Read Ngomba 1 Kɔlɛ̂ŋtɛ 4 Bible Online

1 Kɔlɛ̂ŋtɛ 4 - Ngomba bible

1 Kɔlɛ̂ŋtɛ 4

¹Pɔ́Ꞌɔ lɑ́, pʉʉ líŋɛ wɛ́k pɑ́Ꞌ pɑfɑꞋ fɑꞋ-Kɛlístɔ mbɑ pɑ́Ꞌ pʉɔ pi pɔ́p ɡẅɛɛnɛ nu nǔu nɛkyɛ́Ꞌtɛ nu-Sɛ́ yi ɛ́ kɑ pɔ́ yɛ lʉɔmɛ́nɛ ɛ́sẅíi pʉɔ.

²Yúu mi pɛ́ sɛ́ ńzẅíꞋlɛ mbɔ̌ pʉɔ pi pɔ́p ɡẅɛɛnɛ nu nǔu fɑꞋ, ɛ́ pɔ́ pɔ ŋɡɔ pɔ́p jí pɔ ndɑꞋ yúu mi pɛ́ píkŋɛ́nɛ ŋɡɔ pɔ́p ɡɛ.

³Ɛ́ kɛ́ ŋ́ɡʉ nǔu mɔ, mbɔ ɛ́ kɑ́ pɔ́ ŋ́ɡɑ́ɑnɛ wɑ́ɑ pɑ́Ꞌ mbɔ pʉʉ cú nu nǔu fɑꞋ yɑ́ɑ pɔ́. Kɛ pɔ pɛcɔ́ pʉɔ pɛndɛꞋ nɛnɑ́ŋ sɛ́ ńdíŋɛ nu ŋ́ɡɑ́ nǔu ɔɔ. KwɑꞋ mɔ, ḿbɔ́ m bɔɔ jí nɛsẅíi ŋu pɑ́Ꞌ fɑꞋ yɑ́ɑ pɔ́nɛ pɔ́.

⁴Ɛ́ nɛ́nẅín ŋɡɔ mbʉʉ yɑɑ kɑ́ pɔ́ ńtswɑ́ɑ wɑ́ɑ nǔu yɛcɔ́ nu pɔ́. Lɑ́ ŋ kɑ́ pɔ́ ńdɔk ńcú ŋɡɔ yɛcɔ́ lɔ́Ꞌ kɑ́ pɔ́ nǔu fɑꞋ yi mɔ ŋ́ɡɛ pɔ́ pɔ́. Tsɑpʉɔ pɔ́nɛ ŋu ẅí ɑ ɡẅɛɛnɛ nɛtɑꞋ fɑꞋ yɑ́ɑ ńtíitɛ.

⁵N dɔk pɔ́Ꞌɔ, ɛ́sẅíi wʉ́ʉ ŋɡɔ kɔɔ pʉʉ zɑ́Ꞌ njí ńcú nu nǔu fɑꞋ-ŋu kɛ́ pɔ́ yi ŋkɑ́ kuꞋ. Kɛ́ pɔ́ yi Tsɑpʉɔ tɔ́ mɔ́. Jʉ́ ŋ́ɡɛnɛ ŋ́kyɛꞋ mbɑ kʉ̈ɔ́ lɑ́ yi ɛ́ tsɛt nzɛ́nzʉ́ʉ. A ŋ́ɡɛ ŋ́ɡɛ pɛ́ jʉ́ɔ mɛŋkwɑŋɛ mi ɛ́ tsɛt mɛtʉ́m-pʉɔ. Pɔ́Ꞌɔ lɑ́, Sɛ́ kɛ́ ŋ́ɡɑ́ tsɔ́ꞋfɑꞋ mbɑ wɔ̌ lɑ́ nǔu ntɛ́ yi ɛ́ sɛ́ ḿbíkŋɛ ŋɡɔ ŋɡɑŋ ɡẅɛɛ.

⁶Pɔ́ɔpɛ́mɑ́ pɑ́ɑ, mɔ sɛ́ ńcú nu ḿbɛn ńdɛꞋlɛ pɑ́Ꞌ nu yi n cúnɛ nǔu mɔ ḿbɔ́, mbɑ pɑ́Ꞌ ɛ́ nǔu Apɔlɔ́s ḿbɔ́ pɔ́Ꞌɔ. N dɛꞋlɛ pɔ́Ꞌɔ, pɔ nɛlɔk ńzíꞋ wʉ́ʉ nɛ́ yúu. Ŋ kɔŋ ŋɡɔ pʉʉ fú nǔu pɛk ńzíꞋ yúu mi sɑknɛkɛt yi ɛ́ cúnɛ ŋɡɔ: «Ḿbɑ́ɑ ŋu nɛɡɛ yúu tɛ ńdɛɛ yi pɛ́ kɑ ŋwɑꞋnɛ́nɛ, ńdɔk ɛ́sẅíi wʉ́ʉ ŋɡɔ ŋu wʉʉ kɑ́ ɡẅɛɛ nɛlɔk pɑ́Ꞌ ɑ nzʉʉ wɛcɔ́ ŋu ŋ́ŋɑ́Ꞌtɛ mbi wɛcɔ́ pɔ́.»

