Read Ngomba ŊwɑꞋnɛ-Gɑŋntúu Yɛ́su Kɛlístɔ 4 Bible Online

ŊwɑꞋnɛ-Gɑŋntúu Yɛ́su Kɛlístɔ 4 - Ngomba bible

ŊwɑꞋnɛ-Gɑŋntúu Yɛ́su Kɛlístɔ 4

¹Pyɛ̂ pɔ́p Jɑ̂ŋ kɑ pɛ́t ńcú nu mbɔ̌ lɑ́Ꞌ cúnɛ, pɑnɔŋpɔꞋ ŋ́ɡɛ tɑ́tndɑ́-pɑpyɛ́p ZʉꞋ-nɔŋpɔꞋ pɔ́p pɑsɑdukɑy tɔ́.

²Nu tsuŋ ḿbɔ́ ḿbʉ́k wɔ́p tɛꞋ, mbíꞋŋɡɔ Pyɛ̂ pɔ́p Jɑ̂ŋ kɑ pɔ́ ńzíꞋ lɑ́Ꞌ ŋɡɔ Sɛ́ ɡʉ ŋ́ɡɛ ńzẅíimɛ pʉɔ nǔu nɛvú pɔ ndʉ́ŋndʉŋ pɑ́Ꞌ ɑ kɑ zẅíimɛnɛ Yɛ́su.

³Pɔ́p ɡẅɛɛ wɔ́p. Ɛ́ ɡɔ́ ḿbɔ́ ńtsʉ́Ꞌ ḿbɔ́ pɔ ntsuŋkẅɛ́Ꞌ. Pɔ́p níꞋ wɔ́p ndɑ́tsɑ́ŋ nɛpɔ́ yi pɔ́p ɡʉ ńdɛ́ zúꞋu tɛ njí kiɛ.

⁴Ɛ́ ɡɔ́ ḿbɔ́, mbɔ ɛ́ ɡʉ nǔu pʉɔ pi pɔ́p zúꞋnɛ sẅíŋɛ-Pyɛ̂ pɔ́p Jɑ̂ŋ, nɛzɑ́ɑ pɛ́m. Tɛ pɔ́p pɔ́ ŋkɑ́ ɛ̂yɑ́ tɛmtɛ nǔu pɛcɔ́ pɑpɛ́m Yɛ́su ḿbɔ́ mbɛ́ɛnɛ yúu ntsɑ́Ꞌ yɛ́tɑ́ɑ.

⁵Njí kɑ kiɛ, pɑsɑ́Ꞌlɑ́Ꞌ-pɑyúdɑ pɔ́p pɛlʉ́m, pɔ́p pɑkyɛ́ꞌtɛ nɛpʉ́ʉ-Mɔ̌sɛ̂ɛ cúꞋlɛ zúꞋu Yɛlúsɑlɛm.

⁶Pʉɔ pi pɔ́p ḿbɔ́nɛ yɔ́p zúꞋu, yɔ ḿbɔ́ Ánɑ, tɑ́tndɑ́-pɑnɔŋpɔꞋ, ŋ́ɡɛ Kɑyífɑ, mbɑ Jɑ̂ŋ nɛ́ Lɑksɑ́ndɑ, pɔ́p pʉɔ tsʉʉ nǔu tsɛ́nndɑ́-tɑ́tndɑ́-pɑnɔŋpɔꞋ.

⁷Pɔ́p cú, pɛ́ lɔk Pyɛ̂ pɔ́p Jɑ̂ŋ ńtɔ́ mbi pɔ́p. Pɔ́p píkŋɛ wɔ́p ŋɡɔ: «Mɛtʉʉ kɑ fú ɡɔ́ pʉʉ lɔk ŋ́ɡɛ wɔ ŋɡɑŋɡɔɔ fíitɛ? Pʉʉ ḿbɔ́ pɑꞋnɛ ńdɔk lík wɔ̌ lɑ ŋ́ɡɛ pɔ́Ꞌɔ?»

