Read Ngomba Jɑ̂ŋ 4 Bible Online

Jɑ̂ŋ 4 - Ngomba bible

Jɑ̂ŋ 4

¹Pɑfɑlísɑy zúꞋ pɛ́ pɔ́ ńcú ŋɡɔ ndɛn pʉɔ pínɛ pɔ́p sɛ́ ńcʉ́ɔ nzʉʉ Yɛ́su lɛɛ pɛ́ Jɑ̂ŋ, ɑ pɛn ḿbɔ́ ńnuꞋ pʉɔ ŋki ɛ́ zɑ́ɑ ńtsɑ pɛ́ Jɑ̂ŋ. Ńzɛɛ ŋ́kɛ́ ŋ́ɡɔ ńcú pɔ́Ꞌɔ, kwɑꞋ Yɛ́su zɛɛ ḿbɔɔ ńnuꞋ pʉɔ ŋki pɔ́, ɡɑŋku pɛ́ pɔ́nɛ ńnuꞋ wɔ́p. Yɛ́su jí ŋɡɔ pɑfɑlísɑy zúꞋ, ɛ́fú tsɛt pɑk-ŋɡɔŋ-Judɛ̂ ńcʉ́ɔ sɛ̂ndúŋ nɛpɛn tsɛt pɑk-ŋɡɔŋ-Ŋɡɑlilɛɛ.

⁴Ɛ́ pɔ́ ḿbíkŋɛ ŋɡɔ ɑ jɛ́Ꞌ wɛ́ tsɛt pɑk-ŋɡɔŋ-Sɑmɑlîi.

⁵A ɡʉ tɛ ŋ́kúu tsɛt yɛcɔ́ tʉ́sɔŋ-pɑsɑmɑlîi, ẅi pɛ́ fúŋnɛ ŋɡɔ Sikɑɑ, ɛ́ pɔ́ mbʉʉ ŋkɑ́Ꞌ ẅi Yɑkɔ̂p kɑ ɡɑ́nɛ mbɔ̌ mɔ́ɔ nɛ Yɔsɛ̂p.

⁶Ŋki túŋnɛ ẅi pɛ́ kɑ pɔ́ ɛ́fúŋ nɛ́ ŋki-Yɑkɔ̂p pɔ́ zúꞋu. Yɛ́su ɡɔ́ ŋ́kúu zúꞋu, tẅɛp tsʉ́Ꞌ ŋ́kuꞋ kuꞋnɛ, mbɔ ɑ nɛn tɛ ŋ́kɑ́ɑ, ŋ́kɔkŋɛ ńnɑ́ŋ sɛ́ mbʉʉ-ŋki ɛ̂wɑ́.

⁷Wɛcɔ́ mɑŋɡɛ́-sɑmɑlîi tɔ́ nɛtúꞋ ŋki, Yɛ́su cú mbɔ̌ yɛ́ ŋɡɔ: «Sɛ́sẅíi, ɡɑ́ ŋki n nɔ́.»

⁸Ɛ́ ɡɔ́ ḿbɔ́, mbɔ ɡɑŋku-Yɛ́su ɡʉ tʉ́sɔŋ nɛzúu yúupɛjʉ́.

⁹Mɑŋɡɛ́-Sɑmɑlîi cú mbɔ̌ Yɛ́su ŋɡɔ: «Ɔ ŋu-Pɑyúdɑ, ḿbɛn ńdɔ́ɔ ŋki nɔ́nɛ mbɔ̌ mɔ mɑŋɡɛ́-Sɑmɑlîi ɔɔ?» A kɑ pɔ́ ńcú pɔ́Ꞌɔ, mbíꞋŋɡɔ pɑyúdɑ pɔ́p Pɑsɑmɑlîi ŋkɑɑ ḿbɔ́ ńzúꞋnɛ pɔ́.

¹⁰Yɛ́su pʉ̈ɔt mbɔ̌ wɛ́ ŋɡɔ, ɔ pɛ́Ꞌnɛ ńjí fuꞋ yí Sɛ́ ɡɑ́nɛ, ḿbɛn ńjí ŋu ẅí ɑ cúnɛ mbɔ̌ ɡu ŋɡɔ: «Gɑ́ ŋki n nɔ́, mbɔ ɡu tsʉ́Ꞌnɛ ńdɔ́ɔ ŋki nɔ́nɛ mbɔ̌ wɛ́, ɑ ɡɑ́ wú ŋki ẅí ɛ́ ɡɑ́nɛ luk.»

