Read Ngomba Jɑ̂ŋ 3 Bible Online

Jɑ̂ŋ 3 - Ngomba bible

Jɑ̂ŋ 3

¹Wɛcɔ́ ŋkɛ́m-pɑyúdɑ kɑ pɔ́ tsɛtsɛt pɑfɑlísɑy, pɛ́ fúŋ wɛ́ ŋɡɔ Nikɔdɛ̂m.

²A ɡɛ ńtɔ́ yɛcɔ́ nɛtúꞋ, ńjʉ́ɔ Yɛ́su, ńcú mbɔ̌ wɛ́ ŋɡɔ: «Cícɑ, pɛk jí ŋɡɔ Sɛ́ kɑ túunɛ wú ŋɡɔ ɔ ɡʉ ńzíꞋ pʉɔ nɛ́ yúu. MbíꞋŋɡɔ ɛ́ lɑɑ ḿbɔ́ ŋu pɔɔ ɡɛ mɛnu mɑ̌ɑmɑɑnɛ mi ɔ ɡɛnɛ lɑɑ kɛ́ pɔ́ yi Sɛ́ túunɛ wɛ́ pɔ́.»

³Yɛ́su pʉ̈ɔt mbɔ̌ wɛ́ ŋɡɔ: «Lɑ́ ɛ sẅíi wú, kwɑꞋ nɛ́nẅín, ɛ́ lɑɑ ḿbɔ́ ŋu pɔɔ jʉ́ɔ nɛfɔɔ-Sɛ́ kɛ́ pɔ́ yi pɛ́ pɛn ḿbí wɛ́ yɛcɔ́ ŋkɑ́ pɔ́.»

⁴Nikɔdɛ̂m cú mbɔ̌ Yɛ́su ŋɡɔ: «Ɛ́ lɑɑ ḿbɔ́ ŋu pɔ́ ndʉ́m pɛ́ pɛn ḿbí wɛ́ ŋɡɔ́ku? Tɛ ɛ́ lɑɑ ḿbɔ́ ɑ pɛn ŋ́kúu nɛpɛm-mɑ́ wɛ pɛ́ pɛn ḿbí wɛ́?»

⁵Yɛ́su pʉ̈ɔt ŋɡɔ: «Lɑ́ ɛ sẅíi wú, kwɑꞋ nɛ́nẅín, ɛ́ lɑɑ ḿbɔ́ ŋu pɔɔ kúu tsɛt nu-nɛfɔɔ-Sɛ́ kɛ́ pɔ́ yi ɑ lɛɛ nǔu ŋki, mbɑ Zẅikŋɛ Lɛ́ɛnɛ́nɛ lɑ pɛ́ pí wɛ́ fí fí pɔ́.

⁶Ŋu ẅí ŋu mbɛ́ɛnɛ pɔ́p mɑŋɡɛ́ pínɛ wɛ́, ɑ pɔ́ pɔ ŋumɛsɔŋ, ŋu ẅí Zẅikŋɛ Lɛ́ɛnɛ́nɛ pínɛ wɛ́, ɑ ŋu-Zẅikŋɛ Lɛ́ɛnɛ́nɛ.»

⁷Pɑ́ɑ nɛmɑɑ pɑ́Ꞌ n cúnɛ mbɔ̌ ɡu ŋɡɔ pɛ́ ɡẅɛɛ nɛpɛn ḿbí wʉ́ʉ fí fí.

⁸Fɛfʉ̈ɔt lɛɛ zʉꞋ yí ɑ kɔŋnɛ, ɔ zúꞋ pɑ́Ꞌ ɑ lɛɛnɛ, lɑ́ ŋ́kɛ́ mbɔɔ jí zʉꞋ yí ɛ́ fúnɛ zúꞋu pɔ́, ŋ́kɛ́ mbɔɔ jí zʉꞋ yí ɛ́ ɡʉnɛ nɛ́ zúꞋu pɔ́. Ɛ́ pɛn ḿbɔ́ pɔ pɔ́Ꞌɔ, nǔu ŋu ẅí Zẅikŋɛ Lɛ́ɛnɛ́nɛ pínɛ wɛ́.

