Read Ngomba Jɑ̂ŋ 11 Bible Online

Jɑ̂ŋ 11 - Ngomba bible

Jɑ̂ŋ 11

¹Wɛcɔ́ ŋu ɡɛ ḿvu ɡɔɔ, lík yɛ́ pɔ́ ŋɡɔ Lɑzɑ̂ɑ. Pɔ́p pɔ́ɔpɛ́mɑ́ pɛ́ pɛ́ pɑŋɡɛ́ pɛ́pɑ́, Mɑ́ktɑ pɔ́p Mɑlíyɑ pɔ́ ńtswɛ́ tsɛt lɑ́Ꞌ-Mbɛtɑni.

²Wɔ Mɑlíyɑ pɔ́ ẅi ɑ kɑ lɑ́Ꞌnɛ ńdɔk lɑmɛ́ndɑɑ, ńzɔ́Ꞌ Ndɛ tɛ ɛ́ kuꞋ, ɑ pɛn ńdɔk mɛnuk-tú mɛ́ ńtuk mɛku mɛ́ lɑ́. Mɔ́ɔmɑ́ wɛ Lɑzɑ̂ɑ vu ɡɔɔ pɑ́Ꞌɑ,

³pɑŋɡɛ́ ɛ̂pɑ́ pɛ́pɑ́ túu ńcú mbɔ̌ Yɛ́su ŋɡɔ: «Ndɛ, súu nɛpɛ wu sɛ́ ŋ́ɡɔɔ tɛꞋ.»

⁴Yɛ́su zúꞋ pɔ́Ꞌɔ, ńcú ŋɡɔ: «Yɔ ɡɔɔ kɑ́ pɔ́ yi ɛ́ ɡʉ ńdɔk wɛ́ pɔ́. Pɛ́ ɡʉ ńdɛɛ nǔu ńjʉ́ɔ mɛtʉʉ-Sɛ́, ḿbɛn ńdɛɛ nǔu ŋ́ɡɑ́ mɛkuꞋ mbɔ̌ mɔ́ɔ-Sɛ́.»

⁵Yɛ́su kɑ pɔ́ ŋ́kɔŋ Mɑ́ktɑ, pɔ́p Mɑlíyɑ mbɑ Lɑzɑ̂ɑ.

⁶Ŋ́kɛ́ ńzúꞋ ɡɔɔ pɑ́Ꞌɑ, ḿbɛn ńnɑ́ŋ zʉꞋ yí ɑ m̄bɔ́nɛ zúꞋu lɛ́Ꞌ pɛ́pɑ́.

⁷Ɛ́ ɡɛ pɔ́Ꞌɔ, ɑ cú mbɔ̌ ɡɑŋku pɛ́ ŋɡɔ: «Pɛkŋɛ pɛn nɛ Judɛ̂.»

⁸Gɑŋku pɛ́ pʉ̈ɔt ŋɡɔ: «Cícɑ, ntí kɑ́ sɑk pɑ́Ꞌ pɑyúdɑ kɑ pɔ́ ńdɔɔ nɛlɔk mɛŋɡɔꞋ ńtɛ́m wú ńjẅí pɔ́. Ɔ ɡʉ ḿbɛn ḿbɛn zúꞋu ɔɔ?»

⁹Yɛ́su cú ŋɡɔ: «Tɑ́Ꞌ lɛ́Ꞌlɑ́Ꞌ kɑ́ ɡẅɛɛ nɛm ntsɔ̌ppɑ́ nɛ́ nɛɡɛ́m pɔ́ ɔɔ? Ŋu lɑɑ ńnɛn nɛnɛm, mbɔ ɑ kɛ́ kɔɔtɛ pɔ́, mbíꞋŋɡɔ kyɛꞌ njí sɛ́ ŋ́ɡɛ pɛ́ jʉ́ɔ zʉꞋ.