¹¹Mɑŋɡɛ́ ɛ̂wɑ́ cú mbɔ̌ Yɛ́su ŋɡɔ: «Ndɛ, ɔ zɛɛ mbɔɔ luŋɡɑ́ɑ ɡẅɛɛ, ŋki pɛn ḿbɔ́ tsɛt sɛ́ tɛꞋ pɑ́Ꞌɑ, ẅîwɑ́ ŋki ẅí ɛ́ ɡɑ́nɛ luk pɛn ɛ́fú pɔ ɡɔ́?

¹²Ńjí ŋɡɔ ɔ tsɑ tɑ̌ɑ wɛk Yɑkɔ̂p ẅí ɑ kɑ ɡɑ́nɛ wɔ ŋki túŋnɛ mbɔ̌ pɛk kɛkʉ̈ɔ́? Ŋ́ɡɔ́ ŋ́ɡɑ́, ńzɛɛ ńnɔ́ wɛ́, mbɔ́ŋkʉ̈ɔ́ pɛ́ pɔ́p mɛyúumɛku pɛn ńnɔ́ wɔ́p.»

¹³Yɛ́su pʉ̈ɔt mbɔ̌ wɛ́ ŋɡɔ: «Ŋu nɔ́ ẅîwɑ́, ɡɑ́k yɛ́ kɛ́ ḿbɛn ɛ́shí shínɛ.

¹⁴Lɑ́ ŋu lɑɑ nɔ́ ŋki ẅí mɔ ɡɑ́nɛ mbɔ̌ wɛ́, mbɔ ɡɑ́k yɛ́ kɛ́ lɑ́Ꞌ ḿbɛn ɛ́shí pɔ́. Mbɔ ŋki ɛ̂wɑ́ ɡʉ ŋ́kúu mbʉʉ yɛ́, ńtsʉ́Ꞌ pɔ nɛsɑ́Ꞌ ŋki, zʉꞋ yí ŋki ɡʉ ḿbɔ́ ɛ́fú zúꞋu ńcúŋ, ŋ́ɡɑ́ wɛ́ nɛ́ luk kɛ́mɛ.»

¹⁵Mɑŋɡɛ́ ɛ̂wɑ́ pʉ̈ɔt mbɔ̌ wɛ́ ŋɡɔ: «Ndɛ, ɡɑ́ ẅîwɑ́ ŋki mbɔ̌ mɔ, ɡɑ́k yɑ́ɑ pɔɔ lɑ́Ꞌ ḿbɛn ɛ́shí pɔ́. M bɔɔ pɛn ńtɔ́ zɑꞋnɛ ńtúꞋ ŋki pɔ́.»

¹⁶Yɛ́su pʉ̈ɔt mbɔ̌ wɛ́ ŋɡɔ: «Gʉ ɛ́fúŋ ndúu mu pʉʉnɛ tɔ́.»

¹⁷A pʉ̈ɔt mbɔ̌ wɛ́ ŋɡɔ: «Ŋ kɑ́ ɡẅɛɛ ndúu pɔ́.»

¹⁸Yɛ́su pʉ̈ɔt mbɔ̌ wɛ́ ŋɡɔ: «Ɔ ɡɛ sʉ́Ꞌnɛ nɛcú ŋɡɔ ɔ kɑ́ ɡẅɛɛ ndúu pɔ́. Ɔ kɑ ɡẅɛɛ tɛ pɔ́p pɔ́ pɛ́tɑɑ, lɑ́ ŋu ẅí pʉʉnɛ nɑ́ŋnɛ ŋkɔ̂ɔnɛ kɑ́ pɔ́ ndúu mu pɔ́. Ɔ cú pɑ́Ꞌɑ ɛ́ cẅɛt.»

