Read Ngomba Lúkɑ́shi 8 Bible Online

Lúkɑ́shi 8 - Ngomba bible

Lúkɑ́shi 8

¹Yɛ́su ɡɛ ḿbɔ́ ńnɛn tsɛt mɛtʉ́sɔŋ mbɑ tsɛt mɛlɑ́Ꞌ ɛ́sɑ́Ꞌ Ŋkʉʉ sʉ́Ꞌnɛ ńdɔk ńdɛꞋlɛ pɑꞋ nu-nɛfɔɔ-Sɛ́ pɔ́nɛ. Pɔ́p pɛ́ ɡɑŋku pɛ́ ntsɔ̌ppɑ́ nɛ́ nɛɡɛ́m pɔ́nɛ.

²Pɛcɔ́ mbɔ́ntɑ́Ꞌ-pɑŋɡɛ́ pɔ́ yɔ́p tsɛtsɛt, ḿbɔ́ pinɛ ɑ kɑ zɔŋnɛ mɛɡɔɔ nǔu pɔ́p, ŋ́ɡɛ pinɛ ɑ kɑ zuŋnɛ mɛzẅikŋɛ kɛpɔŋ mi ɛ́ ḿbɔ́nɛ nǔu pɔ́p ḿbɔ́ ḿbɑ́klɛ wɔ́p. Yɔ ḿbɔ́ Mɑlíyɑ ẅi ɑ fúnɛ Mɑkdɑlɑ mbɔ Yɛ́su kɑ zuŋ mɛzẅikŋɛ kɛpɔŋ sɑɑmbɑ́ nǔu wɛ́,

³ŋ́ɡɛ Jɑ̂ɑnɛ, nzwɛ́-Shuzɑ ẅi ɑ ḿbɔ́nɛ mbyɛ́pntɑŋ-fɔɔ Ɛlɔ̂dɛ, tɛ mbɑ Susɑ́nɑɑ, ŋ́ɡɛ pɛcɔ́ pɑŋɡɛ́. Pɔ́p pɛ́tsʉʉ pɔ́ nzʉʉ Yɛ́su ńdɔk mɛyúu mi pɔ́p ɡẅɛɛnɛ ńtɔ́ɔtɛ Yɛ́su pɔ́p ɡɑŋku pɛ́ nǔu fɑꞋ yɔ́p.

⁴Yɛ́su pɔ́ ńnɛn pɔ́Ꞌɔ, nɔɔ-lɑ́Ꞌ fú mɛshʉ́ mɛshʉ́ ńtɔ́. A ɡɛ ńdɔk sɑknɛkɛt ńcú ŋɡɔ:

⁵«Wɛcɔ́ ŋu kɑ lɑ́Ꞌ ŋ́ɡʉ ḿmɑꞋ mbiyúu, ńtɔ́ nɛmɑꞋ, mɛcɔ́ mɛmbɑŋ vu ŋkɑŋ-sɛ̂ndúŋ, pɛ́ lɔk mɛku ńnʉŋtɛ, pɛshʉ́ŋ tʉ́nɛfɑŋ tɔ́ ńtsúk ḿmi tsʉʉ.

⁶Mɛcɔ́ mɛmbɑŋ vu nǔu zʉꞋ-mɛŋɡɔꞋ, ńtɔ́ nɛsɑ́Ꞌ, ńjɑ́k ŋki, ŋ́ɡɔ́ɔ ńzúu.

⁷Mɛcɔ́ mɛmbɑŋ vu tsɛt nɛɡíi kɛpɔŋ, pɔ́p pɛpɔ́p lɔ sɛ́, nɛɡíi kɛpɔŋ fɛ́mɛ mîmɑ́.

