Read Ngomba Jɑ̂ŋ 10 Bible Online

Jɑ̂ŋ 10 - Ngomba bible

Jɑ̂ŋ 10

¹Yɛ́su pɛn ńcú ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, ŋu lɑɑ ńjɛ́Ꞌ pɔ ndǔ ŋkɑ́Ꞌ tɛ mbɔɔ lɛɛ pɔ ntsuŋkɑ́Ꞌ lɑ ŋ́kúu tsɛt ŋkɑ́Ꞌ-mbí pɔ́, mbɔ ŋɡɑŋ ntsɔ́ŋ, ḿbɛn ḿbɔ́ fút.

²Mbyɛ́p mbí sʉ́Ꞌnɛ lɛɛ pɔ ntsuŋkɑ́Ꞌ.

³Ŋu ẅí ɑ pyɛ́pnɛ ntsuŋkɑ́Ꞌ, ɑ tsɔ́Ꞌ ntsuŋkɑ́Ꞌ, mɛnjinjɔ[10]zúꞋ ŋɡi-mbyɛ́p mbí. A lɔk mɛlík mɔ́p ɛ́fúŋ wɔ́p, ńdɔk wɔ́p ńcẅɛt.

⁴Mbyɛ́p mbí ɡɛ mɛnjinjɔ mɛ́ fú ŋkɑ́Ꞌ ńcẅɛt tɛ ḿmɛ, ɑ pɔ́ mbi, pɔ́p pɔ́ nzʉʉ, mbíꞋŋɡɔ mɛnjinjɔ lii ŋɡi yɛ.

⁵Ɛ́ lɑɑ ḿbɔ́ pɔ́p pɔɔ cʉ́ɔ nzʉʉ-ŋu ndɛꞋ pɔ́, pɔ́p ɡʉ ŋ́kʉɔ wɛ́ kʉɔnɛ, mbíꞋŋɡɔ pɔ́p kɑ́ lii ŋɡi pʉɔ ndɛꞋ pɔ́.»

⁶Yɛ́su cú yɔ sɑknɛkɛt mbɔ̌ pɔ́p, lɑ́ pɔ́p kɛ́ mbɔɔ zúꞋ yúu mi ɑ lɔknɛ ńcú pɔ́.

⁷Yɛ́su pɛn ńcú mbɔ̌ pɔ́p ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, ntsuŋkɑ́Ꞌ-mɛnjinjɔ pɔ́ pɔ mɔ.

⁸Pʉɔ tsʉʉ pinɛ pɔ́p kɑ piitɛ́nɛ ńtɔ́, lɑ n tɔ́ yɑ́ɑ, pɔ́ pɔ pɛtsɔ́ŋ, ḿbɛn ḿbɔ́ pɛfút. Lɑ́ mɛnjinjɔ kɑ kɛ́ mbɔɔ ŋɡi yɔp zúꞋ.

⁹Ntsuŋkɑ́Ꞌ pɔ́ pɔ mɔ, ŋu lɑɑ ńdɛɛ nǔu mɔ ŋ́kúu ŋkɑ́Ꞌ, mbɔ ŋɡɑŋ ɡʉ ŋ́ɡɛ ńduk. A ɡʉ ḿbɔ́ ŋ́kúu ŋkɑ́Ꞌ, ńcẅɛt pɑ́Ꞌ ɑ kɔŋnɛ, ḿbɔ́ ńjʉ́ɔ yúu kwɛ́tnɛ.

¹⁰Ntsɔ́ŋ tɔ́ yɛ́ pɔ nɛjɔ, pɔ nɛjẅí, pɔ nɛpʉ́ʉpɛ. Ŋ kɑ tɔ́ nɛpɔ́ yi pʉɔmɛsɔŋ ɡʉ ŋ́ɡẅɛɛ luk yí ɛ́ kwɑꞋ yɛ́tɛ́ tɛ ńdúkŋɛ.»

¹¹Mbyɛ́p mbí wɛ sʉ́Ꞌnɛ pɔ́ pɔ mɔ. Mbyɛ́p mbí wɛ sʉ́Ꞌnɛ, ɡɑ́ tú yɛ́ ntɛ́ njinjɔ yɛ́.

