Read Ngomba Jɑ̂ŋ 7 Bible Online

Jɑ̂ŋ 7 - Ngomba bible

Jɑ̂ŋ 7

¹Yɔ nu lɛɛ, Yɛ́su pɔ́ pɔ tsɛt pɑk-ŋɡɔŋ-Ŋɡɑlilɛɛ, ḿbɔ́ ŋ́kɑ́t ńnɛn, ɑ pɔɔ ḿbɔ́ ŋ́kɔŋ nɛɡʉ tsɛt pɑk-ŋɡɔŋ-Judɛ̂ pɔ́, mbíꞋŋɡɔ pɑsɑ́Ꞌlɑ́Ꞌ-pɑyúdɑ kɑ pɔ́ ńdɔɔ nɛjẅí wɛ́.

²Ɛ́ ɡɔ́ ḿbɔ́, ndínɑ-pɑyúdɑ yi pɛ́ fúŋnɛ ŋɡɔ ndínɑ-mɛntɑp pɔ́ ḿbɑ́ɑtɛ.

³Pɔ́ɔpɛ́mɑ́-Yɛ́su cú mbɔ̌ wɛ́ ŋɡɔ: «Fú zɑꞋnɛ ŋ́ɡʉ nɛ́ Judɛ̂ lɑ́ ɡɑŋku pú pi pɔ́p zúꞋu jʉ́ɔ yɔ́p mɛnu mi ɔ sɛ́ ŋ́ɡɛ.

⁴Ŋu lɑɑ ḿbɔ́ ŋ́kɔŋ ŋɡɔ pɛ́ jí wɛ́, ɑ pɔɔ lʉɔ yúu mi ɑ sɛ́ ŋ́ɡɛ pɔ́. Pɑ́Ꞌ, ɔ sɛ́ ŋ́ɡɛ mɛmɑ́ mɛnu lɑ́, ɡɛ lɑ́Ꞌ jí wú.»

⁵Pɔ́p cú mbíꞌŋɡɔ kwɑꞋ pɔ́p pɔ́ɔpɛ́mɑ́-Yɛ́su ŋ́kɑɑ pɔ́ ńzɑ́p tʉ́m nǔu wɛ́ pɔ́.

⁶Yɛ́su pʉ̈ɔt mbɔ̌ pɔ́p ŋɡɔ: «Yɑ́ɑ ŋkɑ́ pɛ́t kɛ́ kuꞋ, lɑ́ ŋ́ɡʉ nǔu pʉʉ, mbɔ ŋkɑ́ kʉ̈ɔ́ lɑ́ ɛ́ mbɔ̌ pʉʉ ḿbɔ́ pɔ sʉ́Ꞌnɛ.

⁷Mbɔ pʉɔ-ndǔmbí pɔɔ wʉ́ʉ pɑɑ. Lɑ́ ŋ́ɡʉ nǔu mɔ, mbɔ pɔ́p pɑɑ wɑ́ɑ, mbíꞋŋɡɔ ŋ kɑ pɔ́ ɛ́sẅíi wɔ́p nɛ́ sẅíiŋɛ ŋɡɔ ŋɡɛnɛ nu yɔ́p kɑ́ pɔŋ.

⁸Pʉʉ ɡʉnɛ ḿbʉʉ ŋ́ɡʉ zʉꞋ ndínɑ. Ɛ́ ɡʉ nǔu mɔ, mbɔ ŋ kɛ́ ɡʉ nɛ́ zúꞋu pɔ́, yɑ́ɑ ŋkɑ́ kɑ́ kuꞋ.»

⁹Ńcú mbɔ̌ pɔ́p pɔ́Ꞌɔ, ḿbɛn ńnɑ́ŋ Ŋɡɑlilɛɛ.

¹⁰Pɔ́ɔpɛ́mɑ́ pɛ́ pɛn ḿbɔ́ tɛ ḿbʉʉ nɛ́ zʉꞋ-ndínɑ, ɑ ɡɔ́ɔ ŋ́kɛ́ ńcʉ́ɔ yɛ́ sɛ̂ndúŋ. Lɑ́ ńnɛn pɔ ɛ́sɔ́tɛ sɔ́tɛ́nɛ.

