Read Ngomba Pʉɔ-Lɔ́mɑ 8 Bible Online

Pʉɔ-Lɔ́mɑ 8 - Ngomba bible

Pʉɔ-Lɔ́mɑ 8

¹Ɛ́ lɔk ḿbɔ́ ŋɡɔ pʉɔ pi pɔ́p lɑtnɛ mbʉʉ yɔp nǔu Yɛ́su Kɛlístɔ, kɛ́ ɡʉ ńdɑ́Ꞌ ḿbɛn ḿvu ntsɑŋ pɔ́,

²mbíꞋŋɡɔ ŋu zɛɛ ḿbɔ́ tɛ ńdɑt mbʉʉ yɛ nǔu Yɛ́su Kɛlístɔ nɛpʉ́ʉ ni ɛ́ tsʉ́Ꞌnɛ ɛ́sɑ́Ꞌ wɛ́ pɔ́ pɔ yɛ Zẅikŋɛ Lɛ́ɛnɛ́nɛ yi ɛ́ ŋ́ɡɛ pɛ́ pɔ́ ɡú. Mîmɑ́ mbʉ́ʉ kɑ cẅɛ́ɛ wɑ́ɑ mbɔ̌ nɛpʉ́ʉ ni ɛ́ jínɛ nu kɛpɔŋ, ḿbɔ́ mi ɛ́ ɡɛnɛ pɛ́ pfú.

³Nɛpʉ́ʉ-Mɔ̌sɛ̂ɛ ŋ́kɑɑ kuꞋ nɛɡɛ yîyɑ́ yúu pɔ́, mbíꞋŋɡɔ ŋumɛsɔŋ kɑ lɔk pɑ́Ꞌ ɑ zɑŋɛ zɑŋɛ́nɛ ńtɑɑtɛ. Lɑ́ Sɛ́ kɑ kɛ́ ŋ́ɡɛ yîyɑ́ yúu, ńtsʉ́Ꞌ nɛɡɛ, ńtúu kwɑꞋ Mɔ́ɔ nɛ ɑ shɔtnɛ ńtsʉ́Ꞌ ŋumɛsɔŋ, ḿbɔ́ ŋumɛsɔŋ ẅi ɑ ŋɡɑŋmɛfɑɑnɛ nǔu pɑ́Ꞌ ɑ ɡʉ ńcẅɛɛtɛ wɛ́ tsɛt nu kɛpɔŋ. Sɛ́ kɑ lɔk pɔ́Ꞌɔ, ńjẅí mɛtʉʉ-nu kɛpɔŋ yi ɛ́ sɑ́Ꞌnɛ pʉɔmɛsɔŋ.

⁴A kɑ ɡɛ pɔ́Ꞌɔ, nɛpɔ́ yi pɛkŋɛ ɡʉ ŋ́kuꞋ nɛnɑ́ŋ nǔu ntɛ́ yi nɛpʉ́ʉ sɛ́ ḿbíkŋɛ, n dɑꞋ pɛkŋɛ pi pɛkŋɛ kɑ́ pɛ́t ńnɛn pɑ́Ꞌ mbʉʉ yɛkŋɛ tsʉ́ʉnɛ wɛkŋɛ pɔ́, pɛkŋɛ tsʉ́Ꞌ ńnɛn pɔ pɑ́Ꞌ Zẅikŋɛ Lɛ́ɛnɛ́nɛ sɛ́ ɛ́sẅíi wɛkŋɛ.

⁵Pʉɔ pi pɔ́p zɛɛ ńnɑ́ŋ pɔ nǔu ntɛ́ yi mbʉʉ yɔp sɛ́ ɛ́sẅíi wɔ́p, ńtík tʉ́m yɔ́p pɔ nǔu yúu mi mbʉʉ yɔp sɛ́ ŋ́kɔŋ, lɑ́ pʉɔ pi pɔ́p nɑ́ŋnɛ nǔu ntɛ́ yi Zẅikŋɛ Lɛ́ɛnɛ́nɛ sɛ́ ɛ́sẅíi wɔ́p, tík tʉ́m yɔ́p pɔ nǔu yúu mi Zẅikŋɛ Lɛ́ɛnɛ́nɛ sɛ́ ŋ́kɔŋ.

