Read Ngomba ŊwɑꞋnɛ-Gɑŋntúu Yɛ́su Kɛlístɔ 21 Bible Online

ŊwɑꞋnɛ-Gɑŋntúu Yɛ́su Kɛlístɔ 21 - Ngomba bible

ŊwɑꞋnɛ-Gɑŋntúu Yɛ́su Kɛlístɔ 21

¹Pɛk pɛpɔ́p pɔ́ tɛ fɑkŋɛ tsɛt nɛmʉk, pɛk kúu mɑ́mɑ́ kɑnúꞋ, ńjɛ́p jɛ́pnɛ ŋ́ɡʉ nɛ́ Kɔs. Njí ɡɛ ŋ́kiɛ, pɛk ɡʉ tɛ ŋ́kúu Lɔ̂dɛ, ɛ́fú zúꞋu ŋ́ɡʉ tɛ ŋ́kúu Pɑtɑlɑ ḿpfúu,

²ńjʉ́ɔ mɑ́mɑ́ kɑnúꞋ ẅi ɛ́ ɡʉ nɛ́ Fɛ́nísíyɑ, ŋ́kúu tsɛtú ŋ́ɡʉ.

³Ńnɛn nɛnnɛ tɛ ḿbɔ́ ńjʉ́ɔ Shíipɛlɛ, ɛ́ pɔ́ ŋɡɔŋ ẅi ŋki kɑ zɛmɛnɛ ńníꞋ sɔŋ, pɛk lɔk yi ɡúŋ ntsʉ́ʉ, ŋ́kɛ́ ńnɛn nɛnnɛ tɛ ńtsʉ́Ꞌ nɛkúu ŋɡɔŋ-Silii, ńnɑ́ tsɛ́tsɑ́Ꞌ nǔu ɡúŋ-pɔ́ ŋkẅɛpmɛ, ḿbɑŋtɛ nǔu ɡúŋ-pɔ́ tʉʉ. Ɛ́ pɔ́ zʉꞋ yi pɑtɑ́ŋ mɛtɑ́ɑ ɡʉ ńtʉ́ʉ zúꞋu, ŋ́kɔk yúu-mɛtɑ́ɑ tsɛt mɑ́mɑ́ kɑnúꞋ.

⁴Pɛk kúu zúꞋu ḿpfúu, ńjʉ́ɔ pʉɔ-Kɛlístɔ. Pɛk pɛpɔ́p nɑ́ŋ lɛ́Ꞌ sɑɑmbɑ́. Ŋ́kúu zúꞋu, Zẅikŋɛ-Sɛ́ sẅíi wɔ́p nɛ́ nu, pɔ́p cú mbɔ̌ Pɔ̂l ŋɡɔ: «Pɑ́ɑ nɛɡʉ Yɛlúsɑlɛm.»

⁵Yîyɑ́ ŋɡɑp mɛ, pɛk pɛn ńcʉ́ɔ sɛ̂ndúŋ. Pʉɔ-Kɛlístɔ pɛtsʉʉ pɔ́p pɑŋɡɛ́ nɛ́ mbɔ́ŋkʉ̈ɔ́ pɔ́p ɡʉ ńcɑklɛ wɛ́k. Pɛk pɛpɔ́p ɡʉ tɛ ŋ́kúu mbʉʉ-ŋki kɛ́ lɑ, ŋ́kẅíꞋlɛ sɛ́, ńcɛꞋlɛ Sɛ́,

⁶ńdɛɛmɛ, pɛk ɡɔ́ ŋ́kúu tsɛt mɑ́mɑ́ kɑnúꞋ, pɔ́p pɛn nɛ́ mɛnjɛ́Ꞌ mɔ́p.

⁷Pɛk fú Til ɛ̂wɑ́ ŋ́ɡʉ tɛ ŋ́kúu Pɔlɛmɑyis, ńcɛꞋlɛ pɔ́ɔpɛ́mɑ́ pinɛ pɔ́p zúꞋu. Pɛk pɛpɔ́p nɑ́ŋ tɑ́Ꞌ lɛ́Ꞌ.