¹¹Pɛ́ pɔ́ tɛ ḿbɔ́ ńjʉ́ ndínɑ, pɑsɑ́Ꞌlɑ́Ꞌ-pɑyúdɑ pɔ́ ŋ́kɑ́t ńdɔɔ wɛ́, ḿbíkŋɛ ŋɡɔ: «Yɛ́su pɔ́ pɔ ɡɔ́?»

¹²Lɑ́Ꞌ pɔ́ ɛ́sẅíŋɛ mɛtsu mɛtsu ntɛ́ Yɛ́su. Pɛcɔ́ pʉɔ pɔ́ ńcú ŋɡɔ ɑ kwɑꞋ ŋu. Pɛcɔ́ pɔ́ ńcú ŋɡɔ ɑ fu pʉɔ funɛ.

¹³Lɑ́ ŋu kɛ́ ḿbɔɔ ńcú nu nǔu wɛ́ tɛ ŋɡi yɛ kɔ́Ꞌ tʉ́ pɔ́, ḿbɔ́k pɑsɑ́Ꞌlɑ́Ꞌ-pɑyúdɑ.

¹⁴Ndíinɑ Pɛ́t kɛ́ mɛ, Yɛ́su ɡʉ nɛ́ ndɑ́-nɔŋpɔꞋ, ńzɛ nɛzíꞋ pʉɔ nɛ́ yúu.

¹⁵Ɛ́ kʉꞋnɛ pɑyúdɑ, pɔ́p cú ŋɡɔ: «A ɡɛ ŋɡɔ́ku ńjí ŋwɑꞋnɛ-ndɛn kɑɑ pɑ́Ꞌɑ, lɑ́ mbɔ ɑ ŋkɑɑ sɛkút zíꞋ?»

¹⁶Yɛ́su tsɔ́Ꞌ mbɔ̌ pɔ́p ŋɡɔ: «Yúu mi n zíꞋnɛ pʉɔ kɑ́ fú mbɔ̌ mɔ pɔ́, ɛ́ fú pɔ mbɔ̌ Sɛ́ ẅí ɑ kɑ túunɛ wɑ́ɑ.»

¹⁷Ŋu lɑɑ ḿbɔ́ ŋ́kɔŋ nɛɡɛ yúu mi Sɛ́ sɛ́ ŋ́kɔŋ, mbɔ ŋɡɑŋ ɡʉ ńjí, kɛ yúu mi n zíꞋnɛ pʉɔ fú pɔ mbɔ̌ Sɛ́ ɔɔ, kɛ ɛ́ pɔ́ pɔ yɑ́ɑ sẅiŋɛ ɔɔ.

¹⁸Ŋu lɑɑ ḿbɔ́ ńcú nu, ḿbɔ́ yi ɛ́ pɔ́ pɔ sẅiŋɛ yɛ́, mbɔ ɑ lɔɔ pɔ wɛ nɛɡúꞋ. Lɑ́ ḿbɔ́ yi ŋu lɑɑ ḿbɔ́ ńdɔɔ nɛɡúꞋ Sɛ́ ẅí ɑ kɑ túunɛ wɛ́, mbɔ ŋɡɑŋ sẅíi nu nɛ́nẅín, yɛcɔ́ nu ŋɔ́Ꞌnɛ ŋɔ́Ꞌnɛ́nɛ pɔɔ nǔu wɛ́ pɔ́.

¹⁹Mɔ̌sɛ̂ɛ ŋkɑɑnɛ ɡɑ́ nɛpʉ́ʉ mbɔ̌ pʉʉ pɔ́ ɔɔ? Tɛ wɔ̌ nǔu pʉʉ wɔ ḿbɔ́ ńnɛn nǔu? Pʉʉ pɛn ńdɔɔ nɛjẅí wɑ́ɑ mɛlɑ́Ꞌ kʉ̈ɔ́?

