Read Ngomba Jɑ̂ŋ 19 Bible Online

Jɑ̂ŋ 19 - Ngomba bible

Jɑ̂ŋ 19

¹Pilɑ́tɔ ɡɔ́ɔ ŋ́kɛ́ ŋ́ɡɑ́ Yɛ́su ŋɡɔ pɛ́ lɔk ŋɡwɑɑ ńtswɑ́ɑ wɛ́.

²Pɑlʉ̈ɔ́Ꞌntsɔ lɔk mɛnzɔ́ŋ ḿbɑ́Ꞌ cɔꞋ-nɛfɔɔ, ɛ́sɔ tú-Yɛ́su, ḿbɛ́ɛ pɛpɑŋ ndẅí ḿmɑꞋ nǔu wɛ́.

³Ḿbɔ́ ŋ́kẅɛ́Ꞌlɛ ńtɔ́ nɛjɔ́ŋ yɛ́, ńtuŋɛ wɛ́ ŋɡɔ: Pɛ́ cɛꞋlɛ fɔɔ-Pɑyúdɑ! Ńtɛ́m mbɔ́ mɛtúutɛ́ wɛ́.

⁴Pilɑ́tɔ pɛn ńcẅɛt píi ńcú mbɔ̌ pɛkɛ́m-Pɑyúdɑ ŋɡɔ: «Ŋ ɡʉ ńdɔk ŋu ɛ̂wɑ́ ńtɔ́ ŋ́ɡɑ́ mbɔ̌ pʉʉ. Pʉʉ kɛ́ ńjí ŋɡɔ ŋ kɑ́ jʉ́ɔ yɛcɔ́ yúu mi ɑ fɑɑnɛ́nɛ pɔ́.»

⁵Yɛ́su ɡɔ́ ńcẅɛt, ńtɔꞋ cɔꞋ-mɛnzɔ́ŋ, ḿmɑꞋ pɑŋ ndẅí. Pilɑ́tɔ cú mbɔ̌ pɛkɛ́m-Pɑyúdɑ ŋɡɔ: Ŋu wɑ́ pʉ́ɔlɑ́.

⁶Lɑ́ pɛtɑ́tndɑ́-pɑnɔŋ pɔꞋ pɔ́p pɑpyɛ́p zʉꞋ-nɔŋpɔꞋ jʉ́ɔ Yɛ́su, ńzɛ nɛɡɑ́ ɡwɑ́t ŋɡɔ: «Kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ.» Pilɑ́tɔ cú mbɔ̌ pɔ́p ŋɡɔ pʉʉ kɔ wɛ́, kwɑꞋ pʉʉ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ. Ŋ kɑ́ pɔ́ ńjʉ́ɔ yúu mi pɛ́ ɡʉ ńdɛɛ nǔu, lɑ ńjẅí wɛ́ pɔ́.

⁷Pɛkɛ́m tsɔ́Ꞌ mbɔ̌ wɛ́ ŋɡɔ: A fɑɑnɛ nɛpʉ́ʉ nʉkŋɛ. Pɛ́ ɡʉ ńjẅí wɛ́ ntɛ́ nɛpʉ́ʉ ni ɑ fɑɑnɛ́nɛ. A cú ŋɡɔ ɑ mɔ́ɔ-Sɛ́.

⁸Pilɑ́tɔ pɔ́ tɛ ńzúꞋ pɔ́Ꞌɔ, ŋ́ɡɔ́ɔ ḿmɛkŋɛ ńcʉ̈ɔꞋ.

⁹Ḿbɛn ŋ́kúu ntɔ́Ꞌ, ḿbíkŋɛ Yɛ́su ŋɡɔ: «Ɔ ŋu ɡɔ́? Lɑ́ Yɛ́su zɛɛ mbɔɔ tsɔ́p.»

