Read Ngomba Jɑ̂ŋ 13 Bible Online

Jɑ̂ŋ 13 - Ngomba bible

Jɑ̂ŋ 13

¹Ɛ́ kɑ tsʉꞋ pɔ pɑ́Ꞌ njí ɡʉ kiɛ pɛ́ jʉ́ ndínɑ-Pɑ́skɑ, Yɛ́su pɔ́ ńjí ŋɡɔ yîyɑ́ ŋkɑ́ kuꞋ pɑ́Ꞌ ɑ ɡʉ ɛ́fú ndǔ yɔ mbí ŋ́ɡʉ ŋ́kẅɛ́ɛtɛ Tɑ́t wɛ. Pɑ́Ꞌ jʉ́ Yɛ́su kɑ pɔ́ ŋ́kɔŋ pʉɔ pí pɔ́p ndǔmbí ḿbɔ́ pɛ́ lɑ́, ɑ kẅiꞋ ŋ́kɔŋ wɔ́p tɛ ḿmɛkŋɛ.

²Ntsuŋkẅɛ́Ꞌ ɡɛ ḿbɔ́, pɔ́p pɛ́ pɔ́p nɑ́ŋ sɛ́ nɛjʉ́ yúu. Ɛ́ ɡɔ́ ḿbɔ́, mbɔ Sɑ́ttɑ lɑ́Ꞌ mɔ ńníꞋ kwɑŋɛ nɛfɛn Yɛ́su tsɛt tʉ́m Júdɑs Iskɑlyɔt, mɔ́ɔ-Símɔ.

³Yɛ́su pɔ́ ńjí ŋɡɔ Tɑ́t wɛ kɑ níꞋ mɛtʉʉ nɛlɔk ŋ́ɡɛ yúu tsʉʉ mbɔ̌ wɛ́, ḿbɛn ḿbɔ́ ńjí ŋɡɔ ɑ kɑ fú mbɔ̌ Sɛ́, ɑ pɛn ḿbɔ́ ŋ́ɡʉ nɛ́ nɛjɔ́ŋ Sɛ́.

⁴Ńnɑ́ŋ tɛ ńdɔ sɛ́, ɛ́sɔt ndẅí-fɑ́k yɛ́, ńnɔŋ sɛ́, ḿbɛ́ɛ tɑ́wɛtɛ ńzʉ́ʉ lúꞋ yɛ́.

⁵Ŋ́ɡɛ pɔ́Ꞌɔ, ńníꞋ ŋki tsɛt kɑ́ŋ, ńzɛ nɛlɔk ɛ́suk mɛku ɡɑŋku pɛ́, ńdɔk tɑ́wɛtɛ ẅí ɑ kɑ zʉ́ʉnɛ lúꞋ yɛ́ ńtuk.

⁶Ŋ́ɡʉ tɛ ŋ́kúu nǔu Símɔ̂ŋ Pyɛ̂, ɑ cú mbɔ̌ wɛ́ ŋɡɔ: «Ndɛ ɡʉnɛ ɛ́suk mɛku mɑ́ɑ!»

⁷Yɛ́su tsɔ́Ꞌ mbɔ̌ wɛ́ ŋɡɔ: «Yúu mi mɔ sɛ́ ŋ́ɡɛ, ɛ́ lɑɑ ḿbɔ́ ɔ pɔɔ zúꞋ ŋkɔ̂ɔnɛ pɔ́. Lɑ́ ŋ́kɛ́ ŋ́ɡʉ ńzúꞋ.»

⁸Pyɛ̂ cú mbɔ̌ wɛ́ ŋɡɔ: «Zɑŋ yɑ́ɑ, ɛ́ lɑɑ ḿbɔ́ ɔ pɔɔ mɛku mɑ́ɑ ɛ́suk.» Yɛ́su tsɔ́Ꞌ mbɔ̌ wɛ́ ŋɡɔ: «N dɑɑ mbɔɔ ɛ́suk, mbɔ pûu kɛ́ pɛn ḿbɔ́ nǔu yɛcɔ́ nu pɔ́.»

⁹Símɔ̂ŋ Pyɛ̂ cú mbɔ̌ wɛ́ ŋɡɔ: «Ɛ́ lɑɑ ḿbɔ́ pɔ́Ꞌɔ, mbɑ̌ɑ Ndɛ, kɔɔ suk pɔ ndɑꞋ mɛku mɑ́ɑ, ɔ tɛmtɛ ɛ́suk mbɔ́ mɑ́ɑ pɔ́p tú yɑ́ɑ.»

