Read Ngomba 1 Kɔlɛ̂ŋtɛ 11 Bible Online

1 Kɔlɛ̂ŋtɛ 11 - Ngomba bible

1 Kɔlɛ̂ŋtɛ 11

¹Pʉʉ pɔ́ pʉɔ pi pʉʉ pɛ́ɛnɛ fʉꞋ nǔu mɔ, ndʉ́ŋndʉŋ pɑ́Ꞌ m bɛ́ɛnɛ fʉꞋ nǔu Kɛlístɔ.

²Ŋ ɡɑ́ mɛtʉʉ mʉ́ʉ pɑ́Ꞌ pʉʉ tʉ́ʉ nǔu mbɑ yɛ́tɛ́ nu ɔɔ, ŋ́kẅíitɛ wɑ́ɑ kẅíitɛ́nɛ lɑ́. Mbɑ pɑ́Ꞌ pʉʉ sɛ́ ńtsuŋ ŋ́kúꞋlɛ mɑt ẅi ŋ kɑ zíꞋnɛ wʉ́ʉ lɑ́.

³Ɛ́ pɔŋ lɑ́ yúu kɛ́ ḿbɛ́t ɡú yi mɔ sɛ́ ŋ́kɔŋ ŋɡɔ pʉʉ jí sʉ́Ꞌnɛ. Ŋu ẅí ɑ ɡẅɛɛnɛ ŋu mbɛ́ɛnɛ tsʉʉ ɑ Kɛlístɔ, ŋu ẅí ɑ pɛnnɛ ŋ́ɡẅɛɛ mɑŋɡɛ́ ɑ pɔ́ ŋu mbɛ́ɛnɛ, ŋu ẅí ɑ ɡẅɛɛnɛ Kɛlístɔ ɑ pɔ́ Sɛ́.

⁴Ŋu mbɛ́ɛnɛ lɑɑ ŋ́ɡɔ́ ḿbúꞋ mbɔ́ mbɔ̌ Sɛ́, kɛ ŋ́ɡɔ́ ńcẅi Ŋkʉʉ ẅí ɛ́ fúnɛ mbɔ̌ Sɛ́ ɔɔ, ńdɔk yúu ḿbɔɔ tú yɛ́, mbɔ ɑ lɔk ńcɔŋ ndɛn-Kɛlístɔ ẅí ɑ ɡẅɛɛnɛ wɛ́.

⁵Lɑ́ mɑŋɡɛ́ ẅi ɑ ɡɔ́ ḿbúꞋ mbɔ́ mbɔ̌ Sɛ́, kɛ ŋ́ɡɔ́ ńcẅi Ŋkʉʉ ẅí ɛ́ fúnɛ mbɔ̌ Sɛ́ ɔɔ, mbɔɔ lɔk yúu ḿbɔɔ tú yɛ́ pɔ́, ɑ lɔk pɔ́Ꞌɔ, ńcɔŋ ndwɛn ndúu mɛ ẅi ɑ ɡẅɛɛnɛ wɛ́[8], ɑ tʉ́ʉ ŋkɑ́ yîyɑ́ pɔ́Ꞌɔ ḿbɔ́ mɑŋɡɛ́ ẅi pɛ́ ziinɛ tú yɛ́ lɑ́.

⁶Mɑŋɡɛ́ ẅi ɑ kɑ́ lɔk yúu ḿbɔɔ tú yɛ́ pɔ́, ɑ zii. Lɑ́ pɑꞋ ɛ́ mbɔ̌ mɑŋɡɛ́ ḿbɔ́ nu sʉ́ʉ pɑ́Ꞌ ḿbɔ́ tú yɛ́ pɔ́ yi ziinɛ kɛ yɛ́ kɔ́ɔnɛ ɔɔ lɑ́, ɑ pɔɔ tú yɛ́.

⁷Ɛ́ ɡʉ nǔu ŋu mbɛ́ɛnɛ, ɑ pɔɔ ɡẅɛɛ nɛɡɔ́ ńcɛꞋlɛ Sɛ́, ḿbɔɔ tú yɛ́ pɔ́, mbíꞋŋɡɔ ɑ fí Sɛ́. Pɛ́ líŋɛ wɛ́ ńjʉ́ɔ nɛɡúꞋ-Sɛ́. Lɑ́ ŋ́ɡʉ nǔu mɑŋɡɛ́, mbɔ pɛ́ líŋɛ wɛ́ ńjʉ́ɔ pɔ nɛɡúꞋ-ŋu mbɛ́ɛnɛ,

⁸mbíꞋŋɡɔ Sɛ́ kɑ fú pɔ nǔu ŋu mbɛ́ɛnɛ ḿbɔ́ɔ mɑŋɡɛ́. A ŋ́kɑɑ fú pɔ nǔu mɑŋɡɛ́ ḿbɔ́ɔ ŋu mbɛ́ɛnɛ pɔ́.