²⁰Lɑ́Ꞌ pʉ̈ɔt mbɔ̌ Yɛ́su ŋɡɔ: «zẅikŋɛ kɛpɔŋ nǔu ɡu! Wɔ̌ sɛ́ ńdɔɔ nɛjẅí wú?»

²¹Yɛ́su pɛn ńtsɔ́Ꞌ mbɔ̌ pɔ́p ŋɡɔ: «Ŋ kɑ ɡɛ pɔ ndɑꞋ tɑ́Ꞌ yúu, ɛ́ ɡɑ́ɑnɛ wʉ́ʉ pɛtsʉʉ.

²²NɛpúꞋ mɔ́ɔ mbɛ́ɛnɛ kɑ́ fú mbɔ̌ Mɔ̌sɛ̂ɛ pɔ, ɛ́ fú mbɔ̌ pɛmɑ́ŋɡɑpnjẅɛt Pʉʉ. Lɑ́ Mɔ̌sɛ̂ɛ kɑ zíꞋ wʉ́ʉ nɛpúꞋ mɔ́ɔ. Lɑ́ pʉʉ sɛ́ ḿbúꞋ mbɑ lɛ́Ꞌnji.

²³Tɛ ɛ́ lɑɑ ḿbɔ́ yi mbɔ pʉʉ púꞋ mɔ́ɔ lɛ́Ꞌnji, ḿbɔ́k pɑ́Ꞌ pʉʉ ɡʉ ɛ́fɑɑnɛ nɛpʉ́ʉ-Mɔ̌sɛ̂ɛ, pʉʉ pɛn ńzɑ́ŋ lɔ́ŋ nǔu mɔ ŋɡɔ ŋ ɡɛ ŋu fíitɛ lɛ́Ꞌnji mɛlɑ́Ꞌ kʉ̈ɔ́?

²⁴Kɔɔ pʉʉ ŋɑk nu-ŋu kɛ́ jí nɛtsɛ́n, pʉʉ ŋɑk pɔ tsɛt nu nɛ́nẅín.»

²⁵Pɛcɔ́ ntɑ́Ꞌ-pʉɔ-Yɛlúsɑlɛm pɔ́ ńcú ŋɡɔ: «Yɑ́ kɑ́ pɔ́ ŋu wɑ́ ẅi pɛ́ lɔɔnɛ nɛjẅí wɛ́ lɑ́ pɔ́ ɔɔ?

²⁶KwɑꞋ jʉ́, sɛ́ sɑ́ɑnɛ sɑ́ɑnɛ́nɛ ńcú nu, ŋu kɑ pɔ́ ńtsɔ́p pɔ́. Lɛ́Ꞌcɔ́ pɑsɑ́Ꞌlɑ́Ꞌ pɛkŋɛ jʉ́ɔ ŋɡɔ ɑ Nzɑ́Ꞌŋkʉ nɛ́nẅín ẅi Sɛ́ kɑ kɑꞋnɛ.

²⁷Lɑ́, ẅîwɑ́ ŋu pɛ́Ꞌnɛ pɛk pɔ́ ńjí zʉꞋ yi ɑ fúnɛ zúꞋu. Lɑ́ ŋ́ɡʉ nǔu Nzɑ́Ꞌŋkʉ ẅi Sɛ́ kɑ kɑꞋnɛ, mbɔ ŋu kɛ́ ɡɛ ńjí zʉꞋ yi ɑ fúnɛ zúꞋu pɔ́.»

²⁸Yɛ́su pɔ́ ŋkɑ́ ɛ̂yɑ́, ḿbɔ́ tsɛt ndɑ́-nɔŋpɔꞋ ḿbɔ́ ńzíꞋ pʉɔ nɛ́ yúu, ńcú nɛ́ ŋɡi tɛnnɛ ŋɡɔ: «Pʉʉ tsuŋ ḿbɔ́ ńjí wɑ́ɑ, ḿbɛn ḿbɔ́ ńjí zʉꞋ yi ɛ fúnɛ nɛ́ zúꞋu? Mɔ ŋkɑɑ zɑ́pnɛ ŋɡɔ ŋ ɡʉ ńtɔ́ pɔ́. Lɑ́ Sɛ́ ẅí ɑ kɑ túunɛ wɑ́ɑ, ɑ ŋu ẅí ɑ lɑɑ ńcú nu, mbɔ ɛ́ nu nɛ́nẅín. Pʉʉ kɑ́ pɔ́ ńjí wɛ́ pɔ́.

