Read Ngomba ŊwɑꞋnɛ-Gɑŋntúu Yɛ́su Kɛlístɔ 5 Bible Online

ŊwɑꞋnɛ-Gɑŋntúu Yɛ́su Kɛlístɔ 5 - Ngomba bible

ŊwɑꞋnɛ-Gɑŋntúu Yɛ́su Kɛlístɔ 5

¹Lɑ́ wɛcɔ́ ŋu ẅí pɛ́ kɑ pɔ́ ɛ́fúŋ wɛ́ ŋɡɔ Anɑníyɑs pɔ́p nzwɛ́ wɛ Sɑfílɑ ɡʉ ɛ́fɛn zʉꞋ-ŋkɑ́Ꞌ wɔ́p,

²ŋ́kwɑŋɛ, ńzɑ́Ꞌ yɛcɔ́ ɡúŋ-ŋkɑ́p ńdẅɛꞋ, ŋ́ɡʉ ńnɔŋ pfuꞋ mɛku-ɡɑŋntúu-Yɛ́su.

³Pyɛ̂ píkŋɛ wɛ́ ŋɡɔ: «Anɑníyɑs, mɛlɑ́Ꞌ kʉ̈ɔ́ ɔ pɛ́m Sɑ́ttɑ jʉ́ wú tɛ ɔ fu Zẅikŋɛ-Sɛ́? Mɛlɑ́Ꞌ kʉ̈ɔ́ ɔ fɛn ŋkɑ́Ꞌ wú, ŋ́ɡẅɛɛ yɛcɔ́ ɡúŋ-ŋkɑ́p?

⁴Ŋkɑ́Ꞌ ḿbɔ́ pɔ wú, lɑ ɔ fɛn. Ɔ pɛn ɛ́fɛn, ŋkɑ́p pɔ́ pɔ yú. Ɔ pɛn ŋ́ɡɛ ŋɡɔ́ku ŋ́ɡẅɛɛ yɔ ntɛ́ kwɑŋɛ tsɛt tʉ́m yú? Ɔ kɑ́ cɔtnu pɔ mbɔ̌ pʉɔmɛsɔŋ pɔ́. Ɔ cɔtnu pɔ mbɔ̌ Sɛ́.»

⁵Anɑníyɑs zúꞋ yɔ sẅiŋɛ, ŋ́ɡɔ́ɔ ḿvu sɛ́ zẅikŋɛ yɛ́ tʉ́ʉ. Pʉɔ pɛtsʉʉ pi pɔ́p kɑ zúꞋnɛ yɔ nu pɔ́k.

⁶Ɛ́ ɡɔ́ ḿbɔ́, mbɔ ɑ lɑ́Ꞌ ḿpfú pɔ́Ꞌɔ, pɔ́ɔsuu lɔ sɛ́ ńdɔk pɔ́-ndẅí ŋ́kɑ́tɛ pfú yɛ́, ńtíi wɛ́ ŋ́ɡʉ ńtẅí.

⁷Ɛ́ ɡɔ́ ńdɛɛ yúu nɛm yɛ́tɑ́t, nzwɛ́ wɛ tɔ́ ńjɛ́Ꞌ ŋ́kúu ndɑ́. Ḿbɔɔ ḿbɔ́ ńjí yúu mi ɛ́ lɛɛnɛ pɔ́.

⁸Pyɛ̂ píkŋɛ wɛ́ ŋɡɔ: «Sẅíi wɑ́ɑ, pʉʉ lɑ́Ꞌ ɛ́fɛn ŋkɑ́Ꞌ pɔ pɑꞋnɛ?» A cú ŋɡɔ: «Ɔ́ɔŋ, pɛk lɑ́Ꞌ ɛ́fɛn pɔ pɑ́Ꞌɑ.»

⁹Pyɛ̂ cú mbɔ̌ wɛ́ ŋɡɔ: «Pʉʉ lɔk yɛ́tɛ́ sʉktʉ́m lɑ ńtɔ́ ŋ́kwɑꞋlɛ Zẅikŋɛ-Tsɑpʉɔ? ZúꞋ pɑ́Ꞌ pʉɔ ntsundɑ́ ńnɛntɛ, pɔ́p fú nɛtẅíi ndúu mu. Lɑ́ pɔ́p ɡʉ ńtíi wú ɡúu ńdɔk ŋ́ɡʉ ńtẅíi nǔu.»

