Read Ngomba Pʉɔ-Lɔ́mɑ 9 Bible Online

Pʉɔ-Lɔ́mɑ 9 - Ngomba bible

Pʉɔ-Lɔ́mɑ 9

¹Nu yi ŋ ɡʉ ńcú lɑɑ, ɛ́ nɛ́nẅín. Pɑ́Ꞌ ŋ kɑ lɑt mɔ́ mbʉʉ nǔu Kɛlístɔ lɑ́, ŋ kɑ́ pɔ́ ŋ́ɡʉ ɛ́sẅíi cɔtnu pɔ́. Zẅikŋɛ Lɛ́ɛnɛ́nɛ sɛ́ ŋ́ɡɛ tʉ́m yɑ́ɑ sẅíi wɑ́ɑ ŋɡɔ nu yi mɔ ńcú ɛ́ nɛ́nẅín.

²Yîyɑ́ nu ɛ́ ŋɡɔ n nɑ́ŋ kwɑꞋ nɛ́ nɛmʉk, ḿbɛn ḿbɔ́ ńzúꞋ kɛ́kɑ́ŋ tʉ́m mɔ ŋkɑ́ tsʉʉ mbi pɔ́ɔpɛ́mɑ́ pɑ́ɑ pɑyúdɑ.

³Pɛkŋɛ pɛpɔ́p tɑ́Ꞌ njẅɛt. Ɛ́ kɑ pɔ́ yi mbɔ sɛ̂ndúŋ pɔ́ ɡú nɛpɔ́ yi Sɛ́ ɡʉ ḿbɑꞋnɛ wɑ́ɑ pɛk Kɛlístɔ pɛn ɛ́fɑkŋɛ, tɛ ɛ́ pɔ́ yi pɔ́ɔpɛ́mɑ́ pɑ́ɑ pɑyúdɑ ɡʉ ńdɛɛ nǔu ńjí ŋu ẅí Kɛlístɔ jʉ́, mbɔ ɛ́ lɑɑ ḿbɔ́ m bɔɔ lʉꞋ.

⁴Pɔ́p Pɑíslɑyɛ̂l. Mbɔ Sɛ́ kɑ kɑŋ wɔ́p ńdɔk wɔ́p ŋ́ɡɛ pɔ́ɔ pɛ́, ńnyɛt wɔ́p nɛ́ nɛɡúꞋ wɛ, ŋ́ɡɛ pɔ́p pɛpɔ́p ɡwɑt kɑɑ, ɑ ɡɑ́ nɛpʉ́ʉ nɛ́ mbɔ̌ pɔ́p, ɛ́sẅíi wɔ́p nɛ́ ntɛ́ yi pɔ́p ɡʉ ńdɔk ŋ́ɡúꞋlɛ wɛ́, ŋ́kɑꞋ mɛnu mbɔ̌ pɔ́p tɛ ɛ́ zɑ́ɑ zɑ́ɑnɛ.

⁵Pɛ́ mɑ̂ɑŋɡɑpnjẅɛt pɔ́p kɑ cẅɛt nǔu njẅɛt-Ábɛlɛhɑ̂m. Kɛlístɔ ẅi ɑ Sɛ́, kɑ cẅɛt yɛ́ nǔu yîyɑ́ njẅɛt, ŋkɑ́ yi pɛ́ kɑ pínɛ wɛ́ ɑ pɔ́ ŋumɛsɔŋ. A lɛɛ mbɑ kʉ̈ɔ́ lɑ́. Mbɔ́tnɛ pɔ́ nǔu wɛ́ mɛŋɡuꞋ mɛŋɡuꞋ. Ɛ́ pɔ́Ꞌɔ.

⁶Pɔ́p zɛɛ ḿbɔ́ ḿmuŋɛ Kɛlístɔ, lɑ́ mbɔ m bɔɔ cú ŋɡɔ nu yi Sɛ́ kɑ kɑꞋnɛ mbɔ̌ Pɑíslɑyɛ̂l kɑ́ kɛ́ ńcẅɛt nu pɔ́ pɔ́. Ɛ́ mbíꞋŋɡɔ ɛ́ zɛɛ ŋ́ɡɔ́ ḿbɔ́, pʉɔ pi pɔ́p nǔu njẅɛt-Pɑíslɑyɛ̂l, nɛlʉ́m kɑ́ pɔ́ kwɑꞋ pʉɔ-Pɑíslɑyɛ̂l pɔ́,

⁷ḿbɛn ḿbɔ́ mbɔ pɛ́ pɔɔ cú ŋɡɔ pɔ́p njẅɛt-Ábɛlɛhɑ̂m pɛ́Ꞌnɛ ńdɔk ḿbɔ́ kwɑꞋ pʉɔ-Ábɛlɛhɑ̂m pɔ́. MbíꞋŋɡɔ Sɛ́ kɑ cú mbɔ̌ Ábɛlɛhɑ̂m ŋɡɔ: «Pʉɔ pi pɛ́ ɡʉ ńdɑ́Ꞌ ɛ́fúŋ ŋɡɔ njẅɛt yu, pɔ́p pɔ́ pɔ pi pɔ́p ɡʉ ńdɑ́Ꞌ ḿbɔ́ pí-Ɛ́sɑk».

