Read Ngomba Lúkɑ́shi 6 Bible Online

Lúkɑ́shi 6 - Ngomba bible

Lúkɑ́shi 6

¹Ɛ́ m̄bɔ́ yɛcɔ́ lɛ́ꞌ-nji-pɑyúdɑ, Yɛ́su pɔ́p ɡɑŋku pɛ́ pɔ́ ńdɛɛ tsɛt ŋkɑ́Ꞌ-mɛsɑ́ŋntsʉ́ʉ, ɡɑŋku pɛ́ nɛn ɛ́swɛ mɛsɑ́ŋ ɛ̂mɑ́, ɛ́sʉ́Ꞌ mbɔ́ pɔ́p, ŋ́kwɛ́t.

²Pɛcɔ́ pʉɔ nǔu nɔɔ-Pɑfɑlísɑy píkŋɛ wɔ́p ŋɡɔ: «MbíꞋ ku pʉʉ ɡɛ yúu mi pɛ́ kɑ pʉ́ʉ nɛɡɛ lɛ́Ꞌnji?»

³Yɛ́su pʉ̈ɔt mbɔ̌ pɔ́p ŋɡɔ: «Pʉʉ ŋ́kɑɑ mɔ́ fúŋ zʉꞋ ŋwɑꞋnɛ-Sɛ́ yi ɛ́ lɛꞋlɛ́nɛ yúu mi fɔɔ Ndɑvît kɑ ɡɛnɛ pɔ kɛ́? Kɛ ŋɡɔ ɑ m̄bɔ́ yɛcɔ́ lɛ́Ꞌ, nji zɑ́ŋ wɛ́ pɔ́p pʉɔ pɛ́,

⁴ɑ kúu tsɛt ndɑ́-nɛnɔŋpɔꞋ, ḿbɛ́ɛ mbɛlɛ̂ɛt yi pɛ́ ɡɑ́nɛ nɛlɔk ŋ́ɡɛ́mtɛ Sɛ́, ŋ́kwɛ́t tɛ ŋ́ɡɑ́ yɛ ɡɑŋku pɛ́, lɑ́ nɛpʉ́ʉ cú ŋɡɔ ndɑꞋ pɑnɔ́ŋpɔꞋ ɡẅɛɛnɛ nɛkwɛ́t pɔ kɛ́?»

⁵Yɛ́su fú nǔu, ŋ́ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Mɔ́ɔ-ŋu tɛn tɛ ńdɛɛ lɛ́Ꞌnji-pɑyúdɑ.»

⁶Ɛ́ pɛn ḿbɔ́ yɛcɔ́ lɛ́Ꞌnji-Pɑyúdɑ, Yɛ́su kúu ndɑ́-cúꞋlɛ -Pɑyúdɑ, ḿbɔ́ ńdɛꞋlɛ nu-Sɛ́. Wɛcɔ́ ŋu mbɛ́ɛnɛ pɔ́ yɛ́ ndɑ́ zúꞋu, mbɔ pɔ́ yɛ́ yi tʉʉ kɑ pfú.

⁷Pɑfɑlísɑy pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ nɑ́ŋ sɛ́ ḿbɔ́ ńdʉŋtɛ Yɛ́su ŋɡɔ kɛ ɑ ɡʉ ŋ́ɡɛ ŋu fíitɛ lɛ́Ꞌnji ɔ́ɔ, lɑ ńdɛɛtɛ nǔu ńjʉ́ɔ yúu minɛ pɔ́p ńdɔk ɛ́fɛn wɛ́.

⁸Lɑ́ Yɛ́su piitɛ ńjí kwɑŋɛ yɔ́p, ńcú mbɔ̌ pfú pɔ́ ɛ̂wɑ́ ŋɡɔ: «Lɔ sɛ́ ńtɔ́ ńtʉ́ʉ mbi lɑ́Ꞌ.» A lɔ sɛ́ ńtɔ́.