⁸Njí ɡɛ ŋ́kiɛ, pɛk lɔ sɛ́, ŋ́ɡʉ tɛ ŋ́kúu Sɛ́zɑlɛ̂, ŋ́ɡʉ njɛ́Ꞌ-Fílîp ẅi ɑ Ncẅiŋkʉʉ sʉ́Ꞌnɛ. A pɔ́ wɛcɔ́ tɑ́Ꞌ ŋu nǔu pʉɔ sɑɑmbɑ́ pi pɛ́ kɑ tsɔ́Ꞌnɛ Yɛlúsɑlɛm lɑ́. Pɛk pɛpɔ́p nɑ́ŋ.

⁹A ɡẅɛɛ mbɔ́ŋkʉ̈ɔ́ pɛ́ pɔ́ɔ pɑŋɡɛ́ pɛ́nɛ́kwɑ, mbɔ pɔ́p kɑɑ zɔ́Ꞌ. Pɔ́p pɛŋɡɛ́mndʉ̈ɔ́Ꞌ-Sɛ́ nɑ́ŋ cẅi Ŋkʉʉ ẅí ɛ́ fúnɛ mbɔ̌ Sɛ́ mbɔ̌ lɑ́Ꞌ.

¹⁰Pɛk tɔ́ zúꞋu, tɛ nɑ́ŋ mɛcɔ́ mɛlɛ́Ꞌ zúꞋu, wɛcɔ́ ŋɡɛ́mndʉ̈ɔ́Ꞌ ndɛꞋ ẅi ɑ nɑ́ŋnɛ ńcẅi Ŋkʉʉ ẅi ɛ́ fúnɛ mbɔ̌ Sɛ́, pɛ́ fúŋ wɛ́ ŋɡɔ Aɡɑbus, ɑ fú Judɛ̂ ńtɔ́,

¹¹ńtɔ́ pɔ́Ꞌɔ, nɛjʉ́ɔ wɛ́k, ńtɔ́ ḿbɛ́ɛ ŋkʉ-ndẅí ẅi Pɔ̂l lɔknɛ ńtsɔ́ ndẅí yɛ, ńdɔk shɔtnɛ ŋ́kút mɛku mɛ́ pɔ́p mbɔ́ mɛ́ ńcú ŋɡɔ: «Nu yi Zẅikŋɛ-Sɛ́ cúnɛ pʉ̈ɔ́lɑɑ: “Pɛ́ ɡʉ ŋ́kúu Yɛlúsɑlɛm, pɑyúdɑ ɡẅɛɛ ŋɡɑŋ-ŋkʉ-ndẅí wɔ, ŋ́kút wɛ́ pɑ́Ꞌɑ, ŋ́ɡɑ́ wɛ́ mbɔ̌ pʉɔ pi pɔ́p kɑ́ pɔ́ pɑyúdɑ pɔ́.”»

¹²Pɛk pɔ́ɔpɛ́mɑ́ pi pɔ́p Sɛ́zɑlɛ̂ zúꞋ pɔ́Ꞌɔ, ńtsuŋ ḿbúꞋ mbɔ́ mbɔ̌ Pɔ̂l ŋɡɔ ɑ pɑ́ɑ nɛpʉʉ Yɛlúsɑlɛm.

¹³Lɑ́ Pɔ̂l tsɔ́Ꞌ ŋɡɔ: «Pʉʉ lɔk nɛlɑɑ ńdɔk ḿvukŋɛ wɑ́ɑ mɛlɑ́Ꞌ kʉ̈ɔ́. N tʉ́ʉ pɑ́Ꞌɑ, mbɔ mɔ niitɛ mbʉʉ yɑɑ tɛ ḿbɔ́ yi pɛ́ lɑɑ ŋ́kúu Yɛlúsɑlɛm, ŋ́kút wɑ́ɑ kútnɛ, ńjẅí wɑ́ɑ jẅínɛ ntɛ́ Ndɛ wɛkŋɛ Yɛ́su m bɔɔ lʉꞋ.»

¹⁴Pɛk lɔɔ shʉ́ pɑ́Ꞌ pɛk ɡʉ ńtɔꞋ wɛ́ kɛ́kɑ́ŋ, ḿbɔ́tnɛ ńnɑ́ŋ, ńtsʉ́Ꞌ ńcú pɔ ŋɡɔ: «Ɛ́ pɔŋ ŋɡɔ Tsɑpʉɔ ɡɛ yúu mi ɑ lɑ́Ꞌnɛ ńzɑ́p ŋɡɔ ɛ́ ɡʉ ŋ́ɡɛ.»