²⁹Ŋ kɛ́ ḿbɔ́ ńjí wɛ́. Ɛ fú pɔ nɛ́ nɛjɔ́ŋ yɛ́, mbɔ jʉ́ kɑ túunɛ wɑ́ɑ.»

³⁰Pɔ́p zúꞋ yɔ nu, ńdɔɔ nɛɡẅɛɛ wɛ́, lɑ́ ŋu kɛ́ mbɔɔ pɔ́ nǔu wɛ́ zɑ́p, mbíꞋŋɡɔ yɛ́ ŋkɑ́ kɑ pɛ́t kɛ́ kuꞋ.

³¹Nɛzɑ́ɑ pʉɔ tsɛt nɔɔ-lɑ́Ꞌ kɛ́ ḿbɔ́ ńzɑ́p tʉ́m nǔu wɛ́ zɑ́pnɛ, ḿbɔ́ ńcú ŋɡɔ, tɛ Nzɑ́Ꞌŋkʉ ẅi Sɛ́ kɑ kɑꞋnɛ ɡʉ ŋ́ɡɛ ńtɔ́ ḿbɛn ŋ́ɡɛ mɛcɔ́ mɛnu mɑ̌ɑmɑɑnɛ tɛ ɛ́ lɛɛ mi ŋu wɑ́ sɛ́ ŋ́ɡɛ lɑ́?

³²Pɑfɑlísɑy zúꞋ pɑ́Ꞌ lɑ́Ꞌ sɛ́ ɛ́sɔ́klɛ ntsu sɛ́ ŋ́kẅíi lík-Yɛ́su, pɔ́p ɡʉ ńjʉ́ɔ pɛtɑ́tndɑ́-pɑnɔŋpɔꞋ pɔ́p pɛpɔ́p túu pɑpyɛ́p ndɑ́-nɔŋpɔꞋ ŋɡɔ pɔ́p ɡʉ ŋ́ɡẅɛɛ Yɛ́su.

³³Ɛ́ ɡɔ́ ḿbɔ́ Yɛ́su pɔ́ ńcú mbɔ̌ lɑ́Ꞌ ŋɡɔ ŋ ɡʉ ḿbɛn ńnɑ́Ꞌ ńnɑ́ŋ, lɑ ŋ ɡʉ ńtsɛ́t Tɑ̌ɑ ẅí ɑ kɑ túunɛ wɑ́ɑ.

³⁴Pʉʉ ɡʉ ŋ́ɡɛ ḿbɔ́ ńdɔɔ wɑ́ɑ, ḿbɛn ŋ́kɛ́ mbɔɔ wɑ́ɑ jʉ́ɔ, mbíꞋŋɡɔ zʉꞋ yi ŋ ɡʉnɛ nɛ́ zúꞋu, pʉʉ kɑ́ kuꞋ nɛtɔ́ zúꞋu pɔ́.

³⁵Pɑyúdɑ zɛ nɛcú tsɛtsɛt pɔ́p ŋɡɔ: «A pɑ́Ꞌɑ ŋ́ɡʉ ŋ́ɡʉ pɔ ɡɔ́, tɛ pɛk pɔɔ wɛ́ jʉ́ɔ? A ɡʉ ŋ́ɡʉ ŋ́kẅɛ́ɛtɛ pɔ pʉɔ pɛkŋɛ pí pɔ́p kɑ sɑtnɛ zʉꞋ, ŋ́ɡʉ lɑ́Ꞌ-pɑŋɡɛlɛ́k kɛkʉ̈ɔ́? Kɛ ɑ ɡʉ pɔ nɛzíꞋ pɑŋɡɛlɛ́k?