¹²Ŋu ẅí ɑ lɛp yɛ́ pɔ ŋkɑ́p, lɑ́ mɛnjinjɔ pɔɔ mɛ́ pɔ́, ɑ kɑ́ pɔ́ kwɑꞋ mbyɛ́p mbí pɔ́. A nɑ́ŋ tɛ ńjʉ́ɔ nɑɑŋɡwɛ tɔ́, ɑ mɛꞋ wɔ́p ŋ́kʉɔ. Nɑɑŋɡwɛ ɡẅɛɛ wɛcɔ́, ŋ́ɡɛ pfuꞋ sɑt zʉꞋ.

¹³Ẅîwɑ́ ŋu mɛꞋ mɛnjinjɔ ŋ́kʉɔ, mbíꞋŋɡɔ ɑ kɑ tɔ́ pɔ nɛlɛp ŋkɑ́p. Mɛjʉ́ŋ-mɛnjinjɔ kɑ́ pɔ́ ŋ́kɔ́ wɛ́ pɔ́.

¹⁴Mbyɛ́p mbí wɛ sʉ́Ꞌnɛ ɑ mɔ, mɔ sɛ́ ńjí mɛnjinjɔ mɑ́ɑ, pɔ́p pɛn ḿbɔ́ ńjí wɑ́ɑ.

¹⁵Ndʉ́ŋndʉŋ pɑ́Ꞌ Tɑ̌ɑ mɔ sɛ́ ńjí wɑ́ɑ, m bɛn ḿbɔ́ ńjí Tɑ̌ɑ mɔ. Ŋ ɡɑ́ tú yɑ́ɑ ntɛ́ mɛnjinjɔ mɑ́ɑ.

¹⁶M bɛn ŋ́ɡẅɛɛ mɛcɔ́ mɛnjinjɔ mí pɔ́p kɑ́ pɔ́ tsɛt ŋkɑ́Ꞌ wɔ pɔ́. Ɛ́ pɔ́ ḿbíkŋɛ ŋɡɔ ŋ ɡʉ ńdɔk wɔ́p ńtɔ́. Pɔ́p ɡúu ɡʉ ŋ́ɡɛ ńzúꞋ ŋɡi yɑɑ, ɛ́ lɛɛ pɔ́Ꞌɔ, kɑt-njinjɔ pɔ́ wɛ́mɔ́Ꞌ, mbyɛ́p pɔ́ wɛ́mɔ́Ꞌ.

¹⁷Tɑ̌ɑ mɔ kɔŋ wɑ́ɑ, mbíꞋŋɡɔ ŋ ɡɑ́ tú yɑ́ɑ lɑ ŋ́ɡɛ ḿbɛn ńcẅɛ́ɛ.

¹⁸Sɑ̌ɑ ŋu zɛɛ mbɔɔ kuꞋ nɛcẅɛ́ɛ luk yɑ́ɑ pɔ́, mɔ kɔŋnɛ ŋ́ɡɑ́ tú yɑ́ɑ. Ŋ kuꞋ nɛɡɑ́, ŋ́ɡɛ ḿbɛn ńcẅɛ́ɛ. Ɛ́ yúu mi tɑ̌ɑ mɔ kɑ cúnɛ ŋɡɔ ŋ ɡɛ.

¹⁹Yɔ sẅiŋɛ pɛn ḿmɑꞋ tɑ́kŋɛ tsɛtsɛt pɑyúdɑ.

²⁰Nɛzɑ́ɑ pʉɔ tsɛtsɛt pɔ́p pɔ́ ńcú ŋɡɔ: «zẅikŋɛ kɛpɔŋ kɑ ɡẅɛɛ wɛ́. A pɑ́lɛ. A cú kʉ̈ɔ́ tɛ pʉʉ zẅíꞋlɛ?»

²¹Pɛcɔ́ pɔ́ ŋɡɔ: «Yɑ́ kɑ́ pɔ́ sẅiŋɛ-ŋu njẅɛt-zẅikŋɛ kɛpɔŋ kɑ ɡẅɛɛnɛ wɛ́ pɔ́. Mbɔ zẅikŋɛ kɛpɔŋ ŋíɛꞋ mík-pɛfʉ?»

