Read Ngomba Jɑ̂ŋ 17 Bible Online

Jɑ̂ŋ 17 - Ngomba bible

Jɑ̂ŋ 17

¹Yɛ́su kɑ cú yɔ nu tɛ ḿbɔ́tnɛ ńnɑ́ŋ, ḿbʉꞋ tú yɛ́, ńdíŋɛ tʉ́, ńcú ŋɡɔ: «Tɑ̌ɑ mɔ, ŋkɑ́ kuꞋ, ɡɛ pɛ́ jʉ́ɔ nɛɡúꞋ Mɔ́ɔ nu, Mɔ́ɔ nu ɡʉ ŋ́ɡɛ yɛ́, pɛ́ jʉ́ɔ nɛɡúꞋ wu.

²Ɔ kɑ ɡɑ́ mɛtʉʉ mbɔ̌ wɛ́ nɛlɔk ńdíŋɛ pʉɔmɛsɔŋ, ńjí ŋɡɔ ɑ ɡʉ ŋ́ɡɑ́ luk kɛ́ mɛ, mbɔ̌ pʉɔ tsʉʉ pí ɔ kɑ ɡɑ́nɛ mbɔ̌ wɛ́.»

³Luk kɛ́ mɛ ɛ̂yɑ́, ɛ́ pɔ́ pɑ́Ꞌ pɔ́p ɡʉ ńjí wú, ɡu ẅí ɔ kwɑꞋ ndɑꞋ Sɛ́ wɛ nɛ́nẅín zɛ́nɛ ɡu, ḿbɛn ńjí ŋu ẅí ɔ kɑ túunɛ wɛ́, ɑ pɔ́ Yɛ́su Kɛlístɔ.

⁴Ŋ kɑ ɡɛ pɛ́ jʉ́ɔ nɛɡúꞋ wu ndǔ tsɛ́tsɑ́Ꞌ. M mɛk fɑꞋ yí ɔ kɑ ɡɑ́nɛ mbɔ̌ mɔ.

⁵Ɛ́ nǔu ŋkɔ̂ɔnɛ mbɑ̌ɑ Tɑ̌ɑ mɔ, m bɔ́ ńdɔ́ɔ ŋɡɔ ɔ pɛn ŋ́ɡɑ́ wɑɑ nɛɡúꞋ ẅi ŋ kɑ ɡẅɛɛnɛ nɛjɔ́ŋ ɡu, ɛ́ nɛɡúꞋ ẅi ŋ kɑ ɡẅɛɛnɛ nɛjɔ́ŋ ɡu, tɛ yɔ njí pɛ́t kɛ́ pɔ́ ɡú.

⁶Ɔ kɑ fú ndǔmbí, ɛ́fyɑk pʉɔmɛsɔŋ, ŋ́ɡɑ́ mbɔ̌ mɔ, ŋ kɑ zíꞋ wɔ́p nɛjí ŋu ẅí ɔ jʉ́. Pɔ́p kɑ pɔ́ pʉɔ pú, ɔ pɛn ŋ́ɡɑ́ wɔ́p mbɔ̌ mɔ. Pɔ́p kɑ kɛ́ ńzúꞋ sẅiŋɛ yú, ŋ́ɡẅɛɛ.

⁷Pɔ́p ŋkɔ̂ɔnɛ ḿbɔ́ ńjí ŋɡɔ, kʉ̈ɔ́ lɑ́ yi ɔ kɑ ɡɑ́nɛ mbɔ̌ mɔ lɑ́, fú mbɔ̌ ɡu.

⁸Ŋ kɑ kɛ́ ńcú mɛnu tsʉʉ mí ɔ kɑ níꞋnɛ mbɔ̌ mɔ mbɔ̌ pɔ́p, pɔ́p pɛ́m, ńtsuŋ ńjí ŋɡɔ ɛ fú nɛjɔ́ŋ ɡu, ḿbɛn ńjí ŋɡɔ ɡu kɑ túunɛ wɑ́ɑ.

⁹Mɔ pɑ́Ꞌnɛ ḿbúꞋ mbɔ́ mbɔ̌ ɡu nǔu tú yɔ́p, m búꞋ mbɔ́ mbɔ̌ ɡu pɔ nǔu tú-pʉɔ pí ɔ kɑ ɡɑ́nɛ mbɔ̌ mɔ, pɔ́p kwɑꞋ pʉɔ pú. Ŋ kɑ́ pɔ́ ḿbúꞋ mbɔ́ mbɔ̌ ɡu nǔu tú-pʉɔ-ndǔmbí pɔ́.