⁸Yɔ nu lɔk ńcú ŋɡɔ: Pɔ́ɔ pi ŋu mbɛ́ɛnɛ pɔ́p mɑŋɡɛ́ kɔŋ kɔŋnɛ ḿbí, kɑ́ pɔ́ pɔ́ɔ-Sɛ́ pɔ́. Pʉɔ pi pɛ́ kɑ pínɛ wɔ́p nǔu pɑ́Ꞌ Sɛ́ kɑ kɑꞋnɛ lɔknɛ ḿbɔ́ pɔ́ɔ-Sɛ́.

⁹Pʉʉ kẅíitɛ pɑ́Ꞌ Sɛ́ kɑ kɑꞋnɛ mbɔ̌ Ábɛlɛhɑ̂m ŋɡɔ: «Ŋ ɡʉ ńdɑ́Ꞌ ḿbɛn ŋ́ɡɔ́ ńtɔ́ ntí ŋkɔ̂ɔnɛ ŋɡuꞋlɑɑ, nzwɛ́ wu Sɑ̌lɑ ɡẅɛɛ mɔ́ɔ mbɛ́ɛnɛ».

¹⁰Yɛcɔ́ fʉꞋ pɛn ḿbɔ́ ɡú, mbɔ Lɛbɛ́kɑ pɑ́Ꞌ pɔ́p mɑ̂ɑŋɡɑpnjẅɛt wɛkŋɛ Ɛ́sɑk kɑ pínɛ mɛfɑ́k mbɛ́ɛnɛ yɛ́pɑ́.

¹¹Sɛ́ kɑ cú mbɔ̌ Lɛbɛ́kɑ ŋɡɔ, nduŋmbi mɔ́ɔ ɡʉ ŋ́ɡɛ ɛ́fɑꞋ mbɔ̌ wɛ nzʉʉ. Sɛ́ kɑ pɔ́ ńcú pɑ́Ꞌnɛ, mɑ́ wɔ́p pɛ́t pɔ́ shǔutɛ nǔu pɔ́p, mbɔ ɑ ŋ́kɑɑ pí wɔ́p lɑ pɔ́p jí nu sʉ́Ꞌnɛ kɛ yi kɛpɔŋ ɔɔ. Sɛ́ kɑ ɡɛ pɑ́Ꞌnɛ nɛlɔk ńnyɛt ŋɡɔ ɑ nɑ́ŋ ḿbɔ́ ŋ́ɡɛ pɔ yúu mi jʉ́ Sɛ́ sɛ́ ŋ́kɔŋ. A pɔ́ ŋ́ɡʉ tsɛtsɛt pʉɔ ńtsɔ́Ꞌ ŋu wɛ, mbɔɔ ɛ́fú pɔ́ nǔu nu sʉ́Ꞌnɛ yi ŋɡɑŋ ɡɛnɛ pɔ́.

¹³Ɛ́ lɔk ḿbuutɛ nǔu nu yi pɛ́ kɑ ŋwɑꞋnɛ́nɛ tsɛt ŋwɑꞋnɛ-Sɛ́ ŋɡɔ: «Ŋ kɔŋ Yɑkɔ̂p, ḿbɑꞋnɛ Ɛsɑẅi»

¹⁴Ɛ́ lɔk pɔ́Ꞌɔ, ńcú ŋɡɔ kʉ̈ɔ́? Ŋɡɔ Sɛ́ kɑ́ pɔ́ ndʉ́ŋndʉŋ pɔ́ kíi. Ŋɡɑ́ŋ ɛ́ kɑ́ pɔ́ pɔ́Ꞌɔ pɔ́.

¹⁵MbíꞋŋɡɔ Sɛ́ kɑ cú mbɔ̌ Mɔ̌sɛ̂ɛ ŋɡɔ: «Jʉ́ Sɛ́ ŋ́ɡɛ ńtsɑ́ɑ mɛjʉ́ŋ-ŋu ẅí ɑ jʉ́ɔnɛ ŋɡɔ ɑ ńtsɑ́ɑ, ŋ́ɡɛ nu sʉ́Ꞌnɛ nǔu ŋu ẅí ɑ jʉ́ɔnɛ ŋɡɔ ɑ ŋ́ɡɛ».

