Read Ngomba Lúkɑ́shi 5 Bible Online

Lúkɑ́shi 5 - Ngomba bible

Lúkɑ́shi 5

¹Yɛ́su pɔ́ yɛcɔ́ lɛ́Ꞌ, ńtʉ́ʉ mbʉʉ nɛtʉŋ-ŋki pɛ́ fúŋnɛ Jɛnɛzɑlɛ̂t. Nɔɔ-lɑ́Ꞌ tɛ ńzɑ́ɑ tɔ́ nɛjɔ́ŋ yɛ nɛzúꞋ nu-Sɛ́, ńzɑ́ɑ zɑ́ɑnɛ tɛ pɛ́ tsʉꞋ ɛ́fyɛ́t wɛ́ fyɛ́tnɛ.

²Yɛ́su mɑꞋ mík, ńjʉ́ɔ pɛlɑ̌nji pɛ́pɑ́ mbʉʉ-ŋki, mbɔ pɑmɑꞋshú fú tsɛtú ńcẅɛt, ḿbɔ́ ŋki ɛ́suk mɛŋkʉ lɔk ḿmɑꞋ shú mɔ́p.

³Yɛ́su kúu tsɛt yɛcɔ́, ɛ́ pɔ́ yɛ́ Simɔ̂ŋ, ḿbúꞋ mbɔ́ mbɔ̌ wɛ́ ŋɡɔ ɑ nɑ́Ꞌ ńdɔk wɛ́ ŋ́ɡʉ nɛ́ tsɛt ŋki. A pɛ́m, Yɛ́su cúŋ ńnɑ́ŋ tsɛt lɑ̌nji, ńzɛ nɛlɛ́Ꞌlɛ nu-Sɛ́ mbɔ̌ lɑ́Ꞌ.

⁴Ńcú nu tɛ ɛ́ mɛ, ɑ cú mbɔ̌ Simɔ̂ŋ ŋɡɔ: «Lɔk lɑ̌nji, ḿbɛn ŋ́ɡʉ tɛ ŋ́kúu tsɛtsɛt ŋki, zʉꞋ shinɛ; pʉʉ ŋ́kúu zúꞋu, ḿmɑꞋ mɛŋkʉ mʉ́ʉ tsɛt ŋki nɛlɔk ŋ́ɡẅɛɛ mɛshú!»

⁵Simɔ̂ŋ tsɔ́Ꞌ ŋɡɔ: «Ndɛ, pɛk lɛ́ pɔ nɛjʉ́ɔ ŋɡʉ̈ɔ́Ꞌ, nɛmɔɔ ŋki, ŋ́kɛ́ ḿbɔɔ yɛcɔ́ sɑ̌ɑ yúu ɡẅɛɛ. Lɑ́, pɑ́Ꞌ kwɑꞋ ɡu cúnɛ ŋɡɔ pɛ́ pɛn ḿmɑꞋ mɛŋkʉ ŋki lɑ́, ŋ ɡʉ ḿmɑꞋ.»

⁶Ńcú pɔ́Ꞌɔ, pɔ́p pʉɔ pɛ́ ɡʉ ḿmɑꞋ mɛŋkʉ tsɛt ŋki, ńdɔk ŋ́ɡẅɛɛ mɛshú ɛ́ zɑ́ɑ zɑ́ɑnɛ tɛ pɔ́p pɔ́ ɛ́shuŋ, mɛŋkʉ mɔ́p zɛ nɛzɑ́Ꞌtɛ.

⁷Pɔ́p jʉ́ɔ kɛ́kɑ́ŋ, ḿmɑꞋtɛ pɔ́ ńdɔk ŋ́kyɛp pɛcɔ́ ɡɑŋku yɔ́p pi pɔ́p ḿbɔ́nɛ tsɛt wɛcɔ́ lɑ̌nji, ŋɡɔ pɔ́p tɔ́ ńcẅɛ́lɛ́ wɔ́p. Pɔ́p tɔ́, pɔ́p pɛpɔ́p níꞋ mɛshú tsɛt pɛlɑ̌nji pɛ́pɑ́, pɛlɑ̌nji ɛ̂pɑ́ lúu tɛ ńtsʉ́Ꞌ ḿmɛnɛ pɔ ŋki.