⁹Yɛ́su cú mbɔ̌ pɑkyɛ́Ꞌtɛ ŋwɑꞋnɛ-Sɛ́ pɔ́p pɑfɑlísɑy ŋɡɔ: «Ŋ ɡʉ ḿbíkŋɛ wʉ́ʉ tɑ́Ꞌ nu. Ɛ́ pɛꞋnɛ nɛpʉ́ʉ nɛkŋɛ ńcú ŋɡɔ pɛ́ ɡɛ kʉ̈ɔ́ lɛ́Ꞌnji yɛkŋɛ? Ŋɡɔ pɛ́ ɡɛ nu sʉ́Ꞌnɛ kɛ nu kɛpɔŋ? Ŋɡɔ pɛ́ ɡɛ ŋu fíitɛ kɛ pɔ ŋɡɔ pɛ́ jẅí wɛ́?»

¹⁰Ḿbíkŋɛ tɛ ńnɑꞋ cí, ńdíŋɛ wɔ́p wɛ́mɔ́Ꞌ wɛ́mɔ́Ꞌ, tɛ ɛ́ kuꞋ, ɑ cú mbɔ̌ ŋɡɑŋɡɔɔ ŋɡɔ: «Sɛn pɔ́ yú!» A sɛn, pɛ́ jʉ́ɔ ɛ́ tɛntɛ.

¹¹Pɑfɑlísɑy pɔ́p pɑkyɛ́Ꞌtɛ nɛpʉ́ʉ-Mɔ̌sɛ̂ɛ jʉ́ɔ, ɛ́ pʉ́k wɔ́p tɛꞋ. Pɔ́p shɔtnɛ ḿbíkŋɛ tsɛtsɛt pɔ́p ŋɡɔ: «Pɛkŋɛ ɡʉ ŋ́ɡɛ ŋɡɔ ku nɛ́ Yɛ́su wɔ?»

¹²Yɛ́su pɔ́ yɛcɔ́ lɛ́Ꞌ, ŋ́ɡʉ ndǔ nɛŋkɔ́Ꞌ nɛcɛꞋlɛ Sɛ́, tɛ ńdɛ́ zúꞋu lɛ́nɛ.

¹³Njí kiɛ, ɑ fúŋ ɡɑŋku pɛ́, ŋ́ɡʉ tsɛtsɛt pɔ́p, ńtsɔ́Ꞌ pʉɔ ntsɔ̌ppɑ́ nɛ́ nɛɡɛ́m, ńcẅi lík yɔ́p ŋɡɔ ɡɑŋntúu pɛ́.

¹⁴Yɔ ḿbɔ́ Simɔ̂ŋ ẅí Yɛ́su kɑ cẅi yɛcɔ́ lík yɛ́ ŋɡɔ Pyɛ̂, ŋ́ɡɛ Andɛlɛ́yɑ, mɔ́ɔmɑ́ wɛ, ŋ́ɡɛ Jɑ̂k, ŋ́ɡɛ Jɑ̂ŋ, ŋ́ɡɛ Filîp, ŋ́ɡɛ Bɑtɛlɛmîi,

¹⁵ŋ́ɡɛ Mɑtʉ̈ɔ, ŋ́ɡɛ Tɔ́mɑ́shi, ŋ́ɡɛ Jɑ̂k mɔ́ɔ-Alfɛ̂, ŋ́ɡɛ Simɔ̂ŋ ẅí pɔ́p kɑ pɔ́ ɛ́fúŋ wɛ́ ŋɡɔ nzɔŋlɑ́Ꞌ,

¹⁶ŋ́ɡɛ Jẅidɛ mɔ́ɔ-Jɑ̂k, ŋ́ɡɛ Jẅídɑ Iskɑlyɔt ẅí ɑ kɑ tɑ́ɑnɛ ɛ́fɛn Yɛ́su.