³⁶Yɔ ntɛ́ sẅiŋɛ pɑ́Ꞌɑ ńdɔk ńcú ŋɡɔ kʉ̈ɔ́, pɑ́Ꞌ ɑ cúnɛ ŋɡɔ pʉʉ ɡʉ ńdɔɔ wɑ́ɑ ḿbɛn ŋ́kɛ́ mbɔɔ wɑ́ɑ jʉ́ɔ, ḿbɛn mbɔɔ kuꞋ nɛtɔ́ zʉꞋ yí mɔ zúꞋu pɔ́ ɔɔ?»

³⁷Ɛ́ pɔ́ ndẅiknzʉʉ lɛ́Ꞌ-ndínɑ, yi ɛ́ mɑ́mɑ́ lɛ́Ꞌlɑ́Ꞌ, Yɛ́su lɔ sɛ́ ńtʉ́ʉ tsɛtsɛt pʉɔ, ńcú nɛ́ ŋɡi tɛnnɛ ŋɡɔ: «Gɑ́k-ŋu lɑɑ ḿbɔ́ shí, ɑ tɔ́ ńtsɛ́t wɑ́ɑ, ńnɔ́ ŋki.

³⁸Ŋu ẅí ɑ zɑ́pnɛ tʉ́m yɛ́ nǔu mɔ lɑ́, ŋki ɡʉ ɛ́fú tsɛt tʉ́m yɛ́ ńcẅɛt ḿbɔ́ cúŋ pɑ́Ꞌ ŋki ẅí ɛ́ fúnɛ nɛsɑ́Ꞌ lɑ́. Ɛ́ pɔ́ yúu pɛ́ kɑ ŋwɑꞋnɛ́nɛ tsɛt ndɛn kɑɑ.»

³⁹A kɑ pɔ́ ńcú pɔ́Ꞌɔ, ńdɑ́Ꞌ Zẅikŋɛ-Sɛ́ yi pʉɔ pinɛ pɔ́p zɑ́pnɛ tʉ́m nǔu wɛ́ kɑ pɔ́ ŋ́ɡʉ ńcẅɛ́ɛ. Ɛ́ ɡɔ́ ḿbɔ́, Zẅikŋɛ Lɛ́ɛnɛ́nɛ ɛ̂yɑ́ pɛ́t kɛ́ tɔ́, mbíꞋŋɡɔ Yɛ́su kɑ pɛ́t kɛ́ kúu tsɛt nɛɡúꞋ wɛ.

⁴⁰Lɑ́Ꞌ zúꞋ sẅiŋɛ-Yɛ́su, pɛcɔ́ pʉɔ tsɛtsɛt pɔ́p cú ŋɡɔ ɑ kwɑꞋ ŋɡɛ́mndʉ̈ɔ́Ꞌ-Sɛ́.

⁴¹Pɛcɔ́ pɔ́ ńcú ŋɡɔ jʉ́ pɔ́nɛ Nzɑ́Ꞌŋkʉ ẅi Sɛ́ kɑ kɑꞋnɛ. Lɑ́, pɛcɔ́ pɔ́ ńcú yɔ́p pɔ ŋɡɔ Nzɑ́Ꞌŋkʉ ẅi Sɛ́ kɑ kɑꞋnɛ lɑɑ ḿbɔ́ ɑ pɔɔ fú Ŋɡɑlilɛɛ pɔ́.

⁴²Ntɛ́ ŋɡɔ pɛ́ kɑ ŋwɑꞋnɛ tsɛt ŋwɑꞋnɛ-ndɛn kɑɑ ŋɡɔ: «Nzɑ́Ꞌŋkʉ ẅi Sɛ́ kɑ kɑꞋnɛ ɡʉ ńdɑ́Ꞌ ɛ́fú pɔ nǔu njẅɛtndɑ́-fɔɔ Ndɑvît, ŋɡɔ Nzɑ́Ꞌŋkʉ ẅi Sɛ́ kɑ kɑꞋnɛ ɡʉ ńdɑ́Ꞌ ɛ́fú pɔ Mbɛ́tɛlɛhɛ̂m ẅí ɛ́ lɑ́Ꞌ pɛ́ fɔɔ Ndɑvît.»