¹⁰Ŋu lɑɑ ŋ́kɛ́ ḿbɔ́ ńnɛn nɛtúꞋ, mbɔ ɑ ɡʉ kɔɔtɛ, mbíꞋŋɡɔ yúu mi ɛ́ ɡʉ ŋ́kyɛꞋ zʉꞋ ŋ́ɡɑ́ mbɔ̌ wɛ́ kɑ́ pɔ́ ɡú pɔ́.»

¹¹Yɛ́su cú yɔ nu, ḿbɛn ŋɡɔ: Súu wɛkŋɛ Lɑzɑ̂ɑ sɛ ńdɛ́, lɑ́ ŋ ɡʉ ŋ́ɡʉ jʉɔmɛ wɛ́.

¹²Gɑŋku pɛ́ ńcú mbɔ̌ wɛ́ ŋɡɔ: «Ndɛ, ɛ́ lɑɑ ḿbɔ́ yi ɑ lɛ́, mbɔ ɑ ɡʉ ɛ́fíitɛ.»

¹³Ŋ́ɡɔ́ ḿbɔ́ pɔ́Ꞌɔ, Yɛ́su pɔ́ ɛ́sẅíi wɔ́p ŋɡɔ Lɑzɑ̂ɑ pfú. Lɑ́ pɔ́p pɔ́ ŋ́kwɑŋɛ yɔ́p pɔ ŋɡɔ ɑ cú ŋɡɔ ɑ sɛ́ ńdɛ́ lɛ́nɛ.

¹⁴Pɔ́Ꞌɔ lɑ́, Yɛ́su sɑ́ɑnɛ sɑ́ɑnɛ́nɛ, ńcú mbɔ̌ pɔ́p ŋɡɔ: «Lɑzɑ̂ɑ pfú.

¹⁵Ɛ́ pɛn ḿbɔŋ wɑ́ɑ tɛꞋ pɑ́Ꞌ ɑ ɡɔ́ ḿpfú, m bɔɔ sɛ́ pɔ́. Sɛ́ ɡɛnɛ ŋɡɔ ɛ́ pɔ́ pɔ́Ꞌɔ, ntɛ́ wʉ́ʉ, ńjí ŋɡɔ pʉʉ ɡʉ ɛ́fú nǔu, niitɛ ńzɑ́p tʉ́m nǔu mɔ. Lɑ́ pɛkŋɛ ɡʉ ŋkɔ̂ɔnɛ tɛ ŋ́kúu zúꞋu.»

¹⁶Tɔ́mɑ́shi ẅí pɛ́ kɑ pɔ́ ḿbɛn ɛ́fúŋ wɛ́ ŋɡɔ mɔ́ɔnɛfɑ́k, cú mbɔ̌ pɛcɔ́ ɡɑŋku-Yɛ́su ŋɡɔ: «Pʉʉ tɔ́ pɛkŋɛ pɔ́p ɡʉ, ńtɛmtɛ ḿpfú.»

¹⁷Yɛ́su ɡʉ tɛ ŋ́kúu zúꞋu, ńjʉ́ɔ, mbɔ Lɑzɑ̂ɑ nɔɔ tsɛt nɛshi lɛ́Ꞌ pɛ́nɛ́kwɑ.

¹⁸Pɑ́Ꞌ nɛfú Yɛlúsɑlɛm ŋ́ɡʉ Mbɛtɑni kɑ pɔ́ pɔ yúu pɛkílu pɛ́tɑ́t lɑ́,

¹⁹nɛzɑ́ɑ pɑyúdɑ ɡɔ́ ḿbɔ́, mbɔ pɔ́p tɔ́ njɛ́Ꞌ-Mɑ́ktɑ pɔ́p Mɑlíyɑ, nɛzíi ŋki-mík mɔ́p, ntɛ́ mɔ́ɔmɑ́ wɔp ẅí ɑ kɑ pfúnɛ.

²⁰Mɑ́ktɑ pɔ́ tɛ ńzúꞋ ŋɡɔ Yɛ́su sɛ́ ńtɔ́, ŋ́ɡɔ́ɔ ńdɔ sɛ́ ŋ́ɡʉ ńzɑ́Ꞌ wɛ́, Mɑlíyɑ tsʉ́Ꞌ ńnɑ́ŋ pɔ ndɑ́.