⁸Mɛcɔ́ mɛmbɑŋ vu nǔu zʉꞋ tsɛ́tsɑ́Ꞌ sʉ́Ꞌnɛ, ŋ́ɡúꞋ, ŋ́ɡɛ ńzɛ́m, mbɑ nɛ́tɛ́ nɛtsɛ́n lɑ́ ɡɑ́ mbɑŋ ŋkʉ. Yɛ́su cú pɔ́Ꞌɔ, ŋɡɔ, ŋu ẅí ɑ ɡẅɛɛnɛ mɛtúutɛ́ nɛlɔk ńzúꞋ ɑ zúꞋ.»

⁹Gɑŋku-Yɛ́su ɡɛ ḿbíkŋɛ wɛ́ ŋɡɔ ɑ kyɛ́Ꞌtɛ yúu mi yɔ sɑknɛkɛt lɔknɛ ńcú ɛ́sẅíi wɔ́p.

¹⁰A cú mbɔ̌ pɔ́p ŋɡɔ: «Sɛ́ kɑ ɡɛ ŋɡɔ pʉʉ jí nu nɛ́nẅín nǔu nɛfɔɔ-Sɛ́ yí ɛ́ kɑ lʉɔmɛ́nɛ. Lɑ́ ɛ́ ɡʉ nǔu pɛcɔ́ pʉɔ pɔ́p zúꞋ yɔ́p pɔ ndɑꞋ sɑknɛkɛt nɛɡɑɑ wɛ́, ŋ́kɛ́ ḿbɔɔ zúꞋ yúu mi pɛ́ lɔknɛ ńcú pɔ́. Ɛ́ lɔk ḿbuutɛ nǔu pɑ́Ꞌ pɛ́ kɑ ŋwɑꞋnɛnɛ tsɛt ŋwɑꞋnɛ-Sɛ́ ŋɡɔ: Pɔ́p ɡɛ ḿbɔ́ ńdíŋɛ zʉꞋ ḿbɔɔ jʉ́ɔ, ḿbɔ́ ńzúꞋ, lɑ́ ḿbɔɔ zúꞋ tɛ ńzúꞋ pɔ́.»

¹¹A tsʉ́Ꞌ nɛkyɛ́Ꞌtɛ yɔ sɑknɛkɛt ńcú ŋɡɔ: «Yúu pinɛ lɔk ḿbɔ́ sẅíŋɛ-Sɛ́.

¹²Mbiyúu mi ɛ́ vunɛ ŋkɑŋ-sɛ̂ndúŋ, ɛ́ pɔ́ pʉɔ pinɛ pɔ́p zúꞋ sẅíŋɛ-Sɛ́, lɑ́ Sɑ́ttɑ tɔ́ ɛ́fú tʉ́m pɔ́p ńcẅɛɛtɛ, ḿbɔ́k nɛpɔ́ yi pɔ́p ɡʉ ḿbɛ́m, Sɛ́ ɡɛ pɔ́p luk.

¹³Mbiyúu mi ɛ́ vunɛ zʉꞋ-mɛŋɡɔꞋ pɔ́ pʉɔ pinɛ pɔ́p zúꞋ sẅíŋɛ-Sɛ́, ɛ́fɛ́Ꞌnɛ ḿbɛ́m nɛ́ tsɑ́ɑtɛ lɑ́ ɛ́ pɔɔ lɑt mɛŋɑŋ pɔ́, ḿbɔ́ pʉɔ lɛ́Ꞌ lɑ́Ꞌ, ŋɡʉ̈ɔ́Ꞌ pɔ́ tɛ ńtɔ́, pɔ́p ɡɔ́ɔ mɛꞋ.

¹⁴Mbiyúu mi ɛ́ vunɛ tsɛt nɛɡíi kɛpɔŋ, lɔk ḿbɔ́ pʉɔ pinɛ pɔ́p zúꞋ, ŋ́ɡɛ ńzɛ nɛmʉk mɛnu nji nji, ńzɛ nɛkwɑŋɛ ŋkɑ́p pɔ́p nɛnɑ́ŋ sʉ́Ꞌnɛ ndǔ tsɛ́tsɑ́Ꞌ, sẅíŋɛ-Sɛ́ ɡɔ́ɔ ḿbɛ́ kɛ́ ɡɛ yɛcɔ́ yúu tsɛt tʉ́m pɔ́p.

