Read Ngomba Pʉɔ-Lɔ́mɑ 3 Bible Online

Pʉɔ-Lɔ́mɑ 3 - Ngomba bible

Pʉɔ-Lɔ́mɑ 3

¹Tɛ ɛ́ lɑɑ ḿbɔ́ pɑ́Ꞌɑ, ŋu-Pɑyúdɑ lɔk kʉ̈ɔ́ ńdɛɛ ŋu ẅí ɑ kɑ́ pɔ́ ŋu-Pɑyúdɑ pɔ́ ɔɔ? NɛpúꞋ ŋu-Pɑyúdɑ pɛn ńcẅɛ́lɛ wɛ́ nǔu kʉ̈ɔ́?

²Pii kɛ́ ḿbɔ́ ɡú tɛꞋ, mɛshʉ́ mɛshʉ́ nǔu nɛpɔ́ ŋu-Pɑyúdɑ. Nduŋmbi pɔ́ pɑ́Ꞌ Sɛ́ kɑ ɡɑ́nɛ sẅiŋɛ yɛ́ pɔ mbɔ̌ pɑyúdɑ.

³Ɛ́ pɛn ŋ́ɡʉ nǔu pɑ́Ꞌ pɛcɔ́ pɑyúdɑ kɑ nyɛtnɛ yîyɑ́ sẅiŋɛ pɛ́Ꞌɛ, ɛ́ ɡɛ ńdɛɛ pɔ́Ꞌɔ, Sɛ́ nyɛt mɛnu mi ɑ kɑ kɑꞋnɛ mbɔ̌ pɔ́p kɛkʉ̈ɔ́?

⁴Ŋɡɑ́ŋ, ḿbɔ́ ɑ pɔɔ pɔ́Ꞌɔ ɡɛ. Tɛ mbɑ pɑ́Ꞌ pʉɔmɛsɔŋ tsʉʉ pɔ́ pɔ ɡɑŋcɔtnu, jʉ́ Sɛ́ lɔɔ ŋ́kɛ́ ńcú nu ḿbɛn ŋ́kúpmɛ pɔ́. Ɛ́ ndʉ́ŋndʉŋ pɑ́Ꞌ pɛ́ kɑ ŋwɑꞋnɛ́nɛ tsɛt ŋwɑꞋnɛ Sɛ́ ŋɡɔ: «Gu Sɛ́ pɔ́ tɛ ńcú nu pɛ́ ɡẅɛɛ nɛjí ŋɡɔ sẅiŋɛ yú ndʉ́ŋndʉŋ, ḿbɔ́ yi ŋu lɑɑ ŋ́ŋɑk wú ɑ pɔɔ wú jʉ́.»

⁵Ḿbɔ́ pɛcɔ́ pʉɔ cú ŋɡɔ: «Mɛnu kɛpɔŋ mi pɛkŋɛ fʉꞋnɛ nɛɡɛ pʉɔ jí ŋɡɔ Sɛ́ ndʉ́ŋndʉŋ, mbɔ pɛkŋɛ ɡʉ ńtsɔ́Ꞌ mbɔ̌ pɔ́p ŋɡɔ kʉ̈ɔ́? Pɛkŋɛ ɡʉ ńcú ŋɡɔ Sɛ́ pɔ́ tɛ ḿbɔ́ ńníꞋ ŋɡʉ̈ɔ́Ꞌ tú pɛkŋɛ ntɛ́ mɛfʉꞋnɛ mɛnu mɛkŋɛ, kɑ́ lɔknɛ ḿbɔ́ ndʉ́ŋndʉŋ pɔ́ kɛkʉ̈ɔ́?» N cú pɑ́Ꞌɑ pɔ́ nu yi pʉɔmɛsɔŋ sɛ́ ńcú.

⁶Ŋɡɑ́ŋ ḿbɔ́ pɛkŋɛ pɔɔ cú pɔ́Ꞌɔ pɔ́, Sɛ́ pɛ́Ꞌnɛ mbɔɔ pɔ́ ndʉ́ŋndʉŋ pɔ́, mbɔ ɑ kɛ́ kuꞋ pɑ́Ꞌ ḿbɔ́ ɑ ŋɑk pʉɔmɛsɔŋ tsʉʉ pi pɔ́p ndǔ tsɛ́tsɑ́Ꞌ pɔ́.

⁷Tɛ ḿbɔ́ ŋu zɛɛ ńcú ŋɡɔ ɑ ɡʉ ńdɛɛ nǔu pɑ́Ꞌ mɔ sɛ́ ńcɔt nu, nu nɛ́nẅín yi ɛ́ fúnɛ mbɔ̌ Sɛ́ cẅɛt mɑ́ntɑ́ɑ, pɛ́ ɡúꞋlɛ wɛ́ mbíꞋ pɔ́Ꞌɔ, Sɛ́ pɛn ŋ́ŋɑk wɑ́ɑ ŋɡɔ mɔ ŋu kɛpɔŋ mɛlɑ́Ꞌ kʉ̈ɔ́?

