Read Ngomba Jɑ̂ŋ 9 Bible Online

Jɑ̂ŋ 9 - Ngomba bible

Jɑ̂ŋ 9

¹Yɛ́su ɡɛ ḿbɔ́ ńdɛɛ yɛcɔ́ zʉꞋ, ńjʉ́ɔ wɛcɔ́ fʉmík, mbɔ pɛ́ kɑ pí wɛ́ ɑ pɔ́ pɔ fʉ.

²Gɑŋku-Yɛ́su píkŋɛ wɛ́ ŋɡɔ: «Cícɑ, wɔ ŋu kɑ ɡɔ́ ńcẅɛt nɛpɛm, ḿbɔ́ fʉmík, mbɔ wɔ̌ ɡɛnɛ nu kɛpɔŋ? Jʉ́ kɛ mɑmɑ́ wɛ, kɛ tɑ́t wɛ?»

³Yɛ́su pʉ̈ɔt ŋɡɔ: «Ɛ́ kɑ́ pɔ́ pɔ ŋɡɔ jʉ́ kɛ pʉɔ pinɛ pɔ́p kɑ pínɛ wɛ́ kɑ fɑɑnɛ yɛcɔ́ nu pɔ́. A fʉ ɛ́ pɔ́ pɔ ŋɡɔ Sɛ́ ńdɛɛ nǔu wɛ́ ńdɛꞋlɛ mɛfɑꞋ mɛ́.»

⁴Ɛ́ sɛ́ ḿbíkŋɛ ŋɡɔ, njí lɑɑ ḿbɛ́t ɡú pɑ́Ꞌɑ, pɛkŋɛ fɑꞋ mɛfɑꞋ-Sɛ́ ẅí ɑ kɑ túunɛ wɑ́ɑ. TúꞋ ɡʉ ɛ́sʉ́ʉ, wɛcɔ́ ŋu pɔɔ pɛn ŋ́kuꞋ nɛfɑꞋ fɑꞋ pɔ́.

⁵Ŋkɑ́ yi m bɛ́tnɛ ndǔmbí, mɔ, m bɔ́ kyɛꞌ ndǔmbí.

⁶Yɛ́su cú pɔ́Ꞌɔ, ńtẅik mɛ́tɛ́ sɛ́, ńtɔ́ptɛ tsɛ́tsɑ́Ꞌ ńdɔk ńzɔ́Ꞌtɛ mík-fʉ.

⁷Ńcú mbɔ̌ wɛ́ ŋɡɔ: «ɡʉ suk tsɛt ɡʉ́ɔ-ŋki-Silɔwɛ́. Silɔɛ́ lɔk ńcú ŋɡɔ nɛtúu ŋu». Fʉmík ɡʉ zúꞋu ɛ́suk shʉ́ wɛ́, ŋ́ɡɔ ḿbɛn nzʉʉ ḿbɔ́ ńjʉ́ɔ zʉꞋ.

⁸Gɑŋ-nɛpɑt-njɛ́Ꞌ pɛ́, ŋ́ɡɛ pʉɔ pínɛ pɔ́p kɑ pɔ́ ńjʉ́ɔ pɑ́Ꞌ ɑ lɔ́ɔnɛ ndɔ́ɔ jʉ́ɔ wɛ́ ŋkɔ̂ɔnɛ ńcú ŋɡɔ: «Yɑ́ kɑ́ pɔ́ ŋu ẅí ɑ m̄bɔ́nɛ ńnɑ́ŋ sɛ́ ńdɔ́ɔ ndɔ́ɔ pɔ́ ɔɔ?»

⁹Pʉɔ pɔ́ ńcú ŋɡɔ ɑ jʉ́, pɛcɔ́ cú ŋɡɔ ŋɡɑ́ŋ, ɑ fí wɛ́ fínɛ, ŋu ɛ̂wɑ́ pɔ́ ńcú ŋɡɔ: «A kwɑꞋ mɔ.»

¹⁰Pɔ́p píkŋɛ wɛ́ ŋɡɔ: «Mík mú ɡɛ ŋɡɔ́ku lɑ ŋ́ŋíɛꞋnɛ?»

¹¹A tsɔ́Ꞌ ŋɡɔ ŋu ẅí pɛ́ fúŋnɛ wɛ́ ŋɡɔ Yɛ́su, ɑ tɔ́ptɛ tsɛ́tsɑ́Ꞌ, ńdɔk ńzɔ́Ꞌtɛ mík mɑ́ɑ, ńcú mbɔ̌ mɔ ŋɡɔ ŋ ɡʉ Silɔɛ́ ɛ́suk shʉ́ wɑ́ɑ, ŋ ɡʉ zúꞋu ɛ́suk shʉ́ wɑ́ɑ, ŋ́ɡɔ́ɔ ŋ́kɛ́ ńjʉ́ɔ zʉꞋ.

