Read Ngomba ŊwɑꞋnɛ-Gɑŋntúu Yɛ́su Kɛlístɔ 26 Bible Online

ŊwɑꞋnɛ-Gɑŋntúu Yɛ́su Kɛlístɔ 26 - Ngomba bible

ŊwɑꞋnɛ-Gɑŋntúu Yɛ́su Kɛlístɔ 26

¹Fɔɔ Aŋɡɛlípɑ cú mbɔ̌ Pɔ̂l ŋɡɔ: «Mɔ ŋ́ɡɑ́ sẅiŋɛ mbɔ̌ ɡu pɑ́Ꞌ ɔ ɡʉ ḿbɛ́ɛtɛ ntsu wú nǔu mɛnu mi pɛ́ fɛnnɛ wú nǔu n zúꞋ.» Pɔ̂l mɑꞋ mbɔ́, ńzɛ nɛpɛ́ɛtɛ ntsu wɛ́, ńcú ŋɡɔ:

²«Nɑɑ kɛ́mɑꞋ, mɔ lɔ́Ꞌnɛ ḿbɔ́ ńtsɑ́ɑtɛ tɛꞋ nɛtʉ́ʉ mbi fɔɔ ḿbɛ́ɛtɛ ntsu wɑ́ɑ nǔu mɛnu mi pɑyúdɑ zɑ́pnɛ tú mɔ,

³ńtsɑ́ɑtɛ tɛꞋ, mbíꞋŋɡɔ kwɑꞋ zɑɑmɔɔ sɛ́ ńjí mɑt-lɑ́Ꞌ wɔp, ḿbɛn ḿbɔ́ ńniitɛ ńjí mɛnu mi pɔ́p zɔŋnɛ. Ɛ́ pɔ́Ꞌɔ, lɑ́ m bɔ́ ḿbúꞋ mbɔ́ mbɔ̌ zɑɑmɔɔ ŋɡɔ ɑ sʉk, ńtsuŋ ńzúꞋ nu yi mɔ ńcú.»

⁴«Pɑyúdɑ pɛtsʉʉ sɛ́ ńjí pɑ́Ꞌ n dɔ ńnɑ́ŋ pɔ́Ꞌɔ, tɛ fúnɛ pɑ́Ꞌ ŋ kɑ lɔnɛ sɛ́. Pɔ́p sɛ́ ḿbɔ́ ńjí pɑ́Ꞌ ŋ kɑ nɑ́ŋnɛ tsɛtsɛt pɔ́ɔpɛmɑ́ pɑ́ɑ Pɑyúdɑ, mbɑ tsɛt tʉ́sɔŋ-Yɛlúsɑlɛm.

⁵Ŋ kɑ nɑ́ŋ nǔu ntɛ́ yi ŋu nǔu nɔɔ-pɑfɑlísɑy nɑŋnɛ pɔ́Ꞌɔ, pɔ́p pɛn ḿbɔ́ pʉɔ ńcʉŋɛ nǔu nɛpʉ́ʉ-nu-Sɛ́ yɛ́k tɛ ńtsɑ pɛcɔ́ pʉɔ. Pɑyúdɑ lɑɑ ŋ́kɔŋ, pɔ́p sẅíi zɑɑmɔɔ ŋɡɔ, nu yi n cúnɛ lɑɑ, ɛ́ nu nɛ́nẅín. Pɔ́p zɛɛ ńjí wɑ́ɑ tɛ ɛ́fú tɛ lɛ́Ꞌ.

⁶Ŋkɔ̂ɔnɛ, yúu mi pɛ́ ŋɑknɛ wɑ́ɑ nǔu ɛ́ pʉ̈ɔ́lɑ́: Ḿbɔ́ yi Sɛ́ kɑ kɑꞋ nu mbɔ̌ pɛmɑ́ŋɡɑpnjẅɛt pɛkŋɛ, m bɛn ḿbɔ́ ńzẅíꞋlɛ pɑ́Ꞌ ɛ́ ɡʉ ŋ́ɡɛ puutɛ.

