Read Ngomba 1 Kɔlɛ̂ŋtɛ 3 Bible Online

1 Kɔlɛ̂ŋtɛ 3 - Ngomba bible

1 Kɔlɛ̂ŋtɛ 3

¹Pɔ́ɔpɛ́mɑ́ pɑ́ɑ, mɔ ŋ kɑɑ tsʉ́Ꞌ nɛcú nu mbɔ̌ pʉʉ, ńjʉ́ɔ ŋɡɔ ḿbɔ́ m bɔɔ cú pɑ́Ꞌ ḿbɔ́ n cú nu mbɔ̌ pʉɔ pi pɔ́p zúꞋnɛ ntsu Zẅikŋɛ-Sɛ́ pɔ́. Ŋ kɑ ńcú pɔ nǔu ntɛ́ yi m bɔ́ ńcú nu mbɔ̌ pʉɔ pi pɔ́p pɛ́t ńzúꞋ pɔ yúu mi mbʉʉ yɔ́p sɛ́ ńcú. Ŋ ɡʉ ńcú pɔ pɑ́Ꞌ ɛ́ lɑɑ ḿbɔ́ n cú nu mbɔ̌ pʉɔ pi pɔ́p nǔu nɛzɑ́p tʉ́m nǔu Kɛlístɔ, ḿbɛ́t ḿbɔ́ pɔ pɔ́ɔmbɔ́t.

²Ŋ kɑ ɡɑ́ pɔ nɛpʉ́ʉ nɔnɛ mbɔ̌ pʉʉ. Mɔ ŋ́kɑɑ ɡɑ́ yúu kwɛ́tnɛ mbɔ̌ pʉʉ pɔ́, mbíꞋŋɡɔ pʉʉ kɑ pɛ́t kɛ́ kuꞋ nɛkwɛ́t yúu. Tɛ mbɑ ŋkɔ̂ɔnɛ pʉʉ pɛ́t pɔ kɛ́ kuꞋ nɛzúꞋ nu yi ɛ́ tɛnnɛ nɛzúꞋ,

³mbíꞌŋɡɔ mbʉʉ yʉ́ʉ pɛ́t ɛ́sɑ́Ꞌ wʉ́ʉ, kɛ́ɡʉ̈ɔꞋ zɛɛ ḿbɛ́t ḿbɔ́ pɔ tsɛtsɛt pʉʉ, pʉʉ pɛ́t ńzɔŋ nu zɔŋnɛ. Mbʉʉ yʉ́ʉ kɑ́nɛ pɔ́ ńdɔk ḿbɛ́t ɛ́sɑ́Ꞌ wʉ́ʉ pɔ́ ɔɔ? Pʉʉ kɑ́ pɔ́ ńdɔk pɔ́Ꞌɔ, ḿbɛ́t ŋ́ɡɛ pɔ pɑ́Ꞌ pʉɔ ndǔmbí ɡɛnɛ pɔ́ ɔɔ?

⁴Ŋu wʉʉ nɑ́ŋ tɛ ńcú ŋɡɔ ɑ pɔ́ pɔ ŋu-Pɔ̂l, wɛcɔ́ cú ŋɡɔ ɑ yɛ́ pɔ ŋu-Apɔlɔ́s, mbɔ ɛ́ kɑ́ pɛ́t ńdɔk ḿbɔ́ pɔ sẅiŋɛ-pʉɔ-ndǔmbí pɔ́ ɔɔ?

⁵Apɔlɔ́s pɑ́Ꞌɑ ḿbɔ́ wɔ̌? Pɔ̂l pɔ́ wɔ̌? Lɑ pʉʉ cú pɔ́Ꞌɔ? Pɛknɛ́ pɔ́ pɔ pɑfɑꞋ fɑꞋ-Sɛ́ pi pʉʉ kɑ lúꞋnɛ́nɛ wɛ́k lɑ ńzɑ́p tʉ́m nǔu Yɛ́su Kɛlístɔ. Mbɑ wɔ̌ lɑ́ nǔu pɛknɛ́ ɡɛ pɔ yúu mi Tsɑpʉɔ kɑ ɡɑ́nɛ shʉ́ ŋɡɔ ɑ ɡɛ.

⁶Ŋ kɑ pi tʉ́ sɛ́, Apɔlɔ́s tswɛt ŋki nǔu. Lɑ́ Sɛ́ ɡɛ ɛ́ ɡúꞋ.