¹⁹Mɑŋɡɛ́ ɛ̂wɑ́ ɡɔ́ɔ ŋ́kɛ́ ńcú mbɔ̌ wɛ́ ŋɡɔ: «Ndɛ, n jʉ́ɔ ŋɡɔ ɔ ŋɡɛ́mndʉ̈ɔ́Ꞌ-Sɛ́.»

²⁰Ŋ ɡɔ mbɑ, pɛtɑ́t pɛk kɑ pɔ́ ŋ́ɡúꞋlɛ Sɛ́ ndǔ nɛŋkɔ́Ꞌ nɔ, pʉʉ pɑyúdɑ pʉʉ tsʉ́Ꞌ ńcú pɔ ŋɡɔ: ZʉꞋ nɛɡúꞋlɛ Sɛ́ pɔ́ pɔ ndɑꞋ Yɛlúsɑlɛm pɛ́Ꞌnɛ pɛ́ zúꞋ yɛ́ wɔ̌?

²¹Yɛ́su cú mbɔ̌ wɛ́ ŋɡɔ: «Mɑ́ɑ, pɛ́m nu yí mɔ ńcú. Ŋkɑ́ sɛ́ ŋ́kuꞋ pɑ́Ꞌ pʉʉ kɛ́ pɛn ŋ́ɡúꞋlɛ Tɑ̌ɑ ndǔ nɔ nɛŋkɔ́Ꞌ pɔ́, mbɑ Yɛlúsɑlɛm pɔ́.

²²Pʉʉ ɡúꞋlɛ Sɛ́ kɛ́ jí wɛ́. Lɑ́, Pɛk pɑyúdɑ pɛk ɡúꞋlɛ Sɛ́ ẅi pɛk sɛ́ ńjí, mbíꞋŋɡɔ Sɛ́ lɛɛ nǔu pɑyúdɑ lɑ ŋ́ɡɛ pʉɔ luk.

²³Lɑ́, ŋkɑ́ sɛ́ ŋ́kuꞋ, tɛ ɛ́ zɛɛ mɔ́ ŋ́kuꞋ kuꞋnɛ, pɑ́Ꞌ kwɑꞋ pɑɡúꞋlɛ Sɛ́ ɡʉ ŋ́ɡɔ ŋ́ɡúꞋlɛ Sɛ́ Tɑ́t, ńdɔk pɔ Zẅikŋɛ yɛ́, lɑ ŋ́ɡúꞋlɛ wɛ́ tsɛt nu nɛ́nẅín. MbíꞋŋɡɔ ɛ́ ntɛ́ pɑɡúꞋlɛ pi Sɛ́ sɛ́ ńdɔɔ.

²⁴Sɛ́ pɔ́ pɔ zẅikŋɛ, ɛ́ sɛ́ ḿbíkŋɛ ŋɡɔ pʉɔ pínɛ pɔ́p ɡúꞋlɛ́nɛ wɛ́, ɡúꞋlɛ tsɛt nu nɛ́nẅín nǔu ntɛ́ yi Sɛ́ píkŋɛnɛ.»

²⁵Mɑŋɡɛ́ ɛ̂wɑ́ cú mbɔ̌ wɛ́ ŋɡɔ: «N jí ŋɡɔ Nzɑ́Ꞌŋkʉ Sɛ́ kɑ kɑꞋnɛ ẅí pɛ́ fúŋnɛ ŋɡɔ Kɛlístɔ sɛ́ ńtɔ́. A ɡʉ ńtɔ́, ŋ́kyɛ́Ꞌtɛ mbɑ kʉ̈ɔ́ lɑ́ ɛ́sẅíi wɛ́k.»

²⁶Yɛ́su cú mbɔ̌ wɛ́ ŋɡɔ: «Mɔ ẅí pûu sẅiŋɛ́nɛ lɑɑ, mɔ jʉ́.»

²⁷Yɛ́su pɔ́ ńcú pɔ́Ꞌɔ, ɡɑŋku pɛ́ tɔ́, ńjʉ́ɔ pɔ́p mɑŋɡɛ́ ɛ̂wɑ́ pɔ́ ɛ́sẅíŋɛ, ɛ́ kʉꞋnɛ wɔ́p tɛꞋ. Lɑ́, sɑ̌ɑ ŋu wɔp kɛ́ mbɔɔ kuꞋ nɛpíkŋɛ wɛ́ ŋɡɔ ɛ́ nu kʉ̈ɔ́ ɔɔ pɔ́, kɛ nɛcú ŋɡɔ pɔ́pmɛ sẅiŋɛ kʉ̈ɔ́ ɔɔ pɔ́.