⁷Mɛnjẅɛtndɑ́ mɛkŋɛ ntsɔ̌ppɑ́ nɛ́ nɛɡɛ́m sɛ́ ńzẅíꞋlɛ yɔ́p pɔ lɛ́Ꞌ yi Sɛ́ ɡʉ ŋ́ɡɛ yîyɑ́ nu puutɛ. Tɛ ḿbɔ́ nɛnɛm mbɑ nɛtúꞋ, ḿbɔ́ ńcɛꞋlɛ Sɛ́, ŋ́kɛ́ ńzẅíꞋlɛ pɔ yɛ́tɛ́. Zɑɑ ŋɡɔ́mɑ́kɔp, pɑyúdɑ fɛn wɑ́ɑ pɑ́Ꞌɑ ntɛ́ pɔ ŋɡɔ mɔ sɛ́ ńzẅíꞋlɛ yîyɑ́ yúu.

⁸Pʉʉ ẅi pʉʉ sɛ́ ńzẅíꞋlɛ nu yí n cúnɛ lɑɑ, pʉʉ kɛ́ ńdʉꞋ nɛpɛ́m ŋɡɔ Sɛ́ lɑɑ ḿbɔ́ ɑ ńzẅíimɛ pʉɔ nǔu nɛvú mɛlɑ́Ꞌ kʉ̈ɔ́?

⁹Mbɑ mɔ yɑ́ɑ, ŋ kɑ pɔ́ ŋ́kwɑŋɛ ŋɡɔ, ŋ ɡʉ ńdɔk ntsɔ ńdʉ̈ɔ́Ꞌ Yɛ́su mɔ́ɔ-tʉ́sɔŋ-Nɑ̌zɑlɛt, nǔu mɛshʉ́ tsʉʉ.

¹⁰Ɛ́ yúu mi ŋ kɑ ɡɛnɛ tʉ́sɔŋ-Yɛlúsɑlɛm. Ŋ kɑ ɡẅɛɛ pʉɔ-Yɛ́su tɛ pɔ́p zɑ́ɑ zɑ́ɑnɛ, ḿmɑꞋ ndɑ́tsɑ́ŋ, ńzɛɛ ŋ́ɡɔ ŋ́ɡɛ pɔ́Ꞌɔ, pɛtɑ́tndɑ́-pɑnɔŋpɔꞋ zɛɛnɛ ḿbɔ́ ńtúu wɑ́ɑ nɛ́ mɛŋwɑꞋnɛ. Pɛ́ pɔ́ tɛ ḿbɔ́ ŋ́ɡʉ ńjẅítɛ wɔ́p n zɑ́p wɑɑ ntsu nǔu.

¹¹Ŋ kɑ pɔ́ ńdɛɛ tsɛt mɛndɑ́-cúꞋlɛ-pɑyúdɑ, ńnyɛt pʉɔ pɛ́ nɛ́ ŋɡʉ̈ɔ́Ꞌ. Ŋ kɑ pɔ́ ńtsʉ́ʉnɛ wɔ́p ŋɡɔ pɔ́p ńzɔɔtɛ lík-Yɛ́su. Ŋ kɑ puu ḿbɑɑ wɔ́p pɑɑnɛ tɛ ŋ́ɡʉ mbɑ tsɛt mɛtʉ́sɔŋ-lɑ́Ꞌ ndɛꞋ, ńdɔɔ wɔ́p, ńnyɛt wɔ́p nɛ́ ŋɡʉ̈ɔ́Ꞌ.»

¹²«Ŋ kɑ pɔ́ ŋ́ɡɛ pɔ pɔ́Ꞌɔ, tɛ ḿbɔ́ yɛcɔ́ lɛ́Ꞌ, ḿbɔ́ ŋ́ɡʉ nɛ́ tʉ́sɔŋ-Ndɑ́mɑ́s, ŋ́ɡẅɛɛ mɛŋwɑꞋnɛ mi pɛtɑ́tndɑ́-pɑnɔŋpɔꞋ lɑ́Ꞌnɛ ŋ́ɡɑ́ mbɔ̌ mɔ, ńdɔk ńtúu wɑ́ɑ zúꞋu.

