Read Ngomba Jɑ̂ŋ 6 Bible Online

Jɑ̂ŋ 6 - Ngomba bible

Jɑ̂ŋ 6

¹Mɔ mɛnu lɛɛ, Yɛ́su túu yɛcɔ́ mɑ́mɑ́ pɔ̂lfúꞋ-ŋki ni ɛ́ Ŋɡɑlilɛɛ, pɛ́ pɛn ɛ́fúŋ ŋɡɔ mɑ́mɑ́-pɔ̂lfúꞋ-Tibɛ́liyɑ́dɛ ŋ́ɡʉ nɛ́ yɛcɔ́ njʉ́n.

²Nɔɔ-lɑ́Ꞌ pɔ́ ńcʉ́ɔ nzʉʉ yɛ́ tɛꞋ, mbíꞋŋɡɔ pʉɔ kɑ pɔ́ ńjʉ́ɔ mɛnu mɑ̌ɑmɑɑnɛ mi ɑ kɑ pɔ́ ŋ́ɡɛ nǔu ɡɑŋɡɔɔ.

³Yɛ́su ŋ́kɔ́Ꞌ ndǔ nɛcɔ́ nɛŋkɔ́Ꞌ, pɔ́p ɡɑŋku pɛ́ nɑ́ŋ sɛ́.

⁴Ɛ́ ɡɔ́ ḿbɔ́, ŋkɑ́ yi pɑyúdɑ ɡʉ ńjʉ́ ndínɑ wɔp ẅí pɛ́ fúŋnɛ ŋɡɔ Pɑ́skɑ (Mbɔ pɛ́ jʉ́ɔ nǔu mɛkɛm mɛmbɑ́ nǔu mɛŋkɑŋ ntsɔ̌pɛ́tɑ́t) pɔ́ ŋ́kuꞋ.

⁵Yɛ́su nɑ́ŋ tɛ ḿbʉꞋ tú yɛ́ ńjʉ́ɔ mɑ́mɑ́ nɔɔ-lɑ́Ꞌ pɔ́ ńtɔ́ nɛ́ nɛjɔ́ŋ yɛ́, ɑ cú mbɔ̌ Filîp ŋɡɔ: «Pɛkŋɛ ɡʉ ŋ́ɡʉ ɡɔ́ ńzúu mbɛlɛ̂ɛt lɑ ńdɔk ńzẅík wɔ́p?»

⁶A kɑ pɔ́ ńcú pɔ́Ꞌɔ, ńdɔk ŋ́kwɑꞋlɛ wɛ́ kwɑꞋnɛ́nɛ. KwɑꞋ jʉ́ Yɛ́su pɔ́ ńjí yúu mi ɑ ɡʉ ḿbɛn ŋ́ɡɛ.

⁷Filîp pʉ̈ɔt ŋɡɔ: «Pɛ́ lɑɑ ńzúu mbɛlɛ̂ɛt pɔ yɛ́ mɛndɛ́níɛ[4] ŋkʉ yɛ́pɑ́, ŋu wɔp kwɛ́t mbɔ ɛ́ ŋ́kúu nǔu lʉ́m yɛ́?»

⁸Wɛcɔ́ ŋɡɑŋku-Yɛ́su pɔ́ zúꞋu, lík yɛ́ pɔ́ ŋɡɔ Ndɛlɛ́yɑ, ɑ pɔ́ mɔ́ɔmɑ́ pɛ́ Símɔ̂ŋ Pyɛ̂. A cú mbɔ̌ Yɛ́su ŋɡɔ:

⁹«Wɛcɔ́ mɔ́ɔ mbɛ́ɛnɛ zɑꞋnɛ, ŋ́ɡẅɛɛ mbɛlɛ̂ɛt[5] ntɑ́Ꞌ yɛtɑɑ, ŋ́ɡɛ mɛshú mbɑŋ yɛ́pɑ́, yîyɑ́ yúu kɛ́ ŋ́kuꞋ kʉ̈ɔ́ nǔu ndɛn lɑ́Ꞌ yɔ?»