¹⁵Mbiyúu mi ɛ́ vunɛ nǔu tsɛ́tsɑ́Ꞌ sʉ́Ꞌnɛ lɔk ḿbɔ́ pʉɔ pinɛ pɔ́p zúꞋ sẅíŋɛ-sɛ́, ḿbɛ́m nɛ́ tʉ́m sʉ́Ꞌnɛ, ŋ́ɡɛ pɑꞋ ɛ́ sɛ́ ḿbíkŋɛ, ḿbɛn ḿbɔ́ ɛ́sɑ́Ꞌ tʉʉ nɛɡẅɛɛ ŋkɑ́ tsʉʉ, ḿbɛn ḿbɔ́ ńzɛ́m ntɑ́ɑ.»

¹⁶Mbɔ ŋu pɔɔ lyɛt kyɛꞌ ńdɔk kɛ́kɔ́ɔ ŋ́kẅíipɛ pɔ́, ndʉŋndʉŋ pɑꞋ ɛ́ lɑɑ ḿbɔ́ pɛ́ pɔɔ lyɛt kyɛꞌ ńtík ntsɛnŋkúu pɔ́. Pɛ́ lyɛt kyɛꞌ ńtík ndǔ tɑ́pɛlɛ, lɑ ŋu ɡɔ́ ŋ́kúu ndɑ́ ḿbɔ́ ńjʉ́ɔ kyɛꞌ.

¹⁷Pʉʉ jí ŋɡɔ, yúu mi ɛ́ lɔ́Ꞌnɛ ḿbɔ́ ńdʉɔmɛ, ɛ́ ɡʉ ńdɑ́Ꞌ ńcẅɛt pɛ́ jʉ́ɔ, yɛcɔ́ nu kɑ́ pɔ́ yi ɛ́ lɑɑ ḿbɔ́ ɛ́ lʉɔmɛ tɛ pɛ́ pɔɔ lɑ́Ꞌ ńjí tɛ ɛ́sẅíi pɛ́ jʉ́ɔ pɔ́ pɔ́.

¹⁸N dɔk ɛ́sẅíi wʉ́ʉ ŋɡɔ pʉʉ lɑk tú yʉ́ʉ nǔu ntɛ́ yi pʉʉ lɔknɛ ńzúꞋ sẅíŋɛ-Sɛ́, ŋu lɑɑ ŋ́ɡẅɛɛ yúu, mbɔ pɛ́ ɡɛ ŋ́kẅiꞋ. Lɑ́ ŋ́kɛ́ ŋ́ɡʉ nǔu ŋu ẅí ɑ kɑ́ ɡẅɛɛ yúu pɔ́, mbɔ pɛ́ ɡʉ ńcẅɛ́ɛ mɔ́zʉꞋ yí ɑ kwɑŋɛ́nɛ ŋɡɔ ɑ ɡẅɛɛ lɑ.

¹⁹Pɔ́Ꞌɔ lɑ́, mɑ́ wɛ pɔ́p pɔ́ɔpɛ́mɑ́ pɛ́ tɔ́ nɛjʉ́ɔ wɛ́, ŋ́kɛ́ ḿbɔɔ kuꞋ nɛtɔ́ tɛ ŋ́kúu zʉꞋ yi ɑ zúꞋu pɔ́, ntɛ́ lɑ́Ꞌ nɛzɑ́ɑ.

²⁰Pɛ́ tɔ́, ńcú mbɔ̌ Yɛ́su ŋɡɔ: «Mɑ́ wu pɔ́p pɔ́ɔpɛ́mɑ́ pú pɔ́p píilíinɛ ḿbɔ́ ńdɔ́ɔ nɛjʉ́ɔ wú.»

