Read Ngomba Pʉɔ-Lɔ́mɑ 12 Bible Online

Pʉɔ-Lɔ́mɑ 12 - Ngomba bible

Pʉɔ-Lɔ́mɑ 12

¹Pɔ́ɔpɛ́mɑ́ pɑ́ɑ, pɑ́Ꞌ Sɛ́ kɑ ńtsɑ́ɑ mɛjʉ́ŋ mɛkŋɛ lɑ́, mɔ sɛ́ ńcú mbɔ̌ pʉʉ ŋɡɔ pʉʉ ɡɑ́ mbʉʉ yʉʉ mbɔ̌ wɛ́ pɑ́Ꞌ yúu-pɔꞋ lɑ́, ńtsʉ́Ꞌ ńnɑ́ŋ ńzúꞋ pɔ mbɔ̌ wɛ́, ḿbɔ́ pɔ pʉɔ pɛ́ ndɑꞋ, ŋ́ɡɛ pɔ yúu mi ɛ́ ɡʉ ḿbɔŋ wɛ́. Nɛɡɛ pɔ́Ꞌɔ, ɛ́ nɛɡúꞋlɛ Sɛ́ nǔu ntɛ́ yi sʉ́Ꞌnɛ.

²Kɔɔ pʉʉ ɡɛ mʉ́ʉ mɛnu pɑ́Ꞌ pʉɔ pi pɔ́p ndǔmbí ŋkɔ̂ɔnɛ. Pʉʉ pɛ́m Sɛ́ pɔ́ ŋ́ɡɑ́ jínu yɛ fí mbɔ̌ pʉʉ ńdɔk ŋ́kúpmɛ yʉʉ ntɛ́ nɛkwɑŋɛ nu pɔ tsʉʉ, ɛ́ lɛɛ pɔ́Ꞌɔ, pʉʉ kuꞋ nɛjí yúu mi jʉ́ Sɛ́ sɛ́ ŋ́kɔŋ ŋɡɔ pʉʉ ɡɛ. Pʉʉ jí yúu mi ɛ́ pɔŋnɛ, ńjí yi ɛ́ pɔŋnɛ wɛ́, ńjí yi yɛcɔ́ lɔ́Ꞌ kɑ́ pɔ́ nǔu pɔ́.

³Ŋ ɡʉ ɛ́fú nǔu pɑ́Ꞌ Sɛ́ kɑ tsʉ́Ꞌ nɛɡɑ́ fuꞋ níinɛ yɑ́ɑ, ńtík wɑ́ɑ nǔu zʉꞋ ɡwɛ́, ńcú mbɔ̌ mbɑ wɔ̌ lɑ́ tsɛtsɛt pʉʉ ŋɡɔ: Kɔɔ ŋu kwɑŋɛ ŋɡɔ ɑ yúu kɛ́ pɔ́ yi ɑ yɛ́tɛ́. Ŋu ɡẅɛɛ yi kwɑŋɛ ɛ́ kuꞋ kuꞋnɛ. Ŋu kúꞋlɛ pɔ yɛ́ fɑꞋ yi Sɛ́ kɑ ɡɑ́nɛ, ŋ́ɡɔ́ ŋ́ɡɑ́, ɛ́fú nǔu pɑ́Ꞌ ɑ zɑ́pnɛ tʉ́m nǔu Kɛlístɔ.

⁴Ɛ́ zɛɛ ḿbɔ́ nǔu mbɑp-mbʉʉ-ŋumɛsɔŋ, mɛkɛm pɔ́ nǔu tɛ ńzɑ́ɑ ḿbɛn ŋ́kɛ́ ḿbɔɔ ɡẅɛɛ tɑ́Ꞌ fɑꞋ pɔ́.

⁵Ɛ́ pɛn ḿbɔ́ pɔ ndʉ́ŋndʉŋ nǔu pɑ́Ꞌ pɛkŋɛ pɔ́ tɛ ńzɑ́ɑ zɑ́ɑnɛ lɑ́, ńdɔk pɑ́Ꞌ pɛkŋɛ lɑtnɛ mbʉʉ nǔu Kɛlístɔ, ńtɛmtɛ ńcúꞋlɛ nǔu tɑ́Ꞌ ŋu, pɑ́Ꞌ mɛkɛm mbʉʉ tɛmtɛ́nɛ, mbɑ yɛ́tɛ́ lɑ́ pɔ́ ńtɔ́ɔtɛ yɛcɔ́ lɑ́.