¹⁰Yɛ́su cú ŋɡɔ: «Pʉʉ ɡɛ lɑ́Ꞌ nɑ́ŋtɛ sɛ́.» Nɛɡíi m̄bɔ́ zúꞋu. Pʉɔ nɑ́ŋtɛ sɛ́, ḿbɔ́ mbɛ́ɛnɛ yúu ntsɑ́Ꞌ yɛ́tɑɑ.

¹¹Yɛ́su pɛ́ɛ mbɛlɛ̂ɛt, ŋ́ɡɑ́ pɑꞋlɑ́ mbɔ̌ Sɛ́, ŋ́ɡɑp mbɔ̌ lɑ́Ꞌ, ḿbɛn ŋ́ɡɛ pɔ pɔ́Ꞌɔ nǔu mɛshú, mbɑ wɔ̌ lɑ́ kwɛ́t yúu pɑ́Ꞌ ɑ kɔŋnɛ.

¹²Pʉɔ tsʉʉ kwɛ́t yúu tɛ ńzwɛ́t, Yɛ́su cú mbɔ̌ ɡɑŋku pɛ́ ŋɡɔ: «Pʉʉ lɑk mɛkɛm mɛ́ mi ɛ́ vuꞋnɛ tɛ yúu pɔɔ pɛ́.»

¹³Pɔ́p lɑk mɛkɛm mɛ́ mi ɛ́ vuꞋnɛ nǔu mbɛlɛ̂ɛt yi pʉɔ kwɛ́tnɛ ntɑ́Ꞌ yɛ́tɑ́ɑ lɑ́, ɛ́ lúu tsɛt pɛtúŋ ntsɔ̌ppɑ́ nɛ́ nɛɡɛ́m.

¹⁴Lɑ́Ꞌ jʉ́ɔ nu mɑ̌ɑmɑɑnɛ yi Yɛ́su ɡɛnɛ, ńcú ŋɡɔ: «Ŋu wɔ kwɑꞋ ŋɡɛ́mndʉ̈ɔ́Ꞌ-Sɛ́ ẅi pɛ́ kɑ pɔ́ ńzẅíꞋlɛ ŋɡɔ ɑ tɔ́ ndǔmbí.»

¹⁵Yɛ́su jʉ́ɔ shʉ́ yi pɔ́p sɛ́ ńdɔɔ nɛɡẅɛɛ wɛ́ ńdɔk wɛ́ ŋ́ɡɛ fɔɔ, ḿbɛn ńnɑ́ wɔ́p ŋ́ɡʉ nɛ́ ndǔ nɛŋkɔ́Ꞌ zɛ́nɛjʉ́.

¹⁶Ɛ́ ɡɛ ḿbɔ́ ntsuŋkẅɛ́Ꞌ, ɡɑŋku-Yɛ́su cúŋ ŋ́ɡʉ nɛ́ mbʉʉ mɑ́mɑ́ nɛtʉŋ-ŋki-Ŋɡɑlilɛɛ.

¹⁷Pɔ́p kúu tsɛt yɛcɔ́ mɑ́mɑ́ kɑnúꞋ. Ḿbɔ́ ŋ́ɡʉ nɛ́ Kɑpɛɛnɑwûm nǔu yɛcɔ́ njʉ́n. Mbɔ túꞋ sʉ́ʉ mɔ́, lɑ́ Yɛ́su pɛ́t pɔ kɛ́ kẅɛ́ɛtɛ wɔ́p.

¹⁸Yɛcɔ́ mɑ́mɑ́ fɛfʉ̈ɔt pɔ́ ńtsʉ́Ꞌnɛ tɛꞋ, ŋki pɔ́ ḿbʉʉnɛ.

¹⁹Pɔ́p lɔk kɑnúꞋ ńnɛn yúu pɛkílumítɑ pɛ́tɑɑ kɛ pɛ́nɛ́túkú ɔɔ, ńjʉ́ɔ Yɛ́su pɔ́ ńnɛn ndǔ ŋki ńtɔ́, pɔ́p pɔ́k.

²⁰Lɑ́ Yɛ́su cú mbɔ̌ pɔ́p ŋɡɔ: «kɔɔ pʉʉ pɔ́k, ɑ pɔ́ mɔ.»

