Read Ngomba Pʉɔ-Lɔ́mɑ 4 Bible Online

Pʉɔ-Lɔ́mɑ 4 - Ngomba bible

Pʉɔ-Lɔ́mɑ 4

¹Tɛ ɛ́ pɑ́Ꞌɑ pɛkŋɛ ɡʉ ńcú ŋɡɔ kʉ̈ɔ́, nǔu nu-Ábɛlɛhɑ̂m ẅi ɑ mɑ̂ɑŋɡɑpnjẅɛt wɛk pɑyúdɑ? A kɑ lɔk mɛtʉʉ-ŋumɛsɔŋ ŋ́ɡẅɛɛ kʉ̈ɔ́?

²Ɛ́ kɑ pɔ́ pɛ́Ꞌɛ Sɛ́ pɔ́ ńcú ŋɡɔ ɑ ndʉ́ŋndʉŋ mbi wɛ́, ɛ́fú pɔ nǔu mɛfɑꞋ sʉ́Ꞌnɛ mɛ́, mbɔ ɛ́ lɑ́ɑ ḿbɔ́ ɑ lɔk ŋ́ŋɑ́Ꞌtɛ, lɑ́ wɛcɔ́ nɛpɔ́ ẅi mbɔ ɑ lɔk ŋ́ŋɑ́Ꞌtɛ mbi Sɛ́ ɛ́ kɑ́ pɔ́ ɡú pɔ́.

³ŊwɑꞋnɛ-Sɛ́ zɛɛ ńcú ŋɡɔ kʉ̈ɔ́? Ɛ́ cú ŋɡɔ: «Ábɛlɛhɑ̂m kɑ zɑ́pnɛ tʉ́m yɛ́ nǔu Sɛ́, Sɛ́ fú nǔu ńtsʉ́Ꞌ ńdíŋɛ wɛ́, ɑ pɔ́ mbi yɛ́ ḿbɔ́ pɔ́ ndʉ́ŋndʉŋ».

⁴Pɛkŋɛ zɛɛ ḿbɔ́ ńjí ŋɡɔ, ŋu fɑꞋ fɑꞋ, tɛ pɛ́ ɡɑ́ ŋkɑ́p mbɔ̌ wɛ́ mbíꞋ yîyɑ́ fɑꞋ, yîyɑ́ ŋkɑ́p ɛ́ pɔɔ pɔ́ pɔ yɛcɔ́ yúu mi pɛ́ ɡɑ́nɛ mbɔ̌ wɛ́ pɔ níinɛ pɔ́, ɛ́ yi ɛ́ píkŋɛ́nɛ ŋɡɔ pɛ́ ɡɑ́ mbɔ̌ wɛ́.

⁵Lɑ́ ŋ́kɛ́ ŋ́ɡʉ nǔu ŋu ẅí ɑ kɑ́ lɔk pɔ mɛfɑꞋ mɛ́ pɔ́, ńzɑ́p pɔ ndɑꞋ tʉ́m yɛ́ nǔu Sɛ́ ẅí ɑ ɡɛnɛ ŋu kɛpɔŋ tsʉ́Ꞌ ŋu ẅi ɑ ndʉ́ŋndʉŋ mbi wɛ́, Sɛ́ lɔk pɔ́Ꞌɔ, ńtsʉ́Ꞌ ńdíŋɛ wɛ́ ɑ pɔ́ pɔ ndʉ́ŋndʉŋ mbi yɛ́.

⁶Ɛ́ pɛn ḿbɔ́ yúu mi fɔɔ Ndɑvît kɑ cúnɛ. A kɑ cú nu nǔu ŋu ẅí Sɛ́ tsʉ́Ꞌnɛ ńdíŋɛ wɛ́ ɑ pɔ́ mbi yɛ́ ḿbɔ́ pɔ ndʉ́ŋndʉŋ, ɛ́ kɛ́ mbɔɔ ɛ́fú nǔu mɛfɑꞋ-ŋɡɑŋ pɔ́, ẅîwɑ́ ŋu pɔ́ttú.

⁷Fɔɔ Ndɑvît kɑ cú ŋɡɔ: «Pɛpɔ́ttú pʉɔ pi Sɛ́ likŋɛ́nɛ mɛfɑɑnɛ mɔ́p ŋ́ɡwɛ́tnɛ mɛnu kɛpɔŋ mɔ́p.

⁸Pɔ́ttú ɑ ŋu ẅi Tsɑpʉɔ kɑ́ pɛ́t ŋ́kẅíitɛ mɛnu kɛpɔŋ mɛ́ pɔ́.

⁹Tɛ ɛ́ pɑ́Ꞌɑ wɔ nɛpɔ́ pɛpɔ́ttú, ɛ́ pɔ́ pɔ yɛ́ pʉɔ pi pɛ́ ŋ́kɑɑ púꞋ wɔ́p pɑ́Ꞌ pɔ́p ɡʉ ḿbɔ́ pʉɔ-Sɛ́ kɛ ɛ́ pɛn ḿbɔ́ mbɑ wɛ pʉɔ pi pɛ́ ŋkɑɑ wɔ́p púꞋ?» Pɛkŋɛ pɑ́Ꞌɑ ḿbɔ́ ńcú ŋɡɔ ɛ́ kɑ ɡʉ nǔu Ábɛlɛhɑ̂m, Sɛ́ lɔk pɑ́Ꞌ ɑ zɑ́pnɛ tʉ́m nǔu jʉ́ Sɛ́, ńtsʉ́Ꞌ ńdíŋɛ wɛ́ ɑ pɔ́ pɔ ndʉ́ŋndʉŋ mbi yɛ́.

¹⁰A kɑ ɡɛ pɔ́Ꞌɔ, nǔu wɛ́ ŋkɑ́ kʉ̈ɔ́? Ɛ́ kɑ ɡɔ́ ḿbɔ́, mbɔ pɛ́ púꞋ Ábɛlɛhɑ̂m kɛ pɛ́ kɑ pɛ́t kɛ́ púꞋ wɛ́? Ɛ́ ŋkɑɑ ɡɔ́ ḿbɔ́, mbɔ pɛ́ púꞋ wɛ́ pɔ́.

¹¹Pɛ́ kɑ ɡɔ́ ḿbúꞋ Ábɛlɛhɑ̂m, Sɛ́ pɔ́ ńdíŋɛ wɛ́ ɑ pɔ́ pɔ ndʉ́ŋndʉŋ mbi yɛ́, mbíꞋŋɡɔ ɑ kɑ pɔ́ ńzɑ́p tʉ́m yɛ́ nǔu Sɛ́. Pɛ́ kɑ ɡɛ tɛ ńcʉɔꞋ lii-ŋu ẅí pɛ́ púꞋnɛ wɛ́ nǔu wɛ́. Yîyɑ́ lii kɑ lɔk ńdɛꞋlɛ ŋɡɔ Sɛ́ fú nǔu pɑ́Ꞌ jʉ́ Ábɛlɛhɑ̂m zɑ́pnɛ tʉ́m nǔu wɛ́, ńdɔk wɛ́ ŋ́ɡɛ ŋu ẅí ɑ ndʉ́ŋndʉŋ mbi yɛ́. Ɛ́ fú pɔ́Ꞌɔ Ábɛlɛhɑ̂m tsʉ́Ꞌ tɑ́t pɛ́ pʉɔ tsʉʉ pi pɔ́p sɛ́ ńzɑ́p tʉ́m nǔu Sɛ́ tɛ mbɑ pɑ́Ꞌ pɛ́ ŋ́kɑɑ wɔ́p púꞋ, Sɛ́ tsʉ́Ꞌ ńdíŋɛ wɔ́p pɔ́p pɔ́ ndʉ́ŋndʉŋ mbi yɛ́.

¹²Ábɛlɛhɑ̂m kɑ pɛn ḿbɔ́ tɑ́t pɛ́ pʉɔ pi pɛ́ kɑ púꞋnɛ wɔ́p. Ŋ kɑ́ pɔ́ ńdɑꞋ pʉɔ pi pɛ́ kɑ púꞋnɛ wɔ́p ɛ́ kuꞋ pɔ́Ꞌɔ mbɔ̌ pɔ́p pɔ́. N cú pɔ pi pɔ́p pɛn ḿbɔ́ ńzɑ́p tʉ́m nǔu Sɛ́, pɑ́Ꞌ tɑ́t wɛkŋɛ Ábɛlɛhɑ̂m kɑ zɑ́pnɛ yɛ́ ɡúu lɑ pɛ́ ɡɛ ḿbúꞋ wɛ́.

¹³Yɛcɔ́ nu pɛn ḿbɔ́ ŋɡɔ Sɛ́ kɑ kɑꞋ mbɔ̌ Ábɛlɛhɑ̂m, mbɑ mbɔ̌ njẅɛt yɛ́ ŋɡɔ ɑ ɡʉ ńdɑ́Ꞌ ŋ́ɡɑ́ ŋɡɔŋ mbɔ̌ pɔ́p. Sɛ́ ŋ́kɑɑ ḿbɔ́ ŋ́kɑꞋ pɑ́Ꞌɑ, pɔ́ mbíꞋŋɡɔ Ábɛlɛhɑ̂m kɑ pɔ́ ŋ́ɡɛ yúu mi nɛpʉ́ʉ sɛ́ ḿbíkŋɛ pɔ́, ɛ́ kɑ fú pɔ nǔu pɑ́Ꞌ ɑ zɑ́pnɛ tʉ́m nǔu Sɛ́, Sɛ́ tsʉ́Ꞌ ńdíŋɛ wɛ́ ɑ pɔ́ pɔ ndʉ́ŋndʉŋ mbi yɛ́.

¹⁴Ɛ́ kɑ pɔ́ pɛ́Ꞌnɛ ḿbɔ́ yi pɛ́ ɡʉ ɛ́fú pɔ nǔu pɑ́Ꞌ pɛ́ ɡɛnɛ yúu mi nɛpʉ́ʉ sɛ́ ḿbíkŋɛ, lɑ ŋ́ɡẅɛɛ yúu mi Sɛ́ kɑ kɑꞋnɛ, mbɔ nɛzɑ́p tʉ́m nǔu Sɛ́ pɔ́ pɔ fɛ̌ɛ, yúu mi Sɛ́ kɑ kɑꞋnɛ pɛn ḿbɔɔ puutɛ.

¹⁵Nɛpʉ́ʉ zɛɛ ŋ́ɡɛ lɔ́ŋ-Sɛ́ zɑ́ŋ zɑ́ŋnɛ mbíꞋŋɡɔ pʉɔ kɑ́ pɔ́ ŋ́kúꞋlɛ pɔ́. Ɛ́ kɑ pɔ́ pɛ́Ꞌnɛ nɛpʉ́ʉ pɔɔ ɡú pɔ́, mbɔ pʉɔ kɑ́ fɑɑnɛ nɛpʉ́ʉ pɑ́Ꞌnɛ pɔ́.

¹⁶Ɛ́ yúu mi ɛ́ ɡɛnɛ, ŋu lɔk pɔ nɛzɑ́p tʉ́m nǔu Sɛ́ lɑ ŋ́ɡẅɛɛ yúu mi pɛ́ kɑ kɑ́Ꞌnɛ. Sɛ́ lɔk pɔ́Ꞌɔ, ŋ́ɡɑ́ pɔ fuꞋ níinɛ yɛ́, ɛ́ lɛɛ pɔ́Ꞌɔ, mbɑ wɔ̌ lɑ́ ẅi ɑ nǔu njẅɛt-Ábɛlɛhɑ̂m ɡẅɛɛ yɛ́ yúu. Tɛ ɛ́ pɔɔ pɔ́ ndɑꞋ pʉɔ pi pɔ́p nɑ́ŋnɛ ńzúꞋ yɔ́p pɔ mbɔ̌ nɛpʉ́ʉ pɔ́, ɛ́ pɛn ḿbɔ́ mbɑ pʉɔ pi pɔ́p zɑ́pnɛ yɔ́p pɔ tʉ́m nǔu Sɛ́ pɑ́Ꞌ Ábɛlɛhɑ̂m. A tɑ́t wɛkŋɛ pɛtsʉʉ pi pɛkŋɛ pʉɔ-Sɛ́.

¹⁷Ndʉ́ŋndʉŋ pɑ́Ꞌ ŋwɑꞋnɛ-Sɛ́ sɛ́ ńcú nǔu wɛ́ ŋɡɔ: «Mɔ, n zɑ́p wú pɑ́Ꞌ ɔ ɡʉ ḿbɔ́ mɑ̂ɑŋɡɑpnjẅɛt-pʉɔ-mɛlɑ́Ꞌ mɛlɑ́Ꞌ». Ábɛlɛhɑ̂m mbi Sɛ́ ẅi jʉ́ Ábɛlɛhɑ̂m kɑ zɑ́pnɛ tʉ́m nǔu wɛ́, ḿbɔ́ mɑ̂ɑŋɡɑpnjẅɛt wɛkŋɛ, ɑ pɔ́ Sɛ́ ẅi ɑ ɡɛnɛ pɛpfú pɛn ḿbɔ́ ɡú, ɛ́fúŋ yúu mi ɛ́ zɛɛ mbɔɔ ɡú pɔ́, ɛ́ cẅɛt ńtʉ́ʉ.

¹⁸Sɛ́ kɑ kɑꞋ yúu mbɔ̌ Ábɛlɛhɑ̂m, wɛcɔ́ nɛpɔ́ ẅi ɛ́ lɑɑ ḿbɔ́ ɑ kwɑŋɛ nɛɡẅɛɛ ɛ́ ŋkɑɑ pɔ́ ɡú pɔ́, lɑ́ ɑ kɛ ńzɑ́p tʉ́m yɛ́ nǔu Sɛ́ zɑ́pnɛ, ńnɑ́ŋ ḿbɔ́ ńzẅíꞋlɛ yîyɑ́ yúu, ŋ́ɡɛ ńtsʉ́Ꞌ tɑ́t pɛ mɛŋɡɔŋ tɛ ńzɑ́ɑ. Ɛ́ lɔk ḿbuutɛ nǔu nu yi Sɛ́ kɑ cúnɛ mbɔ̌ wɛ́ ŋɡɔ: «Jʉ́ɔ pɑ́Ꞌ njẅɛt yu ɡʉ ńdɑ́Ꞌ ńzɑ́ɑ pɔ́Ꞌɔ».

¹⁹Sɛ́ kɑ pɔ́ ńcú yɔ nu mbɔ̌ Ábɛlɛhɑ̂m ɛ́ tsʉ́Ꞌ pɔ mɔ́zʉꞋ ɑ ɡẅɛɛ ŋɡuꞋ ŋkʉ. Mbɔ mbʉʉ yɛ́ tɑŋ tɛꞋ. Nzwɛ́ wɛ Sɑ̌lɑɑ pɛn ńdɛn tɛ ḿbɔ́ yi ɛ́ kɑ lɑɑ ḿbɔ́ ɑ pɔɔ pɛn ḿbí pɔ́. Lɑ́ Ábɛlɛhɑ̂m kɛ́ mbɔɔ kɑ́ɑ nɛzɑ́p tʉ́m nǔu nu yi Sɛ́ cúnɛ pɔ́.

²⁰A ŋkɑɑ mʉꞋlɛ nǔu nu yi Sɛ́ kɑꞋnɛ mbɔ̌ wɛ́ pɔ́. Tɛ ńtsʉ́Ꞌ pɔ́Ꞌɔ, mbɔ nɛzɑ́p tʉ́m nǔu Sɛ́ kɑ ɡɛ ɑ tɛntɛ, ńnɑ́ŋ ḿbɔ́ ŋ́ɡúꞋlɛ Sɛ́,

²¹ḿbɔ́ ńtsuŋ ńjí ŋɡɔ Sɛ́ ɡẅɛɛ mɛtʉʉ nɛlɔk ŋ́ɡɛ yúu mi jʉ́ Sɛ́ kɑꞋnɛ ɛ́ puutɛ.

²²Ɛ́ yúu mi ɛ́ kɑ ɡɛnɛ Sɛ́ líŋɛ Ábɛlɛhɑ̂m ɑ pɔ́ ndʉ́ŋndʉŋ mbi yɛ́.

²³Lɑ́ pɛ́ kɑ́ pɔ́ ɛ́sɑ́ŋ pɔ ndɑꞋ wɛ́ zɛ́nɛ jʉ́ lɑ ŋ́ŋwɑꞋnɛ ŋɡɔ: «Sɛ́ ŋkɑɑ líŋɛ wɛ́, ɑ pɔ́ ndʉ́ŋndʉŋ mbi yɛ́ pɔ́».

²⁴Pɛ́ kɑ pɔ́ ɛ́sɑ́ŋ mbɑ wɛkŋɛ ɡúu, pi Sɛ́ kɑ pɔ́ ŋ́ɡʉ ŋ́ɡɛ ńdíŋɛ wɛkŋɛ, pɛkŋɛ pɔ́ ndʉ́ŋndʉŋ mbi yɛ́, pɛkŋɛ pi pɛkŋɛ zɑ́pnɛ tʉ́m nǔu jʉ́ Sɛ́ ẅí ɑ kɑ ɡɛnɛ Ndɛ wɛkŋɛ Yɛ́su Kɛlístɔ fú lɑ́Ꞌ-pɛpfú ńzẅíimɛ.

²⁵Jʉ́ kɑ níꞋnɛ Kɛlístɔ mbɔ̌ pʉɔ pɑ́Ꞌ ɑ ɡʉ ḿpfú mbíꞋ mɛnu kɛpɔŋ mɛkŋɛ. A kɑ pɛn ńzẅíimɛ wɛ́ nǔu nɛvú ɛ́fú nǔu ńtsʉ́Ꞌ ńdíŋɛ wɛkŋɛ pɛkŋɛ pɔ́ ndʉ́ŋndʉŋ mbi yɛ́.