⁸Zẅikŋɛ Lɛ́ɛnɛ́nɛ jʉ́ Pyɛ̂. A ɡɔ́ɔ ŋ́kɛ́ ńcú ŋɡɔ: «Pɛfɔɔ-lɑ́Ꞌ pɔ́p pɛkɛ́m,

⁹pɛk kɑ ɡɛ nu sʉ́Ꞌnɛ nǔu tɑ́Ꞌ ŋkʉɔ́. Pɛ́ pɛn ḿbɔ́ lɔ́Ꞌnɛ ḿbɔ́ ḿbíkŋɛ wɛ́k pɑ́Ꞌ pɛk kɑ ɡɛnɛ lɑ́ ɑ fíitɛ.»

¹⁰Pʉʉ pɛtsʉʉ tɛ mbɑ pɑíslɑyɛ̂l tɛ ḿmɛ, ɛ́ ŋ́kɛ́ ḿbɔ́ ḿbíkŋɛ ŋɡɔ pʉʉ jí tɑ́Ꞌ nu. Yîyɑ́ nu pɔ́ ŋɡɔ pɛk kɑ lɔk pɔ lík-Yɛ́su Kɛlístɔ mɔ́ɔ-Nɑ̌zɑlɛt lɑ ŋ́ɡɛ ŋu wɔ fíitɛ pɑ́Ꞌ pʉʉ jʉ́ɔnɛ lɑɑ. A Yɛ́su Kɛlístɔ wɑ́ ẅi pʉʉ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ lɑ́. Sɛ́ kɑ kɛ́ ŋ́ɡɛ ɑ zẅíimɛ nǔu nɛvú.

¹¹Jʉ́ lɔknɛ ḿbɔ́ ŋɡɔꞋ yi ŋwɑꞋnɛ-Sɛ́ cúnɛ nu nǔu wɛ́ ŋɡɔ: «ŊɡɔꞋ yí pʉʉ pɑpɔ́ɔndɑ́ kɑ mɛꞋnɛ, kɑ tsʉ́Ꞌnɛ ŋɡɔꞋ nɛlẅí-ndɑ́.»

¹²«Pʉɔ kɛ́ ŋ́ɡẅɛɛ nɛlɛɛ pɔ nǔu Yɛ́su lɑ́ ńduk, mbíꞌŋɡɔ wɛcɔ́ ŋu ndɛꞋ kɑ́ pɔ́ ndǔ yɔ mbí ḿbɔ́ ẅi Sɛ́ kɑ ńzɑ́pnɛ wɛ́ nɛpɔ́ yi pɛkŋɛ ɡʉ ńdɛɛ nǔu wɛ́ ńduk pɔ́.»

¹³Pʉɔ pinɛ pɔ́p kɑ nɑ́ŋnɛ sɛ́ ḿbɔ́ ŋ́ŋɑk wɔ́p, jʉ́ɔ ntɛ́ yi Pyɛ̂ pɔ́p Jɑ̂ŋ lɔknɛ ńcú nu kɛ́ pɔ́k ɛ́ kʉꞋnɛ wɔ́p, mbíꞋŋɡɔ pɔ́p kɑ pɔ́ ńjí ŋɡɔ pɔ́p pɔ pɛmɛɛ pʉɔ, mbɔ pɔ́p ŋkɑɑ kɛ́ ńzíꞋ sɛkút tɛꞋ pɔ́. Pɔ́p ɡɔ́ɔ ŋ́kɛ́ ńdii ŋɡɔ pɔ́p ɡɛ pɔ́ꞌɔ, mbíꞌŋɡɔ pɔ́p pɛ́ Yɛ́su kɑ pɔ́ ńtɛmtɛ ku ńnɛn.