¹⁰A ɡɔ́ɔ ḿvu sɛ́ mbi Pyɛ̂, ḿpfú. Pɔ́ɔsuu kúu ndɑ́, ńjʉ́ɔ pɑ́Ꞌ ɑ pfúnɛ, ńtíi pfú yɛ́ ńdɔk ŋ́ɡʉ ńtẅíi nɛjɔ́ŋ yɛ́ ndúu mɛ.

¹¹Yɔ nu lɛɛ cúlɛ-pʉɔ-Kɛlístɔ mbɑ pɛcɔ́ pʉɔ pí pɔ́p kɑ zúꞋnɛ yɔ nu pɔ́k tɛꞋ.

¹²Gɑŋntúu kɑ pɔ́ ŋ́ɡɛ mɛnu mɑ̌ɑmɑɑnɛ pɔ́p mɛŋkʉꞋnɛ mɛnu mɛntɛ́ mɛntɛ́ tsɛtsɛt lɑ́Ꞌ. Pɔ́p pʉɔ-Kɛlístɔ pɛtsʉʉ kɑ pɔ́ ńtɔ́ ńcúꞋlɛ nǔu zʉꞋ yí pɛ́ kɑ pɔ́ ɛ́fúŋ ŋɡɔ tɛtɑ́ɑ-Sɑlɛmɔ.

¹³Ŋu ndɛꞋ kɛ́ ḿbɔɔ fʉꞋ nɛkúu tsɛtsɛt pɔ́p pɔ́, lɑ́ pʉɔ tsʉʉ kɛ́ ḿbɔ́ ŋ́ɡʉ̈ɔꞋtɛ ŋɡɛnɛ mɛnu mɔ́p tɛꞋ.

¹⁴Mbɛ́ɛnɛ tɛ ńzɑ́ɑ pɔ́p pɑŋɡɛ́ kɑ pɔ́ ńzɑ́p tʉ́m nǔu Tsɑpʉɔ ŋ́kúu tsɛt nɔɔ yɔ́p. Ɛ́ pɔ́ lɛ́Ꞌ tsʉʉ ndɛn wɔ́p pɔ́ ŋ́kẅiꞋ.

¹⁵Pɛ́ kɑ ɡʉɔꞋlɛ nu yɔ́p ɡʉɔꞋlɛnɛ tɛ pɛ́ lɔk mɛkúu pɔ́p pɛmɑ́tɑ ńtíi pɛŋɡɔɔ ńnɔŋ wɔ́p ŋkɑŋ-sɛ̂ndúŋ nɛpɔ́ yi Pyɛ̂ ɡʉ ŋ́ɡɔ ńdɛɛ, mɔ́jíjʉŋ wɛ tɛ́mɛ nǔu wɛcɔ́.

¹⁶Pʉɔ tɛ ńzɑ́ɑ kɑ pɔ́ ḿbɛn ɛ́fú tsɛt mɛlɑ́Ꞌ mi ɛ́ mbʉʉ Yɛlúsɑlɛm ńdɔk pɛŋɡɔɔ mbɑ pʉɔ pí mɛzẅikŋɛ kɛpɔŋ kɑ pɔ́ ḿbúunɛ wɔ́p, ńtɔ́ ńjʉ́ɔ ɡɑŋntúu. Pɔ́p ɡɛ pɔ́p pɛtsʉʉ fíitɛ.

¹⁷Tɑ́tndɑ́-pɑnɔŋpɔꞋ pɔ́p pʉɔ pí pɔ́p kɑ pɔ́ ńtɔ́ɔtɛ nu yɛ́ zɛ nɛkɔ́Ꞌ lɔ́ŋ ntɛ́ ɡɑŋntúu. Pɑtɔ́ɔtɛ nu yɛ́ yîyɑ́ pɔ́ nǔu nɔɔ yi pɛ́ kɑ pɔ́ ɛ́fúŋ ŋɡɔ yɛ́ pɑsɑdukɑy.

¹⁸Pɔ́p pɛpɔ́p túu pʉɔ, pɔ́p ɡẅɛɛ ɡɑŋntúu ńníꞋ wɔ́p ndɑ́tsɑ́ŋ yi pɛ́ kɑ pɔ́ ńníꞋ ɡɑŋtsɑ́ŋ tsʉʉ zúꞋu.