¹⁶Pɛkŋɛ lɔk ńjʉ́ɔ ŋɡɔ Sɛ́ ɡɔ́ ńtsɔ́Ꞌ ŋu mbɔɔ fú pɔ nǔu pɑ́Ꞌ ŋɡɑŋ kɔŋnɛ pɔ́, ŋ́kɛ́ mbɔɔ fú nǔu pɑ́Ꞌ ŋɡɑŋ sɑ́Ꞌnɛ tʉʉ ŋ́ɡɛ yɛcɔ́ yúu pɔ́, ɛ́ fú pɔ nǔu pɑ́Ꞌ jʉ́ Sɛ́ tsɑ́ɑnɛ mɛjʉ́ŋ-ŋɡɑŋ.

¹⁷Ɛ́ tsɛt ŋwɑꞋnɛ-Sɛ́, mbɔ pɛ́ kɑ zɛɛ ŋ́ŋwɑꞋnɛ ŋɡɔ: Sɛ́ cú mbɔ̌ fɔɔ Fɑlɑhɔŋ ŋɡɔ: Ŋ kɑ lɔk wú ŋ́ɡɛ fɔɔ nɛpɔ́ yi ŋ ɡʉ ńnyɛt wú nɛ́ yúu, pʉɔ fú nǔu ńjʉ́ɔ pɑ́Ꞌ n tɛnnɛ pɔ́Ꞌɔ, lɑ́ pɛ́ ɡɔ́ɔ ńjí lík yɑ́ɑ zʉꞋ tsʉʉ ndǔ tsɛ́tsɑ́Ꞌ.

¹⁸Ɛ́ lɔk pɔ́Ꞌɔ, ḿbɔ́ ŋɡɔ Sɛ́ ɡɛ ŋu ẅi ɑ jʉ́ɔnɛ ŋɡɔ ŋɡɑŋ ɡʉ ńtʉʉ tú mbɔ̌ wɛ́, ńtsɑ́ɑ mɛjʉ́ŋ ŋu ẅi jʉ́ Sɛ́ jʉ́ɔnɛ ŋɡɔ ɑ ɡʉ ńtsɑ́ɑ mɛjʉ́ŋ-ŋɡɑŋ.

¹⁹Líkcɔ́ ŋu zúꞋ pɑ́Ꞌɑ tɛ ḿbíkŋɛ wɑ́ɑ ŋɡɔ ɛ́ lɑɑ ḿbɔ́ pɔ́Ꞌɔ, Sɛ́ pɛn ŋ́kɑkŋɛ ŋu nǔu nu mɛlɑ́Ꞌ kʉ̈ɔ́, mbíꞋŋɡɔ ŋu kɛ́ kuꞋ nɛɡɛ yúu kɛ́ pɔ́ yi jʉ́ Sɛ́ kɑ zɑ́pnɛ ŋɡɔ ŋɡɑŋ ŋ́ɡɛ pɔ́ ɔɔ?

²⁰Gu ŋumɛsɔŋ, ɔ lɑɑ ḿbíkŋɛ pɔ́Ꞌɔ, mbɔ ɔ wɔ̌ tɛ Sɛ́ cú nu ɔ pɑ́Ꞌ? Mbɔ tsɑ́Ꞌ píkŋɛ mbɔ́ɔtsɑ́Ꞌ ŋɡɔ, ɔ kɑ pɔ́ɔ wɑ́ɑ nǔu yɔ ntɛ́ pɑ́Ꞌnɛ mbíꞋ kʉ̈ɔ́ ɔɔ?

²¹Mbɔ́ɔtsɑ́Ꞌ, pɛ́ɛ tsɑ́Ꞌ ńdɔk ḿbɔ́ɔ yúu nǔu ntɛ́ yi ɑ tsɑ́ɑnɛ. A lɔk pɔ tɑ́Ꞌ ntɛ́ tsɑ́Ꞌ ḿbɔ́ɔ tsɑ́Ꞌ yi ndɛn nǔu, ḿbɛn ńdɔk pɔ yîyɑ́ ḿbɔ́ɔ yi ndɛn kuꞋ kuꞋnɛ.