¹⁵Ɛ́ pɛn ŋ́ɡɔ ńdɛɛ mɛcɔ́ mɛlɛ́Ꞌ zúꞋu, pɛk niitɛ mbʉʉ yɛk ḿbʉʉ nɛ́ Yɛlúsɑlɛm.

¹⁶Pɛcɔ́ ntɑ́Ꞌpʉɔ-Kɛlístɔ pɛ́ Sɛ́zɑlɛ̂ ɡʉ ńcɑklɛ wɛ́k, ŋ́kúu sɛ̂ndúŋ ńdɔk wɛ́k ŋ́ɡʉ njɛ́Ꞌ wɛcɔ́ ŋu pɛ́ fúŋnɛ wɛ́ ŋɡɔ Nɑɑsɔŋ. A pɔ́ ŋu ŋɡɔŋ-Shíipɛlɛ, mbɔ ɑ kɑ zɑ́p tʉ́m yɛ́ nǔu Yɛ́su tɛ mbɔ ntí sɑk. Pɛk ɡʉ zúꞋu pɔ́Ꞌɔ, nɛlɛ́ njɛ́Ꞌ yɛ.

¹⁷Pɛk kúu Yɛlúsɑlɛm pɔ́Ꞌɔ, pɔ́ɔpɛ́mɑ́ cẅɛ́ɛ wɛ́k nɛ́ tsɑ́ɑtɛ.

¹⁸Njí ɡɛ ŋ́kiɛ, pɛk pɛ́ Pɔ̂l ɡʉ njɛ́Ꞌ-Jɑ̂k, ŋ́kúu zúꞋu pɑcẅɛ́ɛ mbi tsɛt cúlɛ-pʉɔ-Kɛlístɔ yi Yɛlúsɑlɛm tɔ́ yɔ́p.

¹⁹Pɔ̂l cɛꞋlɛ wɔ́p tɛ ɛ́ kuꞋ, ɑ kẅiꞋ ńdɛꞋlɛ mɛnu wɛmɔ́Ꞌ wɛ́mɔ́Ꞌ mi Sɛ́ kɑ lɔknɛ wɛ́ ŋ́ɡɛ tsɛtsɛt pʉɔ pi pɔ́p kɑ́ pɔ́ pɑyúdɑ pɔ́ ɛ́sẅíi wɔ́p.

²⁰Pɑcẅɛ́ɛ mbi tsɛt cúꞋlɛ-pʉɔ-Kɛlístɔ-Yɛ́lúsɑlɛm zúꞋ yɔ nu ɛ́ pɔŋ wɔ́p tɛꞋ. Pɔ́p kɑꞋ lík-Sɛ́ ŋ́ɡɑ́ tʉ́, ńcú mbɔ̌ Pɔ̂l ŋɡɔ: Mɔ́ɔmɑ́ wɛk, jʉ́ɔ yú. Mbɑ kwɑꞋ Pɑyúdɑ ntsɑ́Ꞌ tɛ ńzɑ́ɑ kɑ ńtsʉ́Ꞌ pʉɔ-Kɛlístɔ, ḿbɛn ḿbɔ́ kwɑꞋ pɑkúꞋlɛ nɛpʉ́ʉ-Mɔ̌sɛ̂ɛ kɛ́ kɑ́ɑ.

²¹Lɑ́ pɔ́p kɑ pɔ́ ńzúꞋ pɛ́ cú nǔu ɡu ŋɡɔ. Ɔ sɛ́ ńzíꞋ mbɔ̌ pɑyúdɑ pi pɔ́p túu nɛ́ túu ŋɡɔ pɔ́p mɛꞋ nɛpʉ́ʉ-Mɔ̌sɛ̂ɛ. Ŋɡɔ ɔ sɛ́ ńcú ŋɡɔ kɔɔ pɔ́p pɛn ḿbúꞋ mbɔ́ŋkʉ̈ɔ́ pɔ́p. Ŋɡɔ ɔ sɛ́ ńtɔꞋ wɔ́p nɛpɛn ńnɛn nǔu pɑ́Ꞌ mɑt-lɑ́Ꞌ wɛkŋɛ sɛ́ ḿbíkŋɛ.

