Read Ngomba Pʉɔ-Lɔ́mɑ 1 Bible Online

Pʉɔ-Lɔ́mɑ 1 - Ngomba bible

Pʉɔ-Lɔ́mɑ 1

¹Yɔ ŋwɑꞋnɛ fú mbɔ̌ mɔ Pɔ̂l, ŋu ẅí ɑ fɑꞋnɛ fɑꞋ-Yɛ́su Kɛlístɔ, Sɛ́ kɑ fúŋnɛ wɑ́ɑ ńdɔk ŋ́ɡɛ ŋɡɑŋntúu-Yɛ́su Kɛlístɔ, ńzɑ́p wɑ́ɑ ŋɡɔ ŋ ɡʉ ńcẅi Ŋkʉʉ Sʉ́Ꞌnɛ wɛ́ mbɔ̌ lɑ́Ꞌ.

²Ntí sɑk pɑ́Ꞌ Sɛ́ kɑ lɑ́Ꞌnɛ ŋkɑꞋ ẅîwɑ́ Ŋkʉʉ Sʉ́Ꞌnɛ tɛ ŋ́ɡɛ pɑcẅiŋkʉʉ pɛ́ pɛ́ ŋkɑ́mbi ŋwɑꞋnɛ tsɛt ŋwɑꞋnɛ yɛ́.

³Ẅîwɑ́ Ŋkʉʉ cú nu nǔu Mɔ́ɔ nɛ Yɛ́su Kɛlístɔ ẅí ɑ Tsɑpʉɔ wɛkŋɛ. A kɑ shɔtnɛ ńtsʉ́Ꞌ ŋumɛsɔŋ pɛ́ pí wɛ́ nǔu njẅɛtndɑ́-fɔɔ Ndɑvît.

⁴Sɛ́ pɛn ńdɔk Zẅikŋɛ Lɛ́ɛnɛ́nɛ ŋ́ɡɛ ɑ pɔ́ Mɔ́ɔ nɛ́, ŋ́ɡẅɛɛ mɛtʉʉ. A lɔk pɑ́Ꞌ ɑ kɑ ɡɛnɛ ɑ zẅíimɛ tsɛtsɛt pɛpfú, mbɑ pɑ́Ꞌ ɑ kɑ níꞋnɛ Zẅikŋɛ Lɛ́ɛnɛ́nɛ nǔu wɛ́.

⁵Sɛ́ kɑ lɛɛ pɔ nǔu jʉ́ Kɛlístɔ ŋ́ɡɑ́ fuꞋ níinɛ yɑ́ɑ, ńdɔk wɑ́ɑ ŋ́ɡɛ ŋɡɑŋntúu-Yɛ́su Kɛlístɔ nɛpɔ́ yi mɔ ŋ́ɡʉ ɛ́sẅíi nu-Sɛ́, tsɛt mɛŋɡɔŋ tsʉʉ. Pʉɔ zɑ́p tʉ́m nǔu wɛ́, ńzúꞋ ntsu wɛ́, ɛ́ lɛɛ pɔ́Ꞌɔ, pɔ́p ɡɑ́ mɛkuꞋ mbɔ̌ Yɛ́su Kɛlístɔ.

⁶Mbɑ pʉʉ yʉ́ʉ, pʉʉ nǔu nɔɔ-pʉɔ ɛ̂pɑ́, mbíꞋŋɡɔ Sɛ́ kɑ fúŋnɛ wʉ́ʉ ŋɡɔ pʉʉ pɔ́ yʉ́ʉ pʉɔ-Kɛlístɔ.

⁷M bɛn ŋ́ɡɑ́ yɔ ŋwɑꞋnɛ mbɔ̌ pʉʉ tsʉʉ pi pʉʉ tʉ́sɔŋ-Lɔ́mɑ. Pʉʉ pi Sɛ́ kɔŋnɛ wʉ́ʉ, yɛ́tɛ́ kɑ ɡɛnɛ ɑ fúŋ wʉ́ʉ pɑ́Ꞌ pʉʉ ɡʉ ḿbɔ́ pʉɔ pɛ́ pi ɑ tsɔ́Ꞌnɛ. Mɔ sɛ́ ńtsɑ́ɑ ŋɡɔ Tɑ́t wɛkŋɛ Sɛ́ mbɑ Tsɑpʉɔ Yɛ́su Kɛlístɔ pɔ́ ḿbɔ́ nɛ́ pʉʉ, ḿbɔ́ ńníꞋ mɔ́fíitɛ tʉ́m pʉʉ.