²²Ɛ́ ndʉ́ŋndʉŋ pɑ́Ꞌ Sɛ́ ŋ́ɡɛ nǔu pʉɔmɛsɔŋ. A kɑ kɔŋ nɛnyɛt ŋɡɔ lɔ́ŋ wɛ sɛ́ ńzɑ́ŋ nǔu mɛnu mi pʉɔmɛsɔŋ ɡɛnɛ, pɛ́ fú nǔu ńjʉ́ɔ pɑ́Ꞌ ɑ tɛnnɛ pɔ́Ꞌɔ. Lɑ́, mbɔ ɑ kɑ ɡʉ nǔu pʉɔ pi, ɑ kɑ pɔ́ ŋ́ɡʉ ńzɑ́ŋ lɔ́ŋ nǔu pɔ́p, ŋ́kɛ́ ɛ́sʉk sʉknɛ ńzẅíꞋlɛ. Mbɔ ɛ́ kɑ ɡɔ́ ḿbɔ́, ḿbɔ́ pɔ́p kuꞋ pɑ́Ꞌ ɑ ɡʉ ḿbík wɔ́p píknɛ.

²³Lɑ́ Sɛ́ kɑ pɔ́ ḿbɛn ŋ́kɔŋ nɛnyɛt ndɛn fuꞋ yi ɛ́ tsɛt nɛɡúꞋ wɛ, ḿbɔ́ yi ɑ ŋ́ɡɑ́ mbɔ̌ pʉɔ pi ɑ tsɑ́ɑnɛ mɛjʉ́ŋ mɔ́p, pʉɔ pi ɑ kɑ lɑ́Ꞌnɛ ńzɑ́Ꞌ njí ńniitɛ wɔ́p ńtík, nɛɡẅɛɛ nɛɡúꞋ wɛ ẅîwɑ́.

²⁴Pîpɑ́ pʉɔ lɔk ḿbɔ́ pɔ wɛkŋɛ wɔ, pɛkŋɛ pi ɑ tsɔ́Ꞌnɛ tsɛtsɛt pɑyúdɑ mbɑ tsɛtsɛt pʉɔ pi pɔ́p kɑ́ pɔ́ pɑyúdɑ pɔ́.

²⁵Ɛ́ pɔ́ kwɑꞋ yúu mi ɑ kɑ lɑ́Ꞌnɛ ńcú tsɛt ŋwɑꞋnɛ-Ɔzɛɛ ŋɡɔ: Pʉɔ pi pɔ́p ŋkɑɑ pɔ́ pʉɔ pɑ́ɑ pɔ́, ŋ ɡʉ ŋ́ɡɛ ɛ́fúŋ wɔ́p ŋɡɔ pʉɔ pɑ́ɑ. Pʉɔ-lɑ́Ꞌ pi ŋ kɑ́ pɔ́ ńnyɛt ŋɡɔ ŋ kɔŋ wɔ́p pɔ́ ŋ ɡʉ ŋ́ɡɛ ɛ́fúŋ wɔ́p ŋɡɔ pʉɔ pi ŋ kɔŋnɛ wɔ́p tɛꞋ.

²⁶Ɛ́ pɔ́ pɔ́Ꞌɔ, zʉꞋ yi pɔ́p kɑ tʉ́ʉnɛ zúꞋu pɛ́ cú mbɔ̌ pɔ́p ŋɡɔ pɔ́p kɑ́ pɔ́ pʉɔ pɑ́ɑ pɔ́, pɔ́p ŋ́ɡɛ ńtʉ́ʉ zúꞋu, pɛ́ cú mbɔ̌ pɔ́p ŋɡɔ: Pʉʉ pɔ́ɔ-Sɛ́ ẅi ɑ ntʉʉ.

²⁷Ŋɡɛ́mndʉ̈ɔ́Ꞌ-Sɛ́ Ɛsɑ̌yɑ kɑ lɑ́Ꞌ ńzɑ́Ꞌ njí ńcú yɛ́ ŋɡɔ: pɔ́ɔ-Íslɑyɛ̂l kɑ lɑɑ ńzɛɛ ńzɑ́ɑ tɛ ḿbɔ́ pɔ pɑ́Ꞌ sɑŋsɑ́ŋ yi ɛ́ mbʉʉ ŋki kɛ́ nɛpɑt lɑ́, mbɔ mbɔ́ntɑ́Ꞌ ɡʉnɛ ńdɑ́Ꞌ ŋ́ɡẅɛɛ luk.

²⁸MbíꞋŋɡɔ Tsɑpʉɔ ɡʉ ŋ́ɡɛ fɛ́Ꞌnɛ ŋ́ɡɛ yúu mi ɑ kɑ kɑꞋnɛ nɛɡɛ ndǔ tsɛ́tsɑ́Ꞌ.

