Read Ngomba Pʉɔ-Lɔ́mɑ 16 Bible Online

Pʉɔ-Lɔ́mɑ 16 - Ngomba bible

Pʉɔ-Lɔ́mɑ 16

¹N níꞋ mɔ́ɔmɑ́ wɛkŋɛ wɛ mɑŋɡɛ́ ẅi pɛ́ fúŋnɛ wɛ́ ŋɡɔ Fɛ́bɛ mbɔ̌ pʉʉ, ɑ fɑꞋ mɛfɑꞋ tsɛt ndɑ-cúꞋlɛ-pʉɔ-Kɛlístɔ yi ɛ́ tʉ́sɔŋ-Sɛŋkɛlɛ̂.

²Pʉʉ lɔk lík-Tsɑpʉɔ ŋ́kúkŋɛ wɛ́ nǔu ntɛ́ yi pʉɔ-Kɛlístɔ ɡẅɛɛnɛ nɛkúkŋɛ ŋu pɔ́Ꞌɔ. Pʉʉ tʉ́ʉ pɑ́Ꞌ mbɑ yɛ́tɛ́ nu lɑ́ lɑɑ ńdɛɛ wɛ́, tɛ ɑ kíi mbɔ̌ pʉʉ, pʉʉ cẅɛ́lɛ́ wɛ́ nǔu. KwɑꞋ jʉ́ kɑ cẅɛ́lɛ́ mɔ́ pʉɔ tɛꞋ, ḿbɛn ńcẅɛ́lɛ mbɑ wɑ́ɑ ɡúu.

³Pʉʉ cɛꞋlɛ Pilískɑ pɔ́p Akilɑs ŋ́ɡɑ́ mbɔ̌ mɔ, ɛ́ pʉɔ pi pɛk pɛpɔ́p tɛmtɛ́nɛ ɛ́fɑꞋ fɑꞋ-Yɛ́su Kɛlístɔ.

⁴Ɛ́ kɑ tsʉ́Ꞌ mɔ́zʉꞋ pɔ́p pfú nǔu tú yɑ́ɑ. Mɔ kɑ́ pɔ́nɛ ndɑꞋ ŋu ẅí yɔ nu nɑ́ŋnɛ ḿbɔŋ wɛ́ pɔ́. Ɛ́ pɛn ḿbɔŋ mbɑ mɛcúꞋlɛ-pʉɔ-Kɛlístɔ mí ɛ́ tsɛt mɛlɑ́Ꞌ mi ɛ́ kɑ́ pɔ́ mɛ́ pɑyúdɑ pɔ́.

⁵Pʉʉ pɛn ḿbúꞋ mbɔ́ mbɔ̌ cúꞋlɛ-pʉɔ-Kɛlístɔ yi ɛ́ ndɑ́ pɔ́p. Pʉʉ cɛꞋlɛ Ɛpɛ́nɛt, mɔ́ɔmɑ́ wɑ́ɑ wɛ tʉʉndɛn. A nduŋmbi ŋu nɛzɑ́p tʉ́m nǔu Kɛlístɔ tsɛt pɑk-ŋɡɔŋ-Azîi.

⁶Pʉʉ ńcɛꞋlɛ Mɑlíyɑ. A kɑ kíɛ ziꞋnɛ tɛꞋ mbíꞋ wʉ́ʉ.

⁷Pʉʉ cɛꞋlɛ Andɛlɔnikus pɔ́p Juníyɑs. Pɛk pɛpɔ́p pɛtsʉʉ pɑyúdɑ, mbɔ pɛk pɛpɔ́p kɑ pɔ́ ndɑ́tsɑ́ŋ. Pɔ́p tsɛtsɛt ɡɑŋntúu pɛ́ ŋ́kɔŋ nu yɔ́p tɛꞋ. Pɔ́p kɑ zɛɛ ḿbiitɛ ḿbɔ́ pʉɔ-Kɛlístɔ lɑ ŋ ɡɛ ḿbɔ́ pɑ́ɑ.

⁸M bɛn ḿbúꞋ mbɔ́ mbɔ̌ Amplíyɑtus. A mɔ́ɔmɑ́ wɑ́ɑ wɛ tʉʉndɛn nzʉʉ Tsɑpʉɔ.

⁹Pʉʉ ńcɛꞋlɛ Ulbɛŋ, pɛkŋɛ fɑꞋ fɑꞋ-Kɛlístɔ, ḿbúꞋ mbɔ́ mbɔ̌ mbɑ mbɔ̌ mɔ́ɔmɑ́ wɑ́ɑ wɛ tʉʉndɛn Stɑshis.

¹⁰Pʉʉ cɛꞋlɛ Apɛlɛs, ɑ kɑ nyɛt ŋɡɔ A kwɑꞋ ŋu-Kɛlístɔ. Pʉʉ cɛꞋlɛ pʉɔ ndɑ́-Alistɔbul.

