Read Ngomba ŊwɑꞋnɛ-Gɑŋntúu Yɛ́su Kɛlístɔ 13 Bible Online

ŊwɑꞋnɛ-Gɑŋntúu Yɛ́su Kɛlístɔ 13 - Ngomba bible

ŊwɑꞋnɛ-Gɑŋntúu Yɛ́su Kɛlístɔ 13

¹Ɛ́ m̄bɔ́ tsɛt cúlɛ-pʉɔ-Kɛlístɔ yi ɛ́ m̄bɔ́nɛ tʉ́sɔŋ-Antíyɔshɛ, pɛŋɡɛ́mndʉ̈ɔ́Ꞌ-Sɛ́ pɔ́ zúꞋu, ŋ́ɡɛ pɑzíꞋ pʉɔ nɛ́ nu-Sɛ́. Yɔ m̄bɔ́ Pɑnɛpɑ́ɑshi, ŋ́ɡɛ Símɛyɔ̂ŋ ẅí pɛ́ fúŋnɛ wɛ́ ŋɡɔ Shíshíŋu, ŋ́ɡɛ Lusius, mɔ́ɔ-pɑk-ŋɡɔŋ-Silɛ̂nɛ, ŋ́ɡɛ Mɑnɑyɛn ẅí pɔ́p Ɛlɔ̂dɛ ẅí ɑ m̄bɔ́nɛ ŋɡɔ́mnɑɑ Ŋɡɑlílíyɑ kɑ ɡúꞋnɛ, ḿbɛn ŋ́ɡɛ Sɔ̂l.

²Yɛcɔ́ lɛ́Ꞌ, pɔ́p kɔŋ kɔŋnɛ ńnɑ́ŋ njí ńcɛꞋlɛ Sɛ́. Zẅikŋɛ Lɛ́ɛnɛ́nɛ cú mbɔ̌ pɔ́p ŋɡɔ: «Pʉʉ ɛ́fɑk Pɑnɛpɑ́ɑshi pɔ́p Sɔ̂l, ńnɑ́ wɔ́p, pɔ́p fɑꞋ fɑꞋ yí ŋ kɑ tsɔ́Ꞌnɛ wɔ́p ntɛ́ yɛ́tɛ́.»

³Pɔ́p zúꞋ pɔ́Ꞌɔ ŋ́kɔŋ ńnɑ́ŋ njí, ńcɛꞋlɛ Sɛ́ tɛ ḿbɔ́tnɛ ńnɑ́ŋ, ńzɑ́p mbɔ́ tú pɔ́p, ńnɑ́ wɔ́p pɔ́p ɡʉ.

⁴Zẅikŋɛ Lɛ́ɛnɛ́nɛ túu Pɑnɛpɑ́ɑshi pɔ́p Sɔ̂l pɔ́Ꞌɔ, pɔ́p ɡʉ nɛ́ Sɛlɛsi zʉꞋ mɛkɑnúꞋ ḿbɔ́ ńtʉ́ʉ. Ɛ́fú zúꞋu ŋ́kúu wɛcɔ́ mɑ́mɑ́ kɑnúꞋ ŋ́ɡʉ nɛ́ Shíipɛlɛ, ɛ́ pɔ́ ŋɡɔŋ ẅi ŋki kɑ zɛmɛnɛ ńníꞋ sɔŋ.

⁵Pɔ́p ɡʉ tɛ ŋ́kúu zúꞋu, ńcẅɛt tsɛt kɑnúꞋ tʉ́sɔŋ-Sɑlɑminɛ, ḿbɔ́ ɛ́sẅíi nu-Sɛ́ tsɛt mɛndɑ́-cúꞋlɛ-pɑyúdɑ. Pɔ́p pɛ́ Jɑ̂ŋ Mɑ́lɛ́kúshi kɑ ɡɛnɛ ɑ pɔ́ ńcẅɛ́lɛ́ wɔ́p.