¹³Nɑɑ kɛ́mɑꞋ, m bɔ́ sɛ̂ndúŋ pɔ́Ꞌɔ nɛnɛm, ńjʉ́ɔ yɛcɔ́ yúu fú tʉ́nɛ́pú, ŋ́kyɛꞋ zʉꞋ, ŋ́ŋwɑŋɛ tɛ ńtsɑ lík-nɛm, ŋ́kyɛꞋ wɛk pʉɔ pinɛ pɛk pɛpɔ́p ḿbɔ́nɛ sɛ̂ndúŋ.

¹⁴Pɛk tsɔ́Ꞌnɛ ḿvutɛ sɛ́ tsʉʉ. N zúꞋ ŋɡi-ŋu lɔk sẅiŋɛ pʉɔ-Hɛbɛlʉ́ ńcú mbɔ̌ mɔ ŋɡɔ: “Sɔ̂l, Sɔ̂l, ɔ tsɔ́Ꞌ ku yɑ́ɑ kɛpɔŋ mɛlɑ́Ꞌ kʉ̈ɔ́? Ɔ pɑ́Ꞌɑ ḿbɔ́ ŋ́ɡɛ fʉ́ŋ yu kẅiꞋ pɑ́Ꞌ nɑɑ ẅi pɛ́ sɛ́ ńdɔk ntsɑ́-nɛkɔŋ ńtsʉ́ʉnɛ wɛ́, ɑ nɛn ḿmɑꞋ ku yɛ́ nzʉʉ lɑ́.”

¹⁵N cú ŋɡɔ: “A ɡu wɔ̌ Ndɛ?” A pʉ̈ɔt ŋɡɔ, mɔ Yɛ́su. Ɔ tsɔ́Ꞌ pɑꞋnɛ pɔ ku yɑ́ɑ kɛpɔŋ.

¹⁶Lɑ́, kɛ́ ńdɔ sɛ́ ŋkɔ̂ɔnɛ ńtʉ́ʉ tʉ́ʉnɛ. N nyɛt mbʉʉ yɑɑ mbɔ̌ wu pɑ́Ꞌɑ, mbíꞋŋɡɔ n tsɔ́Ꞌ wú nɛlɔk wú ŋ́ɡɛ ŋɡɑŋfɑꞋ wɑɑ. Ɔ ɡẅɛɛ nɛɡɛ pɛ́ jí yúu mi ɔ jʉ́ɔnɛ lɔ́Ꞌnɛ mbɑ mɛnu mi ŋ ɡʉ ŋ́ɡɛ lɑ ńnyɛt wú.

¹⁷N túu wú mbɔ̌ pɑyúdɑ mbɑ mbɔ̌ pɛcɔ́ pʉɔ tsɛt mɛlɑ́Ꞌ ndɛꞋ. Mɔ ńzɛɛ ŋ́kẅíipɛ wú tɛ pɔ́p pɔɔ ɡɛ yɛcɔ́ yúu nǔu ɡu pɔ́.

¹⁸N túu wú pɔ́Ꞌɔ, ɔ ɡʉ níɛꞋ mík mɔ́p, ŋ́ɡɛ pɔ́p fú tsɛt nzɛ́nzʉ́ʉ ńcẅɛt, ŋ́kúu nǔu zʉꞋ yi ɛ́ sɛ́ fúk. Ɛ́ lɔk ḿbɔ́ ŋɡɔ ɔ ɡʉ ŋ́ɡɛ ŋ́ɡɛ pɔ́p fú nǔu mbɔ́-Sɑ́ttɑ ńcẅɛt, ḿbɛn nǔu mbɔ́-Sɛ́, ńzɑ́p tʉ́m yɔ́p nǔu mɔ, Sɛ́ likŋɛ mɛnu kɛpɔŋ mɔ́p ŋ́ɡɑ́ mbɔ̌ pɔ́p, ḿbɛn ŋ́ɡɑ́ yɔ́p zʉꞋ tsɛtsɛt pʉɔ pɛ́.»

¹⁹«Nɑɑ kɛ́mɑꞋ fɔɔ Aŋɡɛlípɑ, ɛ́ kɑ fú pɔ́Ꞌɔ, mɔ ŋkɑɑ mɔ tʉʉ tú nǔu nu yi Sɛ́ kɑ ŋíɛꞋnɛ mík mɑ́ɑ zúꞋ pɔ́.