⁸Simɔ̂ŋ Pyɛ̂ jʉ́ɔ yɔ nu jʉ́ɔnɛ, tɛ ŋ́ɡʉ ńnɔɔ mɛku-Yɛ́su, ŋ́ɡẅɛɛ mɛkẅíꞋlɛ mɛ́, ńcú mbɔ̌ wɛ́ ŋɡɔ: «Tsɑpʉɔ, sɛ́sẅíi, fú nɛjɔ́ŋ mɔ ŋ́ɡʉ! Mɔ pɑ́Ꞌ ḿbɔ́ ŋu kɛpɔŋ.»

⁹A kɑ ɡɔ ḿbɛn cú pɔ́Ꞌɔ, mbɔ nɛpɔ́k ɡẅɛɛ wɔ́p pʉɔ pɛ́, ntɛ́ ndɛn-mɛshú mi pɔ́p ɡẅɛɛnɛ.

¹⁰Tɛ mbɑ Jɑ̂ŋ pɔ́p Jɑ̂k, pɔ́ɔ-Zɛbɛdɛ, pɛsúu-Simɔ̂ŋ, pɛn ŋ́ɡɔ́ɔ ḿbɔ́k yɔ́p tɛꞋ. Lɑ́ Yɛ́su cú mbɔ̌ Simɔ̂ŋ ŋɡɔ: «Kɔɔ pɔ́k tɛꞋ, tɛ ɛ́fú lɔ́Ꞌnɛ, ɔ ɡʉ ńnɑ́ nɛɡẅɛɛ mɛshú ńtsʉ́ꞌ ńcúꞋlɛ pɔ pʉɔmɛsɔŋ.

¹¹Pɔ́p zúꞋ pɔ́Ꞌɔ, ńdɔk pɛlɑ̌nji ḿbɛn nɛ́ mbʉʉ ŋki, ŋ́kúu zúꞋu, ŋ́ɡɔ́ɔ ńnɑ́ mbɑ kʉ̈ɔ́ lɑ́ zúꞋu, ńcʉ́ɔ nzʉʉ Yɛ́su.»

¹²Yɛ́su pɔ́ yɛcɔ́ lɛ́Ꞌ, ḿbɔ́ tsɛt yɛcɔ́ tʉ́sɔŋ. Wɛcɔ́ ŋu pɔ́ zúꞋu, mbɔ ŋkɑꞋ kɑ puu mɔ́ ńjʉ́ wɛ́ tɛꞋ. A jʉ́ɔ Yɛ́su, ńtɔ́ ńnɔɔ kɛpkɛ́p mbi wɛ́, ḿbúꞋ mbɔ́ mbɔ̌ wɛ́ ŋɡɔ: «Tsɑpʉɔ, n jí ŋɡɔ ɔ lɑɑ ŋ́kɔŋ, ḿbɔ́ ɔ kuꞋ nɛɡɛ ɛ fíitɛ.»

¹³Yɛ́su zúꞋ, ńcɑklɛ pɔ́, ŋ́kuplɛ wɛ́, ńcú ŋɡɔ: «Ŋ kɔŋ pɔ́Ꞌɔ, fíitɛ!» Ńdɛɛ pɔ́Ꞌɔ, ŋkɑꞋ ɡɔ́ɔ ḿmɛ nǔu wɛ́.

¹⁴Yɛ́su tɔꞋ wɛ́ ŋɡɔ: «Pɑ́ɑ nɛkẅíi tɛ ɛ́sẅíi ŋu! Gʉ ńnyɛt pɔ mbʉʉ yu mbɔ̌ pɑnɔ́ŋpɔꞋ, ḿbɛn ŋ́ɡɑ́ yúu mi nɛpʉʉ-Mɔ̌sɛ̂ɛ sɛ́ ḿbíkŋɛ mbɔ̌ ŋu ẅí ŋkɑꞋ ḿmɛnɛ nǔu wɛ́ tɛ pʉɔ pɛtsʉʉ ɡɔ́ɔ ŋ́kɛ́ ńjí ŋɡɔ ɔ fíitɛ! Pɔ́Ꞌɔ ɛ́ pɔ́ mɑ́mɑ́ lii.»