¹⁰Pilɑ́tɔ ɡɔ́ɔ ŋ́kɛ́ ńcú mbɔ̌ wɛ́ ŋɡɔ: N cú nu ɔ pɔɔ ńtsɔ́Ꞌ pɔ́ ɔɔ? Ɔ kɑ́ pɔ́ ńjí ŋɡɔ ŋ kuꞋ nɛɡɛ pɛ́ nɑ́ wú, pɑ́Ꞌ m bɛn ŋ́kuꞋ nɛɡɛ, pɛ́ kẅii wú nǔu tʉ́ mbɑ́ŋtɛ pɑ́ŋtɛ́nɛ pɔ́ ɔɔ?

¹¹Yɛ́su tsɔ́Ꞌ mbɔ̌ wɛ́ ŋɡɔ: «Sɛ́ lɑɑ ḿbɛ́t kɛ́ ɡɑ́ mɛtʉʉ mbɔ̌ ɡu, ɔ pɔɔ kuꞋ nɛɡɛ yɛcɔ́ yúu nǔu mɔ pɔ́. Ɛ́ yúu mi ɛ́ kɑ ɡɛnɛ lɑ ŋu ẅí ɑ kɑ fɛnnɛ wɑ́ɑ mbɔ̌ ɡu, yɛ́ nu kɛpɔŋ lɛɛ yú.»

¹²Pilɑ́tɔ zɛ ŋkɑ́ ɛ̂yɑ́ nɛlɔɔ shʉ́ pɑ́Ꞌ ɑ ɡʉ ńnɑ́ Yɛ́su. Lɑ́ Pɑyúdɑ zɛ nɛɡɑ́ ɡwɑ́t ŋɡɔ: «Ɔ lɑɑ ńnɑ́ wɛ́, mbɔ ɔ kɑ́ pɔ́ súu-kɑ́sɑ-pɑlɔ́mɑ pɔ́. Ŋu ẅí ɑ cúnɛ ŋɡɔ ɑ fɔɔ, ɑ pɔ ŋɡɑŋmbuu-Kɑ́sɑ.»

¹³Pilɑ́tɔ zúꞋ pɔ́Ꞌɔ, ńdɔk Yɛ́su ɛ́fú ntɔ́Ꞌ ńcẅɛt, ńnɑ́ŋ ndǔ kɔꞋ-nzɑ́Ꞌntsɑŋ, zʉꞋ yí pɛ́ kɑ lɔknɛ mɛŋɡɔꞋ ńnɔŋ, pɛ́ fúŋ nǔu sẅiŋɛ-pʉɔ-Hɛbɛlʉ́ʉ ŋɡɔ Ŋɡɑbɑ́tɑ.

¹⁴Ɛ́ pɔ́ lɛ́Ꞌ yi pɛ́ niitɛ́nɛ ndínɑ-Pɑ́skɑ, ɛ́ kɑ pɔ́ ntʉ̌ʉ nɛm. Pilɑ́tɔ cú mbɔ̌ Pɑyúdɑ ŋɡɔ: «Fɔɔ wʉʉ pʉ́ɔlɑ́.»

¹⁵Pɑyúdɑ ɡɑ́ ɡwɑ́t ŋɡɔ: «Pɛ́ ńjẅí wɛ́, pɛ́ ńjẅí wɛ́. Ŋ́ɡɛ pɛ́ kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ.» Pilɑ́tɔ cú mbɔ̌ pɔ́p ŋɡɔ: «Mɔ ɡʉnɛ ŋ́kẅii fɔɔ wʉʉ nǔu tʉ́ mbɑ́ŋtɛ pɑ́ŋtɛ́nɛ?» Pɛtɑ́tndɑ́-pɑnɔŋ pɔꞋ tsɔ́Ꞌ ŋɡɔ: «A ndɑꞋ Kɑ́sɑ pɔ́, mbɔ pɛk kɑ́ ɡẅɛɛ wɛcɔ́ fɔɔ pɔ́.»

¹⁶Pilɑ́tɔ ɡɔ́ɔ ŋ́kɛ́ ŋ́ɡɑ́ Yɛ́su mbɔ̌ pɔ́p, pɑ́Ꞌ pɛ́ ɡʉ ŋ́ɡʉ ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ. Pɛ́ ɡɔ́ɔ ŋ́kɛ́ ńdɔk Yɛ́su ŋ́ɡʉ.