⁷Kʉ̈ɔ́ zɛɛnɛ ŋ́ɡɛ ɔ kwɑŋɛ ŋɡɔ ɔ lɛɛ pɛcɔ́ pʉɔ? Ɔ ɡẅɛɛ kʉ̈ɔ́ tɛ ɛ́ pɔɔ pɔ́ pɔ yi Sɛ́ kɑ ɡɑ́nɛ mbɔ̌ ɡu pɔ́ ɔɔ? Ɛ́ lɑɑ ḿbɔ́ yi Sɛ́ kɑ ɡɑ́ mbɔ̌ ɡu ɡɑ́nɛ, mbɔ ɔ pɛn ńdɔk ŋ́ŋɑ́Ꞌtɛ pɔ pɑ́Ꞌ ŋkɑ́ yi Sɛ́ ŋkɑɑ ɡɑ́ mbɔ̌ ɡu ɡɑ́nɛ pɔ́ mɛlɑ́Ꞌ kʉ̈ɔ́?

⁸Pʉʉ tsʉ́Ꞌ ńjúk ńcú ŋɡɔ pʉʉ kɑ kɛ́mɔ́ ndɑ́Ꞌ ŋ́ɡẅɛɛ yúu tsʉʉ yi ɛ́ kɑ pɔ́ ńjɑ́k mbɔ̌ pʉʉ. Pʉʉ kɑ tsʉ́Ꞌ mɔ́ ɡɑŋyúu pʉ́ɔ? Pʉʉ tsʉ́Ꞌ mɔ́ pɛfɔɔ ńdɛɛ wɛ́k ɔ́ɔ? Lɑ́ ɛ́ lɑ́Ꞌ ḿbɔ́ pɛ́Ꞌnɛ pʉʉ pɔ́ pɛfɔɔ kwɑꞋ nɛ́nẅín, mbɔ ɛ́ pɔŋ wɑ́ɑ tɛꞋ, mbɔ ɑ pɛkŋɛ.

⁹Mɔ sɛ́ ńjʉ́ɔ yɑ́ɑ ŋɡɔ Sɛ́ kɑ ɡʉ nǔu pɛk ɡɑŋntúu ŋ́ɡɑ́ yɛ́k zʉꞋ ɛ́ pɔ́ pɔ ndẅiknzʉʉ. Pɑ́Ꞌ pʉɔ pinɛ pɛ́ zɑ́Ꞌnɛ ntsɑŋ yɔ́p tɛ pɛ́ lɔk wɔ́p ŋ́kɔ́Ꞌ nɛ́ zɑ́n pɑ́Ꞌ pɛ́ ɡʉ ńjẅítɛ wɔ́p. Ŋɡɔŋ nɛ́ ŋɡɔŋ pɔ́ ńjʉ́ɔ, pʉɔmɛsɔŋ mbɑ pɛcʉ̈ɔ́Ꞌ-Sɛ́ pɔ́ ńjʉ́ɔ yɔ́p.

¹⁰Nu-Kɛlístɔ ɡɛ pɛk tsʉ́Ꞌ pɛpɑ́lɛ́. Lɑ́ ŋ́kɛ́ ŋ́ɡʉ nǔu pʉʉ, mbɔ pʉʉ kɑ kɛ́mɔ́ ńdɛɛ nǔu Kɛlístɔ ńjí nu. Pɛk pɔ́ pɛpɔ́t pʉɔ. Pʉʉ ɡẅɛɛ mɛtʉʉ. Pɛ́ ɡɛ mɛkuꞋ mʉ́ʉ, ḿbɛn ńtɔ́ nǔu pɛk ŋ́ɡwɑ́k wɛ́k ɡwɑ́knɛ.

¹¹Nji júk nɛzɑ́ŋ wɛ́k. Gɑ́k yɛ́k júk ɛ́shí. Ndẅí mɑꞋnɛ pɔɔ ɡú pɔ́. Pɛ́ júk pɔ nɛtswɑ́ɑ wɛ́k. Wɛcɔ́ nɛpɔ́ ẅi mbɔ pɛk pɔ́tnɛ ńnɑ́ŋ tɑ́Ꞌ zʉꞋ pɔɔ ɡú pɔ́.

¹²KwɑꞋ pɛk lɔk mbɔ́ mɛ́k ɛ́fɑꞋ fɑꞋ tɛ ńziꞋnɛ lɑ ŋ́ɡẅɛɛ yɛ́k yúu. Pɛ́ zɔɔtɛ wɛ́k lɑ́ pɛk tsɑ́ɑ pɔ nu sʉ́Ꞌnɛ nǔu pʉɔ. Pɛ́ kʉʉnɛ wɛ́k pɛk pɔɔ zɔŋ.

