Read Ngomba Jɑ̂ŋ 20 Bible Online

Jɑ̂ŋ 20 - Ngomba bible

Jɑ̂ŋ 20

¹Ɛ́ ɡɛ ḿbɔ́ Sɔ́ndii, nduŋmbi lɛ́Ꞌlɑ́Ꞌ nǔu ŋɡɑplɑ́Ꞌ, lɑ́ ḿbɛ́t ḿbɔ́ pɔ mbɑꞋmbɑꞋɑ́, zʉꞋ pɛ́t kɛ́ fúk, Mɑlíyɑ-Mɑkdɑlɑ ɡʉ zʉꞋ-nɛshi, ŋ́kúu zúꞋu, ńjʉ́ɔ mbɔ pɛ́ lɑ́Ꞌ ɛ́fú ntsu-nɛshi, ŋ́kẅɛ́Ꞌlɛ ŋɡɔꞋ.

²A kʉ̈ɔ́, ŋ́ɡʉ ńjʉ́ɔ Símɔ̂ŋ Pyɛ̂ pɔ́p wɛcɔ́ ŋɡɑŋku-Yɛ́su wɑ́ ẅi ɑ kɑ pɔ́ ŋ́kɔŋ wɛ́ tɛꞋ lɑ́, ńcú mbɔ̌ pɔ́p ŋɡɔ: «Pɛ́ lɑ́Ꞌ ɛ́fú tsɛt nɛshi ɛ̂nɑ́, ńcẅɛɛtɛ pfú-Tsɑpʉɔ. Pɛk kɑ́ pɔ́ ńjí zʉꞋ yi pɛ́ lɑ́Ꞌnɛ ńzɑ́p zúꞋu pɔ́.»

³Pyɛ̂ pɔ́p ẅîwɑ́ ŋɡɑŋku cẅɛt, ŋ́ɡʉ zʉꞋ-nɛshi.

⁴Pɔ́p pɛ́pɑ́ kɑ tɛmtɛ ḿbɔ́ ŋ́kʉɔ ndʉ́ɔlɛ́, lɑ́ ŋɡɑŋku-Yɛ́su ɛ̂wɑ́ zɑ́Ꞌ mbi pyɛ̂, ḿbiitɛ zʉꞋ-nɛshi.

⁵Ńtʉɔ́ŋɛ tú yɛ́, ńjʉ́ɔ yúu ndẅí, ɛ́ pɔ́ tsɛt nɛshi, lɑ́ ŋ́kɛ́ mbɔɔ tsɛtú kúu.

⁶Símɔ̂ŋ Pyɛ̂ ẅí ɑ kɑ pɔ́nɛ nzʉʉ ńzuŋtɛ ńtɔ́, ńjɛ́Ꞌ ŋ́kúu tsɛt nɛshi.

⁷Ńjʉ́ɔ yúu ndẅí yi pɛ́ kɑ zɑ́pnɛ nǔu tú-Yɛ́su, ɛ́ pɔ́ yɛ́ kɑ́tɛ́nɛ, nɔɔ nǔu yɛ́ zʉꞋ.

⁸Wɛcɔ́ ŋɡɑŋku-Yɛ́su ẅí ɑ lɑ́Ꞌnɛ ḿbiitɛ ńtɔ́ kúu yɛ́ tsɛtú, ńjʉ́ɔ yúu mi ɛ́ lɛɛnɛ, ḿbɛ́m ŋɡɔ ɛ́ sẅíinu.

⁹Ɛ́ kɑ pɔ́ mbɑ ŋkɑ́ ɛ̂yɑ́, Pɔ́p pɛ́t kɛ́ zúꞋ yúu mi ŋwɑꞋnɛ-ndɛn kɑɑ kɑ lɔknɛ ńdɛꞌlɛ ŋɡɔ Yɛ́su ɡʉ ńdɑ́Ꞌ zẅíimɛ nǔu nɛvú.