¹⁷Ŋ́ɡɔ́ ɛ́fú tʉ́sɔŋ ńcẅɛt, kwɑꞋ jʉ́ tíinɛ tʉ́ mbɑ́ŋtɛ pɑ́ŋtɛ́nɛ yɛ́, pɔ́p pɛ́ pɔ́p pɔ́ ŋ́ɡʉ nɛ́ yɛcɔ́ zʉꞋ, pɛ́ fúŋ ŋɡɔ tsẅíi-tú. Ɛ́ pɔ́ nǔu sẅíŋɛ-pʉɔ-Hɛbɛlʉ́, ḿbɔ́ Ŋɡɔlŋɡɔ́tɑ.

¹⁸Pɔ́p kúu zúꞋu, ŋ́kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ, ḿbɛn ŋ́kẅii pɛcɔ́ pʉɔ pɛ́pɑ́ nǔu mɔ́p mɛtʉ́ mbɑ́ŋtɛ pɑ́ŋtɛ́nɛ. Tɑ́Ꞌ pɔ́ nǔu ɡúŋ pɔ́-Yɛ́su yɛ́ tʉʉ, wɛcɔ́ pɔ́ nǔu ɡúŋ yɛ́ kẅɛpmɛ. Yɛ́su pɔ́ tsɛtsɛt.

¹⁹Pilɑ́tɔ ɡɛ pɛ́ ŋwɑꞋnɛ yúu, ŋ́kẅii nǔu tʉ́ mbɑ́ŋtɛ pɑ́ŋtɛ́nɛ-Yɛ́su. Ɛ́ pɔ́ nǔu ḿbɔ́ ŋɡɔ: Yɛ́su Ŋu-Nɑ̌ɑzɑlɛt, fɔɔ-Pɑyúdɑ.

²⁰ZʉꞋ yí pɛ́ kɑ kẅiinɛ Yɛ́su zúꞋu kɑ pɔ́ nɛpɑt tʉ́sɔŋ-Yɛlúsɑlɛm. Pɑyúdɑ tɛ ńzɑ́ɑ pɔ́ ńdɛɛ zúꞋu ɛ́fúŋ yúu mi pɛ́ ŋwɑꞋnɛ́nɛ. Ɛ́ pɔ́ nǔu sẅiŋɛ pʉɔ-Hɛbɛlʉ́, ḿbɔ́ nǔu sẅiŋɛ-pɑlɔ́mɑ mbɑ nǔu sẅiŋɛ pʉɔ-Ŋɡɛlɛk.

²¹Pɛtɑ́tndɑ́-pɑnɔŋ pɔꞋ-Pɑyúdɑ ɡɔ́ɔ ŋ́kɛ́ ŋ́ɡʉ ńjʉ́ɔ Pilɑ́tɔ ńcú mbɔ̌ wɛ́ ŋɡɔ: Ɛ́ kɑ́ pɔŋ nɛŋwɑꞋnɛ ŋɡɔ fɔɔ-Pɑyúdɑ pɔ́, ŋwɑꞋnɛ pɔ ŋɡɔ ɑ kɑ cú ŋɡɔ ɑ fɔɔ-Pɑyúdɑ.

²²Pilɑ́tɔ tsɔ́Ꞌ ŋɡɔ: «Yúu mi mɔ ŋwɑꞋnɛ, mɔ ńdɑ́Ꞌ mɔ ŋ́ŋwɑꞋnɛ.»

