Read Ngomba 1 Kɔlɛ̂ŋtɛ 10 Bible Online

1 Kɔlɛ̂ŋtɛ 10 - Ngomba bible

1 Kɔlɛ̂ŋtɛ 10

¹Pɔ́ɔpɛ́mɑ́ pɑ́ɑ, mɔ sɛ́ ḿbɔɔ ŋ́kɔŋ ŋɡɔ pʉʉ likŋɛ nu nǔu yúu mi ɛ́ kɑ ɡɛnɛ pɛtɑ́t pɛkŋɛ ŋkɑ́ yi pɔ́p pɛ́ Mɔ̌sɛ̂ɛ kɑ pɔ́ ńnɛn pɔ́, pɔ́p pɛ́tsʉʉ kɑ jʉ́ɔ mɛlɑ́ɑ-Sɛ́ nɛjɔ́ŋ pɔ́p. Pɔ́p pɛ́tsʉʉ kɑ lɛɛ tsɛt ŋki kɛ́ nɛpɑt,

²ńdɔk pɔ́Ꞌɔ, ńcẅɛ́ɛ ŋki, ńtsʉ́Ꞌ pʉɔ-Mɔ̌sɛ̂ɛ.

³Pɔ́p pɛ́tsʉʉ kɑ tɛmtɛ ńjʉ́ tɑ́Ꞌ tú-yúupɛ́jʉ́ yi ɛ́ kɑ pɔ́ ɛ́fú mbɔ̌ Sɛ́.

⁴Mbɑ pɑ́Ꞌ pɔ́p kɑ pɛnnɛ ńtɛmtɛ ńnɔ́ ŋki ẅí ɛ́ pɛnnɛ ɛ́fú mbɔ̌ Sɛ́ lɑ́. Pɔ́p kɑ pɔ́ ńnɔ́ ẅîwɑ́ ŋki, ɛ́ pɔ́ ɛ́fú tsɛt mɑ́mɑ́ ŋɡɔꞋ yi Sɛ́ kɑ ɡɛnɛ ŋɡɔ ɛ́ pɔ́ nzʉʉ pɔ́p. Yîyɑ́ mɑ́mɑ́ ŋɡɔꞋ kɑ pɔ́ pɔ́Ꞌɔ, ńdɔk ḿbɔ́ Kɛlístɔ.

⁵Pɔ́p kɑ jʉ́ɔ mbɑ mɔnɛ mɛnu lɑ nɛzɑ́ɑ pʉɔ tsɛtsɛt pɔ́p kɛ mbɔɔ ɡɛ yúu mi ɛ́ pɔŋnɛ Sɛ́ pɔ́. Ɛ́ yúu mi ɛ́ kɑ ɡɛnɛ pɔ́p vutɛ kɔ̂ŋtɛt ḿpfútɛ.

⁶Mɔnɛ mɛnu kɑ ɡɛ pɑ́Ꞌnɛ pɑ́Ꞌ pɛkŋɛ ɡʉ ɛ́fú nǔu ńdɑk tú yɛkŋɛ. Lɑ ɛ́ lɛɛ pɔ́Ꞌɔ, pɛkŋɛ pɔɔ tsɑ́ɑ yúu kɛpɔŋ pɑ́Ꞌ pɔ́p pɔ́.

⁷Ɛ́ pɛn ŋ́kɛ́ mbɔɔ ḿbíkŋɛ ŋɡɔ pʉʉ ɡúꞋlɛ yúu mi pɛ́ ɡúꞋlɛ́nɛ ŋɡɔ ɛ́ mɛsɛ́ pɔ́. Ɛ́ pɛn ḿbɔ́ yúu mi pɛcɔ́ pʉɔ tsɛtsɛt pɔ́p kɑ ɡɛnɛ. Ɛ́ fú nǔu pɛ́ ŋwɑꞋnɛ tsɛt ŋwɑꞋnɛ-Sɛ́ ŋɡɔ: «Lɑ́Ꞌ kɔkŋɛ ńnɑ́ŋ sɛ́, ŋ́kwɛ́t yúu, ńnɔ́ yúu. Ŋkɑ́ kuꞋ pɔ́p lɔ sɛ́ ŋ́ɡɛ mɛɡɑɑ».