²¹A tsɔ́Ꞌ ŋɡɔ: «Mɑ́ wɑɑ pɔ́p pɔ́ɔpɛ́mɑ́ pɑ́ɑ pʉɔ pinɛ pɔ́p zúꞋnɛ nu-Sɛ́, Ḿbɛn ŋ́ɡɛ pɑꞋ sẅiŋɛ ɛ̂yɑ́ sɛ́ ḿbíkŋɛ.»

²²Yɛ́su pɔ́p ɡɑŋku pɛ́ lɑ́Ꞌ yɛcɔ́ lɛ́Ꞌ ŋ́kúu tsɛt kɑnúꞋ, ɑ cú mbɔ̌ pɔ́p ŋɡɔ: «Pɛkŋɛ ɡʉ tɛ ŋ́kúu nǔu yɛcɔ́ njʉ́n.» Pɔ́p pɛpɔ́p ɡʉ.

²³Pɔ́p pɔ́ ŋ́ɡʉ, Yɛ́su pɔ́ ńdɛ́. Pɛ́ ɡɔ ńjʉ́ɔ yɛcɔ́ mɑ́mɑ́ fɛ́m tɔ́, ńzɛ nɛpʉꞋ ŋki, ɛ́ pɔ́ ŋ́kɔ́Ꞌ ŋ́kúu tsɛt kɑnúꞋ tɛ ɛ́ tsʉꞋ mɔ́zʉꞋ ɛ́ lúu. Pɔ́p pɔ́k nɛɡʉ ŋki,

²⁴ńjʉɔmɛ wɛ́, ńcú ŋɡɔ: «Tsɑpʉɔ, Tsɑpʉɔ, pɛkŋɛ pfú tɛ ńdɛm.» Yɛ́su jʉɔmɛ, ńdɔ sɛ́, ńcʉ̈ɔ́k fɛ́m pɔ́p ŋki. Fɛ́m zɑ́Ꞌnɛ, ŋki tʉ́ʉ, zʉꞋ nɑꞋ ŋɡɔ kɛm.

²⁵A píkŋɛ wɔ́p ŋɡɔ: «Nɛpɛ́m wʉʉ pɔ́ pɔ ɡɔ́?» Lɑ́ pɔ́p pɔ́ ḿbɔ́k pɔ́knɛ, ɛ́ pɔ́ ŋ́kʉꞋnɛ wɔ́p. Pɔ́p shɔtnɛ ńcú tsɛtsɛt pɔ́p ŋɡɔ: «Yɔ lii ŋu pɔ́ pɔ ŋɡɔ ku tɛ ńcú nu mbɑ fɛ́m pɔ́p ŋki zúꞋ ntsu wɛ́?»

²⁶Pɔ́p pɛ́ ɡɑŋku pɛ́ ɡʉ tɛ ŋ́kúu Jɛ́lɑzɑnî, ŋɡɔŋ yí pɛ́ fúnɛ njʉ́n yɛ ŋɡɔ́ŋ-Ŋɡɑlilɛ́, ɛ́ pɔ́ nǔu yɛcɔ́ njʉ́n.

²⁷Yɛ́su cẅɛt tsɛt kɑnúꞋ, wɛcɔ́ ŋu-tʉ́sɔŋ cẅɛt ńzɑ́Ꞌ wɛ́, ḿbɔ́, mbɔ mɛzẅikŋɛ kɛpɔŋ kɑ púunɛ wɛ́ tɛ ɑ tsʉꞋ ńnɛn pɔ kɛ́ zẅík ndẅí, ḿbɛn ńdɛ́ pɔ zʉꞋ yi pɛ́ tẅíinɛ pɛpfú zúꞋu, mbɔ ɑ kɑ lɑ́Ꞌ mɔ́ ḿmɛꞋ njɛ́Ꞌ yɛ.