²¹Pɔ́p pɔ́ ńdɔɔ nɛɡɛ ɑ kúu tsɛt kɑnúꞋ, ŋ́ɡɔ́ ńjʉ́ɔ, mbɔ pɛ́ kúu mɔ mbʉʉ-ŋki.

²²Njí ɡɛ ŋ́kiɛ, lɑ́Ꞌ yi pɛ́ lɑ́Ꞌnɛ ńnɑ́ nǔu yɛcɔ́ njʉ́n-ŋki kẅíitɛ ŋɡɔ kɑnúꞋ lɑ́Ꞌ ḿbɔ́ sɛ́ ndɑꞋ wɛ́mɔ́Ꞌ, ɡɑŋku-Yɛ́su pɛn ŋ́ɡɔ ńdɔk ŋ́ɡʉ, pɔ́p pɛ́ Yɛ́su pɔɔnɛ pɔ́. Pɔ́p ɡʉ pɔ zɛ́nɛ pɔ́p.

²³Mɛcɔ́ mɛkɑnúꞋ pɛn ɛ́fú Tibɛ́liyɑ́dɛ, ńtɔ́ zʉꞋ yí Yɛ́su kɑ tʉ́ʉnɛ zúꞋu, ŋ́ɡɑ́ pɑꞋlɑ́ mbɔ̌ Sɛ́ nǔu mbɛlɛ̂ɛt, ŋ́ɡɑptɛ pɔ́p kwɛ́t lɑ́.

²⁴Ɛ́ ɡɔ́ ḿbɔ́, mbɔ lɑ́Ꞌ yîyɑ́ jʉ́ɔ ŋɡɔ Yɛ́su kɑ́ pɛ́t zúꞋu pɔ́, ɡɑŋku pɛ́ pɛn mbɔɔ pɛ́t yɔ́p zúꞋu pɔ́, pɔ́p ɡɔ́ɔ ŋ́kɛ́ ŋ́kúu tsɛt mɛkɑnúꞋ ɛ̂mɑ́, ńdɔk wɛ Kɑpɛɛnɑwûm nɛpɔ́ ńdɔɔ Yɛ́su.

²⁵Ŋ́ɡʉ tɛ ŋ́kúu nǔu yɛcɔ́ njʉ́n, ńjʉ́ɔ wɛ́, ńcú mbɔ̌ wɛ́ ŋɡɔ: «Cícɑ, ɔ tɔ́ tɛ ŋ́kúu zɑꞋnɛ ŋkɑ́ kʉ̈ɔ́.»

²⁶Yɛ́su pʉ̈ɔt mbɔ̌ pɔ́p ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, pʉʉ kɑ pɔ́ sii ńdɔɔ wɑ́ɑ pɔ mbíꞋŋɡɔ pʉʉ kɑ jʉ́ɔ mɛnu mɑ̌ɑmɑɑnɛ mi ŋ kɑ ɡɛnɛ, ɛ́ nyɛt mɛtʉʉ-Sɛ́ pɔ́, pʉʉ lɔɔ wɑ́ɑ ntɛ́ pɔ pɑ́Ꞌ pʉʉ kɑ kwɛ́tnɛ mbɛlɛ̂ɛt tɛ ńzwɛ́t lɑ́.

²⁷Kɔɔ pʉʉ sɑ́Ꞌ tʉʉ nǔu yúupɛjʉ́ pi ɛ́ kɛ́ lɑ́ɑtɛ, pʉʉ sɑ́Ꞌ tʉʉ pɔ nǔu yúupɛjʉ́ pi ŋu jʉ́, ɛ́ ɡɑ́ luk kɛ́mɛ. Mɔ́ɔ-Ŋu ɡʉnɛ ŋ́ɡɑ́ yîyɑ́ yúupɛjʉ́ mbɔ̌ pʉʉ, mbíꞋŋɡɔ Tɑ̌ɑ Sɛ́ kɑ cʉɔꞌ lii yɛ́ nǔu wɛ́.»

