Read Ngomba Jɑ̂ŋ 21 Bible Online

Jɑ̂ŋ 21 - Ngomba bible

Jɑ̂ŋ 21

¹Yɛ́su ɡɛ ḿbɛn ńnyɛt mbʉʉ yɛ́ mbɔ̌ ɡɑŋku pɛ́. Ɛ́ ɡɔ́ ḿbɔ́ pɔ́p pɔ́ nɛpɑt ŋki-Tibɛlíyɑ́dɛ. Yúu mi ɛ́ kɑ lɛɛnɛ ɛ́ pʉ́ɔ.

²Pɛcɔ́ ɡɑŋku-Yɛ́su kɑ tɛmtɛ ńcúꞋlɛ tɑ́Ꞌ zʉꞋ. Yɔ kɑ pɔ́ Símɔ̂ŋ Pyɛ̂, nɛ́ Tɔmɑ́shi mɔ́ɔnɛfɑ́k, ŋ́ɡɛ Nɑtɑnɑyɛ̂l mɔ́ɔ-tʉ́sɔŋ-Kɑnɑ tsɛt pɑk-ŋɡɔŋ-Ŋɡɑlilɛɛ, nɛ́ mbɔ́ŋkʉ̈ɔ́ Zɛbɛdɛ̂, mbɑ pɛcɔ́ ɡɑŋku-Yɛ́su pɛ́pɑ́.

³Símɔ̂ŋ Pyɛ̂ nɑ́ŋ tɛ ńcú mbɔ̌ pɔ́p ŋɡɔ: «Ŋ ɡʉ ŋ́ɡʉ ḿmɑꞋ mɛshú.» Pɔ́p cú mbɔ̌ wɛ́ ŋɡɔ: «Pɛkŋɛ kɛ́ nɛ ŋ́ɡʉ.» Pɔ́p ɡʉ ŋ́kúu tsɛt kɑnúꞋ, lɑ́ ńdɛ́ lɑ́Ꞌ ḿmɔɔ ŋki, mbɔɔ sɑ̌ɑ yúu ɡẅɛɛ.

⁴Njí ɡɛ ŋ́kiɛ, Yɛ́su cẅɛt ńtʉ́ʉ ŋkɑŋ ŋki, lɑ́ ɡɑŋku pɛ́ pɔɔ jí ŋɡɔ ɑ jʉ́ pɔ́.

⁵A cú mbɔ̌ pɔ́p ŋɡɔ: «Pʉɔ pɑ́ɑ, tɛ pʉʉ zɛɛ ŋ́ɡẅɛɛ mbɑ tɑ́Ꞌ mbɑŋ shú?» Pɔ́p cú ŋɡɔ ŋɡɑ́ŋ.

⁶A cú mbɔ̌ pɔ́p ŋɡɔ: «Pʉʉ mɑꞋ mɛkʉ mbʉʉ kɑnúꞋ, nǔu ɡúŋ pɔ́ tʉʉ. Pʉʉ ɡʉ ŋ́ɡẅɛɛ mɛshú.» Pɔ́p mɑꞋ mɛŋkʉ, ŋ́ɡẅɛɛ mɛshú tɛ nɛpɛn ɛ́fú ŋki ɛ́shuŋ mɛŋkʉ pɛn mbɔɔ ɡú pɔ́.

⁷Ŋɡɑŋku ẅí Yɛ́su kɑ pɔ́ ŋ́kɔŋ wɛ́ tɛꞋ cú mbɔ̌ pyɛ̂ ŋɡɔ: «A pɑ́Ꞌɑ ḿbɔ́ Tsɑpʉɔ!» Pyɛ̂ zúꞋ ŋɡɔ ɑ Tsɑpʉɔ, ḿbɛ́ɛ ndẅí yɛ́ yi ɑ lɑ́Ꞌnɛ ɛ́sɔt, ḿmɑꞋ, ŋ́ɡɔ́ɔ ŋ́kɛ́ ńjɛ́Ꞌ ŋ́kúu ŋki.

⁸Pɛcɔ́ ɡɑŋku-Yɛ́su lɔk kɑnúꞋ ḿbɔ́ ńtɔ́, ḿbɔ́ ɛ́shuŋ mɛŋkʉ, mbɔ mɛshú kúu tsɛtú tɛ ńdúu. Pɔ́p ŋkɑɑ zɛɛ sîi ḿbɔ́ pɔ tɛ sɔŋ-ŋki pɔ́. Nɛfú mbʉʉ ŋki ŋ́kúu zʉꞋ yi pɔ́p kɑ pɔ́nɛ zúꞋu kɑ pɔ́ yúu mítɑ ŋkʉ.

⁹Pɔ́p tɔ́ ɛ́fú tsɛt kɑnúꞋ ńcẅɛt tɛ ńtʉ́ʉ sɛ́, ńjʉ́ɔ mɛɡʉ̈ɔꞋlɛ-múk, mbɔ pɛ́ zɑ́p mɛshú ŋ́ɡɛ mbɛlɛ̂ɛt ndǔ.