⁶Ŋu lɔk pɔ ntɛ́ yi mbʉʉ yɛ́ sɛ́ ɛ́sẅíi wɛ́ ńdɔk ńnɑ́ŋ, mbɔ ŋɡɑŋ nǔu sɛ̂ndúŋ-nɛvú. Lɑ́ ŋu ẅi ɑ lɔknɛ ntɛ́ yi Zẅikŋɛ Lɛ́ɛnɛ́nɛ sɛ́ ɛ́sẅíi wɛ́ ńdɔk ńnɑ́ŋ, mbɔ ŋɡɑŋ nǔu sɛ̂ndúŋ-luk, ɛ́ pɛn ḿbɔ́ sɛ̂ndúŋ-mbɔ́tnɛ.

⁷Pɛcɔ́ pʉɔ nǔu sɛ̂ndúŋ-nɛvú mbíꞋŋɡɔ pʉɔ pi pɔ́p nɑ́ŋnɛ ńtík tʉ́m yɔ́p pɔ nǔu yúu mi mbʉʉ yɔp sɛ́ ɛ́sẅíi wɔ́p, pɛɡɑŋmbuu-Sɛ́. Pɔ́p kɑ́ kúꞋlɛ nɛpʉ́ʉ-Sɛ́ pɔ́, wɛcɔ́ shʉ́ nɛzɛɛ ŋ́kúꞋlɛ kɑ́ pɔ́ mbɔ̌ pɔ́p pɔ́.

⁸Mbɔ pʉɔ pi mbʉʉ yɔp sɑ́Ꞌnɛ wɔ́p zɛɛ mbɔɔ kuꞋ nɛɡɛ yúu mi ɛ́ pɔŋnɛ Sɛ́ pɔ́.

⁹Lɑ́ ɛ́ kɛ́ ŋ́ɡʉ nǔu pʉʉ, mbɔ pʉʉ kɛ́ ńnɑ́ŋ nǔu ntɛ́ yi mbʉʉ yʉʉ sẅíinɛ wʉ́ʉ pɔ́, pʉʉ nɑ́ŋ pɔ nǔu ntɛ́ yi Zẅikŋɛ-Sɛ́ sɛ́ ɛ́sẅíi wʉ́ʉ, ŋkɔ̂ɔnɛ yi Zẅikŋɛ-Sɛ́ nǔu pʉʉ. Zẅikŋɛ-Kɛlístɔ lɑɑ mbɔɔ nǔu ŋu pɔ́, mbɔ ŋɡɑŋ kɑ́ pɔ́ ŋu-Kɛlístɔ pɔ́.

¹⁰Lɑ́ Kɛlístɔ lɑɑ ŋ́kɛ́ ḿbɔ́ nǔu pʉʉ, mbɔ Zẅikŋɛ yɛ́ ɡʉ ŋ́ɡɛ pʉʉ pɔ́ ɡú. Ɛ́ mbíꞋŋɡɔ Sɛ́ ɡɛ pʉʉ pɔ́ pʉɔ pi ɑ tsʉ́Ꞌ ńdíŋɛ wɔ́p pɔ́p pɔ́ pɔ ndʉ́ŋndʉŋ mbi yɛ́. Pʉʉ ɡʉ ńdɑ́Ꞌ ḿbɔ́ ɡú, tɛ mbɑ pɑ́Ꞌ mbɑp-mbʉʉ yʉʉ ɡʉ ńdɑ́Ꞌ ḿpfú pfúnɛ mbíꞋ mɛnu kɛpɔŋ.