²⁸Pɔ́p cú mbɔ̌ wɛ́ ŋɡɔ: «Pɛk ɡʉ ŋ́ɡɛ ŋɡɔ́ku lɑ ŋ́ɡɛ yúu mi Sɛ́ sɛ́ ŋ́kɔŋ?»

²⁹Yɛ́su pʉ̈ɔt mbɔ̌ pɔ́p ŋɡɔ: «Yúu mi Sɛ́ sɛ́ ŋ́kɔŋ ŋɡɔ pʉʉ ɡɛ, ɛ́ nɛzɑ́p tʉ́m nǔu mɔ ẅí Sɛ́ kɑ túunɛ.»

³⁰Pɔ́p pɑꞋ ŋɡɔ: «Nu mɑ̌ɑmɑɑnɛ yi ɔ ɡʉ ŋ́ɡɛ pʉk jʉ́ɔ fú nǔu ńzɑ́p tʉ́m nǔu ɡu ɛ́ kʉ̈ɔ́? Yúu mi ɔ ɡʉ ŋ́ɡɛ ɛ́ ku?

³¹Pɛmɑ́ŋɡɑpnjẅɛt pɛk kɑ kwɛ́t yúu mi pɛ́ fúŋnɛ ŋɡɔ mɑ̂ɑnɛ[6], kɔ̂ŋtɛt. Ɛ́ lɔk ḿbuutɛ nǔu pɑ́Ꞌ ŋwɑꞋnɛ-ndɛn kɑɑ sɛ́ ńcú ŋɡɔ: “A kɑ ɡɑ́ wɔ́p nɛ́ yúupɛjʉ́ pi ɛ́ fúnɛ tʉ́nɛpú.”»

³²Yɛ́su pʉ̈ɔt mbɔ̌ pɔ́p ŋɡɔ: «Lɑ́ ɛ sẅíi wʉ́ʉ, kwɑꞋ nɛ́nẅín, Mɔ̌sɛ̂ɛ ŋkɑɑ ɡɑ́ yúujʉ́ pi ɛ́ fúnɛ tʉ́nɛ́pú mbɔ̌ pʉʉ pɔ́. Tɑ̌ɑ mɔ sɛ́nɛ́ ŋ́ɡɑ́ kwɑꞋ yúujʉ́ pi ɛ́ fúnɛ tʉ́nɛ́pú mbɔ̌ pʉʉ.»

³³«MbíꞋŋɡɔ yúujʉ́ pi ɛ́ fúnɛ mbɔ̌ Sɛ́, ɑ ŋu ẅí ɑ fúnɛ tʉ́nɛ́pú ńcúŋ, ŋ́ɡɛ pʉɔmɛsɔŋ ndǔmbí ɡẅɛɛ kwɑꞋ luk.»

³⁴Lɑ́Ꞌ ɡɔ́ɔ ŋ́kɛ́ ńcú mbɔ̌ wɛ́ ŋɡɔ: «Ndɛ, nɑ́ŋ ŋ́ɡɑ́ yîyɑ́ yúujʉ́ mbɔ̌ pɛk ŋkɑ́ tsʉʉ.»

³⁵Yɛ́su pʉ̈ɔt mbɔ̌ pɔ́p ŋɡɔ: «Yúujʉ́ pi ɛ́ ɡɛnɛ ŋu pɔ́ ɡú, mɔ. Ŋu lɑɑ ńtɔ́ ńtsɛ́t wɑ́ɑ, mbɔ njí kɛ́ lɑ́Ꞌ ḿbɛn ńzɑ́ŋ wɛ́ pɔ́. Ŋu lɑɑ ńzɑ́p tʉ́m yɛ́ nǔu mɔ, mbɔ ɡɑ́k yɛ́ kɛ́ lɑ́Ꞌ ḿbɛn ɛ́shí pɔ́.

³⁶Lɑ́, ŋ kɑ sẅíi wʉ́ʉ, pʉʉ kɑ jʉ́ɔ wɑ́ɑ, ŋ́kɛ́ mbɔɔ zɑ́p tʉ́m nǔu mɔ pɔ́.»