²⁹Ɛsɑ̌yɑ kɑ pɛn ńzɑ́Ꞌ njí ńcú ŋɡɔ: «Tsɑpʉɔ ẅi ɑ sɑ́Ꞌnɛ yúu tsʉʉ ndǔmbí kɑ pɔ́ pɛ́Ꞌnɛ mbɔɔ nɑ́ yɛcɔ́ mbɔ́ntɑ́Ꞌ nǔu njẅɛt yɛkŋɛ mbɔ̌ pɛkŋɛ pɔ́, mbɔ pɛkŋɛ ńtsʉ́Ꞌ pɑ́Ꞌ tʉ́sɔŋ-Sɔdɔ̂m kɛ pɔ pɑ́Ꞌ yɛ́ ɡɔmɔ̂ɔ».

³⁰Pɛkŋɛ fú nǔu yɔ nu ńjʉ́ɔ ŋɡɔ kʉ̈ɔ́? Pɛkŋɛ jʉ́ɔ ŋɡɔ tɛ mbɑ pɑ́Ꞌ pʉɔ pi pɔ́p kɑ́ pɔ́ pɑyúdɑ pɔ́ ŋkɑɑ ŋ́kɛ́ ḿbɔ́ ńdɔɔ shʉ́ nɛpɔ́ pʉɔ pi pɔ́p ndʉ́ŋndʉŋ mbi Sɛ́ pɔ́, shʉ́ kɑ cẅɛt mbɔ̌ pɔ́p. Ɛ́ pɔ́ pɑ́Ꞌ pɔ́p kɑ zɑ́pnɛ tʉ́m yɔ́p nǔu Kɛlístɔ, Sɛ́ tsʉ́Ꞌ ńdíŋɛ wɔ́p pɔ́p pɔ́ pɔ ndʉ́ŋndʉŋ mbi yɛ́,

³¹ŋ́kɛ́ ŋ́ɡʉ nǔu Pɑíslɑyɛ̂l pi pɔ́p kɑ pɔ́ ńdɔɔ nɛfú pɔ nǔu nɛkúꞋlɛ nɛpʉ́ʉ-Mɔ̌sɛ̂ɛ ḿbɔ́ pʉɔ pi pɔ́p ndʉ́ŋndʉŋ mbi Sɛ́, mbɔ pɔ́p ŋkɑɑ kuꞋ, wɔ́p sɛ̂ndúŋ pɔ́p mɔ́p ncẅɛtnɛ ndɑ́ nɛpʉ́ʉ ŋkɑɑ kɛ́ ḿbuutɛ pɔ́.

³²Pɔ́p ŋkɑɑ kuꞋ pɔ́ mɛlɑ́Ꞌ kʉ̈ɔ́? Ɛ́ kɑ pɔ́ mbíꞋŋɡɔ pɔ́p ŋ́kɑɑ ḿbɔ́ ŋ́kwɑŋɛ ŋɡɔ pɔ́p ɡʉ ńzɑ́p tʉ́m yɔ́p nǔu Sɛ́ lɑ jʉ́ ɡɛnɛ pɔ́p pɔ́ ndʉ́ŋndʉŋ mbi yɛ́ pɔ́, pɔ́p kɑ pɔ́ ńcú pɔ ŋɡɔ pɔ́p ɡʉ ŋ́ɡɔ́ ḿbɔ́ ndʉ́ŋndʉŋ mbi Sɛ́, ńdɛɛ pɔ nǔu mɛfɑꞋ mɔ́p. Pɔ́p ɡɛ pɔ́Ꞌɔ, ŋ́ɡɔ́ɔ ŋ́kɛ́ ńtɛ́m ku yɔ́p nǔu ŋɡɔꞋ yi pɛ́ kɔɔtɛ́nɛ nǔu ḿvu sɛ́.

³³ŊɡɔꞋ yi pɛ́ kɑ ŋwɑꞋnɛ́nɛ yúu nǔu tsɛt ŋwɑꞋnɛ-Sɛ́ ŋɡɔ: Sɛ́ cú ŋɡɔ: Mɔ ńnɔŋ tɑ́Ꞌ ŋɡɔꞋ tʉ́sɔŋ-Siyɔŋ, Ɛ́ pɔ́ yí pɛ́ ɡʉ ŋ́kɔɔtɛ nǔu. Ɛ́ mɑ́mɑ́ ŋɡɔꞋ yí ɛ́ ɡʉ ŋ́ɡɛ pɛ́ vu. Lɑ́ ŋu ẅí ɑ ɡʉ ńzɑ́p tʉ́m yɛ́ nǔu wɛ́, sʉ́ʉ kɛ́ lɑ́Ꞌ ŋ́kɔ́ wɛ́ pɔ́.