɛcʉ̈ɔ́Ꞌ pɛ́ tɔ́ ńdʉ̈ɔ́tɛ wú.

¹¹Pɛ́ kɑ pɛn ŋ́ŋwɑꞋnɛ ŋɡɔ: Pɔ́p ɡʉ ńdɔk mbɔ́ mɔ́p ńtíi wú tɛ ɔ pɔɔ tɛ́m ku yú nǔu ŋɡɔꞋ pɔ́.»

¹²Yɛ́su tsɔ́Ꞌ mbɔ̌ Sɑttɑ ŋɡɔ: «Pɛ́ kɑ pɛn ŋ́ŋwɑꞋnɛ tsɛt ŋwɑꞋnɛ-Sɛ́ ŋɡɔ: Ḿbɑ́ɑ ɡu nɛkwɑꞋnɛ Tsɑpʉɔ Sɛ́ wu kwɑꞋnɛ́nɛ ŋɡɔ ɑ ɡɛ yúu nǔu ɡu!»

¹³Sɑ́ttɑ kwɑꞋnɛ Yɛ́su tɛ ḿmik mɛntɛ́, ńjʉ́ɔ kɛ́kɑ́ŋ, ńnɑ́ wɛ́, ŋ́ɡʉ, ḿbɔ́ ńzẅíꞋlɛ ŋkɑ́ ndɛꞋ yi ɑ ɡʉ ŋ́ɡɛ ḿbɛn ńtɔ́ nǔu wɛ́.

¹⁴Yɛ́su ɡɔ ḿbɛn nɛ́ Ŋɡɑlilɛɛ, zẅikŋɛ-Tsɑpʉɔ Sɛ́ pɔ́ ŋ́ɡɑ́ wɛ́ nɛ́ mɛtʉʉ, ńdɔk ńnyɛt mɛfɑꞋ-Sɛ́. Lík yɛ́ sɑt yîyɑ́ pɑk-ŋɡɔŋ,

¹⁵mbíꞋŋɡɔ ɑ kɑ pɔ́ ńzíꞋ pʉɔ nɛ́ nu-Sɛ́ ndɑ́-cúꞋlɛ-Pɑyúdɑ, pʉɔ pɛtsʉʉ pɔ́ ŋ́ɡɑ́ mɛkuꞋ mɛ́.

¹⁶Yɛ́su lɑ́Ꞌ ńnɑ́ŋ tɛ ḿbɛn Nɑ̌ɑzɑlɛt, zʉꞋ yi ɑ kɑ ɡúꞋnɛ zúꞋu. Lɛ́Ꞌ-nji yɔ́p kuꞋ, ɑ ɡʉ ndɑ́-cúꞋlɛ Pɑyúdɑ pɑ́Ꞌ ɑ lɔ ńzɛɛ ŋ́ɡʉ. Ŋkɑ́ kuꞋ, ɑ lɔ sɛ́ nɛfúŋ ŋwɑꞋnɛ-Sɛ́.

¹⁷Pɛ́ pɛ́ɛ ŋwɑꞋnɛ-Ɛsɑ̌yɑ ŋɡɛ́mndʉ̈ɔ́Ꞌ-Sɛ́, ŋ́ɡɑ́ mbɔ̌ wɛ́. A níɛꞋ nǔu zʉꞋ yi pɛ́ kɑ ŋwɑꞋnɛ zúꞋu ŋɡɔ:

¹⁸«Zẅikŋɛ-Tsɑpʉɔ nǔu mɔ, mbíꞋŋɡɔ ɑ kɑ zɔ́Ꞌ wɑ́ɑ, ńtúu wɑ́ɑ ŋɡɔ ŋ ɡʉ, ɛ́sɑ́Ꞌ Ŋkʉʉ sʉ́Ꞌnɛ mbɔ̌ ɡɑŋɡʉ̈ɔ́Ꞌ, ńtúu wɑ́ɑ ŋɡɔ ŋ ɡʉ ɛ́sɑ́Ꞌ mbɔ̌ ɡɑŋtsɑ́ŋ ńcú ŋɡɔ: Pɛ́ ɡʉ ńcẅɛɛtɛ wɔ́p ndɑ́-kwɑɑ, ńtúu wɑ́ɑ ŋɡɔ ŋ ɡʉ, ŋ́ɡɛ pɛfʉmík jʉ́ɔ zʉꞋ, ŋɡɔ ŋ ɡʉ, ńtɔ́ɔtɛ nzʉʉ pʉɔ pinɛ pɛ́ sɛ́ ɛ́fyɛ́t wɔ́p,

¹⁹ḿbɛn, ńtúu wɑ́ɑ ŋɡɔ ŋ ɡʉ ɛ́sɑ́Ꞌ mbɔ̌ lɑ́Ꞌ ŋɡɔ yɔ ŋɡuꞋ yi Tsɑpʉɔ ɡʉ ńtsɑ́ɑ mɛjʉ́ŋ pʉɔ pɛ́.»