²¹Mɑ́ktɑ tɔ́ ńcú mbɔ̌ Yɛ́su ŋɡɔ: «Ndɛ, ɔ kɑ pɔ́ pɛ́Ꞌnɛ ḿbɔ́ zɑꞋnɛ, mbɔ mɔ́ɔmɑ́ mɔ ŋkɑɑ pfú.

²²Lɑ́ tɛ mbɑ ŋkɔ̂ɔnɛ, n jí ŋɡɔ ɔ lɑɑ ḿbíkŋɛ kʉ̈ɔ́ mbɔ̌ Sɛ́ lɑ́, mbɔ ɑ ɡʉ ŋ́ɡɑ́ ɡɑ́nɛ.»

²³Yɛ́su pʉ̈ɔt ŋɡɔ: «Mɔ́ɔmɑ́ wu ɡʉ ŋ́ɡɛ ńzẅíimɛ nǔu nɛvú.»

²⁴Mɑ́ktɑ pʉ̈ɔt ŋɡɔ: «N jí ŋɡɔ ɑ ɡʉ ŋ́ɡɛ ńzẅíimɛ nǔu ndẅiknzʉʉ lɛ́Ꞌlɑ́Ꞌ pɑ́Ꞌ pɛpfú ɡʉ ńdɑ́Ꞌ ḿbɔ́ ńzẅíimɛ.»

²⁵Yɛ́su pʉ̈ɔt mbɔ̌ wɛ́ ŋɡɔ: «Mɔ ŋu ẅí ɑ ɡɛnɛ pɛ́ zẅíimɛ nǔu nɛvú, ḿbɔ́ ŋu ẅí ɑ ɡɛnɛ pɛ́ pɔ́ ɡú. Ŋu lɑɑ ńzɑ́p tʉ́m nǔu mɔ ḿpfú mbɑ pfúnɛ, mbɔ ɑ ɡʉ ŋ́ɡɛ ḿbɔ́ ɡú.

²⁶Ŋu ẅí ɑ pɛ́tnɛ ntʉʉ, ńzɑ́p tʉ́m yɛ́ nǔu mɔ, ɑ kíi ńdɑ́Ꞌ ḿpfú pɔ́. Tɛ ɔ pɛ́m yɔ nu?»

²⁷A cú ŋɡɔ: «Ɔ́ɔŋ mbɑ̌ɑ Tsɑpʉɔ. Mɔ, m bɛ́m ŋɡɔ ɔ Nzɑ́Ꞌŋkʉ ẅi Sɛ́ kɑ kɑꞋnɛ, ḿbɔ́ mɔ́ɔ-Sɛ́ ẅi pɛ́ kɑ pɔ́ ńzẅíꞋlɛ ŋɡɔ ɑ ńtɔ́ ndǔmbí.»

²⁸Mɑ́ktɑ cú pɑ́Ꞌɑ, ŋ́ɡʉ ɛ́fúŋ mɔ́ɔmɑ́ wɛ Mɑlíyɑ, tsɔ́Ꞌnɛ ntsɛm mbɔ̌ wɛ́ ŋɡɔ: «Cícɑ píi ḿbɔ́ ŋɡɔ ɔ tɔ́.»

²⁹Mɑlíyɑ zúꞋ pɔ́Ꞌɔ, ŋ́ɡɔ́ɔ ńdɔ sɛ́ nɛ́ tʉʉ nɛɡʉ ńjʉ́ɔ wɛ́.

³⁰Yɛ́su kɑ pɛ́t pɔ zʉꞋ pɔ́p Mɑ́ktɑ lɑ́Ꞌnɛ ńtʉ́ʉ zúꞋu ɛ́sẅíŋɛ, tɛ mbɔ ɑ kɑ́ tɔ́k tɛ ŋ́kúu tsɛt lɑ́Ꞌ pɔ́.