¹¹Pʉʉ cɛꞋlɛ Ɛlɔ̂díyɔn. A ŋu-Yúdɑ pɑ́Ꞌ mɔ. Pʉʉ cɛꞋlɛ pʉɔ-ndɑ́-Nɑɑsis pi pɔ́p lɑtnɛ mbʉʉ nǔu Tsɑpʉɔ.

¹²Pʉʉ cɛꞋlɛ Tilifɛn pɔ́p mɔ́ɔmɑ́ wɛ Tilifɔs, ɛ́ pɑŋɡɛ́ pi pɔ́p fɑꞋnɛ fɑꞋ-Tsɑpʉɔ tɛꞋ. Pʉʉ cɛꞋlɛ Pɛɛsidɛ. A tʉʉndɛn mɔ́ɔmɑ́ wɑ́ɑ wɛ mɑŋɡɛ́. A kɑ fɑꞋ yɛ́ fɑꞋ-Tsɑpʉɔ tɛꞋ.

¹³N cɛꞋlɛ Lufus. A ŋu ẅí Tsɑpʉɔ kɑ tsɔ́Ꞌnɛ wɛ́ ɑ pɛn ńníꞋ tú nǔu fɑꞋ yɛ́ tɛꞋ. Pʉʉ pɛn ḿbúꞋ mbɔ́ mbɔ̌ mbɑ mbɔ̌ mɑ́ wɛ, mɑ́ wɛ ɛ̂wɑ́ pɛn ḿbɔ́ mɑ́ wɑɑ ɡúu.

¹⁴Pʉʉ cɛꞋlɛ Asiŋkɛlit, nɛ́ Flɛŋɡɔŋ, nɛ́ Hɛlmɛs, nɛ́ Pɑtɛlɔbɑs, nɛ́ Hɛlmɑs, mbɑ pɔ́ɔpɛ́mɑ́ pi pɔ́p pɛpɔ́p pɔ́nɛ.

¹⁵Pʉʉ cɛꞋlɛ Filɔlɔk, nɛ́ Julí, nɛ́ Nɛ́lɛ tɛ mbɑ mɔ́ɔmɑ́ wɛ wɛ mɑŋɡɛ́, ŋ́ɡɛ Ɔlɛmpɑ́s, tɛ mbɑ pʉɔ-Kɛlístɔ pɛtsʉʉ pi pɔ́p pɛpɔ́p pɔ́nɛ.

¹⁶Pʉʉ cɛꞋlɛ mɛmbʉʉ mʉ́ʉ, ńtsʉ́Ꞌ nɛcɛꞋlɛ, ńniitɛ mɛmbʉʉ mʉ́ʉ nǔu ntɛ́ yɛ́ pʉɔ-Sɛ́. MɛcúꞋlɛ-pʉɔ-Kɛlístɔ tsʉʉ nǔu wɔ shʉ́ cɛꞋlɛ wʉ́ʉ.

¹⁷Pɔ́ɔpɛ́mɑ́ pɑ́ɑ, mɔ ńcú mbɔ̌ pʉʉ ŋɡɔ pʉʉ pɑ́ɑ pʉɔ pi pɔ́p mɑꞋnɛ fyɑkŋɛ tsɛtsɛt pʉʉ, ńdɔk pɑ́Ꞌ pɔ́p lʉꞋnɛ yúu mi pɛ́ kɑ zíꞋnɛ wʉ́ʉ nǔu Kɛlístɔ, ŋ́ɡɛ pʉɔ fɑɑnɛ sɛ̂ndúŋ. Pʉʉ kʉ̈ɔ́ pîpɑ́ pʉɔ.

¹⁸MbíꞋŋɡɔ yîyɑ́ ntɛ́ pʉɔ kɑ́ pɔ́ ɛ́fɑꞋ fɑꞋ-Tsɑpʉɔ wɛkŋɛ Yɛ́su Kɛlístɔ pɔ́, pɔ́p tsɑ́ɑ pɔ nɛpɛm nɔ́p. Pɔ́p lɔk sẅiŋɛ pɔ́tnɛ́nɛ mbɑ sẅiŋɛ lẅɑklɛ, ɛ́fúklɛ pʉɔ pi jínu yɔ́p túꞌ tuꞋnɛ.

¹⁹Ɛ́ ɡʉ nǔu pʉʉ, pʉɔ pɛtsʉʉ sɛ́ ńjí ŋɡɔ pʉʉ zúꞋ ntsu-Tsɑpʉɔ. Lɑ́ tʉ́m yɑ́ɑ nɑ́ŋ ńtsɑ́ɑtɛ tsɑ́ɑtɛ́nɛ nǔu yúu mi pʉʉ sɛ́ ŋ́ɡɛ. Lɑ́ mɔ sɛ́ ńtsɑ́ɑ ŋɡɔ pʉʉ ɡẅɛɛ jínu sʉ́Ꞌnɛ nɛlɔk ŋ́ɡɛ nu sʉ́Ꞌnɛ, ḿbɛn ńnɑ́ŋ ḿbɔ́ pʉɔ pi pɔ́p lɔk nɛkʉɔ nu kɛpɔŋ ḿbɔ́ pɑ kɛ́ ɡẅɛɛ lɔ́Ꞌ.