²²Ɔ pɑ́Ꞌɑ ŋ́ɡɛ ŋɡɔ́ku? Pɔ́p kɛ́ jí ŋɡɔ ɔ tɔ́ tɛ ḿbɔ́ zɑꞋnɛ pɔ́ ɔɔ?

²³Ɛ́ yɛ́tɛ́, ɛ́ pɔŋ ɔ ɡɛ yúu mi pɛk ɡʉ ńcú mbɔ̌ wu. Pʉɔ zɑꞋnɛ pɛ́nɛ́kwɑ pi pɔ́p kɑ kɑꞋnɛ nu mbɔ̌ Sɛ́.

²⁴Lɔk wɔ́p ŋ́ɡʉ, pʉʉ pɛpɔ́p ḿbʉʉtɛ mbʉʉ yʉʉ mbi Sɛ́. Gu ńzɛɛnɛ ŋ́kɛ́ ŋ́ɡɑ́ yɔ́p ŋkɑ́p yi pɔ́p ɡẅɛɛ nɛɡɑ́ nǔu, ńjí ŋɡɔ pɔ́p ɡʉ ŋ́kɔ́ɔ tú yɔ́p. Ɔ lɑɑ ŋ́ɡɛ pɔ́Ꞌɔ, mbɔ pʉɔ pɛtsʉʉ ɡʉ ńjʉ́ɔ ŋɡɔ nu yi pɛ́ pɛ́ɛtɛ́nɛ nǔu ɡu ɛ́ kɑ́ pɔ́ nu pɔ́, ńjí ŋɡɔ ɔ kɛ́ ŋ́kúꞋlɛ nɛpʉ́ʉ-Mɔ̌sɛ̂ɛ kúꞋlɛ́nɛ.

²⁵Ɛ́ ɡʉ nǔu pʉɔ pi pɔ́p kɑ́ pɔ́ Pɑyúdɑ pɔ́, mbɔ pɛk kɑ ŋwɑꞋnɛ mɔ́ ŋwɑꞋnɛ ŋ́ɡɑ́ mbɔ̌ pɔ́p, nɛlɔk ɛ́sẅíi wɔ́p nɛ́ yúu mi pɛk kɑ zɑ́pnɛ ŋɡɔ pɔ́p pɔ́ ŋ́ɡɛ, ńcú tsɛtú ŋɡɔ pɔ́p pɑ́ɑ nɛkwɛ́t pfuꞋ-mbɑp yi pɛ́ lɔknɛ ńnɔŋ pɔꞋ, ḿbɑ́ɑ nɛzẅíꞋ mɛci nɛ́ɛnɛ, ḿbɛn ḿbɑ́ɑ nɛkwɛ́t mbɑp-nɑɑ ẅí pɛ́ fɛ́mɛ wɛ́ fɛ́mɛ́nɛ, ŋɡɔ pɔ́p pɑ́ɑ nɛcẅɛꞋnɛ mbɑ wɔ̌ lɑ́ pɔ́p pɛpɔ́p nɔɔ nɔɔnɛ.

²⁶Ńcú pɔ́Ꞌɔ, Pɔ̂l ɡɔ́ɔ ŋ́kɛ́ ńdɔk pʉɔ pɑ́ pɛ́nɛ́kwɑ ŋ́ɡʉ. Njí kiɛ, pɔ́p pʉʉtɛ mbʉʉ yɔp mbi Sɛ́ tɛ ḿbɔ́tnɛ ńnɑ́ŋ, ŋ́ɡʉ tsɛt ZʉꞋ-nɔŋpɔꞋ mbi ndɑ́-Sɛ́, ŋ́kúu zúꞋu ńcú lɛ́Ꞌ yi nɛsuk lɔ́Ꞌ ɡʉ ńdɑ́Ꞌ ḿmɛ. Lɛ́Ꞌ ɛ̂yɑ́ pɔ́ yi pɛ́ ɡʉ ńnɔŋ pɔꞋ ntɛ́ tú mbɑ wɔ̌ lɑ́ tsɛtsɛt pɔ́p.