¹⁴Ḿbɔ́ ńjʉ́ɔ pɑ́Ꞌ ŋu ẅí ɑ kɑ fíitɛ́nɛ tʉ́ʉnɛ nɛjɔ́ŋ Pyɛ̂ pɔ́p Jɑ̂ŋ, pɔ́p pɔɔ pɛn ńjí yɛcɔ́ nu yi pɔ́p ɡʉ ńcú pɔ́,

¹⁵ńcú pɛ́ ɡɛ pɔ́p fú zʉꞋ-ntsɑŋ ńcẅɛt. Pɔ́p kwɑŋɛ pɑ́Ꞌ pɔ́p ɡʉ ŋ́ɡɛ,

¹⁶ńcú ŋɡɔ: «Pɛkŋɛ ɡʉ ńtsuŋ ŋ́ɡɛ ŋɡɔ́ku nǔu pʉɔ pɔnɛ? Pʉɔ tsʉʉ, Yɛlúsɑlɛm wɔ sɛ́ ńjí yɔ nu mɑ̌ɑmɑɑnɛ yi pɔ́p kɑ ɡɛnɛ. Tɛ ɛ́ lɑɑ ḿbɔ́ pɛkŋɛ pɔɔ muŋɛ.

¹⁷Lɑ́, pɛkŋɛ vukŋɛ wɔ́p, ḿbɑpmɛ wɔ́p, ŋɡɔ kɔɔ pɔ́p pɛn ŋ́kẅiꞋ ńdɔk lík-Yɛ́su ńcú nu mbɔ̌ wɛcɔ́ sɑ̌ɑ ŋu lɑ́Ꞌ zɑꞋnɛ. Ɛ́ lɛɛ pɔ́Ꞌɔ, yɔ nu pɔɔ pɛn ɛ́sɑt zʉꞋ pɔ́.»

¹⁸Pɔ́p fúŋ Pyɛ̂ pɔ́p Jɑ̂ŋ, ńcú mbɔ̌ pɔ́p ŋɡɔ: «Ḿbɑ́ɑ wʉ́ʉ nɛpɛn ŋ́kẅíi lík-Yɛ́su. Kɔɔ pʉʉ pɛn ńzíꞋ nu yɛ́ mbɔ̌ pʉɔ.»

¹⁹Lɑ́ Pyɛ̂ pɔ́p Jɑ̂ŋ tsɔ́Ꞌ mbɔ̌ pɔ́p ŋɡɔ: «Yúu mi Sɛ́ sɛ́ ŋ́kɔŋ pɔ́ ŋɡɔ pɛ́ zúꞋ pɔ ntsu wʉ́ʉ kɛ wɛ́? Pʉʉ jʉ́ɔ yʉ́ʉ ŋɡɔ kʉ̈ɔ́?

²⁰Ɛ́ ɡʉ nǔu pɛk, mbɔ ɛ́ lɑɑ ḿbɔ́ pɛk pɔɔ nɑ́Ꞌ nǔu nu yí pɛk kɑ zúꞋnɛ ḿbɛn ńjʉ́ɔ pɔ́.»

²¹Pɑzɑ́Ꞌntsɑŋ pɛn ńniitɛ ḿbɑpmɛ wɔ́p, ńnɑ́ wɔ́p pɔ́p ɡʉ. Mbɔ pɔ́p lɔɔ shʉ́ ẅi pɔ́p ɡʉ ɛ́fú nǔu ńdɔk ńnyɛt wɔ́p nɛ́ ŋɡʉ̈ɔ́Ꞌ, ḿbɔɔ jʉ́ɔ ntɛ́ lɑ́Ꞌ. MbíꞋŋɡɔ pʉɔ tsʉʉ kɑ pɔ́ ŋ́ɡɛ́mtɛ Sɛ́ nǔu yúu mi ɛ́ kɑ lɛɛnɛ.

²²Ɛ́ pɛn ŋ́ɡɔ ḿbɔ́ ŋu ẅí ɑ kɑ fíitɛ́nɛ nǔu ntɛ́ yi mɑ̌ɑmɑɑnɛ lɑɑ, lɛɛ mɔ ŋɡuꞋ mɛɡɛ́mɛ́nɛ́kwɑ.