⁴³Nu-Yɛ́su ɡɔ́ɔ ŋ́kɛ́ ḿmɑꞋ tɑ́kŋɛ tsɛtsɛt pɔ́p.

⁴⁴Pɛcɔ́ pʉɔ nǔu pɔ́p pɔ́ ńdɔɔ nɛɡẅɛɛ Yɛ́su, lɑ́ wɛcɔ́ ŋu wɔ́p kɛ́ mbɔɔ kuꞋ nɛzɑ́p pɔ́ nǔu wɛ́ pɔ́.

⁴⁵Pɑpyɛ́p ndɑ́-nɔŋpɔꞋ pínɛ pɛ́ lɑ́Ꞌnɛ ńtúu wɔ́p pɛn nzʉʉ ŋ́kẅɛ́ɛtɛ pɛtɑ́tndɑ́-pɑnɔŋpɔꞋ pɔ́p pɑfɑlísɑy, pɔ́p píkŋɛ wɔ́p ŋɡɔ pɔ́p kɑ́ lɔk Yɛ́su ńtɔ́ pɔ́ mɛlɑ́Ꞌ kʉ̈ɔ́?

⁴⁶Pɑpyɛ́p ndɑ́-nɔŋpɔꞋ pʉ̈ɔt ŋɡɔ: «Pɛk ŋkɑɑ mɔ zúꞋ wɛcɔ́ ŋu sẅiŋɛ pɑ́Ꞌ ŋu ɛ̂wɑ́ pɔ́!»

⁴⁷Pɑfɑlísɑy ɡɔ́ɔ ŋ́kɛ́ ńcú mbɔ̌ pɔ́p ŋɡɔ: Ńjí ŋɡɔ ɑ shɔt tú yʉ́ʉ ɡúu pɔ́ ɔɔ?

⁴⁸Kɑ́ɑ wɛcɔ́ tɑ́Ꞌ nǔu pɛkɛ́m pɛk, kɛ́ mbɑ tɑ́Ꞌ nǔu pɑfɑlísɑy ŋkɑɑ mɔ́ zɑ́p tʉ́m nǔu ŋu wɑ́ pɔ́!

⁴⁹Nɔɔ-lɑ́Ꞌ yɑ́ yi ɛ́ kɑ́ jí nɛpʉ́ʉ pɔ́, ɡɑŋndɔɔ.

⁵⁰Pɑfɑlísɑy pɔ́ ńzɔŋ pɑ́Ꞌɑ, wɛcɔ́ ŋu wɔp, Nikɔdɛ̂m, ḿbɔ́ ŋu ẅí ɑ kɑ ɡʉnɛ ńjʉ́ɔ Yɛ́su. A nɑ́ŋ tɛ ńcú mbɔ̌ yɛcɔ́ ku yɔ́p ŋɡɔ:

⁵¹«Ɛ́ nǔu nɛpʉ́ʉ nɛkŋɛ pɛ́Ꞌɛ, pɛ́ cú ŋɡɔ ŋu vu ntsɑŋ kɛ́ pɔ́ yi pɛ́ zúꞋ nu yí ɛ́ cẅɛtnɛ ntsu wɛ́, ḿbɛn ńjí yúu mi ɑ ɡɛnɛ?»

⁵²Lɑ́ pɛcɔ́ pʉɔ tsɔ́Ꞌ mbɔ̌ wɛ́ ŋɡɔ: «Ɔ yú ŋu-Ŋɡɑlilɛɛ kɛkʉ̈ɔ́? Ɔ lɑɑ ńdɔɔ sʉ́Ꞌnɛ, mbɔ ɔ ɡʉ ńjʉ́ɔ ŋɡɔ wɛcɔ́ ŋɡɛ́mndʉ̈ɔ́Ꞌ-Sɛ́ ŋkɑɑ mɔ́ cẅɛt Ŋɡɑlilɛɛ pɔ́.»

⁵³Pɔ́p ɡɛ pɔ́Ꞌɔ, ɛ́shyɛmɛ, mbɑ wɔ̌ lɑ́ ɡʉ nɛ́ njɛ́Ꞌ yɛ́.