⁸Pɛkŋɛ pɑ́ɑ nɛkẅɛ́ɛtɛ wɛ́tɛ́ ŋu ɔɔ pɛkŋɛ pɛ́ pɔ́p nɔɔ nɔɔnɛ. Ɛ́ pɛn ḿbɔ́ pɑ́Ꞌ pɛcɔ́ pʉɔ tsɛtsɛt pɔ́p kɑ ɡɛnɛ. Tɛ ɛ́ tʉ́ʉ tɑ́Ꞌ lɛ́Ꞌ ŋumɛsɔŋ ntsɑ́Ꞌ ntsɔ̌pɛ́tɑɑ nɛ́ mɛɡɛ́mɛ́mbɑ́ vutɛ tsɛtsɛt pɔ́p ḿpfútɛ.

⁹Pɛkŋɛ pɑ́ɑ nɛtsʉ́ʉnɛ Tsɑpʉɔ tsʉ́ʉnɛ́nɛ. Ɛ́ pɛn ḿbɔ́ pɑ́Ꞌ pɛcɔ́ pʉɔ tsɛtsɛt pɔ́p kɑ ɡɛnɛ lɑ mɛnɔ́ tsúktɛ wɔ́p pɔ́p pfútɛ.

¹⁰Kɔɔ pʉʉ sẅíitɛ nǔu Tsɑpʉɔ. Ɛ́ pɛn ḿbɔ́ pɑ́Ꞌ pɛcɔ́ pʉɔ tsɛtsɛt pɔ́p kɑ ɡɛnɛ. Ɛ́ lɛɛ pɔ́Ꞌɔ, Cʉ̈ɔꞋ-Sɛ́ ẅí ɑ jẅítɛ́nɛ pʉɔ tɔ́ ńjẅítɛ wɔ́p.

¹¹Mɔnɛ mɛnu kɑ ɡɛ wɔ́p pɑ́Ꞌɑ ńdɔk ńnyɛt fʉꞋ-nu. Pɛ́ kɑ pɛn ŋ́ŋwɑꞋnɛ pɑ́Ꞌ pɛkŋɛ pi pɛkŋɛ tsʉ́Ꞌ ḿbɔ́ pɔ nǔu ŋkɑ́ nɛlẅiklɛ lɑɑ ɡʉ ɛ́fú nǔu ńjínu.

¹²Pɛkŋɛ fú nǔu yɔ nu ńzúꞋ ŋɡɔ nɛpɛ́t ŋ́ɡʉ ɡʉnɛ ŋ́ɡɔ́ɔ ḿbɔ́ ńzɔp, kɑ́ pɔŋ[6].

¹³MɛŋkwɑꞋnɛ mi ɛ́ kɑ kúunɛ wʉ́ʉ, ɛ́ mi ɛ́ kúunɛ ŋumɛsɔŋ. Sɛ́ ẅi ɑ lɔɔ ńcú nu ḿbɛn ŋ́kúpmɛ pɔ́, ɑ kɛ́ pɛ́m ŋɡɔ ŋkwɑꞋnɛ kúu wʉ́ʉ tɛ ŋ́ɡɑ́Ꞌ mɛtʉʉ mʉ́ʉ pɔ́. ŊkwɑꞋnɛ ɡʉ ḿbɔ́ tɛ ńtɔ́, ɑ ɡɑ́ mɛtʉʉ mbɔ̌ pʉʉ nɛlɔk sʉk ḿbɛn ŋ́ɡɑ́ shʉ́ nɛlɔk ɛ́fú tsɛtú ńcẅɛt.

¹⁴Ɛ́ ɡʉ nǔu mɛnu mɔnɛ tsʉʉ, mbɑ̌ɑ pɛsúu pɑ́ɑ pɛ́ tʉʉndɛn, kɔɔ pʉʉ ɡẅɛɛ yɛcɔ́ nu nǔu nɛɡúꞋlɛ yúu mi pɛ́ ɡúꞋlɛnɛ ŋɡɔ ɛ́ mɛsɛ́.