⁸Ŋu lɑɑ ńcú pɑ́Ꞌnɛ, mbɔ ɛ́ lɑɑ ḿbɔ́ pɛ́ cú ŋɡɔ: Pɛkŋɛ ɡɛ mɛnu kɛpɔŋ, ńjí ŋɡɔ nu sʉ́Ꞌnɛ ɡʉ ńcẅɛt nǔu. Pɛcɔ́ pʉɔ sɛ́ ɛ́sẅíŋɛ nǔu lík yɑ́ɑ ŋɡɔ mɔ cúnɛ pɔ́Ꞌɔ. Pîpɑ́ pʉɔ pi Sɛ́ ɡʉ ŋ́ɡɛ ŋ́ŋɑk wɔ́p.

⁹Tɛ ɛ́ pɑ́Ꞌnɛ ḿbɔ́ pɛkŋɛ cú ŋɡɔ kʉ̈ɔ́? Ŋɡɔ ɛ́ mbi Sɛ́ pɛk pɑyúdɑ lɛɛ pʉɔ pi pɔ́p kɑ́ pɔ́ pɑyúdɑ pɔ́ kíi? Ŋɡɑ́ŋ ɛ́ kɑ́ pɔ́ pɔ́Ꞌɔ pɔ́. Mɔ ńdɑ́Ꞌmɔ́ ńdɛꞋlɛ pɑ́Ꞌ nu kɛpɔŋ ńjʉ́ mɔ́ pɑyúdɑ mbɑ pʉɔ pi pɔ́p kɑ́ pɔ́ pɑyúdɑ pɔ́.

¹⁰Ɛ́ lɔk ḿbuutɛ nǔu pɑ́Ꞌ pɛ́ kɑ ŋwɑꞋnɛ tsɛt ŋwɑꞋnɛ-Sɛ́ ŋɡɔ: «Wɛcɔ́ ŋumɛsɔŋ ẅí ɑ ndʉ́ŋndʉŋ kɑ́ pɔ́ ɡú pɔ́. Kɑ́ɑ tɑ́Ꞌ wɛmɔ́Ꞌ.

¹¹Wɛcɔ́ ŋu ẅí ɑ ɡẅɛɛnɛ jínu kɑ́ pɔ́ ɡú pɔ́. Wɛcɔ́ ŋu ẅí ɑ tsuŋ ḿbɔ́ ńtsɑ́ɑ nɛjí sɛ̂ndúŋ-Sɛ́ ɑ kɑ́ pɔ́ ɡú pɔ́.

¹²Pɔ́p pɛtsʉʉ kɑ mɛꞋ mɔ́ ndúŋ-Sɛ́. Pɔ́p pɛtsʉʉ kɑ pʉ́k mɔ́. Pʉɔmɛsɔŋ kɑ́ pɔ́ ŋ́ɡɛ nu sʉ́Ꞌnɛ pɔ́, kɑ́ɑ tɑ́Ꞌ wɛmɔ́Ꞌ.

¹³Ntsu wɔ́p lɛm pɔ pɑ́Ꞌ jɑ́k nɛshi ni pɛ́ fiꞋnɛ lɑ́. Pɔ́p lɔk lʉ́m yɔ́p ɛ́fúklɛ pʉɔmɛsɔŋ fúklɛ́nɛ. Nu yi ɛ́ cẅɛtnɛ nǔu mɛkup-ntsu mɔ́p pɔ́ pɔ pɑ́Ꞌ lʉ́m-nɔ́.

¹⁴Ntsu wɔ́p zɔɔ pʉɔ zɔɔnɛ, ńníꞋ pɔ ndɔɔ.

¹⁵Ku yɔ́p zɑŋɛ pɔ nǔu nɛnɑ́ɑnɛ pʉɔ, ńtsẅɛt mɛci mɔ́p.

¹⁶Pɔ́p lɛɛ ɡɔ́ lɑ́, ḿbʉ́ʉpɛ yúu pɔ tsʉʉ, pɛ́ tsʉ́Ꞌ ńdɑɑ.

¹⁷Mbɔ pɔ́p pɔɔ lɔk mbɔ́tnɛ ńtɔ́ zʉꞋ pɔ́.

¹⁸Pɔ́p ɡɛ yɔ́p nu pɔ kɛ́ pɔ́k Sɛ́.

