Read Ngomba ŊwɑꞋnɛ-Gɑŋntúu Yɛ́su Kɛlístɔ 1 Bible Online

ŊwɑꞋnɛ-Gɑŋntúu Yɛ́su Kɛlístɔ 1 - Ngomba bible

ŊwɑꞋnɛ-Gɑŋntúu Yɛ́su Kɛlístɔ 1

¹Tʉ́ʉndɛn Tɛɔfîl! Mɔ, ŋ kɑ ŋwɑꞋnɛ nduŋmbi ŋwɑꞋnɛ, ŋ́ɡɑ́ mbɔ̌ ɡu ńdɔk ḿbɛ́ɛtɛ mɛnu mi Yɛ́su kɑ ɡɛnɛ, mbɑ mi ɑ kɑ zíꞋnɛ mbɔ̌ pʉɔ tɛ ɛ́fú nzɛnɛ fɑꞋ yɛ́,

²ŋ́ɡʉ ŋ́kúu nǔu lɛ́Ꞌ yi Sɛ́ ɡɛnɛ ɑ kɔ́Ꞌ nɛ́ tʉ́nɛ́pú. A kɑ ɡɔ́ ŋ́kɔ́Ꞌ, ńdɛɛ nǔu Zẅikŋɛ Lɛ́ɛnɛ́nɛ, ńdɛꞋlɛ yúu mi ɡɑŋntúu pi ɑ kɑ tsɔ́Ꞌnɛ ɡʉ ńtsʉ́Ꞌ ḿbɔ́ ŋ́ɡɛ.

³A kɑ jʉ́ɔ ŋɡʉ̈ɔ́Ꞌ lɑ ḿpfú, ŋ́ɡɛ ńzẅíimɛ nǔu nɛvú, ńdɔk mɛntɛ́ tɛ ńzɑ́ɑ, ńnyɛt mbʉʉ yɛ mbɔ̌ pɔ́p, ŋɡɔ ɑ ɡú, tɛ mbɔ ɛ́ pɔ́ pɔ́p pɔɔ pɛn ḿmʉꞋlɛ pɔ́, ńcẅɛt mbi pɔ́p cẅɛtnɛ nǔu mɛlɛ́Ꞌ mɛɡɛ́mɛ́nɛ́kwɑ, ḿbɔ́ ɛ́sẅíi wɔ́p nɛ́ nu nǔu nu-nɛfɔɔ-Sɛ́.

⁴Pɔ́p pɛ́pɔ́p ɡɛ ḿbɔ́ yɛcɔ́ lɛ́Ꞌ ɑ sɑ́Ꞌ mbɔ̌ pɔ́p ŋɡɔ: «Pʉʉ kɛ ńnɑ́ŋ pɔ Yɛlúsɑlɛm! Pʉʉ kɛ́ ńnɑ́ŋ pɔ zúꞋu, ńzẅíꞋlɛ yúu mi Tɑ̌ɑ kɑ kɑꞋnɛ nɛɡɑ́ mbɔ̌ pʉʉ.» Ɛ́ pɔ́ pɑ́Ꞌ ŋ kɑ sẅíinɛ wʉ́ʉ ŋɡɔ:

⁵«Jɑ̂ŋ kɑ nuꞋ pʉɔ ŋki, lɑ́ ŋ́ɡʉ nǔu pʉʉ, mbɔ ɛ́ tsʉ́Ꞌ mɛcɔ́ mɛlɛ́Ꞌ, Sɛ́ nuꞋ wʉ́ʉ tsɛt Zẅikŋɛ Lɛ́ɛnɛ́nɛ.»

⁶Gɑŋntúu kɑ cúꞋlɛ pɔ́Ꞌɔ, ḿbíkŋɛ Yɛ́su ŋɡɔ: «Ndɛ, yɔ lɔk ḿbɔ́ ŋkɑ́ yi ɔ ɡʉ ŋ́ɡɛ lɑ nɛfɔɔ pɛn mbɔ̌ Íslɑɛ̂l kɛkʉ̈ɔ́?»