⁸M biitɛ ńdɛɛ nǔu lík-Yɛ́su Kɛlístɔ ŋ́ɡɑ́ pɑ́Ꞌlɑ́ mbɔ̌ Sɛ́ wɑɑ nǔu tú yʉ́ʉ pɛ́tsʉʉ, mbíꞋŋɡɔ pɛ́ ndǔmbí zʉꞋ tsʉʉ ḿbɔ́ ńcú ntɛ́ yi pʉʉ lɔknɛ ńzɑ́p tʉ́m nǔu Yɛ́su Kɛlístɔ.

⁹Mbɑ ŋkɑ́ kʉ̈ɔ́ lɑ́ yi mɔ sɛ́ ḿbúꞋ mbɔ́ mbɔ̌ Sɛ́, m bɔɔ nɑ́ kɛ́ kɛ́ ŋ́kẅíitɛ wʉ́ʉ pɔ́. Sɛ́ sɛ́ ńjí pɔ́Ꞌɔ. N cú pɑ́Ꞌɑ ḿbɔ́ ŋu ẅí ɑ sɛ́ fɑꞋ fɑꞋ yɛ́ nɛ́ ŋɡɔŋ tʉ́m yɛ́ tsʉʉ, ḿbɔ́ ńcẅi Ŋkʉʉ Sʉ́Ꞌnɛ ẅí ɛ́ líŋɛ́nɛ Mɔ́ɔ nɛ.

¹⁰Mɔ sɛ́ ḿbɛn ḿbɔ́ ḿbúꞋ mbɔ́ mbɔ̌ Sɛ́ ŋkɑ́ kʉ̈ɔ́ lɑ́, ńdɔ́ɔ mbɔ̌ wɛ́ ŋɡɔ ɑ ɡɛ pɑ́Ꞌ mɔ sɛ́ ńtsɑ́ɑ ŋkɑ́ tsʉʉ nɛɡʉ lɑ́Ꞌ pʉʉ lɑ́, ɛ́ puutɛ nǔu wɛ nɛkɔŋtɛ.

¹¹MbíꞋŋɡɔ mɔ sɛ́ ńtsuŋ ńtsɑ́ɑ nɛtɔ́ ńjʉ́ɔ wʉ́ʉ, nɛpɔ́ yi ŋ ɡʉ ŋ́ɡɛ Zẅikŋɛ Lɛ́ɛnɛ́nɛ ɡɑ́ fuꞋ níinɛ yʉ́ʉ, mɛtʉ́m mʉ́ʉ kẅiꞋ ńtɛntɛ. Pʉʉ lɔk pɔ́Ꞌɔ ŋ́kẅiꞋ ńtɛntɛ.

¹²N dɑ́Ꞌ ńzɛɛ ḿbɔ́ ŋ́ɡʉ ńcú pɔ ŋɡɔ n dɑɑ ńtɔ́ ḿbɔ́ tsɛtsɛt pʉʉ, yʉʉ ntɛ́ nɛzɑ́p tʉ́m nǔu Sɛ́ ɡɔ́ ńní mɛtʉʉ mɑ́ɑ, yɑɑ ntɛ́ níꞋ mɛtʉʉ mʉ́ʉ ɡúu.

¹³Pɔ́ɔpɛ́mɑ́ pɑ́ɑ, pʉʉ jí sʉ́Ꞌnɛ ŋɡɔ ŋ kɑ tɑ́ŋ tɛꞋ nɛtɔ́ ńjʉ́ɔ wʉ́ʉ lɑ́ shʉ́ kɛ́ mbɔɔ cẅɛt tɛ ŋ́kúu lɔ́Ꞌnɛ pɔ́. Ŋ kɑ tsɑ́ɑ pɔ́Ꞌɔ nɛtɔ́ ɛ́fɑꞋ tsɛtsɛt pʉʉ tɛ pʉʉ jʉ́ yʉ́ʉ pii pɑ́Ꞌ ŋ kɑ fɑꞋnɛ tsɛt mɛcɔ́ mɛŋɡɔŋ pɔ́p jʉ́ pii.