³¹Pɑyúdɑ pinɛ pɔ́p lɑ́Ꞌnɛ ḿbɔ́ ndɑ́ nɛzíi ŋki-mík Mɑlíyɑ, jʉ́ɔ pɑ́Ꞌ ɑ fúnɛ ndɑ́ ńcẅɛt nɛ́ tʉʉ, ńcʉ́ɔ yɔ́p nzʉʉ wɛ́, ḿbɔ́ ŋ́kwɑŋɛ ŋɡɔ ɑ ɡʉ tú-nɛshi ńnɑ́ŋ zúꞋu lɑ́ ńdɑɑ.

³²Mɑlíyɑ ɡʉ tɛ ŋ́kúu zʉꞋ yí Yɛ́su kɑ pɔ́nɛ zúꞋu, ḿbɔ́ tɛ ńjʉ́ɔ wɛ́, ŋ́kẅíꞋlɛ sɛ́ mbi yɛ́, ńcú ŋɡɔ: «Ndɛ, ɔ kɑ pɔ́ pɛ́Ꞌnɛ ḿbɔ́ zɑꞋnɛ, mbɔ mɔ́ɔmɑ́ mɔ ŋkɑɑ pfú.»

³³Yɛ́su jʉ́ɔ pɑ́Ꞌ ɑ sɛ́ ńdɑɑ, pɑyúdɑ pínɛ pɔ́p pɛ́ pɔ́p tɛmtɛnɛ ńtɔ́ pɛn ḿbɔ́ ńdɑɑ yɔ́p, ńjẅi, mbʉʉ yɛ kẅiꞋ citɛ.

³⁴A cú ŋɡɔ: «Pʉʉ kɑ lẅɛꞋ pfú yɛ́ ɡɔ́?» Pɔ́p pʉ̈ɔt mbɔ̌ wɛ́ ŋɡɔ: «Ndɛ, tɔ́ ńjʉ́ɔ.»

³⁵Yɛ́su lɑɑ.

³⁶Pɑyúdɑ cú ŋɡɔ, pʉʉ jʉ́ɔ pɑ́Ꞌ ɑ kɑ pɔ́ ŋ́kɔŋ wɛ́.

³⁷Pɛcɔ́ ntɑ́Ꞌ pʉɔ tsɛtsɛt pɔ́p pɔ́ ńcú yɔ́p pɔ ŋɡɔ: «Jʉ́ ẅi ɑ kɑ ŋíɛꞋnɛ mík-pɛfʉ, kʉ̈ɔ́ kɑ ɡɛnɛ, ɑ pɔɔ kuꞋ nɛɡɛ wɔ ŋu pɔɔ pfú pɔ́ ɔɔ?»

³⁸Yɛ́su pɛn ńjẅi, ŋ́ɡʉ zʉꞋ-nɛshi, ɛ́ pɔ́ yɛcɔ́ mvuꞋ zʉꞋ, mbɔ pɛ́ kɑ lɔk ŋɡɔꞋ ńjʉ́ɔꞋ ntsu wɛ́.

³⁹Yɛ́su cú ŋɡɔ: «Pʉʉ kẅɛ́Ꞌlɛ ŋɡɔꞋ yɑ́.» Mɑ́ktɑ, fɛ́ pfú, ḿbʉ̈ɔt ŋɡɔ: «Ndɛ, ɑ ɡʉ ḿbɔ́ ŋkɔ̂ɔnɛ ńtsʉ́Ꞌ ńdɛm lɛmnɛ. MbíꞋŋɡɔ ɛ́ ŋkɔ̂ɔnɛ ḿbɔ́ lɛ́Ꞌ pɛ́nɛ́kwɑ pɑ́Ꞌ ɑ kɑ pfúnɛ.

⁴⁰Yɛ́su tsɔ́Ꞌ mbɔ̌ wɛ́ ŋɡɔ: N dɑ́Ꞌ mbɔɔ cú mbɔ̌ ɡu ŋɡɔ ɔ lɑɑ ńzɑ́p tʉ́m nǔu mɔ, mbɔ ɔ ɡʉ ńjʉ́ɔ nɛɡúꞋ-Sɛ́ pɔ́ ɔɔ?»