²⁸A jʉ́ɔ Yɛ́su pɔ́Ꞌɔ, ńtɔ́ ńnɔɔ mɛku wɛ́, ŋ́kíi ńdɔk ŋɡi tɛnnɛ ńcú ŋɡɔ: «Yɛ́su mɔ́ɔ-Sɛ́ ẅi ɑ piꞋnɛ mbɑ kʉ̈ɔ́ lɑ́, ɔ cẅɛ́ɛ kʉ̈ɔ́ mbɔ̌ mɔ? M búꞋ mbɔ́ mbɔ̌ wu, kɔɔ níꞋ wɑ́ɑ tsɛt ŋɡʉ̈ɔ́Ꞌ!»

²⁹Ńcú pɔ́Ꞌɔ, mbíꞋŋɡɔ ɛ́ kɑ ɡɔ ḿbɔ́, mbɔ Yɛ́su cɔ́k yîyɑ́ Zẅikŋɛ kɛpɔŋ ŋɡɔ ɛ́ fú nǔu wɛ́ ńcẅɛt. Zẅikŋɛ kɛpɔŋ ɛ̂yɑ́ kɑ pɔ́ pɑꞋɑ, mbɔ ɛ́ zɛɛ ńtɔ́, ḿbʉ́ʉpɛ wɛ́. Ḿbɔ́ ɛ́ lɑɑ ḿbɔ́ tɛ ŋ́ɡẅɛɛ wɛ́, ɑ lɔ sɛ́ ŋ́kʉɔ pɛ́ zuŋ wɛ́ ŋ́ɡẅɛɛ, ńdɔk mɛŋkʉ-tẅín ŋ́kút wɛ́, ńníꞋ kɔꞋ mɛku wɛ́. A zɑ́Ꞌtɛ ŋkʉ-tʉ́n, ḿbʉ̈ɔ́Ꞌ kɔꞋ zẅikŋɛ kɛpɔŋ ɛ̂yɑ́ lɔk wɛ́ ŋ́kʉɔ pɔ nɛ́ kɔ̂ŋtɛt.

³⁰Yɛ́su píkŋɛ ŋu ɛ̂wɑ́ ŋɡɔ: «Lík yú wɔ̌?» A cú ŋɡɔ: «Pʉɔ tɛ ńzɑ́ɑ.» A ḿbɔ́ ńcú pɔ́Ꞌɔ, mbíꞋŋɡɔ mɛzẅikŋɛ kɛpɔŋ ɛ̂mɑ́ ḿbɔ́ nǔu wɛ́ tɛ ńzɑ́ɑ zɑ́ɑnɛ.

³¹Mɛzẅikŋɛ kɛpɔŋ ɛ̂mɑ́ púꞋ mbɔ́ mbɔ̌ Yɛ́su ŋɡɔ, kɔɔ ɑ ńtúu wɔ́p tsɛt ɡʉ́ɔ zʉꞋ-ŋɡʉ̈ɔ́Ꞌ.

³²Ɛ́ ɡɔ ḿbɔ́, yɛcɔ́ kɑt-mɛnjínɑɑ pɔ́ zúꞋu, ḿbɔ́ ŋ́kɑ́t ŋ́kwɛ́t yúu ndǔ nɛŋkɔ́Ꞌ. Mɛzẅikŋɛ kɛpɔŋ ɛ̂mɑ́ púꞋ mbɔ́ mbɔ̌ Yɛ́su ŋɡɔ ɑ pɛ́m, pɔ́p ɡʉ ŋ́kúu tsɛt mɛnjínɑɑ. A pɛ́m.

³³Pɔ́p ɡɔ́ɔ ŋ́kɛ́ ɛ́fú nǔu ŋu ɛ̂wɑ́ ńcẅɛt, ŋ́ɡʉ ŋ́kúu nǔu mɛnjínɑɑ. Pɔ́p kʉŋtɛ ńtɑ́kŋɛ, ńzɔt ŋ́kiimɛ ḿbʉ̈ɔtnɛ tsɛt kʉɔ nɛkʉŋ-ŋki, ńnɔ́ ŋki ḿpfútɛ.