⁶Pɔ́p pɛ́ pɔ́p ɡɛ ɛ́fú zúꞋu ńjɛ́Ꞌ tɛ ŋ́kúu tʉ́sɔŋ-Pɑfɔs. Ŋ́kúu zúꞋu ńcẅɛ́Ꞌnɛ wɛcɔ́ ŋu-pɑyúdɑ, pɛ́ fúŋnɛ wɛ́ ŋɡɔ Mbɑ̂l-Yɛ́su. A pɔ́ ŋɡɑŋnɛkɑŋ, ńjúk ńcɔt nu mbɔ̌ pʉɔ ŋɡɔ ɑ Ŋɡɛ́mdʉ̈ɔ́Ꞌ-Sɛ́.

⁷A pɔ́ ŋu nǔu pʉɔ pi pɔ́p nɛjɔ́ŋ-ŋɡɔ́mnɑɑ Sɛlɡẅís Pɔlɔs. Ŋɡɔ́mnɑɑ ɛ̂wɑ́ pɔ́ ŋu ŋ́ɡẅɛɛ jínu tɛꞋ. A cú pɛ́ ɡʉ ɛ́fúŋ Pɑnɛpɑ́ɑshi pɔ́p Sɔ̂l ŋ́ɡɑ́ mbɔ̌ wɛ́, mbíꞋŋɡɔ ɑ kɑ pɔ́ ńtsɑ́ɑ nɛzúꞋ nu-Sɛ́.

⁸Lɑ́ ŋɡɑŋnɛkɑŋ ɛ̂wɑ́, lík yɛ́ pɔ́ Ɛlímɑs nǔu sẅiŋɛ-ŋɡɛlɛ́k lɔk ḿbɔ́ ŋɡɑŋnɛkɑŋ, ŋu ɛ̂wɑ́ pɔ́ ḿbɑɑ Pɑnɛpɑ́ɑshi pɔ́p Sɔ̂l, ḿbɔ́ ńdɔɔ nɛtɑɑtɛ tɛ ŋɡɔ́mnɑɑ pɔɔ zɑ́p tʉ́m yɛ́ nǔu Yɛ́su pɔ́.

⁹Zẅikŋɛ Lɛ́ɛnɛ́nɛ jʉ́ Sɔ̂l, ẅi pɛ́ pɛnnɛ ɛ́fúŋ wɛ́ ŋɡɔ Pɔ̂l lɑ́. A tík mík nǔu Ɛlímɑs,

¹⁰ńcú mbɔ̌ wɛ́ ŋɡɔ: «Mɔ́ɔ-Sɑ́ttɑ, ɔ ŋɡɑŋ cɔtnu. Ɔ jí pɔ nɛfʉ́klɛ pʉɔ. Ɔ ŋɡɑŋmbuu-nu sʉ́Ꞌnɛ tsʉʉ, mbɑ kʉ̈ɔ́ lɑ́ yi Tsɑpʉɔ Sɛ́ ɡɛnɛ ɛ́ tʉ́ʉ ndʉ́ŋndʉŋ, ɔ ɡɔ́ɔ ŋ́kɛ́ ńtɑ́ɑ, ŋ́ŋɔ́Ꞌtɛ. Tɛ ɔ kɑ nɑ́ wɑ́ ndɛn pɑ́Ꞌɑ pɔ́ ɔɔ?

¹¹Tsuŋ ńzúꞋ ŋkɔ̂ɔnɛ, Tsɑpʉɔ Sɛ́ zɑ́p pɔ́ yɛ́ nǔu ɡu. Ɔ ɡʉ fʉ tɛ ɛ́ nɑ́Ꞌ ńnɑ́ŋ, ɔ pɔɔ pɛn ńjʉ́ɔ lík-nɛm pɔ́.» Ńcú pɔ́Ꞌɔ, mík Ɛlímɑs sʉ́ʉ. A tsʉ́Ꞌ ḿbɔ́ pɔ tsɛt nzɛ́nzʉ́ʉ, ńzɛ nɛshɔtnɛ ńzɛmɛ zʉꞋ, ńdɔɔ ŋu ẅí ɑ ɡʉ ŋ́ɡẅɛɛ pɔ́ yɛ́.

