Read Ngomba Jɑ̂ŋ 18 Bible Online

Jɑ̂ŋ 18 - Ngomba bible

Jɑ̂ŋ 18

¹Yɛ́su kɑ cú pɔ́Ꞌɔ, pɔ́p pɛ́ ɡɑŋku pɛ́ ɡʉ, ŋ́kúu tsɛt fúꞋ, ńtúu nɛtʉŋ-ŋki-Sɛdɛlɔŋ, ŋ́ɡʉ nǔu yɛcɔ́ njʉ́n. Yɛcɔ́ ŋkɑ́Ꞌ pɔ́ zúꞋu, pɔ́p pɛ́ ɡɑŋku pɛ́ kúu tsɛtú.

²Ɛ́ kɑ ɡɔ́ ḿbɔ́ Jẅidɑ ẅí ɑ ɡʉ fɛn wɛ́ pɔ́ ńjí zʉꞋ ɛ̂yɑ́ kwɑꞋ sʉ́Ꞌnɛ, mbíꞋŋɡɔ Yɛ́su pɔ́p ɡɑŋku pɛ́ m̄bɔ́ ńnɑ́ŋ ńcúꞋlɛ zúꞋu.

³Jẅidɑ nɑ́ŋ tɛ ńtɔ́, ḿbɔ́ mbi tsɛtsɛt pɑlʉ̈ɔ́Ꞌntsɔ-Lɔ́mɑ pɔ́p pɑpyɛ́p ndɑ́-nɔŋpɔꞋ, pí pɛtɑ́tndɑ́-pɑnɔŋ pɔꞋ pɔ́p pɑfɑlísɑy lɑ́Ꞌnɛ ńtúu. Pɔ́p ɡẅɛ mɛkyɛꞋ múk, nɛ́ túlúkɑ́ŋ, mbɑ yúu-ntsɔ.

⁴Yɛ́su jí nu yí ɛ́ sɛ́ ńtɔ́ nǔu wɛ́, ńtɔ́ mbi pɔ́p ńcú ŋɡɔ: «Pʉʉ lɔɔ wɔ̌?»

⁵Pɔ́p tsɔ́Ꞌ mbɔ̌ wɛ́ ŋɡɔ: «Yɛ́su wɛ Nɑ̌ɑzɑlɛt.» A tsɔ́Ꞌ mbɔ̌ pɔ́p ŋɡɔ: «A mɔ.» Ŋ́ɡɔ ńcú pɑ́Ꞌnɛ, Jẅidɑ ẅí ɑ lɑ́Ꞌnɛ ɛ́fɛn wɛ́ pɔ́ tsɛtsɛt pɔ́p.

⁶Yɛ́su pɔ́ tɛ ńcú mbɔ̌ pɔ́p ŋɡɔ: A mɔ, pɔ́p pɛn nzʉʉ nɛ nzʉʉ, ḿvutɛ sɛ́.

⁷Yɛ́su pɛn ḿbíkŋɛ wɔ́p ŋɡɔ: «Pʉʉ lɔɔ wɔ̌?» Pɔ́p cú ŋɡɔ: «Yɛ́su wɛ Nɑ̌ɑzɑlɛt.»

⁸Yɛ́su tsɔ́Ꞌ mbɔ̌ pɔ́p ŋɡɔ: «Ɛ sẅíi wʉ́ʉ ŋɡɔ ɑ mɔ. Ɛ́ lɑɑ ŋ́kɛ́ ḿbɔ́ yi pʉʉ tɔ́ lɔɔ wɑ́ɑ, pʉʉ ńnɑ́ pɔ pʉɔ pɔ́p ɡʉ.»

⁹Ɛ́ kɑ pɔ́ pɔ́Ꞌɔ, sẅiŋɛ yí Yɛ́su lɑ́Ꞌnɛ ńcú mbɔ̌ Sɛ́ lɔk ḿbuutɛ. Ɛ́ pɔ ńcú ŋɡɔ: «Wɛcɔ́ tɑ́Ꞌ nǔu pʉɔ pí ɔ kɑ ɡɑ́nɛ mbɔ̌ mɔ lɑ́, ŋkɑɑ pɛ́.»