²³Pɑlʉ̈ɔ́Ꞌntsɔ kɑ kẅii Yɛ́su nǔu tʉ́ mbɑ́ŋtɛ pɑ́ŋtɛ́nɛ tɛ ḿbɔ́tnɛ ńnɑ́ŋ, ḿbɛ́ɛ mɛndẅí mɛ́, ŋ́ɡɑptɛ nji yɛ́nɛ́kwɑ. Mbɑ wɔ̌ lɑ́ pɛ́ɛ yɛ nji, tɛ ɛ́ tsʉꞋ ndẅí yɛ́ yi ɡwɛ́, yi pɛ́ ŋkɑɑ tɛ́m tɛ́mnɛ pɔ́. Pɛ́ kɑ pɑ́Ꞌ pɑ́Ꞌnɛ, ɛ́fú tʉ́ ŋ́kúu sɛ́.

²⁴Pɑlʉ̈ɔ́Ꞌntsɔ cú tsɛtsɛt pɔ́p ŋɡɔ: «Kɔɔ pɛkŋɛ sɑ yɔ. Pɛkŋɛ mɑꞋ ńtíitɛ, ŋu ẅí ɑ ńjʉ́, pɛkŋɛ ɡɑ́ mbɔ̌ wɛ́.» Ɛ́ lɔk ḿbuutɛ nǔu nu yí pɛ́ kɑ ŋwɑꞋnɛ́nɛ tsɛt ŋwɑꞋnɛ-ndɛn kɑɑ ŋɡɔ: «pɔ́p sɛ́ ŋ́ɡɑptɛ mɛndẅí mɑ́ɑ tsɛtsɛt pɔ́p, ḿmɑꞋ ńtíitɛ nǔu ndẅí yɑɑ yi ɡwɛ́.» Yɔ yúu mi pɑlʉ̈ɔ́Ꞌntsɔ kɑ ɡɛnɛ.

²⁵Mɑ́ pɛ́ Yɛ́su pɔ́p mɔ́ɔmɑ́ wɛ wɛ mɑŋɡɛ́, ŋ́ɡɛ Mɑlíyɑ nzwɛ́-Kɛlɔ́pɑs, mbɑ Mɑlíyɑ-Mɑkdɑlɑ kɑ tʉ́ʉ mbʉʉ tʉ́ mbɑ́ŋtɛ pɑ́ŋtɛ́nɛ-Yɛ́su.

²⁶Yɛ́su jʉ́ɔ pɑ́Ꞌ mɑ́ wɛ tʉ́ʉnɛ nɛjɔ́ŋ ŋɡɑŋku wɛ ẅí ɑ kɑ pɔ́ ŋ́kɔŋ wɛ́ tɛꞋ, ńcú mbɔ̌ mɑ́ wɛ ŋɡɔ: «Mɑ́ɑmɑɑ, mɔ́ɔ nu pʉ́ɔlɑ́.»

²⁷Ḿbɛn ńcú mbɔ̌ ŋɡɑŋku wɛ wɑ́ ŋɡɔ: «Mɑ́ wu pʉ́ɔlɑ́.» Ɛ́ fú ŋkɑ́ ɛ̂yɑ́, ŋɡɑŋku wɛ wɑ́ lɔk mɑ́ pɛ́ Yɛ́su ŋ́ɡʉ nɛ́ njɛ́Ꞌ yɛ.

²⁸Mɔnɛ mɛnu kɑ lɛɛ, Yɛ́su jí ŋkɔ̂ɔnɛ ŋɡɔ mbɑ kʉ̈ɔ́ lɑ́ kuꞋ, ńcú ŋɡɔ: «Gɑ́k yɑ́ɑ shí, ńcú pɑ́Ꞌnɛ nɛpɔ́ yi yúu mi pɛ́ kɑ ŋwɑꞋnɛ́nɛ tsɛt ŋwɑꞋnɛ-ndɛn kɑɑ ɡʉ ḿbuutɛ.»

²⁹Nɛcɔ́ nɛkʉŋ kɑ pɔ́ zúꞋu, mbɔ pɛ́ níꞋ cícɔ́k mɛluꞋ tsɛtú. Pɛ́ tsɛp kúntsɑ́ɑ tsɛtú, ɛ́sɔ́klɛ nǔu tú-kɛkɑꞋ, ńcɑklɛ ńníꞋ ntsu-Yɛ́su.