¹²Ŋɡɔmnɑɑ jʉ́ɔ yúu mi ɛ́ lɛɛnɛ, ńzɑ́p tʉ́m yɛ́ nǔu Yɛ́su. Ɛ́ ɡɔ́ ḿbɔ́, mbɔ nu-Tsɑpʉɔ yi pɛ́ sẅíinɛ wɛ́, níꞋ mɛtʉʉ mɛ́ tɛꞋ.

¹³Pɔ̂l pɔ́p pʉɔ pi pɔ́p pɛ́ pɔ́p ḿbɔ́nɛ, ŋ́kúu wɛcɔ́ mɑ́mɑ́ kɑnúꞋ tʉ́sɔŋ-Pɑfɔs, ŋ́ɡʉ nɛ́ tʉ́sɔŋ-Pɛljɛ yi ɛ́ tsɛt ŋɡɔŋ-Pɑnfilî. Jɑ̂ŋ Mɑ́lɛ́kúshi ɡʉ tɛ ŋ́kúu zúꞋu, ńnɑ́ wɔ́p ḿbɛn nɛ́ Yɛlúsɑlɛm.

¹⁴Pɔ̂l pɔ́p Pɑnɛpɑ́ɑshi tsʉ́Ꞌ nzʉʉ ɛ́fú tʉ́sɔŋ-Pɛljɛ, ńdɔk mɛku ŋ́ɡʉ nɛ́ tʉ́sɔŋ-Antíyɔshɛ yi ɛ́ mbʉʉ Pisidîi. Lɛ́Ꞌnji-pɑyúdɑ ɡɛ ŋ́kuꞋ, pɔ́p ɡʉ ndɑ́-cúꞋlɛ, ŋ́kɔkŋɛ ńnɑ́ŋ sɛ́.

¹⁵Pɛ́ fúŋ sẅíŋɛ-Sɛ́ tsɛt ŋwɑꞋnɛ-nɛpʉ́ʉ mbɑ tsɛt mɛŋwɑꞋnɛ-pɛŋɡɛ́mndʉ̈ɔ́Ꞌ-Sɛ́, ɛ́fúŋ tɛ ḿbɔ́tnɛ ńnɑ́ŋ, pɛlʉ́m tsɛt yîyɑ́ ndɑ́-cúꞋlɛ túu pɛ́ ɡʉ ḿbíkŋɛ wɔ́p ŋɡɔ: «Pɔ́ɔpɛ́mɑ́, pʉʉ lɑɑ ŋ́ɡẅɛɛ sẅiŋɛ nɛlɔk ńníꞋ mɛtʉʉ pʉɔ, pʉʉ ɡɑ́.»

¹⁶Pɔ̂l lɔ sɛ́, ŋ́kɑꞋ pɔ́ yɛ́, ńcú ŋɡɔ: «Pɑíslɑyɛ̂l, tɛ mbɑ pʉʉ ẅi pʉʉ pɔ́knɛ Sɛ́, pʉʉ zúꞋ.»

¹⁷Sɛ́ wʉk pɑíslɑyɛ̂l kɑ tsɔ́Ꞌ pɛmɑ́ŋɡɑpnjẅɛt pɛk, ŋ́ɡɛ lɑ́Ꞌ yɔ sɑ́ɑ njẅɛt yɛ́, ŋkɑ́ yi pɔ́p kɑ pɔ́ ńtswɛ́ túu, tsɛt ŋɡɔŋ-Ɛɡíptɔ. Sɛ́ ɡɛ ńdɔk pɔ tʉʉ lɑ́ ɛ́fú zúꞋu ńcẅɛɛtɛ wɔ́p,

¹⁸ɛ́suk mɛku mɔ́p kɔ̂ŋtɛt suknɛ, nǔu ŋɡuꞋlɑ́Ꞌ mɛɡɛ́mɛ́nɛ́kwɑ,

¹⁹ŋ́ɡɛ ḿbík mɛlɑ́Ꞌ-pʉɔ-Kɑ̌nɑhɑ́n sɑɑmbɑ́, ŋ́ɡɑptɛ tsɛ́tsɑ́ꞌ yɔ́p mbɔ̌ pʉɔ pɛk.