²⁰Pʉʉ lɑɑ ŋ́ɡɛ pɑ́Ꞌɑ, mbɔ Sɛ́ ẅí ɑ ɡɑ́nɛ mɔ́fíitɛ, ɡʉ ḿmɑꞋ Sɑ́ttɑ sɛ́, pʉʉ lɔk mɛku ńnʉŋtɛ wɛ́. Tsɑpʉɔ wɛkŋɛ Yɛ́su Kɛlístɔ pɔ́ ḿbɔ́ nɛ́ pʉʉ[6].

²¹Timɔtɛ̂ɛ ẅí pɛknɛ fɑꞋnɛ, cɛꞋlɛ wʉ́ʉ. Lusius mbɑ Jɑsɔn mbɑ Sɔsipɑtɛɛ, pi pɛk pɛpɔ́p tɛmtɛ ḿbɔ́ pɑyúdɑ pɔ́p cɛꞋlɛ wʉ́ʉ ɡúu.

²²Mɔ Tɛɛtilus ẅí pɛ́ cúnɛ ŋɡɔ ŋ ŋwɑꞋnɛ yɔ ŋwɑꞋnɛ, n dɔk pɑ́Ꞌ n dɑtnɛ mbʉʉ nǔu Tsɑpʉɔ ẅí ɑ kɑ tɛmtɛnɛ wɛkŋɛ, n cɛꞋlɛ wʉ́ʉ ɡúu.

²³Ŋɡɑẅîs ẅí ɑ kúkŋɛ́nɛ wɑ́ɑ, cɛꞋlɛ wʉ́ʉ, cúꞋlɛ-pʉɔ-Kɛlístɔ ndɑ́ yɛ́. Ɛlɑstɛ, ẅí ɑ tʉ́sɔŋ ḿbɔ́ ndẅɛꞋ ŋkɑ́p, mbɑ mɔ́ɔmɑ́ wɛkŋɛ Kɑɑtẅis pɔ́p tɛmtɛ ḿbúꞋ mbɔ́ mbɔ̌ pʉʉ. [

²⁴Tsɑpʉɔ wɛkŋɛ Yɛ́su Kɛlístɔ pɔ́ ḿbɔ́ nɛ́ pʉʉ pɛtsʉʉ. Ɛ́ pɔ́Ꞌɔ.]

²⁵Pɛkŋɛ ɡúꞋlɛ Sɛ́. Jʉ́ kuꞋnɛ nɛɡɛ pʉʉ tɛntɛ tɛntɛ́nɛ nzʉʉ wɛ́. Ŋkʉʉ Sʉ́Ꞌnɛ ẅí n cẅinɛ ɛ́ cú nu nǔu Yɛ́su Kɛlístɔ, ɛ́ ɡʉ ḿbɔ́ ɛ́fɑꞋ yîyɑ́ fɑꞋ. Sɛ́ lɔk wɔ Ŋkʉʉ Sʉ́Ꞌnɛ, ńnyɛt yúu mi ɑ kɑ zɑ́pnɛ nǔu Kɛlístɔ, mbɔ ɛ́ kɑ zɛɛ ḿbɔ́ yi lʉɔmɛ́nɛ tɛ ɛ́fú tɛ mɛŋɡuꞋ.

²⁶Ɛ́ pɛn ḿbɔ́ ŋkɔ̂ɔnɛ, mbɔ ɛ́ cẅɛt mɔ́ mɑ́ntɑ́ɑ. Pɑ́Ꞌ Sɛ́ kɑ cúnɛ lɑ́, pɛ́ ŋkɔ̂ɔnɛ ḿbɔ́ ɛ́fú nǔu yúu mi pɑcẅiŋkʉʉ-Sɛ́ kɑ ŋwɑꞋnɛ́nɛ, ḿbɔ́ ɛ́sɑ́Ꞌ nɛpɔ́ yi pʉɔ pi pɔ́p kɑ́ pɔ́ pɑyúdɑ pɔ́ ɡʉ ńjí Kɛlístɔ, ńzɑ́p tʉ́m nǔu wɛ́, ńzúꞋ ntsu wɛ́.

²⁷Sɛ́ jínɛ nu zɛ́nɛ jʉ́. Pɛkŋɛ lɛɛ nǔu Yɛ́su Kɛlístɔ ŋ́ɡúꞋlɛ wɛ́ nǔu mɛŋɡuꞋ mɛŋɡuꞋ. Ɛ́ pɔ́Ꞌɔ.