⁷Yɛ́su tsɔ́Ꞌ mbɔ̌ pɔ́p ŋɡɔ: «Pʉʉ zɛɛ mbɔɔ ɡẅɛɛ nɛjí kɛ ɛ́ ŋkɑ́ pɔ́, kɛ lɛ́Ꞌ yi mîmɑ́ mɛnu ɡʉ ŋ́ɡɛ pɔ́. Tɑ̌ɑ zɛ́nɛ́ jʉ́ kɑ kwɑŋɛ́nɛ ńzɑ́p.

⁸Pʉʉ ńjí pɔ ndɑꞋ ŋɡɔ Zẅikŋɛ-Sɛ́ ɡʉ ŋ́ɡɛ ńtɔ́ nǔu pʉʉ, ŋ́ɡɑ́ wʉ́ʉ nɛ́ mɛtʉʉ. Pʉʉ lɔk ŋ́kuꞋ nɛsẅíŋɛ mbɑ kʉ̈ɔ́ lɑ́ yi pʉʉ jínɛ nǔu mɔ! Ńzɛ Yɛlúsɑlɛm ɛ́sẅíi sẅíinɛ ḿmɛk Judɛ̂. Ḿbɛn ɛ́fú Sɑmɑlîi, ɛ́sẅíi sẅíinɛ ŋ́kúu zʉꞋ yi tsɛ́tsɑ́Ꞌ lẅiklɛ́nɛ zúꞋu.»

⁹Yɛ́su kɑ cú yɔ nu tɛ ḿbɔ́tnɛ ńnɑ́ŋ, pɔ́p tʉ́ʉ ḿbɔ́ ńdíŋɛ wɛ́ líŋɛ́nɛ, ɑ kɔ́Ꞌ nɛ́ tʉ́nɛ́pú. Yɛcɔ́ lɑ́ɑ pɔɔ wɛ́, ɑ pɛ́ mík pɔ́p.

¹⁰A pɔ́ ŋ́kɔ́Ꞌ, pɔ́p tʉ́ʉ ŋ́kɛ́ ḿbɔ́ ńdíŋɛ nɛpú líŋɛ́nɛ. Pɛcɔ́ pʉɔ pɛ́pɑ́ ɡɔ́ɔ ńcẅɛt ńtʉ́ʉ nɛjɔ́ŋ pɔ́p, ḿmɑꞋ mɛfúfú ndẅí,

¹¹ńcú mbɔ̌ pɔ́p ŋɡɔ: «Pɑŋɡɑlíliyɑ, pʉʉ tʉ́ʉ ńdíŋɛ tʉ́nɛ́pú mɛlɑ́Ꞌ kʉ̈ɔ́? Yɛ́su pʉ́ɔlɑ́, mbɔ Sɛ́ fú mbɔ̌ pʉʉ ɛ́sɑ́Ꞌ wɛ́ ńdɔk ŋ́ɡʉ nɛ́ tʉ́nɛ́pú, ɑ ɡʉ ŋ́ɡɛ ḿbɛn ḿbɛn nzʉʉ pɔ nǔu ntɛ́ yi pʉʉ jʉ́ɔnɛ ɑ lɔk ŋ́ɡʉ lɑ́.»

¹²Gɑŋntúu-Yɛ́su ɡɔ́ɔ ŋ́kɛ́ ɛ́fú ndǔ nɛŋkɔ́Ꞌ-mɛtʉ́-mɛɡwɛ́t-ɔliivɛ ḿbɛn nzʉʉ nɛ́ Yɛlúsɑlɛm. Nɛfú ndǔ nînɑ́ nɛŋkɔ́Ꞌ, ŋ́ɡʉ ŋ́kúu zúꞋu, ɛ́ pɔ́ yúu kílɔmítɑ yɛ́pɑ́.