²⁰Ɛ́ pɔ́ ŋkɑ́ yîyɑ́, ɛ́ lɔk ḿbɔ́ yúu ŋɡuꞋlɑ́Ꞌ ŋkʉ yɛ́nɛ́kwɑ nɛ́ mɛɡɛ́mɛ́ntɑɑ pɑ́Ꞌ ɑ kɑ tsɔ́Ꞌnɛ wɔ́p. A pɑ́ɑtɛ ŋ́ɡɑ́ pɑpɛꞋ mɛlɑ́Ꞌ mbɔ̌ pɔ́p. Tɛ ńdɑ́Ꞌ ŋ́ɡʉ ńdẅiklɛ nǔu ŋkɑ́-Ŋɡɛ́mdʉ̈ɔ́Ꞌ-Sɛ́ Sɑmîɛ[10].

²¹Pɛmɑ́ŋɡɑpnjẅɛt pɛk ɡɛ ńdɔ́ɔ fɔɔ, Sɛ́ ɡɑ́ Sɑẅîl, mɔ́ɔ-Kís mbɔ̌ pɔ́p. A fú nǔu njẅɛtndɑ́ Mbɛ̌zɑmɛn. A sɑ́Ꞌ lɑ́Ꞌ ŋɡuꞋlɑ́Ꞌ mɛɡɛ́mɛ́nɛ́kwɑ,

²²Sɛ́ ɡɛ ḿmɛꞋ wɛ́, ńtsɔ́Ꞌ Ndɑvît, ńdɔk ŋ́ɡɛ fɔɔ, ńcú nu ntɛ́ Ndɑvît ŋɡɔ: «Mɔ, n jʉ́ɔ Ndɑvît, mɔ́ɔ-Jɛsɛ́ ɑ pɔ́ lii-ŋu ẅí mɔ sɛ́ ŋ́kɔŋ. A ɡʉ ńdɑ́Ꞌ ŋ́ɡɛ yúu tsʉʉ yí ŋ kɔŋnɛ.»

²³Sɛ́ pɛn ŋ́ɡʉ nǔu njẅɛtndɑ́-fɔɔ Ndɑvît, ŋ́ɡɛ pɛ́ pí Nzɑ́Ꞌŋkʉ pɑ́Ꞌ ɑ kɑ kɑꞋnɛ, ŋɡɑŋ pɔ́ Yɛ́su.

²⁴Yɛ́su ŋ́ɡɛ ŋ́ɡɔ ńtɔ́, mbɔ Jɑ̂ŋ tɔ́ mɔ yɛ́ tɛ ḿbɔ́ ɛ́sɑ́Ꞌ sẅiŋɛ mbɔ̌ lɑ́Ꞌ-Íslɑyɛ̂l ŋɡɔ pɔ́p kúpmɛ mɑt wɔp, ŋ́ɡɛ pɛ́ nuꞋ wɔ́p ŋki.

²⁵Jɑ̂ŋ ɡɛ ńtsʉ́Ꞌ nɛmɛkŋɛ fɑꞋ yɛ́, ḿbíkŋɛ lɑ́Ꞌ ŋɡɔ: «Pʉʉ pɑꞋnɛ ḿbɔ́ ŋ́kwɑŋɛ ŋɡɔ mɔ wɔ̌? Ŋ kɑ́ pɔ́ Nzɑ́Ꞌŋkʉ puꞋ pɔ́! Pʉʉ kɛ ńzúꞋ sʉ́Ꞌnɛ, ɑ nzʉʉ mɔ ḿbɔ́ ńtɔ́. N zɛɛ ḿbɔɔ kuꞋ ŋu ẅí ɛ́ lɑɑ ḿbɔ́ ŋ kíɛꞋ ŋkʉ-mɛtɑp mɛ́ pɔ́.»