¹⁴Sɛ́ kɑ ɡɑ́ yɔ fɑꞋ mbɔ̌ mɔ, ɛ́ yɛ́tɛ́ lɑ ŋ ɡẅɛɛ nɛcẅi Ŋkʉʉ Sʉ́Ꞌnɛ mbɔ̌ pʉɔ pɛtsʉʉ, mbɔ̌ pʉɔ pi pɔ́p kɑ zíꞋnɛ jínu mbɑ pinɛ pɔ́p ŋkɑɑ zíꞋ, mbɑ pɑjí ŋwɑꞋnɛ mbɑ pɑkɛ́jí.

¹⁵Ɛ́ yúu mi ɛ́ ɡɛnɛ lɑ n tsɑ́ɑ nɛtɔ́ ńcẅi Ŋkʉʉ Sʉ́Ꞌnɛ mbɔ̌ pʉʉ ɡúu, pi pʉʉ tʉ́sɔŋ-Lɔ́mɑ.

¹⁶Mbɔ sʉ́ʉ pɔɔ wɑ́ɑ kɔ́ nɛcẅi Ŋkʉʉ Sʉ́Ꞌnɛ pɔ́, ɛ́ mɛtʉʉ mí Sɛ́ lɔknɛ ŋ́ɡɛ pʉɔ pinɛ pɔ́p zɑ́pnɛ tʉ́m nǔu wɛ́ luk. Ɛ́ zɛ nǔu pɑyúdɑ ŋ́kúu nǔu pʉɔ pi pɔ́p kɑ́ pɔ́ pɑyúdɑ pɔ́.

¹⁷Ɛ́ zɛɛ ŋ́ɡɔ ḿbɔ́, Ŋkʉʉ Sʉ́Ꞌnɛ pɔ́ ŋ́ɡɛ pɛ́ jí pɑ́Ꞌ ɛ́ lɛɛnɛ pɔ́Ꞌɔ, lɑ Sɛ́ lɔk pʉɔmɛsɔŋ ɛ́fúŋ pʉɔ pi pɔ́p ndʉ́ŋndʉŋ mbi yɛ́. Ɛ́ lɛɛ pɔ ndɑꞋ nǔu pɑ́Ꞌ pɔ́p zɑ́pnɛ tʉ́m nǔu wɛ́. Wɛcɔ́ ndúŋ ndɛꞋ kɑ pɔ́ ɡú pɔ́. Ɛ́ yúu mi pɛ́ kɑ ŋwɑꞋnɛ́nɛ tsɛt ŋwɑꞋnɛ-Sɛ́ ŋɡɔ: «Ŋu ẅí ɑ mbi Sɛ́ ḿbɔ́ ndʉ́ŋndʉŋ mbíꞋŋɡɔ ɑ zɑ́p tʉ́m nǔu wɛ́ ɡʉ ndɑ́Ꞌ ḿbɔ́ ɡú.»

¹⁸Sɛ́ zɛɛ ḿbɔ́ tʉ́nɛ́pú ḿbɔ́ ńnyɛt ŋɡɔ ɑ sɛ́ ńzɑ́ŋ lɔ́ŋ, mbíꞋŋɡɔ pʉɔmɛsɔŋ muŋɛ wɛ́, ńnɑ́ŋ ŋ́ɡɛ mɛnu kɛpɔŋ. Pɔ́p sɛ́ ńdɔk ŋɡɛnɛ mɛnu kɛpɔŋ mɔ́p ɛ́fɛ́mɛ nu nɛ́nẅín nɛfɑꞋ fɑꞋ. Sɛ́ sɛ́ ńníꞋ ndɔɔ tú pɔ́p,

¹⁹mbíꞋŋɡɔ yúu mi mbɔ pɛ́ jí nǔu Sɛ́, pɔ́p pɛn ḿbɔ́ ńjí yɔ́p. Sɛ́ kɑ sɑ́ɑnɛ sɑ́ɑnɛ́nɛ ńnyɛt wɔ́p nɛ́ yúu ɛ̂mɑ́.

²⁰Ɛ́ zɛɛ ŋ́ɡɔ́ ḿbɔ́, mbɔ tɛ fúnɛ pɑ́Ꞌ Sɛ́ kɑ niitɛ́nɛ ndǔmbí, pɛ́ fú pɔ nǔu yúu mi ɑ kɑ niitɛ́nɛ, ńjí ŋɡɔ ɑ Sɛ́, tɛ mbɑ pɑ́Ꞌ pɛ́ kɑ́ pɔ́ ńjʉ́ɔ wɛ́ nɛ́ mík pɔ́. Pɛ́ jí mɛtʉʉ mɛ́ mi ɛ́ ŋ́ɡʉ ńdɑ́Ꞌ ḿmɛ pɔ́. Ɛ́ lɛɛ pɔ́Ꞌɔ, mbɔ pʉɔmɛsɔŋ pɔɔ lɑ́Ꞌ ńcú ŋɡɔ pɔ́p ŋkɑɑ ḿbɔ́ ńjí Sɛ́ pɔ́ pɔ́.