¹³Pɔ́p ŋ́kúu Yɛlúsɑlɛm, ŋ́kɔ́Ꞌ ndǔ ndɛ̂k wɛ tʉ́, ŋ́kúu tsɛt lûmndɑ́ ẅi pɔ́p kɑ pɔ́ ńcúꞋlɛ zúꞋu. Yɔ m̄bɔ́ Pyɛ̂, ŋ́ɡɛ Jɑ̂ŋ pɔ́p Jɑ̂k, ŋ́ɡɛ Ndɛlɛ́yɑ. Yɔ pɔ́ Filîp, ŋ́ɡɛ Tɔ́mɑ́shi, pɔ́p Pɑtɛlɛmî mbɑ Mɑtʉ̈ɔ. Yɔ pɔ́ Jɑ̂k mɔ́ɔ-Alfɛ̂, ŋ́ɡɛ Símɔ̂ŋ ẅi pɛ́ kɑ pɔ́ ɛ́fúŋ wɛ́ ŋɡɔ mɔ́ɔ-ŋɡɔŋ, pɔ́p Jẅidɛ mɔ́ɔ-Jɑ̂k.

¹⁴Pɔ́p pɛ́tsʉʉ kɑ pɔ́ ńdɔk tɑ́Ꞌ zẅikŋɛ ńcɛꞋlɛ Sɛ́ kɛ́ tẅí yɛcɔ́ lɛ́Ꞌ, pɔ́p pɛ́ Mɑlíyɑ mɑ́ pɛ́ Yɛ́su, ŋ́ɡɛ pɛcɔ́ pɑŋɡɛ́ mbɑ pɔ́ɔpɛ́mɑ́-Yɛ́su.

¹⁵Ɛ́ ɡɛ ḿbɔ́ yɛcɔ́ lɛ́Ꞌ, pɔ́ɔpɛ́mɑ́ cúꞋlɛ sɛ́, tɛ ḿbɔ́ yúu pʉɔ ŋkʉ nɛ́ mɛɡɛ́mɛ́mbɑ́ Pyɛ̂ lɔ sɛ́, ńtʉ́ʉ tsɛtsɛt pɔ́p ńcú ŋɡɔ:

¹⁶«Pɔ́ɔpɛ́mɑ́, ɛ́ ḿbɔ́ ḿbíkŋɛ ŋɡɔ yúu minɛ Zẅikŋɛ Lɛ́ɛnɛ́nɛ kɑ lɔknɛ ntsu-fɔɔ Ndɑvît ḿbʉ́, pɛ́ ŋwɑꞋnɛ tsɛt ŋwɑꞋnɛ-Sɛ́ puutɛ. Ɛ́ nu yí ɑ kɑ zɑ́Ꞌnɛ njí ńcú ntɛ́ Jẅidɑ ẅí jʉ́ kɛ́nɛ ńcẅɛt ńnyɛt ndúŋ lɑ pɛ́ ɡẅɛɛ Yɛ́su.»

¹⁷Lɑ mbɔ Jẅidɑ ɛ̂wɑ́ ḿbɔ́ wɛcɔ́ tɑ́Ꞌ ŋu nǔu nɔɔ wɛk pɑpɛ́m Yɛ́su. Tɛ ḿbɛn ŋ́ɡẅɛɛ yɛ́ túfɑꞋ yi ɑ ɡʉ ŋ́ɡɛ tsɛtsɛt pɛkŋɛ.

¹⁸A ńcẅɛ́ɛ ŋkɑ́p-sɔ́ɔ, ńdɔk ńzúu ŋkɑ́Ꞌ, ŋ́kúu zúꞋu, ḿvu sɛ́ mbi nɛ mbi. Tɛ nɛpɛm nɛ́ sɑ́Ꞌ. Mɛtɔ́ mɛ́ cẅɛt ɛ́sɑt zʉꞋ.

¹⁹Yɛlúsɑlɛm tsʉʉ kɑ zúꞋ yɔ nu, tɛ ńcẅi lík ŋkɑ́Ꞌ ŋɡɔ: «Akɛldɑmɑ, ńdɔk ńcú ŋɡɔ: “Ŋkɑ́Ꞌ-mɛci.”