⁶Ɛ́ yɛ́tɛ́ lɑ Sɛ́ ɡɑ́ fuꞋ níinɛ yɛkŋɛ, ŋ́ɡɑ́ fuꞋ yɛ́ mbɑ wɔ̌ lɑ́ ɛ́ pɔ́ pɔ yɛ́ ntɛ́. FuꞋ yi ŋu lɑɑ ḿbɔ́ ńnɑ́ŋ ńcẅi Ŋkʉʉ ẅí ɛ́ fúnɛ mbɔ̌ Sɛ́, ɑ ɡɔ́ ńcẅi, ńcẅi nǔu ntɛ́ yi ɑ sɛ́ ńzúꞋ, mbɔ Sɛ́ lɔk ɛ́sẅíi wɛ́ pɔ́Ꞌɔ.

⁷FuꞋ-ŋu lɑɑ ḿbɔ́ nɛcẅɛ́lɛ nǔu mɛfɑꞋ, ɑ cẅɛ́lɛ́. Yɛ́ ŋu pɔ́ nɛzíꞋ pʉɔ nɛ́ yúu, ɑ zíꞋ.

⁸FuꞋ-ŋu pɔ́ nɛníꞋ mɛtʉʉ-pɛcɔ́ pʉɔ, ɑ ńníꞋ. Ŋu lɑɑ ḿbɔ́ ŋ́ɡɑ́ yúu mbɔ̌ ŋu, ɑ ɡɑ́ kɛ́ sɑ́ŋ. Ŋu lɑɑ ḿbɔ́ ŋu ẅí ɑ niitɛ́nɛ cúꞋlɛ, ɑ niitɛ tɛ ńjí yúu mi ɑ ɡɛnɛ yɛ́tɛ́. Ŋu lɑɑ ḿbɔ́ ńcẅɛ́lɛ pɛpúŋ, ɑ cẅɛ́lɛ́ nɛ́ tʉ́m sʉ́Ꞌnɛ.

⁹Pʉʉ kɔŋ pʉɔmɛsɔŋ pɔ nɛ́ tʉ́m yʉ́ʉ tsʉʉ. Pʉʉ kʉ̈ɔ́ nu kɛpɔŋ tɛ ńtɔ́ŋ mɛkɑ́ɑ, ŋ́kúꞋlɛ pɔ nu sʉ́Ꞌnɛ tɛ ɛ́ tɛn.

¹⁰Pʉʉ lɔk pɑ́Ꞌ pʉʉ pɔ́ɔpɛ́mɑ́, ŋ́kɔŋɛ pʉʉ nɛ́ pʉʉ, ŋu wʉʉ piitɛ ŋ́ɡɑ́ mɛkuꞋ mɔ́ɔmɑ́ wɛ.

¹¹Kɔɔ pʉʉ pɔ́ pɛlɔ́ŋ, pʉʉ pɔ́ pɔ ɡɑŋfɑꞋ. Pʉʉ lɔk tʉ́m yʉ́ʉ tsʉʉ ɛ́fɑꞋ mbɔ̌ Tsɑpʉɔ.

¹²Pʉʉ ńnɑ́ŋ nɛ́ tsɑ́ɑtɛ mbíꞋ yúu mi pʉʉ sɛ́ ńzẅíꞋlɛ. Ŋɡʉ̈ɔ́Ꞌ lɑɑ ŋ́kúu wʉ́ʉ, pʉʉ sʉk sʉknɛ. Pʉʉ kɛ́ ḿbɔ́ ḿbúꞋ mbɔ́ pɔ mbɔ̌ Sɛ́ kɛ́ kɑ́ɑ.

¹³Yúu lɑɑ ńjɑ́k mbɔ̌ pɔ́ɔpɛ́mɑ́, pʉʉ pʉɔ-Kɛlístɔ, pʉʉ cẅɛ́lɛ́ wɔ́p. Pʉʉ ńnɑ́ŋ ńcẅɛ́ɛ pʉɔ-túu sʉ́Ꞌnɛ.