⁹Nikɔdɛ̂m ɡɔ́ɔ ŋ́kɛ́ ḿbíkŋɛ Yɛ́su ŋɡɔ: «Ɛ́ ɡɔ́ ḿbɔ́ pɔ́Ꞌɔ, ńdɛɛ ŋɡɔ́ku?»

¹⁰Yɛ́su pʉ̈ɔt mbɔ̌ wɛ́ ŋɡɔ: «Ɔ Íslɑɛ̂l ḿbɔ́ tɑ́Ꞌ cícɑ tɛ pɛ́ jí wú tɛꞋ, ɔ pɛn mbɔɔ yɔ nu jí?

¹¹Lɑ́ ɛ sẅíi wú, kwɑꞋ nɛ́nẅín, pɛk cú nu nǔu yúu mi pɛk sɛ́ ńjí, ńcú yi pɛk sɛ́ ńjí nǔu yúu mi pɛk kɑ jʉ́ɔnɛ, lɑ́ pʉʉ kɑ́ kɛ́ ḿbɛ́m nu yí pɛk cúnɛ pɔ́.»

¹²Mɔ ɛ́sẅíi wʉ́ʉ nɛ́ nu nǔu yúu mi ɛ́ lɛɛnɛ ndǔ tsɛ́tsɑ́Ꞌ, pʉʉ pɔɔ pɛ́m. N dɑɑ ɛ́sẅíi wʉ́ʉ nɛ́ nu ŋkɔ̂ɔnɛ nǔu yúu mi ɛ́ lɛɛnɛ tʉ́nɛ́pú, mbɔ pʉʉ ɡʉ ŋ́ɡɛ ŋɡɔ́ku lɑ ḿbɛ́m?

¹³Ŋumɛsɔŋ ŋkɑɑ mɔ́ kɔ́Ꞌ tʉ́nɛ́pú pɔ́, ndɑꞋ Mɔ́ɔ-Ŋu ẅí ɑ kɑ fúnɛ zúꞋu ńcúŋ.

¹⁴Ndʉ́ŋndʉŋ pɑ́Ꞌ Mɔ̌sɛ̂ɛ kɑ kútnɛ nɔ́ nǔu tɑ́Ꞌ tʉ́, ŋ́kɑꞋ ŋ́ɡɑ́ tʉ́, kɔ̂ŋtɛt lɑ́, ɛ́ sɛ́ ḿbíkŋɛ ŋɡɔ pɛ́ ɡɛ ŋ́kɑꞋ Mɔ́ɔ-Ŋu pɔ pɔ́Ꞌɔ.

¹⁵Ɛ́ lɛɛ pɔ́Ꞌɔ, ŋu ẅí ɑ zɑ́pnɛ tʉ́m yɛ́ nǔu wɛ́, ɡẅɛɛ luk kɛ́mɛ.

¹⁶MbíꞋŋɡɔ ntɛ́ yi Sɛ́ kɑ lɔknɛ ŋ́kɔŋ píimbí pɔ́Ꞌɔ kɑ pɔ́ tɛ ɑ ɡɑ́ Mɔ́ɔ nɛ wɛ́mɔ́Ꞌ, nɛpɔ́ yi wɛ́t ŋu lɑ́ ẅi ɑ zɑ́pnɛ tʉ́m yɛ́ nǔu Mɔ́ɔ nɛ ɛ̂wɑ́, kɛ́ lɑ́Ꞌ ńtíi ndɔɔ kɛ́mɛ pɔ́, ɑ ɡʉ ńdɑ́Ꞌ ŋ́ɡẅɛɛ pɔ luk kɛ́mɛ.

¹⁷Mbɑ pɔ́Ꞌɔ, Sɛ́ ŋkɑɑ zɛɛ ńtúu Mɔ́ɔ nɛ ndǔmbí ŋɡɔ ɑ ɡʉ ŋ́ŋɑk pʉɔmɛsɔŋ pɔ́. A kɑ túu wɛ́ nɛpɔ́ yi ɑ ɡʉ ŋ́ɡʉ ŋ́ɡɛ pʉɔmɛsɔŋ luk.