¹¹Ɛ́ lɑɑ ḿbɔ́ yi Zẅikŋɛ-Sɛ́ ẅí ɑ kɑ zẅíimɛ́nɛ Yɛ́su nǔu nɛvú nǔu pʉʉ, mbɔ jʉ́ ẅi ɑ kɑ zẅíimɛ́nɛ Kɛlístɔ nǔu nɛvú, ɡʉ ŋ́ɡɛ mbʉʉ yʉʉ yi ɛ́ yi pfúnɛ ńdɔk Zẅikŋɛ yɛ́ yi ɛ́ nǔu pʉʉ ḿbɔ́ yɛ́ ɡú.

¹²Pɔ́Ꞌɔ lɑ́, mbɑ̌ɑ pɔ́ɔpɛ́mɑ́ pɑ́ɑ, ɛ́ ɡʉ nǔu Zẅikŋɛ-Sɛ́, mbɔ nzɔ́ tú pɛkŋɛ, tɛ mbɔ pɛkŋɛ pɔɔ ńnɑ́ŋ pɔ pɑ́Ꞌ mbʉʉ yɛkŋɛ sɛ́ ɛ́sẅíi wɛkŋɛ pɔ́.

¹³Pʉʉ lɑɑ ńnɑ́ŋ nǔu ntɛ́ yi mbʉʉ yʉʉ sɛ́ ɛ́sẅíi wʉ́ʉ, mbɔ pʉʉ ɡʉ ḿpfútɛ, lɑ́ ŋ́kɛ́ ḿbɔ́ yi pʉʉ lɑɑ ńdɔk mɛtʉʉ-Zẅikŋɛ-Sɛ́ ḿbík mɑt kɛpɔŋ ẅi ɛ́ fúnɛ nǔu mbʉʉ, mbɔ pʉʉ ɡʉ ḿbɔ́ ɡú.

¹⁴MbíꞋŋɡɔ pʉɔ pi Zẅikŋɛ-Sɛ́ tsiinɛ́nɛ wɔ́p pɔ́ɔ-Sɛ́.

¹⁵Zẅikŋɛ yi pɛ́ kɑ níꞋnɛ nǔu pʉʉ, zɛɛ mbɔɔ Zẅikŋɛ yi ɛ́ ɡʉ ŋ́ɡɛ pʉʉ pɛn ḿbɔ́ pɔ pɛkwɑɑ pi pɔ́p ŋ́ɡɛ ḿbɔ́ ńcʉ̈ɔꞋ cʉɔꞋnɛ pɔ́. Ɛ́ pɔ́ pɔ Zẅikŋɛ yi ɛ́ ŋ́ɡɛ ŋ́ɡɛ pʉʉ tsʉ́Ꞌ pɔ́ɔ-Sɛ́. Pɛkŋɛ pɛn ńdúꞋnɛ yîyɑ́ Zẅikŋɛ, ɛ́fúŋ wɛ́ ŋɡɔ Ábɑ; ɛ́ pɔ́ ŋɡɔ Tɑ̌ɑ.

¹⁶KwɑꞋ jʉ́ Zẅikŋɛ ɛ̂yɑ́ pɔ́ ŋ́ɡɛ pɛkŋɛ tsuŋ ńjí tsɛt tʉ́m pɛkŋɛ ŋɡɔ pɛkŋɛ pɔ́ɔ-Sɛ́.

¹⁷Pɑ́Ꞌ pɛkŋɛ pɔ́ɔ-Sɛ́ lɑ́, pɛkŋɛ ɡʉ ńdɑ́Ꞌ ŋ́ɡẅɛɛ yɛkŋɛ yúu nǔu fuꞋ yi Sɛ́ kɑ kɑꞋnɛ mbɔ̌ pʉɔ pɛ́, ńdɔk ŋ́ɡẅɛɛ yɛkŋɛ yúu nǔu yúu-Sɛ́, pɛkŋɛ pɛ Kɛlístɔ lɔk ńtɛmtɛ ŋ́ɡẅɛɛ. Pɑ́Ꞌ[2] pɛkŋɛ sɛ́ ḿbɛ́m nɛjʉ́ɔ ŋɡʉ̈ɔ́Ꞌ pɑ́Ꞌ ɑ kɑ pɛ́mnɛ yɛ́ lɑ́, pɛkŋɛ pɛpɔ́p ɡʉ ŋ́ɡɛ ḿbɛn tɛmtɛ ḿbɔ́ tsɛt nɛɡúꞋ wɛ.