¹⁵N cú nu pɑ́Ꞌɑ nǔu ntɛ́ yi mbɔ pɛ́ cú nu mbɔ̌ pʉɔ pi pɔ́p sɑ́ŋnɛ nu. KwɑꞋ pʉʉ líŋɛ yʉ́ʉ tɛ ńjʉ́ɔ kɛ nu yí n cúnɛ ɛ́ nɛ́nẅín ɔɔ?

¹⁶Pɛkŋɛ sɛ́ ńnɔ́ ntúꞋ-mɛluꞋ yí pɛkŋɛ ɡɑ́nɛ pɑ́Ꞌlɑ́ mbɔ̌ Sɛ́ nǔu, pɛkŋɛ kɑ́ pɔ́ ńdɔk pɔ́Ꞌɔ, ńtɛmtɛ nǔu mɛci-Kɛlístɔ pɔɔ? Mbɛlɛ̂ɛt yí pɛkŋɛ pʉ̈ɔ́Ꞌtɛ́nɛ ŋ́ɡɑp, kɑ́ pɔ́ ńtɛmtɛ wɛkŋɛ nǔu mbɑp-mbʉʉ-Kɛlístɔ pɔ́ ɔɔ?

¹⁷Pɑ́Ꞌ tɑ́Ꞌ mbɛlɛ̂ɛt wɛ́mɔ́Ꞌ pɔ́nɛ sɛ́ lɑ́, pɛkŋɛ pɛtsʉʉ tɛmtɛ ŋ́kwɛ́t yîyɑ́ tɑ́Ꞌ mbɛlɛ̂ɛt ńdɔk ńnyɛt ŋɡɔ pɛkŋɛ tɛmtɛ ḿbɔ́ pɔ tɑ́Ꞌ mbʉʉ wɛ́mɔ́Ꞌ.

¹⁸Pʉʉ líŋɛ pɑíslɑyɛ̂l lɑ ńjʉ́ɔ, ɛ́ tsɛtsɛt pɔ́p, pʉɔ pí pɔ́p lɔ ŋ́kwɛ́t yɔ́p mbɑp pɔ nǔu yúu pɔꞋ yí pɛ́ lɔknɛ ńtɔ́ mbi Sɛ́ lɑ́, pɔ́p pɛ́ Sɛ́ ẅi zʉꞋ-pɔꞋ yɛ́ lɔk pɔ́Ꞌɔ ńtɛmtɛ ḿbɔ́ tɑ́Ꞌ ŋu.

¹⁹N dɔk pɑ́Ꞌɑ ńcú ŋɡɔ kʉ̈ɔ́ nǔu mbɑp yi pɛ́ ɡɑ́nɛ nǔu yúu mi pɛ́ ɡúꞋlɛ́nɛ ŋɡɔ ɛ́ mɛsɛ́? Mbɑp ɛ̂yɑ́ zɛɛ ɛ́fɑꞋ yɛcɔ́ fɑꞋ? Mɛsɛ́ ɛ̂mɑ́ zɛɛ ḿbɔ́ ɡú?

²⁰Ŋɡɑ́ŋ! Ɛ́ ɡú pɔ́. Ŋ ɡʉ ńcú pɔ ŋɡɔ pʉɔ pi pɔ́p nɔŋnɛ pɔꞋ nɔŋ pɔ mbɔ̌ mɛzẅikŋɛ kɛpɔŋ. Pɔ́p kɑ́ pɔ́ ńnɔŋ pɔꞋ mbɔ̌ Sɛ́ pɔ́. Ŋ kɑ́ pɔ́ ŋ́kɔŋ ŋɡɔ pʉʉ pɛ́ mɛzẅikŋɛ kɛpɔŋ tɛmtɛ pɔ́[7].