¹⁰Yɛ́su cú mbɔ̌ pɔ́p ŋɡɔ: «Pʉʉ lɔk mɛcɔ́ mɛshú mi pʉʉ ɡẅɛɛnɛ lɑ́ ńtɔ́.»

¹¹Símɔ̂ŋ Pyɛ̂ pɛn ŋ́kúu tsɛt kɑnúꞋ, ɛ́shuŋ mɛŋkʉ ḿmɑꞋ sɛ́, mɛshú pɔ́ tsɛtú mɛmɑ́ mɑ́ mbɑŋ ŋkʉ nɛ́ ntsɔ̌pɛ́tɑ́t nɛ́ mɛɡɛ́m yɛ́tɑɑ, ɛ́ zɛɛ ńzɑ́ɑ ndɛn wɔ lɑ́ mɛŋkʉ kɛ́ mbɔɔ ɛ́sɑnɛ.

¹²Yɛ́su cú mbɔ̌ pɔ́p ŋɡɔ: «Pʉʉ tɔ́ ŋ́kwɛ́t yúu.» Sɑ̌ɑ tɑ́Ꞌ ŋu nǔu ɡɑŋku-Yɛ́su pɔɔ sʉk tɛ ḿbíkŋɛ ŋɡɔ ɔ wɔ̌ pɔ́ ɔɔ? MbíꞋŋɡɔ pɔ́p kɑ pɔ́ ńjí ŋɡɔ ɑ Tsɑpʉɔ.

¹³Yɛ́su kẅɛ́Ꞌlɛ ńtɔ́, ḿbɛ́ɛ mbɛlɛ̂ɛt ŋ́ɡɑ́ nɛ́ pɔ́p, ḿbɛn ŋ́ɡɑ́ mɛshú mbɔ̌ pɔ́p.

¹⁴Yɛ́su nyɛt mbʉʉ yɛ́ mbɔ̌ ɡɑŋku pɛ́ pɑ́Ꞌnɛ, ɛ́ lɔk ḿbɔ́ ŋkɑ́ yɛ́tɑ́t pɑ́Ꞌ ɑ cẅɛtnɛ mbi pɔ́p tɛ ɛ́fú pɑ́Ꞌ ɑ kɑ zẅímɛ́nɛ nǔu nɛvú.

¹⁵Pɔ́p kwɛ́t yúu tɛ ɛ́ kuꞋ, Yɛ́su cú mbɔ̌ Símɔ̂ŋ Pyɛ̂ ŋɡɔ: «Símɔ̂ŋ, mɔ́ɔ-Jɑ̂ŋ, tɛ ɔ kɔŋ wɑ́ɑ tɛ ńtsɑ pʉɔ pɔ?» A pʉ̈ɔt ŋɡɔ ɔ́ɔŋ, mbɑ̌ɑ Tsɑpʉɔ, ɔ jí ŋɡɔ ŋ ŋkɔŋ wú. Yɛ́su cú mbɔ̌ wɛ́ ŋɡɔ: «Tsiinɛ pɔ́ɔ-njinjɔ pɑ́ɑ.»

¹⁶Ḿbɛn ḿbíkŋɛ wɛ́ nǔu ḿbɑ́ɑtɛ yɛ́pɑ́ ŋɡɔ: «Símɔ̂ŋ, mɔ́ɔ-Jɑ̂ŋ, tɛ ɔ kɔŋ wɑ́ɑ? A tsɔ́Ꞌ ŋɡɔ ɔ́ɔŋ, mbɑ̌ɑ Tsɑpʉɔ, ɔ jí ŋɡɔ ŋ kɔŋ wú.» Yɛ́su cú ŋɡɔ: «pyɛ́p njinjɔ yɑ́ɑ.»

¹⁷Ḿbɛn ḿbíkŋɛ wɛ́ nǔu ḿbɑ́ɑtɛ yɛ́tɑ́t ŋɡɔ: «Símɔ̂ŋ mɔ́ɔ-Jɑ̂ŋ tɛ ɔ kɔŋ wɑ́ɑ?» Shʉ́ pyɛ̂ kɔkŋɛ, mbíꞋŋɡɔ Yɛ́su píkŋɛ wɛ́ tɛ ŋkɑ́ yɛ́tɑ́t ŋɡɔ tɛ ɑ kɔŋ wɛ́ ɔɔ. A tsɔ́Ꞌ ŋɡɔ: «Tsɑpʉɔ, ɔ jí ŋɡɔŋ nu tsʉʉ, ɔ jí ŋɡɔ ŋ kɔŋ wú.» Yɛ́su cú mbɔ̌ wɛ́ ŋɡɔ: «Tsiinɛ njinjɔ yɑ́ɑ.»