¹⁰Símɔ̂ŋ Pyɛ̂ ẅí ɑ kɑ ɡẅɛɛnɛ níi-ntsɔ ɡɔ́ɔ ŋ́kɛ́ ɛ́sɔŋ níi tsɛt mbɑ́ɑ, ńzwɑ́ nɛtúutɛ ŋɡɑŋfɑꞋ tɑ́tndɑ́-pɑnɔŋ pɔꞋ nǔu ɡúŋ pɔ́ tʉʉ. Lík ŋu ɛ̂wɑ́ kɑ pɔ́ ŋɡɔ Mɑlkus.

¹¹Lɑ́ Yɛ́su cú nɛ́ pyɛ̂ ŋɡɔ: «NíꞋ níi yu mbɑ́ɑ!» Ŋ kɛ́ nɔ́ ŋɡʉ̈ɔ́Ꞌ[18] yí Tɑ̌ɑ mɔ ɡɑ́nɛ ŋɡɔ n nɔ́ pɔ́ ɔɔ?

¹²Nɔɔ-pɑlʉ̈ɔ́Ꞌntsɔ, pɔ́p pɛtɑ́tndɑ́-pɑnɔŋ pɔꞋ pɔ́p pɑpyɛ́p zʉꞋ-nɔŋpɔꞋ, pí pɛkɛ́m-Pɑyúdɑ lɑ́Ꞌnɛ ńtúu, ɡɔ́ɔ ŋ́kɛ́ ŋ́ɡẅɛɛ Yɛ́su, ŋ́kút wɛ́.

¹³Pɔ́p kút Yɛ́su pɔ́Ꞌɔ, ńdɔk wɛ́ ḿbiitɛ ŋ́ɡʉ ntɔ́Ꞌ-Áɑnɛ. Áɑnɑ ḿbɔ́ pɔ́Ꞌɔ, ḿbɔ́ tɑ́kẅíꞋ-Kɑifɑ ẅí ɑ kɑ pɔ́ ŋɡuꞋ ɛ̂yɑ́, ḿbɔ́ tɑ́tndɑ́-pɑnɔŋ pɔꞋ.

¹⁴Jʉ́ Kɑyífɑ, pɔ́ ŋu ẅí ɑ kɑ cúnɛ mbɔ̌ pɛkɛ́m-Pʉɔ-Yúdɑ ŋɡɔ: «Mbi pɑ́Ꞌ ɛ́ lɑɑ ḿbɔ́ tɑ́Ꞌ ŋu pfú nǔu tú lɑ́Ꞌ»

¹⁵Símɔ̂ŋ Pyɛ̂ pɔ́p wɛcɔ́ ŋɡɑŋku-Yɛ́su kɑ pɔ́ nzʉʉ Yɛ́su. Pɑ́Ꞌ tɑ́tndɑ́-pɑnɔŋ pɔꞋ kɑ pɔ́ ńjí ẅîwɑ́ ŋɡɑŋku-Yɛ́su lɑ́, pɛ́ ɡɔ́ ńdɔk Yɛ́su ńtɔ́k nɛ́ tsɛt ntɔ́Ꞌ-tɑ́tndɑ́-pɑnɔŋ pɔꞋ, ɑ pɔ́ yɛ́ pɔ nzʉʉ.

¹⁶Pyɛ̂ ɡɔ́ŋ píi ńtʉ́ʉ, ntsu-ntɔ́Ꞌ. Wɛcɔ́ ŋɡɑŋku-Yɛ́su wɑ́ ẅi tɑ́tndɑ́-pɑnɔŋpɔꞋ kɑ pɔ́ ńjí wɛ́ lɑ́, ɡʉ ńcú nu mbɔ̌ mɑŋɡɛ́ ẅi ɑ pyɛ́pnɛ ntsu-ntɔ́Ꞌ, ŋ́ɡɛ pyɛ̂ kúu tsɛt ntɔ́Ꞌ.

