Read Ngomba ŊwɑꞋnɛ-Gɑŋntúu Yɛ́su Kɛlístɔ 24 Bible Online

ŊwɑꞋnɛ-Gɑŋntúu Yɛ́su Kɛlístɔ 24 - Ngomba bible

ŊwɑꞋnɛ-Gɑŋntúu Yɛ́su Kɛlístɔ 24

¹Ɛ́ lɛɛ lɛ́Ꞌ pɛ́tɑɑ, Anɑníyɑs, tɑ́tndɑ́-pɑnɔŋpɔꞋ, cúŋ nɛ́ Sɛ́zɑlɛ̂, pɔ́p pɛcɔ́ pɛkɛ́m-lɑ́Ꞌ, ŋ́ɡɛ Tɛltúlus, ɑ pɔ́ ńtɔ́ɔtɛ nzʉʉ yɔ́p zʉꞋ-ntsɑŋ. Pɔ́p tɔ́ zúꞋu ɛ́fɛn Pɔ̂l mbi ŋɡɔ́mnɑɑ Fɛlɛshi.

²Pɛ́ ɡɛ Pɔ̂l tɔ́, Tɛltúlus zɛ nɛcú nu tú yɛ́ ŋɡɔ: «Ndɛ, pɛk lɑ́Ꞌ zɑꞋnɛ ŋkɔ̂ɔnɛ ŋ́ɡɔ ńnɑ́ŋ kwɑꞋ tsɛt mbɔ́tnɛ, mbíꞋ wú nǔu mɛnu mi ɔ kɑ lɔknɛ mɑ́mɑ́ jínu yú ńzɑ́p ŋɡɔ pɛ́ kúpmɛ tsɛt lɑ́Ꞌ yɛ́k.

³Pɛk sɛ́ ŋ́ɡɔ ńjʉ́ pii mîmɑ́ mɛnu, zʉꞋ tsʉʉ, ŋkɑ́ tsʉʉ ḿbɔ́ ŋ́ɡɛ́mtɛ wú tɛ ńcú sẅíinu.

⁴Lɑ́, ŋ kɑ́ pɔ́ ŋ́kɔŋ nɛtʉ́ʉ mbi Ndɛ ńdɑ́ɑtɛ nǔu sẅiŋɛ lɑ́ɑtɛ́nɛ pɔ́. Ɛ́ lɛɛ pɔ́Ꞌɔ, lɑ́ m bɔ́ mbúꞋ mbɔ́ mbɔ̌ Ndɛ ŋɡɔ ɑ lɔk pɔŋ tʉ́m ńzẅíꞋlɛ nu yi ŋ ɡʉ nɑ́Ꞌ ḿbɛ́ɛtɛ ɛ́sẅíi wɛ́.

⁵Pɛk kɑ jʉ́ɔ ŋu wɔ ɑ pɔ́ ŋu ẅi ɛ́ lɑɑ ḿbɔ́ pɛ́ pɔ́k wɛ́ tɛꞋ. A sɛ́ ḿmɑꞋ ntɑkŋɛ tsɛtsɛt pɑyúdɑ tsʉʉ, zʉꞋ tsʉʉ ndǔ tsɛ́tsɑ́Ꞌ. A pɑ́Ꞌɑ ḿbɔ́ tɑ́tndɑ́-pɛcɔ́ pɑfɑk mbʉʉ pi pɛ́ fúŋnɛ wɔ́p ŋɡɔ Nɑzɑlɛyɛ̂ŋ.

⁶Ɛ́ kɑ zɛɛ ńtsʉ́Ꞌ mɔ́zʉꞋ ɑ zɑ́p yɛcɔ́ nu. A kɑ pɔ́ ŋ́ɡʉ ńníꞋ lɔ́Ꞌ nǔu ZʉꞋ-nɔŋpɔꞋ lɑ́ pɛk ɡẅɛɛ wɛ́. [Pɛk kɑ pɔ́ ńdɔɔ nɛlɔk kwɑꞋ nɛpʉ́ʉ-lɑ́Ꞌ nɛkŋɛ ŋ́ŋɑk wɛ́.

⁷Lɑ́ Lisíyɑs, tɑ́tndɑ́-pɛtɑ́tndɑ́-ntsɔ tɔ́ ńdɔk mɑ́mɑ́ mɛtʉʉ ɛ́sɑ́Ꞌ wɛ́ mbɔ̌ pɛk,

⁸ḿbɛn ńcú ŋɡɔ pʉɔ pi pɔ́p fɛnnɛ wɛ́ lɔk ntsɑŋ ńtɔ́ pɔ mbi ɡu]. Píkŋɛ ŋu wɑ́ nɛ́ nu, tɛ ɔ lɑɑ ḿbɔɔ jʉ́ɔ ŋɡɔ mɛnu mi pɛk fɛnnɛ wɛ́ nǔu ɛ́ zúꞋu ḿbɔ́ nɛ́nẅín pɔ́.»