¹⁷Yɛ́su pɔ́p ɡɑŋntúu pɛ́ pi ɑ tsɔ́Ꞌnɛ, fú ndǔ nɛŋkɔ́Ꞌ ńcúŋ tɛ ŋ́kúu sɛ́, ńjʉ́ɔ pɛcɔ́ ɡɑŋku pɛ́ pɔ́ zúꞋu tɛ ńzɑ́ɑ pɔ́p nɔɔ-lɑ́Ꞌ, mbɔ pɛ́ fú nǔu ŋɡɔ́ŋ-Jẅidɛ̂, ɛ́fú tʉ́sɔŋ Yɛlúsɑlɛm, ɛ́fú mɛtʉ́sɔŋ Tîi pɔ́p Sidɔ̂ŋ mi ɛ́ ŋkɑŋ-ŋki.

¹⁸Pɔ́p pɛ́tsʉʉ tɔ́ pɔ́Ꞌɔ nɛzúꞋ sẅiŋɛ Yɛ́su, mbɑ pɑꞋ ɑ ɡʉ ŋ́ɡɛ mɛɡɔɔ mɔ́p fíitɛ. Pʉɔ pinɛ mɛzẅikŋɛ kɛpɔŋ kɑ pɔ́ mbʉʉ pɔ́p ɑ ńzɔŋ wɔ́p.

¹⁹Pʉɔ tsʉʉ kɑ pɔ́ ńdɔɔ nɛkuu wɛ́, mbíꞋŋɡɔ mɛtʉʉ kɑ pɔ́ fú nǔu wɛ́, ńzɔŋ wɔ́p pɛ́tsʉʉ.

²⁰Yɛ́su kɑ pʉꞋ mík mɛ́, ńdíŋɛ ɡɑŋku pɛ́, ńcú mbɔ̌ pɔ́p ŋɡɔ: «Pʉʉ pɛpɔ́ttú, pʉʉ pínɛ pʉʉ pɛpúŋ, mbíꞋŋɡɔ nɛfɔɔ-Sɛ́ ɛ́ mbɔ̌ pʉʉ.

²¹Pʉʉ pɛpɔ́ttú pʉʉ pi pʉʉ sɛ́ ḿpfú nji ŋkɔ̂ɔnɛ, mbíꞋŋɡɔ pʉʉ ŋ́ɡɛ ńzwɛ́t. Pʉʉ pɛpɔ́ttú pʉʉ pi pʉʉ ŋkɔ̂ɔnɛ ḿbɔ́ ŋ́kíi, mbíꞋŋɡɔ pʉʉ ŋ́ɡɛ ŋ́ɡwɛ.

²²Pʉʉ pɛpɔ́ttú, nǔu ŋkɑ́ yi pʉʉ cʉ́ɔ nzʉʉ mɔ́ɔ-ŋu, pɛ́ pɛn ḿbɔ́ ḿbɑɑ wʉʉ, ḿbɔ́ ŋ́kʉ́ʉnɛ wʉ́ʉ, ḿbɔ́ ńzɔɔtɛ wʉ́ʉ, ḿbɔ́ ḿbʉ́ʉpɛ lík yʉ́ʉ.

²³Yɔ nu lɑɑ ḿbɔ́ tɛ ḿbɔ́ ŋ́ɡɛ wʉ́ʉ, pʉʉ tsɑ́ɑtɛ, ńzɔp ńnʉŋ, ńjí ŋɡɔ Sɛ́ niitɛ mɑ́mɑ́ tsɔ́ꞋfɑꞋ ḿbɔ́ ńdɔk ńzẅíꞋlɛ wʉ́ʉ. Pʉʉ zɛɛ ńjí ŋɡɔ ɛ́ pɛn ḿbɔ́ pɔ ndʉ́ŋndʉŋ pɑ́Ꞌ pɛtɑ̌ɑ pɔ́p kɑ pɔ́ ŋ́ɡɛ yɔ́p nǔu pɛŋɡɛ́mndʉ̈ɔ́Ꞌ-Sɛ́.