¹⁷Mɑŋɡɛ́ ɛ̂wɑ́ ẅi ɑ pyɛ́pnɛ ntsu-ntɔ́Ꞌ cú mbɔ̌ Pyɛ̂ ŋɡɔ: «Ɔ kɑ́ pɔ́ yú wɛcɔ́ tɑ́Ꞌ nǔu ɡɑŋku ŋu wɑ́ pɔ́ ɔɔ?» Pyɛ̂ tsɔ́Ꞌ ŋɡɔ: «Ŋ kɑ́ pɔ́ ŋɡɑŋku wɛ pɔ́.»

¹⁸Ɛ́ ɡɔ́ ḿbɔ́, mbɔ ɡɑŋfɑꞋ pɔ́p pɑpyɛ́p ndɑ́-nɔŋpɔꞋ lɑ́Ꞌ ńniitɛ múk. Fɑ́k pɔ́ ŋ́kɔ́, pɔ́p pɔ́ ńzɔ́k múk. Pyɛ̂ tʉ́ʉ yɛ́ pɔ́p pɛ́ pɔ́p pɔ́ ńzɔ́k múk.

¹⁹Yɛ́su pɔ́ ŋkɑ́ ɛ̂yɑ́ ḿbɔ́ mbi nɔŋpɔꞋ wɛ ɡwɛ́[19]. A pɔ́ ḿbíkŋɛ wɛ́ nɛ́ nu nǔu ŋɡɑŋku wɛ́, mbɑ nǔu yúu mi ɑ zíꞋnɛ pʉɔ.

²⁰Yɛ́su tsɔ́Ꞌ mbɔ̌ wɛ́ ŋɡɔ: «Ŋ kɑ pɔ́ sɑ́ɑnɛ sɑ́ɑnɛ́nɛ ńcú nu mbɔ̌ lɑ́Ꞌ, ŋ kɑ pɔ́ ńzíꞋ pʉɔ tsɛt mɛndɑ́-cúꞋlɛ, mbɑ tsɛt ndɑ́-nɔŋpɔꞋ, zʉꞋ yí Pɑyúdɑ cúꞋlɛ́nɛ zúꞋu. Mɔ ŋkɑɑ ḿbɔ́ ńcú yɛcɔ́ nu pɔ ńdʉɔ lʉɔmɛ́nɛ pɔ́.

²¹Mɛlɑ́Ꞌ ku ɔ píkŋɛnɛ wɑ́ɑ nɛ́ mɛnu? Píkŋɛ nu yí ŋ kɑ cúnɛ mbɔ̌ pʉɔ pí pɔ́p kɑ pɔ́ ńzúꞋ. Pɔ́p sɛ́ ńniitɛ ńjí yúu mi ŋ kɑ cúnɛ.»

²²Yɛ́su cú pɔ́Ꞌɔ, wɛcɔ́ tɑ́Ꞌ nǔu pɑpyɛ́p ndɑ́-nɔŋpɔꞋ ẅí ɑ ḿbɔ́nɛ zúꞋu tɛ́m pɔ́ nɛtúutɛ yɛ́, ńcú ŋɡɔ: «Yɑ́ pɑ́Ꞌ ɔ tsɔ́Ꞌnɛ nu mbɔ̌ NɔŋpɔꞋ wɛ ɡwɛ́?»

²³Yɛ́su tsɔ́Ꞌ mbɔ̌ wɛ́ ŋɡɔ: «Ɛ́ lɑɑ ḿbɔ́ yí n cú kɛpɔŋ, ɔ sẅíi wɑ́ɑ nɛ́ yúu mi ɛ́ nǔu ḿbɔ́ yi kɛpɔŋ, ŋ́kɛ́ ḿbɔ́ yí n cú sʉ́Ꞌnɛ, mbɔ ɔ pɛn ńtswɑ́ɑ wɑ́ɑ mɛlɑ́Ꞌkʉ̈ɔ́?»

²⁴Áɑnɑ cú, tɛ Yɛ́su pɛ́t pɔ mɛŋkʉ, pɛ́ lɔk wɛ́ ŋ́ɡʉ ŋ́ɡɑ́ mbɔ̌ Kɑyífɑ, nɔŋpɔꞋ wɛ ɡwɛ́.