³⁷Mbɑ wɔ̌ lɑ́ ẅi Tɑ̌ɑ mɔ ɡɑ́nɛ mbɔ̌ mɔ, ɑ ɡʉ ńtɔ́ ńtsɛ́t wɑ́ɑ. M bɛn ŋ́kɛ́ mbɔɔ lɑ́Ꞌ yɛcɔ́ lɛ́Ꞌ ńcẅɛɛtɛ ŋu ẅí ɑ tɔ́nɛ ńtsɛ́t wɑ́ɑ, ŋ́ɡɑ́ píi pɔ́.

³⁸MbíꞋŋɡɔ mɔ ŋkɑɑ fú tʉ́nɛ́pú ńtɔ́ pɔ nɛɡɛ yɑ́ɑ yúu mi ŋ kɔŋnɛ pɔ́, ŋ kɑ tɔ́ nɛɡɛ yúu mi ŋu ẅí ɑ kɑ túunɛ wɑ́ɑ sɛ́ ŋ́kɔŋ.

³⁹Yúu mi ŋu ẅí ɑ kɑ túunɛ wɑ́ɑ sɛ́ ŋ́kɔŋ, ɛ́ pɔ́ pɔ ŋɡɔ kɔɔ mɔ nɑ́ tɛ wɛcɔ́ tɑ́Ꞌ nǔu pʉɔ pí ɑ kɑ ɡɑ́nɛ mbɔ̌ mɔ pɛ́. Ndẅiknzʉʉ lɛ́Ꞌlɑ́Ꞌ ńdɑ́Ꞌ ḿbɔ́, n zẅíimɛ wɔ́p nǔu nɛvú.

⁴⁰Yúu mi Tɑ̌ɑ mɔ sɛ́ ŋ́kɔŋ ɛ́ pʉ̈ɔ́lɑɑ: «Ŋu lɑɑ ńjʉ́ɔ mɔ́ɔ nɛ, ńzɑ́p tʉ́m yɛ́ nǔu wɛ́, mbɔ ŋɡɑŋ ŋ́ɡẅɛɛ luk kɛ́mɛ. N dɑ́Ꞌ ndẅiknzʉʉ lɛ́Ꞌlɑ́Ꞌ ńzẅíimɛ wɛ́ nǔu nɛvú.»

⁴¹Pɑyúdɑ ɡɔ́ɔ ŋ́kɛ́ ńzɛ nɛcútɛ nzʉʉ Yɛ́su, mbíꞋŋɡɔ ɑ cú ŋɡɔ ɑ yúujʉ́ yi ɛ́ fúnɛ tʉ́nɛ́pú.

⁴²Pɔ́p pɛn ḿbɔ́ ńcú ŋɡɔ ŋu wɑ́ kɑ́ pɔ́ Yɛ́su mɔ́ɔ-Yɔsɛ̂p pɔ́ ɔɔ! Pɛkŋɛ kɑ́ pɔ́ ńjí tɑ́t wɛ pɔ́p mɑ́ wɛ pɔ́ ɔɔ! Ɛ́ pɛn ŋ́ɡɛ ŋɡɔ́ku lɑ ɑ sẅíi wɛkŋɛ ŋkɔ̂ɔnɛ ŋɡɔ ɑ kɑ fú tʉ́nɛ́pú ńcúŋ?

⁴³Yɛ́su tsɔ́Ꞌ mbɔ̌ pɔ́p ŋɡɔ: «Kɔɔ pʉʉ pɛn ńcútɛ!

⁴⁴Wɛcɔ́ ŋu lɑɑ ḿbɔ́ ɑ pɔɔ tɔ́ ńtsɛ́t wɑ́ɑ kɛ́ pɔ́ yi Tɑ̌ɑ mɔ ẅí ɑ kɑ túunɛ wɑ́ɑ zɛɛnɛ ɛ́shuŋ wɛ́ pɔ́. Mɔ, m bɛn ńdɑ́Ꞌ nǔu ndẅiknzʉʉ lɛ́Ꞌlɑ́Ꞌ, ńzẅíimɛ wɛ́ nǔu nɛvú.»