¹⁹Mɔnɛ mɛnu mi pɛ́ kɑ ŋwɑꞋnɛ́nɛ tsɛt ŋwɑꞋnɛ-nɛpʉ́ʉ-Sɛ́, pɛkŋɛ pɛn ńjí ŋɡɔ nu tsʉʉ yí nɛpʉ́ʉ cúnɛ, m biitɛ ńcú mbɔ̌ pɑyúdɑ pi nɛpʉ́ʉ ɛ̂nɑ́ sɑ́Ꞌnɛ wɔ́p. Pɑ́Ꞌ pɔ́p pɛn ḿbɔ́ yɔ́p pɔ ɡɑŋ-mɛfɑɑnɛ lɑ́, ntsu mbɑ wɛ́tɛ́ ŋumɛsɔŋ lɑ́, ɡʉ ńjʉ́ɔꞋnɛ, mbɑ wɔ̌ lɑ́ pɛn tʉ́ʉ mbi Sɛ́ ḿbɔ́ pɔ ŋu ẅí ɑ vunɛ ntsɑŋ.

²⁰Ɛ́ pɑ́Ꞌɑ mbíꞋŋɡɔ ŋu kɛ́ lɑ́Ꞌ ńdɔk pɑ́Ꞌ ɑ cúnɛ ŋɡɔ ɑ ɡɛ yúu mi nɛpʉ́ʉ sɛ́ mbíkŋɛ, tʉʉ mbi Sɛ́ ḿbɔ́ ndʉ́ŋndʉŋ pɔ́. FɑꞋ-nɛpʉ́ʉ zɛɛ ḿbɔ́ nɛnyɛt pʉɔmɛsɔŋ ŋɡɔ pɔ́p jí ŋɡɔ pɔ́p ɡɛ nu kɛpɔŋ.»

²¹Lɑ́ ɛ́ nǔu ŋkɔ̂ɔnɛ, mbɔ Sɛ́ kɛ́mɔ́ ńdɛꞋlɛ ntɛ́ yi ɑ ɛ́fú nǔu ńtsʉ́Ꞌ ńdíŋɛ ŋu ɑ pɔ́ pɔ ndʉ́ŋndʉŋ mbi yɛ́, ɛ́ kɛ́ mbɔɔ ntɛ́ yi ɛ́ fúnɛ nǔu nɛpʉ́ʉ pɔ́. ŊwɑꞋnɛ-nɛpʉ́ʉ-Mɔ̌sɛ̂ɛ tɛ mbɑ nɛ́ pɑncẅiŋkʉʉ-Sɛ́ kɑ cú nu ntɛ́ ẅîwɑ́ sɛ̂ndúŋ.

²²Pɔ pɑ́Ꞌ ŋu lɑɑ ńzɑ́p tʉ́m nǔu Yɛ́su Kɛlístɔ, mbɔ Sɛ́ ɡʉ tsʉ́Ꞌ ńdíŋɛ ŋɡɑŋ, ɑ pɔ́ mbi yɛ́ ḿbɔ́ pɔ ndʉ́ŋndʉŋ. Ɛ́ ndɑꞋ ndúŋ mbɔ̌ pʉɔ tsʉʉ. Pɔ́p mbi Sɛ́ tɛꞋ ḿbɔ́ pɔ tɑ́Ꞌ yúu,

²³mbíꞋŋɡɔ pɔ́p pɛtsʉʉ kɑ zɛɛ ŋ́ɡɛ mɛnu kɛpɔŋ tɛ sɑ́ɑ nɛɡúꞋ ẅi ɛ́ nɛjɔ́ŋ Sɛ́.

²⁴Lɑ́, pɑ́Ꞌ Yɛ́su Kɛlístɔ kɑ kɛ́mɔ́ ńtɔ́, ŋ́kíɛꞋ kʉ̈ɔ́Ꞌlɛ-nu kɛpɔŋ nǔu pʉɔ lɑ́, Sɛ́ tsʉ́Ꞌ fú nǔu ńdíŋɛ pʉɔ pɔ́p pɔ́ pʉɔ pinɛ pɔ́p ndʉ́ŋndʉŋ mbi yɛ́, ɛ́ pɔ́ yúu mi ɑ lɔknɛ ŋ́ɡɑ́ fuꞋ níinɛ yɔ́p.

²⁵Sɛ́ kɑ lɔk wɛ́ ńnɔŋ pɔꞋ pɑ́Ꞌ mɛci mɛ́ ɡʉ ɛ́suk mɛnu kɛpɔŋ-pʉɔ pinɛ pɔ́p zɑ́pnɛ tʉ́m nǔu jʉ́ Kɛlístɔ. Pɑ́Ꞌ ŋu kɑ ɡẅɛɛnɛ nɛpfú nǔu mɛnu kɛpɔŋ-pʉɔ lɑ́, ɛ́ lɔk ńnyɛt ŋɡɔ Sɛ́ ɡɛ mɛnu mɛ́ ndʉ́ŋndʉŋ. Ɛ́ kɑ pɔ́ yɛcɔ́ ŋkɑ́, pʉɔmɛsɔŋ pɔ́ ŋ́ɡɛ nu kɛpɔŋ, jʉ́ Sɛ́ ɡɛ pɔ pɑ́Ꞌ ŋkɑ́ yi ɑ kɑ́ pɔ́ ńjʉ́ɔ pɔ́ lɑ́.