⁷Ɛ́ pɔ́ pɔ́Ꞌɔ, ŋu ẅí ɑ pinɛ tʉ́ pɔ́p ŋu ẅí ɑ tswɛtnɛ ŋki pɔɔ lɔk ḿbɔ́ yɛcɔ́ yúu pɔ́. Sɛ́ ẅí ɑ ɡɛnɛ ɛ́ ɡúꞋ ɡẅɛɛnɛ nu tsʉʉ.

⁸Ŋu ẅí ɑ pinɛ tʉ́ pɔ́p ŋu ẅí ɑ tswɛtnɛ ŋki nǔu pɔ́ pɔ ndʉ́ŋndʉŋ. Mbɑ wɔ̌ lɑ́ nǔu pɔ́p pɔ́ ŋ́ɡʉ ńcẅɛ́ɛ yɛ́ tsɔ́Ꞌ fɑꞋ ɛ́ kuꞋ nǔu fɑꞋ yi ɑ fɑꞋnɛ.

⁹MbíꞋŋɡɔ pɛk tɛmtɛ ḿbɔ́ ɛ́fɑꞋ pɔ fɑꞋ-Sɛ́. Pʉʉ pɔ́ ŋkɑ́Ꞌ-Sɛ́, ḿbɛn ḿbɔ́ ndɑ́ yi Sɛ́ sɛ́ ŋ́kút.

¹⁰Sɛ́ kɑ ɡɑ́ fuꞋ níinɛ yɑ́ɑ, mɔ nɔŋnɛ cʉ́ndɑ́ pɑ́Ꞌ ŋɡɑŋ-nɛɡwɛlɛ wɛ sʉ́Ꞌnɛ. Ŋ kɑ nɔŋnɛ cʉ́ndɑ́, wɛcɔ́ ŋu sɛ́ ńdɔk fɑꞋ ŋ́ɡʉ mbi. A sɛ́ ŋ́kút ndɑ́ ndǔ. Lɑ́ mbɑ wɔ̌ lɑ́ lɑk tú yɛ́ nǔu ntɛ́ yi ɑ lɔknɛ ŋ́kút ndɑ́ ndǔ.

¹¹Ɛ́ ɡʉ nǔu cʉ́ndɑ́, mbɔ ɛ́ ndɑ́Ꞌ mɔ́ ḿbɔ́ sɛ́. Mbɔ ŋu pɔɔ pɛn ńnɔŋ yɛcɔ́ yɛ ndɛꞋ pɔ́.

¹²Ḿbɔ́ ŋu tsʉ́Ꞌ nɛpɔ́ɔ ndɑ́ nǔu cʉ́ ɛ̂yɑ́ ńdɔk tʉ́n-ɡɔ̂l ḿbɔ́ɔ. Wɛcɔ́ ŋu lɔk tʉ́n-ŋkɑ́p ḿbɔ́ɔ. Wɛcɔ́ lɔk tʉʉndɛn mɛŋɡɔꞋ ḿbɔ́ɔ. Wɛcɔ́ ŋu lɔk yɛ́ pɔ mɛtʉ́ ŋ́kút. Wɛcɔ́ lɔk nɛɡíi zúunɛ kɛ píi ɔɔ ɛ́fɛtnɛ.

¹³Mbɔ ɛ́ kɑ pɔ́ yɛcɔ́ lɔ́Ꞌ pɔ́. FɑꞋ-mbɑ wɔ̌ lɑ́ ɡʉ ńdɑ́Ꞌ ńcẅɛt mɑ́ntɑ́ɑ. Pɛ́ ɡʉ ńdɑ́Ꞌ ńjʉ́ɔ nǔu lɛ́Ꞌ yi pɛ́ ŋɑknɛ mɛtsɑŋ. MbíꞋŋɡɔ múk ɡʉ ńdɑ́Ꞌ ńdɛɛ nǔu fɑꞋ mbɑ wɔ̌ lɑ́ tɛ pɛ́ jʉ́ɔ pɑ́Ꞌ ɛ́ zúꞋu ḿbɔ́ pɔ́Ꞌɔ.