⁴⁵Pɛ́ kɑ ŋwɑꞋnɛ tsɛt ŋwɑꞋnɛ-pɛŋɡɛ́mndʉ̈ɔ́Ꞌ-Sɛ́ ŋɡɔ: «Sɛ́ nɛ́ tú mbʉʉ yɛ́ ɡʉ ńdɑ́Ꞌ ńzíꞋ nu yɛ́ mbɔ̌ pʉɔ tsʉʉ. Ŋu lɑɑ ńzúꞋ nu yi ɛ́ fúnɛ mbɔ̌ Tɑ̌ɑ, ḿbɛ́m yúu mi ɑ zíꞋnɛ pʉɔ, mbɔ ẅîwɑ́ ŋu ɡʉ tɔ́ ńtsɛ́t wɑ́ɑ.

⁴⁶Sɑ̌ɑ ŋu ŋkɑɑ mɔ Tɑ̌ɑ jʉ́ɔ, tɛ ńdíꞋ ndɑꞋ mɔ ẅí ŋ kɑ fúnɛ nɛjɔ́ŋ yɛ́. Mɔ kɑ jʉ́ɔnɛ Tɑ̌ɑ Sɛ́.

⁴⁷Lɑ́ ɛ sẅíi wʉ́ʉ, kwɑꞋ nɛ́nẅín, ŋu lɑɑ ńzɑ́p tʉ́m nǔu mɔ, mbɔ ŋɡɑŋ ɡʉ ŋ́ɡẅɛɛ luk kɛ́mɛ.

⁴⁸Yúujʉ́ yi ɛ́ ɡɛnɛ pɛ́ pɔ́ ɡú ɑ pɔ́ mɔ.

⁴⁹Pɛmɑ́ŋɡɑpnjẅɛt pʉ́ʉ kɑ kwɛ́t yúujʉ́ yi pɛ́ fúŋnɛ ŋɡɔ mɑ̂ɑnɛ kɔ̂ŋtɛt, ḿbɛn ḿpfú pfúnɛ.

⁵⁰Lɑ́, yúujʉ́ pi ɛ́ fúnɛ tʉ́nɛ́pú ńcúŋ, ɛ́ yi ŋu lɑɑ ńjʉ́, ɑ pɔɔ pɛn ḿpfú pɔ́.

⁵¹KwɑꞋ mɔ, mɔ yúujʉ́ yi ɛ́ kuꞋnɛ nɛɡɛ pɛ́ pɔ́ ɡú, ɛ́ yi ɛ́ fúnɛ tʉ́nɛ́pú ńcúŋ. Ŋu lɑɑ ńjʉ́ yîyɑ́ yúujʉ́, mbɔ ɑ ɡʉ ńdɑ́Ꞌ ḿbɔ́ pɔ ɡú mɛŋɡuꞋ mɛŋɡuꞋ. Yúujʉ́ yi ŋ ɡʉ ŋ́ɡɑ́, ɛ́ mbɑp-mbʉʉ yɑɑ.[7] Ŋ ɡʉ ŋ́ɡɑ́ lɑ́ ɛ́ lɛɛ pɔ́Ꞌɔ, pʉɔmɛsɔŋ ndǔmbí pɔ́ ɡú.»

⁵²Ńcú pɔ́Ꞌɔ, pɑsɑ́Ꞌlɑ́Ꞌ-Pɑyúdɑ pɔ́ ńzɔŋ tsɛtsɛt pɔ́p tɛꞋ ńcú ŋɡɔ: «Ŋu wɑ́ ɡʉ ŋ́ɡɛ ŋɡɔ́ku lɑ́ ŋ́ɡɑ́ mbɑp-mbʉʉ yɛ pɛkŋɛ kwɛ́t?»

⁵³Yɛ́su tsɔ́Ꞌ mbɔ̌ pɔ́p ŋɡɔ, lɑ́ ɛ sẅíi wʉ́ʉ, kwɑꞋ nɛ́nẅín, pʉʉ lɑɑ mbɔɔ kwɛ́t mbɑp-mbʉʉ-Mɔ́ɔ-Ŋu, ńnɔ́ mɛci mɛ́ pɔ́, mbɔ pʉʉ kɛ́ ɡɛ ŋ́ɡẅɛɛ kwɑꞋ luk pɔ́.