¹⁰Mbɑ kʉ̈ɔ́ lɑ́ yi ɛ́ mbɔ̌ mɔ ɛ́ yú. Ndʉ́ŋndʉŋ pɑ́Ꞌ Mbɑ kʉ̈ɔ́ lɑ́ yi ɛ́ mbɔ̌ ɡu ɛ́ yɑ́ɑ. Pɔ́p pɔ sɛ́ nɛ́ ŋ́ɡɛ pɛ́ jʉ́ɔ wɑɑ nɛɡúꞋ.

¹¹Ɛ́ nǔu ŋkɔ̂ɔnɛ, ɛ́ tsʉ́Ꞌ mɔ́zʉꞋ, m bɔɔ pɛn ḿbɔ́ ndǔmbí pɔ́, mbíꞋŋɡɔ ŋ ɡʉ ḿbɛn nɛ́ nɛjɔ́ŋ ɡu. Lɑ́ ŋ́ɡʉ nǔu pɔ́p, mbɔ pɔ́p kɛ́ ḿbɛ́t ḿbɔ́ pɔ ndǔmbí. Tɑ̌ɑ mɔ ɑ ndɑꞋ ɡu ḿbɔ́ Sɛ́-mɛkuꞋ, lɔk mɛtʉʉ mú, mɛtʉʉ mí ɔ kɑ ɡɑ́nɛ mbɔ̌ mɔ lɑ́, ḿbyɛ́p wɔ́p, ńjí ŋɡɔ pɔ́p ɡʉ ḿbɔ́ tɑ́Ꞌ ŋu, ndʉ́ŋndʉŋ pɑ́Ꞌ pûu tɑ́Ꞌ ŋu lɑ́.

¹²Ɛ́ m̄bɔ́ ŋkɑ́ yi pɛk pɛ́ pɔ́p kɑ pɔ́nɛ, m bɔ́ ńdɔk mɛtʉʉ mú, mɛtʉʉ mí ɔ kɑ ɡɑ́nɛ mbɔ̌ mɔ lɑ́, ḿbyɛ́p wɔ́p. Ŋ kɑ tʉ̈ɔ́Ꞌlɛ wɔ́p tɛ wɛcɔ́ tɑ́Ꞌ ŋu nǔu pɔ́p pɔɔ pɛ́. Ŋu ẅí ɛ́ kɑ pɔ́ ḿbíkŋɛ ŋɡɔ ɑ pɛ́ kɑ pɛ́nɛ. Ɛ́ lɔk ḿbuutɛ nǔu nu yí pɛ́ kɑ ŋwɑꞋnɛ́nɛ tsɛt ŋwɑꞋnɛ-ndɛn kɑɑ.

¹³Ɛ́ nǔu ŋkɔ̂ɔnɛ mɔ sɛ́ ńtɔ́ nɛ́ nɛjɔ́ŋ ɡu. Lɑ́ ŋ kɛ́ ńtʉ́ʉ ndǔmbí ńcú yɔ sẅiŋɛ nɛpɔ́ yi pɔ́p ɡʉ ŋ́ɡẅɛɛ yɔ tsɑ́ɑtɛ tʉ́m pɔ́p, kwɑꞋ tsɑ́ɑtɛ.

¹⁴Ŋ kɑ cú nu yú mbɔ̌ pɔ́p, pʉɔ-ndǔmbí pɑɑ wɔ́p mbíꞋŋɡɔ pɔ́p zɛɛ ḿbɔɔ pʉɔ-ndǔmbí pɔ́ pɑ́Ꞌ mbɑ mɔ yɑ́ɑ ŋ kɑ́ pɔ́ ŋu-ndǔmbí pɔ́.

¹⁵Ŋ kɑ́ pɔ́ ḿbúꞋ mbɔ́ mbɔ̌ ɡu ŋɡɔ ɔ fú ndǔmbí ńcẅɛɛtɛ wɔ́p pɔ́, m búꞋ mbɔ́ mbɔ̌ ɡu pɔ ŋɡɔ ɔ pɑ́ɑ wɔ́p nǔu Sɑ́ttɑ ŋɡɛnu kɛpɔŋ.

¹⁶Pɔ́p kɑ́ pɔ́ pʉɔ-ndǔmbí pɔ́, ndʉ́ŋndʉŋ pɑ́Ꞌ mɔ yɑ́ɑ ŋ kɑ́ pɔ́ ŋu ndǔmbí pɔ́.

¹⁷Lɔk nu nɛ́nẅín yú ŋ́ɡɛ pɔ́p tsʉꞋ pʉɔ pú tɛ ɛ́sẅíi nu. Sẅiŋɛ yú ɛ́ nɛ́nẅín.