²⁸Mɑŋɡɛ́ ɛ̂wɑ́ nɑ́ tʉ́ɔ-ŋki yɛ́ zúꞋu, ḿbɛn tʉ́sɔŋ, ńcú mbɔ̌ lɑ́Ꞌ ŋɡɔ:

²⁹«Pʉʉ tɔ́ ńjʉ́ɔ wɛcɔ́ ŋu ẅí ɑ sẅíinɛ wɑ́ɑ nɛ́ mɛnu tsʉʉ mí ŋ kɑ ɡɛnɛ. Tɛ ɑ kɑ́ pɔ́ pɔ Nzɑ́Ꞌŋkʉ ẅi Sɛ́ kɑ kɑꞋnɛ pɔ́ ɔɔ?»

³⁰Lɑ́Ꞌ fú tʉ́sɔŋ ńcẅɛt, ńtɔ́ nɛ nɛjɔ́ŋ-Yɛ́su.

³¹Ŋ́ɡɔ ńtɔ́ pɔ́Ꞌɔ, ɡɑŋku pɛ́ pɔ́ ńdẅɑklɛ wɛ́ ńcú ŋɡɔ: «Cícɑ, kwɛ́t mɔ́yúu lɑ́.»

³²Lɑ́ ɑ pʉ̈ɔt mbɔ̌ pɔ́p ŋɡɔ: «Ŋ ɡẅɛɛ yɛcɔ́ yúujʉ́ yi ŋ ɡʉ ńjʉ́, ɛ́ pɔ́ yi pʉʉ kɑ́ pɔ́ ńjí pɔ́.»

³³Gɑŋku pɛ́ zúꞋ pɔ́Ꞌɔ, ɛ́shɔtnɛ ḿbíkŋɛ tsɛtsɛt pɔ́p ŋɡɔ: «Wɛcɔ́ ŋu tsʉ́Ꞌ ńdɔk yúujʉ́ ńtɔ́ ŋ́ɡɑ́ mbɔ̌ wɛ́ kɛkʉ̈ɔ́?»

³⁴Yɛ́su cú mbɔ̌ pɔ́p ŋɡɔ: «Yɑ́ɑ yúujʉ́ pɔ́ pɔ nɛɡɛ yúu mi ŋu ẅí ɑ kɑ túunɛ wɑ́ɑ sɛ́ ŋ́kɔŋ, mbɑ nɛmɛkŋɛ fɑꞋ yí ɑ kɑ ɡɑ́nɛ mbɔ̌ mɔ.»

³⁵Pʉʉ ŋ́kɑɑnɛ ḿbɔ́ ńcú ŋɡɔ: «Ɛ́ tsʉꞋ ńjɑ́k pɛsɑŋ pɛ́nɛ́kwɑ, pɛ́ lɑk yúu pɔ́ ɔɔ? Lɑ́, ŋ ɡʉ ɛ́sẅíi wʉ́ʉ ɡúu ŋɡɔ: “Pʉʉ líŋɛ lɑ́ ńjʉ́ɔ, yúu tʉ̌ʉ tɛ ńtsʉ́Ꞌ ḿbíkŋɛ pɔ nɛlɑk.”»

³⁶Ŋu ẅí ɑ lɑknɛ yúu, ɑ sɛ́ ńcẅɛ́ɛ tsɔ́ꞋfɑꞋ yɛ́, ɛ́ pɔ́ pɑ́Ꞌ ɑ sɛ́ ńcúꞋlɛ yúu ńníꞋ tsɛt luk kɛ́mɛ. Nɛpɔ́ yi ŋu ɑ pinɛ pɔ́p ŋu ɑ lɑknɛ ɡʉ tɛmtɛ ńtsɑ́ɑtɛ.

³⁷Pɔ́Ꞌɔ, sɑknɛkɛt yí ɛ́ cúnɛ ŋɡɔ: «Ŋu ɑ pinɛ yúu ɡú, ndɔkyúu pɔ́ ɡú ɛ́ nɛ́nẅín.