¹⁵Yɛ́su kɑ tɔꞋ wɛ pɔ́Ꞌɔ, pɛ́ kɛ́ ḿbɔ́ ŋ́kẅiꞋ ŋ́kẅíitɛ wɛ́ kẅíitɛ́nɛ, tɛ lɑ́Ꞌ pɛn ŋ́kẅiꞋ ńtɔ́ nɛzúꞋ sẅiŋɛ yɛ́ mbɑ nɛpɔ́ yi ɑ ɡʉ ńzɔŋ mɛɡɔɔ mɔ́p.

¹⁶Lɑ́, Yɛ́su ńnɑ́ŋ tɛ ńdɔ sɛ́ ŋ́ɡʉ zʉꞋ yi ŋu zúꞋu pɔ ḿbɔ́ ńcɛꞋlɛ Sɛ́.

¹⁷Yɛ́su pɔ́ yɛcɔ́ lɛ́Ꞌ, ḿbɔ́ ńdɛꞋlɛ nu-Sɛ́, pʉɔ-Fɑlísɑy pɔ́p pɑkyɛ́Ꞌtɛ nɛpʉʉ-Sɛ́ tɔ́ ńnɑ́ŋ nɛjɔ́ŋ yɛ́, ɛ́fú nǔu mɛlɑ́Ꞌ mi ɛ́ tsɛt ŋɡɔŋ Ŋɡɑlilɛɛ pɔ́p Jẅidɛ̂ tɛ mbɑ tʉ́sɔŋ Yɛlúsɑlɛm. Mɛtʉʉ-Tsɑpʉɔ Sɛ́ pɔ́ nǔu Yɛ́su, ɑ lɔk ńzɔŋ mɛɡɔɔ.

¹⁸Pɛ́ nɑ́ŋ tɛ ńjʉ́ɔ mbɛ́ɛnɛ lɔk wɛcɔ́ ŋɡɑŋkẅíꞋlɛ ńtɔ́, mbɔ pɔ́p lɔk pɑ́ŋtɛ ńtíi wɛ́, ńdɔ́ɔ ndúŋ nɛkúu ndɑ́ ńtík wɛ́ mbi Yɛ́su.

¹⁹Lɑ́Ꞌ fyɛ́tnɛ ntsu ndɑ́ fyɛ́tnɛ́nɛ tɛ pɔ́p jʉ́ɔ kɛ́kɑ́ŋ, ńtsʉ́Ꞌ ńdɔk wɛ́ ńdɔk ndúŋ yi ɛ́ ɡɛ ńdɛɛ ndǔ tɛtɑ́ɑ yi ɛ́ ndǔ ndɑ́, ŋ́kúu zúꞋu, ńtsɔ́Ꞌtɛ yúu mi pɛ́ kɑ lɔknɛ ḿbɑ́ɑ ndɑ́, ɛ́fú zúꞋu ńcɑklɛ ŋɡɔɔ ndǔ pɑ́ŋtɛ wɛ, ńnɔ́ŋ wɛ́ mbi Yɛ́su.

²⁰Yɛ́su jʉ́ɔ ntɛ́ yi pʉɔ pɔnɛ lɔknɛ ńzɑ́p tʉ́m nǔu wɛ́, ńcú mbɔ̌ ŋɡɔɔ ŋɡɔ: «Ŋu wɔ, pɛ́ likŋɛ mɛnu kɛpɔŋ mú ŋ́ɡɑ́ mbɔ̌ wu.»

²¹Pɑkyɛ́Ꞌtɛ nɛpʉʉ-Mɔ̌sɛ̂ɛ pɔ́p pʉɔ-Fɑlísɑy zúꞋ, ńzɛ nɛpíkŋɛ ŋɡɔ: «Yɔ wɔ̌ ẅí ɑ ɡwɑ́knɛ Sɛ́? Sɛ́ zɛ́nɛ́ jʉ́ kuꞋnɛ nɛlikŋɛ mɛnu kɛpɔŋ-ŋu.»

²²Yɛ́su ɡɔ́ɔ ńjí yúu mi pɔ́p sẅíitɛ́nɛ nǔu, ḿbíkŋɛ wɔ́p ŋɡɔ: «MbíꞋkʉ̈ɔ́ pʉʉ ɡẅɛɛ yɔ ntɛ́ kwɑŋɛ tsɛt tʉ́m pʉʉ?

²³Pʉʉ jʉ́ɔ yʉ́ʉ ŋɡɔ yɛ́t zɑŋɛnɛ nǔu nɛcú mbɔ̌ ŋu ŋɡɔ pɛ́ likŋɛ mɛnu kɛpɔŋ mɛ́ kɛ pɔ́ nɛcú ŋɡɔ ɑ lɔ sɛ́ ńnɛn?

²⁴Pɔ́Ꞌɔ, nɛnyɛt pʉʉ jí ŋɡɔ mɔ́ɔ-ŋu ɡẅɛɛ mɛtʉʉ ndǔ tsɛ́tsɑ́Ꞌ nɛlɔk ńdikŋɛ mɛnu kɛpɔŋ-pʉɔmɛsɔŋ ŋ́ɡɑ́ mbɔ̌ pɔ́p. N cú mbɔ̌ wu ŋɡɔ, Lɔ sɛ́, ńtíi pɑ́ŋtɛ wu ńdɔk ŋ́ɡʉ nɛ́ njɛ́Ꞌ yu!»

²⁵A ɡɔ́ɔ ńdɔ sɛ́ tsɛtsɛt lɑ́Ꞌ, ńtíi pɑ́ŋtɛ, ŋ́ɡɔ ŋ́kɛ́ ḿbɛn nɛ́ njɛ́Ꞌ yɛ́, ńnɛn ḿbɔ́ ŋ́ɡúꞋlɛ Sɛ́.

²⁶Pʉɔ pɛtsʉʉ kɑ jʉ́ɔ ɛ́ kʉꞋnɛ wɔ́p, pɔ́p pɔ́ ḿbɔ́k, ḿbɛn ḿbɔ́ ńcú ŋɡɔ: «ɡúꞌlɛ mbɔ̌ Sɛ́! Pɛk jʉ́ɔ ndɑɑkɑ́jʉ́ɔ lɔ́Ꞌnɛ!»

²⁷Yɛ́su ɡɛ pɔ́Ꞌɔ ńcẅɛt ḿbɔ́ ŋ́ɡʉ, ńjʉ́ɔ wɛcɔ́ ŋu ẅi pɛ́ fúŋnɛ wɛ́ ŋɡɔ Lɛ́vi, ɑ pɔ́ ńcẅɛ́ɛntsup-Pɑlɔ́mɑ, ɑ nɑ́ŋ zʉꞋ pɛ́ cẅɛ́ɛnɛ ntsup-pʉɔ-Lɔ́mɑ zúꞋu. Yɛ́su cú mbɔ̌ wɛ́ ŋɡɔ: «Cʉ́ɔ nzʉʉ mɔ!»

²⁸Lɛ́vi nɑ́ yúu tsʉʉ, ńdɔ sɛ́, ńcʉ́ɔ nzʉʉ yɛ́.

²⁹Lɛ́vi ɡɛ ɛ́fúŋ mɑ́mɑ́ ndínɑ ndɑ́ yɛ ntɛ́ Yɛ́su. Pɑ́cẅɛ́ɛntsup tɔ́ tɛ ńzɑ́ɑ tɛ mbɑ pɛcɔ́ pʉɔ pinɛ pʉɔ-Yúdɑ kɑ pɔ́ ɛ́fúŋ wɔ́p ŋɡɔ pʉɔ kɛpɔŋ. Pɔ́p pɛ́ Yɛ́su tɛ́mtɛ ńjʉ́ yúu.

³⁰Pɛcɔ́ pʉɔ-Fɑlísɑy pɔ́p pɛcɔ́ pɑkyɛ́Ꞌtɛ nɛpʉʉ-Mɔ̌sɛ̂ɛ jʉ́ɔ pɔ́Ꞌɔ, ḿbɔ́ ɛ́sẅíitɛ, ḿbíkŋɛ ɡɑŋku-Yɛ́su ŋɡɔ: «MbíꞋku pʉʉ pɑcẅɛ́ɛntsup pɔ́p pɛcɔ́ pʉɔ kɛpɔŋ tɛmtɛ yúu ńjʉ́?»

³¹Yɛ́su pɑ́Ꞌ mbɔ̌ pɔ́p ŋɡɔ: «Ḿbɔ́ ŋu pɔɔ pɔ́ ntʉʉ ŋ́ɡʉ ńdɔɔ ŋɡɛmɛfu pɔ́. Ŋu ɡɔɔ lɑ ńdɔɔ wɛ́.

³²Mɔ ŋkɑɑ tɔ́ pɔ nɛfúŋ pʉɔ ndʉ́ŋndʉŋ pɔ́. Ŋ kɑ tɔ́ ntɛ́ pʉɔ kɛpɔŋ ŋɡɔ pɔ́p kúpmɛ mɑt wɔp.»

³³Pɑfɑlísɑy pɛn ńcú mbɔ̌ Yɛ́su ŋɡɔ: «Gɑŋku-Jɑ̂ŋ lɔ ńnɑ́ŋ nji, ḿbɛn ḿbúꞋ mbɔ́ mbɔ̌ Sɛ́. Pɛk pʉɔ pɛn ŋ́ɡɛ pɔ pɔ́Ꞌɔ. Lɑ́, pú pʉɔ kɛ́ ḿbɔɔ pɔ́Ꞌɔ ɡɛ. Pɔ́p kwɛ́t ḿbɛn ńnɔ́ ŋɡɔŋ ŋkɑ́ tsʉʉ.»

³⁴Yɛ́su pʉ̈ɔt mbɔ̌ pɔ́p ŋɡɔ: «Ḿbɔ́ pɛ́ ɡʉ nɛlúŋ ŋu, ɑ pɛ́t ńnɑ́ŋ ńnɑ́ŋnɛ, pʉɔ pinɛ ɑ fúŋnɛ wɔ́p ńnɑ́ŋ nji?

³⁵Lɑ́, pɛ́ ɡʉ ńdɑ́Ꞌ ɛ́fú mbɔ̌ pɔ́p yɛcɔ́ lɛ́Ꞌ ɛ́sɑ́Ꞌ wɛ́, pɔ́p ɡɔ́ɔ ŋ́kɛ́ ńzɛ nɛnɑ́ŋ nji ŋkɑ́ ɛ̂yɑ́.»

³⁶Yɛ́su pɛn ɛ́sɑk nɛkɛt ŋɡɔ: «Ḿbɔ́ ŋu pɔɔ sɑ yúu-ndẅí nǔu ndẅí fí ńdɔk ńtsɛ́t nɛpʉ́ nǔu ndɛn ndẅí pɔ́. Ŋu lɑɑ ŋ́ɡɛ pɔ́Ꞌɔ, mbɔ ɑ ńdɔk ḿbʉ́ʉpɛ ndẅí fí, yúu-ndẅí fí yi ɑ lɑ́Ꞌnɛ ńzɑ́Ꞌ kɛ́ ḿbɔɔ puu nǔu ndɛn ndẅí pɔ́.»

³⁷Pɛ́ lɑɑ ḿbɔ́ ŋ́ɡʉ ńdẅɛꞋ mɛluꞋ tsɛt kɑ́Ꞌlɛ-ŋɡup[7], ḿbɔ́ pɛ́ pɔɔ níꞋ mɛluꞋ mi pɛ́ pɛ́t ńtsɔ́Ꞌ tsɛt ndɛn kɑ́Ꞌlɛ pɔ́. Pɛ́ lɑɑ ŋ́ɡɛ pɔ́Ꞌɔ, mbɔ mɛluꞋ fí ɡʉ ɛ́fɔꞋ, ɛ́sɑ́ɑ ndɛn kɑ́Ꞌlɛ. Pɛ́ pɛ́ mɛluꞋ, ḿbɛ́ kɑ́Ꞌlɛ.

³⁸Ɛ́ sɛ́ ḿbíkŋɛ ŋɡɔ pɛ́ níꞋ mɛluꞋ fí pɔ tsɛt kɑ́Ꞌlɛ fí.

³⁹Ɛ́ lɑɑ ḿbɔ́ ŋu pɔɔ nɔ́ mɛluꞋ mi ɛ́ sɛ́ ńtɛn tɛ ɛ́ ɡẅɛɛ ntsu wɛ́, ɑ pɛn ńtsɑ́ɑ nɛnɔ́ mɛluꞋ mi pɛ́ pɛ́t ńtsɔ́Ꞌ pɔ́. A ɡʉ ńtsʉ́Ꞌ ńtsɑ́ɑ pɔ mi ɛ́ tɛnnɛ.