¹⁰Yɛ́su cú mbɔ̌ wɛ́ ŋɡɔ: «Ɛ́ kɑ́ pɔ́ ḿbíkŋɛ ŋɡɔ pɛ́ pɛn ɛ́suk mbʉʉ ŋu ẅí ɑ suk mɔ pɔ́, (ńdíꞋ ndɑꞋ mɛku mɛ́). MbíꞋŋɡɔ ŋɡɑŋ ńdɛ́ɛnɛ mɔ́. Pʉʉ pɑ́Ꞌɑ, mbɔ mbʉʉ yʉʉ lɛɛnɛ[16], lɑ́ ɛ́ kɑ́ pɔ́ yʉʉ pɛtsʉʉ pɔ́.»

¹¹Ńcú pɔ́Ꞌɔ, mbíꞋŋɡɔ ɑ kɑ pɔ́ ńjí ŋu ẅí ɑ ɡʉ ŋ́ɡɛ ɛ́fɛn wɛ́ lɑ́ ńcú ŋɡɔ mbʉʉ yʉʉ pɛtsʉʉ kɑ́ lɛɛnɛ.

¹²Yɛ́su suk mɛku mɔ́p tɛ ḿbɔ́tnɛ ńnɑ́ŋ, ḿmɑꞋ ndẅí yɛ́, ḿbɛn ńnɑ́ŋ sɛ́ nɛjʉ́ yúu, ńcú mbɔ̌ pɔ́p ŋɡɔ tɛ pʉʉ zúꞋ yúu mi ɛ fúnɛ nɛɡɛ nǔu pʉʉ?

¹³Pʉʉ fúŋnɛ wɑ́ɑ ŋɡɔ Cícɑ, ɛ́fúŋ wɑ́ɑ ŋɡɔ Tsɑpʉɔ, ńcú sẅíinu mbíꞋŋɡɔ mɔ jʉ́.

¹⁴Ɛ́ lɑɑ ḿbɔ́ yi kwɑꞋ mɔ Tsɑpʉɔ, ḿbɔ́ Cícɑ, ɛ suk mɛku mʉ́ʉ, mbɔ ɛ́ píkŋɛ ŋɡɔ pʉʉ yʉ́ʉ, pʉʉ pɔ́ ɛ́suk mɛku mʉ́ʉ pʉʉ nɛ́ pʉʉ.

¹⁵Mbíꞌŋɡɔ, n nyɛt wʉ́ʉ nɛ́ fʉꞋ nɛpɔ́ yi pʉʉ yʉ́ʉ pʉʉ ɡʉ ŋ́ɡɛ pɑ́Ꞌ pʉʉ jʉ́ɔnɛ ŋ ɡɛ lɑɑ.

¹⁶Lɑ́ ɛ sẅíi wʉ́ʉ, kwɑꞋ nɛ́nẅín, nzíꞋfɑꞋ kɑ́ ɡúꞋ ńdɛɛ tɑ́fɑꞋ wɛ pɔ́, ŋɡɑŋntúu kɛ́ mbɔɔ ɡúꞋ ńdɛɛ ŋu ẅí ɑ lɑ́Ꞌnɛ ńtúu wɛ́ pɔ́.

¹⁷Pɑ́Ꞌ pʉʉ sɛ́ ńjí ŋkɔ̂ɔnɛ lɑ́, pʉʉ lɑɑ ŋ́ɡɛ pɔ́Ꞌɔ, mbɔ pʉʉ pɛpɔ́ttú.

¹⁸Ŋ kɑ́ kɛ́ ńcú yɔ nu mbɔ̌ pʉʉ pɛtsʉʉ pɔ́, mɔ sɛ́ ńjí pʉɔ pí ŋ kɑ tsɔ́Ꞌnɛ wɔ́p. Lɑ́ ɛ́ pɔŋ ŋɡɔ yúu mi pɛ́ kɑ ŋwɑꞋnɛ́nɛ tsɛt ŋwɑꞋnɛ-ndɛn kɑɑ puutɛ. Pɛ́ kɑ ŋwɑꞋnɛ ŋɡɔ ŋu ẅí pɛkŋɛ sɛ́ ńtɛmtɛ yúu pɛjʉ́ ńjʉ́ kɑ tsʉ́Ꞌnɛ ŋɡɑŋmbuu wɑɑ.