²⁷Lɛ́Ꞌ sɑɑmbɑ́ yi Pɔ̂l pɔ́p pʉɔ pɑ́ pɛ́nɛ́kwɑ lɔknɛ ḿbʉʉtɛ mbʉʉ tsʉ́Ꞌ ŋ́ɡʉ pɔ nɛkuꞋ. Pɔ́Ꞌɔ lɑ́, pɛcɔ́ pɑyúdɑ pi pɔ́p fúnɛ nǔu pɑk-ŋɡɔŋ-Azîi jʉ́ɔ Pɔ̂l pɔ́ ZʉꞋ-nɔŋpɔꞋ, pɔ́p mɑꞋ vɑꞋ tsɛtsɛt nɔɔ-lɑ́Ꞌ, ŋ́ɡẅɛɛ Pɔ̂l,

²⁸ŋ́kɑꞋ ŋɡi yɔp tʉ́ ɡíɛt ŋɡɔ: «Pʉɔ-Íslɑyɛ̂l, pʉʉ tɔ́ ńcẅɛ́lɛ́ wɛ́k! Ŋu wɑ́ pʉ́ɔ. A sɛ́ ḿbɔ́ ńnɛn zʉꞋ tsʉʉ ndǔ tsɛ́tsɑ́Ꞌ ŋ́kẅíi pʉɔ-lɑ́Ꞌ pɛkŋɛ kɛpɔŋ, ɛ́sẅíŋɛ kɛpɔŋ nǔu nɛpʉ́ʉ-Mɔ̌sɛ̂ɛ. Tɛ mbɑ nǔu ZʉꞋ-nɔŋpɔꞋ yɔ. Ɛ́ pʉ́ɔ, mbɔ ɑ zɛɛ ńdɔk pʉɔ pi pɔ́p kɑ́ pɔ́ pɑyúdɑ pɔ́, ńtɔ́, ńdɔk wɔ́p ŋ́kúu tsɛt ZʉꞋ-nɔŋpɔꞋ, ńdɔk pɔ́Ꞌɔ, ńníꞋ lɔ́Ꞌ nǔu.»

²⁹Ńcú pɔ́Ꞌɔ, mbíꞋŋɡɔ pɔ́p kɑ jʉ́ɔ Pɔ̂l pɔ́ Tɔlɔfinɛ, mɔ́ɔ-Ɛ́fɛ̂zɛ pɔ́ tʉ́sɔŋ ḿbɔ́ ńnɛn. Pɔ́p pɔ́ ŋ́kwɑŋɛ ŋɡɔ Pɔ̂l lɔk wɛ́ ńtɔ́ ŋ́kúu tsɛt ZʉꞋ-nɔŋpɔꞋ.

³⁰VɑꞋ puu ńjʉ́ tʉ́sɔŋ tsʉʉ. Lɑ́Ꞌ fú mɛshʉ́ mɛshʉ́ ńnɑ́ɑtɛ ŋ́kʉɔ ńtɔ́. Pɔ́p kẅiꞋ ŋ́kúꞋlɛ Pɔ̂l, ɛ́shuŋ wɛ́ ńdɔk ɛ́fú tsɛt ZʉꞋ-nɔŋpɔꞋ ńcẅɛt tɛ ŋ́kúu píi, pɛ́ ɡɔ́ɔ ńjʉ́ɔꞋ mɛtsupuꞋ.

³¹Pɑyúdɑ pɔ́ pɔ́Ꞌɔ, ḿbɔ́ ńdɔɔ nɛjẅí Pɔ̂l. Lɑ́ vɑꞋ vu Yɛlúsɑlɛm pɔ́Ꞌɔ, yɔ nu vu nɛtúutɛ Tɑ́tndɑ́-pɛtɑ́tndɑ́-ntsɔ-Pɑlɔ́mɑ. A zúꞋ ŋɡɔ vɑꞋ jʉ́ tʉ́sɔŋ-Yɛlúsɑlɛm,

³²ŋ́ɡɔ́ɔ ńcúꞋlɛ pɑlʉ̈ɔ́Ꞌntsɔ pɔ́p pɛtɑ́tndɑ́ pɔ́p. Pɔ́p pɛpɔ́p nɑ́ɑtɛ ńcúŋ nɛ́ zʉꞋ yi lɑ́Ꞌ cúꞋlɛ́nɛ zúꞋu. Lɑ́Ꞌ pɔ́ tɛ ńjʉ́ɔ pɑ́Ꞌ Tɑ́tndɑ́-pɛtɑ́tndɑ́-ntsɔ pɔ́p pɑlʉ̈ɔ́Ꞌntsɔ tɔ́nɛ, ḿbɔɔ pɛn ńtswɑ́ɑ Pɔ̂l pɔ́.