¹⁸Ŋu lɑɑ ńzɑ́p tʉ́m yɛ́ nǔu wɛ́, mbɔ pɛ́ ŋ́ɡʉ ŋ́ɡɛ ŋ́ŋɑk wɛ́ pɔ́. Ŋu ẅí ɑ kɛ́ mbɔɔ zɑ́p tʉ́m yɛ́ nǔu wɛ́ pɔ́ jí ŋɡɔ pɛ́ ŋɑk mɔ́ wɛ́, mbíꞋŋɡɔ ɑ kɑ́ zɑ́p tʉ́m yɛ́ nǔu mɔ́ɔ-Sɛ́ wɛ́mɔ́Ꞌ pɔ́.

¹⁹Pɛ́ ńdɑ́Ꞌ ŋ́ŋɑk pʉɔmɛsɔŋ ntɛ́ nu-kyɛꞋ yi ɛ́ kɑ tɔ́nɛ ndǔmbí, lɑ́ pʉɔmɛsɔŋ kɔŋ pɔ nzɛ́nzʉ́ʉ ńtsɑ kyɛꞌ ɛ̂yɑ́, mbíꞋŋɡɔ ŋɡɛnɛ mɛnu mɔ́p kɑ́ pɔŋ.

²⁰Ŋu lɑɑ ŋ́ɡɛ nu kɛpɔŋ, mbɔ ŋɡɑŋ ḿbɑɑ kyɛꞌ pɑɑnɛ, mbɔɔ kɔŋ nɛnɛn zʉꞋ yí kyɛꞌ zúꞋu pɔ́, ḿbɔ́k ŋɡɔ mɛnu mɛ́ ńcẅɛt mɑ́ntɑ́ɑ.

²¹Lɑ́, ŋu ẅí ɑ sɛ́ ńnɛn nǔu sɛ̂ndúŋ-nu-nɛ́nẅín, ɑ ńtɔ́ zʉꞋ yí kyɛꞌ zúꞋu, ńjí ŋɡɔ pɛ́ ɡʉ ńjʉ́ɔ ŋɡɔ ŋɡɛnɛ mɛnu mɛ́ fú pɔ nǔu pɑ́Ꞌ ɑ sɛ́ ńzúꞋ ntsu-Sɛ́.

²²Yɔ nu lɛɛ, Yɛ́su pɔ́p ɡɑŋku pɛ́ ɡʉ nɛ́ tsɛt pɑk-ŋɡɔŋ-Judɛ̂, pɔ́p pɛpɔ́p nɑꞋ ńzɛ ńnɑ́ŋ, Yɛ́su pɔ́ ńnuꞋ pʉɔ ŋki.

²³Jɑ̂ŋ pɔ́ yɛ́ Ɛnɔn, mbʉʉ Sɑlím ḿbɔ́ ńnuꞋ pʉɔ ŋki ɡúu, mbíꞋŋɡɔ ŋki kɑ pɔ́ zúꞋu tɛꞋ. Pʉɔ pɔ́ ńtɔ́, ɑ nuꞋ wɔ́p ŋki.

²⁴Ɛ́ kɑ ɡɔ́ ḿbɔ́, pɛ́ pɛ́t kɛ́ níꞋ Jɑ̂ŋ ndɑ́tsɑ́ŋ.

²⁵Yɛcɔ́ lɛ́Ꞌ, ŋu-pɑyúdɑ pɔ́p wɛcɔ́ ɡɑŋku-Jɑ̂ŋ nɑ́ŋ tɛ ńzɛ nɛzɔŋ nu nǔu nu nɛpʉʉtɛ mbʉʉ lɑ ŋ́ɡúꞋlɛ Sɛ́.

²⁶Gɑŋku-Jɑ̂ŋ ɡʉ ńjʉ́ɔ Jɑ̂ŋ, ńcú mbɔ̌ wɛ́ ŋɡɔ Cícɑ, ɔ sɛ́ ŋ́kẅíitɛ ŋu wɑ́ ẅi pʉʉnɛ kɑ pɔ́ nǔu yɛcɔ́ njʉ́n-ŋki-Juudɛŋ lɑ́? Ŋu wɑ́ ẅi ɔ kɑ cúnɛ nu yí ɔ jínɛ nǔu wɛ́ lɑ́? A sɛ́ ńnuꞋ yɛ́ pʉɔ ŋki ŋkɔ̂ɔnɛ, tɛ lɑ́Ꞌ mɛnɔɔ mɛnɔɔ pɔ́ ŋ́ɡʉ ńjʉ́ɔ pɔ wɛ́.