²⁰Tɛ ńtsʉ́Ꞌ pɔ́Ꞌɔ, mbɔ ŋ kɑ zɛ nǔu pʉɔ-Ndɑ́mɑ́s nɛcú nu yɛ́, ḿbɑ́ɑtɛ ŋ́kúu pʉɔ-pɛ́ Yɛlúsɑlɛm, ɛ́fú zúꞋu ŋ́kúu nǔu pɑk-ŋɡɔŋ-Judɛ̂ tsʉʉ, ɛ́fú zúꞋu ŋ́kúu nǔu pʉɔ pi pɔ́p kɑ́ pɔ́ pɑyúdɑ pɔ́, ḿbɔ́ ńcú mbɔ̌ pʉɔ tsʉʉ ŋɡɔ pɔ́p kúpmɛ mɑt wɔp, ḿbɛn mbɔ̌ Sɛ́, ḿbɔ́ ŋ́ɡɛ mɛnu mi ɛ́ nyɛtnɛ ŋɡɔ Pɔ́p kúpmɛ mɑt.

²¹Jʉ́ɔ yúu mi ɛ́ kɑ ɡɛnɛ lɑ́ pɑyúdɑ ɡẅɛɛ wɑ́ɑ tsɛt ZʉꞋ-nɔŋpɔꞋ tɛ ńdɔɔ nɛjẅí wɑ́ɑ.

²²Lɑ́ m bɛ́t ɡú lɔ́Ꞌnɛ pɑ́Ꞌɑ, Sɛ́ pɔ́nɛ ŋ́kẅíipɛ wɑ́ɑ. M bɛn ḿbɔ́ ɛ́sẅíi mbɑ kʉ̈ɔ́ lɑ́ yi n jínɛ nǔu wɛ́, mbɔ̌ pɛlʉ́m mbɑ mbɔ̌ mbɔ́ŋkʉ̈ɔ́. Pɛ́ kɑ zɑ́Ꞌ njí ńcú mɛnu mi ɛ́ ɡʉ ńdɑ́Ꞌ lɑ́ ńtɔ́ tsɛt ŋwɑꞋnɛ-pɛŋɡɛ́mndʉ̈ɔ́Ꞌ-Sɛ́, mbɑ tsɛt ŋwɑꞋnɛ-Mɔ̌sɛ̂ɛ. Mɔ ḿbɔ́ ńcú pɔ yɛ́tɛ́.

²³Pɛ́ kɑ cú ŋɡɔ, Nzɑ́Ꞌŋkʉ ẅí Sɛ́ kɑ kɑꞋnɛ ɡʉ ŋ́ɡɛ ńtɔ́, ńjʉ́ɔ ŋɡʉ̈ɔ́Ꞌ, ŋɡɔ jʉ́ ɡʉnɛ ŋ́ɡɛ ḿbɔ́ nduŋmbi ŋu nɛzẅíimɛ nǔu nɛvú, ŋɡɔ jʉ́ ɡʉnɛ ŋ́ɡɛ ńcú sẅiŋɛ yi ɛ́ ɡʉ kyɛꞌ pɑyúdɑ mbɑ pʉɔ pi pɔ́p kɑ́ pɔ́ pɑyúdɑ pɔ́, pɔ́p luk.»

²⁴Pɔ̂l pɔ́ ḿbɛ́ɛtɛ ntsu wɛ́ pɔ́Ꞌɔ, ŋɡɔ́mnɑɑ Fɛstus cẅɛ́ɛ sẅiŋɛ ŋ́kɑꞋ ŋɡi yɛ ńcú ŋɡɔ: «Pɔ̂l, ɔ pɑ́lɛ. Ɔ kɑ́ pûu, ńzíꞋ yúu zíꞋnɛ tɛ ɛ́ pʉ́ʉpɛ tú yú.»

²⁵Pɔ̂l tsɔ́Ꞌ ŋɡɔ: «Ndɛ, ŋ kɑ́ pɔ́ pɑ́lɛ pɔ́. Mɛnu mi n cúnɛ ɛ́ zúꞋu ḿbɔ́ pɔ́Ꞌɔ. Mbɔ n zɛɛ ŋ́kwɑŋɛ, lɑ ńcú.