¹⁸Pɑ́Ꞌ ɔ kɑ túunɛ wɑ́ɑ ndǔmbí lɑ́, mbɑ mɔ yɑ́ɑ n túu wɔ́p ndǔmbí ɡúu.

¹⁹Ŋ́ɡʉ nǔu mɔ, ŋ ɡɑ́ mbʉʉ yɑɑ mbɔ̌ ɡu ntɛ́ wɔ́p, ńjí ŋɡɔ pɔ́p ɡʉ ɛ́fú nǔu nu nɛ́nẅín, ńtsʉ́Ꞌ pʉɔ pú tɛ ɛ́sẅíi nu.

²⁰Ŋ kɑ́ púꞋ mbɔ́ mbɔ̌ ɡu pɔ ndɑꞋ nǔu tú yɔ́p pɔ́, m búꞋ mbɔ́ mbɔ̌ ɡu mbɑ nǔu tú-pʉɔ pí pɔ́p ɡʉ ŋ́ɡɛ ńdɛɛ nǔu sẅiŋɛ yɔ́p, ńzɑ́p tʉ́m nǔu mɔ.

²¹M búꞋ mbɔ́ mbɔ̌ ɡu ŋɡɔ ɔ ɡɛ pɔ́p tsʉʉ pɔ́ tɑ́Ꞌ ŋu, pɑ́Ꞌ ɡu Tɑ̌ɑ mɔ ɔ tɛmtɛ nǔu mɔ, n tɛmtɛ nǔu ɡu. Sɛ́sẅíi, ɡɛ pɛk pɛ́ pɔ́p pɔ́ tɑ́Ꞌ. Ɛ́ lɛɛ pɔ́Ꞌɔ, pʉɔ-ndǔmbí pɛ́m ŋɡɔ ɔ kɑ túunɛ wɑ́ɑ.

²²NɛɡúꞋ ẅi ɔ kɑ ɡɑ́nɛ mbɔ̌ mɔ lɑ́, ɛ́ ẅîwɑ́ ẅi ŋ kɑ ɡɑ́nɛ mbɔ̌ pɔ́p, pɔ́p ɡʉ tɛmtɛ ḿbɔ́ tɑ́Ꞌ pɑ́Ꞌ pûu tɛmtɛnɛ lɑ́.

²³M bɔ́ nɛ́ pɔ́p, ɔ pɔ́ nɛ́ mɔ. Pɔ́p ɡẅɛɛ tɑ́Ꞌ ntsu. Pʉɔ ndǔmbí ɡɔ́ɔ ŋ́kɛ́ ńjí ŋɡɔ ɔ kɑ túu wɑ́ɑ, ḿbɛn ńjí ŋɡɔ ɔ kɔŋ pʉɔ pɔ pɑ́Ꞌ ɔ kɔŋnɛ wɑ́ɑ.

²⁴Tɑ̌ɑ mɔ, ɔ kɑ ɡɑ́ wɔ́p mbɔ̌ mɔ. M bɛn ḿbɔ́ ŋ́kɔŋ ŋɡɔ pɔ́p pɔ́ zʉꞋ yí ŋ ɡʉnɛ nɛ́ zúꞋu, ńjʉ́ɔ wɑɑ nɛɡúꞋ, nɛɡúꞋ ẅi ɔ kɑ ɡɑ́nɛ mbɔ̌ mɔ, mbíꞋŋɡɔ ɔ kɑ kɔŋ wɑ́ɑ tɛ ńzɛɛ ḿbɛ́t pɔ kɛ́ niitɛ mbí.

²⁵Tɑ̌ɑ mɔ, ɔ ŋu ndʉ́ŋndʉŋ, pʉɔ ndǔmbí ŋkɑɑ wú jí, lɑ́ ŋ kɛ́ ḿbɔ́ ńjí wú, pɔ pʉɔ kɛ́ ńjí ŋɡɔ ɡu kɑ túunɛ wɑ́ɑ.

²⁶Ŋ kɑ zíꞋ wɔ́p nɛjí ŋu ẅí ɔ jʉ́, mɔ ŋ́kɛ́ ḿbɔ́ ŋ́ɡɛ pɔ́p pɔ́ ńjí wú jínɛ, ŋ́kɔŋɛ pɔ́p nɛ́ pɔ́p pɑ́Ꞌ ɔ kɔŋnɛ wɑ́ɑ, m bɛn ḿbɔ́ tʉ́m pɔ́p.