²⁷Jɑ̂ŋ tsɔ́Ꞌ mbɔ̌ pɔ́p ŋɡɔ: «Mbɔ ŋu pɔɔ ɡẅɛɛ yúu kɛ́ pɔ́ yi Sɛ́ ɡɑ́nɛ mbɔ̌ wɛ́ pɔ́.

²⁸KwɑꞋ pʉʉ yʉ́ʉ sɛ́ ńniitɛ ńjí ŋɡɔ ŋ kɑ cú ŋɡɔ ŋ kɑ́ pɔ́ Nzɑ́Ꞌŋkʉ ẅi Sɛ́ kɑ túunɛ pɔ́. Mɔ pɔ́ ŋu ẅí pɛ́ kɑ túunɛ ŋɡɔ m bɔ́ mbi yɛ́.

²⁹Ŋu ẅí ɑ zɔ́Ꞌnɛ mɑŋɡɛ́ pɔ́nɛ ndúu-mɑŋɡɛ́. Súu-ndúu tʉ́ʉ nɛjɔ́ŋ ndúu, ɑ cú nu, ɑ zúꞋ ŋɡi yɛ, nu pɔŋ wɛ́ tɛꞋ. Mɔ sɛ́ ńtsɑ́ɑtɛ yɑ́ɑ pɔ pɔ́Ꞌɔ, ḿbɛn ńtsɑ́ɑtɛ tɛ ḿmik tʉ́m yɑ́ɑ.

³⁰Ɛ́ sɛ́ ḿbíkŋɛ ŋɡɔ yɛ́ nu ɡɔ́ ŋ́kẅiꞋ ŋ́ɡʉ nɛ́ mbi, yɑ́ɑ pɔ́ ḿbɛn nɛ́ nzʉʉ.»

³¹Ŋu ẅí ɑ fúnɛ tʉ́nɛ́pú, ɑ lɛɛ pʉɔ pɛtsʉʉ. Ŋu ẅí ɑ ndǔ tsɛ́tsɑ́Ꞌ ɑ ŋu-tsɛ́tsɑ́Ꞌ, ḿbɛn ńcú nu pɔ nǔu mɛnu mí ɛ́ ndǔ tsɛ́tsɑ́Ꞌ. Lɑ́, ŋu ẅí ɑ fúnɛ tʉ́nɛ́pú ɑ lɛɛ pʉɔ tsʉʉ.

³²A cú nu yí ɑ jínɛ nǔu yúu mi ɑ kɑ jʉ́ɔnɛ mbɑ yi ɑ kɑ zúꞋnɛ, lɑ́ ŋu pɔɔ pɛ́m.

³³Ŋu ẅí ɑ pɛ́mnɛ nu yí ɑ cúnɛ, lɔk ńnyɛt ŋɡɔ Sɛ́ nɛ́nẅín nǔu mbɑ kʉ̈ɔ́ lɑ́.

³⁴Ŋu ẅí Sɛ́ túunɛ wɛ́, ɑ cú mɛnu mí ɛ́ fúnɛ mbɔ̌ Sɛ́, mbíꞋŋɡɔ Sɛ́ ɡɑ́ Zẅikŋɛ yɛ́ mbɔ̌ wɛ́ kɛ́ ndẅiklɛ.

³⁵Tɑ̌ɑ Sɛ́ kɔŋ Mɔ́ɔ nɛ, mbɔ ɑ kɑ níꞋ yúu tsʉʉ nǔu lɑ́ɑpɔ́-Mɔ́ɔ nɛ.

³⁶Ŋu lɑɑ ńzɑ́p tʉ́m yɛ́ nǔu mɔ́ɔ-Sɛ́, ŋɡɑŋ ɡẅɛɛ luk kɛ́mɛ. Ŋu ẅí ɑ kɛ́ mbɔɔ zɑ́p tʉ́m yɛ́ nǔu mɔ́ɔ-Sɛ́ pɔ́, ɑ kɛ́ lɑ́Ꞌ ŋ́ɡẅɛɛ kwɑꞋ luk pɔ́. Sɛ́ kɛ́ ḿbɛ́t ŋ́kẅiꞋ ńzɑ́ŋ lɔ́ŋ nǔu wɛ́ zɑ́ŋnɛ.