¹⁸N zɛɛ ḿbɔ́ ŋ́kwɑŋɛ ŋɡɔ, ŋɡʉ̈ɔ́Ꞌ yi pɛkŋɛ ŋkɔ̂ɔnɛ ḿbɔ́ ńjʉ́ɔ kɑ́ síi ŋ́kuꞋ yɛcɔ́ yúu nǔu nɛɡúꞋ ẅi Sɛ́ ɡʉ ŋ́ɡɛ ŋ́ɡɛ pɛkŋɛ jʉ́ɔ pɔ́.

¹⁹Kʉ̈ɔ́ lɑ́ yi Sɛ́ kɑ niitɛ́nɛ zɛɛ ḿbɔ́ ńzẅíꞋlɛ tɛꞋ nɛjʉ́ɔ ŋkɑ́ yi Sɛ́ ɡʉ ŋ́ɡɛ pɛ́ jʉ́ɔ nɛɡúꞋ pʉɔ-pɛ́.

²⁰Kʉ̈ɔ́ lɑ́ yi Sɛ́ kɑ niitɛ́nɛ kɑ vu mɔ́ nǔu mbɔ́-mɛtʉʉ mi ɛ́ lɔknɛ wɔ́p ŋ́ɡɛ yúu kɛ́ ńdɛɛtɛ pɔ́Ꞌɔ ŋ́kɛ́ ḿbɔɔ kɔŋ kɔŋnɛ lɑ ḿbɔ́ yúu kɛ́ ńdɛɛtɛ pɔ́, Sɛ́ pɛ́mnɛ pɔ́p tsʉ́Ꞌ pɔ́Ꞌɔ, mbíꞋŋɡɔ ɑ kɑ kɔŋ ŋɡɔ pɔ́p nɑ́ŋ ḿbɔ́ ńzẅíꞋlɛ yúu pɔ́.

²¹Ɛ́ pɔ́ ŋɡɔ yɛcɔ́ lɛ́Ꞌ ɡʉ ńdɑ́Ꞌ ŋ́kuꞋ, ɑ fú ndɑ́-kwɑɑ ńcẅɛɛtɛ mbɑ kʉ̈ɔ́ lɑ́ yi ɑ kɑ niitɛ́nɛ, yɛcɔ́ yúu pɔɔ pɛn ńdyɔ́ nǔu pɔ́, mbɑ kʉ̈ɔ́ lɑ́ pɔ́ zʉꞋ yi pʉɔ-Sɛ́ zúꞋu tsɛt nɛɡúꞋ, yɛcɔ́ yúu lɔɔ ḿpfú zúꞋu pɔ́, yɛcɔ́ kɛ́ mbɔɔ lyɔ́.

²²Pɛkŋɛ zɛɛ ḿbɔ́ ńjí ŋɡɔ kʉ̈ɔ́ lɑ́ yi Sɛ́ kɑ niitɛ́nɛ, tɛ ŋ́kúu ŋkɔ̂ɔnɛ ɛ́ sɛ́ ńtsẅii, ńjʉ́ɔ ŋɡʉ̈ɔ́Ꞌ pɑ́Ꞌ mɑŋɡɛ́ ẅi ɑ ɡʉ ḿbɔ́ ḿbí lɑ́.