¹⁹Lɑ́ ɛ́ ɡɛ ḿbɔ́ nɛtúꞋ, wɛcɔ́ cʉ̈ɔ́Ꞌ-Tsɑpʉɔ tɔ́, ńtsɔ́Ꞌ ndɑ́tsɑ́ŋ, ŋ́ɡɛ ɡɑŋntúu cẅɛt, ɑ cú mbɔ̌ pɔ́p ŋɡɔ:

²⁰«Pʉʉ ɡʉ ńtʉ́ʉ ndǔ zɑ́n yi ɛ́ tsɛt ZʉꞋ-nɔŋpɔꞋ ɛ́sẅíi lɑ́Ꞌ nɛ́ mɛnu mi ɛ́ líŋɛ́nɛ luk fí.»

²¹Pɔ́p zúꞋ ntsu wɛ́. Njí kiɛ, pɔ́p mʉ́ʉ ŋ́ɡʉ ZʉꞋ-nɔŋpɔꞋ, ńzɛ nɛzíꞋ nu-Sɛ́ mbɔ̌ lɑ́Ꞌ. Ŋ́ɡɔ́ ḿbɔ́ mbɔ tɑ́tndɑ́-pɑnɔŋpɔꞋ pɔ́p Pɑsɑdukɑy nɑ́ŋ tɛ ńcúꞋlɛ pɑsɑ́Ꞌlɑ́Ꞌ-Íslɑyɛ̂l nǔu nu nɛzɑ́Ꞌ ntsɑŋ. Pɔ́p pɛpɔ́p túu ɡɑŋfɑꞋ ŋɡɔ pɔ́p ɡʉ ndɑ́tsɑ́ŋ ńdɔɔ ɡɑŋntúu-Yɛ́su ńdɔk wɔ́p ńtɔ́.

²²Lɑ́ ɡɑŋfɑꞋ ɡʉ ŋ́kúu ndɑ́tsɑ́ŋ, mbɔɔ wɔ́p jʉ́ɔ, ḿbɛn nzʉʉ ɛ́sẅíi pʉɔ pi pɔ́p lɑ́Ꞌnɛ ńtúu wɔ́p ŋɡɔ:

²³«Pɛk ɡʉ tɛ ŋ́kúu zúꞋu, ńjʉ́ɔ mɛtsu-ndɑ́tsɑ́ŋ tsuŋ ḿbɔ́ mɛ́ jʉ́ɔꞋnɛ. Pɑpyɛ́p zʉꞋ kɛ́ ńtʉ́ʉ pɔ ntsundɑ́. Pɛk tsɔ́Ꞌ mɛtsundɑ́, ŋ́kúu tsɛtú, ŋ́kɛ́ mbɔɔ ŋu tsɛt ndɑ́ jʉ́ɔ.»

²⁴Tɑ́tndɑ́-pɑpyɛ́p ZʉꞋ-nɔŋpɔꞋ pɔ́p pɛtɑ́tndɑ́-pɑnɔŋpɔꞋ zúꞋ yɔ nu ɛ́ kʉꞋnɛ wɔ́p. Pɔ́p pɔɔ jí yúu mi ɛ́ lɑ́Ꞌnɛ ŋ́ɡɛ ɡɑŋntúu-Yɛ́su pɔ́.

²⁵Wɛcɔ́ tɑ́Ꞌ ŋu ɡɔ́ɔ ńjɛ́Ꞌ ŋ́kúu ndɑ́, ńcú ŋɡɔ: «Pʉɔ pɑ́ pi pʉʉ kɑ níꞋnɛ wɔ́p ndɑ́tsɑ́ŋ lɑ́, pʉʉ jí ŋɡɔ pɔ́p ndǔ zɑ́n ZʉꞋ-nɔŋpɔꞋ, ḿbɔ́ ńzíꞋ lɑ́Ꞌ nɛ́ yúu.»