²⁰Yɛ́su kɑ fúŋ yîyɑ́ zʉꞋ tɛ ɛ́ mɛ, ŋ́kɑ́tɛ ŋwɑꞋnɛ[6], ŋ́ɡɑ́ mbɔ̌ ŋu ẅí ɑ fɑꞋnɛ ndɑ́ zúꞋu, ńcúŋ, ńnɑ́ŋ sɛ́ nɛkyɛ́Ꞌtɛ. Pʉɔ pinɛ pɔ́p ḿbɔ́nɛ ndɑ́-cúꞋlɛ tík mík nǔu wɛ́, ḿbɔ́ ńzẅíꞋlɛ.

²¹A ɡɔ́ɔ ŋ́kɛ́ ńzɛ nɛkyɛ́Ꞌtɛ, ńcú ŋɡɔ: «Mɛnu mi pʉʉ fú zɑꞋnɛ nɛzúꞋ tsɛt ŋwɑꞋnɛ-Sɛ́ lɑɑnɛ, ɛ́ puutɛ lɔ́Ꞌnɛ.»

²²Pɔ́p zúꞋ sẅiŋɛ yi ɛ́ cẅɛtnɛ ntsu wɛ́. Ɛ́ pɔ́ ḿbɔŋ wɔ́p, ḿbɛn ḿbɔ́ ŋ́kʉꞋnɛ wɔ́p. Pɔ́p zɛ nɛpíkŋɛ, ńcú ŋɡɔ: «Yɔ kɑ pɔ́ mɔ́ɔ-Yɔsɛ̂p pɔ́ ɔɔ?»

²³Yɛ́su pʉ̈ɔt mbɔ̌ pɔ́p ŋɡɔ: «Pʉʉ ɡʉ ŋ́ɡẅɛɛ kwɑŋɛ-sɑknɛkɛt nɛcú ŋɡɔ: Ŋɡɛmɛfu zɔŋ tú mbʉʉ yu! Pɛk zúꞋ ndɑɑkɑ́jʉ́ɔ mɛnu ɔ ŋ́ɡɛnɛ Kɑpɛɛnɑwûm, pɛn ŋ́ɡɛ zɑꞋnɛ lɑ́Ꞌ pʉʉ lɑ́.»

²⁴Yɛ́su pɛn ŋ́kẅiꞋ ńcú mbɔ̌ pɔ́p ŋɡɔ: «Lɑ́ ŋ kɛ́ ɛ́sẅíi wʉ́ʉ nɛ́nẅín, pɛ́ lɔ́ɔ ḿbɛ́m nu-ŋɡɛ́mndʉ̈ɔ́Ꞌ-Sɛ́ lɑ́Ꞌ pɔ́p pɔ́.»

²⁵Lɑ́ ɛ sẅíi wʉ́ʉ, kwɑꞋ nɛ́nẅín, ɛ́ ḿbɔ́ ŋkɑ́ yi Ɛlîi, ŋɡɛ́mndʉ̈ɔ́Ꞌ-Sɛ́, pɛpfúk pɑŋɡɛ́ pɔ́ tsɛt ŋɡɔ́ŋ-Pɑíslɑɛ̂l tɛꞋ. Mbʉŋ lɑ́Ꞌ ńnɑ́ŋ ŋɡuꞋ yɛ́tɑ́t nɛ́ pɛsɑŋ pɛ́nɛ́ntúkú kɛ́ lɔ́, tɛ mɑ́mɑ́ cʉ́ ḿvu tsɛt lɑ́Ꞌ-pʉɔ-Islɑɛ̂l tsʉʉ.

²⁶Tɑ̌ɑ Sɛ́ kɛ́ ńdɑ́Ꞌ ḿbɔɔ ńtúu Ɛlîi njɛ́Ꞌ-ŋu wɔp pɔ́, ńcú, ɑ cẅɛt ŋ́ɡʉ pɔ ndɑ́-mpfúk mɑŋɡɛ́-Sɛlɛ́ptɑ tsɛt ŋɡɔŋ-Sidɔŋ.