²⁵Pyɛ̂ kɛ́ ḿbɛ́t ḿbɔ́ ńzɔ́k pɔ múk, pɛ́ cú nɛ́ jʉ́ ŋɡɔ: «Gu yú, ɔ kɑ́ pɔ́ wɛcɔ́ tɑ́Ꞌ ŋɡɑŋku ŋu wɑ́ pɔ́ ɔɔ?» Pyɛ̂ muŋɛ, ńcú ŋɡɔ ŋ kɑ́ pɔ́ ŋɡɑŋku wɛ pɔ́.

²⁶Wɛcɔ́ tɑ́Ꞌ ŋɡɑŋfɑꞋ-NɔŋpɔꞋ wɛ ɡwɛ́, ḿbɔ́ mɔ́ɔmɑ́ pɛ́ ŋu wɑ́ ẅi pyɛ̂ kɑ zwɑ́nɛ nɛtúutɛ nɛ́ lɑ́, cú mbɔ̌ pyɛ̂ ŋɡɔ: «Mɔ ŋkɑɑ jʉ́ɔ wʉ́ʉ pɛ́ pɔ́p tsɛt ŋkɑ́Ꞌ pɔɔ?»

²⁷Pyɛ̂ pɛn ḿmuŋɛ. Mɔ̂ŋkʉ̈ɔ́Ꞌ ɡɔ́ɔ ńtɔ́ŋ.

²⁸Pɛ́ fú ntɔ́Ꞌ-Kɑyífɑ, ńdɔk Yɛ́su ŋ́ɡʉ nɛ́ njɛ́Ꞌ-ŋɡɔ́mnɑɑ-Pʉɔ-Lɔ́mɑ. Ɛ́ pɔ́ mbɑꞋmbɑꞋɑ́. Pɛkɛ́m pí pɔ́p lɔknɛ Yɛ́su ńtɔ́ kɛ́ mbɔɔ yɔ́p ndɑ́ ŋɡɔ́mnɑɑ kúu, ḿbɔ́k nɛtíi lɔ́Ꞌ, ɛ́ tɔꞋ wɔ́p nɛjʉ́ ndínɑ-Pɑ́skɑ.

²⁹Pilɑ́tɔ kẅɛ́ɛtɛ wɔ́p píi, ńcú ŋɡɔ: «Pʉʉ ɛ́fɛn ŋu wɔ mɛlɑ́Ꞌkʉ̈ɔ́?»

³⁰Pɔ́p tsɔ́Ꞌ ŋɡɔ: «Ŋu ɛ̂wɑ́ lɑ́Ꞌ ḿbɔ́ pɛ́Ꞌɛ ḿbɔɔ nu kɛpɔŋ ɡɛ, mbɔ pɛk kɑ́ lɔk wɛ́ ńtɔ́ mbi wú pɔ́.»

³¹Pilɑ́tɔ ɡɔ́ɔ ńcú mbɔ̌ pɔ́p ŋɡɔ: «Pʉʉ lɔk wɛ́ ŋ́ɡʉ ŋ́ŋɑk wɛ́ zɛ́nɛ pʉʉ, pɑ́Ꞌ nɛpʉ́ʉ nʉ́ʉ ŋ́kɔŋnɛ pɔ́Ꞌɔ.» Pɛkɛ́m tsɔ́Ꞌ ŋɡɔ: «Nɛpʉ́ʉ nʉkŋɛ kɑ́ pɛ́m ŋɡɔ pɛk jẅí ŋu pɔ́.»

³²Ɛ́ lɔk ḿbuutɛ nǔu nu yí Yɛ́su kɑ tsʉ́Ꞌ nɛcú ntɛ́ yí ɑ ɡʉ ŋ́ɡɛ ḿpfú ńcú.

³³Pilɑ́tɔ ɡɔ́ɔ ḿbɛn ndɑ́, ŋ́ɡɛ Yɛ́su tɔ́, ɑ píkŋɛ wɛ́ ŋɡɔ: «Ɔ fɔɔ-Pɑyúdɑ ɔɔ?»