²⁴Lɑ́, pʉʉ kwɑꞋ pɛpɛktú pʉʉ pinɛ pʉʉ ɡɑŋyúu, mbíꞋŋɡɔ pʉʉ kɛ́ ŋ́ɡẅɛɛ mʉ́ʉ mɛyúu sʉ́Ꞌnɛ pɔ ndɑꞋ ŋkɔ̂ɔnɛ.

²⁵Pʉʉ pɛpɛktú, pʉʉ pinɛ pʉʉ ŋkɔ̂ɔnɛ ŋ́kwɛ́t ńzwɛ́t, mbíꞋŋɡɔ pʉʉ ɡʉ ńdɑ́Ꞌ ḿpfú nji. Pʉʉ pɛpɛktú pʉʉ pinɛ pʉʉ sɛ́ ŋ́ɡwɛ ŋkɔ̂ɔnɛ, mbíꞋŋɡɔ pʉʉ ɡʉ ńdɑ́Ꞌ ńtsʉ́ꞌ ńnɑ́ŋ pɔ tsɛt nɛmʉk ḿbɛn ḿbɔ́ ŋ́kíi.

²⁶Pʉʉ pɛpɛktú pɑ́Ꞌ ɛ́ lɑɑ ḿbɔ́ pʉɔ pɔ́ ŋ́kẅíi lík yʉ́ʉ pɔ sʉ́Ꞌnɛ, ɛ́ zɛɛ ḿbɔ́ pɔ pɑ́Ꞌ pɛtɑ̌ɑ pɔ́p kɑ pɔ́ ŋ́ɡɛ nǔu pɛŋɡɛ́mndʉ̈ɔ́Ꞌ pɛ́ kɛpɔŋ.

²⁷Lɑ́, n cú mbɔ̌ pʉʉ pinɛ pʉʉ sɛ́ ńzúꞋ sẅiŋɛ yɑ́ɑ ŋɡɔ, pʉʉ kɔŋ ɡɑŋmbuu pʉ́ʉ, ŋ́ɡɛ pɔ nu sʉ́Ꞌnɛ nǔu pʉɔ pinɛ pɔ́p pɑɑnɛ wʉ́ʉ.

²⁸Pʉʉ tsɑ́ɑ pɔ nu sʉ́Ꞌnɛ nǔu tú pʉɔ pinɛ pɔ́p sɛ́ ńtsɑ́ɑ nu kɛpɔŋ nǔu pʉʉ! Pʉʉ púꞋ mbɔ́ mbɔ̌ Sɛ́ nǔu tú-pʉɔ pinɛ pɔ́p sɛ́ sẅiŋɛ kɛpɔŋ nǔu lík yʉ́ʉ!

²⁹Ŋu lɑɑ ńtswɑ́ɑ pɔ́ nɛtúutɛ wu, ɔ shɔt yɛcɔ́ ɡúŋ, ŋ́ɡɑ́ ɑ mɛkŋɛ ńtswɑ́ɑ! Ŋu lɑɑ ŋ́ɡẅɛɛ wú ńcẅɛ́ɛ ndẅí-fɑ́k yu, ɔ mɛkŋɛ ɛ́sɔt yi tsɛtú, ŋ́ɡɑ́ mbɔ̌ wɛ́!

³⁰Mbɑ wɔ̌ lɑ́ tɔ́ ńdɔ́ɔ yúu mbɔ̌ ɡu, ɔ ɡɑ́ mbɔ̌ wɛ́! Ŋu lɑɑ ńtɔ́ ḿbɛ́ɛ yúu yú ńdɔk ŋ́ɡʉ, ɔ pɑ́ɑ nɛkɑ́!

³¹Yúu mi pʉʉ sɛ́ ńtsɑ́ɑ ŋɡɔ pɛ́ ɡɛ nǔu pʉʉ lɑ́, pʉʉ ɡɛ kwɑꞋ yîyɑ́ nǔu pɛcɔ́ pʉɔ!