²⁶Pɔ̂l pɛn ńcú ŋɡɔ: «Pɔ́ɔpɛ́mɑ́, Sɛ́ cú yɔ nu pɔ mbɔ̌ pɛkŋɛ pɛtsʉʉ. Ɛ́ nɛlɔk ŋ́ɡɛ pɛkŋɛ luk. A túu yɔ nu mbɔ̌ pʉʉ ẅí pʉʉ pɔ́ɔ-Ábɛlɛhɑ́m, mbɑ mbɔ̌ pʉʉ ẅí pʉʉ pɔ́knɛ Sɛ́.»

²⁷Lɑ́ ɛ́ kɛ́ ḿbɔ́ pɑ́Ꞌɑ, mbɔ pʉɔ-Yɛlúsɑlɛm pɔ́p pɑsɑ́Ꞌ lɑ́Ꞌ yɔ́p ŋ́kɑɑ kɛ́ ńjí ŋu ẅí Yɛ́su jʉ́ pɔ́, pɔ́p ŋ́kɑɑ pɛn ŋ́kɛ́ ńzúꞋ yúu mi sẅiŋɛ-pɛŋɡɛ́mndʉ̈ɔ́Ꞌ-Sɛ́ cúnɛ pɔ́, lɑ́ ḿbɛn ŋ́kɛ́ ḿbɔ́ ɛ́fúŋ ŋɡɔŋ mɛlɛ́Ꞌnji mɔ́p tsʉʉ. Ɛ́ kɑ lɛɛ pɔ́Ꞌɔ, pɔ́p ŋɑk Yɛ́su pɑ́Ꞌ pɛ́ ɡʉ ńjẅí wɛ́. Pɔ́p kɑ lɔk pɔ́Ꞌɔ, ŋ́ɡɛ yúu mi pɛŋɡɛ́mndʉ̈ɔ́Ꞌ-Sɛ́ kɑ zɑ́Ꞌnɛ njí ńcú puutɛ,

²⁸ńjɑ́k yúu mi pɔ́p ɡʉ ńdɛɛ nǔu ŋ́ɡɛ pɛ́ jẅí wɛ́, ŋ́ɡʉ ńjʉ́ɔ Pilɑtɔ ŋɡɔ ɑ kɛ́ ńjẅí wɛ́ jẅínɛ.

²⁹Pɔ́p kɑ pɔ́ tɛ ŋ́ɡɛ mbɑ kʉ̈ɔ́ lɑ́ yi pɛ́ kɑ ŋwɑꞋnɛnɛ tsɛt ŋwɑꞋnɛ-Sɛ́ ntɛ́ jʉ́ Yɛ́su, pɔ́p ɡɛ pɛ́ fú nǔu tʉ́ mbɑ́ŋtɛ pɑ́ŋtɛ́nɛ ŋ́kɔk wɛ́, ńníꞋ tsɛt nɛshi.

³⁰Lɑ́ Sɛ́ zẅíimɛ wɛ́ nǔu nɛvú.

³¹A lɔk mɛlɛ́Ꞌ tɛ ńzɑ́ɑ, ńnyɛt mbʉʉ yɛ mbɔ̌ pʉɔ pí pɔ́p pɛ́ pɔ́p kɑ fúnɛ Ŋɡɑlilɛɛ ńtɛmtɛ ŋ́ɡʉ Yɛlúsɑlɛm. Píipɑ́ pʉɔ ŋkɔ̂ɔnɛ ḿbɔ́ pɛ́ pɑjʉ́njʉ́ɔ mbi lɑ́Ꞌ.

³²Pɛk yɛ́k, pɛk tʉ́ʉ pɑꞋnɛ, ḿbɔ́ ḿbʉ́ wʉ́ʉ nɛ́ yîyɑ́ nu sʉ́Ꞌnɛ. Ɛ́ pɔ́ nu yí Sɛ́ kɑ lɑ́Ꞌnɛ ŋ́kɑꞋ mbɔ̌ pɛmɑ́ŋɡɑpnjẅɛt-pɑíslɑyɛ̂l.