¹²Pɔ́p píkŋɛ wɛ́ ŋɡɔ: «Ŋu ɛ̂wɑ́ ɡɔ́?» A tsɔ́Ꞌ ŋɡɔ, kɑ́ jí.

¹³Pɛ́ ɡɔ́ɔ ńdɔk ŋu ẅí ɑ kɑ pɔ́ fʉmík lɑ́, ŋ́ɡʉ mbi nɔɔ-Pɑfɑlísɑy.

¹⁴Ŋ́ɡɔ́ ḿbɔ́ pɔ́Ꞌɔ, mbɔ Yɛ́su lɑ́Ꞌ ŋ́ɡɔ ńtɔ́ptɛ tsɛ́tsɑ́Ꞌ, ńdɔk ŋ́ɡɛ mík-ŋu ɛ̂wɑ́ ŋíɛꞋnɛ, ɛ́ pɔ́ lɛ́Ꞌnji-pɑyúdɑ.

¹⁵Pɑfɑlísɑy píkŋɛ wɛ́ ɡúu pɑ́Ꞌ ɛ́ lɑ́Ꞌnɛ ńdɛɛ pɔ́Ꞌɔ, lɑ ɑ pɔ́ ńjʉ́ɔ zʉꞋ. A cú mbɔ̌ pɔ́p ŋɡɔ: «A lɑ́Ꞌ ńdɔk tsɛ́tsɑ́Ꞌ, ńzɔ́Ꞌtɛ mík mɑ́ɑ, ŋ ɡʉ ɛ́suk. Mɔ ŋkɔ̂ɔnɛ ḿbɔ́ ńjʉ́ɔ zʉꞋ.»

¹⁶Pɛcɔ́ ntɑ́Ꞌ-Pɑfɑlísɑy cú ŋɡɔ, ŋu ẅí ɑ ɡɛnɛ yîyɑ́ nu, Sɛ́ zɛɛnɛ ḿbɔɔ wɛ́ túu, mbíꞋŋɡɔ ɛ́ ḿbɔ́ lɛ́Ꞌnji. Pɛcɔ́ pʉɔ pɔ́p cú ŋɡɔ, mbɔ ŋu kɛpɔŋ ɡɛ pɑ́Ꞌɑ lɑ́ ŋ́ɡɛ yîyɑ́ ntɛ́ mɛnu mɑ̌ɑmɑɑnɛ? Tɑ́kŋɛ ɡɔ́ɔ ŋ́kɛ́ ḿvu tsɛtsɛt pɔ́p.

¹⁷Pɔ́p pɛn ḿbíkŋɛ ŋu ɛ̂wɑ́ ŋɡɔ: «Ɔ cú yú ŋɡɔ kʉ̈ɔ́ nǔu ŋu ẅí ɑ lɑ́Ꞌnɛ ŋ́ŋíɛꞋ mík mú?» A cú ŋɡɔ: «A Ŋɡɛ́mndʉ̈ɔ́Ꞌ-Sɛ́.»

¹⁸Pɑsɑ́Ꞌlɑ́Ꞌ-pɑyúdɑ, kɛ́ ḿbɔɔ ḿbɔ́ ḿbɛ́m ŋɡɔ ndʉ́m ɛ̂wɑ́ ḿbɔ́ fʉ ɑ pɛn ɛ́fíitɛ pɔ́. Ɛ́fúŋ tɑ́t wɛ pɔ́p mɑ́ wɛ,

¹⁹ḿbíkŋɛ wɔ́p ŋɡɔ: «Yɑ́ mɔ́ɔ wʉʉ ẅí pʉʉ cúnɛ ŋɡɔ pɛ́ kɑ ɡɔ́ ḿbí wɛ́ ɑ pɔ́ fʉ ɔɔ? Lɑ́ ɑ pɛn ŋ́ɡɛ ŋɡɔ́ku lɑ́ ńjʉ́ɔ zʉꞋ ŋkɔ̂ɔnɛ?»

²⁰Tɑ́t wɛ pɔ́p mɑ́ wɛ tsɔ́Ꞌ ŋɡɔ: «A kwɑꞋ mɔ́ɔ wɛk, pɛk sɛ́ ńjí ŋɡɔ ɑ kɑ cẅɛt ḿbɔ́ fʉmík.