⁴¹Pɛ́ pɔ́ tɛ kẅɛ́Ꞌlɛ ŋɡɔꞋ, Yɛ́su pʉꞋ tú yɛ́, ńdíŋɛ tʉ́, ńcú ŋɡɔ: «Tɑ̌ɑ mɔ, ŋ ɡɑ́ pɑꞋlɑ́ pɑ́Ꞌ n cɛꞋlɛ́nɛ wú, ɔ zúꞋ.»

⁴²Mɔ sɛ́ ńjí ŋɡɔ, n cú nu ŋkɑ́ kʉ̈ɔ́ lɑ́, ɔ zúꞋ ŋɡi yɑɑ. Lɑ́ n cú pɑ́Ꞌɑ ntɛ́ pɔ pʉɔ pínɛ pɔ́p tʉ́ʉnɛ nɛjɔ́ŋ mɔ lɑɑ, ŋɡɔ pɔ́p pɛ́m ŋɡɔ ɡu kɑ túunɛ wɑ́ɑ.

⁴³Ńcú pɔ́Ꞌɔ, ńdɔk ŋɡi tɛnnɛ ŋɡɔ: «Lɑzɑ̂ɑ, cẅɛt.»

⁴⁴Mpfú cẅɛt. Mbɔ pɛ́ kɑ lɔk yúu-ndẅí ńzʉ́ʉ mɛku mɛ́ mbɑ mbɔ́ mɛ́, pɔ́p shʉ́ wɛ́. Yɛ́su cú mbɔ̌ pɔ́p ŋɡɔ: «Pʉʉ kíɛꞋ wɛ́, ŋ́kíɛꞋ wɛ́ ńnɑ́ ɑ ɡʉ.»

⁴⁵Nɛzɑ́ɑ pɑyúdɑ pí pɔ́p lɑ́Ꞌnɛ ńtɔ́ njɛ́Ꞌ pɛ́ Mɑlíyɑ, pínɛ pɔ́p jʉ́ɔnɛ yúu mi Yɛ́su ɡɛnɛ, zɑ́p tʉ́m yɔ́p nǔu Yɛ́su.

⁴⁶Lɑ́ pɛcɔ́ ntɑ́Ꞌ pʉɔ tsɛtsɛt pɔ́p ɡʉ ḿbɛ́ɛtɛ yúu mi Yɛ́su ɡɛnɛ, ɛ́sẅíi pɑfɑlísɑy.

⁴⁷Pɛtɑ́tndɑ́-pɑnɔŋpɔꞋ, pɔ́p pɑfɑlísɑy ɡɔ́ɔ ɛ́fúŋ cúꞋlɛ-pɑsɑ́Ꞌ ŋɡɔŋ, ńtɔ́ tsɛtú ńcú ŋɡɔ: «Pɛkŋɛ ɡʉ ŋ́ɡɛ ŋɡɔ́ku? Ŋu wɔ sɛ́ ŋ́ɡɛ mɛnu mɑ̌ɑmɑɑnɛ tɛꞋ.

⁴⁸Pɛkŋɛ lɑɑ ńnɑ́ wɛ́ ɑ lɔk ŋ́ɡʉ mbi, mbɔ pʉɔtsʉʉ ɡʉ ńzɑ́p tʉ́m nǔu wɛ́. Pɑlɔ́mɑ tɔ́, ńtɑ́k ndɑ́-nɔŋpɔꞋ Yɛlúsɑlɛm, mbɑ ŋɡɔŋ wɛkŋɛ.»

⁴⁹Wɛcɔ́ tɑ́Ꞌ ŋu kɑ pɔ́ tsɛtsɛt pɔ́p, lík yɛ́ pɔ́ Kɑyífɑ. A pɔ́ tɑ́tndɑ́-pɑnɔŋpɔꞋ nǔu yîyɑ́ ŋɡuꞋ. A cú ŋɡɔ: «Pʉk yɛcɔ́ yúu nǔu nu yí pʉʉ cúnɛ lɑɑ kɑ́ zúꞋ!