²¹Mbɔ pʉʉ pɔɔ pɔ́ pʉɔ pi pʉʉ nɔ́nɛ ntúꞋ-Tsɑpʉɔ, ḿbɛn ḿbɔ́ pʉɔ pi pɔ́p nɔ́nɛ yɛ́ mɛzẅikŋɛ kɛpɔŋ pɔ́. Mbɔ pʉʉ pɔɔ pɔ́ pʉɔ pi pʉʉ jʉ́nɛ yúupɛ́jʉ́-Tsɑpʉɔ, ḿbɛn ḿbɔ́ pʉɔ pi pɔ́p jʉ́nɛ yúupɛjʉ́-mɛzẅikŋɛ kɛpɔŋ pɔ́.

²²Pɛkŋɛ lɑɑ ŋ́ɡɛ pɔ́Ꞌɔ, mbɔ pɛkŋɛ kɑ́ pɔ́ ńdɔk ńdɔɔ ŋɡɔ lɔ́ŋ-Tsɑpʉɔ zɑ́ŋ mbíꞋ wɛkŋɛ pɔ́ ɔɔ? Pɛkŋɛ tɛn ńdɛɛ wɛ́?

²³Pɛcɔ́ pʉɔ tsɛtsɛt pʉʉ, ḿbɔ́ ńcú ŋɡɔ mbɔ ŋu ɡɛ kʉ̈ɔ́ lɑ́ pɔ́ kɛ́ pɔ́k nɛpʉ́ʉ. Ɛ́ nu lɑ́, yúu tsʉʉ kɑ́ cẅɛ́lɛ́ pɔ́. Ɛ́ nu ŋɡɔ ḿbɔ́ ŋu ɡɛ mbɑ kʉ̈ɔ́ lɑ́ pɔ́ kɛ́ pɔ́k nɛpʉ́ʉ, lɑ́ yúu tsʉʉ yi pɛ́ ɡɛnɛ kɑ́ cẅɛ́lɛ́ pʉɔ nɛkẅiꞋ ńzɑ́p tʉ́m nǔu Sɛ́ pɔ́.

²⁴Kɔɔ ŋu lɔɔ pɔ yúu mi ɛ́ ɡʉ ńcẅɛ́lɛ́ pɔ túmbʉʉ yɛ́. Ŋu lɔɔ yúu mi ɛ́ ɡʉ ńcẅɛ́lɛ́ mɔ́ɔmɑ́ wɛ.

²⁵Ɛ́ ɡʉ nǔu nu-mbɑp, mbɔ pʉʉ lɑɑ ńtɔ́ mɛntɑ́ɑ ńjʉ́ɔ mbɑp pʉʉ zúu, ńtɔ́ lɑ́Ꞌ ŋ́kwɛ́t kɛ́ ɡẅɛɛ yɛcɔ́ kwɑŋɛ, kɛ́ píkŋɛ yɛcɔ́ nu.

²⁶ŊwɑꞋnɛ-Sɛ́ cú ŋɡɔ: «Ndǔmbí tɛ mbɑ mɛyúu tsʉʉ mi ɛ́ tsɛtú zɛɛ ḿbɔ́ pɔ mbɔ̌ Tsɑpʉɔ».

²⁷Ŋu ẅí ɑ kɑ́ pɔ́ ŋu-Kɛlístɔ pɔ́ lɑɑ ɛ́fúŋ wʉ́ʉ ndɑ́ yɛ́ ŋɡɔ pʉʉ pɛpɔ́p jʉ́ yúu, pʉʉ pɛ́m, pʉʉ tɔ́ zúꞋu pɛ́ ɡɑ́ mbɑ kʉ̈ɔ́lɑ́ mbɔ̌ pʉʉ ɔɔ, pʉʉ jʉ́ kɛ́ ɡẅɛɛ yɛcɔ́ kwɑŋɛ, kɛ́ píkŋɛ yɛcɔ́ nu.