¹⁹N zɑ́Ꞌ njí ɛ́sẅíi wʉ́ʉ ŋkɔ̂ɔnɛ lɑ mɔ mɛnu ɡɛ ńtɔ́, pʉʉ lɔk pɔ́Ꞌɔ ḿbɛ́m ŋɡɔ mɔ ɡú.

²⁰Lɑ́ ɛ sẅíi wʉ́ʉ, kwɑꞋ nɛ́nẅín, ŋu lɑɑ ŋ́kúkŋɛ ŋu ẅí n túunɛ wɛ́, mbɔ ɑ kúkŋɛ pɔ wɑ́ɑ. Ŋu ẅí ɑ pɛnnɛ ŋ́kúkŋɛ wɑ́ɑ, ɑ kúkŋɛ pɔ ŋu ẅí ɑ túunɛ wɑ́ɑ.

²¹Yɛ́su cú pɔ́Ꞌɔ, lɛ́m yɛ́ sɑ́ɑnɛ tɛꞋ, ɑ sɑ́ɑnɛ sɑ́ɑnɛ́nɛ ńcú ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, wɛcɔ́ tɑ́Ꞌ ŋu nǔu pʉʉ ɡʉ ɛ́fɛn wɑ́ɑ.»

²²Gɑŋku-Yɛ́su zúꞋ, mbɑ wɔ̌ lɑ́ shɔtnɛ ńdíŋɛ mɔ́ɔmɑ́ wɛ, pɔ́p pɔɔ jí ŋu ẅí ɑ lɑ́Ꞌ jʉ́ pɔ́.

²³Wɛcɔ́ tɑ́Ꞌ nǔu ɡɑŋku Yɛ́su ẅi ɑ kɑ pɔ́ ŋ́kɔŋ wɛ́ tɛꞋ, pɔ́ nɛjɔ́ŋ yɛ́ ḿbɔ́ ńjʉ́ yúu.

²⁴Símɔ̂ŋ Pyɛ̂ nɔꞋ mík ńdɔk ńcú ŋɡɔ: «Ɛ́ píkŋɛ ŋɡɔ ɑ cú ŋɡɑŋ.»

²⁵Ẅîwɑ́ ŋɡɑŋku lɛmtɛ nɛtúutɛ-Yɛ́su, ḿbíkŋɛ wɛ́ ŋɡɔ: «Tsɑpʉɔ, ŋɡɑŋ wɔ̌?»

²⁶Yɛ́su tsɔ́Ꞌ ŋɡɔ: «A ŋu ẅí ŋ ɡʉ ńcʉ̈ɔꞋ mbʉ̈ɔꞋ-yúu pɛjʉ́, ŋ́ɡɑ́ mbɔ̌ wɛ́.» Ńcú pɔ́Ꞌɔ, ḿbɛ́ɛ mbʉ̈ɔꞋ-yúu, ńcʉ̈ɔꞋ. Ŋ́ɡɑ́ mbɔ̌ Jẅidɑ Iskɑlyɔt, mɔ́ɔ-Símɔ.

²⁷Jẅidɑ pɔ́ tɛ ńcẅɛ́ɛ, Sɑ́ttɑ kúu tsɛt tʉ́m yɛ́. Yɛ́su ɡɔ́ɔ ŋ́kɛ́ ńcú mbɔ̌ wɛ́ ŋɡɔ: «ɛ́fɛ́Ꞌnɛ ŋ́ɡwɛtnɛ ŋ́ɡɛ yúu mi ɔ ɡẅɛɛnɛ nɛɡɛ.»

²⁸Sɑ̌ɑ ŋu nǔu pʉɔ pí pɔ́p pɛ́pɔ́p ḿbɔ́nɛ ńjʉ́ yúu, pɔɔ zúꞋ nu yí Yɛ́su lɔɔnɛ nɛcú pɔ́.

²⁹Pɛcɔ́ pʉɔ pɔ́ ŋ́kwɑŋɛ ŋɡɔ ɑ cú ŋɡɔ Jẅidɑ ɡʉ ńzúu yɔ́p pɛ́ pɔ́p yúu-ndínɑ, Kɛ pɔ ŋɡɔ ɑ ɡɑ́ yúu mbɔ̌ pɛpúŋ ɔɔ, mbíꞋŋɡɔ jʉ́ m̄bɔ́nɛ ŋ́ɡẅɛɛ mɔ́ɔpɑɑ-ŋkɑ́p wɔp pɛ́pɔ́p.