³³A kɑ kɛ́ ŋ́ɡɛ yîyɑ́ nu puutɛ tú pɛkŋɛ pí pɛkŋɛ mbɔ́ŋkʉ̈ɔ́ pɔ́p. A kɑ ɡɛ Yɛ́su zẅíimɛ nǔu nɛvú pɑ́Ꞌ pɛ́ kɑ ŋwɑꞋnɛnɛ tsɛt ŊwɑꞋnɛ-Mɛzɔpŋki, ɛ́ nǔu mbɑ́ɑtɛ pɑk pɛ́pɑ́ ŋɡɔ: «Ɔ Mɔ́ɔ wɑɑ, tɛ fú lɔ́Ꞌnɛ n tsʉ́Ꞌ tɑ́t wu.»

³⁴Sɛ́ kɑ ɡɛ Yɛ́su zẅíimɛ nǔu nɛvú. Pɔ́Ꞌɔ lɑ́, ɑ kíi ńdɑ́Ꞌ ḿbɛn ḿbɛn tsɛt nɛshi pɑ́Ꞌ ḿbɔ́ ɑ lʉ̈ɔ́ pɔ́. Ɛ́ pɔ́ nu yí Sɛ́ kɑ zɛɛnɛ ńzɑ́Ꞌ njí ńcú ŋɡɔ: «Mɔ, ŋ ɡʉ ŋ́ɡɛ ńníꞋ mbɔ́tnɛ yɑɑ nǔu pʉʉ ɛ́ pɔ́ kwɑꞋ yîyɑ́ yi ŋ kɑ pʉ́nɛ mbɔ̌ fɔɔ Ndɑvît.»

³⁵Ɛ́ yɛ́tɛ́ lɑ́ pɛ́ kɑ pɛn ŋwɑꞋnɛ tsɛt yɛcɔ́ zʉꞋ-ŋwɑꞋnɛ-Sɛ́ ŋɡɔ: «Ɔ kɛ́ lɑ́Ꞌ ńnɑ́ ŋu ẅí ɔ kɑ tsɔ́Ꞌnɛ wɛ́, ɑ lʉ̈ɔ́ tsɛt nɛshi pɔ́.»

³⁶Ɛ́ ɡʉ nǔu fɔɔ Ndɑvît, mbɔ ɑ kɑ ɡɛ yúu mi Sɛ́ kɑ cúnɛ ŋɡɔ ɑ ɡɛ nǔu yɛ́ ŋkɑ́, ŋ́ɡɛ ḿpfú. Pɛ́ níꞋ pfú yɛ́ zʉꞋ yí pɛ́ kɑ níꞋnɛ yi pɛtɑ́t pɛ́ zúꞋu. A lʉ̈ɔ́ tsɛt nɛshi.

³⁷Lɑ́ ŋ́ɡʉ nǔu Yɛ́su, mbɔ ɑ ŋkɑɑ kɛ́ ńdʉ̈ɔ́ tsɛt nɛshi pɔ́. Sɛ́ kɑ kɛ́ ŋ́ɡɛ ɑ zẅíimɛ nǔu nɛvú.

³⁸Pɔ́ɔpɛ́mɑ́, jínɛ ŋɡɔ pɛ́ sẅíi wʉ́ʉ lɔ́Ꞌnɛ ŋɡɔ mbɔ Sɛ́ likŋɛ mɛnu kɛpɔŋ pʉɔ pɑꞋnɛ nɛtẅɛꞋ-Yɛ́su.

³⁹Mbɑ wɔ̌ lɑ́ ẅi ɑ zɑ́pnɛ tʉ́m yɛ́ nǔu Yɛ́su ɛ̂wɑ́ lɑ́, Sɛ́ líŋɛ wɛ́ ɑ pɔ́ mbi yɛ́ ḿbɔ́ ndʉ́ŋndʉŋ. Yɔ pɛn ḿbɔ́ yúu mi nɛpʉ́ʉ-Mɔ̌sɛ̂ɛ ŋ́kɑɑ kuꞋ nɛɡɛ pɔ́.