¹³Pɛ́ ɛ́sẅíŋɛ kɛpɔŋ nǔu lík yɛ́k, pɛk lɔk pɔ sẅiŋɛ sʉ́Ꞌnɛ ḿbʉ̈ɔt. Tɛ ŋ́kúu ŋkɔ̂ɔnɛ yi pɛ́ líŋɛ́nɛ wɛ́k ńjʉ́ɔ pɛk pɔ́ pɔ pɑ́Ꞌ mɛkyɑŋɛ mí ɛ́ ndǔmbí, ḿbɔ́ pɔ pɑ́Ꞌ mɛfʉ̈ɔplɛ níinɛ mi ɛ́ tsɛtsɛt pʉɔmɛsɔŋ lɑ́.

¹⁴Ŋ kɑ́ pɔ́ ŋwɑꞋnɛ yɔ nu ńdɔk ńtɛ́m pɔ sʉ́ʉ nǔu pʉʉ pɔ́, n dɔk ńzíꞋ wʉ́ʉ pɔ nɛ́ yúu, mbíꞋŋɡɔ pʉʉ mbɔ́ŋkʉ̈ɔ́ pɑ́ɑ pi ŋ kɔŋnɛ wʉ́ʉ tɛꞋ.

¹⁵Pʉʉ lɑɑ ńzɛɛ ŋ́ɡẅɛɛ pʉɔ pi pɔ́p zíꞋnɛ wʉ́ʉ nɛ́ nu-Kɛlístɔ tɛ ɛ́ zɛɛ ḿbɔ́ pɔ yúu ntsɑ́Ꞌ nɛɡɛ́m, ḿbɔ́ pɛtɑ́t pʉ́ʉ kɑ zɑ́ɑ zɑ́ɑnɛ. Mɔ pɔ́nɛ tɑ́t wʉ́ʉ mbíꞋŋɡɔ mɔ tɔ́nɛ ńcẅi Ŋkʉʉ Sʉ́Ꞌnɛ mbɔ̌ pʉʉ, lɑ́ pʉʉ lɑt mbʉʉ yʉʉ nǔu Yɛ́su Kɛlístɔ.

¹⁶Pɔ́Ꞌɔ lɑ́, n dɔk ńcú mbɔ̌ pʉʉ ŋɡɔ, pʉʉ pɛ́ɛ fʉꞋ nǔu mɔ.

¹⁷Ŋ ɡɔ́ ńtúu Timɔtɛ̂ɛ mbɔ̌ pʉʉ mbíꞋ pɔ pɔ́Ꞌɔ. A nǔu nu-Kɛlístɔ ḿbɔ́ mɔ́ɔ wɑ́ɑ wi ŋ kɔŋnɛ wɛ́ tɛꞋ. A jí pɔ ndɑꞋ nu-Tsɑpʉɔ. A ŋ́ɡɛ ńtɔ́ ŋ́kẅíitɛ wʉ́ʉ nɛ́ yúu mi n zíꞋnɛ pʉɔ nǔu nɛnɛn nzʉʉ Kɛlístɔ pɔ kwɑꞋ pɑ́Ꞌ mɔ sɛ́ ńtɔ́ mbɑ ɡɔ́ lɑ́ tsɛt mɛcúꞋlɛ-pʉɔ-Kɛlístɔ ńzíꞋ lɑ́.

¹⁸Pɛcɔ́ pʉɔ tsɛtsɛt pʉʉ kɑ kwɑŋɛ ŋɡɔ ŋ kɛ́ lɑ́Ꞌ ḿbɛn ńtɔ́ tɛ ńjʉ́ɔ wʉ́ʉ pɔ́, ŋ́kwɑŋɛ pɔ́Ꞌɔ, ńzɛ nɛŋɑ́Ꞌlɛ.

¹⁹Lɑ́ Tsɑpʉɔ lɑɑ ḿbɛ́m, mbɔ mɔ ŋ́ɡɛ fɛ́Ꞌnɛ ńtɔ́ ńjʉ́ɔ wʉ́ʉ. Ńtɔ́ pɔ́Ꞌɔ, mbɔɔ líŋɛ nu pɔ ndɑꞋ nǔu sẅiŋɛ yi pɔ́p niitɛ́nɛ ńcú mbɔ̌ lɑ́Ꞌ pɔ́, m bɛn ńjí yúu mi pîpɑ́ ɡɑŋ-ŋɑ́Ꞌlɛ kuꞋ nɛɡɛ.

²⁰MbíꞋŋɡɔ nu-nɛfɔɔ-Sɛ́, ɛ́ kɑ́ pɔ́ nɛniitɛ sẅiŋɛ pɔ́, mɛtʉʉ-Zẅikŋɛ Lɛ́ɛnɛ́nɛ fɑꞋnɛ fɑꞋ.

²¹Pʉʉ ɡʉ nǔu mɛnu mɔnɛ mɛmbɑ́ ŋ́kɑŋ yʉ́ʉ. Pʉʉ tsɑ́ɑ ŋɡɔ ŋ ɡɔ́ ńtɔ́ tsɛtsɛt pʉʉ ŋ́ɡẅɛɛ pɔ ŋɡwɑɑ kɛ ŋ ɡɔ ńtɔ́ tʉ́m wɑ́ɑ pɔ́ ḿbɔŋ pɔŋnɛ, m bɔ́ ŋ́kɔŋ wʉ́ʉ kɔŋnɛ?