⁹A cú pɑ́Ꞌɑ Pɑyúdɑ tɔ́ɔtɛ nu yɛ́ ŋɡɔ: «Ɔ́ɔŋ ɑ sẅíi nu.»

¹⁰Ŋɡɔ́mnɑɑ Fɛlɛshi lɔk yɛcɔ́ ntɛ́ ńcú ŋɡɔ Pɔ̂l cú nu. Pɔ̂l cú ŋɡɔ: «Ɛ́ ŋkɔ̂ɔnɛ ḿbɔ́ mɛŋɡuꞋ tɛ ńzɑ́ɑ pɑ́Ꞌ ɔ sɛ́ ɛ́sɑ́Ꞌ lɑ́Ꞌ yɔ. Ɛ́ lɛɛ pɔ́Ꞌɔ, lɑ́ ḿbɔ́ yi n dɑɑ ńtʉ́ʉ mbi ɡu ḿbɔ́ ŋ́ɡʉ ńzɔŋ tú yɑ́ɑ, m bɔɔ pɔ́k.

¹¹Nu yi ŋ ɡʉ ńcú, ɔ kuꞋ nɛlɔɔ yú nɛ́ túmbʉʉ yú ńjʉ́ɔ kɛ ɛ́ nɛ́nẅín ɔɔ, ɛ́ lɔ́Ꞌnɛ pɑ́Ꞌɑ ńdɔk ḿbɔ́ ndɑꞋ lɛ́Ꞌ ntsɔ̌ppɑ́ nɛ́ nɛɡɛ́m pɑ́Ꞌ ŋ kɑ ɡʉnɛ Yɛlúsɑlɛm nɛcɛꞋlɛ Sɛ́.

¹²Mɔ ŋkɑɑ kɛ́ ŋ́kúu zúꞋu pɛk wɛcɔ́ ŋu tʉ́ʉ ḿbɔ́ ńzɔŋ yɛcɔ́ nu pɔ́. Ŋ́kɛ́ ḿbɔɔ níꞋ mɛtʉʉ lɑ́Ꞌ nɛmɑꞋ vɑꞋ pɔ́, kɛ pɔ tsɛt ZʉꞋ-nɔŋpɔꞋ pɔ́, kɛ pɔ tsɛt mɛndɑ́-cúꞋlɛ mɛkŋɛ pɔ́, kɛ pɔ tsɛt tʉ́sɔŋ pɔ́ pɔ́.

¹³Mɛnu mɑ́ mi pʉɔ tíknɛ tú mɔ lɑ́, pɛ́ lɑɑ ŋɡɔ pɛɡɑŋ pɛ́ɛtɛ pɔ́p pɔɔ jí nɛpɛ́ɛtɛ pɔ́.

¹⁴Lɑ́, nu yi ŋ ɡʉ ńtʉ́ʉ mbi ɡu, ɛ́sɑ́ɑnɛ sɑ́ɑnɛ́nɛ ḿbɛ́m pɔ́ ŋɡɔ ɛ fɑꞋ pɔ mbɔ̌ Sɛ́-pɛmɑ̂ɑŋɡɑpnjẅɛt pɛk pɛpɔ́p. Mɔ sɛ́ ńnɛn pɔ nǔu sɛ̂ndúŋ yi pɔ́p lʉꞋnɛ ŋɡɔ ɛ́ wɛ pʉɔ pi pɔ́p fɑknɛ mbʉʉ, tɛ mbɑ pɑ́Ꞌ mɔ sɛ́ ḿbɛ́m mbɑ kʉ̈ɔ́ lɑ́ yi pɛ́ kɑ ŋwɑꞋnɛnɛ tsɛt ŋwɑꞋnɛ-nɛpʉ́ʉ-Mɔ̌sɛ̂ɛ mbɑ tsɛt mɛŋwɑꞋnɛ-pɛŋɡɛ́mndʉ̈ɔ́Ꞌ-Sɛ́.