¹⁴Yúu mi ŋu kɑ lɔknɛ ŋ́kút ndɑ́ nǔu cʉ́ndɑ́ ɛ̂yɑ́, lɑɑ ńdɑ́Ꞌ mbɔɔ shí, mbɔ ŋɡɑŋ ɡʉ ńdɑ́Ꞌ ńcẅɛ́ɛ tsɔ́ꞋfɑꞋ.

¹⁵Lɑ́ fɑꞋ-ŋu lɑɑ ŋ́kɛ́ ńdɑ́Ꞌ ɛ́shí, mbɔ ŋɡɑŋ tɑ́ŋ pɛ́, ŋ́kɛ́ ńduk luknɛ, mbɔ ɑ luk pɑ́Ꞌ ŋu ẅí ɑ tɔ́knɛ tsɛt lʉ́m-múk lɑ ńduk lɑ́.

¹⁶Pʉʉ kɑ pɔ́ ńjí ŋɡɔ pʉʉ pɑ́Ꞌɑ ḿbɔ́ ndɑ́-nɔŋpɔꞋ, Zẅikŋɛ-Sɛ́ pɔ́ tsẅɛ́ tsɛtú pɔ́ ɔɔ?

¹⁷Ŋu lɑɑ ńtɑ́ktɛ ndɑ́-nɔŋpɔꞋ, mbɔ Sɛ́ ɡʉ ŋ́ɡɛ ɛ́sɑt ŋɡɑŋ ḿmɛꞋ. MbíꞋŋɡɔ ndɑ́-nɔŋpɔꞋ pɔ́ pɔ jʉ́ zɛ́nɛ́ jʉ́. Pʉʉ pɛn ŋ́ɡẅɛɛ nɛjí ŋɡɔ ndɑ́-nɔŋpɔꞋ ɛ̂yɑ́ lɔk ḿbɔ́ pɔ wʉ́ʉ.

¹⁸Ḿbɑ́ɑ ŋu nɛfʉ́klɛ túmbʉʉ yɛ́. Ŋu lɑɑ ḿbɔ́ tsɛtsɛt pʉʉ ḿbɔ́ ŋ́kwɑŋɛ ŋɡɔ pʉɔ-ndǔmbí sɛ́ ńjʉ́ɔ ŋɡɔ ɑ jínu, ɑ zɛɛ ḿbiitɛ ɛ́shɔtnɛ ńtsʉ́Ꞌ ŋu lɑ ḿbɔ́ kwɑꞋ njínu.

¹⁹MbíꞋŋɡɔ nu yi ɛ́ tsɛt yɔ ndǔmbí ḿbɔ́ jínu, ɛ́ mbi Sɛ́ ḿbɔ́ pɔ mɛnu-pɛpɑ́lɛ. ŊwɑꞋnɛ-Sɛ́ zɛɛ ńcú ŋɡɔ: «Sɛ́ lɔk pɔ ɡwɑk-njínu ńdɔk ŋ́ɡẅɛɛ wɛ́».

²⁰ŊwɑꞋnɛ-Sɛ́ pɛn ńcú ŋɡɔ: «Tsɑpʉɔ jí kwɑŋɛ-pɑjínu. A jí ŋɡɔ ɛ́ kɑ́ kuꞋ yɛcɔ́ yúu pɔ́».

²¹Pɔ́Ꞌɔ lɑ́, kɔɔ ŋu wʉʉ lɔk pɑ́Ꞌ ɑ ŋu wɛ mɑ́kɛkɛ, ńdɔk ŋ́kɑꞋmɛ. MbíꞋŋɡɔ mbɑ kʉ̈ɔ́ lɑ́ pɔ́ pɔ yʉ́ʉ.

²²A lɑɑ ḿbɔ́ pɔ Pɔ̂l, ḿbɔ́ pɔ Apɔlɔ́s, ḿbɔ́ pɔ Kɛfɑs, ḿbɔ́ pɔ ndǔmbí, ḿbɔ́ pɔ luk kɛ pɔ nɛvú ɔɔ, ḿbɔ́ pɔ yɔ kɛm-njí kɛ yi ɛ́ pɛ́t lɑ ńtɔ́ ɔɔ, mbɔ kʉ̈ɔ́ lɑ́ pɔ́ pɔ mbɔ̌ pʉʉ.

²³Lɑ́ ɛ́ ɡʉ nǔu pʉʉ, pʉʉ pɔ́ mbɔ̌ Kɛlístɔ, Kɛlístɔ pɛn ḿbɔ́ mbɔ̌ Sɛ́.