³⁰A fíitɛ ńcú ŋɡɔ: «Nu tsʉʉ mɛ», ŋ́ɡɔ́ɔ ŋ́kɛ́ ńcɔ́ŋɛ tú yɛ́, ḿpfú.

³¹Pɛ́ kɑ pɔ́ lɛ́Ꞌ ɛ̂yɑ́ ḿbɔ́ ńniitɛ lɛ́Ꞌnji-Pɑyúdɑ, ɛ́ pɛn mbɔɔ pɔŋ ŋɡɔ ɛ́ pɔ́ lɛ́Ꞌnji, mɛpfú-pʉɔ pɔ́ nǔu mɛtʉ́ mbɑ́ŋtɛ pɑ́ŋtɛ́nɛ pɔ́, yîyɑ́ nu zɛɛ ḿbɔ́ ŋ́ɡʉ ḿbɔ́ nji ɡwɛ́ tɛꞋ. Pɛkɛ́m-Pɑyúdɑ ɡʉ ńjʉ́ɔ Pilɑ́tɔ, ḿbúꞋ mbɔ́ mbɔ̌ wɛ́ ŋɡɔ ɑ ɡɛ pɛ́ pʉ̈ɔ́Ꞌtɛ mɛku-pʉɔ pí pɔ́p nǔu mɛtʉ́ mbɑ́ŋtɛ pɑ́ŋtɛ́nɛ, pɔ́p pfútɛ, pɛ́ fú nǔu mɛtʉ́ mbɑ́ŋtɛ pɑ́ŋtɛ́nɛ ŋ́kɔk wɔ́p.

³²Pɑlʉ̈ɔ́Ꞌntsɔ ɡɔ́ɔ ŋ́kɛ́ ńtɔ́ ḿbʉ̈ɔ́Ꞌtɛ mɛfʉ́ʉ-nduŋmbi, mbɑ mɛ mbɑ́ɑtɛ ŋu ẅí pɛ́ tɛmtɛ ŋ́kẅii wɔ́p pɛ́ Yɛ́su.

³³Ŋ́ɡʉ tɛ ŋ́kúu nǔu Yɛ́su, ńjʉ́ɔ, mbɔ ɑ ńdɑ́Ꞌ mɔ́ ḿpfú. Pɔ́p pɔɔ pɛn ḿbʉ̈ɔ́Ꞌtɛ mɛfʉ́ʉ mɛ́ pɔ́.

³⁴Lɑ́ wɛcɔ́ tɑ́Ꞌ nǔu pɑlʉ̈ɔ́Ꞌntsɔ lɔk nɛkɔŋ, ɛ́sɔp ɡúŋ-ŋɡíi-Yɛ́su. Mɛci pɔ́p ŋki ɡɔ́ɔ ńcẅɛt zúꞋu.

³⁵Ŋu ẅí ɑ sẅíinɛ wʉ́ʉ ɑ ńcẅɛ́ɛntɑ́ŋ nǔu kʉ̈ɔ́ lɑ́ yí ɛ́ kɑ lɛɛnɛ. Ɛ́ pɔ́ kwɑꞋ pɑ́Ꞌ ɛ́ kɑ lɛɛnɛ. KwɑꞋ jʉ́ nɛ tú yɛ́ pɔ́ ńniitɛ ńjí ŋɡɔ ɑ cú nu nɛ́nẅín, ńcú pɑ́Ꞌnɛ nɛpɔ́ yí pʉʉ yʉ́ʉ ɡʉ ńzɑ́p tʉ́m nǔu yɔ nu.

³⁶Mɔnɛ mɛnu m̄bɔ́ ńdɛɛtɛ pɑ́Ꞌnɛ pɑ́Ꞌ yúu mi pɛ́ kɑ ŋwɑꞋnɛ́nɛ tsɛt ŋwɑꞋnɛ-ndɛn kɑɑ ɡʉ ḿbuutɛ. Pɛ́ kɑ ŋwɑꞋnɛ ŋɡɔ: «Pɛ́ ŋkɑɑ kɛ́ ḿbʉ̈ɔ́Ꞌ yɛcɔ́ tsẅíi-mbʉʉ yɛ́ pɔ́.