³⁸Ŋ kɑ túu wʉ́ʉ nɛlɔk yúu mi pʉʉ ŋkɑɑ jʉ́ɔ yɛcɔ́ ŋɡʉ̈ɔ́Ꞌ nǔu ḿbi pɔ́, pɛcɔ́ pʉɔ kɑ jʉ́ɔ ŋɡʉ̈ɔ́Ꞌ, pʉʉ kɑ tɔ́ yʉ́ʉ, ńtsʉ́Ꞌ ńjʉ́ pii-fɑꞋ yɔ́p jʉ́nɛ.»

³⁹Ɛ́ kɑ fú nǔu sẅiŋɛ-mɑŋɡɛ́ ɛ̂wɑ́ yi ɑ kɑ pɔ́ ńcú ŋɡɔ: «A sẅíi wɑ́ɑ nɛ́ mbɑ kʉ̈ɔ́ lɑ́ yi ŋ kɑ ɡɛnɛ, Pʉɔ-Sɑmɑlîi tɛ ńzɑ́ɑ pi pɔ́p m̄bɔ́nɛ nǔu yîyɑ́ tʉ́sɔŋ zɑ́p tʉ́m nǔu Yɛ́su,

⁴⁰ɛ́ pɔ́Ꞌɔ lɑ́, pɔ́p tɔ́ tɛ ŋ́kúu nɛjɔ́ŋ Yɛ́su, ḿbúꞋ mbɔ́ mbɔ̌ wɛ́ ŋɡɔ pɔ́p pɛ́pɔ́p tsʉ́Ꞌnɛ ńnɑ́ŋ. Yɛ́su pɛ́m, ńnɑ́ŋ zúꞋu lɛ́Ꞌ pɛ́pɑ́.»

⁴¹Pʉɔ pɛn ŋ́kẅiꞋ ńzɑ́p tʉ́m nǔu wɛ́ tɛ ńzɑ́ɑ, ntɛ́ sẅiŋɛ yɛ́.

⁴²Ḿbɔ́ ńcú mbɔ̌ mɑŋɡɛ́ ɛ̂wɑ́ ŋɡɔ: «Pɛk kɑ́ pɛ́t ńzɑ́p tʉ́m nǔu Yɛ́su ntɛ́ pɔ sẅiŋɛ yú ndɑꞋ pɔ́, pɛk zɑ́p tʉ́m nǔu wɛ́ ŋkɔ̂ɔnɛ, mbíꞌŋɡɔ pɛk yɛ́k tsuŋ ńzúꞋ sẅiŋɛ yɛ́, lɑ ńjí ŋɡɔ ɑ ŋu ẅí ɑ ɡʉ ŋ́ɡɛ pʉɔmɛsɔŋ pínɛ pɔ́p ndǔmbí luk.»

⁴³Lɛ́Ꞌ pɛ́pɑ́ yɑ́ pɔ́ tɛ ńdɛɛ, Yɛ́su fú zúꞋu, ḿbɔ́ ŋ́ɡʉ tsɛt pɑk-ŋɡɔŋ-Ŋɡɑlilɛɛ.

⁴⁴Mbɔ jʉ́ nɛ́ túmbʉʉ yɛ́ kɑ cú ŋɡɔ: «Pɛ́ lɔɔ ŋ́ɡɑ́ mɛkuꞋ-ŋɡɛ́mndʉ̈ɔ́Ꞌ-Sɛ́ lɑ́Ꞌ pɔ́p pɔ́.»

⁴⁵Lɑ́ ŋ́ɡʉ tɛ ŋ́kúu Ŋɡɑlilɛɛ, pɑŋɡɑlilíyɑ kúkŋɛ wɛ́ sʉ́Ꞌnɛ. MbíꞋŋɡɔ pɔ́p kɑ ɡʉ ndínɑ Yɛlúsɑlɛm, ŋ́kúu zúꞋu, ńjʉ́ɔ mbɑ kʉ̈ɔ́ lɑ́ yi ɑ ḿbɔ́ ŋ́ɡɛ.