²³Pɛ́ kɑ pɔ́ tɛ ńnɑ́ wɔ́p, Pyɛ̂ pɔ́p Jɑ̂ŋ ɡʉ ŋ́kẅɛ́ɛtɛ pʉɔ pɔ́p. Ḿbɛ́ɛtɛ mɛnu mí pɛtɑ́tndɑ́-pɑnɔŋpɔꞋ pɔ́p pɑsɑ́Ꞌlɑ́Ꞌ lɑ́Ꞌnɛ ńcú mbɔ̌ pɔ́p, ɛ́sẅíi wɔ́p.

²⁴Pɔ́p zúꞋ pɔ́Ꞌɔ, ŋ́ɡɔ́ɔ ńcúꞋlɛ sɛ́ ńdɔk tɑ́Ꞌ ntsu ńzɛ nɛcɛꞋlɛ Sɛ́ ńcú ŋɡɔ: «Tsɑpʉɔ, ɡu kɑ niitɛ́nɛ nɛpú pɔ́p tsɛ́tsɑ́Ꞌ, ńniitɛ ŋki, ńniitɛ mbɑ kʉ̈ɔ́ lɑ́ yi ɛ́ nǔu mɔnɛ mɛzʉꞋ.

²⁵Ɔ kɑ ɡɛ Zẅikŋɛ Lɛ́ɛnɛ́nɛ jʉ́ mɑ̂ɑŋɡɑpnjẅɛt wɛk fɔɔ Ndɑvît ẅi ɑ ḿbɔ́nɛ ŋɡɑŋfɑꞋ wu, ɑ cú ŋɡɔ: Túu nɛ́ túu kɑꞋ mɛtsẅíi mɔ́p mbi Sɛ́ mɛlɑ́Ꞌ kʉ̈ɔ́? Mɛlɑ́Ꞌ mɛlɑ́Ꞌ lɔɔ nu pɑꞋnɛ ɛ́ pɔ́ mɛlɑ́Ꞌ kʉ̈ɔ́?

²⁶Pɛfɔɔ ndǔ tsɛ́tsɑ́Ꞌ sɛ́ ńniitɛ ntsɔ, pɑsɑ́Ꞌlɑ́Ꞌ pɛn ḿbɔ́ ńcúꞋlɛ yɔ́p ńtɑ́ŋ ŋɡɔ pɔ́p ɡʉ ńdʉ̈ɔ́Ꞌ Tsɑpʉɔ Sɛ́ nɛ́ ntsɔ, mbɑ ŋu ẅí ɑ kɑ zɔ́Ꞌnɛ wɛ́ ńdɔk ŋ́ɡɛ fɔɔ.

²⁷Ɛ́ kwɑꞋ nu. Ɛlɔ̂dɛ pɔ́p Pɔ́ŋntí Pilɑ́tu cúꞋlɛ tsɛt tʉ́sɔŋ yɔ pɔ́p pɑtúu tɛ mbɑ mɛcɔ́ mɛtsɛ́nndɑ́-Íslɑyɛ̂l, ńcúꞋlɛ pɔ́Ꞌɔ, nɛlʉ̈ɔ́Ꞌ Yɛ́su, ŋɡɑŋfɑꞋ wu ẅí ɔ kɑ tsɔ́Ꞌnɛ, ńzɔ́Ꞌ wɛ́.

²⁸Pɔ́p kɑ tɑ́ŋ wɛ́ pɔ́Ꞌɔ, ŋ́ɡɛ kʉ̈ɔ́ lɑ́ yi ɡu Sɛ́, kɑ lɑ́Ꞌnɛ ńzɑ́Ꞌ njí ŋ́kwɑŋɛ ńzɑ́p ŋɡɔ ɛ́ ɡʉ ńdɑ́Ꞌ ḿbɔ́ pɔ́Ꞌɔ.

²⁹Ɔ́ɔŋ Tsɑpʉɔ, líŋɛ ŋkɔ̂ɔnɛ lɑ ńjʉ́ɔ pɑ́Ꞌ pɔ́p sɛ́ ḿbɑpmɛ wɛk. Gɑ́ sʉktʉ́m mbɔ̌ ɡɑŋfɑꞋ pú, pɔ́p sẅíi nu yú kɛ́ pɔ́k.