¹⁴Pʉʉ tsɑ́ɑ pɔ nu sʉ́Ꞌnɛ nǔu tú-pʉɔ pi pɔ́p sɛ́ ŋ́ɡɛ pʉʉ jʉ́ɔ ŋɡʉ̈ɔ́Ꞌ. Pʉʉ tsɑ́ɑ pɔ nu sʉ́Ꞌnɛ, kɔɔ pʉʉ tsɑ́ɑ nu kɛpɔŋ.

¹⁵Pʉɔ lɑɑ ḿbɔ́ ńtsɑ́ɑtɛ pʉʉ pɛpɔ́p tɛmtɛ ńtsɑ́ɑtɛ, ḿbɔ́ ńdɑɑ pʉʉ pɛpɔ́p tɛmtɛ ńdɑɑ.

¹⁶Pʉʉ ɡẅɛɛ tɑ́Ꞌ ntsu tsɛtsɛt pʉʉ, kɔɔ pʉʉ tsɑ́ɑ pɔ mɛntsu-fɑꞋ-pɛlʉ́m, pʉʉ pɛ́m nɛɡɛ mɛfɑꞋ mi ɛ́ kuꞋ kuꞋnɛ, kɔɔ pʉʉ kwɑŋɛ ŋɡɔ pʉʉ jí nu.

¹⁷Kɔɔ pʉʉ tsɔ́Ꞌ pɛn nu kɛpɔŋ ŋ́ɡɑ́ nu kɛpɔŋ. Tɛ ńtsʉ́Ꞌ pɔ́Ꞌɔ, pʉʉ lɔɔ shʉ́ ŋ́ɡɛ pɔ nu yi mbɑ wɔ̌ lɑ́ ɡʉ ńjʉ́ɔ ḿbɛ́m ŋɡɔ ɛ́ pɔŋ.

¹⁸Mbɑ yɛ́tɛ́ nu lɑ́ lɑɑ ḿbɔ́ sɛ́, tɛ shʉ́ pɔ́ mbɔ̌ ɡu, ɔ ɡɛ pɔ pɑ́Ꞌ pʉʉ pɛ́ pʉɔ tsʉʉ ɡʉ ńnɑ́ŋ nɛ́ mbɔ́tnɛ.

¹⁹Pʉʉ pɛsúu pɑ́ɑ, kɔɔ ŋu wʉ́ʉ shɔtnɛ ńtsɔ́Ꞌ nu kɛpɔŋ yi pɛ́ ɡɛnɛ nǔu wɛ́, ŋ́ɡɑ́ yɛcɔ́. A nɑ́ Sɛ́ lɑ́Ꞌnɛ ḿbʉ̈ɔt, mbíꞋŋɡɔ ɛ́ tsɛt ŋwɑꞋnɛ-Sɛ́, jʉ́ Tsɑpʉɔ cú ŋɡɔ: «Mɔ ɡẅɛɛnɛ nɛtsɔ́Ꞌ nu kɛpɔŋ ŋ́ɡɑ́ yɛcɔ́, mɔ ɡẅɛɛnɛ nɛtsɔ́Ꞌ fɑꞋ mbɑ wɔ̌ lɑ́».

²⁰A pɛn ńcú ŋɡɔ: «Nji lɑɑ ḿbɔ́ ńzɑ́ŋ ŋɡɑŋmbuu wu ɔ ɡɑ́ yúu ɑ kwɛ́t. Nji ŋki pɔ́ ńzɑ́ŋ wɛ́, ɔ ɡɑ́ ŋki ɑ nɔ́. Ɔ lɑɑ ŋ́ɡɛ pɔ́Ꞌɔ, mbɔ sʉ́ʉ ɡʉ ŋ́kɔ́ wɛ́, ɑ kúpmɛ mɑt wɛ».

²¹Kɔɔ ŋu pɛ́m tɛ nu yi ŋu ɡɛnɛ nǔu wɛ́ tsʉ́ʉnɛ wɛ́, ɑ ɡɛ nu kɛpɔŋ, tɛ ńtsʉ́Ꞌ pɔ́Ꞌɔ, ɑ lɔk nɛɡɛ nu sʉ́Ꞌnɛ, ḿbík nu kɛpɔŋ.