⁵⁴Ŋu lɑɑ ŋ́kwɛ́t mbɑp-mbʉʉ yɑɑ, ńnɔ́ mɛci mɑ́ɑ, ɑ ɡẅɛɛ luk kɛ́mɛ. Ŋ ɡɛ ńzẅíimɛ ŋɡɑŋ nǔu nɛvú ndẅiknzʉʉ lɛ́Ꞌ.

⁵⁵MbíꞋŋɡɔ mbɑp-mbʉʉ yɑɑ yúujʉ́ sʉ́Ꞌnɛ, mɛci mɑ́ɑ pɔ́ kwɑꞋ yúu nɔ́nɛ.

⁵⁶Ŋu lɑɑ kwɛ́t mbɑp-mbʉʉ yɑɑ, ńnɔ́ mɛci mɑ́ɑ, mbɔ ɑ tɛmtɛ nǔu mɔ, n tɛmtɛ yɑ́ɑ ɡúu nǔu wɛ́.

⁵⁷Tɑ̌ɑ mɔ kɑ túunɛ wɑ́ɑ, ɑ nɛsɑ́Ꞌ-luk. N dɔk pɔ pɔ́Ꞌɔ, ḿbɔ́ ɡú, ɛ́ ndʉ́ŋndʉŋ pɑ́Ꞌ ŋu lɑɑ ŋ́ɡɛ ŋ́kwɛ́t mbɑp-mbʉʉ yɑɑ, mbɔ ɑ ɡʉ ńdɔk pɔ pɔ́Ꞌɔ, ḿbɔ́ ɡú.

⁵⁸Yɔ pɑꞋ yúujʉ́ pi ɛ́ fúnɛ tʉ́nɛ́pú pɔ́nɛ, ɛ́ kɑ́ pɔ́ pɑ́Ꞌ yi pɛtɑ́t pʉ́ʉ kɑ kwɛ́tnɛ ŋ́kɛ́ ḿbɛn ḿpfú pfúnɛ pɔ́. Ŋu lɑɑ ńjʉ́ pɔ yúujʉ́ yi ɛ́ fúnɛ tʉ́nɛ́pú, mbɔ ŋɡɑŋ ɡʉ ńdɑ́Ꞌ ḿbɔ́ pɔ ɡú.

⁵⁹Yɛ́su kɑ pɔ́ ńcú mɔnɛ mɛnu, ŋkɑ́ yi ɑ kɑ pɔ́ ńzíꞋ pʉɔ nɛ́ nu-Sɛ́ tsɛt ndɑ́-cúꞋlɛ-pɑyúdɑ Kɑpɛɛnɑwûm.

⁶⁰Gɑŋku-Yɛ́su zúꞋ sẅiŋɛ yɛ́, nɛzɑ́ɑ pʉɔ zɛ nɛcú ŋɡɔ: «Sẅiŋɛ yɑ́ tɛn tɛ ńtsɑ! Ɛ́ lɑɑ ḿbɔ́ wɔ̌ zẅíꞋlɛ?»

⁶¹Yɛ́su jí ŋɡɔ ɡɑŋku pɛ́ sɛ́ ńcútɛ ntɛ́ nu yí ɑ cúnɛ, ḿbíkŋɛ wɔ́p ŋɡɔ sẅiŋɛ yɑ́ɑ sɛ́ ḿbɑ́klɛ wʉ́ʉ pɑ́klɛ́nɛ kɛ?

⁶²Lɑ́ pʉʉ lɑɑ ŋ́ɡɔ ńjʉ́ɔ Mɔ́ɔ-Ŋu pɛn ŋ́kɔ́Ꞌ ŋ́ɡʉ nɛ́ zʉꞋ yí ɑ kɑ zɛɛnɛ ḿbɔ́ zúꞋu, pʉʉ ɡɛ pɔ ŋɡɔ́ku?