³⁰Sɛn pɔ́ yú nɛlɔk ŋ́ɡɛ pʉɔ fíitɛ, nɛlɔk ŋ́ɡɛ mɛnu mɑ̌ɑmɑɑnɛ pɔ́p mɛŋkʉꞋnɛ nǔu lík-Yɛ́su, ŋɡɑŋfɑꞋ wu ẅí ɔ kɑ tsɔ́Ꞌnɛ.»

³¹Pɔ́p kɑ cɛꞋlɛ Sɛ́ tɛ ḿbɔ́tnɛ ńnɑ́ŋ, zʉꞋ yí pɔ́p kɑ cúꞋlɛ́nɛ zúꞋu tsʉ́Ꞌnɛ. Zẅikŋɛ Lɛ́ɛnɛ́nɛ jʉ́ wɔ́p pɛ́tsʉʉ. Pɔ́p zɛ nɛsẅíi nu-Sɛ́ kɛ́ pɔ́k.

³²Nɔɔ-pʉɔ-Yɛ́su kɑ pɔ́ ŋ́ɡẅɛɛ pɔ tɑ́Ꞌ ntsu, ŋ́ɡẅɛɛ pɔ tɑ́Ꞌ tʉ́m. Sɑ̌ɑ ŋu nǔu pɔ́p ŋkɑɑ pɔ́ ŋ́ɡẅɛɛ yúu ŋɡɔ ɛ́ pɔ́ pɔ yɛ́ pɔ́. Pɔ́p kɑ pɔ́ ńtɛmtɛ yúu tɛmtɛnɛ.

³³Sɛ́ ɡɑ́ mɑ́mɑ́ mɛtʉʉ mbɔ̌ ɡɑŋntúu-Yɛ́su ŋɡɔ pɔ́p lɔk ŋ́kẅiꞋ ɛ́sɑ́Ꞌ nǔu ntɛ́ yi pʉɔ ɡʉ ńzúꞋ ńjí ŋɡɔ Sɛ́ kɑ zẅíimɛnɛ Tsɑpʉɔ Yɛ́su nǔu nɛvú. Sɛ́ sɛ́ ńníꞋ mbɔ́tnɛ nǔu pɑpɛ́m Yɛ́su pɛtsʉʉ pɑ́ꞋtɛꞋ.

³⁴Sɑ̌ɑ ŋu nǔu pɔ́p ŋkɑɑ pɔ́ ńjɑ́k yúu pɔ́, mbíꞋŋɡɔ pʉɔ tsʉʉ tsɛtsɛt pɔ́p pi pɔ́p kɑ ɡẅɛɛnɛ mɛndɑ́ pɔ́p mɛŋkɑ́Ꞌ kɑ pɔ́ ŋ́ɡʉ ɛ́fɛn ńdɔk ŋkɑ́p ńtɔ́,

³⁵ńnɔŋ mɛku ɡɑŋntúu. Pɛ́ ɡɑp ŋ́ɡɑ́ yɛ́ mbɑ wɔ̌ lɑ́ pɑ́Ꞌ ɛ́ ɡʉ ŋ́kuꞋ nǔu yɛ́ nu.

³⁶Wɛcɔ́ ŋu pɔ́ zúꞋu, lík yɛ́ pɔ́ ŋɡɔ Yɔsɛ̂p, ḿbɔ́ ŋu nǔu njẅɛt-Lɛ́vi, mbɔ pɛ́ kɑ pí wɛ́ ŋɡɔŋ-Shíipɛlɛ. Gɑŋntúu kɑ pɔ́ ḿbɛn ɛ́fúŋ wɛ́ ŋɡɔ Pɑnɛpɑ́ɑshi, ɛ́ lɔk ńcú ŋɡɔ: «Ŋu ẅí ɑ níꞋnɛ mɛtʉʉ-pʉɔ.»

³⁷A kɑ fɛn wɛ́ ŋkɑ́Ꞌ, ńdɔk ŋkɑ́p ńtɔ́ ńnɔŋ mɛku-pɑpɛ́m Yɛ́su.