³⁴Pʉɔ pinɛ pɔ́p kɑ pɔ́ ḿbyɛ́p mɛnjínɑɑ jʉ́ɔ pɔ́Ꞌɔ, ɛ́sɑtnɛ ŋ́kʉɔ, ŋ́ɡʉ ɛ́sẅíi yɔ nu tsɛt tʉ́sɔŋ mbɑ tsɛt mɛlɑ́Ꞌ.

³⁵Lɑ́Ꞌ zúꞋ, ŋ́ɡɔ́ɔ ńcẅɛt, ńtɔ́ nɛjʉ́ɔ nu ɛ̂yɑ́. Ŋ́ɡʉ tɛ ŋ́kúu zʉꞋ yi Yɛ́su kɑ pɔ́nɛ zúꞋu, ńjʉ́ɔ ŋu ẅi mɛzẅikŋɛ kɛpɔŋ lɑ́Ꞌnɛ ńcẅɛt nǔu wɛ́ lɑ́, ɑ nɑ́ŋ nɛjɔ́ŋ Yɛ́su, mbɔ ɑ fíitɛ, jínu yɛ́ pɛn tɛ ɑ mɑꞋ ndẅí. Pɔ́p jʉ́ɔ pɔ́Ꞌɔ, ŋ́ɡɔ́ɔ ńtsʉ́Ꞌ ḿbɔ́k pɔ́knɛ.

³⁶Pʉɔ pinɛ pɔ́p ḿbɔ́ ńjʉ́ɔ nzɛnɛ-nu pɛ́ɛtɛ pɑꞋ ɛ́ lɑ́Ꞌnɛ ńdɛɛ lɑ ŋu ẅi mɛzẅikŋɛ kɛpɔŋ kɑ pɔ́nɛ nǔu wɛ́ lɑ́, fíitɛ.

³⁷Pʉɔ nǔu wîwɑ́ shʉ́ pɛ́tsʉʉ zɛ nɛpɔ́k, ḿbɔ́k pɔ́knɛ tɛ ḿbúꞋ mbɔ́ mbɔ̌ Yɛ́su ŋɡɔ ɑ fú nǔu wɔ́p shʉ́ ŋ́ɡʉ. Yɛ́su ɡɔ́ɔ ŋ́kɛ́ ŋ́kúu tsɛt kɑnúꞋ nɛɡʉ,

³⁸ḿbɔ́ ŋ́ɡʉ, ŋu ẅí mɛzẅikŋɛ kɛpɔŋ lɑ́Ꞌnɛ ńcẅɛt nǔu wɛ́ lɑ́, púꞋ mbɔ́ mbɔ̌ wɛ́ ŋɡɔ pɔ́pmɛ́ ŋ́ɡʉ. Lɑ́ Yɛ́su lʉꞋ ńcú mbɔ̌ wɛ́ ŋɡɔ:

³⁹«Pɛn pɔ nɛ́ njɛ́Ꞌ yu, ɛ́sẅíi lɑ́Ꞌ nɛ́ mɑ́mɑ́ nu sʉ́Ꞌnɛ yí Sɛ́ ɡɛnɛ nǔu ɡu.» Ŋu ɛ̂wɑ́ ɡɔ́ɔ ŋ́kɛ́ ŋ́ɡʉ, ńdɔk nu yi Yɛ́su lɑ́Ꞌnɛ ŋ́ɡɛ nǔu wɛ́ lɑ ɛ́sɑt lɑ́Ꞌ.