²³Yúu ɛ̂mɑ́ kɑ́ pɔ́nɛ ńcú zɛ́nɛ jʉ́ pɔ́ pɛkŋɛ pi Sɛ́ kɑ lɔknɛ Zẅikŋɛ yɛ́ ŋ́ɡɛ pɛkŋɛ ɡẅɛɛ tú-yúu nǔu yúu mi ɑ kɑ kɑꞋnɛ nɛɡɑ́ mbɔ̌ pɛkŋɛ, pɛkŋɛ ɡúu pɛn ḿbɔ́ tsɛt tʉ́m pɛkŋɛ ńcú pɔ pɔ́Ꞌɔ, ḿbɔ́ ńzẅíꞋlɛ lɛ́Ꞌ yi Sɛ́ ɡʉ ńdɔk wɛkŋɛ ŋ́ɡɛ pʉɔ-pɛ́ ndɑꞋ ndɑꞋ, pɛkŋɛ ɡẅɛɛ mbʉʉ yi fí, ńduk ŋɡʉ̈ɔ́Ꞌ.

²⁴Pɛkŋɛ ŋkɔ̂ɔnɛ, mbɔ pɛkŋɛ kɑ luk, lɑ́ pɛkŋɛ pɛ́t kɛ́ jʉ́ɔ yúu tsʉʉ nɛ́ mík. Pɛkŋɛ zɛɛ ńdɔk mík ńjʉ́ɔ yúu mi pɛkŋɛ kɑ pɔ́ ńzẅíꞋlɛ, pɛkŋɛ pɔɔ pɛn ńzẅíꞋlɛ pɔ́, mbíꞋŋɡɔ ɛ́ lɑ́Ꞌmɔ́ ḿbɔ́ mbɔ̌ pɛkŋɛ. Mbɔ wɔ̌ zɛɛ ńnɑ́ŋ ḿbɔ́ ńzẅíꞋlɛ yúu mi ɑ sɛ́ ńjʉ́ɔ?

²⁵Tɛ pɑ́Ꞌ pɛkŋɛ sɛ́ ńzẅíꞋlɛ yúu mi pɛkŋɛ kɑ pɔ́ ńjʉ́ɔ pɔ́ lɑ́, pɛkŋɛ lɔk sʉk ńniitɛ ńzẅíꞋlɛ.

²⁶NɛzẅíꞋlɛ ɛ̂wɑ́ pɛn ḿbɔ́ pɔ ndʉ́ŋndʉŋ pɑ́Ꞌ Zẅikŋɛ-Sɛ́ tɔ́nɛ ńcẅɛ́lɛ wɛkŋɛ ẅí pɛkŋɛ kɑ́ɑ kɑ́ɑnɛ lɑ́. Pɛkŋɛ pɔɔ jí nɛcɛꞋlɛ Sɛ́ nǔu ntɛ́ yi ɛ́ sɛ́ ḿbíkŋɛ pɔ́, Zẅikŋɛ-Sɛ́ cɛꞋlɛ Sɛ́ nǔu tú yɛkŋɛ, wɛ nɛpúꞋ mbɔ́ mbɔ̌ Sɛ́ lɛɛ yúu mi ḿbɔ́ pɛkŋɛ cú mbɔ̌ Sɛ́.

²⁷Sɛ́ jí yúu mi ɛ́ tsɛt tʉ́m-pʉɔmɛsɔŋ, ɑ jí yúu mi Zẅikŋɛ yɛ́ sɛ́ ńcú, Zẅikŋɛ-Sɛ́ zɛɛ ḿbúꞋ mbɔ́ mbɔ̌ Sɛ́ nǔu tú-pʉɔ-Sɛ́ pɔ nǔu ntɛ́ yi Sɛ́ sɛ́ ŋ́kɔŋ.

²⁸Pɛkŋɛ pɛn ḿbɔ́ ńjí ŋɡɔ mɛnu mi ɛ́ ɡɛnɛ pʉɔ pi pɔ́p sɛ́ ŋ́kɔŋ Sɛ́, Sɛ́ ɡɛ mîmɑ́ mɛnu, ŋ́ɡɛ pɔ nu sʉ́Ꞌnɛ nǔu pɔ́p, pɔ́p ẅi ɑ kɑ tsɔ́Ꞌnɛ nǔu ntɛ́ yi ɑ kɑ zɑ́Ꞌnɛ njí ŋ́kwɑŋɛ.