³⁴Yɛ́su tsɔ́Ꞌ ŋɡɔ: «KwɑꞋ ɡu kɛ́ nɛ́ ŋ́kwɑŋɛ ńcú, kɛ pɛcɔ́ pʉɔ sẅíi wú ŋɡɔ mɔ fɔɔ?»

³⁵Pilɑ́tɔ tsɔ́Ꞌ ŋɡɔ: «Ɔ zúꞋ ŋɡɔ mɔ ŋu Pɑyúdɑ? Pɑlɑ́Ꞌ pʉ́ʉ pɔ́p pɛkɛ́m-pɑnɔŋpɔꞋ fɛnnɛ wú mbɔ̌ mɔ. Ɔ kɑ ɡɛ ku?»

³⁶Yɛ́su tsɔ́Ꞌ ŋɡɔ: «Nɑ́ɑ nɛfɔɔ kɑ́ pɔ́ nɛ́ yɔ mbí pɔ́. Nɛfɔɔ nɑ́ɑ pɛ́Ꞌnɛ ḿbɔ́ nɛ́ yɔ mbí, mbɔ pʉɔ pɑ́ɑ lɑ́Ꞌ mbɔɔ nɑ́ nzʉʉ yɑɑ, tɛ pɛ́ níꞋ wɑ́ɑ mbɔ̌ pɛkɛ́m-Pɑyúdɑ pɔ́. Lɑ́, n zɛɛ ńcú ŋɡɔ nɑ́ɑ nɛfɔɔ kɑ́ pɔ́ nɛ́ ndǔmbí yɔ pɔ́.»

³⁷Pilɑ́tɔ píkŋɛ wɛ́ ŋɡɔ: «Ɔ lɔk ḿbɔ́ fɔɔ pɔ́ ɔɔ?» Yɛ́su tsɔ́Ꞌ ŋɡɔ: «Gu cúnɛ pɔ́Ꞌɔ, mɔ fɔɔ. ZúꞋ yúu mi ɛ́ kɑ ɡɛnɛ pɛ́ pí wɑ́ɑ, ḿbɛn ńzúꞋ yúu mi ɛ́ kɑ ɡɛnɛ n tɔ́ ndǔmbí. Ŋ kɑ tɔ́ nɛcú yúu mi n jínɛ nǔu nu nɛ́nẅín. Ŋu pɔ́ nǔu nu nɛ́nẅín, ńzúꞋ ŋɡi yɑɑ.»

³⁸Pilɑ́tɔ cú nɛ́ jʉ́ ŋɡɔ: «Nu nɛ́nẅín ɛ́ yɛ́t?» Ńcú pɔ́Ꞌɔ, ḿbɛn ɛ́fú ndɑ́ ńcẅɛt, ŋ́ɡʉ ńjʉ́ɔ pɛkɛ́m-Pɑyúdɑ píi. Ńcú nɛ́ pɔ́p ŋɡɔ: «N zɛɛ ḿbɔɔ ńjʉ́ɔ yúu mi pɛ́ ɡʉ ńdɛɛ nǔu lɑ ńcú ŋɡɔ ŋu wɔ vu ntsɑŋ pɔ́.

³⁹Lɑ́, pɑ́Ꞌ ɛ́ mɑt mbɔ̌ pɛkŋɛ nɛpɔ́ ŋkɑ́-ndínɑ-pɑ́skɑ, ńtsɔ́Ꞌ tɑ́Ꞌ ŋɡɑŋtsɑ́ŋ lɑ́, pʉʉ kɔŋ ŋɡɔ n tsɔ́Ꞌ fɔɔ-Pɑyúdɑ ŋ́ɡɑ́ nɛ́ pʉʉ?»

⁴⁰Pɔ́p pɛn ŋ́ɡɑ́ ɡwɑ́t, ńcú ŋɡɔ: «Ŋɡɑ́ŋ, kɔɔ tsɔ́Ꞌ wɑ́ ŋu, tsɔ́Ꞌ pɔ Bɑlɑbɑs, ńcú pɑ́Ꞌnɛ Bɑlɑbɑs ɛ̂wɑ́ pɔ́ kwɑꞋ ntʉʉ ntsɔ́ŋ.»