²¹Lɑ́ ŋ́ɡʉ nǔu pɑ́Ꞌ ɛ́ ɡɛnɛ lɑ́ ɑ pɔ́ ńjʉ́ɔ zʉꞋ ŋkɔ̂ɔnɛ, mbɔ pɛk kɑ́ jí nu nǔu pɔ́. Kɛ wɔ̌ lɑ́Ꞌnɛ ŋ́ɡɛ mík mɛ́ ŋíɛꞋnɛ ɔɔ, mbɔ pɛk pɛn kɛ́ ḿbɔɔ ńjí pɔ́. Pʉʉ píkŋɛ wɛ́, ɑ kɑ́ pɛ́t ḿbɔ́ pɔ mɔ́ɔ nɛcú nu yí ɛ́ líŋɛ́nɛ wɛ́ pɔ́.»

²²Tɑ́t wɛ pɔ́p mɑ́ wɛ, pɔ́ ńcú pɔ́Ꞌɔ, mbíꞋŋɡɔ pɔ́p kɑ pɔ́ ḿbɔ́k pɑsɑ́Ꞌlɑ́Ꞌ-pɑyúdɑ. Ɛ́ ɡɔ́ ḿbɔ́, mbɔ pɑyúdɑ kɑ zɑ́b ŋɡɔ ŋu lɑɑ ḿbɛ́m ŋɡɔ Yɛ́su Nzɑ́Ꞌŋkʉ ẅí Sɛ́ kɑ kɑꞋnɛ, pɛ́ fú ndɑ́-cúꞋlɛ ńzuŋ ŋɡɑŋ.

²³Ɛ́ yúu mi ɛ́ ɡɛnɛ tɑ́t wɛ pɔ́p mɑ́ wɛ cú ŋɡɔ pʉʉ píkŋɛ wɛ́, ɑ kɑ́ pɛ́t ḿbɔ́ pɔ mɔ́ɔ pɔ́.

²⁴Pɑfɑlísɑy pɛn ɛ́fúŋ ŋu ẅí ɑ ḿbɔ́nɛ fʉ lɑ́, ńcú mbɔ̌ wɛ́ ŋɡɔ: «Tʉ́ʉ mbi-Sɛ́, ńcú nu nɛ́nẅín. Pɛk sɛ́ ńjí ŋɡɔ ŋu ɛ̂wɑ́ ŋu kɛpɔŋ.»

²⁵A tsɔ́Ꞌ mbɔ̌ pɔ́p ŋɡɔ: «Ŋ kɑ́ jí kɛ ɑ ŋu kɛpɔŋ pɔ́, kɛ ɑ kɑ́ pɔ́ ŋu kɛpɔŋ pɔ́ pɔ́. Yɑ́ɑ yúu mi mɔ sɛ́ ńjí, pɔ́ pɔ ŋɡɔ, ŋ kɑ pɔ́ fʉmík, mɔ ŋkɔ̂ɔnɛ ḿbɔ́ ńjʉ́ɔ zʉꞋ.»

²⁶Pɔ́p píkŋɛ wɛ́ ŋɡɔ: «A lɑ́Ꞌ ŋ́ɡɛ ŋɡɔ́ku nǔu ɡu? A lɑ́Ꞌ ŋ́ɡɛ ŋɡɔ́ku lɑ́ mík mú ŋíɛꞋnɛ?

²⁷A pʉ̈ɔt ŋɡɔ: Mɔ ńdɑ́Ꞌmɔ́ ɛ́sẅíi wʉ́ʉ, pʉʉ pɔɔ zẅíꞋlɛ. Pʉʉ kɔŋ nɛpɔ́ yi mɔ ḿbɛn ńcú cúnɛ mɛlɑ́Ꞌ kʉ̈ɔ́? Ńjí ŋɡɔ pʉʉ sɛ́ ńtsɑ́ɑ yʉ́ʉ nɛtsʉ́Ꞌ ɡɑŋku pɛ́ kɛ kʉ̈ɔ́?»

²⁸Pɔ́p ɡɔ́ɔ ńzɛ nɛzɔɔtɛ wɛ́, ḿbɔ́ ńcú ŋɡɔ: «Gu pɔ́nɛ ŋɡɑŋkuwɛ, pɛk pɔ́ pɔ ɡɑŋku-Mɔ̌sɛ̂ɛ.

²⁹Pɛk sɛ́ ńjí ŋɡɔ Sɛ́ kɑ cú nu mbɔ̌ Mɔ̌sɛ̂ɛ, lɑ́ ŋ́ɡʉ nǔu wɑ́ ŋu, mbɔ pɛk kɑ́ pɔ́ ńjí nɛfú nɛ́ pɔ́.

³⁰Fʉmík ɛ̂wɑ́ cú mbɔ̌ pɔ́p ŋɡɔ: Pʉʉ cú pɑ́Ꞌɑ, ɛ́ kʉꞋnɛ wɑ́ɑ tɛꞋ pɑ́Ꞌ pʉʉ kɑ́ pɔ́ ńjí nɛfú nɛ́ pɔ́. Lɑ́, mbɔ ɑ ŋ́kɛ́ ŋ́ŋíɛꞋ mík mɑ́ɑ!»