²²Pɛ́ pɔ́ Yɛlúsɑlɛm ḿbɔ́ ńjʉ́ ndínɑ nɛlɔk ŋ́kẅíitɛ pɑ́Ꞌ pɛ́ kɑ pɛnnɛ ńniitɛ zʉꞋ-nɛnɔŋ pɔꞋ yí pɛ́ kɑ pʉ́ʉpɛnɛ, ɛ́ pɔ́ ŋkɑ́-fɑ́k, (ńzɛ nǔu pɛsɑŋ ntsɔ̌ppɑ́ ŋ́kúu nǔu pɛsɑŋ pɛ́pɑ́)

²³Yɛ́su pɔ́ ŋ́kɑ́t nɛntɛ tsɛt ndɑ́-nɔŋpɔꞋ, zʉꞋ pɛ́ fúŋnɛ ŋɡɔ tɛtɑ́ɑ-Sɑlɛmɔ.

²⁴Pɑyúdɑ tʉ̈ɔ́Ꞌlɛ Yɛ́su ńníꞋ sɔŋ, ḿbíkŋɛ wɛ́ ŋɡɔ: «pɛk ɡʉ ńzẅíꞋlɛ tɛ kúu pɔ ŋkɑ́ kʉ̈ɔ́ lɑ́ ɔ sẅíi wɛ́k nɛ́ ŋu ẅí ɔ jʉ́? Ɔ lɑɑ ḿbɔ́ Nzɑ́Ꞌŋkʉ ẅi Sɛ́ kɑ kɑꞋnɛ, ɔ jɛ́p jɛ́pnɛ ɛ́sẅíi wɛ́k.»

²⁵Yɛ́su pʉ̈ɔt mbɔ̌ pɔ́p ŋɡɔ: «Mɔ ńdɑ́Ꞌ mɔ́ ɛ́sẅíi wʉ́ʉ, lɑ́ pʉʉ pɔɔ ḿbɔ́ ḿbɛ́m pɔ́. MɛfɑꞋ mí mɔ sɛ́ ńdɔk lík-Tɑ̌ɑ mɔ ŋ́ɡɛ ńdɛꞋlɛ ŋu ẅí mɔ jʉ́.

²⁶Lɑ́ pʉʉ kɑ́ pɔ́ ńzɑ́p tʉ́m nǔu mɔ pɔ́, mbíꞋŋɡɔ pʉʉ kɑ́ pɔ́ tsɛt kɑt-mɛnjinjɔ mɑ́ɑ pɔ́.

²⁷Mɛnjinjɔ mɑ́ɑ zúꞋ ŋɡi yɑɑ. N jí wɔ́p, pɔ́p cʉ́ɔ nzʉʉ mɔ.

²⁸Ŋ ɡɑ́ luk kɛ́mɛ mbɔ̌ pɔ́p, pɔ́p ŋ́ɡʉ ńdɑ́Ꞌ ḿbɛn ńtíi ndɔɔ kɛ́mɛ pɔ́. Sɑ̌ɑ ŋu pɛn mbɔɔ kuꞋ nɛfú mbɔ̌ mɔ ɛ́sɑꞋ wɔ́p pɔ́.

²⁹Tɑ̌ɑ mɔ kɑ ɡɑ́ wɔ́p mbɔ̌ mɔ. A ɡẅɛɛ mɛtʉʉ ńtsɑ yúu tsʉʉ, sɑ̌ɑ ŋu kɑ́ kuꞋ nɛfú mbɔ̌ Tɑ̌ɑ mɔ ɛ́sɑꞋ wɔ́p pɔ́.»

³⁰Pɛk Tɑ̌ɑ mɔ pɔ́ pɔ tɑ́Ꞌ ŋu.

³¹Pɑyúdɑ pɛn ńdɑk mɛŋɡɔꞋ, nɛlɔk ńtɛ́mtɛ Yɛ́su ńjẅí.

³²Lɑ́ Yɛ́su pɛn ńcú mbɔ̌ pɔ́p ŋɡɔ: «Ŋ kɑ ɡɛ pʉʉ jʉ́ɔ mɛfɑꞋ sʉ́Ꞌnɛ tɛ ɛ́ zɑ́ɑ zɑ́ɑnɛ mi ɛ́ fúnɛ mbɔ̌ Tɑ̌ɑ mɔ, pʉʉ lɑk mɛŋɡɔꞋ nɛlɔk ńtɛ́mtɛ wɑ́ɑ ńjẅí pɑ́Ꞌɑ mbíꞋ yɛ́tɛ́ nǔu?»