⁵⁰Pʉʉ kɑ́ jʉ́ɔ ŋɡɔ ɛ́ pɔŋ mbɔ̌ pʉʉ pɑ́Ꞌ ɛ́ lɑɑ ḿbɔ́ tɑ́Ꞌ ŋu wɛ́mɔ́Ꞌ pfú nǔu tú-lɑ́Ꞌ, ńtsɑ lɑ́Ꞌ tsʉʉ nɛpuu tɑ́kŋɛ pɔ́ kɛ?»

⁵¹A kɑ pɔ́ ńcú pɔ́Ꞌɔ, jʉ́ pɔɔnɛ ńcú pɔ́, pɑ́Ꞌ ɛ́ kɑ ɡɔ́ ḿbɔ́ jʉ́ pɔ́nɛ tɑ́tndɑ́-pɑnɔŋpɔꞋ nǔu yîyɑ́ ŋɡuꞋ lɑ́, ɑ cẅi Ŋkʉʉ-Sɛ́ ŋɡɔ Yɛ́su ɡʉ mpfú nǔu tú-lɑ́Ꞌ-pɑyúdɑ.

⁵²Ɛ́ pɔɔ pɔ́ pɔ ndɑꞋ nǔu tú-pɑyúdɑ zɛ́nɛ pɔ́p pɔ́, ɛ́ pɛn ḿbɔ́ nɛlɔk ńtɛmtɛ pʉɔ-Sɛ́ pi pɔ́p zʉꞋ tsʉʉ, pɔ́p tsʉ́Ꞌ tɑ́Ꞌ ku.

⁵³Ɛ́ fú lɛ́Ꞌ ɛ̂yɑ́, pɛkɛ́m-pɑyúdɑ zɑ́p ŋɡɔ pɔ́p ɡʉ ńdɔɔ shʉ́ tɛ ńjẅí Yɛ́su.

⁵⁴Yɛ́su fú ŋkɑ́ yîyɑ́ mbɔɔ pɛn sɑ́ɑnɛ sɑ́ɑnɛ́nɛ ńdɛɛ tsɛtsɛt pɑyúdɑ pɔ́. A lɔk yɛcɔ́ lɑ́Ꞌ yi ɛ́ lʉɔmɛ́nɛ, shʉ́ kɔ̂ŋtɛt, ŋ́ɡʉ tsɛt yɛcɔ́ tʉ́sɔŋ yi pɛ́ fúŋnɛ ŋɡɔ Ɛ́fɛlɑyim, pɔ́p ɡɑŋku pɛ́ nɑ́ŋ zúꞋu.

⁵⁵Ndíinɑ-Pɑ́skɑ-pɑyúdɑ kɑ pɔ́ ńtɔ́, nɛzɑ́ɑ pɑyúdɑ pɔ́ ɛ́fú tsɛt lɑ́Ꞌ ńzɑ́Ꞌ njí ḿbiitɛ Yɛlúsɑlɛm, nɛpʉʉtɛ mbʉʉ yɔp[11].

⁵⁶Pɔ́p pɔ́ ńdɔɔ Yɛ́su, ḿbɛn ŋ́ɡɔ ńcúꞋlɛ tsɛt ndɑ́-nɔŋpɔꞋ Yɛlúsɑlɛm, ḿbɔ́ ɛ́shɔtnɛ ḿbíkŋɛ tsɛtsɛt pɔ́p ŋɡɔ: «Pʉʉ kwɑŋɛ ŋɡɔ ɑ ɡʉ ńtɔ́ ndínɑ wɔ? Mbɔ ɑ zɛɛ ḿbɔɔ tɔ́.»

⁵⁷Ɛ́ kɑ ɡɔ́ ḿbɔ́, mbɔ pɛtɑ́tndɑ́-pɑnɔŋpɔꞋ, pɔ́p pɑfɑlísɑy kɑ cú ŋɡɔ, ŋu lɑɑ ḿbɔ́ ńjí zʉꞋ yí Yɛ́su zúꞋu, ɑ kíɛꞋ, pɛ́ ɡʉ ŋ́ɡẅɛɛ wɛ́.