¹⁰Ɛ́ lɛɛ pɔ́Ꞌɔ, Gɑŋku-Yɛ́su pɛn nzʉʉ.

¹¹Mɑlíyɑ tɔ́ ńtʉ́ʉ mbʉʉ nɛshi, ḿbɔ́ ŋ́kíi, ŋ́kíi lɑ́ ńtʉɔ́ŋɛ tú yɛ́, ńdíŋɛ tsɛt nɛshi.

¹²Ńjʉ́ɔ pɛcʉ̈ɔ́Ꞌ-Sɛ́ pɛ́pɑ́, pɔ́p mɑꞋ fúfú ndẅí, ńnɑ́ŋ zʉꞋ yí pɛ́ kɑ nɔŋnɛ pfú-Yɛ́su zúꞋu. Tɑ́Ꞌ nɑ́ŋ nǔu zʉꞋ yi tú yɛ́ kɑ pɔ́nɛ zúꞋu, wɛcɔ́ nɑ́ŋ nǔu zʉꞋ yi mɛku mɛ́ kɑ pɔ́nɛ zúꞋu.

¹³Pɔ́p cú mbɔ̌ wɛ́ ŋɡɔ: «Mɑ́mɔ́ɔ ɔ kíi kʉ̈ɔ́?» A pʉ̈ɔt mbɔ̌ pɔ́p ŋɡɔ: «Pɛ́ tíi pfú-Tsɑpʉɔ wɑɑ, m bɛn ḿbɔɔ ḿbɔ́ ńjí zʉꞋ yi pɛ́ lɑ́Ꞌnɛ ńzɑ́p zúꞋu pɔ́.»

¹⁴Ḿbɛ́t ńcú cúnɛ, ɛ́shɔtnɛ, ńjʉ́ɔ Yɛ́su tʉ́ʉ zúꞋu, lɑ́ ɑ kɛ́ mbɔɔ ńjí ŋɡɔ ɑ Yɛ́su pɔ́.

¹⁵Yɛ́su cú nɛ́ jʉ́ ŋɡɔ: «Mɑ́mɔ́ɔ, ɔ kíi ku? Ɔ lɔɔ wɔ̌?» Lɑ́ ɑ ŋ́kwɑŋɛ ŋɡɔ kɛ ɑ pɔ́ pɔ ŋu ẅí ɑ pyɛ́pnɛ ŋkɑ́Ꞌŋɡɑ́ɑtɛ ɔɔ, ńcú nɛ́ jʉ́ ŋɡɔ: «Ndɛ, ɛ́ lɑɑ ḿbɔ́ yi ɡu lɑ́Ꞌnɛ tíi pfú-Yɛ́su, ɔ lɛꞋlɛ wɑ́ɑ nɛ zʉꞋ yí ɔ nɔŋnɛ zúꞋu, ŋ ɡʉ, tíi.»

¹⁶Yɛ́su fúŋ wɛ́ ŋɡɔ Mɑlíyɑ, ɑ shɔtnɛ ɛ́fúŋ wɛ́ nǔu sẅiŋɛ pʉɔ-Ɛbɛlʉ́ ńcú ŋɡɔ Lɑbuni, ńdɔk ńcú ŋɡɔ cícɑ.

¹⁷Yɛ́su cú mbɔ̌ wɛ́ ŋɡɔ: «Kɔɔ lɑ́ɑtɛ wɑ́ɑ, mbíꞋŋɡɔ n zɛɛ ḿbɛ́t kɛ́ kɔ́Ꞌ tɛ ŋ́kúu nɛjɔ́ŋ Tɑ̌ɑ. Kɛ́ ŋ́ɡʉ ńjʉ́ɔ pɔ́ɔpɛmɑ́ pɑ́ɑ, ńcú mbɔ̌ pɔ́p ŋɡɔ: Mɔ kɔ́Ꞌ nɛ́ nɛjɔ́ŋ Tɑ̌ɑ ẅi ɑ pɛn ḿbɔ́ Tɑ̌ɑ wʉʉ. Nɛjɔ́ŋ Sɛ́ wɑɑ ẅi ɑ pɛn ḿbɔ́ Sɛ́ wʉʉ.»