³¹Pɛkŋɛ pɛtsʉʉ jí ŋɡɔ Sɛ́ kɑ́ pɔ́ ńzúꞋ ŋɡi-ŋu kɛpɔŋ pɔ́, lɑ́ ḿbɔ́ yi ŋu lɑɑ ŋ́ɡɛ mɛkuꞋ-Sɛ́, ḿbɛn ḿbɔ́ ŋ́ɡɛ yúu mi Sɛ́ sɛ́ ŋ́kɔŋ, mbɔ Sɛ́ ɡʉ ńzúꞋ ŋɡi yɛ.

³²Pɛ́ ŋkɑɑ mɔ́ zúꞋ ŋu ẅí ɑ ŋíɛꞋnɛ mík-ŋu ẅí pɛ́ kɑ ɡɔ́ ḿbí wɛ́ ɑ pɔ́ fʉmík pɔ́ mbɑ́ɑ!

³³Ŋu ɛ̂wɑ́ lɑ́Ꞌ ḿbɔ́ pɛ́Ꞌɛ, mbɔ Sɛ́ ŋkɑɑnɛ wɛ́ túu, mbɔ ɑ lɑ́Ꞌ ḿbɔɔ kuꞋ nɛɡɛ yɛcɔ́ yúu pɔ́.

³⁴Pɔ́p tsɔ́Ꞌ mbɔ̌ wɛ́ ŋɡɔ: «pɛ́ kɑ pí wú tsɛt nu kɛpɔŋ, ɔ ɡʉ nɛzíꞋ wɛ́k nɛ́ yúu kîi!» Ŋ́ɡɔ́ɔ ɛ́fú ndɑ́-cúꞋlɛ ńzuŋ wɛ́ ŋ́ɡɑ́ píi.

³⁵Yɛ́su ɡɛ ńzúꞋ ŋɡɔ pɔ́p fú ndɑ́-cúꞋlɛ ńzuŋ fʉmík, ŋ́ɡʉ ńcú mbɔ̌ wɛ́ ŋɡɔ: Ɔ zɑ́b tʉ́m nǔu Mɔ́ɔ-Ŋu?

³⁶Ŋu ɛ̂wɑ́ pʉ̈ɔt ŋɡɔ: «A wɔ̌ Ndɛ? Lɑ́ n zɑ́p tʉ́m nǔu wɛ́?»

³⁷Yɛ́su cú mbɔ̌ wɛ́ ŋɡɔ: «Ɔ sɛ́ ńjʉ́ɔ wɛ́, jʉ́ cúnɛ nu mbɔ̌ wu pɑ́Ꞌɑ.»

³⁸A ɡɔ́ɔ ńcú ŋɡɔ: «N zɑ́b tʉ́m nǔu ɡu mbɑ̌ɑ Tsɑpʉɔ, ńcúŋ ŋ́kẅíꞋlɛ sɛ́ mbi yɛ́.»

³⁹Yɛ́su ńcú ŋɡɔ: «Ŋ kɑ tɔ́ ndǔ yɔ mbí nɛŋɑk, nɛpɔ́ yi pʉɔ pinɛ pɔ́p sɛ́ ńjʉ́ɔ zʉꞋ ɡʉ ḿbɔ́ ńtsʉ́Ꞌ pɛfʉ, pɛfʉ jʉ́ɔ zʉꞋ.»

⁴⁰Pɛcɔ́ ntɑ́Ꞌpʉɔ tsɛt nɔɔ-pɑfɑlísɑy pínɛ pɔ́p ḿbɔ́nɛ zúꞋu, zúꞋ yɔ nu, ḿbíkŋɛ Yɛ́su ŋɡɔ: «Pɛ́ kɑ́ cú cúnɛ pɔ́, ŋɡɔ ɔ cú pɛfʉ pɑ́Ꞌɑ tɛ ɛ́sɑ́ŋ wɛ́k nǔu kɛkʉ̈ɔ́?»

⁴¹Yɛ́su tsɔ́Ꞌ mbɔ̌ pɔ́p ŋɡɔ: «Pʉʉ kɛ́ ḿbɔ́ pɛ́Ꞌnɛ ḿbɔ́ pɛfʉmík, mbɔ pʉʉ kɑ pɔ́ ńdɔk ŋ́ɡɛ yɛcɔ́ nu kɛpɔŋ pɔ́. Lɑ́ pɑ́Ꞌ pʉʉ cúnɛ ŋɡɔ: Pɛk sɛ́ ńjʉ́ɔ zʉꞋ lɑ́, mɛnu kɛpɔŋ mʉ́ʉ lɔk ŋ́ɡɔ́ŋ nǔu pʉʉ.»