⁴⁰Pɔ́Ꞌɔ lɑ́, pʉʉ kɛ ńdɑk tú yʉ́ʉ, ḿbɔ́k yúu mi pɛŋɡɛ́mndʉ̈ɔ́Ꞌ-Sɛ́ kɑ ŋwɑꞋnɛnɛ tsɛt ŋwɑꞋnɛ-Sɛ́ nɛɡɛ wʉ́ʉ. Pɔ́p kɑ cú ŋɡɔ:

⁴¹«Pʉʉ pɑɡwɑ́k wɑ́ɑ mɔ Sɛ́, pʉʉ líŋɛ lɑ́ ńjʉ́ɔ. Yúu mi mɔ ŋ́ɡɛ ɡʉ ŋ́ɡɛ tɛ pʉʉ lɑ́kŋɛ! Pʉʉ ɡʉ ńzɛɛ ḿbɛ́t ḿbɔ́ pɔ ndǔ tsɛ́tsɑ́Ꞌ, ŋ ɡɛ yɛcɔ́ mɑ́mɑ́ nu, tɛ ḿbɔ́ yi pɛ́ ḿbɔ́ pɛ́Ꞌɛ ɛ́sẅíi wʉ́ʉ sẅíinɛ, mbɔ ɛ́ ńdɑɑ ḿbɔ́ pʉʉ pɔɔ pɛ́m.»

⁴²Pɔ́p kɑ mɛkŋɛ, Pɔ̂l pɔ́p Pɑnɛpɑ́ɑshí fú ndɑ́-cúꞋlɛ ńcẅɛt. Pɛ́ púꞋ mbɔ́ mbɔ̌ pɔ́p tɛꞋ ŋɡɔ pɔ́p lɑ́Ꞌ lɛ́Ꞌnji-pɑyúdɑ yi ŋɡɑp, ḿbɛn ńtɔ́ ɛ́sẅíi wɔ́p nɛ́ nu ŋ́ɡɑ́ nǔu yîyɑ́ nu.

⁴³Pɛ́ cẅɛt ndɑ́-cúꞋlɛ, ŋ́ɡɔ fyɑkŋɛ, nɛzɑ́ɑ pɑyúdɑ, pɔ́p pʉɔ pí pɔ́p pɔ́knɛ Sɛ́ ɡʉ ńcɑklɛ wɔ́p. Pɔ̂l pɔ́p Pɑnɛpɑ́ɑshi pɛn ńníꞋ mɛtʉʉ wɔ́p ŋɡɔ pɔ́p ɡẅɛɛ mɛnu sʉ́Ꞌnɛ mi Sɛ́ lɔknɛ ŋ́ɡɑ́ luk yɔ́p, ŋ́kúꞋlɛ kwɑꞋ sʉ́Ꞌnɛ.

⁴⁴Ŋɡɑpnjí lɛɛ, lɛ́Ꞌnji-pɑyúdɑ ɡɛ ḿbɔ́, pʉɔ-tʉ́sɔŋ kɔ́Ꞌ tɛꞋ, ńtɔ́ nɛzúꞋ sẅiŋɛ-tsɑpʉɔ Sɛ́.

⁴⁵Pɑyúdɑ jʉ́ɔ ndɛn lɑ́Ꞌ yi ɛ́ kɔ́Ꞌnɛ, ŋ́kɔ́Ꞌ lɔ́ŋ, ńzɛ nɛsɑ shuk-nu yí Pɔ̂l pɔ́p Pɑnɛpɑ́ɑshi cúnɛ, ńzɛ nɛzɔɔtɛ wɔ́p.

⁴⁶Pɔ̂l pɔ́p Pɑnɛpɑ́ɑshi ɡɔ́ɔ ɛ́sɑ́ɑnɛ sɑ́ɑnɛ́nɛ ńcú mbɔ̌ pɔ́p ŋɡɔ: «Pɛk ŋ́kɛ́ zɛɛ ŋ́ɡẅɛɛ nɛpiitɛ ɛ́sẅíi nu-Sɛ́ pɔ mbɔ̌ pʉʉ pɑyúdɑ. Pɑ́Ꞌ pʉʉ kɛ́ ńdʉꞋ lʉꞋnɛ, ńnyɛt ŋɡɔ pʉʉ kɑ́ kuꞋ pɑ́Ꞌ ḿbɔ́ pʉʉ ɡẅɛɛ luk kɛ́mɛ pɔ́ lɑ́, pɛk ɡʉ ɛ́shɔtnɛ ŋ́ɡʉ ńdɔɔ pʉɔ pí pɔ́p kɑ́ pɔ́ pɑyúdɑ pɔ́,