¹⁵Ɛ́ lɛɛ pɔ́Ꞌɔ, yɛcɔ́ yúu pɔ́ ɡú yi mɔ sɛ́ ńzẅíꞋlɛ. Tɛ mbɑ pʉɔ pi pɔ́p fɛnnɛ wɑ́ɑ lɑ́ pɛn ḿbɔ́ ńzẅíꞋlɛ yɔ́p pɔ yɛ́tɛ́. Ɛ́ pɔ́ ŋɡɔ Sɛ́ ɡʉ ńdɑ́Ꞌ ńzẅíimɛ pʉɔ pi pɔ́p kɑ ɡɛnɛ nu ndʉ́ŋndʉŋ, tɛ mbɑ pʉɔ pi pɔ́p ŋ́kɑɑ ɡɛ pɔ́Ꞌɔ pɔ́ tsʉʉ.

¹⁶Ɛ́ yúu mi ɛ́ ɡɛnɛ lɑ m bɔ́ ɛ́sɑ́Ꞌ tʉʉ nɛ́ tʉ́m lɛ́ɛnɛ́nɛ nɛnɛn ndʉ́ŋndʉŋ mbi Sɛ́, mbɑ mbi pʉɔmɛsɔŋ.»

¹⁷Pɔ̂l pɛn ńcú ŋɡɔ: «Ŋ kɑ nɑ́ŋ túu tɛꞋ. Mɔ ḿbɔ́ pɑ́Ꞌɑ, mbɔ m bɛn Yɛlúsɑlɛm pɔ nɛɡɑ́ ŋkɑ́p pɛ́ tsupnɛ ńdɔk ńcẅɛ́lɛ́ lɑ́Ꞌ yɛ́k, mbɑ nɛɡɑ́ yúu nɛlɔk ŋ́ɡúꞋlɛ Sɛ́.

¹⁸Pɔ́Ꞌɔ, ŋ kɑ pɔ́ tsɛt ZʉꞋ-nɔŋpɔꞋ, lɑ pɔ́p tɔ́ zúꞋu ńjʉ́ɔ wɑ́ɑ, ŋ́ɡɔ ḿbɔ́, mbɔ ŋ kɛ́ ɛ́fú nɛɡɛ yúu mi mɔ ńdɔk suk pʉ nǔu mɔ. Lɑ́Ꞌ ŋkɑɑ pɔ́ zúꞋu pɔ́. Yɛcɔ́ ntɑkŋɛ pɛn ŋ́kɛ́ ḿbɔɔ ńcẅɛt.

¹⁹Ɛ́ kɑ ɡɔ́ ḿbɔ́ pɛcɔ́ ntɑ́Ꞌ-pɑyúdɑ pi pɔ́p fúnɛ nǔu pɑk-ŋɡɔŋ-Azîi pɔ́ yɔ́p zúꞋu. Lɑ́ ɛ́ ḿbɔ́ pɛ́Ꞌɛ ḿbɔ́ yi ŋ kɑ fɑɑnɛ yɛcɔ́ nu, mbɔ pîpɑ́ pʉɔ zɛɛnɛ ḿbɔ́ zɑꞋnɛ nɛfɛn wɑ́ɑ mbɔ̌ ɡu.

²⁰Pɑ́Ꞌ pɔ́p yɔ́p kɑ́ pɔ́ sɛ́ pɔ́ lɑ́, kɛ ɛ́ lɑɑ ḿbɔ́ pʉɔ pɔnɛ pi pɔ́p zɑꞋnɛ lɑɑ, cú yúu mi pɛ́ kɑ lɔknɛ wɑ́ɑ ŋ́ɡʉ mbi pɑsɑ́Ꞌ lɑ́Ꞌ pɛkŋɛ pɛ́Ꞌɛ, pɑsɑ́Ꞌ lɑ́Ꞌ ɛ̂pɑ́ jʉ́ɔ ŋɡɔ ɛ fɑɑnɛ ɔɔ?

²¹Tɑ́Ꞌ nu ɡú ḿbɔ́ yi ŋ kɑ tʉ́ʉnɛ mbi pɔ́p, ŋ́kɑꞋ ŋɡi yɑɑ tʉ́ ńcú ɛ́ pɔ́ pɑ́Ꞌ ŋ kɑ cúnɛ ŋɡɔ, pɛ́ kɑ pɔ́ ɛ́fɛn wɑ́ɑ mbi pɔ́p lɛ́Ꞌ ɛ̂yɑ́ mbíꞌŋɡɔ m bɛ́m ŋɡɔ Sɛ́ ɡʉ ńdɑ́Ꞌ ńzẅíimɛ pɛpfú.»