⁴⁶A pɛn tɛ ŋ́kúu Kɑ́nɑ pɔ́p Ŋɡɑlilɛɛ, ɛ́ pɔ́ tʉ́sɔŋ yi ɑ kɑ shɔtnɛ ŋki zúꞋu ńdɔk ŋ́ɡɛ mɛluꞋ lɑ́. Wɛcɔ́ ndʉ́m tsɛt fɑꞋ-ŋɡɔ́mɛnɑɑ pɔ́ tʉ́sɔŋ-Kɑpɛɛnɑwúm, mɔ́ɔ nɛ pɔ́ ŋ́ɡɔɔ.

⁴⁷A zúꞋ ŋɡɔ Yɛ́su fú Judɛ̂ ńtɔ́ Ŋɡɑlilɛɛ, ŋ́ɡʉ ńjʉ́ɔ wɛ́, ḿbúꞋ mbɔ́ mbɔ̌ wɛ́ ŋɡɔ ɑ cúŋ ńtɔ́, ŋ́ɡɛ mɔ́ɔ nɛ ẅí ɑ tsʉ́Ꞌ ḿpfú pfúnɛ fíitɛ.

⁴⁸Yɛ́su cú mbɔ̌ wɛ́ ŋɡɔ: «Pʉʉ lɑɑ mbɔɔ jʉ́ɔ mɛnu mɑ̌ɑmɑɑnɛ mi ɛ́ nyɛtnɛ mɛtʉʉ-Sɛ́ pɔ́, pɔ́p mɛŋkʉꞋnɛ nu pɔ́, pʉʉ pɔɔ lɑ́Ꞌ ńzɑ́p tʉ́m nǔu mɔ pɔ́!»

⁴⁹ŊɡɑŋfɑꞋ-ŋɡɔ́mnɑɑ ɛ̂wɑ́ cú mbɔ̌ wɛ́ ŋɡɔ: «Sɛ́sẅíi, Ndɛ, cúŋ ńjʉ́ɔ mɔ́ɔ wɑɑ lɑ ɑ pfú.»

⁵⁰Yɛ́su cú mbɔ̌ wɛ́ ŋɡɔ: «Gʉ!» Mɔ́ɔ nu fíitɛ. Wɔ ndʉ́m pɛ́m nu yí Yɛ́su cúnɛ mbɔ̌ yɛ́, ŋ́ɡʉ.

⁵¹A pɛ́t pɔ sɛ̂ndúŋ ńcúŋ ŋ́ɡʉ, ŋɡɑŋfɑꞋ wɛ tɔ́ ńzɑ́Ꞌ wɛ́, ɛ́sẅíi wɛ́ ŋɡɔ mɔ́ɔ nu fíitɛ.

⁵²A píkŋɛ wɔ́p nɛ́ ŋkɑ́ yi ɑ fíitɛ́nɛ, pɔ́p cú mbɔ̌ wɛ́ ŋɡɔ: «Ɛ́ ḿbɔ́ mbɔ́tnjí zɔ́n nǔu tɑ́Ꞌ nɛm, mbʉʉnút zɑ́Ꞌnɛ nǔu wɛ́.»

⁵³Tɑ́-mɔ́ɔ zúꞋ, ɛ́ lɔk ḿbɔ́ kwɑꞋ ŋkɑ́ yɑ́ yi Yɛ́su kɑ cúnɛ mbɔ̌ wɛ́ ŋɡɔ: «Mɔ́ɔ nɛ fíitɛ lɑ́.» A ɡɔ́ɔ ŋ́kɛ́ ńzɑ́p tʉ́m yɛ́ nǔu Yɛ́su, pɔ́p pʉɔ pɛ́ tsʉʉ tsʉʉ ndɑ́ yɛ́.

⁵⁴Yɛ́su ɡɛ yɔ nu mɑ̌ɑmɑɑnɛ, ŋkɑ́ yi ɑ fúnɛ Judɛ̂ ḿbɛn Ŋɡɑlilɛɛ pɑ́Ꞌɑ, ɛ́ lɔk ḿbɔ́ nu mɑ̌ɑmɑɑnɛ mbɑ́ɑtɛ yɛ́pɑ́ yi ɑ ɡɛnɛ.