Read Ngomba Jɑ̂ŋ 2 Bible Online

Jɑ̂ŋ 2 - Ngomba bible

Jɑ̂ŋ 2

¹Ɛ́ lɛɛ lɛ́Ꞌ pɛ́tɑ́t, yɛcɔ́ lɑ́ɑndɑ́ pɔ́ tʉ́sɔŋ-Kɑ́nɑ, tsɛt pɑk-ŋɡɔŋ-Ŋɡɑlilɛɛ, mɑ́ pɛ́ Yɛ́su pɔ́ zúꞋu.

²Pɛ́ pɛn ɛ́fúŋ Yɛ́su ɡúu pɔ́p ɡɑŋku pɛ́, zʉꞋ-lɑ́ɑndɑ́ ɛ̂yɑ́.

³MɛluꞋ ɡɛ ḿmɛ, mɑ́ pɛ́ Yɛ́su cú mbɔ̌ wɛ́ ŋɡɔ: «Pʉɔ kɑ́ pɛn ŋ́ɡẅɛɛ mɛluꞋ mi pɔ́p ɡʉ ńnɔ́ pɔ́.»

⁴Yɛ́su pʉ̈ɔt mbɔ̌ wɛ́ ŋɡɔ: «Mɑ́ɑmɑɑ, ɔ cẅɛ́ɛ kʉ̈ɔ́ mbɔ̌ mɔ? Yɑ́ɑ ŋkɑ́ pɛ́t kɛ́ kuꞋ.»

⁵Pɔ́Ꞌɔ lɑ́, mɑ́ wɛ ɡʉ ńcú mbɔ̌ pɑli pʉɔ ŋɡɔ ɑ lɑɑ ńcú ŋɡɔ: «Pʉʉ ɡɛ pɔ kʉ̈ɔ́ lɑ́ pʉʉ ɡɛ.»

⁶Mɛcɔ́ mɛkʉŋ-ŋɡɔꞋ pɔ́ zúꞋu mɛ́nɛ́ntúkú. Mi Pɑyúdɑ túꞋnɛ ŋki tsɛtú ńdɔk ḿbʉʉtɛ mbʉʉ yɔp lɑ ŋ́ɡúꞋlɛ Sɛ́. Pɑ́Ꞌ nɛpʉ́ʉ-lɑ́Ꞌ nɔ́p kɑ pɔ́ ḿbíkŋɛ. Ɛ́ kɑ pɔ́ tɛ mbɔ pɛ́ níꞋ ŋki mbɑ lɛ́tɑ ŋkʉ tsɛt tɑ́Ꞌ.

⁷Yɛ́su cú mbɔ̌ pɑli pʉɔ ŋɡɔ: «Pʉʉ níꞋ ŋki tsɛt mɛkʉŋ mɑ́ tɛ ɛ́ lúu.» Pɔ́p níꞋ ŋki tsɛtú tɛ ɛ́ lúu.

⁸Yɛ́su ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Pʉʉ shɔ́k wɛcɔ́ ŋkɔ̂ɔnɛ, ŋ́ɡʉ ŋ́ɡɑ́ mbɔ̌ ŋu ẅí ɑ ntɑŋ-ndínɑ.» Pɔ́p shɔ́k ŋ́ɡʉ ŋ́ɡɑ́ mbɔ̌ wɛ́.

⁹A zẅíꞋ ŋki ẅí ɛ́ shʉɔtnɛ́nɛ ńtsʉ́Ꞌ mɛluꞋ, ḿbɔɔ pɔ́ ńjí zʉꞋ yí mîmɑ́ mɛluꞋ fúnɛ zúꞋu pɔ́, lɑ́ pɑli pʉɔ pínɛ pɔ́p lɑ́Ꞌnɛ ńtúꞋ ŋki pɔ́ ńjí. Ŋu ẅí ɑ ntɑŋ-ndínɑ, fúŋ ŋu ẅí pɛ́ ɡɛnɛ lɑ́ɑndɑ́ yɛ́,

¹⁰ńcú mbɔ̌ wɛ́ ŋɡɔ: «Pɛ́ lɔ ḿbiitɛ ŋ́ɡɑ́ pɔ mɛluꞋ sʉ́Ꞌnɛ, tɛ pɛ́ nɔ́ tɛꞋ, lɑ́ pɛ́ ɡɑ́ mi ɛ́ nɑꞋ ḿmɛɛ mɛɛnɛ. Lɑ́ ŋ́ɡʉ nǔu ɡu, mbɔ yɔ yú ŋkɑ́ yi ɔ ɡɑ́nɛ mɛluꞋ sʉ́Ꞌnɛ mbɔ̌ pʉɔ?»

¹¹Yɔ pɑ́Ꞌ Yɛ́su kɑ zɛnɛ nɛɡɛ mɛnu mɑ̌ɑmɑɑnɛ. Ɛ́ kɑ pɔ́ Kɑ́nɑ, tsɛt pɑk-ŋɡɔŋ-Ŋɡɑlilɛɛ, Yɛ́su lɔk pɔ́Ꞌɔ, ńdɛꞋlɛ nɛɡúꞋ wɛ. Gɑŋku pɛ́ zɑ́p tʉ́m nǔu wɛ́.

¹²Yɔ nu lɛɛ, Yɛ́su pɔ́p mɑ́ wɛ, pɔ́p pɔ́ɔpɛ́mɑ́ pɛ́, ŋ́ɡɛ ɡɑŋku pɛ́, ɡʉ nɛ́ tʉ́sɔŋ-Kɑpɛɛnɑwúm, ŋ́kúu zúꞋu, ńnɑ́ŋ pɔ mɛcɔ́ mɛlɛ́Ꞌ.