²²Pɑ́Ꞌ ɛ́ kɑ ɡɔ́ ḿbɔ́ Fɛlɛshi tsuŋ ḿbɔ́ ńjí nu pɛ́ zíꞋnɛ nǔu Yɛ́su lɑ́, ɑ tsɔ́Ꞌ lɛ́Ꞌ-ntsɑŋ, ńcú mbɔ̌ pɑyúdɑ ŋɡɔ: «Lisíyɑs, tɑ́tndɑ́-pɛtɑ́tndɑ́-ntsɔ ɡʉ ńtɑ́ɑ ńtɔ́ lɑ́ ŋ ŋɑk ntsɑŋ yʉʉ,»

²³ńcú pɔ́Ꞌɔ, ḿbɛn ńcú mbɔ̌ tɑ́tndɑ́-ntsɔ ŋɡɔ ɑ lɔk Pɔ̂l ŋ́ɡʉ ńdẅɛꞋ ndɑ́tsɑ́ŋ, ḿbɔɔ kɛ́ ŋ́kút wɛ́ pɔ́, ḿbɔɔ kɛ́ ńtɔꞋ pɛsúu pɛ́ nɛtɔ́ ńcẅɛ́lɛ́ wɛ́ pɔ́.

²⁴Ɛ́ lɛɛ mɛcɔ́ mɛlɛ́Ꞌ, ŋɡɔmnɑɑ Fɛlɛshi pɔ́p nzwɛ́ wɛ Ndɛlẅisil ẅi ɑ mɔ́ɔ-Yúdɑ tɔ́. Ŋɡɔ́mnɑɑ cú pɛ́ ɡʉ ńdɔɔ Pɔ̂l ŋ́ɡɑ́ mbɔ̌ wɛ́, pɑ́Ꞌ ɑ ɡʉ ńzẅíꞋlɛ nu yi Pɔ̂l ɡʉ ɛ́sẅíi wɛ́ nǔu nɛzɑ́p tʉ́m nǔu Yɛ́su Kɛlístɔ.

²⁵Pɔ̂l tɔ́ tɛ ńzɛ nɛkyɛ́Ꞌtɛ ntɛ́ yi ŋu lɑɑ ńdɔk ńnɑ́ŋ, mbɔ ŋɡɑŋ ɡʉ ḿbɔ́ ŋu ẅi ɑ ɡɛnɛ yúu mi ɛ́ ndʉ́ŋndʉŋ mík-Sɛ́, ḿbɔ́ ŋ́kyɛ́Ꞌtɛ mbɑ pɑ́Ꞌ ɛ́ lɑɑ ḿbɔ́ ŋu ɡẅɛɛ mbʉʉ yɛ pɔ́Ꞌɔ, ḿbɔ́ ŋ́kyɛ́Ꞌtɛ ɛ́sẅíi wɛ́ ŋɡɔ Sɛ́ ɡʉ ŋ́ɡɛ ŋ́ŋɑk pʉɔ tsʉʉ. Ŋɡɔ́mnɑɑ Fɛlɛshi zúꞋ pɔ́Ꞌɔ, ńtsʉ́Ꞌ ńcʉ̈ɔꞋ cʉɔꞋnɛ, ńcú mbɔ̌ Pɔ̂l ŋɡɔ: Ɛ́ nǔu ŋkɔ̂ɔnɛ, fú nɛjɔ́ŋ mɔ ŋ́ɡʉ. Ŋkɑ́ ɡʉ ḿbɛn ŋ́kuꞋ, lɑ́ m bɛn ńcú pɛ́ fúŋ wú ḿbɔ́ mɔ.

²⁶Ɛ́ ɡɔ́ ḿbɔ́ pɔ́Ꞌɔ, ŋɡɔ́mnɑɑ Fɛlɛshi pɛn ḿbɔ́ ńtsɑ́ɑ ŋɡɔ Pɔ̂l kút nɛpúꞋ nɛ́. Ɛ́ yúu mi ɛ́ ɡɛnɛ ɑ nɑ́ŋ ḿbɔ́ ńcú pɛ́ ɡɛ Pɔ̂l tɔ́ pɔ́pmɛ́ sẅiŋɛ,

²⁷ḿbɔ́ ŋ́ɡɛ pɔ pɔ́Ꞌɔ, tɛ ɛ́ ɡɔ́ ḿbɔ́ ŋɡuꞋ yɛ́pɑ́, pɛ́ lɔk ŋɡɔ́mnɑɑ Pɔlsíyus Fɛstus ŋ́kúp Fɛlɛshi. Pɑ́Ꞌ Fɛlɛshi kɑ pɔ́ ŋ́kɔŋ nɛɡɛ yúu mi ɛ́ ɡʉ ḿbɔŋ pɑyúdɑ lɑ́, ɑ nɑ́ Pɔ̂l pɔ ndɑ́tsɑ́ŋ.