²⁶Tɑ́tndɑ́-pɑpyɛ́p zʉꞋ pɔ́p pʉɔ pɛ́ ɡʉ nɛlɔk wɔ́p ńtɔ́. Lɑ́ ŋ́kɛ́ ḿbɔɔ lɔk tʉʉ ŋ́ɡẅɛɛ wɔ́p pɔ́. MbíꞋŋɡɔ lɑ́Ꞌ kɑ pɔ́ zúꞋu tɛꞋ. Pɔ́p pɔ́ ḿbɔ́k pɑ́Ꞌ pɛ́ ɡʉ ńdɔk mɛŋɡɔꞋ ńtɛ́mtɛ wɔ́p ńjẅítɛ.

²⁷Pɔ́p lɔk pɑpɛ́m Yɛ́su ńtɔ́, ńtík wɔ́p mbi pɑsɑ́Ꞌlɑ́Ꞌ. Tɑ́tndɑ́-pɑnɔŋpɔꞋ píkŋɛ wɔ́p ŋɡɔ:

²⁸«Pɛk ŋkɑɑ tɔꞋ wʉ́ʉ nɛpɛn ńzíꞋ nu-ŋu wɑ́ mbɔ̌ pʉɔ pɔɔ? Pʉʉ pɛn ńdɔk nu yɛ́ ɛ́sɑt Yɛlúsɑlɛm tsʉʉ. Pʉʉ kɑ lɔɔ pɑꞋnɛ ŋɡɔ pɛ́ ɡɔ́ pɛk jí nu nǔu nɛvú wɛ pɔ́ ɔɔ?»

²⁹Lɑ́ Pyɛ̂ pɔ́p pɛcɔ́ ɡɑnŋtúu pʉ̈ɔt ŋɡɔ: «Ɛ́ píkŋɛ ŋɡɔ pɛ́ zúꞋ ntsu-Sɛ́, ńtsɑ nɛzúꞋ ntsu-pʉɔmɛsɔŋ.

³⁰Sɛ́-pɛmɑ̂ɑŋɡɑpnjẅɛt pɛkŋɛ, kɑ ɡɛ Yɛ́su ẅí pʉʉ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ lɑ́, zẅíimɛ nǔu nɛvú.

³¹Sɛ́ kɑ ɡɛ ɑ kɔ́Ꞌ nɛ́ tʉ́nɛpú, ɑ tsẅíkŋɛ wɛ́ nǔu ɡúŋ-pɔ́ yɛ́ yi tʉʉ, pɔ́Ꞌɔ, ńdɔk wɛ́ ŋ́ɡɛ fɔɔ, ḿbɛn ńdɔk wɛ́ ŋ́ɡɛ Nzɑ́Ꞌŋkʉ. Sɛ́ kɑ ɡɛ pɔ́Ꞌɔ, nɛpɔ́ yi pʉɔ-Íslɑyɛ̂l ɡʉ kúpmɛ mɑt wɔp, ɑ likŋɛ mɛnu kɛpɔŋ mɔ́p.

³²Pɛk cú pɑ́Ꞌɑ ḿbɔ́ pɑjʉ́ ńjʉ́ɔ nǔu mɔnɛ mɛnu. Zẅikŋɛ Lɛ́ɛnɛ́nɛ yi Sɛ́ sɛ́ ŋ́ɡɑ́ mbɔ̌ pʉɔ pi pɔ́p sɛ́ ńzúꞋ ntsu wɛ́ tsʉ́ʉnɛ́nɛ wɛk nɛcú.»

³³Pɛkɛ́m zúꞋ pɑ́Ꞌ pɔ́p cúnɛ pɔ́Ꞌɔ, ńzɑ́ŋ lɔ́ŋ, ńzɛ nɛkwɑŋɛ nɛjẅí ɡɑŋntúu-Yɛ́su.

³⁴Lɑ́ wɛcɔ́ ŋu wɔp, pɛ́ fúŋnɛ wɛ́ ŋɡɔ Ŋɡɑmɑlíyɛ̂l, lɔ sɛ́ ńcú ŋɡɔ pɛ́ ɡɛ ɡɑŋntúu nɑ́Ꞌ ńcẅɛt píi. Pɔ́Ꞌɔ, ḿbɔ́ ŋu tsɛt nɔɔ-pɑfɑlísɑy, ḿbɔ́ ndʉ́m nǔu nɛkyɛ́Ꞌtɛ nɛpʉ́ʉ-Mɔ̌sɛ̂ɛ, lɑ́Ꞌ ɡɑ́ mɛkuꞋ mɛ́ tɛꞋ.

