Read Ngomba 1 Kɔlɛ̂ŋtɛ 2 Bible Online

1 Kɔlɛ̂ŋtɛ 2 - Ngomba bible

1 Kɔlɛ̂ŋtɛ 2

¹Pɔ́ɔpɛ́mɑ́ pɑ́ɑ, ɛ́ kɑ pɔ́ ŋkɑ́ yi ŋ kɑ tɔ́nɛ lɑ́Ꞌ pʉʉ nɛcú nu-Sɛ́, ɛ́ pɔ́ nu yi ɛ́ kɑ zɛɛnɛ ḿbɔ́ yi lʉɔmɛ́nɛ, ŋ ɡɔ́ ńcú mbɔ̌ pʉʉ, ŋ́kɛ́ ḿbɔɔ lɔk yɛcɔ́ sẅiŋɛ yi ɛ́ tɛn tɛnnɛ ńcú pɔ́, ŋ́kɛ́ mbɔɔ lɔk pɔ nɛnyɛt wʉ́ʉ nɛ́ yɛcɔ́ yúu mi n jínɛ tɛꞋ ńdɔk ńcú pɔ́.

²MbíꞋŋɡɔ ŋ kɑ zɑ́p ŋɡɔ ŋ kɑ́ pɔ́ ŋ́ɡʉ ńjí yɛcɔ́ nu ndɛꞋ tsɛtsɛt pʉʉ tɛ ɛ́ pɔɔ pɔ́ pɔ nu-Yɛ́su Kɛlístɔ pɔ́, Yɛ́su Kɛlístɔ ẅí pɛ́ kɑ kẅiinɛ wɛ́ nǔu tʉ́ mbɑ́ŋtɛ pɑ́ŋtɛ́nɛ pɔ́.

³Ŋ kɑ tʉ́ʉ tsɛtsɛt pʉʉ, ńzúꞋ ḿbɔ́t pɔ́tnɛ, ńzúꞋ ḿbɔ́k pɔ́knɛ tɛ ḿbɔ́ ŋ́ɡwɛt.

⁴Sẅiŋɛ yi ɛ́ kɑ pɔ́ ńcẅɛt ntsu mɔ, mbɑ nu-Kɛlístɔ yi ŋ kɑ pɔ́ ɛ́sɑ́Ꞌ mbɔ̌ pʉʉ, kɑ́ pɔ́ ńnyɛt jínu-ŋumɛsɔŋ yi pɛ́ lɔknɛ ŋ́ɡɛ ŋu pɛ́m nu pɔ́. Mɛtʉʉ-Zẅikŋɛ-Sɛ́ kɑ pɔ́ ŋ́ɡɛ pʉɔ jʉ́ɔ ŋɡɔ ɛ́ nu nɛ́nẅín.

⁵Pɔ́Ꞌɔ nɛpɔ́ yi wʉ́ʉ nɛzɑ́p tʉ́m nǔu Sɛ́ kɛ́ jʉ́ɔꞋnɛ nǔu jínu-pʉɔmɛsɔŋ pɔ́. Ɛ́ ɡʉ ńjʉ́ɔꞋnɛ pɔ nǔu mɛtʉʉ-Sɛ́.

⁶Pɛk pɛn ŋ́kɛ́ ŋ́ɡʉ nǔu pʉɔ-Kɛlístɔ pi pɔ́p tsʉklɛnɛ nǔu nɛzɑ́p tʉ́m nǔu Sɛ́, ńzíꞋ wɔ́p nɛ́ jínu. Lɑ́ yîyɑ́ jínu kɛ́ mbɔɔ jínu yɔ mbí pɔ́, ŋ́kɛ́ mbɔɔ jínu yi ɛ́ fúnɛ mbɔ̌ yúu kɛpɔŋ yi ɛ́ sɑ́Ꞌnɛ yɔ mbí, ḿbɔ́ mi pɛ́ ɡʉ ŋ́ɡɛ ḿbík pɔ́.

⁷Ɛ́ ɡʉ nǔu pɛk, mbɔ pɛk lɛꞋlɛ yɛ́k pɔ jínu-Sɛ́ yi ɛ́ ŋkʉꞋnɛ nu yi ɛ́ kɑ pɔ́ yi lʉɔmɛ́nɛ, mbɔ Sɛ́ kɑ lɑ́Ꞌ mɔ́ ńniitɛ ńzɑ́p tɛ mbí pɛ́t kɛ́ pɔ́ ɡú, nɛpɔ́ yi ɑ ɡʉ ńdɑ́Ꞌ ńdɔk ŋ́ɡɑ́ nɛɡúꞋ wɛkŋɛ.

⁸Sɑ̌ɑ tɑ́Ꞌ nǔu yúu kɛpɔŋ yi ɛ́ sɑ́Ꞌnɛ yɔ mbí ŋkɑɑ jí yîyɑ́ jínu pɔ́. Pɔ́p kɑ pɔ́ pɛ́Ꞌnɛ ńjí yîyɑ́ jínu mbɔ pɔ́p ŋkɑɑ ɡɛ pɛ́ kẅii Ndɛ nǔu tʉ́ mbɑ́ŋtɛ pɑ́ŋtɛ́nɛ pɔ́, Ndɛ ẅí ɑ ɡẅɛɛnɛ nɛɡúꞋ.

⁹Pɛ́ kɑ zɛɛ ŋ́ŋwɑꞋnɛ tsɛt ŋwɑꞋnɛ-Sɛ́ ŋɡɔ: «Yúu mi ŋumɛsɔŋ kɑ́ pɔ́ ńjʉ́ɔ pɔ́ ŋ́kɛ́ ḿbɔɔ ńzúꞋ pɔ́, mbɔ ɑ kɑ́ pɔ́ ńzɛɛ ŋ́kwɑŋɛ pɔ́, Sɛ́ kɑ niitɛ́nɛ yîyɑ́ yúu ńzɑ́p. Nɛpɔ́ yi pʉɔ pi pɔ́p kɔŋnɛ wɛ́ ɡʉ ŋ́ɡɛ ńjʉ́ pii.»