⁹Sɛ́ ŋkɑɑ pɛn ŋ́kɛ́ ḿbɔ́ɔ ŋu mbɛ́ɛnɛ mbíꞋ mɑŋɡɛ́ pɔ́. A kɑ pɔ́ɔ pɔ mɑŋɡɛ́ mbíꞋ ŋu mbɛ́ɛnɛ.

¹⁰Yúu mi ɛ́ ɡɛnɛ mɑŋɡɛ́ ɡẅɛɛ nɛpɔɔ tú yɛ́, ńdɔk ńnyɛt ŋɡɔ ɑ ɡɑ́ mbʉʉ sɛ́ mbi ndúu mɛ. Pɔ́Ꞌɔ, mbíꞋ pɛcʉ̈ɔ́Ꞌ-Sɛ́[9].

¹¹Ɛ́ kɛ́ ḿbɔ́ pɔ́Ꞌɔ lɑ́, ŋ́ɡʉ nǔu pɑ́Ꞌ pɛkŋɛ lɑtnɛ mbʉʉ nǔu Tsɑpʉɔ lɑ́, mbɔ mɑŋɡɛ́ pɔɔ cú ŋɡɔ pɔ́p ŋu mbɛ́ɛnɛ kɛ́ nu pɔ́. Ŋu mbɛ́ɛnɛ kɛ́ mbɔɔ cú ŋɡɔ pɔ́p mɑŋɡɛ́ kɛ́ nu pɔ́.

¹²Tɛ mbɑ pɑ́Ꞌ Sɛ́ kɑ fú pɔ nǔu ŋu mbɛ́ɛnɛ ḿbɔ́ɔ mɑŋɡɛ́ lɑ́, mɑŋɡɛ́ pínɛ ŋu mbɛ́ɛnɛ. Ŋɡɔŋ nu tsʉʉ pɛn ɛ́fú pɔ mbɔ̌ Sɛ́.

¹³Pʉʉ sɑ́ŋ yʉ́ʉ lɑ́ ńzúꞋ. Tɛ ɛ́ pɛ́Ꞌnɛ ḿbɔ́ ḿbɔŋ ŋɡɔ mɑŋɡɛ́ cɛꞋlɛ Sɛ́ tsɛt cúꞋlɛ-pʉɔ-Kɛlístɔ kɛ́ pɔɔ tú yɛ́?

¹⁴KwɑꞋ píimbí kɑ́ pɔ́ ńzíꞋ wʉ́ʉ ŋɡɔ ɛ́ kɔ́sʉ́ʉ mbɔ̌ ŋu mbɛ́ɛnɛ nɛtsɑ́p mɛnuk-tú pɔ́ ɔɔ?

¹⁵Lɑ́ ɛ́ ḿbɔ́ nɛɡúꞋ mbɔ̌ mɑŋɡɛ́ nɛtsɑ́p. Mbɑ pɔ́Ꞌɔ, mɛnuk-tú mbɔ̌ mɑŋɡɛ́ ḿbɔ́ nɛlɔk ḿbɔɔ tú yɛ́.

¹⁶Ŋu lɑɑ ŋ́kɛ́ ńjʉ́ɔ ŋɡɔ ɑ ɡʉ ńzɔŋ nu ŋ́ɡɑ́ nǔu yɔ nu, mbɔ pɛk kɑ́ ɡẅɛɛ mɑt wɛ ndɛꞋ pɔ́. MɛcúꞋlɛ-pʉɔ-Sɛ́ kɛ́ mbɔɔ ɡẅɛɛ mɑt wɛ ndɛꞋ pɔ́.

¹⁷Yɛcɔ́ nu pɛn ḿbɔ́ Sɛ́ yi ŋ ɡʉ ńcú nu nǔu ŋkɔ̂ɔnɛ. Ɛ́ pɔ́ yi pʉʉ sɛ́ ŋ́ɡɛ ɛ́ pɔɔ ḿbɔŋ wɑ́ɑ pɔ́. Pʉʉ sɛ́ ŋ́kúu mɛcúꞋlɛ mʉ́ʉ, ɛ́ tsʉ́Ꞌ yi nu sʉ́Ꞌnɛ lɑ́Ꞌnɛ ḿbɔ́ ŋ́ɡʉ ńcẅɛt zúꞋu lɑ́, yi kɛpɔŋ cẅɛtnɛ.