²⁶Tɛ nɑɑ kɛ́mɑꞋ Aŋɡɛlípɑ nɑ́ŋ pɑ́Ꞌɑ ḿbɔ́ ńjí pɔ tsʉʉ. Ɛ́ yúu mi ɛ́ ɡɛnɛ ɛ sɑ́ɑnɛ sɑ́ɑnɛ́nɛ ńcú nu kɛ́ pɔ́k, mbíꞋŋɡɔ n jí ŋɡɔ, yɛcɔ́ nu yi ɛ́ nǔu ɑ pɔ́ ḿmuŋɛ kɑ́ pɔ́ ɡú pɔ́. Ɛ́ zɛɛ ŋ́ɡɔ ḿbɔ́, mbɔ mîmɑ́ mɛnu ŋkɑɑ kɛ́ ńdɛɛ pɔ zʉꞋ lʉɔmɛ́nɛ pɔ́.

²⁷Nɑɑ kɛ́mɑꞋ fɔɔ Aŋɡɛlípɑ, tɛ ɔ pɛ́m mɛnu mi pɛŋɡɛ́mndʉ̈ɔ́Ꞌ-Sɛ́ kɑ zɑ́Ꞌnɛ njí ŋ́ŋwɑꞋnɛ? N jí ŋɡɔ ɛ́ lɑɑ ḿbɔ́ nɑɑ kɛ́mɑꞋ pɔɔ nɑ́ kɛ́ pɛ́m pɔ́.»

²⁸Fɔɔ Aŋɡɛlípɑ tsɔ́Ꞌ mbɔ̌ Pɔ̂l ŋɡɔ: «Ɔ kwɑŋɛ ŋɡɔ ɔ ɡʉ nɑ́Ꞌ ńdɔk pɔ pɑ́Ꞌɑ ŋ́ɡɛ ɛ fɛ́Ꞌnɛ ńtsʉ́Ꞌ ŋu-Kɛlístɔ kɛkʉ̈ɔ́?»

²⁹Pɔ̂l tsɔ́Ꞌ mbɔ̌ wɛ́ ŋɡɔ: «Kɛ pɛ́ ɡʉ ńdɔk pɔ nu yi ɛ́ sɑk sɑknɛ ɔɔ, kɛ pɔ mi ɛ́ túꞌ tuꞋnɛ ɔɔ, mbɔ yɑ́ɑ yúu mi n dɑ́Ꞌ ńdɔ́ɔ mbɔ̌ Sɛ́ pɔ́ pɔ ŋɡɔ: Nɑɑ kɛ́mɑꞋ tɛ mbɑ pʉʉ pɛ́tsʉʉ pi pʉʉ sɛ́ ńzúꞋ nu yí n cúnɛ lɔ́Ꞌnɛ, pʉʉ tsʉ́Ꞌ pɑ́Ꞌ mɔ. Tɛ mɛcɛ̂n mɔnɛ, pɔɔ nǔu pʉʉ pɔ́.»

³⁰Fɔɔ Aŋɡɛlípɑ, mbɑ ŋɡɔ́mnɑɑ pɔ́p Mbɛlɛnís, pɔ́p pʉɔ pi pɔ́p ḿbɔ́nɛ zúꞋu lɔ sɛ́,

³¹ŋ́ɡɔ ńcẅɛt, ḿbɔ́ ńcú tsɛtsɛt pɔ́p ŋɡɔ: «Ŋu wɔ ŋkɑɑ ɡɛ yɛcɔ́ yúu mi ɛ́ lɑɑ ḿbɔ́ pɛ́ lɛɛ nǔu ńjẅí wɛ́ pɔ́, tɛ mbɑ nɛníꞋ wɛ́ tsɑ́ŋ.»

³²Pɔ́Ꞌɔ lɑ́, fɔɔ Aŋɡɛlípɑ cú mbɔ̌ Fɛstus ŋɡɔ: «Ŋu wɑ́ ḿbɔ́ pɛ́Ꞌɛ mbɔɔ cú ŋɡɔ Kɑ́sɑ ɡʉnɛ ŋ́ŋɑk wɛ́ pɔ́, mbɔ pɛ́ tsʉ́Ꞌ ńnɑ́ wɛ́ nɑ́nɛ ɑ ɡʉ.»