²¹Pɔ́p jí Sɛ́, lɑ́ pɔ́p kɑ́ pɔ́ ŋ́ɡúꞋlɛ wɛ́ pɔ́, ŋ́ɡɛ́mtɛ wɛ́ pɑ́Ꞌ ɛ́ sɛ́ ḿbíkŋɛ ŋɡɔ pɛ́ ɡɛ nǔu Sɛ́ pɔ́. Tɛ ńtsʉ́Ꞌ pɔ́Ꞌɔ, mbɔ jínu yɔ́p kɑ fúklɛ wɔ́p pɔ́p fɑɑnɛ ndúŋ, tʉ́m yɔ́p yi ɛ́ ɡẅɛɛ pɔ ɡʉɡʉʉ jínu ɡɛ pɔ́p vu tsɛt nzɛ́nzʉ́ʉ.

²²Pɔ́p tɔ́ pɔ nɛsɑ́Ꞌ ŋɡɔ pɔ́p jí nu, ńtsʉ́Ꞌ pɛpɑ́lɛ́.

²³Pɔ́p nɑ́ nɛɡúꞋlɛ Sɛ́ ẅí ɑ ɡẅɛɛnɛ nɛɡúꞋ, ḿbɔ́ kɛ́ pfú, ńtsʉ́Ꞌ ŋ́ɡúꞋlɛ pɔ yúu níinɛ, mɛyúu mi ɛ́ fínɛ ŋumɛsɔŋ ẅí ɑ ḿpfú, fí pɛshʉ́ŋ, pɛcɔ́ fí mɛyúumɛku mi ɛ́ ɡẅɛɛnɛ mɛku mɛ́nɛ́kwɑ, pɛcɔ́ fí mɛyúumɛku mi ɛ́ shuŋnɛ nɛpɛm nɔ́p pɔ sɛ́.

²⁴Ɛ́ yúu mi ɛ́ kɑ ɡɛnɛ Sɛ́ nɑ́ wɔ́p pɔ́p ɡɛ mɛnu shẅɛt shẅɛtnɛ mi tʉ́m yɔ́p kɑ pɔ́ ńtsɑ́ɑ ńdɔk nɛɡɛ pɔ́Ꞌɔ, ɛ́shɔtnɛ ḿbʉ́ʉpɛ mɛmbʉʉ mɔ́p, ńdɔk ɛ́shɔtnɛ ńtɛ́m sʉ́ʉ nǔu pɔ́p.

²⁵Pɔ́p kɑ nɑ́ nu nɛ́nẅín yi ɛ́ nǔu Sɛ́, ńcʉ́ɔ nzʉʉ cɔtnu, ɛ́ pɔ́ pɑ́Ꞌ pɔ́p tsʉ́Ꞌ ŋ́ɡúꞋlɛ pɔ́ yúu mi Sɛ́ kɑ niitɛ́nɛ, ńtsʉ́Ꞌ ɛ́fɑꞋ pɔ mbɔ̌ mîmɑ́ mɛyúu. Lɑ́ pɛ́ ɡẅɛɛ nɛɡúꞋlɛ pɔ jʉ́ mbuꞋŋɡɔŋ, ŋ́ɡúꞋlɛ wɛ́ nǔu mɛŋɡuꞋ mɛŋɡuꞋ, Ɛ́ pɔ́Ꞌɔ.

²⁶Ɛ́ yúu mi ɛ́ kɑ ɡɛnɛ Sɛ́ nɑ́ wɔ́p pɔ́p ɡɛ yúu mi kwɑŋɛ yɔ́p tʉ́ʉnɛ nǔu lɑ́ ɛ́ pɔ́ mɛnu mi ɛ́ níꞋnɛ sʉ́ʉ nǔu pɔ́p. Pɛzwɛ́ pɔ́p nɑ́ mbɛ́ɛnɛ ńtsʉ́Ꞌ ńdɔɔ pɔ pɛcɔ́ pɑŋɡɛ́ pɔ́p pɛpɔ́p nɔɔ, yîyɑ́ ntɛ́ nɛɡɛ mɛnu kɑ́ pɔ́ ntɛ́ yi Sɛ́ kɑ zɑ́pnɛ pɔ́.