³⁵Gɑŋntúu-Yɛ́su cẅɛt, Ŋɡɑmɑlíyɛ̂l cú ŋɡɔ: «Pɑíslɑyɛ̂l, pʉʉ lɑk tú yʉ́ʉ nǔu nu yí pʉʉ lɔɔnɛ nɛɡɛ nǔu pʉɔ pɑ́lɑ́.

³⁶Pʉʉ kẅíitɛ pɑ́Ꞌ Tɛdɑs kɑ kwɑŋɛ ŋɡɔ ɑ ŋu tɛꞋ ńcẅɛt, ńcúꞋlɛ pʉɔ yúu ŋkʉ yɛ́nɛ́kwɑ nǔu yɛ nɔɔ, pɛ́ jẅí wɛ́, pɔ́p sɑtnɛ tɛ ḿmɛ, ɛ́sɑt zʉꞋ.

³⁷Ɛ́ lɑ́Ꞌ ḿbɔ́ ŋkɑ́ yi pɛ́ kɑ pɔ́ ɛ́sɑ́ŋ lɑ́Ꞌ, Jẅidɑ ŋu-Ŋɡɑlilɛɛ cẅɛt yɛ́ ɡúu. Pɛ́ cʉ́ɔ nzʉʉ yɛ́ tɛꞋ. Pɛ́ pɛn ńjẅí wɛ́ ɡúu, pʉɔ pɛ́ tɑ́kŋɛ ɛ́sɑt zʉꞋ, Yɔ́p mɛ.

³⁸N dɔk pɑ́Ꞌɑ ɛ́sẅíi wʉ́ʉ ŋɡɔ, pʉʉ nɑ́ pʉɔ pɑ́lɑ́, pɔ́p ɡʉ, mbíꞋŋɡɔ yúu mi pɔ́p kíɛnɛ ziꞋnɛ nǔu lɑɑ fú pɔ mbɔ̌ pʉɔmɛsɔŋ, ḿbɔ́ yúu mi pɔ́p niitɛ́nɛ, ɡʉ ńdɔk pɔ ndɑ̌ɑ ndɑɑ ḿmɛ.

³⁹Ŋ́kɛ́ ɛ́fú mbɔ̌ Sɛ́, mbɔ ɛ́ lɑɑ ḿbɔ́ pʉʉ pɔɔ kuꞋ nɛtɑ́k pɔ́. Pʉʉ pɑ́ɑ pɑ́Ꞌ ɛ́ lɑɑ ḿbɔ́ pʉʉ lʉ́ɔꞋ Sɛ́ nɛ́ ntsɔ.» Pɔ́p pɛ́m nu yi Ŋɡɑmɑlíyɛ̂l cúnɛ,

⁴⁰ɛ́fúŋ ɡɑŋntúu-Yɛ́su, ńcú pɛ́ lɔk ŋɡwɑɑ ńtswɑ́ɑ wɔ́p. Pɔ́p tɔꞋ wɔ́p nɛpɛn ńdɔk lík-Yɛ́su ńcú nu, ŋ́ɡɛ ńnɑ́ wɔ́p pɔ́p ɡʉ.

⁴¹Pɔ́p ɡɔ́ ɛ́fú tsɛt cúꞋlɛ-pɑsɑ́Ꞌ lɑ́Ꞌ ńcẅɛt, ńnɛn ńtsɑ́ɑtɛ tsɑ́ɑtɛ́nɛ. MbíꞋŋɡɔ Sɛ́ jʉ́ɔ ŋɡɔ pɔ́p kuꞋ nɛjʉ́ɔ ŋɡʉ̈ɔ́Ꞌ ntɛ́ nu-lík-Yɛ́su.

⁴²Pɔ́p ɡʉ pɔ́Ꞌɔ, ḿbɔ́ lɛ́Ꞌ tsʉʉ tsɛt ZʉꞋ-nɔŋpɔꞋ, mbɑ tsɛt mɛndɑ́ mɛndɑ́, ḿbɔ́ ńzíꞋ pʉɔ nɛ́ yúu, ḿbɔ́ ɛ́sɑ́Ꞌ Ŋkʉʉ Sʉ́Ꞌnɛ, ńcú ŋɡɔ Yɛ́su Nzɑ́Ꞌŋkʉ ẅí Sɛ́ kɑ kɑꞋnɛ.