⁶³Zẅikŋɛ-Sɛ́ ɡɛnɛ pɛ́ tsuŋ ḿbɔ́ ɡú. Ŋumɛsɔŋ nɛ́ tú yɛ́ kɑ́ kuꞋ nɛɡɛ yɛcɔ́ yúu pɔ́. Sẅiŋɛ yí ŋ ɡɑ́nɛ mbɔ̌ pʉʉ fú mbɔ̌ Zẅikŋɛ-Sɛ́, yîyɑ́ sẅiŋɛ ɡɛnɛ lɑ pɛ́ pɔ́ ɡú.

⁶⁴Tɛ mbɑ pɔ́Ꞌɔ, pɛcɔ́ pʉɔ tsɛtsɛt pʉʉ kɑ́ pɔ́ ḿbɛ́m pɔ́. Ɛ́ ɡɔ́ ḿbɔ́, mbɔ Yɛ́su kɑ lɑ́Ꞌ mɔ́ ńjí pʉɔ pinɛ pɔ́p kɑ́ pɔ́ ńzɑ́p tʉ́m nǔu wɛ́ pɔ́, ḿbɛn ńjí ŋu ẅí ɑ ɡʉ ŋ́ɡɛ ɛ́fɛn wɛ́.

⁶⁵Yɛ́su pɛn ńcú ŋɡɔ, ɛ́ yúu mi ɛ́ ḿbɔ́ ŋ́ɡɛ lɑ n cú mbɔ̌ pʉʉ ŋɡɔ, ɛ́ lɑɑ ḿbɔ́ ŋu pɔɔ tɔ́ ŋ́kẅɛ́ɛtɛ wɑ́ɑ kɛ́ pɔ́ yi Tɑ̌ɑ mɔ ɡɛnɛ ŋɡɔ ŋɡɑŋ tɔ́ pɔ́.

⁶⁶Ɛ́ fú ŋkɑ́ ɛ̂yɑ́, nɛzɑ́ɑ ɡɑŋku-Yɛ́su kʉ̈ɔ́, pɔ́p pɛpɔ́p pɔɔ pɛn ńnɛn pɔ́.

⁶⁷Yɛ́su ɡɛ ńcú mbɔ̌ pʉɔ ntsɔ̌ppɑ́ nɛ́ nɛɡɛ́m ŋɡɔ: «Pʉʉ kɑ́ pɔ́ ŋ́kɔŋ yʉ́ʉ nɛɡʉ pɔ́ kɛ?»

⁶⁸Símɔ Pyɛ̂ pʉ̈ɔt mbɔ̌ wɛ́ ŋɡɔ: «Tsɑpʉɔ, pɛk ɡʉ ŋ́ɡʉ ŋ́kẅɛ́ɛtɛ pɔ wɔ̌? Ɔ ɡẅɛɛ sẅiŋɛ yí ɛ́ ɡɑ́nɛ luk kɛ́mɛ.

⁶⁹Pɛk kɑ lɑ́Ꞌmɔ́ ḿbɛ́m, ḿbɛn ḿbɔ́ ńjí ŋɡɔ ɔ kwɑꞋ ŋu ẅí ɑ fúnɛ nɛjɔ́ŋ Sɛ́.»

⁷⁰Yɛ́su pʉ̈ɔt mbɔ̌ pɔ́p ŋɡɔ: «Pʉʉ wɔ ntsɔ̌ppɑ́ nɛ́ nɛɡɛ́m, mɔ ŋkɑɑ nɛ tsɔ́Ꞌ wʉ́ʉ pɔ́ ɔɔ? Wɛcɔ́ ŋu kɛ́ ḿbɔ́ tsɛtsɛt pʉʉ, ḿbɔ́ ŋu-Sɑ́ttɑ.»

⁷¹Yɛ́su cú pɔ́Ꞌɔ, ńdɑ́Ꞌ Jẅidɑ, mɔ́ɔ-Símɔ Iskɑlyɔt. Jʉ́ kɑ pɔ́nɛ ŋ́ɡʉ ŋ́ɡɛ ɛ́fɛn Yɛ́su, tɛ mbɑ pɑ́Ꞌ ɑ m̄bɔ́nɛ tsɛtsɛt pʉɔ ntsɔ̌ppɑ́ nɛ́ nɛɡɛ́m.