²⁸Lɑ́ ḿbɔ́ yi ŋu lɑɑ ŋ́kɛ́ ńcú ŋɡɔ, mbɑp yɔ pɑ́Ꞌɑ ḿbɔ́ pfuꞋ-mbɑp yi pɛ́ ɡɑ́nɛ nǔu yúu mi pɛ́ ɡúꞋlɛ́nɛ ŋɡɔ ɛ́ mɛsɛ́ lɑ́, pʉʉ ɡɔ́ɔ ŋ́kɛ́ ńdʉꞋ nɛkwɛ́t, ńdʉꞋ mbíꞋ ŋu ẅí ɑ sẅíinɛ wʉ́ʉ nɛ́ zʉꞋ yi ɛ́ fúnɛ nɛ́ zúꞋu. Mbɔ tʉ́m yú kɛ́ zúꞋ kɛ́kɑ́ŋ tsɛtú pɔ́.

²⁹Ŋ kɑ́ pɔ́ ńcú pɑ́Ꞌɑ ŋɡɔ yú tʉ́m ɡʉnɛ ńzúꞋ kɛ́kɑ́ŋ pɔ́, n dɑꞋ pɔ yɛ́ ŋu ẅí ɑ sẅíinɛ wú. Mbɔ ɔ píkŋɛ ŋɡɔ mɛlɑ́Ꞌ kʉ̈ɔ́ ɔ ɡɛ yúu pɔ nǔu wu nɛkɔŋ, tʉ́m wɛcɔ́ ŋu ndɛꞋ pɛn ŋ́ŋɑk wɛ́ nǔu yîyɑ́ yúu?

³⁰N dɑɑ ŋ́ɡɔ́ ńjʉ́ yúupɛjʉ́, ńzɛɛ ḿbiitɛ ŋ́ɡɑ́ pɑ́Ꞌlɑ́ mbɔ̌ Sɛ́, mbɔ mɛlɑ́Ꞌ kʉ̈ɔ́ ŋu ndɛꞋ ńtɛ́m sʉ́ʉ nǔu mɔ mbíꞋ yîyɑ́ yúu lɑ mbɔ ŋ ɡɔ́ ńjʉ́, ŋ́ɡɑ́ pɑ́Ꞌlɑ́ mbɔ̌ Sɛ́?

³¹Ŋ ɡʉ ńcú yɑ́ɑ ŋɡɔ, pʉʉ lɑɑ ḿbɔ́ ńjʉ́ pɔ yúu, kɛ ḿbɔ́ ńnɔ́ pɔ mɛluꞋ ɔɔ, kɛ ḿbɔ́ ŋ́ɡɛ pɔ kʉ̈ɔ́ ɔɔ, pʉʉ ɡɛ mîmɑ́ mɛyúu tsʉʉ pɔ nǔu ntɛ́ yi pɛ́ ɡʉ ŋ́ɡúꞋlɛ Sɛ́.

³²Kɔɔ pʉʉ ɡɛ yúu mi ŋu-Yúdɑ kɛ ŋu-Ŋɡɛlɛk ɔɔ, kɛ ŋu-cúꞋlɛ-pʉɔ Sɛ́ ɔɔ, ɡʉ kɔɔtɛ nǔu ḿvu sɛ́.

³³Ɛ́ pɑ́Ꞌ mɔ sɛ́ ŋ́ɡɛ yɑ́ɑ. Mɔ sɛ́ ńdɔɔ shʉ́ nɛɡɔ́ ŋ́ɡɛ mbɑ kʉ̈ɔ́ lɑ́, ɛ́ pɔ́ yi ɛ́ ɡʉ ḿbɔŋ pʉɔtsʉʉ. Ŋ kɑ́ pɔ́ ńdɔɔ pɔ yúu mi ɛ́ ɡʉ ńcẅɛ́lɛ́ pɔ wɑ́ɑ pɔ́. N dɔɔ pɔ yúu mi ɛ́ ɡʉ ńcẅɛ́lɛ́ pʉɔ tɛ ńzɑ́ɑ, ńjí ŋɡɔ Sɛ́ ɡʉ ŋ́ɡɛ pɔ́p luk.