³⁰Jẅidɑ cẅɛ́ɛ mbʉ̈ɔ́Ꞌ-yúujʉ́ pɔ́Ꞌɔ, ŋ́ɡɔ́ɔ ɛ́fú ndɑ́ ńcẅɛt. Mbɔ túꞋ lɑ́Ꞌ sʉ́ʉ.

³¹Jẅidɑ pɔ́ tɛ ɛ́fú ndɑ́ ńcẅɛt, Yɛ́su cú ŋɡɔ: «Ɛ́ ŋkɔ̂ɔnɛ pɑ́Ꞌnɛ, pɛ́ ɡɑ́ nɛɡúꞋ mbɔ̌ Mɔ́ɔ-Ŋu. Mɔ́ɔ-Ŋu kɑ ɡɑ́ nɛɡúꞋ mbɔ̌ Sɛ́.

³²(Pɑ́Ꞌ Mɔ́ɔ-Ŋu kɑ ɡɑ́ nɛɡúꞋ mbɔ̌ Sɛ́ lɑ́), Sɛ́ nɛ túmbʉʉ yɛ́ ɡʉ ŋ́ɡɛ ŋ́ɡɑ́ nɛɡúꞋ mbɔ̌ wɛ́, lɑ́ ɛ́ tsʉꞋ pɔ mɔ́zʉꞋ ɑ ɡɑ́.»

³³Mbɔ́ŋkʉ̈ɔ́ pɑ́ɑ, pɛkŋɛ kɛ́ pɛn ńnɑ́ŋ tɛ ntí sɑk pɔ́. Pʉʉ ɡʉ ŋ́ɡɛ ḿbɔ́ kɑ́t ńdɔɔ wɑ́ɑ pɑ́Ꞌ ŋ kɑ cúnɛ mbɔ̌ Pɑyúdɑ ŋɡɔ: «ZʉꞋ yí ŋ ɡʉnɛ nɛ́ zúꞋu, pʉʉ kɛ́ kuꞋ nɛtɔ́ zúꞋu pɔ́. Mɔ ḿbɛn ńcú yîyɑ́ nu mbɔ̌ pʉʉ ŋkɔ̂ɔnɛ.»

³⁴Ŋ ɡʉ ŋ́ɡɑ́ nɛpʉ́ʉ nɛ fí mbɔ̌ pʉʉ, ɛ́ pɔ́ ŋɡɔ: «Pʉʉ kɔŋɛ pʉʉ nɛ́ pʉʉ. Pɑ́Ꞌ ŋ kɑ kɔŋnɛ wʉ́ʉ lɑ́, pʉʉ yʉ́ʉ kɔŋɛ pʉʉ nɛ́ pʉʉ.

³⁵Pʉʉ lɑɑ ŋ́kɔŋɛ pʉʉ nɛ́ pʉʉ, mbɔ pʉɔ tsʉʉ ɡʉ ńjí ŋɡɔ pʉʉ ɡɑŋku pɑ́ɑ.»

³⁶Símɔ̂ŋ Pyɛ̂ píkŋɛ wɛ́ ŋɡɔ: «Tsɑpʉɔ, ɔ ɡʉ pɔ nɛ́ ɡɔ́.» Yɛ́su tsɔ́Ꞌ mbɔ̌ wɛ́ ŋɡɔ: «ZʉꞋ yí ŋ ɡʉnɛ nɛ́ zúꞋu, ɔ kɑ́ kuꞋ nɛcʉ́ɔ nzʉʉ mɔ ŋkɔ̂ɔnɛ pɔ́. Ɔ ɡʉ ńtɑ́ɑ lɑ ńcʉ́ɔ nzʉʉ mɔ.»

³⁷Pyɛ̂ cú mbɔ̌ Yɛ́su ŋɡɔ: «Tsɑpʉɔ, kʉ̈ɔ́ ɡʉ ŋ́ɡɛ lɑ m bɔɔ ɡɔ́ɔ ńcʉ́ɔ nzʉʉ wú pɔ́ ɔɔ? Ŋ ɡʉ ŋ́ɡɑ́ tú yɑ́ɑ ntɛ́ wú.»

³⁸Yɛ́su tsɔ́Ꞌ ŋɡɔ: «Ɔ cú ŋɡɔ ɔ ɡʉ ŋ́ɡɑ́ tú yú ntɛ́ wɑ́ɑ? Lɑ́ mɔ ɛ́sẅíi wú, kwɑꞋ nɛ́nẅín, mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ́ ńtɔ́ŋ lɔ́Ꞌnɛ, mbɔ ɔ muŋɛ wɑ́ɑ ŋkɑ́ yɛ́tɑ́t.»