²⁰Ɛ́ zɛɛ ŋ́ɡɔ ḿbɔ́ mbɔ pɛ́ kɑ ŋwɑꞋnɛ tsɛt ŋwɑꞋnɛ mɛzɔpŋki ŋɡɔ: Ɛ́ pɔŋ ndɑ́ yɛ ńtsʉ́Ꞌ fɛm ndɑ́. Ḿbɑ́ɑ ŋu nɛlɑ́Ꞌ ḿbɛn ńnɑ́ŋ tsɛtú, ḿbɛn ŋ́ŋwɑꞋnɛ ńdɔk ńdẅiklɛ ŋɡɔ wɛcɔ́ ŋu ndɛꞋ ńjʉ́ zʉꞋ yɛ́.»

²¹Ɛ́ yɛ́tɛ́ lɑ́ ɛ́ sɛ́ ḿbíkŋɛ ŋɡɔ pɛkŋɛ tsɔ́Ꞌ tɑ́Ꞌ ŋu tsɛtsɛt pʉɔ pinɛ pɛkŋɛ pɛpɔ́p ḿbɔ́ ńjúk ńnɛn nzʉʉ Tsɑpʉɔ Yɛ́su, tɛ ɛ́fú ŋ́kɑ́ yi Jɑ̂ŋ kɑ pɔ́ ńnuꞋ pʉɔ ŋki ŋ́kúu nǔu lɛ́Ꞌ yi Sɛ́ kɑ lɔknɛ Yɛ́su ɛ́fú tsɛtsɛt pɛkŋɛ ŋ́ɡʉ, ńdɔɔ tɑ́Ꞌ ŋu, pɛkŋɛ pɛ́pɔ́p puutɛ pɛ́tsʉʉ ɛ́sẅíi yúu mi pɛkŋɛ jínɛ nǔu Ndɛ wɛkŋɛ Yɛ́su pɑ́Ꞌ ɑ kɑ zẅíimɛ́nɛ nǔu nɛvú.

²³Pɛ́ kɑ tík pʉɔ pɛ́pɑ́ sɛ́. Yɔ m̄bɔ́ Yɔsɛ̂p ẅí pɛ́ kɑ pɔ́ ḿbɛn ɛ́fúŋ wɛ́ ŋɡɔ Mbɑlsɑbɑs, yɛcɔ́ lík yɛ́ pɛn ḿbɔ́ ŋɡɔ Jẅistẅis. Wɛcɔ́ ŋu pɔ́ Mɑtíyɑs.

²⁴Pɛ́ ɡɔ́ɔ ŋ́kɛ́ ńcɛꞋlɛ Sɛ́ ńcú ŋɡɔ: «Tsɑpʉɔ, ɡu ẅí ɔ jínɛ tʉ́m pʉɔtsʉʉ lɑ́, ɡʉ nǔu pʉɔ pɔnɛ pɛ́pɑ́, ńnyɛt wɛk nɛ́ ŋu ẅí ɔ tsɔ́Ꞌnɛ wɛ́.

²⁵Ẅîwɑ́ ŋu tsʉ́Ꞌ ŋɡɑŋtúu Yɛ́su, ńtʉ́ʉ nǔu zʉꞋ-Jẅidɑ ḿbɔ́nɛ zúꞋu lɑ ḿmɛꞋ ŋ́ɡʉ nɛ́ yɛ́ zʉꞋ lɑ́.»

²⁶ŃcɛꞋlɛ Sɛ́ tɛ ḿbɔ́tnɛ ńnɑ́ŋ, ḿmɑꞋ ńtíitɛ nɛlɔk ńdɔɔ ŋu ẅí Tsɑpʉɔ tsɔ́Ꞌnɛ wɛ́, ɛ́ vu nǔu Mɑtíyɑs. Pɛ́ kẅiꞋ wɛ́ nǔu nɔɔ-pɑpɛ́m Yɛ́su ntsɔ̌pmɔꞋ nɛ́ nɛɡɛ́m.