¹⁸Mɑlíyɑ-Mɑkdɑlɑ ɡʉ ńjʉ́ɔ ɡɑŋku-Yɛ́su, ɛ́sẅíi wɔ́p ŋɡɔ ɑ jʉ́ɔ Tsɑpʉɔ, ŋ́ɡɔ́ɔ ŋ́kɛ́ ńnɑ́ŋnɛ nu yi ɑ cúnɛ mbɔ̌ wɛ́.

¹⁹Ɛ́ pɔ́ ŋkɑ́ ntsuŋkẅɛ́Ꞌ, pɔ lɛ́Ꞌ ɛ̂yɑ́ yi ɛ́ kɑ pɔ́ sɔ́ndii, nduŋmbi lɛ́Ꞌlɑ́Ꞌ nǔu ŋɡɑp lɑ́Ꞌ, ɡɑŋku-Yɛ́su nɑ́ŋ ndɑ́, mbɔ pɔ́p lɑ́Ꞌ ńjʉ́ɔꞋ ntsundɑ́, ḿbɔ́k Pɑyúdɑ. Yɛ́su cẅɛt ńtʉ́ʉ tsɛtsɛt pɔ́p, ńcú nɛ́ pɔ́p ŋɡɔ: «Mbɔ́tnɛ pɔ́ nɛ́ pʉʉ.»

²⁰A cú pɔ́Ꞌɔ, ńnyɛt wɔ́p nɛ mbɔ́ mɛ́, mbɑ ɡúŋ mbʉʉ yɛ́. Gɑŋku pɛ́ jʉ́ɔ wɛ́, ńtsɑ́ɑtɛ tɛꞋ pɑ́Ꞌ pɔ́p jʉ́ɔnɛ Tsɑpʉɔ.

²¹Yɛ́su pɛn ńcú mbɔ̌ pɔ́p ŋɡɔ: «Mbɔ́tnɛ pɔ́ nɛ́ pʉʉ. Pɑ́Ꞌ Tɑ̌ɑ kɑ túunɛ wɑ́ɑ lɑ́, mɔ ńtúu wʉ́ʉ ɡúu.»

²²Ńcú pɔ́Ꞌɔ, ɛ́fɑ́k zẅikŋɛ-ntsu wɛ́ nǔu pɔ́p, ńcú ŋɡɔ: «Pʉʉ cẅɛ́ɛ zẅikŋɛ Lɛ́ɛnɛ́nɛ.

²³Pʉʉ lɑɑ ńdikŋɛ mɛnu kɛpɔŋ pʉɔ ŋ́ɡɑ́ mbɔ̌ pɔ́p, mbɔ Sɛ́ ɡʉ ńdikŋɛ yɛ́ likŋɛ́nɛ. Pʉʉ lɑɑ ńdʉꞋ nɛlikŋɛ mɛnu kɛpɔŋ pʉɔ ŋ́ɡɑ́ mbɔ̌ pɔ́p, mbɔ Sɛ́ ɡʉ ńdʉꞋ yɛ́ lʉꞋnɛ nɛlikŋɛ.»

²⁴Wɛcɔ́ ŋu nǔu pʉɔ ntsɔ̌ppɑ́, lík yɛ́ pɔ́ ŋɡɔ Tɔmɑ́shi, ńdɔk ńcú ŋɡɔ mɔ́ɔnɛfɑ́k, ɑ ŋkɑɑ jí ŋkɑ́ yi Yɛ́su kɑ tɔ́nɛ pɔ́.