²⁹MbíꞋŋɡɔ pʉɔ pi Sɛ́ kɑ zɑ́Ꞌnɛ njí ńtsɔ́Ꞌ wɔ́p, ɑ kɑ pɛn ńzɑ́Ꞌ njí ńzɑ́p ŋɡɔ mɔ́yúu ɡʉ ńdɑ́Ꞌ ḿbɔ́ ŋ́kúpmɛ nǔu pɔ́p kúpmɛ́nɛ, tɛ pɔ́p fí Mɔ́ɔ nɛ. Ɛ́ lɛɛ pɔ́Ꞌɔ, Mɔ́ɔ nɛ pɔ́ wɛ ndʉ́m nǔu nɔɔ-pɔ́ɔpɛ́mɑ́ pɛ́ pi pɔ́p zɑ́ɑ zɑ́ɑnɛ.

³⁰Pʉɔ pi Sɛ́ kɑ zɑ́Ꞌnɛ njí ńtsɔ́Ꞌ wɔ́p, ɑ lɛɛ tɛ ḿbɛn ɛ́fúŋ pɔ wɔ́p, ɛ́fúŋ wɔ́p pɔ́Ꞌɔ, ḿbɛn ńtsʉ́Ꞌ ńdíŋɛ wɔ́p pɔ́p pɔ́ pɔ ndʉ́ŋndʉŋ mbi yɛ́, ɛ́ pɔɔ kuꞋ pɔ ndɑꞋ pɔ́Ꞌɔ pɔ́, ɑ kɑ pɛn ŋ́ɡɑ́ nɛɡúꞋ mbɔ̌ pɔ́p.

³¹Mbɔ pɛkŋɛ pɛn ŋ́kẅiꞋ kʉ̈ɔ́ nǔu nu yi pɛkŋɛ cúnɛ lɑɑ? Pɑ́Ꞌ Sɛ́ lɑɑ ḿbɔ́ nǔu yɛkŋɛ ɡúŋ, mbɔ wɔ̌ pɛn ŋ́kuꞋ nǔu pɛkŋɛ?

³²Jʉ́ ẅi ɑ ŋkɑɑ pɑ́ɑ kwɑꞋ Mɔ́ɔ nɛ nɛjʉ́ɔ ŋɡʉ̈ɔ́Ꞌ pɔ́, jʉ́ ẅi ɑ kɑ ɡɛnɛ pɛ́ jẅí wɛ́ mbíꞋ wɛkŋɛ pɛ́tsʉʉ, ɛ́ ɡʉ ŋ́ɡɛ pɑ́Ꞌ lɑ́ ɑ pɔɔ pɛn ŋ́ɡɑ́ pɔ fuꞋ níinɛ yɛkŋɛ ńdɔk pɔ jʉ́ mɔ́ɔ nɛ ŋ́ɡɑ́ mɛcɔ́ mɛyúu tsʉʉ mbɔ̌ pɛkŋɛ pɔ́ ɔɔ?

³³Mbɔ wɔ̌ fɛn pʉɔ pi Sɛ́ kɑ zɑ́Ꞌnɛ yɔ́p ntsɑŋ? Ŋɡɑŋ kɑ pɔ́ ɡú pɔ́, mbíꞋŋɡɔ Sɛ́ kɑ lɔknɛ wɔ́p ŋ́ɡɛ pʉɔ pi ɑ tsʉ́Ꞌ ńdíŋɛ wɔ́p pɔ́p pɔ́ pɔ ndʉ́ŋndʉŋ mbi yɛ́,

³⁴mbɔ wɔ̌ kuꞋ nɛcú ŋɡɔ ntsɑŋ jʉ́nɛ wɔ́p? Ŋɡɑŋ kɑ pɔ́ ɡú pɔ́, mbíꞋŋɡɔ Yɛ́su Kɛlístɔ kɑ pfú nǔu tú yɔ́p, mbɔɔ ɡɔ́ŋ pɔ́Ꞌɔ pɔ́, ɑ kɑ zẅíimɛ nǔu nɛvú. A nɑ́ŋ nǔu ɡúŋ-pɔ́-Sɛ́ yi tʉʉ, ḿbɔ́ ḿbúꞋ mbɔ́ mbɔ̌ wɛ́ nǔu tú yɛkŋɛ.