⁴⁰Yɛ́su pɛn nzʉʉ tɛ ŋ́kúu nǔu yɛcɔ́ njʉ́n, lɑ́Ꞌ pɔ́ zúꞋu, mbɔ pɔ́p ńdɑ́Ꞌ mɔ́ ńzɛ nɛzẅíꞋlɛ wɛ́, pɔ́p jʉ́ɔ wɛ́, ŋ́ɡɔ́ɔ ńtsɑ́ɑtɛ tɛꞋ.

⁴¹Wɛcɔ́ tɑ́tndɑ́-cúꞋlɛ-Pɑyúdɑ tɔ́, lík yɛ́ pɔ́ ŋɡɔ Yɑyɛ́lɔ, ńnɔɔ mɛku-Yɛ́su, ḿbúꞋ mbɔ́ mbɔ̌ wɛ́ ŋɡɔ ɑ tɔ́ tɛ ŋ́kúu ndɑ́ yɛ,

⁴²ŋɡɔ ndɑꞋ mɔ́ɔ nɛ wɛ́mɔ́Ꞌ tsʉ́Ꞌ ḿpfú pfúnɛ. Ḿbɔ́ mɔ́ɔ mɑŋɡɛ́, tɛ ŋ́ɡẅɛɛ ŋɡuꞋ ntsɔ̌ppɑ́. Yɛ́su zúꞋ pɔ́Ꞌɔ, ńdɔ sɛ́ pɔ́pmɛ́ ɡʉ. Ḿbɔ́ ŋ́ɡʉ pɔ́Ꞌɔ, lɑ́Ꞌ zɑ́ɑ nzʉʉ yɛ, ńtíi wɛ́, ńtík sɔŋ tɛ zʉꞋ tsʉꞋ kʉ́ʉpɛ kʉ́ʉpɛ́nɛ.

⁴³Wɛcɔ́ mɑŋɡɛ́ pɔ́ yɛ́ tsɛtsɛt, ŋ́ɡẅɛɛ ɡɔ́ɔ mɑ́sɔ́ɔ, mbɔ ɛ́ ɡɑ́ɑnɛ wɛ́ ɡɑ́ɑnɛnɛ ŋɡuꞋ ntsɔ̌ppɑ́ nɛ́ nɛɡɛ́m, ŋ́kɛ́ ḿbɔɔ zɑ́Ꞌnɛ, mbɔ pɑɡɛ mɛfu kɑ zɔŋ mɔ́ yɔ́p kɛ́kɑ́ŋ tɛ ŋ́kɑ́ɑ. A fɛn pɛ́ yúu tsʉʉ tsʉʉ pɔ nǔu, ŋ́kɛ́ ḿbɔɔ fíitɛ.

⁴⁴A nɑꞋtɛ, ɛ́fú nzʉʉ, ńtɔ́ ŋ́kuplɛ nɛcɔ́ŋ-ndẅí-Yɛ́su. Gɔɔ yɛ́ ɡɔ́ɔ ḿmɛ.

⁴⁵Yɛ́su píkŋɛ ŋɡɔ: «Wɔ̌ kuunɛ wɑ́ɑ?» Mbɑ wɔ̌ lɑ́ pɔ́ ḿmuŋɛ muŋɛ́nɛ. Pyɛ̂ cú ŋɡɔ: «Ndɛ, pɛ́ sɛ́ ɛ́fyɛ́t wú ndɛn pɑ́Ꞌnɛ, ɔ píkŋɛ ŋɡɔ pɛ́ cú ŋɡɔ ɑ wɔ̌?»

⁴⁶Yɛ́su tsúŋ ńcú ŋɡɔ: «Ŋu kuu wɑ́ɑ. N zúꞋ pɑꞋ mɛtʉʉ cẅɛtnɛ nǔu mɔ.»