³³Pɑyúdɑ tsɔ́Ꞌ mbɔ̌ wɛ́ ŋɡɔ: «Pɛk kɑ́ pɔ́ ńdɔɔ nɛlɔk mɛŋɡɔꞋ ńtɛ́mtɛ wú ńjẅí, ntɛ́ pɔ yɛcɔ́ fɑꞋ sʉ́Ꞌnɛ pɔ́, ɛ́ pɔ́ pɔ ŋɡɔ ɔ zɔɔtɛ Sɛ́. Gu ẅí ɔ pɔ́ pɔ ŋumɛsɔŋ, ɔ tsʉ́Ꞌ ńcú pɔ ŋɡɔ ɔ Sɛ́.»

³⁴Yɛ́su tsɔ́Ꞌ mbɔ̌ pɔ́p ŋɡɔ: «Pɛ́ ŋkɑɑ ŋwɑꞋnɛ tsɛt ŋwɑꞋnɛ-ndɛn kɑɑ yʉ́ʉ ŋɡɔ Sɛ́ cú ŋɡɔ: Mɔ, n cú ŋɡɔ pʉʉ mɛsɛ́ pɔ́»?

³⁵Pɛkŋɛ pɛtsʉʉ sɛ́ ńjí ŋɡɔ yúu mi pɛ́ kɑ ŋwɑꞋnɛ́nɛ tsɛt ŋwɑꞋnɛ-ndɛn kɑɑ ŋ́ɡʉ ńdɑ́Ꞌ ŋ́kúpmɛ pɔ́. Ɛ́ lɑɑ ḿbɔ́ yi Sɛ́ kɑ cú ŋɡɔ pʉɔ pínɛ ɑ cúnɛ nu yɛ́ mbɔ̌ pɔ́p mɛsɛ́,

³⁶mɔ m bɛn ńtʉ́ʉ pɑ́Ꞌɑ ḿbɔ́ ŋu ẅí Tɑ̌ɑ mɔ Sɛ́ kɑ tsɔ́Ꞌnɛ ńtúu ndǔ yɔ mbí, mbíꞋŋɡɔ n cúnɛ ŋɡɔ mɔ mɔ́ɔ-Sɛ́, pʉʉ cú ŋɡɔ n zɔɔtɛ Sɛ́?

³⁷N dɑɑ mbɔɔ fɑꞋ mɛfɑꞋ Tɑ̌ɑ mɔ pɔ́, kɔɔ pʉʉ zɑ́p tʉ́m nǔu mɔ.

³⁸Lɑ́ ḿbɔ́ yi n dɑɑ fɑꞋ, ɛ́ zɛɛ ḿbɔ́ ŋɡɔ pʉʉ kɛ́ zɑ́p tʉ́m nǔu mɔ pɔ́, pʉʉ pɛ́m mɛfɑꞋ ɛ̂mɑ́. Ɛ́ lɛɛ pɔ́Ꞌɔ, pʉʉ jí sʉ́Ꞌnɛ ŋɡɔ Tɑ̌ɑ mɔ nɛ́ mɔ, m bɔ́ nɛ́ jʉ́.

³⁹Pɔ́p pɛn ńdɔɔ shʉ́ nɛɡẅɛɛ wɛ́, lɑ́ ɑ sẅiklɛ tsɛt mbɔ́ mɔ́p.

⁴⁰Yîyɑ́ nu lɛɛ, Yɛ́su pɛn ḿbɛn nǔu yɛcɔ́ njʉ́n-ŋki-Juudɛŋ, zʉꞋ yí Jɑ̂ŋ kɑ zɛnɛ nɛnuꞋ pʉɔ ŋki zúꞋu lɑ́, ńnɑ́ŋ zúꞋu.

⁴¹Pʉɔ tɛ ńzɑ́ɑ tɔ́ nɛjɔ́ŋ yɛ́, ḿbɔ́ ńcú ŋɡɔ: «Jɑ̂ŋ ŋkɑɑ ɡɛ yɛcɔ́ nu mɑ̌ɑmɑɑnɛ pɔ́, lɑ́ kʉ̈ɔ́ lɑ́ yi ɑ kɑ cúnɛ nǔu ŋu mbɛ́ɛnɛ wɔ kɑ pɔ́ nu nɛ́nẅín.»

⁴²Pʉɔ tɛ ńzɑ́ɑ nǔu pʉɔ pinɛ pɔ́p m̄bɔ́nɛ zúꞋu zɑ́p tʉ́m nǔu Yɛ́su.