³⁵Tɛ yɛcɔ́ yúu ɡú yi mbɔ ɛ́ fyɑk wɛkŋɛ pɛ Kɛlístɔ tɛ ɑ pɔɔ pɛn ŋ́kɔŋ wɛkŋɛ pɔ́ ɔɔ? Ŋɡʉ̈ɔ́Ꞌ ɔ́ɔ? NɛpúꞋ mbʉʉ ɔ́ɔ? Pɛ́ nɛkʉ́ʉnɛ wɛkŋɛ ɔ́ɔ? Nji ɔ́ɔ? Púŋ ɔ́ɔ? Yúu mi ɛ́ vukŋɛ́nɛ wɛkŋɛ ɔ́ɔ? Kɛ pɔ nɛvú?

³⁶Ɛ́ lɔk ḿbɔ́ yúu mi pɛ́ kɑ ŋwɑꞋnɛ́nɛ tsɛt ŋwɑꞋnɛ-Sɛ́ ŋɡɔ: «Lɛ́Ꞌ tsʉʉ nɛvú sɛ́ ńnʉk wɛk nʉknɛ mbíꞋ wú. Pɛ́ pɔ́ ńdíŋɛ wɛ́k pɑ́Ꞌ mɛnjinjɔ mi pɛ́ ɡʉnɛ nɛ ɡwɑt lɑ́».

³⁷Lɑ́ ɛ́ kɛ́ ŋ́ɡʉ nǔu yúu ɛ̂pɑ́ tsʉʉ, pɛkŋɛ pɔ́ pɛtɑ́mɛtʉʉ, pɑlɛɛ nǔu mîmɑ́ mɛyúu ńdúꞋnɛ pɔ́ pʉɔ pi pɔ́p kɑ kɔŋnɛ wɛkŋɛ.

³⁸N zɛɛ ḿbɔ́ ńtsuŋ ńjí ŋɡɔ, yɛcɔ́ yúu mi mbɔ ɛ́ fyɑk wɛkŋɛ pɛ Sɛ́ kɑ́ pɔ́ ɡú pɔ́, tɛ pɑ́Ꞌ ɛ́ lɑɑ ḿbɔ́ pɔ nɛvú, ḿbɔ́ pɔ ŋɡʉ̈ɔ́Ꞌ yi ɛ́ nǔu luk, ńzɛɛ ḿbɔ́ pɔ pɛcʉ̈ɔ́Ꞌ-Sɛ́, ḿbɔ́ pɔ yúu mi ɛ́ sɑ́Ꞌnɛ mbí, ḿbɔ́ pɔ yɔ ŋkɑ́ mbí kɛ pɔ yi ɛ́ ɡʉ ŋ́ɡɛ lɑ ńtɔ́ ɔɔ,

³⁹ḿbɔ́ pɔ mɛtʉʉ ntɛ́ nɛ́ ntɛ́ mi ɛ́ ndǔmbí, mi ɛ́ tʉ́, kɛ mi ɛ́ tsɛt sɛ́ ɔɔ, ḿbɔ́ pɔ yɛcɔ́ yúu ndɛꞋ yi Sɛ́ kɑ pɔ́ɔnɛ, mbɔ yɛcɔ́ yúu kɛ́ lɑ́Ꞌ ŋ́kuꞋ nɛtɑɑtɛ Sɛ́ nɛkɔŋ wɛkŋɛ pɔ́. A kɑ lɛɛ nǔu Yɛ́su Kɛlístɔ, Tsɑpʉɔ wɛkŋɛ, ńnyɛt ŋɡɔ ɑ kɔŋ wɛkŋɛ.