³²Pʉʉ lɑɑ ŋ́kɔŋ pɔ ndɑꞋ pʉɔ pinɛ pɔ́p kɔŋnɛ wʉ́ʉ, mbɔ pɛ́ ɡʉ ḿbɛn ŋ́ɡɑ́ pɑ́Ꞌlɑ́ mbɔ̌ pʉʉ nǔu kʉ̈ɔ́? Pʉɔ kɛpɔŋ zɛɛ ŋ́kɔŋ yɔ́p pɔ pʉɔ pinɛ pɔ́p kɔŋnɛ wɔ́p.

³³Pʉʉ lɑɑ ḿbɔ́ ŋ́ɡɛ nu sʉ́Ꞌnɛ pɔ ndɑꞋ nǔu pʉɔ pinɛ pɔ́p ɡɛnɛ nu sʉ́Ꞌnɛ nǔu pʉʉ, mbɔ pɛ́ ɡʉ ḿbɛn ŋ́ɡɑ́ pɑ́Ꞌlɑ́ mbɔ̌ pʉʉ nǔu kʉ̈ɔ́? Mbɑ pʉɔ kɛpɔŋ nǐi ŋ́ɡɛ yɔ́p pɔ pɔ́Ꞌɔ.

³⁴Pʉʉ lɑɑ ɛ́fɔ yúu pɔ mbɔ̌ pʉɔ pinɛ pʉʉ jínɛ ŋɡɔ pɔ́p ɡʉ ŋ́ɡɛ ḿbɑꞋ, mbɔ pɛ́ ɡʉ ḿbɛn ŋ́ɡɑ́ pɑ́Ꞌlɑ́ mbɔ̌ pʉʉ nǔu kʉ̈ɔ́? Mbɑ pʉɔ kɛpɔŋ nǐi ɛ́fɔ yɔ́p yúu pɔ mbɔ̌ pɛcɔ́ pʉɔ kɛpɔŋ, ḿbɔ́ ńjí ŋɡɔ pɔ́p ɡʉ ńtɑ́ɑ ḿbɛn ḿbɑꞋ pɔ yɛ́t ŋ́ɡɑ́ mbɔ̌ pɔ́p.

³⁵Yúu mi ɛ́ pɔ́ŋnɛ ŋɡɔ pʉʉ ɡɛ pɔ ŋɡɔ: Pʉʉ kɔŋ ɡɑŋmbuu pʉ́ʉ, ŋ́ɡɛ pɔ nu sʉ́Ꞌnɛ nǔu pɔ́p! Pʉʉ fɔ yúu mbɔ̌ ŋu kɛ sɑ́ŋ ŋɡɔ ŋɡɑŋ ŋ́ɡɛ ḿbɑꞋ! Pʉʉ lɑɑ ḿbɔ́ ŋ́ɡɛ pɔ́Ꞌɔ, mbɔ Sɛ́ ɡʉ ńdɑ́Ꞌ ŋ́ɡɑ́ wʉ́ʉ nɛ́ mɑ́mɑ́ tsɔ́ꞋfɑꞋ. Pʉʉ pɛn ḿbɔ́ pʉɔ-Sɛ́ ẅí ɑ piꞋnɛ mbɑ kʉ̈ɔ́ lɑ́, kwɑꞋ jʉ́ sɛ́ ŋ́ɡɛ nu sʉ́Ꞌnɛ nǔu pɑjʉ́kɛpɛ́m, mbɑ nǔu ɡɑŋsɔ́ɔ.»

³⁶«Pʉʉ tsɑ́ɑ mɛjʉ́ŋ pʉɔ pɑ́Ꞌ tɑ̌ɑ wʉʉ sɛ́ ńtsɑ́ɑ mɛjʉ́ŋ pʉɔ tsʉʉ!»

³⁷«Kɔɔ pʉʉ nɑ́ŋ ńtɔ́ lɔ́Ꞌ-pʉɔ ḿbɔ́k Sɛ́ nɛtɔ́ yʉ́ʉ lɔ́Ꞌ! Kɔɔ pʉʉ nɑ́ŋ ŋ́kʉ́ʉnɛ pʉɔ ḿbɔ́k Sɛ́ nɛkʉ́ʉnɛ wʉ́ʉ! Pʉʉ nɑ́ŋ ńdikŋɛ mɛfɑɑnɛ-pʉɔ, sɛ́ likŋɛ mɛfɑɑnɛ mʉ́ʉ.