³³A tɔ́ ńcú pɛ́ ɡẅɛɛ Pɔ̂l ńdɔk mɛcɛ̂n mɛmbɑ́ ŋ́kút wɛ́, ḿbɛn ḿbíkŋɛ ŋɡɔ: «Ŋu wɔ wɔ̌? A ɡɛ ŋɡɔ́ku?»

³⁴Lɑ́, lɑ́Ꞌ pɔ́ ɡíɛt pɔ mɛŋɡi mɛŋɡi. A pɔɔ yɛcɔ́ nu zúꞋ, ntɛ́ nɛsẅíi. A cú ŋɡɔ pɛ́ lɔk Pɔ̂l ŋ́ɡʉ tsɛt mɑ́mɑ́ ŋkɑ́Ꞌ-pɑlʉ̈ɔ́Ꞌntsɔ.

³⁵Pɛ́ lɔk Pɔ̂l ŋ́ɡʉ tɛ ńtsʉ́Ꞌ nɛkúu zʉꞋ-mɛsɛtẅɛp, lɑ́Ꞌ ńnʉk nɛjẅí wɛ́. Lɑ́ pɑlʉ̈ɔ́Ꞌntsɔ fú zúꞋu ńtsʉ́Ꞌ ńtíi wɛ́ tíinɛ.

³⁶Ɛ́ ɡɔ́ ḿbɔ́, lɑ́Ꞌ pɔ́ nzʉʉ ɡíɛt ńcú ŋɡɔ: «Pɛ́ jẅí wɛ́.»

³⁷Pɛ́ ɡʉ tɛ ńtsʉ́Ꞌ nɛníꞋ Pɔ̂l tsɛt ŋkɑ́Ꞌ-pɑlʉ̈ɔ́Ꞌntsɔ, ɑ cú mbɔ̌ Tɑ́tndɑ́-pɛtɑ́tndɑ́-ntsɔ ŋɡɔ: «Tɛ ɛ́ lɑɑ ḿbɔ́ pɛ́ pɛ́m n cú nu?» Ndʉ́m ɛ̂wɑ́ tsɔ́Ꞌ ŋɡɔ: «Ɔ zɛɛ ńjí nɛsẅíŋɛ cú-Ŋɡɛlɛk kɛ?

³⁸Ńjí ŋɡɔ ɔ lɔk ḿbɔɔ pɔ́ ŋu-Ɛɡíptɔ wɑ́ ẅi ɑ kɑ tɔ́nɛ zɑꞋnɛ, ńnɔŋ nzɔŋɛ, ńcúꞋlɛ pʉɔ ntsɑ́Ꞌ yɛ́nɛ́kwɑ ńdɔk ńcʉ́ɔ kɔ̂ŋtɛt lɑ́ pɔ́ kɛkʉ̈ɔ́?»

³⁹Pɔ̂l pʉ̈ɔt ŋɡɔ: «Mɔ ŋu-Yúdɑ, pɛ́ pí wɑ́ɑ tsɛt tʉ́sɔŋ-Tɑ́lsɔ, nǔu pɑk-ŋɡɔŋ-Silísíyɑ. Mɔ ŋu-tʉ́sɔŋ yi pɛ́ sɑ́ɑnɛ sɑ́ɑnɛ́nɛ ńjí lík yɛ́. Sɛ́sẅii, ɡɔ́ɔ ḿbɛ́m n cú nu mbɔ̌ lɑ́Ꞌ lɑ.»

⁴⁰Tɑ́tndɑ́-pɛtɑ́tndɑ́-ntsɔ pɛ́m. Pɔ̂l tʉ́ʉ ndǔ mɛsɛtẅɛp, ŋ́kɑꞋ pɔ́ yɛ́ ŋ́ɡɑ́ tʉ́. ZʉꞋ ɡɔ́ɔ ńdɛ́ɛ, ɑ lɔk sẅíŋɛ-pɑyúdɑ ńcú mbɔ̌ lɑ́Ꞌ ŋɡɔ: