Read Ngomba Pʉɔ-Lɔ́mɑ 6 Bible Online

Pʉɔ-Lɔ́mɑ 6 - Ngomba bible

Pʉɔ-Lɔ́mɑ 6

¹Tɛ ɛ́ pɑ́Ꞌɑ pɛkŋɛ ŋ́ɡɛ ŋɡɔ́ku? Pɛkŋɛ kɛ́ ŋ́kẅiꞋ ŋ́ɡɛ pɔ nu kɛpɔŋ nɛpɔ́ yi Sɛ́ ɡʉ ńdɔk nɛlikŋɛ mɛfɑɑnɛ mɛkŋɛ, pɛ́ tsuŋ ńjʉ́ɔ pɑ́Ꞌ ɑ sɛ́ ŋ́ɡɑ́ fuꞋ níinɛ-pʉɔ kíi?

²Ŋɡɑ́ŋ! Mbɔ pɛkŋɛ pɔɔ pɔ́Ꞌɔ ɡɛ. Pɑ́Ꞌ ɛ́ zɛɛ ḿbɔ́ nǔu nɛɡɛ nu kɛpɔŋ, mbɔ pɛkŋɛ kɑ pfú mɔ́ lɑ́, mbɔ pɛkŋɛ ŋ́ɡɛ pɑ́Ꞌɑ lɑ ḿbɛn ḿbɔ́ ŋ́ɡɛ pɔ nu kɛpɔŋ?

³Pʉʉ likŋɛ ŋɡɔ ɛ́ ɡʉ nǔu pɛkŋɛ pɛtsʉʉ pi pɛ́ kɑ nuꞋnɛ wɛkŋɛ ŋki, pɛkŋɛ lɔk ńdɑt mbʉʉ yɛkŋɛ nǔu Yɛ́su Kɛlístɔ, nɛnuꞋ wɛkŋɛ ŋki ɛ̂wɑ́ lɔk ńdɛꞋlɛ ŋɡɔ pɛkŋɛ pɛpɔ́p kɑ tɛmtɛ ḿpfú tɑ́Ꞌ nɛvú kíi?

⁴Pɑ́Ꞌ ɛ́ kɑ fúnɛ nǔu cẅɛ́ɛ ŋki, pɛkŋɛ pɛpɔ́p tɛmtɛ ḿpfú, pɛ́ pɛn ńtɛmtɛ wɛkŋɛ pɛpɔ́p ńtẅíi lɑ́, nɛpɔ́ yi pɑ́Ꞌ Sɛ́ Tɑ̌ɑ kɑ lɔknɛ mɛtʉʉ mi ɛ́ ɡẅɛɛnɛ nɛɡúꞋ, ŋ́ɡɛ Kɛlístɔ zẅíimɛ nǔu nɛvú lɑ́, pɛkŋɛ ɡúu ɡʉ tsʉ́Ꞌ ḿbɔ́ pɔ tsɛt luk fí.

⁵Ɛ́ zɛɛ ḿbɔ́ pɑ́Ꞌɑ, mbɔ pɛkŋɛ kɑ pfú nɛvú ẅí ɛ́ fí wɛ, ńdɔk pɔ́Ꞌɔ, pɛkŋɛ pɛpɔ́p puutɛ nǔu tɑ́Ꞌ nu ɛ́ pɛn ḿbɔ́ pɔ pɑ́Ꞌ pɛkŋɛ pɛpɔ́p ɡʉ ŋ́ɡɛ ḿbɛn ḿbuutɛ nǔu nɛzẅíimɛ nǔu nɛvú.

⁶Kɔɔ pɛkŋɛ likŋɛ ŋɡɔ: Pɛ́ kɑ tɛmtɛ Kɛlístɔ nɛ ndɛn ŋu ẅí ɑ kɑ pɔ́ nǔu pɛkŋɛ ŋ́kẅii nǔu tʉ́ mbɑ́ŋtɛ pɑ́ŋtɛ́nɛ, nɛpɔ́ yi mɛtʉʉ yúu mi ɛ́ kɑ pɔ́ nǔu pɛkŋɛ, ńtsʉ́ʉnɛ wɛkŋɛ pɛkŋɛ ɡɛ nu kɛpɔŋ, ɛ́ ɡʉ ḿmɛ pɛkŋɛ pɔɔ pɛn ḿbɔ́ pɛkwɑɑ-nu kɛpɔŋ pɔ́.

⁷Ŋu zɛɛ ḿbɔ́ tɛ ḿpfú, ɑ pɔɔ pɛn ŋ́kuꞋ nɛɡɛ yɛcɔ́ yúu pɔ́, ŋkʉ-nu kɛpɔŋ fú nǔu wɛ́ ŋ́kíɛꞋnɛ.

⁸Pɑ́Ꞌ pɛkŋɛ pɛ Kɛlístɔ kɑ tɛmtɛ́nɛ ḿpfú lɑ́, ɛ́ lɔk ḿbɔ́ ŋɡɔ pɛkŋɛ pɛpɔ́p ɡʉ ŋ́ɡɛ ńtɛmtɛ ḿbɔ́ ɡú.

⁹Pɛk tsuŋ ḿbɔ́ ńjí ŋɡɔ Kɛlístɔ kɑ piitɛ tɛ ńzẅíimɛ nǔu nɛvú, ɑ kɛ́ lɑ́Ꞌ ḿbɛn ḿpfú pɔ́. Nɛvú kɑ́ pɛn ŋ́ɡẅɛɛ yɛcɔ́ nu nǔu wɛ́ pɔ́.

¹⁰Kɛlístɔ kɑ pfú, ḿpfú pɔ tɑ́Ꞌ ŋkɑ́, nǔu mɛnu kɛpɔŋ-pʉɔ. A ŋkɔ̂ɔnɛ ḿbɔ́ ɡú pɔ nɛɡɑ́ mɛkuꞋ-Sɛ́.

¹¹Mbɑ pʉʉ yʉ́ʉ, pʉʉ[1] líŋɛ túmbʉʉ yʉ́ʉ pɑ́Ꞌ pʉɔ pi pɔ́p nǔu nu kɛpɔŋ, ńtsʉ́Ꞌ pɔ pɛpfú. Pʉʉ tsʉ́Ꞌ ḿbɔ́ pɔ pʉɔ pi pɔ́p lɔk pɑ́Ꞌ pɔ́p lɑtnɛ mbʉʉ nǔu Kɛlístɔ, ńtsʉ́Ꞌ ŋ́ɡẅɛɛ pɔ ntɛ́ yɛ́ fí pɑ́Ꞌ pɔ́p ɡʉ ɛ́fɑꞋ fɑꞋ-Sɛ́.

¹²Pɔ́Ꞌɔ lɑ́, ɛ́ kɑ́ pɔ́ ḿbíkŋɛ ŋɡɔ nu kɛpɔŋ pɛn ɛ́sɑ́Ꞌ mbʉʉ yʉʉ yi ɛ́ ɡʉ ŋ́ɡɛ ḿpfú pɔ́, pʉʉ pɑ́ɑ nɛpɛn ńnɑ́ mbʉʉ yʉʉ ɛ́ tsʉ́ʉnɛ wʉ́ʉ ńníꞋ tsɛt kɛɡʉ̈ɔꞋ.

¹³Kɔɔ pʉʉ pɛn ńdɔk mɛkɛm-mbʉʉ mʉ́ʉ ŋ́ɡɛ nu kɛpɔŋ pɑ́Ꞌ pɛ́ lɔknɛ yúu-ntsɔ ŋ́ɡɛ mɛnu kɛpɔŋ lɑ́. Tɛ ńtsʉ́Ꞌ pɔ́Ꞌɔ, pʉʉ nɑ́ mbʉʉ yʉʉ mbɔ̌ Sɛ́ ḿbɔ́ kwɑꞋ pʉɔ pi pɔ́p kɑ pfúnɛ ḿbɛn ńzẅíimɛ. Pʉʉ lɔk mɛkɛm-mbʉʉ mʉ́ʉ ŋ́ɡɛ yúu mi pʉʉ ɡʉ ńdɔk ŋ́ɡɛ yúu mi ɛ́ ndʉ́ŋndʉŋ.

¹⁴Nu kɛpɔŋ zɛɛ ḿbɔɔ ńdɑ́Ꞌ ŋ́ɡʉ ḿbɛn ŋ́ɡẅɛɛ wʉ́ʉ pɔ́, mbíꞋŋɡɔ pʉʉ kɑ́ pɛ́t ńnɛn nǔu sɛ̂ndúŋ nɛpʉ́ʉ pɔ́, pʉʉ ńtsʉ́Ꞌ ńnɛn pɔ nǔu sɛ̂ndúŋ ẅi Sɛ́ sɛ́ ńdɛɛ nǔu ŋ́ɡɑ́ fuꞋ níinɛ yʉ́ʉ, pʉʉ pɔ́ ŋ́ɡɛ yúu mi ɛ́ ndʉ́ŋndʉŋ.

¹⁵Pɔ́Ꞌɔ, ńdɔk ńcú ŋɡɔ kʉ̈ɔ́? Pɛ́ lɔk ńcú ŋɡɔ pɛkŋɛ ɡɛ mɛnu kɛpɔŋ, mbíꞋŋɡɔ pɛkŋɛ kɑ́ pɛ́t ńnɛn nǔu sɛ̂ndúŋ-nɛpʉ́ʉ pɔ́, ńtsʉ́Ꞌ ńnɛn pɔ nǔu ẅi Sɛ́ ńdɛɛ nǔu ŋ́ɡɑ́ fuꞋ níinɛ yɛkŋɛ, ńdɔk wɛkŋɛ ŋ́ɡɛ pʉɔ pɛ́ kɛkʉ̈ɔ́? Ŋɡɑ́ŋ ḿbɔ́ pɛkŋɛ pɔɔ pɔ́Ꞌɔ ɡɛ.

¹⁶Kɔɔ pʉʉ kɛ́ ńdikŋɛ ŋɡɔ ŋu lɑɑ ḿbɛ́m ŋkwɑɑ-ŋu pɑ́Ꞌ ɑ ɡʉ ḿbɔ́ ńzúꞋ ntsu-ŋɡɑŋ, mbɔ ɑ tsʉ́Ꞌ ŋkwɑɑ-ŋɡɑŋ. Ɛ́ lɔk ḿbɔ́ ŋɡɔ pʉʉ lɑɑ ḿbɔ́ ńzúꞋ ntsu-nu kɛpɔŋ, mbɔ pʉʉ tsʉ́Ꞌ ŋkwɑɑ-nu kɛpɔŋ, ɛ́ ɡɛ pʉʉ pfú, ŋ́kɛ́ ḿbɔ́ yi pʉʉ lɑɑ ḿbɔ́ ńzúꞋ ntsu-Sɛ́, mbɔ pʉʉ ɡʉ ńtsʉ́Ꞌ ŋkwɑɑ-Sɛ́, ɑ ɡɛ pʉʉ ɡɛ yúu mi ɛ́ ndʉ́ŋndʉŋ mbi yɛ́.

¹⁷Pɛkŋɛ kɛ́ ŋ́ɡɑ́ pɑ́Ꞌlɑ́ mbɔ̌ Sɛ́, mbíꞋŋɡɔ pʉʉ kɑ pɔ́ yɛcɔ́ ŋkɑ́ ḿbɔ́ ŋkwɑɑ-nu kɛpɔŋ, pʉʉ ŋkɔ̂ɔnɛ, mbɔ pʉʉ lɔk tʉ́m yʉ́ʉ tsʉʉ, ḿbɛ́m yúu mi pɛ́ kɑ zíꞋnɛ wʉ́ʉ. Ɛ́ pɔ́ yi ɛ́ sɛ́ ḿbíkŋɛ ŋɡɔ pʉʉ piitɛ ńjí,

¹⁸mbíꞋŋɡɔ Sɛ́ ŋ́kíɛꞋ ŋkʉ-nu kɛpɔŋ nǔu pʉʉ, pʉʉ ŋkɔ̂ɔnɛ ńtsʉ́Ꞌ pɛkwɑɑ-nu yi ɛ́ ndʉ́ŋndʉŋ.

¹⁹N dɑɑ ḿbɔ́ yi m bɛ́ɛ fʉꞋ nǔu mɛnu mi ɛ́ sɛ́ ńdɛɛtɛ tsɛtsɛt pʉɔmɛsɔŋ, mbɔ mɔ, n dɔk ńdɔɔ nɛɡɛ pʉʉ tsuŋ ńzúꞋ, mbíꞋŋɡɔ ŋumɛsɔŋ pɔ́t pɔ́tnɛ. Pʉʉ kɑ lɔk mɛkɛm-mbʉʉ mʉ́ʉ ŋ́ɡɛ pɛkwɑɑ-mɛnu-ntsɛ́lɛ́ pɔ́p yɛ́ mɛnu lɔk ńtɑ́k zʉꞋ. Mîmɑ́ mɛnu pɔ́ mi ɛ́ ɡɛnɛ pɛ́ tʉʉ tú mbɔ̌ Sɛ́ tʉʉnɛ. Ndʉ́ŋndʉŋ pɔ́Ꞌɔ, pʉʉ pɔ́ ŋkɔ̂ɔnɛ ńtsʉ́Ꞌ ńdɔk mɛkɛm-mbʉʉ mʉ́ʉ ɛ̂mɑ́ ŋ́ɡɛ pɔ ŋkwɑɑ ẅi ɑ fɑꞋnɛ mbɔ̌ yúu mi ɛ́ ndʉ́ŋndʉŋ mbi Sɛ́, ɛ́ kɛ ɛ́fú pɔ́Ꞌɔ, nɛnɑ́ŋ wʉʉ pɔ́ wɛ Sɛ́.

²⁰Ɛ́ kɑ pɔ́ ŋkɑ́ yi pʉʉ kɑ pɛ́tnɛ pɛkwɑɑ-nu kɛpɔŋ, nɛɡɛ yúu mi ɛ́ ndʉ́ŋndʉŋ mbi Sɛ́ pɔɔ yɛcɔ́ nu nǔu pʉʉ ɡẅɛɛ.

²¹Pʉʉ kɑ jʉ́ pii kʉ̈ɔ́ nǔu yîyɑ́ ntɛ́ mɛfɑꞋ? Pʉʉ ŋkɔ̂ɔnɛ ńtsʉ́Ꞌ ŋ́kwɑŋɛ mîmɑ́ mɛfɑꞋ sʉ́ʉ kɔ́ wʉ́ʉ nǔu kɔ́nɛ, mbíꞋŋɡɔ ɛ́ ɡɔ́ ḿmɛ ŋ́ɡɑ́ pɔ nɛvú.

²²Lɑ́ pɑ́Ꞌ ɛ́ kɛ́ ḿbɛn ḿbɔ́ ŋkɔ̂ɔnɛ, mbɔ Sɛ́ kíɛꞋ ŋkʉ-nu kɛpɔŋ nǔu pʉʉ, pʉʉ tsʉ́Ꞌ pɛkwɑɑ pɛ́ lɑ́, pii yi ɛ́ sɛ́ ńcẅɛt ɛ́ pɑ́Ꞌ Sɛ́ sɛ́ ńcẅɛ́lɛ wʉ́ʉ pʉʉ pɔ́ ŋ́ɡẅɛɛ tsẅɛ́-pʉɔ pɛ́, ɛ́ ɡʉ ŋ́ɡɛ ńtsʉ́Ꞌ nɛmɛkŋɛ pʉʉ ɡẅɛɛ luk kɛ́mɛ,

²³mbíꞋŋɡɔ yúu mi nu kɛpɔŋ lɔknɛ ńtsɔ́ꞋfɑꞋ ntɛ́ fɑꞋ-ŋu, ɛ́ pɔ́ pɔ ŋɡɑŋ nɛpfú, lɑ́ fuꞋ yi Sɛ́ ɡɑ́nɛ mbɔ̌ ŋu pɔ níinɛ, ɛ́ pɔ́ pɑ́Ꞌ ŋɡɑŋ lɑtnɛ mbʉʉ yɛ nǔu Tsɑpʉɔ Yɛ́su Kɛlístɔ, ŋ́ɡẅɛɛ luk kɛ́mɛ.