³⁸Pʉʉ nɑ́ŋ ńcẅɛ́lɛ́ pʉɔ, Sɛ́ ɡɛ ńcẅɛ́lɛ́ wʉ́ʉ. Pɛ́ ɡʉ ŋ́ɡɛ ńníꞋ yúu tsɛt pɑɑ-ŋu tɛ ɛ́ lúu pɛ́ tsʉ́Ꞌnɛ, ńdẅíkŋɛ tɛ mɛmbɑŋ tswɛnɛ sɛ́! Pʉʉ jí ŋɡɔ Sɛ́ ɡʉ ńtɑ́ɑ ńníꞋ pɑɑ yʉ́ʉ pɔ pɑ́Ꞌ pʉʉ zɛnɛ ńníꞋ yɛ́ pɛcɔ́ pʉɔ.»

³⁹Yɛ́su pɛn ɛ́sɑk nɛkɛt ŋɡɔ: «Tɛ ɛ́ lɑɑ ḿbɔ́ fumík ɡẅɛɛ pɔ́ wɛcɔ́, pɔ́pmɛ́ nɛn? Ŋɡɑ́ŋ! Mbɔ pɔ́p pɛ́pɑ́ ɡɛ ŋ́ɡʉ ḿvu tsɛt ɡʉ́ɔ.

⁴⁰Ḿbɛn ŋ́ɡɔ: NzíꞋfɑꞋ kɑ́ tsɑ tɑ̌ɑfɑꞋwɛ pɔ́. Lɑ́, nzíꞋfɑꞋ ẅí ɑ zíꞋ fɑꞋ tɛ ḿmɛk, ɡɛ yɛ́ pɑ́Ꞌ tɑ̌ɑfɑꞋ wɛ lɑ́.

⁴¹Ɛ́ pɛn ŋ́ɡɛ pɑ́Ꞌɑ, ɔ pɔ́ ńjʉ́ɔ mɔ́ɔmɔ ŋɡʉɔ-píi yi ɛ́ vunɛ lík mɔ́ɔmɑ́ wu, lɑ́ kɛ́m-yúu nɔɔ lík yú, ɔ pɛn ḿbɔɔ jʉ́ɔ?

⁴²Mbɔ ɔ ŋ́ɡɛ pɑ́Ꞌ, lɑ ńcú mbɔ̌ mɔ́ɔmɑ́ wu ŋɡɔ: “Mɔ́ɔmɑ́, tsʉ́Ꞌ n cẅɛɛtɛ ŋɡʉɔ-píi yi ɛ́ lík yú lɑ́”, ŋ́ɡɔ cú ŋkɑ́ yîyɑ́ ḿbɔɔ pɔ́ ńjʉ́ɔ kɛ́m-yúu mi ɛ́ nɔɔnɛ nǔu lík yú pɔ́ ɔɔ? Ɔ ŋɡɑŋcɔtnu! Piitɛ ńcẅɛɛtɛ kɛm yúu mi ɛ́ lík ɡu, tɛ ḿbɔ́ ńtsuŋ ńjʉ́ɔ zʉꞋ lɑ́ ŋ́kuꞋ nɛcẅɛɛtɛ ŋɡʉɔ-píi tsɛt lík mɔ́ɔmɑ́ wu!»

⁴³Yɛ́su pɛn ńcú ŋɡɔ: «Tʉ́ sʉ́Ꞌnɛ kɑ́ zɛ́m ntɑ́ɑ kɛpɔŋ pɔ́. Tʉ́ kɛpɔŋ pɛn ḿbɔɔ ntɑ́ɑ sʉ́Ꞌnɛ zɛ́m.