¹⁰Sɛ́ kɑ pɛn ŋ́ɡɛ Zẅikŋɛ Lɛ́ɛnɛ́nɛ ɡɛ pɛkŋɛ jínɛ yîyɑ́ nu yi ɛ́ kɑ pɔ́ yɛ lʉɔmɛ́nɛ. Zẅikŋɛ Lɛ́ɛnɛ́nɛ zɛɛ ńtuŋtɛ́ nu tsʉʉ, tɛ mbɑ mɛnu mi Sɛ́ pɛ́tnɛ ŋ́ɡẅɛɛ pɔ tsɛt mvuꞋ-tʉ́m yɛ́.

¹¹Mbɔ wɔ̌ jí nu yi ŋumɛsɔŋ sɛ́ ŋ́kwɑŋɛ tʉ́m yɛ́ kɛ́ pɔ́ pɔ ŋɡɑŋ? Ɛ́ pɛn ḿbɔ́ ndʉ́ŋndʉŋ pɑ́Ꞌ wɛcɔ́ ŋu lɑɑ ḿbɔ́ ɑ pɔɔ jí nu yi Sɛ́ sɛ́ ŋ́kwɑŋɛ kɛ́ pɔ́ pɔ Zẅikŋɛ-Sɛ́ pɔ́.

¹²Ɛ́ ɡʉ nǔu pɛkŋɛ, mbɔ pɛ́ ŋkɑɑ ɡɑ́ zẅikŋɛ-ndǔmbí mbɔ̌ pɛkŋɛ pɔ́. Pɛ́ kɑ ɡɑ́ pɔ Zẅikŋɛ yi ɛ́ fúnɛ mbɔ̌ Sɛ́ mbɔ̌ pɛkŋɛ pɑ́Ꞌ ɛ́ ɡʉ ŋ́ɡɛ pɛkŋɛ jí pɔ́fɑꞋ yi Sɛ́ kɑ lɔknɛ ŋ́ɡɑ́ fuꞋ níinɛ yɛkŋɛ.

¹³Pɛkŋɛ kɑ́ pɔ́ ŋ́ɡɔ́ ńcú nu nǔu mîmɑ́ mɛyúu mi Sɛ́ kɑ ɡɑ́nɛ mbɔ̌ pɛkŋɛ ńdɔk pɔ sẅiŋɛ yi pʉɔmɛsɔŋ kɑ lɔknɛ jínu yɔ́p ńzíꞋ wɛkŋɛ pɔ́. Pɛkŋɛ lɔk pɔ sẅiŋɛ yi Zẅikŋɛ-Sɛ́ zíꞋnɛ wɛkŋɛ lɑ ńcú nu nǔu. Ɛ́ lɛɛ pɔ́Ꞌɔ, pɛkŋɛ tsʉ́Ꞌ nɛɡɔ́ ŋ́kyɛ́Ꞌtɛ nu nǔu yúu mi ɛ́ fúnɛ mbɔ̌ Zẅikŋɛ-Sɛ́, ńdɔk pɔ sẅiŋɛ yi ɛ́ fú mbɔ̌ Zẅikŋɛ-Sɛ́ lɑ ŋ́kyɛ́Ꞌtɛ[1].

¹⁴Ŋumɛsɔŋ lɑɑ ḿbɛ́t ḿbɔ́ pɔ nǔu ntɛ́ yi pɛ́ kɑ pínɛ wɛ́ ɑ pɔ́, mbɔ ɛ́ lɑɑ ḿbɔ́ ɑ pɔɔ zúꞋ yúu mi ɛ́ fúnɛ mbɔ̌ zẅikŋɛ-Sɛ́ pɔ́. Ɛ́ mbɔ̌ yɛ́ ḿbɔ́ pɔ mɛnu-pɑ́lɛ. A kɛ́ kuꞋ nɛzúꞋ nu yi ɑ cúnɛ pɔ́. MbíꞋŋɡɔ Zẅikŋɛ Lɛ́ɛnɛ́nɛ ɡɛnɛ lɑ pɛ́ zúꞋ nu yi yîyɑ́ yúu lɔknɛ ńcú.

¹⁵Ŋu ẅí Zẅikŋɛ Lɛ́ɛnɛ́nɛ nǔu wɛ́, ɑ kuꞋ nɛtɑꞋ mbɑ yɛ́tɛ́ nu lɑ́ tsʉʉ ńdíŋɛ. Lɑ́ ŋ́ɡʉ nǔu wɛ́, mbɔ ɛ́ lɑɑ ḿbɔ́ wɛcɔ́ ŋu pɔɔ yɛ́ nu líŋɛ.

¹⁶Ɛ́ lɔk ḿbuutɛ nǔu pɑ́Ꞌ ŋwɑꞋnɛ-Sɛ́ cúnɛ ŋɡɔ: «Wɔ̌ jí yúu mi Tsɑpʉɔ ndɑ́ ŋ́kwɑŋɛ? Mbɔ wɔ̌ ɡɑ́ wɛ́ nɛ́ ntík?» Lɑ́ ɛ́ kɛ́ ŋ́ɡʉ nǔu pɛkŋɛ, mbɔ Kɛlístɔ lɑɑ ḿbɔ́ ŋ́kwɑŋɛ pɔ kʉ̈ɔ́ lɑ́, mbɔ pɛkŋɛ ńjí.