¹⁸Ɛ́ ɡʉ nǔu mɛnu mi ɛ́ sɛ́, nduŋmbi nu ɛ́ pɑ́Ꞌ ŋ kɑ zúꞋnɛ ŋɡɔ pʉʉ ńnɑ́ŋ sɛ́ tsɛt cúꞋlɛ yʉ́ʉ, ɛ́fɑkŋɛ mɛnɔɔ mɛnɔɔ, m bɔ́ ńjʉ́ɔ ŋɡɔ ɛ́ ŋ́ɡɛ pɑ́Ꞌ lɑ́, ɛ́ pɔ́ pɔ nu.

¹⁹Ɛ́ nɛ́nẅín ŋɡɔ pʉʉ pɔ́ tɛ fɑkŋɛ mɛnɔɔ mɛnɔɔ, pɛ́ fú nǔu ńjʉ́ɔ pʉɔ pi pɔ́p kɑ́ kɔŋ fɑkŋɛ pɔ́.

²⁰N dɔk ńjʉ́ɔ ŋɡɔ pʉʉ kúu tsɛt cúꞋlɛ, ŋ́ɡɔ́ jʉ́ yúupɛ́jʉ́-Tsɑpʉɔ, kwɑŋɛ yʉ́ʉ pɔɔ tʉ́ʉ nǔu wɛ́ pɔ́.

²¹N cú pɑ́Ꞌɑ, mbíꞋŋɡɔ ŋkɑ́-nɛjʉ́ yúu pɔ́ tɛ ŋ́kuꞋ, mbɑ wɔ̌ lɑ́ ɡwɛtnɛ ńnɑ́ŋ sɛ́, ńjʉ́ yɛ́ yúu mi ɑ lɑ́Ꞌnɛ ńdɔk ńtɔ́. Lɑ́ pɛ́ jʉ́ɔ pɛcɔ́ pʉɔ ɡɔ́ ńnɑ́ŋ nji, mbɔ pɛcɔ́ pʉɔ nɔ́ tɛ ḿbɑ́.[10]

²²Pʉʉ kɑ́ ɡẅɛɛ mɛndɑ́ mʉ́ʉ nɛnɑ́ŋ zúꞋu ŋ́kwɛ́t ḿbɛn ńnɔ́ pɔ́ kii? Kɛ pʉʉ kɔŋ pɔ nɛlɔk sʉ́ʉ ŋ́kɔ́ pʉɔ pi pɔ́p kɑ́ ɡẅɛɛ yúupɛ́jʉ́ pɔ́, ńdɔk pɔ́Ꞌɔ ŋ́ɡwɑ́k cúꞋlɛ-pʉɔ-Kɛlístɔ? Pʉʉ lɔɔ ŋɡɔ n cú mbɔ̌ pʉʉ ŋɡɔ kʉ̈ɔ́? Ŋɡɔ ŋ ɡɑ́ pɑ́Ꞌlɑ́ mbɔ̌ pʉʉ? Ŋɡɑ́ŋ! KwɑꞋ nɛ́nẅín, m bɔ́ mbɔɔ ɡɑ́ pɑ́Ꞌlɑ́ mbɔ̌ pʉʉ pɔ́.

²³Ŋ kɑ kɛ́ ńzíꞋ wʉ́ʉ nɛ́ yúu mi ŋ kɑ zúꞋnɛ mbɔ̌ Tsɑpʉɔ, ɛ́ pɔ́ ŋɡɔ: «Ɛ́ kɑ pɔ́ nɛtúꞋ ẅi pɛ́ kɑ fɛnnɛ Tsɑpʉɔ Yɛ́su, ɑ́ pɛ́ɛ mbɛlɛ̂ɛt,

²⁴ŋ́ɡɑ́ pɑ́Ꞌlɑ́ mbɔ̌ Sɛ́, ḿbʉ̈ɔ́Ꞌ ńcú ŋɡɔ: Yɔ mbɑp-mbʉʉ yɑɑ yi pɛ́ ŋ́ɡɑ́ nǔu tú yʉ́ʉ. Pʉʉ tsʉ́Ꞌ ḿbɔ́ ŋ́ɡɛ pɑ́Ꞌɑ ńdɔk ŋ́kẅíitɛ wɑ́ɑ».

²⁵Pɔ́p jʉ́ yúu tɛ ḿbɔ́tnɛ ńnɑ́ŋ, ɑ pɛn ńtíi ntúꞋ ńcú ŋɡɔ: «NtúꞋ yɔ pɑ́Ꞌɑ ḿbɔ́ kɑɑ fí yi Sɛ́ lɔknɛ mɛci mɑ́ɑ ŋ́ɡwɑt. Pʉʉ tsʉ́Ꞌ ḿbɔ́ ŋ́ɡɛ pɑ́Ꞌɑ, ńdɔk ŋ́kẅíitɛ wɑ́ɑ ŋkɑ́ tsʉʉ yi pʉʉ ɡʉ ŋ́ɡɛ ḿbɔ́ ńnɔ́.»