⁴⁴Pɛ́ jí yîyɑ́ tʉ́ pɔ nǔu mɛntɑ́ɑ mɛ́. Pɛ́ lɔ́ɔ ŋ́kɑ́p ndẅindẅi nǔu tʉ́ nyɛt pɔ́. Ndʉ́ŋndʉŋ pɑꞋ ɛ́ lɑɑ ḿbɔ́ pɛ́ pɔɔ kɑ́p nɛpi nǔu tʉ́ nɛŋɡɑ̌m pɔ́.

⁴⁵Pʉʉ jí ŋɡɔ ŋu lɑɑ ŋ́ɡẅɛɛ tʉ́m sʉ́Ꞌnɛ, mbɔ ɑ ɡʉ ŋ́ɡẅɛɛ ntsu sʉ́Ꞌnɛ; ŋ́ɡẅɛɛ tʉ́m kɛpɔŋ, mbɔ sẅiŋɛ kɛpɔŋ ɡʉ ńcẅɛt ntsu wɛ́, mbíꞋŋɡɔ ŋu cú pɔ nu yi ɛ́ tsɛt tʉ́m yɛ́.»

⁴⁶Yɛ́su pɛn ńcú ŋɡɔ: «Mɛlɑ́Ꞌkʉ̈ɔ́ pʉʉ sɛ́ ɛ́fúŋ wɑ́ɑ nɛ́ “Tsɑpʉɔ! Tsɑpʉɔ!” Ḿbɛn ḿbɔɔ kɛ́ ŋ́ɡɛ yúu mi n cúnɛ pɔ́ ɔɔ?»

⁴⁷Ŋu lɑɑ ńtɔ́, ńtsɛ́t wɑ́ɑ, ńzẅíꞋlɛ sẅiŋɛ yɑ́ɑ, ŋ́ɡɛ pɑꞋ ɛ́ sɛ́ ḿbíkŋɛ, mbɔ ɑ ɡʉ ɛ́fí ŋu ẅí ŋ ɡɛ nyɛt wʉ́ʉ lɑɑ.

⁴⁸Ŋɡɑŋ pɔ́ pɑ́Ꞌ wɛcɔ́ ŋu ẅí ɑ kɑ tsʉ́Ꞌ nɛkút ndɑ́, ḿbiitɛ ńtúŋ zʉꞋ túŋnɛ tɛ ŋ́kúu nǔu mɑ́mɑ́ ŋɡɔꞋ lɑ ḿbɔ́ɔ cʉ́ndɑ́, lɑ ńtík ndɑ́ ndǔ. Mbʉŋ ɡɛ ńdɔ́, ŋ́ɡʉ ŋki tɔ́ ńtɛ́mɛ nǔu cʉ́ndɑ́, lɑ́ ŋ́kɛ́ ḿbɔɔ kuꞋ nɛɡɛ tɛ ɛ́ ŋɑtnɛ pɔ́, mbíꞋŋɡɔ pɛ́ kɑ niitɛ ŋ́kút ndɑ́ sʉ́Ꞌnɛ.

⁴⁹Lɑ́, ŋu ẅí ɑ zúꞋnɛ sẅiŋɛ yɑ́ɑ, ŋ́ɡʉ, ḿbɔɔ ɡɛ pɑꞋ n cúnɛ pɔ́, mbɔ ŋɡɑŋ pɔ́ pɑ́Ꞌ wɛcɔ́ ŋu ẅí ɑ kɑ kút yɛ́ ndɑ́ pɔ kɛ́ pɔɔ cʉ́. Mbʉŋ ɡɛ ńdɔ́, ŋ́ɡʉ ŋki tɔ́ ńtɛ́mɛ nǔu ndɑ́, ɛ́ kɛ́mɛ ḿbʉ̈ɔtnɛ sɛ́. Ndɑ́ ɛ̂yɑ́ kɑ tsʉ́Ꞌ nɛkɛmɛ, ŋ́kɛmɛ pɔ tsʉʉ.