²⁷Ɛ́ lɑ́Ꞌ ḿbɔ́ nǔu ŋkɑ́ yi ŋɡɛ́mndʉ̈ɔ́Ꞌ-Sɛ́ Ɛlizɛ̂ɛ, pɛɡɑŋkɑꞋ-pɑ́p pɔ́ tsɛt ŋɡɔ́ŋ-Pɑíslɑɛ̂l tɛ ńzɑ́ɑ, Ɛlizɛ̂ɛ ŋ́kɑɑ kɛ́ ŋ́ɡɛ wɛcɔ́ tɑ́Ꞌ nǔu pɔ́p fíitɛ pɔ́, tɛ ńdíꞋ ndɑꞋ Nɑɑmɑ̂n ŋu-Silîi.

²⁸Pʉɔ pɛtsʉʉ pinɛ pɔ́p m̄bɔ́nɛ ndɑ́-cúꞋlɛ zúꞋ pɔ́Ꞌɔ, lɔ́ŋ wɔp kɔ́Ꞌ.

²⁹Pɔ́p lɔ sɛ́ pɛtsʉʉ, ŋ́ɡẅɛɛ Yɛ́su ńdɔk wɛ́ ɛ́fú tʉ́sɔŋ, ńcẅɛt tɛ ŋ́kúu ndǔ tú-nɛŋkɔ́Ꞌ, zʉꞋ yi pɛ́ kɑ kútnɛ tʉ́sɔŋ wɔp zúꞋu, ḿbɔ́ ńdɔɔ nɛfu ndǔ nɛŋkɔ́Ꞌ ńtsʉ́ʉ wɛ́ ḿmɑꞋ tsɛt fúꞋ.

³⁰Lɑ́ Yɛ́su tɔ́k tsɛtsɛt pɔ́p ńdɛɛ ndúŋ wɛ́, ŋ́ɡʉ.

³¹Yɛ́su ɡɛ pɔ́Ꞌɔ, ńcúŋ ŋ́ɡʉ nɛ́ Kɑpɛɛnɑwûm, ɛ́ pɔ́ wɛcɔ́ tʉ́sɔŋ nǔu ŋɡɔ́ŋ-Ŋɡɑlilɛ́. Lɛ́Ꞌ-nji yɔ́p kuꞋ, ɑ pɔ́ ńzíꞋ pʉɔ nɛ́ nu-Sɛ́.

³²Pɛ́ mɑɑ yɛ ntɛ́ nɛzíꞋ pʉɔ nɛ́ yúu, mbíꞋŋɡɔ Sɛ́ kɑ pɔ́nɛ ŋ́ɡɑ́ wɛ́ nɛ́ mɛtʉʉ lɑ ɑ lɔk ńcú nu.

³³Wɛcɔ́ ŋu pɔ́ yɛ́ ndɑ́-cúꞋlɛ zúꞋu, yɛcɔ́ zẅikŋɛ kɛpɔŋ pɔ́ nǔu wɛ́, ńnɑ́ŋ tɛ ńtsʉꞋnɛ wɛ́, ɑ lɔk ŋɡi tɛnnɛ ḿbɔ́ ŋ́kíi ńcú ŋɡɔ:

³⁴«Yɛ́su mɔ́ɔ-Nɑ̌zɑlɛt, pɛkŋɛ ɡẅɛɛ kʉ̈ɔ́? Ɔ kɑ fɑ́ɑ ńtɔ́ pɔ nɛpík wɛ́k? Mɔ sɛ́ ńjí, ɔ fú mbɔ̌ Sɛ́, ḿbɔ́ mɔ́ɔ nɛ.»

³⁵Yɛ́su cɔ́k yîyɑ́ zẅikŋɛ kɛpɔŋ, ńcú mbɔ̌ wɛ́ ŋɡɔ: «NɑꞋ, fú nǔu ŋu wɔ ńcẅɛt!» Zẅikŋɛ kɛpɔŋ ɛ̂yɑ́ ɛ́shɔt ŋu ɛ̂wɑ́, ḿmɑꞋ sɛ́ tsɛtsɛt pʉɔ ŋ́ɡɔ́ɔ ŋ́kɛ́ ɛ́fú nǔu wɛ́ ńcẅɛt kɛ́ ɡɛ yúu kɛpɔŋ nǔu wɛ́.