²⁷Mbɛ́ɛnɛ pɛn ŋ́ɡɛ yɔ́p pɔ pɔ́Ꞌɔ, ńnɑ́ pɑŋɡɛ́, tʉ́m yɔ́p ɛ́shí pɔ́p shɔtnɛ ńtsɑ́ɑ tsɛtsɛt pɔ́p pɔ pɑ́Ꞌ ŋu mbɛ́ɛnɛ pɔ́p wɛcɔ́ ɡʉ shɔtnɛ ńnɔɔ, ɛ́ pɔ́ nu sʉ́ʉ nǔu pɔ́p. Ɛ́ pɔ́ pɔ́Ꞌɔ, Sɛ́ níꞋ ŋɡʉ̈ɔ́Ꞌ kwɑꞋ nǔu pɔ́p ɛ́fú nǔu tsẅɛ́ kɛpɔŋ yɔ́p.

²⁸Pɑ́Ꞌ pɔ́p kɑ lʉꞋnɛ nɛjí Sɛ́ lɑ́, Sɛ́ kɑ nɑ́ wɔ́p, jínu yɔ́p yi ɛ́ kɑ́ tʉ́ʉ, tsʉ́Ꞌnɛ ɛ́sɑ́Ꞌ wɔ́p pɔ́p tsʉ́Ꞌ ŋ́ɡɛ pɔ yúu mi pɔ́p lɑ́Ꞌ mbɔɔ ŋ́ɡʉ ŋ́ɡɛ pɔ́.

²⁹Mɛnu mi Sɛ́ sɛ́ ḿbɔɔ ŋ́kɔŋ pɔ́ jʉ́ wɔ́p, pɔ́p ɡɛ mɛnu kɛpɔŋ, ŋ́ɡẅɛɛ kɛ́ɡʉ̈ɔꞋ, ḿbɔ́ pʉɔ ńcʉ̈ɔ́k lɔ́ŋ, nɛjʉ́ɔ yúu-ŋu ŋ́kɔ́Ꞌ lɔ́ŋ nǔu jʉ́ wɔ́p, pɔ́p jẅítɛ pʉɔ, ńnɑ́ŋ ńtɑ́k pɔ mɛfɛꞋ, ŋ́ɡẅɛɛ fúklɛ, kʉ̈ɔ́ lɑ́ sɑ́Ꞌ tú pɔ́p ɔɔ pɔ́p ɡɛ ɡɛnɛ, ńzɑ́p mɛnu tú-pʉɔ,

³⁰ɛ́shɔtnɛ ńtík sɔ́ɔ tú pɔ́p nɛ́ pɔ́p, ḿbɔ́ pɛɡɑŋmbuu-Sɛ́, ńzɔɔtɛ pʉɔ, ḿbɔ́ ɡɑŋŋɑ́Ꞌtɛ, ḿbɔ́ pɑnyɛt mbʉʉ, ńdɔɔ mɛshʉ́ tsʉʉ nɛlɔk ŋ́ɡɛ nu kɛpɔŋ, pɔ́p kɑ́ zúꞋ ntsu-pɛtɑ̌ɑ pɔ́p mbɑ wɛ pɛmɑ́ pɔ́p pɔ́.

³¹Jínu jɑ́k wɔ́p. Pɔ́p kɑꞋ nu mbɔɔ ɡɛ, tʉ́m yɔ́p tɑɑ mɔ, pɔ́p pɑkɛ́tsɑ́ɑ mɛjʉ́ŋ.

³²Pɔ́p sɛ́ ńtsuŋ ńjí ŋɡɔ ɛ́ mbɔ̌ Sɛ́, pʉɔ pi pɔ́p ɡẅɛɛnɛ mɔnɛ mɛmɑt, pɔ́p pʉɔ pi pɔ́p tʉ́ʉnɛ pɑ́Ꞌ pɛ́ ɡʉ ńdɑ́Ꞌ ńjẅí wɔ́p jẅínɛ. Lɑ́, pɔ́p kɑ́ fɑɑnɛ mɔnɛ mɛnu fɑɑnɛ́nɛ ndɑꞋ pɔ́, pɔ́p pɛn ńníꞋ mɛtʉʉ-pʉɔ pi pɔ́p sɛ́ ɛ́fɑɑnɛ yɔ́p mîmɑ́ mɛnu ɡúu.