²⁶Pʉʉ jí ŋɡɔ ŋɡɔŋ ŋkɑ́ tsʉʉ yi pʉʉ kwɛ́tnɛ yɔ mbɛlɛ̂ɛt, ḿbɛn ńnɔ́ yɔ ntúꞋ, pʉʉ lɔk pɔ́Ꞌɔ ɛ́sɑ́Ꞌ ŋɡɔ Tsɑpʉɔ kɑ́ pfú, ŋ́kɛ́ ńdɑ́Ꞌ ɛ́sɑ́Ꞌ pɔ pɔ́Ꞌɔ, tɛ ńdɑ́Ꞌ kúu lɛ́Ꞌ yi ɑ ɡʉ ńdɑ́Ꞌ ḿbɛn ńtɔ́.

²⁷Ɛ́ yúu mi ɛ́ ɡɛnɛ pɛ́ cú ŋɡɔ ŋu lɑɑ ŋ́kwɛ́t mbɛlɛ̂ɛt-Tsɑpʉɔ, kɛ ńnɔ́ pɔ ntúꞋ yɛ́ nɛ́ ŋɡwɑ́k ɔɔ, mbɔ ŋɡɑŋ fɑɑnɛ nu nǔu mbɑp-mbʉʉ, mbɑ nǔu mɛci-Tsɑpʉɔ.

²⁸Pɔ́Ꞌɔ lɑ́, mbɑ wɔ̌ lɑ́ tsɑꞋ mbʉʉ yɛ́. Lɑ́ mbɔɔ ŋ́kɛ́ ŋ́kwɛ́t yɔ mbɛlɛ̂ɛt ḿbɛn ńnɔ́ yɔ ntúꞋ,

²⁹mbíꞋŋɡɔ ŋu lɑɑ ŋ́kwɛ́t mbɛlɛ̂ɛt, ńnɔ́ ntúꞋ, kɛ́ pɔ́ ŋ́kẅíitɛ yúu mi ɛ́ lɔknɛ ńcú, mbɔ ŋɡɑŋ lɔk ɛ́fúŋ ntsɑŋ ńníꞋ nǔu wɛ́.

³⁰Ɛ́ yúu mi ɛ́ ɡɛnɛ lɑ́ pʉɔ tɛ ńzɑ́ɑ pɔ́ tsɛtsɛt pʉʉ, ḿbɔ́ ɡɑŋɡɔɔ. Pɛcɔ́ pɔ́ pɛkʉ́ɔ, mbɔ pɛcɔ́ kɑ pfutɛ mɔ́.

³¹Pɛkŋɛ kɑ pɔ́ pɛ́Ꞌnɛ ḿbiitɛ ńtsɑꞋ mbʉʉ yɛkŋɛ, mbɔ ɛ́ lɑɑ ḿbɔ́ pɛkŋɛ lʉ́ɔꞋlɛ tɛ mbɔɔ vu ntsɑŋ mbi Sɛ́ pɔ́.

³²Lɑ́ Tsɑpʉɔ ŋ́ŋɑk wɛkŋɛ, ńdɔk ńtík wɛkŋɛ, ḿbɔ́k pɑ́Ꞌ mbɔ pɛ́ lɑ́Ꞌ ńtɛmtɛ wɛkŋɛ pɛ́ pʉɔ-ndǔmbí ŋ́ŋɑk.

³³Pɔ́Ꞌɔ lɑ́, mbɑ̌ɑ pɔ́ɔpɛ́mɑ́ pɑ́ɑ, pʉʉ lɑɑ ḿbɔ́ ŋkɑ́ yi pʉʉ cúꞋlɛ́nɛ nɛjʉ́ yúu, pʉʉ pyɛ́p pɛcɔ́ pʉɔ.

³⁴Nji lɑɑ ḿbɔ́ ńzɑ́ŋ ŋu, ɑ ɡɔ́ ɛ́fú njɛ́Ꞌ yɛ́, ḿbiitɛ ńjʉ́ yúu, nɛpɔ́ yi pʉʉ kɛ́ ɡʉ zʉꞋ yi pʉʉ cúꞋlɛ́nɛ zúꞋu, ɛ́fúŋ pɔ ntsɑŋ yi Sɛ́ ɡʉ ŋ́ŋɑk wʉ́ʉ ŋɑknɛ pɔ́. Ɛ́ ɡʉ nǔu mɛcɔ́ mɛnu, mbɔ mɔ ŋ́ɡɛ ńtɔ́ lɑ niitɛ.