³⁷Pɛ́ kɑ pɛn ŋ́ŋwɑꞋnɛ ŋɡɔ: pɔ́p ɡʉ ńdɑ́Ꞌ ḿbɔ́ ńdíŋɛ ŋu ẅí pɔ́p lɔknɛ nɛkɔŋ ɛ́sɔp wɛ́.»

³⁸Mɔnɛ mɛnu kɑ lɛɛ, Yɔsɛ̂p, ŋu-tʉ́sɔŋ-Alimɑtɛ́, ɑ ɡʉ ńjʉ́ɔ Pilɑ́tɔ, ḿbúꞋ mbɔ́ mbɔ̌ wɛ́ ŋɡɔ ɑ pɛ́m, ɑ kɔk pfú-Yɛ́su nǔu tʉ́ mbɑ́ŋtɛ pɑ́ŋtɛ́nɛ. Yɔsɛ́p ẅîwɑ́ kɑ pɔ́ wɛcɔ́ ŋɡɑŋku-Yɛ́su, lɑ́ ḿbɔ́ ɛ́sɔ́tɛ sɔ́tɛ́nɛ, ḿbɔ́ ḿbɔ́k Pɑyúdɑ. Pilɑ́tɔ pɛ́m, Yɔsɛ́p ɡʉ kɔk pfú Yɛ́su.

³⁹Nikɔdɛ̂m ẅí ɑ kɑ pɔ́ wɛcɔ́ nɛtúꞋ, ńtɔ́ ŋ́ɡʉ ńjʉ́ɔ Yɛ́su lɑ́, ńtɔ́ yɛ́, ŋ́ɡẅɛɛ yɛcɔ́ ntɛ́ lɑmɛ́ndɑɑ yí pɛ́ kɑ tsup mɛtú mɛɡíi ńdɔk ŋ́ɡɔꞋ, mîmɑ́ mɛɡíi pɔ́ mîi pɔ́p ɑlɔwɛ̂s. Ɛ́ pɔ́ yúu kilɔ mɛɡɛ́m yɛ́tɑ́t.

⁴⁰Pɔ́p yɔsɛ̂p tíi pfú-Yɛ́su, ḿbɔ́ ŋ́kɛmtɛ lɑmɛ́ndɑɑ nǔu, ńdɔk yúu ndẅí ńzʉ́ʉ, pɑ́Ꞌ Pɑyúdɑ m̄bɔ́ ŋ́ɡʉ lẅɛꞋ pfú-ŋu, ŋ́ɡɛ pɔ́Ꞌɔ.

⁴¹Yɛcɔ́ ŋkɑ́Ꞌ kɑ pɔ́ nɛpɑt zʉꞋ yí pɛ́ kɑ kẅiinɛ Yɛ́su nǔu tʉ́ mbɑ́ŋtɛ pɑ́ŋtɛ́nɛ zúꞋu. Nɛcɔ́ nɛshi nɛ fí pɔ́ tsɛt ŋkɑ́Ꞌ ɛ̂wɑ́, mbɔ pɛ́ ŋkɑɑ mɔ́ zɛɛ ńníꞋ ŋu tsɛtú pɔ́.

⁴²Pɑ́Ꞌ Pɑyúdɑ kɑ pɔ́ ńniitɛ mbʉʉ yɔp ntɛ́ lɛ́Ꞌnji yɔ́p lɑ́, zɑꞋ-njí pɔ́ ńdɛɛ, pɛ́ tíi pfú-Yɛ́su ńdɔk ŋ́ɡʉ ńníꞋ tsɛt nɛshi ni pɛ́ kɑ pɛ́t ɛ́sʉꞋ nǔu ŋɡɔꞋ. MbíꞋŋɡɔ ɛ́ kɑ pɔ́ pɔ nɛpɑt zúꞋu.