²⁵A ɡɛ ńtɔ́, ɡɑŋku-Yɛ́su cú mbɔ̌ wɛ́ ŋɡɔ: «Pɛk lɑ́Ꞌ ńjʉ́ɔ Tsɑpʉɔ.» Tɔmɑ́shi tsɔ́Ꞌ mbɔ̌ pɔ́p ŋɡɔ: «Ŋ dɑɑ ḿbɛ́t kɛ́ jʉ́ɔ cʉ́ fʉ́ŋ yi mɛmbɑŋ kɑ ńníꞋnɛ nǔu mbɔ́ mɛ́ pɔ́, ḿbɛ́t kɛ́ ɛ́sɔ́klɛ tɔ̂pɔ́ wɑɑ nǔu zʉꞋ mɛmbɑŋ, ḿbɛ́t kɛ́ ɛ́sɔ́klɛ pɔ́ yɑ́ɑ nǔu ɡúŋ ŋɡíi wɛ́ pɔ́, m bɔɔ pɛ́m.»

²⁶Ɛ́ ɡɛ ńdɛɛ lɛ́Ꞌ pɛ́nɛ́fɔ́m, ɡɑŋku-Yɛ́su pɛn ńcúꞋlɛ sɛ́, Tɔmɑ́shi pɔ́ yɛ́ tsɛtsɛt pɔ́p, ɛ́ ɡɔ́ ḿbɔ́, mbɔ pɔ́p jʉ́ɔꞋ mɛntsu-ndɑ́, Yɛ́su cẅɛt ńtʉ́ʉ tsɛtsɛt pɔ́p ńcú mbɔ̌ pɔ́p ŋɡɔ: «Mbɔ́tnɛ pɔ́ nɛ́ pʉʉ.»

²⁷Ńcú mbɔ̌ Tɔmɑ́shi ŋɡɔ: «Ɛ́sɔ́klɛ mɔ́ɔ tɔ̂pɔ́ wu zɑꞋnɛ. Líŋɛ mbɔ́ mɑ́ɑ. Ɛ́sɔ́klɛ pɔ́ yú, ɛ́sɔ́klɛ nǔu ɡúŋ ŋ́ɡíi wɑ́ɑ. Kɔɔ pɛn ḿmʉ́Ꞌtɛ, pɛ́m ŋɡɔ ɑ kwɑꞋ mɔ.»

²⁸Tɔmɑ́shi tsɔ́Ꞌ mbɔ̌ wɛ́ ŋɡɔ: «Tsɑpʉɔ wɑɑ, ḿbɔ́ Sɛ́ wɑɑ.»

²⁹Yɛ́su tsɔ́Ꞌ mbɔ̌ wɛ́ ŋɡɔ: «Ɔ ɡɔ́ɔ ŋ́kɛ́ ḿbɛ́m, mbíꞋŋɡɔ ɔ jʉ́ɔ wɑ́ɑ. Pɛpɔ́ttú sʉ́Ꞌnɛ pʉɔ pínɛ pɔ́p pɛ́m kɛ zɛɛ ńjʉ́ɔ.»

³⁰Yɛ́su kɑ pɛn ŋ́ɡɛ mɛnu mɑ̌ɑmɑɑnɛ tɛ ɛ́ zɑ́ɑ zɑ́ɑnɛ mbi ɡɑŋku pɛ́. Pɛ́ ŋkɑɑ mîmɑ́ tsɛt yɔ ŋwɑꞋnɛ ŋwɑꞋnɛ.

³¹Lɑ́ pɛ́ kɑ kɛ́ ŋ́ŋwɑꞋnɛ mɔnɛ pɑ́Ꞌnɛ nɛpɔ́ yi pʉʉ ɡʉ ḿbɛ́m ŋɡɔ Yɛ́su Nzɑ́Ꞌŋkʉ ẅi Sɛ́ kɑ kɑꞋnɛ, ḿbɔ́ Mɔ́ɔ Sɛ́, ḿbɔ́ yi pʉʉ lɑɑ ḿbɛ́m, ɑ ɡɛ pʉʉ ŋ́ɡẅɛɛ luk kɛ́mɛ.