³⁶Pʉɔ pɛtsʉʉ kɑ jʉ́ɔ pɔ́Ꞌɔ, ńcʉ̈ɔꞋ, ńzɛ nɛshɔtnɛ ḿbíkŋɛ tsɛtsɛt pɔ́p ŋɡɔ: «Sẅiŋɛ-ndʉ́m wɔ pɑ́Ꞌɑ ḿbɔ́ ŋɡɔ ku lɑ́ɑ? A tʉ́ʉ tɛ ńcú nu mbɔ̌ mɛzẅikŋɛ kɛpɔŋ pɔ́p fú nǔu ŋu ńcẅɛt.

³⁷Lík-Sɛ́ kɛ́ ŋ́ɡɔ́ɔ ɛ́sɑt yîyɑ́ pɑk-ŋɡɔŋ.»

³⁸Yɛ́su cẅɛt ndɑ́-cúꞋlɛ, ŋ́ɡʉ njɛ́Ꞌ Simɔ̂ŋ, ŋ́ɡɔ ŋ́kúu zúꞋu, mbɔ wɛcɔ́ ntʉʉ lyɔknút kɑ ɡẅɛɛ Mɑ́kẅiꞋ-Simɔ̂ŋ. Pɛ́ púꞋ mbɔ́ mbɔ̌ Yɛ́su ŋɡɔ ɑ cẅɛ́lɛ́ wɛ́.

³⁹A tɔ́ ŋ́ŋɔ́Ꞌnɛ mbʉʉ kúu, ńdɔk tʉʉ ńcú nu, ɡɔɔ ɡɔ́ɔ ńzɑ́Ꞌnɛ. Mɑ́kẅiꞋ-Simɔ̂ŋ ɛ̂wɑ́ ɡɔ́ɔ ńdɔ sɛ́, ńniitɛ yúujʉ́ ŋ́ɡɑ́ mbɔ̌ pɔ́p.

⁴⁰TúꞋ kɑ ɡɔ ɛ́sʉ́ʉ, pʉɔ pinɛ pɛɡɑŋ ɡɔ́ɔ ntɛ́ ntɛ́ ḿbɔ́nɛ mɛndɑ́ mɔ́p lɔk wɔ́p tɔ́. Yɛ́su zɑ́p mbɔ́ nǔu mbɑ wɛ́t ŋɡɔɔ lɑ́, ɑ fíitɛ.

⁴¹Mɛzẅikŋɛ kɛpɔŋ pɔ́ ŋ́ɡɔ́ ɛ́fú nǔu nɛlʉ́m wɔp ńcẅɛt, ŋ́kíi ńcú ŋɡɔ: «Ɔ mɔ́ɔ-Sɛ́.» Lɑ́ Yɛ́su cɔ́k wɔ́p, ḿbɔɔ pɛ́m ŋɡɔ pɔ́p cú nu pɔ́, mbíꞋŋɡɔ pɔ́p kɑ jí ŋɡɔ Yɛ́su Nzɑ́Ꞌŋkʉ-puꞋ ẅí Sɛ́ kɑ kɑꞋnɛ mbɔ̌ pʉɔmɛsɔŋ.

⁴²Njí kiɛ, Yɛ́su fú tʉ́sɔŋ ńcẅɛt, ḿbɔ́ ńdɔk wɛ́ kɔ̂ŋtɛt ŋ́ɡʉ, lɑ́Ꞌ cẅɛt ńzɛ nɛmɔɔ zʉꞋ ḿbɔ́ ńdɔ́ɔ wɛ́. Ŋ́kẅɛ́ɛtɛ wɛ́ pɔ́Ꞌɔ, ńdɔɔ nɛɡẅɛɛ wɛ́ ŋɡɔ kɔɔ ɑ nɑ́ wɔ́p, ŋ́ɡʉ.

⁴³Lɑ́ Yɛ́su cú mbɔ̌ pɔ́p ŋɡɔ: «N ɡẅɛɛ nɛpɛn ŋ́ɡʉ tsɛt mɛcɔ́ mɛtʉ́sɔŋ, ɛ́sɑ́Ꞌ Ŋkʉʉ sʉ́Ꞌnɛ ẅí Sɛ́ kɑ túunɛ wɑ́ɑ nɛsɑ́Ꞌ, nɛɡɛ pʉɔmɛsɔŋ jí ŋɡɔ yɔ ŋkɑ́ yi Sɛ́ zɛ nɛnyɛt nɛfɔɔ nɛ́.»

⁴⁴Ńcú pɔ́Ꞌɔ, ńzɛ nɛnɛn tsɛt mɛndɑ́-cúꞋlɛ-Pɑyúdɑ, tsɛt ŋɡɔ́ŋ-Jẅidɛ̂ ɛ́sɑ́Ꞌ Ŋkʉʉ sʉ́Ꞌnɛ.