¹³Ndínɑ-Pɑ́skɑ-pɑyúdɑ kɑ pɔ́ ḿbɑ́ɑtɛ, Yɛ́su ɡɔ́ɔ ŋ́kɛ́ ḿbʉʉ nɛ́ Yɛlúsɑlɛm,

¹⁴ŋ́kúu tɛtɑ́ɑ-ndɑ́-nɔŋpɔꞋ, ńjʉ́ɔ pʉɔ pɔ́ tsɛtú ḿbɔ́ ɛ́fɛn pɛfɔŋ, pɛcɔ́ pɔ́ ɛ́fɛn mɛnjinjɔ, pɛcɔ́ pɔ́ ɛ́fɛn pɛpuutɛ, mbɑ pɑkúp ŋkɑ́p nɑ́ŋtɛ sɛ́.

¹⁵Pɔ́Ꞌɔ lɑ́, Yɛ́su ɡɔ́ɔ ŋ́kɛ́ ńdɔk mɛŋkʉ ńniitɛ ŋɡwɑɑ, ɛ́fú tsɛt tɛtɑ́ɑ-ndɑ́-nɔŋpɔꞋ, ńzuŋ pʉɔ ɛ̂pɑ́ pɔ́p mɛnjinjɔ mɔ́p, pɔ́p pɛfɔŋ, ńtsʉ́ʉ mɛŋkɔꞋ mɔ́p ḿmɛꞋ, ŋkɑ́p pʉɔtnɛ sɛ́,

¹⁶ńcú mbɔ̌ pɑfɛn pɛpuutɛ ŋɡɔ: «Pʉʉ lɔk yúu mɑ́ ɛ́fú zɑꞋnɛ ŋ́ɡʉ! Pʉʉ pɑ́ɑ nɛlɔk zʉꞋ-Tɑ̌ɑ mɔ ŋ́ɡɛ zʉꞋ-mɛtɑ́ɑ.»

¹⁷Gɑŋku-Yɛ́su ɡɔ́ɔ ŋ́kɛ́ ŋ́kẅíitɛ zʉꞋ-ŋwɑꞋnɛ-ndɛn kɑɑ yi ɛ́ cúnɛ ŋɡɔ: «Mɔ, ŋ kɔŋ zʉꞋ yú kɔŋnɛ tɛ ŋ ɡʉ ńdɑ́Ꞌ ḿpfú pɔ nǔu.»

¹⁸Pɑsɑ́Ꞌlɑ́Ꞌ-pɑyúdɑ ɡɔ́ɔ ŋ́kɛ́ ńcú mbɔ̌ Yɛ́su ŋɡɔ: «Gɛ ndɑɑkɑ́jʉ́ɔ nu mbi pɛk ńdɔk ńnyɛt wɛ́k ŋɡɔ pɛ́ kɑ ɡɑ́ wú nɛ́ mɛtʉʉ nɛɡɛ yúu mi ɔ ɡɛnɛ lɑɑ.»

¹⁹Yɛ́su tsɔ́Ꞌ mbɔ̌ pɔ́p ŋɡɔ: «Pʉʉ kɛm ndɑ́-nɔŋpɔꞋ yɔ, n dɔk lɛ́Ꞌ pɛtɑ́t, ḿbʉꞋ ńtík tíknɛ.»

²⁰Pɔ́p cú mbɔ̌ wɛ́ ŋɡɔ: «Pɛ́ kɑ lɔk ŋɡuꞋ ntsɔ̌pɛ́nɛ́ntúkú nɛ́ mɛɡɛ́mɛ́nɛ́kwɑ, ŋ́kút ndɑ́-nɔŋpɔꞋ yɔ, ŋ́ɡʉ nǔu ɡu, ɔ cú ŋɡɔ mbɔ́ ɔ lɔk lɛ́Ꞌ pɛtɑ́t ḿbʉꞋ ńtík ɔɔ?»

²¹Lɑ́, Yɛ́su cú pɑ́Ꞌɑ, ndɑ́-nɔŋpɔꞋ yi ɑ kẅíinɛ pɔ́ pɔ túmbʉʉ yɛ.

²²Ɛ́ yɛ́tɛ́ lɑ́ ɑ kɑ zẅíimɛ nǔu nɛvú, ɡɑŋku pɛ́ kẅíitɛ ŋɡɔ ɑ kɑ cú yɔ nu, ŋ́ɡɔ́ɔ ŋ́kɛ́ ḿbɛ́m, ḿbɛn ḿbɛ́m yi ŋwɑꞋnɛ-ndɛn kɑɑ kɑ cúnɛ nǔu wɛ́.

²³Yɛ́su pɛ́t ḿbɔ́ pɔ Yɛlúsɑlɛm, pɛ́ pɔ́ ńjʉ́ ndínɑ-pɑ́skɑ-pɑyúdɑ, lɑ́Ꞌ jʉ́ɔ mɛnu mɑ̌ɑmɑɑnɛ mi ɑ ɡɛnɛ, pʉɔ tɛ ńzɑ́ɑ zɑ́p tʉ́m nǔu wɛ́.

²⁴Lɑ́ Yɛ́su pɔɔ mɛꞋ mbʉʉ yɛ mbɔ̌ pɔ́p pɔ́, mbíꞋŋɡɔ ɑ sɛ́ ńjí pɑ́Ꞌ pɔ́p pɔ́nɛ pɛtsʉʉ.

²⁵A ŋkɑɑ pɔ́ ńtsɑ́ɑ ŋɡɔ pɛ́ kyɛ́Ꞌtɛ kyɛ́Ꞌtɛ́nɛ ɛ́sẅíi wɛ́ pɔ́. KwɑꞋ jʉ́ ḿbɔ́ ńjí yúu mi ɛ́ tsɛt tʉ́m-ŋumɛsɔŋ.