²⁶A kɑ pɔ́ ŋkɑ́ ɛ̂yɑ́ ḿbɔ́ ɛ́sʉk sʉknɛ ńzẅíꞋlɛ, lɑ́ ɛ́ ŋkɔ̂ɔnɛ, Sɛ́ nyɛt ŋɡɔ ɑ ndʉ́ŋndʉŋ, ḿbɛn ńnyɛt ŋɡɔ ɑ líŋɛ ŋu ẅí ɑ zɑ́pnɛ tʉ́m yɛ́ nǔu Kɛlístɔ ɑ pɔ́ pɔ ndʉ́ŋndʉŋ mbi yɛ́.

²⁷Tɛ ɛ́ pɑ́Ꞌɑ yɛcɔ́ yúu mi mbɔ ŋumɛsɔŋ pɛn ńdɔk ŋ́ŋɑ́Ꞌtɛ pɔ́ ɡú? Ŋɡɑ́ŋ ɛ́ kɑ́ pɛn ḿbɔ́ ɡú pɔ́ kɑ́ɑ yɛcɔ́ yúu. Pɔ́Ꞌɔ, mɛlɑ́Ꞌ kʉ̈ɔ́? MbíꞋŋɡɔ yúu mi Sɛ́ zẅíꞋlɛ́nɛ, kɑ́ pɔ́ pɔ ŋu nɛcú ŋɡɔ ɑ ɡɛ yúu mi nɛpʉ́ʉ sɛ́ píkŋɛ pɔ́, ɛ́ pɔ́ pɔ ŋu nɛzɑ́p tʉ́m yɛ́ nǔu Yɛ́su.

²⁸Pɛk zɛɛ ḿbɔ́ ńjí yɛ́k ŋɡɔ: Sɛ́ ɡɔ́ ńdíŋɛ ŋu ɑ pɔ́ ndʉ́ŋndʉŋ mbi yɛ́, ntɛ́ pɔ nǔu pɑꞋ ɑ zɑ́pnɛ tʉ́m yɛ́ nǔu Yɛ́su, ɛ́ kɑ́ fú nǔu pɑ́Ꞌ ɑ ɡɛnɛ yúu mi nɛpʉ́ʉ píkŋɛ́nɛ pɔ́.

²⁹Ɛ́ pɛꞋnɛ ḿbɔ́ pɔ́Ꞌɔ, mbɔ Sɛ́ tsʉ́Ꞌ ḿbɔ́ pɔ wɛ pɑyúdɑ zɛ́nɛ pɔ́p, lɑ́ ɑ pɛn ḿbɔ́ Sɛ́-pʉɔ pinɛ pɔ́p kɑ́ pɔ́ pɑyúdɑ pɔ́.

³⁰MbíꞋŋɡɔ Sɛ́ pɔ́ pɔ wɛ́mɔ́Ꞌ. A líŋɛ pɑyúdɑ pi pɔ́p zɑ́pnɛ tʉ́m nǔu Yɛ́su, pɔ́p tsʉ́Ꞌ ḿbɔ́ mbi yɛ́ ḿbɔ́ pɔ ndʉ́ŋndʉŋ, jʉ́ pɛnnɛ ńdíŋɛ pʉɔ pinɛ pɔ́p kɑ́ pɔ́ pɑyúdɑ pɔ́, lɑ́ mbɔ pɔ́p zɑ́p tʉ́m nǔu Yɛ́su, pɔ́p tsʉ́Ꞌ ḿbɔ́ mbi yɛ́ ḿbɔ́ pɔ ndʉ́ŋndʉŋ.

³¹Ńjí ŋɡɔ ɛ́ pɑ́Ꞌɑ ḿbɔ́ yi pɛkŋɛ lɑɑ ńzɑ́p tʉ́m nǔu Yɛ́su, mbɔ nɛpʉ́ʉ kɑ́ pɛ́t yɛcɔ́ nu pɔ́ kɛkʉ̈ɔ́? Ŋɡɑ́ŋ ɛ́ kɑ́ lɔk ḿbɔ́ pɔ́Ꞌɔ pɔ́. Tɛ ńtsʉ́Ꞌ pɔ́Ꞌɔ, mbɔ pɛkŋɛ lɔk pɔ́Ꞌɔ, ńtík nɛpʉ́ʉ kwɑꞋ nǔu zʉꞋ yɛ́.