⁴⁷mbíꞋŋɡɔ Tsɑpʉɔ kɑ zɛɛ ńcú mbɔ̌ pɛk ŋɡɔ: N dɔk wú ŋ́ɡɛ kyɛꞌ yí ɛ́ ɡʉ ŋ́kyɛꞋ ŋɡɔŋ nɛ́ ŋɡɔŋ. Ɔ ŋ́ɡʉ tɛ ŋ́kúu zʉꞋ yí tsɛ́tsɑ́Ꞌ lẅiklɛ́nɛ zúꞋu, ńcú mbɔ̌ lɑ́Ꞌ ŋɡɔ: Sɛ́ túu sẅiŋɛ mbɔ̌ pʉʉ yi ɛ́ ɡɛnɛ pʉʉ luk!»

⁴⁸Pʉɔ pí pɔ́p kɑ́ pɔ́ pɑyúdɑ pɔ́ zúꞋ yɔ nu, ńtsɑ́ɑtɛ tɛꞋ, ŋ́ɡúꞋlɛ sẅiŋɛ-tsɑpʉɔ. Pʉɔ pi pɔ́p tsɛtsɛt pɔ́p, mbɔ Sɛ́ tsɔ́Ꞌ wɔ́p pɑ́Ꞌ pɔ́p pɛ́ pɔ́p ɡʉ ŋ́ɡẅɛɛ luk kɛ́mɛ, zɑ́p tʉ́m yɔ́p nǔu Yɛ́su.

⁴⁹Sẅiŋɛ-tsɑpʉɔ pɛn ḿbɔ́ ɛ́sɑt yîyɑ́ pɑk-ŋɡɔŋ tsʉʉ.

⁵⁰Lɑ́ pɑyúdɑ ɡɔ́ɔ ŋ́kɛ́ ńníꞋ mɛtʉʉ pɛcɔ́ pɑŋɡɛ́ pi pɔ́p tʉ́sɔŋ-Antíyɔshɛ ɛ̂wɑ́ ŋ́ɡẅɛɛ yúu. Mbɔ pɔ́p kɑ pɔ́ ńcɛꞋlɛ Sɛ́ pɑ́Ꞌ pɑyúdɑ, ńníꞋ mɛtʉʉ mbɑ pɛcɔ́ pɛkɛ́m pi pɔ́p tʉ́sɔŋ. Pɔ́p pɛ́ pɔ́p zɑ́ɑ sɔ́ɔ nǔu Pɔ̂l pɔ́p Pɑnɛpɑ́ɑshi, ńzuŋ wɔ́p tɛ pɔ́p fú lɑ́Ꞌ pɔ́p ŋ́kɛ́ ŋ́ɡʉ ɡʉnɛ.

⁵¹Pɔ̂l pɔ́p Pɑnɛpɑ́ɑshi ɡɔ́ ɛ́fú lɑ́Ꞌ ɛ̂yɑ́ ńcẅɛt, ḿbúꞋ pɛ́pɛ́p nǔu mɛku mɔ́p nɛlɔk ɛ́sẅíi wɔ́p ŋɡɔ ɛ́ tsʉ́Ꞌ ńdíŋɛ pɔ wɔ́p, ŋ́ɡɔ́ɔ ŋ́ɡʉ nɛ́ Ikɔnyɔm.

⁵²Ɛ́ kɛ ŋ́ɡʉ nǔu pʉɔ-Kɛlístɔ pɛ́ Antíyɔshɛ, pɔ́p tsʉ́Ꞌ tʉ́sɔŋ ɛ̂wɑ́, Zẅikŋɛ Lɛ́ɛnɛ́nɛ jʉ́ wɔ́p, pɔ́p nɑ́ŋ tsɛt tsɑ́ɑtɛ.