¹⁸Lɑ́ ŋ kɛ́ ɛ́sẅíi wú, kwɑꞋ nɛ́nẅín, ɔ kɑ pɛ́t mɔ́ɔsuu, ɡu pɔ́nɛ ŋ́kút tɑp yú, ḿbɛn ḿbɔ́ ŋ́ɡʉ zʉꞋ yí ɔ kɔŋnɛ, ɔ ɡʉ ŋ́kɛ́ ḿbɔ́ tɛ ńdɛn, ńtsʉ́Ꞌ ŋ́kɑꞋ pɔ mbɔ́ mú, ŋ́ɡɑ́ tʉ́ lɑ ŋu ndɛꞋ kút tɑp yú, ńdɔk wú ŋ́ɡʉ zʉꞋ yi ɔ kɑ́ pɔ́ ŋ́kɔŋ pɔ́.

¹⁹Yɛ́su cú pɔ́Ꞌɔ, ńdɔk ńdɛꞌlɛ ntɛ́ nɛvú ni pyɛ̂ ɡʉ ŋ́ɡɛ ḿpfú yɛ́t, ɛ́ lɔk ŋ́ɡúꞋlɛ Sɛ́. Yɛ́su cú pɔ́Ꞌɔ, ḿmɛkŋɛ ŋɡɔ: «Cʉ́ɔ nzʉʉ mɔ.»

²⁰Pyɛ̂ shɔtnɛ, ńjʉ́ɔ ŋɡɑŋku ẅí Yɛ́su kɔŋnɛ wɛ́ tɛꞋ lɑ́, ẅi pɛ́ kɑ pɔ́ ńjʉ́ yúu, ɑ ŋɔ́nɛ nɛtúutɛ-Yɛ́su ḿbíkŋɛ wɛ́ ŋɡɔ Tsɑpʉɔ wɔ̌ ɡʉnɛ ɛ́fɛn wú?

²¹Pyɛ̂ jʉ́ɔ wɛ́ pɔ́Ꞌɔ, ḿbíkŋɛ Yɛ́su ŋɡɔ: «Tsɑpʉɔ, ŋ́ɡʉ nǔu wɔ ŋu, mbɔ kʉ̈ɔ́ ɡʉ ŋ́ɡɛ ŋ́ɡɛ wɛ́?»

²²Yɛ́su tsɔ́Ꞌ mbɔ̌ wɛ́ ŋɡɔ: «N dɑɑ ŋ́kɔŋ ŋɡɔ ɑ pɔ́ pɔ ɡú tɛ n dɑ́Ꞌ ḿbɛn nzʉʉ, mbɔ yú nu nǔu ḿbɔ́ kʉ̈ɔ́? Cʉ́ɔ yú pɔ nzʉʉ mɔ.»

²³Yɛ́su cú yɔ nu nǔu ẅîwɑ́ ŋɡɑŋku wɛ pɑ́Ꞌnɛ, pɑpɛ́m Yɛ́su tsʉʉ tsʉ́Ꞌ ḿbɔ́ ɛ́sẅíitɛ sẅíitɛ́nɛ ŋɡɔ ẅîwɑ́ ŋɡɑŋku wɛ kɛ́ lɑ́Ꞌ ḿpfú pɔ́. Lɑ́, mbɔ Yɛ́su ŋkɑɑ cú ŋɡɔ ɑ kɛ́ lɑ́Ꞌ ḿpfú pɔ́ pɔ́. Mbɔ ɑ cú pɔ ŋɡɔ, ɑ lɑɑ ŋ́kɔŋ ŋɡɔ ẅîwɑ́ ŋu pɔ́ pɔ ɡú tɛ ɑ lɑ́Ꞌ ḿbɛn ńtɔ́, mbɔ yɛ́ nu-pyɛ̂ nǔu ḿbɔ́ kʉ̈ɔ́ ɔɔ.

²⁴Ẅîwɑ́ ŋɡɑŋku-Yɛ́su ẅi pɛ́ cúnɛ, kɑ jʉ́ɔ mɔnɛ mɛnu, jʉ́ kɑ ŋwɑꞋnɛ́nɛ. Pɛk pɛn ḿbɔ́ ńjí ŋɡɔ nu yí ɑ cúnɛ ɛ́ nɛ́nẅín.

²⁵Yɛ́su kɑ pɛn ŋ́ɡɛ mɛcɔ́ mɛnu tɛ ɛ́ zɑ́ɑ zɑ́ɑnɛ. Ŋ kwɑŋɛ ŋɡɔ pɛ́ kɑ pɔ́ pɛꞋnɛ ḿbɛ́ɛtɛ ŋ́ŋwɑꞋnɛ, mbɔ ḿbɔ́ mɛŋwɑꞋnɛ zɑ́ɑ tɛ mbɔɔ kúu tsɛt mbí yɔ tsʉʉ pɔ́.