⁴⁷Mɑŋɡɛ́ ɛ̂wɑ́ jʉ́ɔ pɑ́Ꞌ Yɛ́su píitɛnɛ ńjí, ńzɛ nɛɡwɛt, ńtɔ́ ńnɔɔ mɛku-Yɛ́su, ŋ́ɡɔ́ɔ ḿbɛ́ɛtɛ mbi lɑ́Ꞌ, ɛ́sẅíi wɛ́ yúu mi ɛ́ ɡɛnɛ lɑ ɑ kuu wɛ́, ŋ́kuplɛ wɛ́ pɔ́Ꞌɔ ɛ́fíitɛ.

⁴⁸Yɛ́su cú mbɔ̌ wɛ́ ŋɡɔ: «Mɔ́ɔ wɑɑ, ntɛ́ yi ɔ lɔknɛ ńzɑ́p tʉ́m nǔu mɔ ɡɛ ɔ fíitɛ, ɡʉ nɛ́ mbɔ́tnɛ!»

⁴⁹Ḿbɔ́ ńcú mbɔ̌ wɛ́ pɔ́Ꞌɔ, ŋu fú njɛ́Ꞌ-Yɑyɛ́lɔ ńcú mbɔ̌ Yɑyɛ́lɔ ŋɡɔ, kɔɔ pɛn ḿbɑ́klɛ Tsɑpʉɔ níinɛ, mɔ́ɔ nu pfú.

⁵⁰Yɛ́su tɑ́ nɛtúutɛ ńzúꞋ, ńcú mbɔ̌ Yɑyɛ́lɔ ŋɡɔ: «Kɔɔ pɔ́k, zɑ́p pɔ tʉ́m yú nǔu mɔ! Mɔ́ɔ nu ɡʉ ɛ́fíitɛ.»

⁵¹Yɛ́su ɡʉ tɛ ŋ́kúu njɛ́Ꞌ-Yɑyɛ́lɔ, ńtɔꞋ ŋɡɔ kɔɔ wɛcɔ́ ŋu ndɛꞋ kúu ndɑ́ tɛ ńdíꞋ ndɑꞋ Pyɛ̂, ŋ́ɡɛ Jɑ̂k, pɔ́p Jɑ̂ŋ, ŋ́ɡɛ Tɑ́-mɔ́ɔ pɔ́p Mɑ́mɔ́ɔ.

⁵²Lɑ́Ꞌ kɑ ɡɔ́ ḿbɔ́, mbɔ pɔ́p zɛ nɛlɑɑ nɛvú. Yɛ́su cú ŋɡɔ: «Kɔɔ pɛ́ pɛn ŋ́kíi, mɔ́ɔ kɑ́ pfú, ɑ lɛ́ lɛ́nɛ.»

⁵³Pɛ́ zúꞋ ŋ́ɡwɛ wɛ́ ɡwɛnɛ, mbíꞋŋɡɔ pɔ́p kɑ pɔ́ ńjí ŋɡɔ ɑ tsuŋ ḿpfú.

⁵⁴Lɑ́, Yɛ́su kɛ́ ŋ́ɡʉ ɡʉnɛ tɛ ŋ́kúu pɔ zʉꞋ yi mɔ́ɔ kɑ nɔɔnɛ zúꞋu, ŋ́kuplɛ pɔ́ yɛ́, ńdɔk ŋɡi tɛnnɛ ŋɡɔ: «Mɔ́ɔ wɑ́ɑ, jʉɔmɛ!»

⁵⁵Jíjʉ́ŋ wɛ ɡɔ́ɔ ḿbɛn, ɑ pʉꞋ mbʉʉ yɛ. Yɛ́su cú ŋɡɔ pɛ́ ɡɑ́ yúu ɑ jʉ́.

⁵⁶Tɑ́-mɔ́ɔ pɔ́p Mɑ́mɔ́ɔ jʉ́ɔ, ɛ́ kʉꞋnɛ wɔ́p. Lɑ́ Yɛ́su tɔꞋ ŋɡɔ kɔɔ pɔ́p kɛ́ sẅíi ŋu nɛ́ yúu mi ɛ́ lɛɛnɛ.